1. Kej kiijtoua 1 Pedro 3:8, ¿kenke kuali timomachiliaj kema tiitstokej ininuaya katli kinekij kuali ma tijyolmatikaj uan kuali ma tiitstokaj?

NOCHI tiyolpakij kema tiitstokej ininuaya maseualmej katli kinekij kuali ma tijyolmatikaj uan kuali ma tiitstokaj. Inijuantij kichiuaj kampeka kiyolmatisej tlen tojuantij tijyolmatij uan kikuamachilisej tlen timoiljuiaj. Nimantsi kiitaj tlake techpoloua uan techpaleuiaj, kiampa kichiuaj maske kemantika amo tleno tikiniljuiaj. Tlauel tikinpatiitaj uan tikintlaskamatiliaj katli kichiuaj kampeka moiljuisej ipan tlen tijyolmatij uan ‘kipiasej san se ininyolo’ * kej tojuantij (xijpoua 1 Pedro 3:8).

2. ¿Kenke uelis tijmatij ouij tijkuamachilisej tlen sekinok kiyolmatij?

² Nochi Cristo itokilijkauaj tijnekij tijkuamachilisej tlen sekinok kiyolmatij. Maske tijnekij nopa, kemantika amo tijchiuaj pampa tielij titlajtlakolejkej (Rom. 3:23). Nojkia, moneki tijchiuasej kampeka amo san ipan tojuantij timoiljuisej, pampa nochi kiampa tijchiuaj. Uan uelis kej techiskaltijkej uan tlen techpanotok, kichiua ouij ma timoiljuikaj ipan tlen sekinok kiyolmatij. Uan kej maseualmej monejnemiltiaj nojkia kejuak techtsakuilia, pampa ipan itlamia tonali miakej maseualmej amo kinkuesoua tlen sekinok kiyolmatij uan san inijuantij moikneliaj (2 Tim. 3:1, 2). ¿Tlake techpaleuis amo ma techtsakuili yon se tlen ni tlamantli uan ma tijnextikaj techtekipachoua tlen sekinok kiyolmatij?

3. 1) ¿Tlake techpaleuis ma tijkuamachilikaj tlen sekinok kiyolmatij? 2) ¿Tlake tikitasej ipan ni tlamachtili?

³ Tlaj tijchiuasej kej Jehová uan Jesús kichiuaj, techpaleuis ma timoiljuikaj o ma tijyolmatikaj tlen sekinok kiyolmatij.  Jehová kuali technextilia kenijkatsa titeiknelisej pampa yaya eli nopa toTeotsij tlen kipia miak tlaiknelijkayotl (1 Juan 4:8). Uan Jesús kuali kinextik kenijkatsa eliyaya iTata (Juan 14:9). Kema itstoya ipan Tlaltipaktli, kinextik maseualmej uelis kinextisej teikneliaj. Ipan ni tlamachtili tikitasej kenijkatsa Jehová uan Jesús kinextijtokej kintekipachoua tlen sekinok kiyolmatij, uan teipa tikitasej kenijkatsa uelis tijchiuasej kej inijuantij.

4. ¿Kenijkatsa Isaías 63:7-9 kinextia Jehová nelia kitekipachoua tlen kiyolmatij itekipanojkauaj?

⁴ Biblia kiijtoua toTeotsij tlauel kipatiita tlen kiyolmatij katli kitekipanouaj. Ma tikitakaj kenijkatsa kiyolmatki kema israeleuanij kipixkej tlaouijkayotl. Biblia kiijtoua: “Ipan nochi inintlaijiyouilis yajaya nojkia tlaijiyouik” (xijpoua Isaías 63:7-9). Teipa, ika itlajtolpanextijka Zacarías, kiijtok kejuak ya kichiuiliyayaj tlen amo kuali kema kintlaijiyouiltiyayaj itekipanojkauaj. Ya kiniljuik itekipanojkauaj kema se akajya kintlaijiyouiltiyaya, eliyaya kejuak kikokouayayaj “iixteyol sitlal” (Zac. 2:8). Ni kinextia Jehová nelia kitekipachoua tlen kinpano itekipanojkauaj.

5. Xikijto se neskayotl kampa nesi kenijkatsa Jehová kinpaleuijtok itekipanojkauaj kema tlaijiyouiaj.

⁵ Kema toTeotsij itekipanojkauaj tlaijiyouiaj, ya amo san kintekneltiita, nojkia kichiua se keski tlamantli tlen ika kinpaleuia. Ma tikitakaj se neskayotl. Kema egiptoeuanij kinchiualtiyayaj israeleuanij ma tlatekipanokaj, Jehová kikuamachilik tlen kinpanoyaya, uan nopa kiyololinik ma kinmakixti. Kiiljuik Moisés: “Nikitstok kejatsa tlaijiyouiaj notlakauaj [...]. Nijkaktok keja chokaj [...] pampa tlauel tlaijiyouiaj. Yeka nitemotok para nikinmakixtis ininmako nopa egiptojmej” (Éx. 3:7, 8). Kinmakixtik pampa kiyolkokouayaya tlen kinpanoyaya. Kema panok miak xiuitl, kema itstoyaj ipan nopa tlali tlen kintenkauilijtoyaj, se keskij altepemej kintlaijiyouiltiyayaj. ¿Kenijkatsa kiyolmati Jehová? Biblia kiijtoua moyolkokouayaya “pampa kinkakiyaya kejatsa ayijtiyayaj kema kintlaijiyouiltiyayaj ininkualankaitakauaj”. Pampa kiyolkokouayaya tlen kinpanoyaya, ya kinpaleuik uan kintlalik tetlajtolsenkauanij katli kinmakixtiskiaj tlen ininkualankaitakauaj (Juec. 2:16, 18).

6. Xikijto kenijkatsa Jehová kikuamachilik tlen kiyolmatiyaya se itekipanojka katli mokuapolojtoya.

 ⁶ Jehová nojkia kinextia kikuamachilia tlen kiyolmatij itekipanojkauaj maske mokuapolouaj. Ma tikitakaj tlen kipanok tlajtolpanextijketl Jonás. ToTeotsij kititlanki ma kiniljuiti maseualmej katli itstoyaj Nínive kintsontlamiltiskia tlaj amo moyolpatlaskiaj. Níniveeuanij moyolkuepkej, yeka Jehová kintlapojpoljuik. Tlen panok tlauel kikualankamakak Jonás pampa amo mochijki tlen ya kiijtojtoya. Jehová kipixki iyolo ika Jonás uan kipaleuik ma kipatla tlen moiljuiyaya (Jon. 3:10–4:11). Teipa, Jonás kikuamachilik tlen panok, uan toTeotsij kichijki ma kiijkuilo tlen kipanok ipan Biblia pampa kimatiyaya ueliskia techpaleuis (Rom. 15:4). *

7. ¿Kenijkatsa techpaleuia tijmatisej Jehová kinpaleuijtok itekipanojkauaj?

⁷ Tlen Jehová kichijki kema kinpaleuik itekipanojkauaj kichiua ma timotemachikaj ya nelia kikuamachilia tlen tijyolmatij. Ya kuali kimati kenijkatsa moyolkokouaj uan tlaijiyouiaj sejse tlen itekipanojkauaj. Pampa san ya kiixmati “inintlalnamikilis uan ininyolo nochi tlakamej” (2 Crón. 6:30). Ya kuali kikuamachilia tlen timoiljuiaj uan tlen eltok ipan toyolijtik, uan kimati tlen amo ueli tijchiuaj. Uan nojkia techiljuia amo kikauas ma tijpiakaj se tlayejyekoli tlen amo uelis tikijiyouisej (1 Cor. 10:13). ¡Nelia tlauel techyolchikaua tijmatisej ni tlamantli!

8-10. ¿Tlake kipaleuik Jesús ma motekipacho ipan tlen sekinok kinpanoyaya?

⁸ Kema Jesús itstoya ipan Tlaltipaktli, kinextik kitekipachouayaya tlen kinpanoyaya sekinok. Uelis eyi tlamantli kipaleuik kiampa ma kichiua. Se: kej ya tikitakej, Jesús kinextik nopa kuajkuali tlamantli tlen iTata kinextia. Jesús kinikneliyaya maseualmej sanse kej Jehová. Maske yolpakiyaya pampa kipaleuik iTata kema kichijchijki nochi tlen onka, ya san maseualmej tlauel kiniknelik (Prov. 8:31). Uan pampa kinikneliyaya maseualmej, kitekipachouayaya tlen kinpanoyaya.

⁹ Ome: sanse kej Jehová, Jesús ueliyaya kiita tlen maseualmej kipixtoyaj ipan ininyolo, nopa kiijtosneki kimatiyaya tlen moiljuiyayaj uan tlen kiyolmatiyayaj (Mat. 9:4; Juan 13:10, 11). Yeka, kema kiitayaya mokuesojtoyaj o motekipachojtoyaj, tlen kiyolmatiyaya kiyololiniyaya ma kinyolchikaua (Is. 61:1, 2; Luc. 4:17-21).

¹⁰ Eyi: Jesús nojkia kipixki kuesoli tlen maseualmej kipixtoyaj. Kampa moskaltik, ichampoyouaj amo tlatominpixtoyaj. Uan pampa tekitik iuaya itata José, kiyekok kichijchiuas se keski tlamantli kampa monekiyaya kitekiuis ichikaualis (Mat. 13:55; Mar. 6:3). Uan nojkia kimatki kenijkatsa kiyolmatiyayaj sekinok kema mikiyaya se akajya katli kiikneliyayaj, pampa uelis José mijki kema Jesús ayamo peuayaya tlajtolmoyaua. Uan nojkia se keskij tlen ichampoyouaj amo kipixtoyaj sanse inintlaneltokilis kej ya (Juan 7:5). Ni uan sekinok tlamantli kipaleuik ma kikuamachili nopa kuesoli tlen maseualmej kipixtoyaj uan ma kiyolmati tlen inijuantij kiyolmatiyayaj.

11. ¿Kema Jesús kinextik nelia kikuamachiliyaya tlen sekinok kiyolmatiyayaj? (Xikita tlaixkopinkayotl tlen ipantsajka).

¹¹ Kema Jesús kichijki uejueyi tlamantli kinextik nelia kikuamachiliyaya tlen sekinok kiyolmatiyayaj. Kichijki nopa pampa tlauel kinikneliyaya maseualmej katli tlaijiyouiyayaj uan amo san pampa ya nopa monekiyaya kichiuas (Mat. 20:29-34; Mar. 1:40-42). Ma timoiljuikaj  tlake kiyolmatki kema kiuejkatlalik uan kichikajki se tlakatl katli amo tlakakiyaya o kema kiyolkuik iyojtsi ikone se siuatl katli ya miktoya iueue (Mar. 7:32-35; Luc. 7:12-15). Jesús kiyolmatki tlen inijuantij kiyolmatiyayaj uan kinejki kinpaleuis.

12. Kej kiijtoua Juan 11:32-35, ¿kenijkatsa Jesús kinextik kiyolmatki tlen kiyolmatiyayaj Marta uan María?

¹² Kema Lázaro mijki, Jesús nojkia kiyolmatki tlen kiyolmatiyayaj Marta uan María. Kema kiitak kenijkatsa tlauel tlaijiyouiyayaj, nojkia chokak (xijpoua Juan 11:32-35). Ya amo san kichokilik iuampo pampa ayokmo itstoskia iuaya, pampa kimajtoya kiyolkuiskia. Ya mochokilik pampa kiyolkokouayaya kinitas kenijkatsa iuampoyouaj tlauel mokuesouayayaj.

13. ¿Kenke techyolchikaua tijmatisej Jesús kiyolkokoua kema sekinok tlaijiyouiaj?

¹³ Tojuantij tielij titlajtlakolejkej, yeka amo tielij sanse kej Jesús. Maske kiampa tielij, tlauel techpaleuia tikitasej kenijkatsa Jesús kikuamachiliyaya tlen sekinok kiyolmatiyayaj. Uan tlauel tikikneliaj kema tikitaj kenijkatsa kinpaleuik maseualmej (1 Ped. 1:8). Nojkia, tlauel tiyolpakij pampa yaya tekichijtok ipan toTeotsij iTlanauatijkayo uan pampa nechka kitlamiltis nochi tlaijiyouilistli. Pampa ya nojkia elki se maseuali, yaya kinamiki kikualtlalis nochi tlen Satanás kichijtok. Tlauel kuali tijyolmatij pampa toTlanauatijka “techtlasojtla kema axtijpiaj fuerza” (Heb. 2:17, 18; 4:15, 16).

14. ¿Tlake techyololinia ma tijchiuakaj tlen kiijtoua Efesios 5:1, 2?

¹⁴ Kema tikitaj tlen Jehová uan Jesús kichiuaj, techyololinia nojkia ma tijchiuakaj kampeka tijyolmatisej tlen sekinok kiyolmatij (xijpoua Efesios 5:1, 2). Maske tojuantij amo tiuelij tijmatij tlen maseualmej kipiaj ipan ininyolo, kena uelis tijchiuasej kampeka tijkuamachilisej tlen moyoliljuiaj uan tlen kinpoloua (2 Cor. 11:29). Maske maseualmej san mosentlaliaj ipan tlen inijuantij kinpoloua uan kiyolmatij, tojuantij tijchiuaj kampeka tijchiuasej tlen apóstol Pablo kiijtok: “Amo san ximoiljuikaj tlen tlamantli tlen inmechpaleuis. Nojkia ximoiljuikaj tlen kinpaleuis sekinok” (Filip. 2:4).

15. ¿Ajkia inijuantij tlauel moneki kikuamachilisej tlen kiyolmatij toikniuaj?

¹⁵ Ueuejtlakamej tlauel moneki kinextisej kikuamachiliaj tlen kiyolmatij toikniuaj. Inijuantij kimatij se tonali Jehová kintlajtlanis kenijkatsa kinmokuitlauijkej toikniuaj (Heb. 13:17). Yeka, tlaj kinekij kinpaleuisej, moneki kinextisej kikuamachiliaj tlen kinpano. ¿Kenijkatsa uelis kinextisej nopa?

16. ¿Tlake kichiuaj ueuejtlakamej katli teikneliaj, uan kenke tlauel moneki kichiuasej nopa?

¹⁶ Ueuejtlakamej katli teikneliaj uan kikuamachiliaj tlen kinpano toikniuaj kichiuaj kampeka itstosej ininuaya. Kintlatsintokiaj tlake kinpano uan kuali kintlakakiliaj, uan nochipa kinextiaj kipiaj ininyolo. Tlauel moneki kichiuasej ni tlamantli tlaj se toikni katli tlaijiyouijtok kineki kiniljuis tlen kipano uan amo kimati kenijkatsa kiniljuis (Prov. 20:5). Kema ueuejtlakamej kikixtiaj tonali uan kinpaleuiaj toikniuaj, kichiua kuali ma mouikakaj, ma motemachikaj ipan inijuantij uan ma moiknelikaj (Hech. 20:37).

17. ¿Tlake kipatiitaj toikniuaj tlen se ueuejtlakatl? Xikijto se neskayotl.

¹⁷ Miakej toikniuaj kiijtouaj tlauel kipatiitaj kema ueuejtlakamej kinextiaj kintekipachoua tlen kinpano. ¿Kenke kiampa kiyolmatij? Adelaide kiijtoua: “Amo ouij tikamanaltis ininuaya pampa kikuamachiliaj tlen tijyolmatij. Kema tikamanaltis ininuaya, tlen kiijtouaj o tlen kichiuaj kinextia inijuantij nojkia kiyolmatij tlen tojuantij tijyolmatij”. Se toikni tlauel kitlaskamati nopa, kiijtoua: “Kema nikiljuiyaya  se ueuejtlakatl se kuesoli tlen nijpixtoya, pejki ixayochoka. Amo kema nikilkauas nopa” (Rom. 12 :15).

18. ¿Kenijkatsa uelis tijnextisej tijkuamachiliaj tlen sekinok kiyolmatij?

¹⁸ Amo san ueuejtlakamej moneki kichiuasej nopa pampa nochi tojuantij uelis tijnextisej techtekipachoua tlen kiyolmatij sekinok. ¿Kenijkatsa uelis tijchiuasej nopa? Ma tijchiuakaj kampeka tijkuamachilisej nochi kuesoli tlen kinpano tochampoyouaj uan toikniuaj. Ma tikinpaleuikaj telpokamej, katli mokokouaj, katli ueuejtixtokej uan katli mijki se tlen ininchampoyouaj. Ma tikintlajtlanikaj kenijkatsa itstokej uan kuali ma tijtlakakilikaj tlen techiljuisej. Uan ika tlen tijchiuasej, ma kimatikaj nelia tijkuamachiliaj tlen kinpano. Ma tikiniljuikaj tijnekij tikinpaleuisej ipan tlen ueli tlamantli. Tlaj tijchiuasej ni, tijnextisej nelia tikinikneliaj (1 Juan 3:18).

19. ¿Kenke moneki tikilnamikisej amo nochi sanse kiyolmatij kema kinpano se kuesoli?

¹⁹ Kema tijnekisej tikinpaleuisej sekinok, moneki tikilnamikisej amo nochi sanse kiyolmatij kema kipiaj se kuesoli. Sekij kimatij ouij kiijtosej tlake kinpano, uan sekinok nimantsi techiljuiaj. Uajka, maske tijnekij tikinpaleuisej, moneki amo tikintlajtlanisej se tlenijki tlen amo kinpaktis o kinyolkokos (1 Tes. 4:11). Uan maske uelis kemantika amo techpaktis tlen kiyolmati se akajya, moneki tijkuamachilisej ya kiampa kiyolmati. Yeka, moneki kuali tijtlakakilisej uan amo nima tikijtojtiuetsisej se tlenijki (Mat. 7:1; Sant. 1:19).

20. ¿Tlake tikitasej ipan seyok tlamachtili?

²⁰ Amo san ipan tlanechikoli moneki tijchiuasej nopa, nojkia ipan tlajtolmoyaualistli moneki tijchiuasej kampeka tijkuamachilisej tlen maseualmej kiyolmatij. ¿Kenijkatsa uelis tijchiuasej ni kema titlajtolmoyauaj uan kema tikinpaleuiaj sekinok ma mochiuakaj Cristo itokilijkauaj? Tikitasej ni ipan seyok tlamachtili.