1. Toko cineeraaya 1 Peturu 3:8, kontha isiyani unaareera ukhala naatthu anwacera itthu inniira ni ukumiihu?

UNAAREERA cinene ukhala naatthu oowacera itthu inniira ni oowacera ukumiihu. Ayo atthwaayo anaamananiha ucuwelela itthu inoopuweleehu ni inniira wanrimani wihu. Ayo anaakhitiri ucuwela itthu innithwaa ni anaanikavihera—imaara cinci, hataa nihinaaya waalepela, ayo anaanikavihera. Khweeliini, ninaatteeliya cinene ‘nawaceriyaka’ * naakhwiihu.—Nsome 1 Peturu 3:8.

2. Kontha isiyani pooti unirikela waawacera akhunanihu?

² Ukhala wiira hiiva makristau, otheene cihu nihaana naawaceraka akhunanihu. Masi upanka iyo pooti unirikela. Kontha isiyani? Woopacera, kontha otheene cihu naatthu oopahuwa. (Aroo. 3:23) Phimaana, nihaana niikurumicaka wiira nihiye uyuupuwela veekheehu paahi. Itthu ikhwaawe inaarikihela atthu akina waawacera akhunanaya akhanle mananna ayo cuunuwihiyaaya ni masakha apacale waakhumelela muukumini waya. Uhiya iyo, hiiva ciicammo pooti uhapusiya naatthu ontuninyani. Ala mahuku ookhiceraala, atthu enci khanwacera mena vakaani itthu inwiira akhunanaya. Ayo atthu “owiifenta” asineennyaaya paasi. (2 Tim. 3:1, 2) Ninhala ukhitiri cani utthema citthu cinnirikihela uwacera itthu inwiira akhunanihu?

3. a) Isiyani inhala unikavihera waawacera akhunanihu? b) Isiyani inhaleehu wiitthuca nhina ula mwahoola?

³ Itthu inhala unikavihera waawacera akhunanihu ukhanle untakiha Yehova Nluku ni Mwanawe, Yesu Kristu. Yehova nifento ni naanithoonyera sana-saana mananna o waawacera akhunanihu. (1 Joau 4:8) Yesu hotakiha ratta-raata makhalelo a  Athumwaane. (Joau 14:9) Ukati Yesu waaryaawe watuninyani, ahothoonyera mananna ntthu cinlamuliyaawe woonihera uthunku. Nhina ula mwahoola, woopacera ninaahala wiitthuca manannani Yehova ni Yesu caawacenryaaya atthu. Ciicammo, ninaahala wiitthuca mananna o waatakiha.

4. Ilivuru ya Isaiya 63:7-9 inthoonyera cani wiira Yehova naawacera itthu inwiira ale anonswalela?

⁴ Ibiiblya inaaniitthuciha wiira Yehova naawacera itthu inwiira ale anonswalela. Muupuwele itthu yaamwiira Yehova, ukati asarayeli waaphwanyalyaaya masakha oorika: “Ukati wotheene waaryaaya ni masukhuli, uyo ciicammo aakhala ni masukhuli.” (Nsome Isaiya 63:7-9.) Wahoolo waya, Yehova ahonruma Zakariya uhimya wiira ule naahuviha apoovu a Nluku nkhala khampa nonhuviha Nluku. Yehova ahowiirela apoovwaawe: “Ule nookolokocani, notutha nitho naka.” (Zakar. 2:8) Wuupuwela iyo unaanikavihera woona mananna Yehova cinaawaceraawe apoovwaawe.

5. Nhimye ntakihero ninthoonyera wiira Yehova ahopanka itthu wiira awoopole ale yanswalela.

⁵ Uhiya paasi uwacera itthu inwiira ale anonswalela, ihaavo-tho itthu Yehova impankaawe. Uyo naapanka itthu wiira aakavihere. Wootakihera, ukati asarayeli waahuvaaya nlattu wookhala ipottha Wiciipitu, Yehova ahowoonela uthunku ni ahopanka itthu wiira awoopole. Yehova ahomwiirela Moses: “Khweeliini, kihoona uhuva waapoovwaaka, ari Wiciipitu, ni kiheewa ikuttho caya . . .  kinaacuwela ratta-raatta mananna cinhuvaaya. Kinaakhuruwa wiira kawoopole mmatatani wa atthu o Wiciipitu.” (Nkw. 3:7, 8) Yehova ahowoopola apoovwaawe kontha aanaawacera itthu yaawiira. Cinavinreene myaakha cinci, asarayeli yahokolokociya naalupatthi ukati waakhalaaya ilapo yaakhuluvelihiyaaya. Yehova aakhanle cani? Uyo “khawancivela wiipulela waya nlattu waatthu yaahuviha ni yaakakhaca”. Phimaana, Yehova ahaaruma masuwisi wiira yawoopole asarayeli mmatatani wa alupatthi. Totho, Yehova ahaawacera apoovwaawe ni ahopanka itthu wiira awoopole.—Masuw. 2:16, 18.

6. Nhimye ntakihero ninthoonyera wiira Yehova ahowacera itthu yaawiira ale yanswalela yahaarina moopuwelelo omaana.

⁶ Yohova naawacera itthu inwiira ale anonswalela, hataa moopuwelelwaaya yahikhalaka omaana. Muupuwele itthu yankhumelenle  Jonas. Nluku ahonruma Jonas urwaa ulalyeera wiira isitati yooNinive yaanahala umalamalihiya. Masi atthu ooNinive yahorukunusa mirima caya, ni Nluku aholakela wiira khaahala waamalamaliha. Masi itthu yaalakenlyaawe Nluku khayancivenle Jonas mena vakaani. Uyo “ahorusiya venci” kontha itthu yaahimyalyaawe khayaahala wiirannya. Yehova aapankale isiyani? Yehova ahonvilela Jonas ni ahonkavihera urukunusa moopuwelelwaawe. (Jonas 3:10–4:11) Wahoolo waya, Jonas aheetthuca itthu yeetthucihiyaawe ni Yehova. Ni muupuwele ipharakha Jonas yaakhenlyaawe: Uyo ahovareliya nteko ni Yehova wiira antikhe mbiiblyani citthu cotheenennyo caakhumelenle. Hiiva ciicammo pooti wiitthuca nnyo citthunnyo.—Aroo. 15:4. *

7. Mananna Yehova caawacenryaawe ale yanswalela khalayi annikhuluveliha isiyani?

⁷ Mananna Yehova caawacenryaawe ale yanswalela khalayi anaanikhuluveliha wiira naawacera itthu inniira wanrimani wihu. Yehova naacuwela citthu coowerya cotheene cinnikhumelela ni mahuviho otheene anniphwanya. Yamwaacaka Yehova, Ibiiblya ineera: “Thi weeva paasi khweeliini uncuwela ciryaaya nrima wa pinaatamu.” (2 Ikor. 6:30) Uyo naacuwela itthu inoopuweleehu ni inniira wanrimani wihu, ni naacuwela nipuro ninvelavelaaya ikuru cihu. Ciicammo, Yehova ‘khanhala unihiyerera nittehiyaka wahinhaleehu ukhitiri’ uvilela. (1 Akor. 10:13) Khannokupali wiira iyo inatiriiyo inaanimaaliha?

8-10. Citthuni tthaaru caamwiirihale Yesu waawacera akhunanawe?

⁸ Ukati Yesu waakhalaawe watuninyani khampa pinaatamu, ahothoonyera wiira aanaawacera itthu yaawiira akhunanawe. Ni aapanka iyo nlattu wo citthu tthaaru. Yoopacera, toko ciitthucaleehu, Yesu hotakiha ratta-raata makhalelo a Athumwaane wiirimu. Toko Yehova, Yesu aanawaafenta atthu. Uyo wahontteela nrima cinene waakavihera Athumwaane wumpa citthu cotheene, masi ‘yaatepa uncivela yaari apinaatamu’, awula atthu. (Miru. 8:31) Nifento phaamwiirihale Yesu uwacera itthu yaawiira akhunanawe.

⁹ Yonayeeli, toko Yehova, Yesu aanaakhitiri woona mirima caatthu. Iyo maanaaya wiira Yesu anaacuwela itthu yaamwiira khula ntthu wanrimani wawe. (Mat. 9:4; Joau 13:10, 11) Phimaana, ukati Yesu woonaawe wiira ntthu nooriipiya nrima, nlattu woohuva, Yesu aananwacera ni aanammaaliha.—Isai. 61:1, 2; Luka 4:17-21.

¹⁰ Yoneeraru, Yesu yahopaca unkhumulela masakha yaakhumelela atthu. Pooti ukhalaka wiira amucyaawe Yesu yaari amasikhini. Yesu ahaana eetthucaka uvara nteko woorettheeliha wamoca ni athumwaane oohinnyara, Yusufu. (Mat. 13:55; Mark. 6:3) Uhiya commo, atthunaka Yusufu aakhwaale Yesu hinaaya wancera ntekwaawe woolalyeera watuninyani. Phimaana, Yesu pooti ahokhala ni masukhuli menci nlattu wookhweliya. Yesu ciicammo ahaana amuci yahaakupali citthu caakupalyaawe. (Joau 7:5) Nnyo ni citthu cikhwaawe cankhumelenle Yesu cahonkavihera uhitikhina marikariko ni citthu caawiira atthu.

11. Ukatini Yesu waathoonyenryaawe wiira aanawaawacera atthu? Ntaphulele. (Nwehe ilatarato iri wakaapani.)

¹¹ Ukati waapankaawe mitikhiniho, Yesu ahothoonyera wiira aanawaawacera atthu. Uyo khaapanka mitikhiniho nlattu wookhanyererihiya, masi aapanka mitikhiniho kontha ‘aanaawoonela uthunku’ ale yaahuva. (Mat. 20:29-34; Mark. 1:40-42) Wootakihera, muupuwele  mananna Yesu ciicoonalyaawe ukati wancisalyaawe uttayi nlopwana oohiiwa wiira arwee anvonihe. Muupuwele ciicammo inanna caatteeliyaawe nrima Yesu umunweleliha wawe mwaana a nankhweli. (Mark. 7:32-35; Luka 7:12-15) Yesu aanawaawacera atthu ni aanaapheela cinene waakavihera.

12. Ilivuru ya Joau 11:32-35 inoonihera cani mananna Yesu canwaceraawe Marta ni Mariya?

¹² Yesu ciicammo ahonwacera Marta ni Mariya. Ukati Yesu woonalyaawe wiira yaari ni masukhuli nlattu wookhwa muulupalyaaya, Laazaru, “Yesu ahancera wunla.” (Nsome Joau 11:32-35.) Yesu khonlale nlattu wookhwa mpatthannyaawe anfentaawe, kontha aanaacuwela wiira aanaahala umunweleliha Laazaru. Yesu onlale kontha aanaacuwela wiira apatthannyaawe yahoona uwerya. Yesu ahoona uwerya toko apatthannyaawe coonalyaaya uwerya.

13. Kontha isiyani unaarera ucuwela wiira Yesu aanawaawacera atthu?

¹³ Wiitthuca wiira Yesu aanawaawacera atthu, unaanilipiha makhuva ilelo. Ucuwela wiira Yesu aanawaawacera akhunanawe unaanikavihera utepa unfenta. (1 Pet. 1:8) Unaareera ucuwela wiira nna va Yesu ri moolamulela wiirimu khampa Mwene o Umwene wa Nluku. Woohipica, Yesu naahala umaliha uhuva wotheene ni citthu cotheene coowerya cinkumihacaaya ikuvernu ya Sotwani. Yesu phinomphwanela upanka iyo, kontha hopaca ukhala watuninyani khampa pinaatamu. Khweeliini, nihocaaliya cinene ukhalana nhooleli ‘nocuwela uhiicoorya wihu.’—Mabere. 2:17, 18; 4:15, 16.

14. Toko cineeraaya Efesu 5:1, 2, ntakihero na Yehova ni na Yesu ninaanivaha ikuru wiira nipanke isiyani?

¹⁴ Usoma ntakihero na Yehova ni na Yesu unaanivaha ikuru wiira nitepe uwacera itthu inwiira akhunanihu. (Nsome Efesu 5:1, 2.) Hiiva khanincuwela itthu inoopuwelaaya akhwiihu wanrimani waya, masi Yehova ni Yesu anaacuwela. Unookhalaru commo, hiiva pooti umananiha ucuwela itthu inwiira akhwiihu wanrimani waya ni citthu cinaathwaa. (2 Akor. 11:29) Hataa nikhalaka ntuninyani yoothanyanaciya, ninawiikurumica utotha kahi ‘citthu cinnicivela paasi, masi ciicammo citthu cinaacivela akhunanihu.’—Afili. 2:4.

15. Venci-venci tipani nlamuliya waawacera akhunanawe?

¹⁵ Venci-venci mahumu o wanlokoni anlamuliya waawacera akhunanaya. Ayo anaacuwela wiira anaahala uhukhumwiya ni Yehova nlattu wo mananna cinwaceraaya ikhontwa cawe. (Mabere. 13:17) Wiira yaakavihere asuulupaleehu ni asirokorehu o wanlokoni, mahumu ahaana yaawaceraka. Mahumu o wanlokoni anlamuliya uwacera cani itthu inwiira akhunanaya?

16. Humu o wanlokoni nowacera itthu inwiira akhunanawe nopanka isiyani, ni kontha isiyani upanka commo unaareera?

¹⁶ Humu o wanlokoni nowacera itthu inwiira akhunanawe, naakumiha ukati wiira akhale nkhayi naasuulupalyaawe ni asirokorawe. Uyo nawaakohakoha ni naaviriyana ratta inoolumaaya. Upanka commo unaareera, utepa wakhalaka wiira ntthu mmoca o wanlokoni mpheela uhimya itthu immwiira wanrimani wawe, masi unanrikela ukumihera vate itthu irinaawe wanrimani. (Miru. 20:5) Humu o wanlokoni aaminiki uleva ukatyaawe wiira akhale ni mayaamunna, unaakhala upatthani, ukhuluvelana ni nifento.—Mite. 20:37.

17. Ikhaleloni asuulupaleehu ni asirokorihu enci intepa waacivela umoona humu ooniheraka? Nhimye ntakihero.

¹⁷ Asuulupaleehu ni asirokorihu enci o wanlokoni aneera wiira ikhalelo intepa waacivela umoona humu ooniheraka iri uwacera itthu inwiira akhunanawe. Kontha isiyani?  Nrokorihu mmoca neehaniya Adelaide aheera: “Wacuwelaka wiira humu naahala wuuviriyana ratta, khunoorikela urwaa umuulumana.” Uyo aheera-tho: “Warwaaka uwuulumana mahumu, vano woonaka mananna cinaakhulaaya, unawoonannya wiira ayo anawuuwacera.” Muulupaleehu nkina nawuupuwela itthu yankhumelenle: “Ukati wanhimyeraka humu itthu yaakiira, kahoona wiira yahancera unkhuma minthori. Akinliyala nne nihukunne.”—Aroo. 12:15.

18. Manannani ninlamuliyeehu uthoonyera wiira ninawaawacera akhunanihu?

¹⁸ Ninaacuwela wiira khanakhala mahumu paasi anlamuliya waawacera akhunanaya. Otheene cihu nihaana naawaceraka akhunanihu. Manannani? Ntothe ucuwela isiyani inwiira amuciinyu ni mayamunna o wanlokoni. Mwaawacere amirawo, owuuluvala ni ale akhweliye. Mwaakohe ciryaaya. Ni yaakhulaka, mwaaviriyane ratta. Mwaakavihere woona wiira nnawaawacera. Mwaahimyacere wiira nnaapheela upanka yotheene inhaleenyu ukhitiri wiira mwaakavihere. Napankaka commo, ninaathoonyera nifento neekhweeli.—1 Joau 3:18.

19. Ukati woomananiha waakavihera akhunanihu, kontha isiyani khaninlamuliya uphara itthu?

¹⁹ Ukati woomananiha waakavihera akhunanihu, khaninlamuliya uphara itthu. Kontha isiyani? Kontha mananna atthu cinaananaaya masankiho anaavirikana. Ahaavo atthu anhimya itthu inwiira. Atthu akina khunaacivela uhimya masakha arinaaya. Ninaapheela cinene waakavihera akhunanihu, masi khaninlamuliya unkohakoha ntthu mpaka unsankihaca. (1 Atesal. 4:11) Ni ntthu pooti wuuhimyerani itthu imwiira, masi nyuuva uhaamini citthu cinoolumaawe. Wakhala commo, muupuwele wiira ntthuuyo nhimya itthu immwiira. Nimpheela ukhala atthu owaakuva uviriyana masi oopica wuuluma.—Mat. 7:1; Tiya. 1:19.

20. Isiyani inhaleehu wiitthuca nhina mwaha nkina unrweehu usoma?

²⁰ Uhiya waawacera akhunanihu wanlokoni paahi, ciicammo nimpheela waawacera akhunanihu wuulalyeerani. Ninhala uthoonyera cani wiira ninawaawacera akhunanihu ukati wowaapanka eetthuci? Iyo phi itthu inhaleehu wiitthuca nhina mwaha nkina unrweehu usoma.