1. 1 Petrub 3:8 ǃoagu da tae-i ǃaroma ǃgâsan hîna sada tsâsigu tsî ǂurusib tsîn ǃnâ ǃgâiǃgâibasensa ūhân ǁaegu hâs xa a ǃgâibahe?

KAISE da ge ra ǂkhî khoen hîna sada tsâsigu tsî ǂurusib tsîn ǃnâ ǃgâiǃgâibasensa ūhân ǁaegu hâsa. ǁÎn ge sada ǂaidi ǃnâ ra mâisen tsî ra dītsâ sada ra tsâ tsî ǂâi ǀgausa ǁnâuǃāsa. ǁÎn ge sada ǃgomsina mûǂan tsî huiba ra mā tsî ǀnî ǁaegu ai nēsa ǂgans tsîna da hî tama hâ hîna ra dī. ǃGâsan hîna ‘ǃgâsaǀnamxasiba’ ra ǁgauna da ge ra ǃgôaǃgâ *.—Khomai re 1 Petrub 3:8.

2. Tae-i ǃaroma da tsâbaǁhaosa ǁgausa nî sîsenǂam?

² Xristeǁîn ase da ge hoa da tsâbaǁhaos tamas ka io ǃgâsaǀnamxasiba ra ǁgau ǂgao. Xawe da ge nēsa nî sîsenǂam. Tae-i ǃaroma? ǀOasa kurusa da ūhâ tama hâ amaga. (Rom. 3:23) ǁNās ǃaroma da ge ǁî aitsama ǁaeǁaesens tsâsiba nî ǃkham ǃoa. ǀNî da ge tsâbaǁhaosa ǁgaus ǀkha ǃgomsiba a ūhâ ǁkhā. Sada ge kai ǀgaus xa ǃaroma-e hâse tamas ka io sada khaoǃhūb xa. Tamas ka io da ge sada ǂnamipe hâ khoen ǂâi ǀgauba ge ūǃoa. Nē ǀuni tsēdi ǃnân ge khoena nau khoen tsâsiga ǃgôaǃgâ tama hâ. Xawe a “ǁîǀnamsenxa.” (2Tim. 3:1, 2) Tae-e a hui da ǁkhā, nē ǃgomsiga ǀamsa hōbasa, nau ǃgâsana tsâbas ǃaroma?

3. (a) Mati da khoexaǃnâsiba a ǁgau ǁkhā? (b) Tae-e da nē ǁkhāǁkhāǃâs ǃnâ nî ǃhoaǃgao?

³ Jehovab tsî Jesub tsîkha di aiǁgaude saos ǃnâ da ge tsâbaǁhaosa ǃgâi ǀgaub ǃnâ ǃgâsan ǃoa-ai a ǁgau  ǁkhā. Jehovab ge ǀnammi Eloba tsî ǃgâi aiǁgausa sada ǃgâsana tsâbas ǃnâ ra ǁgau. (1 Jhn. 4:8) Jesub ge ǃamkuse ǁîb ǁGûb aiǁgausa gere ǁgae. (Jhn. 14:9) ǃHūbaib aib hâ hînab ge ge ǁgau matin khoena tsâbaǁhaoxasiba nî ǁgausa. Nē ǁkhāǁkhāǃâs ǃnâ da ge ǂgurose nî ǃhoaǃgao matikha Jehovab tsî Jesub tsîkha ǃgâsan ǃoa-ai tsâbaǁhaosa ra ǁgausa. ǁNāpaxū da ge mati da ǁîkha aiǁgaude a sao ǁkhā ǀgaub xa nî ǃhoa.

4. Jesajab 63:7-9 sa mati ra ǁgau Jehovab ǁîb khoen tsâsigu ǃnâ ǃgâiǃgâibasensa ūhâsa?

⁴ Elobmîs ge ra ǁkhāǁkhā Jehovab ǁîb khoen tsâsiga ra ǃgôaǃgâsa. Aiǁgause, ǂâi re Jehovab ge mati gere tsâsa Israelǁaes ge ǃgomsigu ǃnâ hâ io. “ǁÎn ǂōǂōb hoab ǃnâb ge ǁîba ge ǂōǂōhe.” (Khomai re Jesajab 63:7-9.) Egab ge Jehovaba ǁîb kēbo-aob Saxariab ǃnâ-ū ge mî ǁîb khoen ga ǃgâi tama ǀgaub ǃnâ hâ-ūhe o, os nēsa ǁîb tsîna ra tsâǀkhāsa. Jehovab ge ǁîb khoena ra mîba: ‘Sado ga tsâǀkhā-i, ǁnā-i ti mûǃnâde’ ra tsâǀkhā ǃkhaisa. (Sax. 2:8) Nēb ge kaise a ǀgaisa tsâ ǀgauba hînab Jehovaba ǁîb khoen ǃoa-ai ūhâba.

5. Aiǁgau-e mā re, Jehovab mati ǁîb khoen hîna ǃgoma gere tsâna a hui ǀgausa.

⁵ Jehovab ge ǁîb ǃoaba-aon hîna ǃgomsina ra tsâna tsâbaǁhaos ǀguisa hî tama hâ. Xaweb ge xū-e ra dī ǁîna huisa. Aiǁgause, Israelǁaes ge Egipteb ǃnâ ǃgoma gere tsâ o, ob ge Jehovaba ǁîn ǃgomsiga gere ǁnâuǃā tsî ge ǁgari-e ǁîna huisa. Jehovab ge Moseb ǃoa ge mî: “Tita ge go mû ti ǁaes Egipteb ǃnâ hâs di ǁgâiǀāba, tsî ta ge ǁîn di ǃausa go ǁnâu . . . ǁîn di tsûga ta ge a ǂan. ǁNā-amaga ta ge tita go ǁgôaxa, Egipteǁîn di ǃomǁaeba xu ta nî ǁîna orega.” (Eks. 3:7, 8) Jehovab ge ǁîb khoenab gere tsâba amaga ǁîna ǃgāsisa xu ge ǃnoraǃnora. ǂGui kurin ǃkharu hâses ge Israelǁaesa mîmâisa ǃhūb ǃnâ gere ǁgâiǀāhe ǁîn saoǃgōn-aon xa. Jehovaba tae-e ge dī? “ǃKhūb ge ge ǃhausen  ǁîn di ǀhâimâinǀoms, ǁnān, ǁîna ge ǁgari tsî ǁgâin xan ra ǀhâimâinǀoms ǃaroma.” Tsâbaǁhaos ge Jehovaba ge tsâǀkhā îb ǁîb khoena hui. ǁÎb ge ǀgoraǃgâ-aoga ge sî în Israelǁîna ǁîn khākhoena xu sâuhe.—ǂHǂh. 2:16, 18.

6. Aiǁgau-e mā re, hîna ra ǁgau-e Jehovab khoe-i tsâsiga gere ǃgôaǃgâsa ǁî-i ǂâi ǀgaub ge ǂhanu tama hâ i xawe.

⁶ Jehovab ge ǁîb khoenab ra tsâba ǃkhaisa ra ǁgau, ǁîn ǂâi ǀgaub ga ǂhanu tama i xawe. Jonab aiǁgaus xa ǂâi re. Elob ge ǁîb kēbo-aoba Nineveǁîna ǃoa ge sî îb sī ǀgoraǃgâs haisi-amsa mā nî. ǁÎn ǁgai ǀgaugan ge ǀû o, ob ge Jehovaba ge sâu nî. Xaweb ge Jonaba nēs xa ge ǂkhîǂâixa tama hâ i. “Tsîb ge ge ǁaixa” ǁîb di ǀgoraǃgâs haisi-ams ge dīǀoaǀoahe tama i amaga. Xaweb ge Jehovaba Jonab ǀkha ge ǃnūǃnâxa i tsî ge hui bi îb ǁîb ǂâi ǀgauba ǀkharaǀkhara. (Jonab 3:10–4:11) Jonab ge nēsa ega ge ǁnâuǃā tsîb ge Jehovaba Jonaba ǁîb aiǁgausa sada ǃaroma ge xoa kai.—Rom. 15:4. *

7. Jehovab ǁîb ǃoaba-aon ǀkha ra hâ ǀgauba tae-e ra ǁgau da?

⁷ Jehovab ge ǁîb khoen ǀkha gere hâ ǀgaus ge ra hui da mûǂansa ǁîb ge ǁîn tsâsiga gere ǃgôaǃgâsa. ǁÎb ge mâ khoe-i hoa-i di tsûb tsî ǃgomsigu tsîna a ǂan. Jehovab ge amabes ǃnâ “khoen ôan di ǂgaoga a ǂan.” (2Kro. 6:30) ǁÎb ge sada ǂâidi, tsâsigu tsî ǂkhabusasigu tsîna ra ǁnâuǃā. Tsî “ǁkhā du as ǂamai ǃâitsâ du tide.” (1Kor. 10:13) Nēs ge ǃgâi ǂansa.

8-10. Jesub ge ūhâ i ǃgâi ǀgauga mâ xūn xa gere ǂkhâǃnâ-e?

⁸ ǃHūbaib aib ge hâ io, ob ge Jesuba khoena gere tsâba. ǃNona xūn ge nēs ǃnâ ge hui bi. ǂGurose, mî da go hâ i khami, Jesub ge ǁîb ǁGûb di ǀgauga ǃgâi ǀgaub ǃnâ gere ǁgau. ǁÎb ǁGûb khamib ge Jesuba khoena ge ǀnam i. Hoa xūn hînab ge Jehovaba kuru huin xab ge gere dâ xaweb ge Jesuba “khoen ôan” ǃnâ ǃgâiǃgâibasensa ge ūhâ i. (ǂKhm. 8:31) ǀNammi ge Jesuba ge ǂkhâǃnâ îb khoen tsâsiga ǃgôaǃgâ.

⁹ ǀGamǁîse, Jehovab khamib ge Jesuba khoen ǂgaoga ge khomai ǁkhā i. ǁÎb ge khoen ǂâibasendi tsî tsâsigu tsîna ge ǂan i. (Mat. 9:4; Johaneb 13:10, 11) Jesub gere mû o, khoen ǂgaogu khôaǂkhūǂkhūhe hâsa, ob ge ǁîna gere hui.—Jes. 61:1, 2; Lukab 4:17-21.

¹⁰ ǃNonaǁîse, Jesub tsîn ge nē ǃgomsin khoen ge ǃkharu ǃnâna ǁîb tsîna ge ǃkharu ǃnâ. Aiǁgauseb ge Jesuba ǀgâsa omaris ǃnâ ge kai. ǁÎb dadab Joseb ǀkha sîsens ǃnâ-ūb ge Jesuba ǃgarise sîsensa ge ǁkhāǁkhāsen. (Mat. 13:55; Markub 6:3) Joseb ge Jesub di aoǁnâ sîsenni nî ǀams aiǃâ ge ǁō. Nēs ǀkhab ge Jesuba ǀgūkhoe-e ǁōb ǃnâ ǂoaǃnâs di tsûba ge hōǃâ. Jesub tsîn ge ge ǂan i ǃkharagagu ǂgomdi ǃnâ ra ǂgom omaris khoen ǀkha hâs mati tsâsa. (Johaneb 7:5) Nē mâsigu tsî ǀnîn tsîn ge Jesuba ge hui îb khoen di ǃgomsigu tsî tsâsigu tsîna ǁnâuǃā.

11. Mâǁaeb aib ge Jesub di khoexǃnâsiba ǃgāsa i? ǁGuiǃā re. (Tsoatsoas ai hâ ai-īsiba mû re.)

¹¹ Jesub di khoexaǃnâsib ge buruburuxa dīgab gere dī o, o ǃgāsase gere mûsen. Jesub ge buruburuxa dīga ǁgui-ais ase  ge dī tama hâ i. ǁÎb ge khoenab ūba hâ ‘ǀkhomxasib’ ǃaroma ǁnāsa gere dī. (Mat. 20:29-34; Mrk. 1:40-42) Aiǁgause, ǂâi re, Jesub ge ǂganaǂgae hâ khoeba khoen ǁaeguba xu ǂoa-ū tsî ge ǂgauǂgau. (Mrk. 7:32-35; Luk. 7:12-15) Jesub ge nē khoena gere tsâba tsî ǁîna gere hui ǂgao.

12. Johaneb 11:32-35 sa mati ra ǁgau Jesub Martas tsî Marias tsînab ra tsâba ǃkhaisa gere ǁgausa?

¹² Jesub ge tsâbaǁhaosa Martas tsî Marias tsîra ge ǁgau. ǁÎra ǃgâb Lasarub di ǁōb ǃgao ra tsûaǂgao hâ ǃkhaisab ge mû o, ob “ge Jesuba ge ā.” (Khomai re Johaneb 11:32-35.) Jesub ge ǁîb di ǀhōsabab ge ǂoaǃnâ ǃkhais ǃaroma ǀgui ge ā tama hâ i. ǁÎb ge ge ǂan i Lasarubab ǁōba xu nî khâi kaisa. Xaweb ge gere ā ǁîb ǀhōsan di tsûbab gere ǁnâuǃā amaga.

13. Jesub di tsâbaǁhaos xa ǂansa mati ra ǂkhâǃnâ da?

¹³ Jesub di tsâbaǁhaosa xu da ge ǂgui xūna a ǁkhāǁkhāsen ǁkhā. ǂAn da as ge ǁîb khami da ǀoasa kurusa ūhâ tama hâsa. Xawe da ge khoen ǀkhab gere sîsen ǀgaub ǃaroma a ǀnam bi. (1 Pet. 1:8) ǂKhâǃnâ-e da ge ra ǂansa ǁîb nēsi Elob Gaosib di Gao-aob ase ra ǂgaeǂguisa. ǁÎb ge ǀgūǁae hoa ǃgomsina nî ǀam kai. Khoeb aseb ge ǃhūbaib ai hâ i, amagab ge Jesuba khoen ǃgomsin hîna ǁGâuab xa ra ǃaromahena a ǀamǀam ǁkhā. ǀKhaesa da ge a nēti i ǂgaeǂgui-aob ‘sada ǂkhabusasigu ǀkha ǀkhomxasi-e ūhâsa.’—Heb. 2:17, 18; 4:15, 16.

14. Efeseǁîn 5:1, 2 ǃoagu da tae-e ra ǂkhâǃnâhe dīsa?

¹⁴ Jehovab tsî Jesub tsîkha di aiǁgaudi xa da ga ǂâi o, o da ge ra ǂkhâǃnâhe sada tsîna ǁkhā xū-e dītsâsa. (Khomai re Efeseǁîn 5:1, 2.) Sada ge ǁîkha khami khoen ǂgaoga a khomai ǁoa. Xawe da ge a dītsâ ǁkhā ǁîn di tsâsigu tsî ǂhâsigu tsîna ǁnâuǃāsa. (2Kor. 11:29) Nē eloxoresa ǃhūbaib hîna da ûi ǃnâ hâb xa i “mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.”—Fil. 2:4.

15. Hamga ǃgōsase tsâbaǁhaosa nî ǁgau?

¹⁵ ǀHaohâb ǃûi-aogu ge ǃgōsase tsâbaǁhaosa nî ǁgau. ǁÎgu ge a ǂan gūn ǁîgu ǃomǁae hâsa tsî gu ǁîn ǃereamsa tani hâsa. (Heb. 13:17) ǁÎgu ǃgâsana huis ǃaroma gu ge ǀhaohâb ǃûi-aoga ǁîna nî ǁnâuǃā. Matigu ǀhaohâb ǃûi-aoga tsâbaǁhaosa a ǁgau ǁkhā?

16. Tsâbaǁhao ra ǀhaohâb ǃûi-aoba tae-e ra dī tsî nēsa tae-i ǃaroma a ǂhâǂhâsa?

¹⁶ Tsâbaǁhaoxa ǀhaohâb ǃûi-aob ge ǁaeba ǃgâsan ǃgao nî ǁamaǂui. Nē ǀhaohâb ǃûi-aob ge dîna dî tsî ǃgaoǃgâxase nî ǃgâ. Nēs ge ǃgōsase a ǂhâǂhâsa nē gū-i di ǀgui-i ga ǁî-i ǂgaoba ǃhoaǂui ǂgao o. ǂHanuse i ga ǁgâiǂuisen tama i xawe. (ǂKhm. 20:5) ǁÎb di ǁaeba ǁnā ǃgâsa-e mās ǃnâ-ūb ge ǀhaohâb ǃûi-aoba ǂgomǃgâsib, ǀnammi tsî ǀhōsagusis tsîna ra omkhâi.—ǃNaeǃkhaidi 20:37.

17. ǂGui ǃgâsana tae-e ǀhaohâb ǃûi-aogu xa ra ǃgôaǃgâ? Aiǁgau-e mā re.

¹⁷ ǂGui ǃgâsan ge ra mî ǁîn ǀhaohâb ǃûi-aogu xan ra ǃgôaǃgâ xū-i ge ǁîgu ǃgâsana ra tsâba ǃkhaisa. Tae-i ǃaroma? “Nēs ge ǁîgu ǀkha ǃhoasa ra supusupu ǂan da a amaga ǁîgu nî ǁnâuǃā da ǃkhaisa,” dis ge Adelaidsa ra mî. ǁÎs ge ra mî: “ǂAnts ge a ǁîgu ra tsâba dasa ǃhoagu ra ǀgaub ǃnâ.” ǀGui ǃgâsab ge ra ǂâi-oa ǃgôaǃgâsib hînab ge ǁgauheb xa: “ǀHaohâb  ǃûi-aob mûra ǃnâ ta ge ǁgamroga ge mû ti ǃgomsibab ra ǃgâ hîna. ǁNāsa ta ge tātsē ǀuru tide.”—Rom. 12:15.

18. Mati da tsâbaǁhaosa a omkhâi ǁkhā?

¹⁸ Xawe ǀhaohâb ǃûi-aogu ǀguigu ge tsâbaǁhaosa a ǁgau ǁoa. Hoa da ge nēsa a dī ǁkhā. Mâ ǀgaub ǃnâ? Dītsâ re omaridi khoen tsî sada ǃgâsan tsîn ra tsâ ǃgomsina ǁnâuǃāsa. ǃGâiǃgâibasensa ǂkhamkhoen ǀhaohâb ǃnâ hân, ǀaesan hâ ǃgâsan, kaira hân tsî ǀgūkhoena ǁōb ǃnâ ǂoaǃna hâ ǃgâsan tsîna ǁgau re. Dî nî re matin ra ǂkhaisa. Tsî ǁgâiǂuisen an ra ǁaeb ǃnâ ǃgâ re. Mûǂan kai nî re, amabes ǃnâ du ra ǁnâuǃāsa ǃkharu ǃnân ra xūna. Hui ǁkhā du a ǀgaun hoan ǃnâ hui nî re. Nēsa da ga dī o, o da ge amabes ǃnâ da a ǀnam nîsa dīgu ǃnâ ra ǁgau.—1 Johaneb 3:18.

19. Tae-i ǃaroma da ǃgâsana huis ǃgao nî ǁnâuǃāxa?

¹⁹ Hoaǁae da ge nî hui ǀnamxa. Tae-i ǃaroma? ǀNî ǃgâsan ge ǃgomsina ǃkharagaguse ra sîsenǂam. ǀNîn ge supuse ra ǃhoa ǀnîn a ǃgombahe hîna. ǁNā-amaga da ge ǃgâsana huiba ra mā ǂgao xawe tā kaise ǃgam dîde nî dî. (1Tes. 4:11) ǀNîn ga ǁîn ǃgomsina mîba da xawe da ge hoaǁae ǁîn mûǂuiga ǃkhō-am tama hâ. Xawe da ge nî mûǂan nēs ge ǁîn ra tsâ ǀgausa. Xawe da ge nî ǃhae ǁnâusa tsî nî ǂau ǃhoas ǃnâ.—Mat. 7:1; Jak. 1:19.

20. Tae-e da sao ra ǁkhāǁkhāǃâs ǃnâ nî ǃhoaǃgao?

²⁰ Nēsa da ge ǀhaohâgu ǃnâ ǀgui ǁgau ǂgao tama hâ xawe sada aoǁnâ sîsenni ǃnâs tsîna ra ǁgau ǂgao. Mati da aoǁnâ sîsenni ǃnâ tsâbaǁhaosa a ǁgau ǁkhā? Nēsa da ge sao ra ǁkhāǁkhāǃâs ǃnâ nî ǃhoaǃgao.