1. Erikwamana na 1 Petero 3:8, busana naki thukatsemera eribya omwa bandu abatsomene eriyowa n’engebe yethu?

THUKATSEMERA eribya ahali abandu abatsomene eriyowa n’engebe yethu. Bakalengesaya eriyihira omwa bisandu byethu, eriminya amalengekania n’eriyowa lyethu. Bakasangwa balhangira ebya thukayithagha n’eriha obuwathikya​—obundi nibya isithuli thwanabusaba. Thukasima abandu abakakanganaya ku ‘bakathulhumirirawa.’ *​—Soma 1 Petero 3:8, NW.

2. Busana naki thukayithagha erikulha-kulhania omubere w’erilhumirirwa abandi?

² Ng’Abakristayo, ithwe bosi thwanzire erighanya abandi, kutse eribalhumirirwa. Aliwe omo kwenene sikyolho mughulhu wosi. Busana naki? Eky’erimbere, sithuhikene. (Abar. 3:23) Neryo thutholere ithwarwanisya omubere w’obubuthiranwa ow’eriyilengekaniako ithwe basa. Kandi, abandi omw’ithwe thwanganalemwa erilhumirirwa abandi busana n’emikulire yethu kutse ebyathubyako kera. Eky’erighunzerera, amalengekania w’abathuthimbireko angana thuhambako. Omwa biro by’enyuma-nyuma bino, abangyi sibali tsomana eriyowa ly’abandi. Ni bandu “abakayanza.” (2 Tim. 3:1, 2) Ni kyahi ekyanga thuwathikya erikinda ebikathukakiraya eritsomana eriyowa ly’abandi?

3. (a) Thwang’ongera thuthi erilhumirirwa abandi? (b) Omwa mwatsi ono thukendi kania okuki?

³ Thwamagherererya Yehova na Mughalha wiwe, Yesu Kristo, ithukendiongera erilhumirirwa abandi. Yehova ni Nyamuhanga w’olhwanzo, kandi akahiraho eky’erileberyako  ekyuwene kutsibu eky’eritsomana abandi. (1 Yn. 4:8) Yesu mwagherererya ndeke-ndeke Thatha wiwe. (Yn. 14:9) Iniane okwa kihugho, mwakangania ngoku omundu angakwira abandi b’obulighe. Omo mwatsi ono, thukendi tsuka erilhangira emibere Yehova na Yesu babiritsomaniramu eriyowa ly’abandi. Neryo thukendi lhangira ngoku thwanga bagherererya.

4. Isaya 63:7-9 hakakanganaya hathi ngoku Yehova akatsomana eriyowa ly’abaghombe biwe?

⁴ E Biblia yikakangiriraya yithi Yehova atsomene eriyowa ly’abaghombe biwe. Ng’eky’erileberyako, thalebya ngoku Yehova abya akayowa Abaisraeli bakabana ebitsibu bingyi. E Biblia yithi: “Omo malighe wabo wosi nayu mwaghalhwa.” (Soma Isaya 63:7-9.) Enyuma waho, omw’ikolesya omuminyereri Zekaria, Yehova mwabugha athi abandu biwe bamakolhwa nabi, akabya nga n’iyo kyamakolhwako. Yehova mwabwira abaghombe biwe athi: “Oyukabathulhako akathulha oko kalhangira k’eriso [lyaghe].” (Zek. 2:8) Ekyo ni ky’erileberyako ekyuwene ky’erikangania ngoku Yehova akatsomana abandu biwe!

5. Iha eky’erileberyako ekikakanganaya ngoku Yehova abiriyira eky’erikolha eriwathikya abaghombe biwe abakaghalhawa.

⁵ Yehova syalisubulira okw’ikwira abaghombe biwe abakaghalhawa b’obulighe. Akabawathikaya. Ng’eky’erileberyako, Abaisraeli ibanemwaghalhwa omwa bukobe e Misiri, Yehova mwalhangira obulhumi bwabu, amabawathikya. Yehova mwabwira Musa athi: “Nabirilhangira amalighe w’abandu baghe . . . , nabiriowa ekiriro kyabu . . . Nyinasi amalighe wabu. Naghe nabirikima erilhamyabo omwa byalha by’Abanya Misiri.” (Eri. 3:7, 8) Kundi Yehova mwakwira abandu biwe b’obulighe, mwabalhusya omwa bukobe. Myaka mingyi enyuma waho, Abaisraeli ibane omwa kihugho Ekyalhaghanisibawa, mubabambirwa n’esyonzighu nyingyi. Yehova mwakolhaki? “Mwaghanyirabo busana n’emisimbo yabu busana n’abandu abanubayabo n’eriaghalyabo.” Kandi, eribakwira obulighe mulyaleka Yehova iniayira eky’erikolha eribawathikya. Mwathuma abatsweri erilhamya Abaisraeli oko nzighu syabu.​—Abat. 2:16, 18.

6. Iha eky’erileberyako ekikakanganaya ngoku Yehova atsomana eriyowa ly’oyuthabya n’amalengekania awahikire.

 ⁶ Yehova akatsomana eriyowa ly’abandu biwe​—n’omughulhu amalengekania wabu akabya isyahikire. Eky’erileberyako ni Yona. Nyamuhanga mwathuma omuminyereri oyu eriyathulira Abanya Ninawe omwatsi w’eritswera. Babere bayisubamu, Nyamuhanga mwathwamu erithendi bitha. Aliwe, Yona mwathatsemera erithwamu eri. Yona “mwaghalirwa” kundi obuminyereri bwiwe mubuthabererera. Aliwe Yehova mwaghumisirizya Yona n’erimuwathikya erihengulha amalengekania wiwe. (Yona 3:10–4:11) Erighunzerera Yona mwayitheghererya ekya Yehova akamweghesaya, nibya Yehova amamukolesya erihandika omwatsi oyu busana n’erithughasira.​—Abar. 15:4. *

7. Emibere Yehova akolanganiramu n’abaghombe biwe yikathukakasayaki?

⁷ Emibere Yehova akolanganiramu n’abandu biwe yikathukakasaya ngoku akalhumirirawa abaghombe biwe. Anasi obulhumi n’eriaghalhwa ly’obuli mughuma w’okw’ithwe. Yehova ‘anasi emithima y’abandu.’ (2 Emy. 6:30) Akayitheghereraya amalengekania wethu, eriyowa lyethu lyosi, n’erilemererwa lyethu. Kandi ‘syendisyaligha thukalengwako kwilhaba amaaka wethu.’ (1 Kor. 10:13) Omulhaghe oyu akahumulikanaya kutsibu!

8-10. Ni byahi ebyangabya ibyawathikaya Yesu eritsomana abandi?

⁸ Yesu iniane okwa kihugho, iniatsomene kutsibu abandi. Hane bindu bisathu ebyaleka iniatsomana abandi. Eky’erimbere, ngoku thulyalhangira, emibere ya Yesu yiri ng’eya Thatha wiwe. Nga Thatha wiwe, Yesu inianzire abandu. Nomwakine indi Yesu mwatsemera ebyosi ebya wathikayamu Yehova erihangika, kutsibu-tsibu, “obutseme [bwiwe] bwabya haghuma n’abaghalha b’abandu.” (Emi. 8:31) Olhwanzo mulhwaleka Yesu iniatsomana eriyowa ly’abandi.

⁹ Ekyakabiri, nga Yehova, Yesu iniakaminya ebiri omwa mithima y’abandu. Iniakaminya amalengekania n’eriyowa ly’abandu. (Mt. 9:4; Yn. 13:10, 11) Neryo Yesu iniakabya akalhangira abandu abali omwa bulighe, iniakabakwira obulighe n’eribahumulikania.​—Isa. 61:1, 2; Lk. 4:17-21.

¹⁰ Ekyakasathu, Yesu nayu mwabana ebighuma by’okwa bitsibu ebikahika okwa bandu. Ng’eky’erileberyako, Yesu angabya imwakulira omw’eka y’abera. Angabya imw’igha erikolha emibiiri y’amani omw’ikolha na Yozefu, thatha wiwe oyuwamukulhaya. (Mt. 13:55; Mk. 6:3) Yozefu akabya nga mwaholha Yesu isyali atsuka omubiiri wiwe w’erithulira. Neryo obo Yesu nayu mwabana obulhumi bw’eriholerwa. Kandi Yesu abya inianasi ebitsibu by’erikulira omw’eka eyighabene omw’iramya. (Yn. 7:5) Emibere eyo n’eyindi yangabya imuyawathikya Yesu eriyitheghererya ebitsibu n’eriyowa ly’abandu.

11. Erilhumirirwa lya Yesu kutsibu-tsibu mulyalhangirika mughulhu wahi? Soborera. (Lebaya ekisasani ky’okwa kidipa.)

¹¹ Erilhumirirwa lya Yesu mulyalhangirika kutsibu akakolha ebithiko-thiko. Yesu isyali kolha ebithiko-thiko ambu kundi atholere eribikolha. Abandu abakaghalhawa “mwakwirabo obulighe.” (Mt. 20:29-34; Mk. 1:40-42) Ng’eky’erileberyako, thalengekania okw’iyowa lya Yesu akathwalha omulhume omutsiha  ahathe bandu eriyamulhamya kutse akalhubukya omwana mughuma musa w’omukwakali. (Mk. 7:32-35; Lk. 7:12-15) Yesu mwakwira abandu b’obulighe, amabawathikya.

12. Yoane 11:32-35 hakakanganaya hathi erilhumirirwa lya Yesu oku Marata na Maria?

¹² Yesu mwalhumirirwa Marata na Maria. Abere alhangira obulighe obwa balimu busana n’olhuholho lhwa mughalha wabo, Lazaro, “Yesu mwalira.” (Soma Yoane 11:32-35.) Syalira busana n’erithabya iniabiriholerwa munywani wiwe. Abya inianasi kw’akayalhubukaya Lazaro. Aliwe, Yesu alira kundi mwalhangira obulhumi bw’abanywani biwe balimu busana n’eriholerwa neryo kyamamuhambako.

13. Eriminya ngoku Yesu akalhumirirawa kikathuhimba kithi?

¹³ Eriminya ngoku Yesu akalhumirirawa abandu kikathughasira. Ni kwenene iyo abya ahikene, aliwe ithwe eyihi. Aliwe, thumwanzire kundi iniakakwira abandi b’obulighe. (1 Pet. 1:8) Eriminya hathya ku ni Mwami w’Obwami bwa Nyamuhanga, kikathughumaya. Akisiya iniaghunzaho eriaghalhwa lyosi. Kundi mwanabya mundu ng’ithwe, yuwangathoka eriwathikya abandu eribalhusya omw’inuba n’eriaghalhwa ly’obuthabali bwa Sitani. Omo kwenene, ni mughisa eribya n’Omuthabali ‘oyukathukwira obulighe omwa bwolho-bwolho bwethu.’​—Ebr. 2:17, 18; 4:15, 16.

14. Erikwamana na Abanya Efeso 5:1, 2, ni kyahi ekyathukayowa ithutholere erikolha?

¹⁴ Erilengekania okwa ky’erileberyako kya Yehova na Yesu, likathusukuma nethu eryongera erilhumirirwa abandi. (Soma Abanya Efeso 5:1, 2.) Ithwe sithwanga minya ebiri omwa muthima w’omundu ng’ibo. Nomwabine, thwanganalengaho eriyitheghererya eriyowa n’ebiyithawa by’abandi. (2 Kor. 11:29) Mbaghane n’abandu b’ekihugho abayitsomene, thukalengaho ‘eritheya ebindu by’abandi butsira erilhwira ebyethu bisa.’​—Fil. 2:4.

15. Kutsibu-tsibu ni bahi abatholere ibakangania erilhumirirwa abandi?

¹⁵ Abasyakulhu b’ekithunga kutsibu-tsibu batholere ibalhumirirwa abandi. Banasi ku ni b’erisyalhuthonda busana n’esyombuli esyo bakatheghaya. (Ebr. 13:17) Erithoka eriwathikya balikyabo, abasyakulhu batholere ibabya n’obuyitheghererya. Abasyakulhu banga kangania bathi erilhumirirwa abandi?

16. Ni kyahi eky’omusyakulhu oyutsomene abandi akakolha, kandi busana naki eki ni kikulhu?

¹⁶ Omusyakulhu oyutsomene abandi akabana endambi ey’eribya haghuma n’abalikyabo Abakristayo. Akabulhaya ebibulyo neryo iniahulikirira ndeke kandi omw’ighumisirizya. Eki ni kikulhu, kutsibu-tsibu enguma y’okwa syombuli yikanza eribugha ebiri okwa muthima aliwe ikyakalirayo eribana ebinywe ebitholere. (Emi. 20:5) Omusyakulhu erihayo endambi yiwe busana n’eribya n’abalikyabo, kikaleka ihabya eriyiketherana, obunywani, n’olhwanzo, kandi ibyongera.​—Emib. 20:37.

17. Balikyethu bangyi bakabugha bathi ni mubere wahi mukulhu owa bakanza omwa basyakulhu? Iha eky’erileberyako.

¹⁷ Balikyethu bangyi bakabugha bathi omubere owa bakalhangira mwa mukulhu omwa basyakulhu b’ekithunga w’ow’eritsomana eriyowa ly’abandi. Busana naki? Adelaide akabugha athi: “Kik’olhoba erikania nabu, kundi wukaminya ku bakendi kuyitheghererya.” Akongerako athi: “Wukaminya ku bakulhumirirwe omwa mibere bakasubiraya wukakania nabu.” Mughalha wethu omw’isima akabugha bino: “Munalhangira emisonia yikathoghonga omwa meso w’omusyakulhu akaghanirya  okwa mibere eyo ngalimo. Singendi sy’ibirirwa ekyo.”​—Abar. 12:15.

18. Thwanga kangania thuthi erilhumirirwa abandi?

¹⁸ Sibugha indi abasyakulhu basa babatholere erilhumirirwa abandi. Ithwe bosi thwangana kangania omubere oyu. Thuthi? Lengesaya eriyitheghererya ebitsibu ebya bali omw’eka ndebe kutse ebya balikyethu bawithe. Kanganaya ku wutsomene eminyethu, abalhwere, abakulire omo myaka, n’abaholerwe omwa kithunga. Babulhaye nga bane bathi. Bahulikirire ndeke bakakubwira eriyowa lyabu. Bawathikaye balhangire ku wunayitheghererye ndeke emibere eyo balimo. Bawathikaye ngoku wanga thoka. Thwamakolha eki thukabya ithwamakangania olhwanzo lhw’okwenene.​—1 Yn. 3:18.

19. Busana naki ithwabya n’obuyitheghererya thukalengesya eriwathikya abandi?

¹⁹ Thutholere ithwabya n’obuyitheghererya thukalengesya eriwathikya abandi. Busana naki? Kundi ebitsibu bikahamba okwa bandu omwa nzira muthina-muthina. Abandi bakanza ibakania okwa bitsibu byabu, n’abandi sibalyanza eribikaniako. Neryo thukanza ithwawathikya, aliwe thutholere ithwayitheya okw’ibulya ebibulyo ebyangana leka ibayowa nabi. (1 Tes. 4:11) N’omughulhu abandi banga thubwira eriyowa lyabu, thwangana ghana erilighirana n’ebya bakathubwira. Nomwabine, thukayithagha eriminya ngoku eryo ly’eriyowa lyabu. Thwanzire ithwabya abakowa lhuba aliwe isithwanguha eribugha.​—Mt. 7:1; Yak. 1:19.

20. Thukendi syakania okuki omo mwatsi owakakwamako?

²⁰ Eryongera okw’ilhumirirwa abandi omwa kithunga, thwanzire erikangania omubere mubuyanga oyu omw’ithulira. Thwanga kangania thuthi erilhumirirwa abandi thukayira abigha? Thukendi kania okw’ekyo omo mwatsi owakakwamako.