1. Metsokumwe naPetrus gwotango 3:8, omolwashike hatu nyanyukilwa okukala naantu mboka ye na ko nasha nomaiyuvo getu nosho wo nonkalonawa yetu?

OHATU nyanyukilwa okukala naamboka ye na ko nasha nomaiyuvo getu nosho wo nonkalonawa yetu. Ohaya kambadhala okwiitula moongaku dhetu, opo ya tale kutya otatu dhiladhila shike nenge otu uvite ngiini. Ohaya tala kutya otwa pumbwa shike e taye tu kwathele, nomathimbo gamwe ohaye shi ningi nokuli manga inaatu ya pula. Ohatu kala twa lenga aantu mboka ye tu nine ‘euvitopamwe.’ * — Lesha 1 Petrus 3:8.

2. Omolwashike twa pumbwa okulonga nuudhiginini, tu ulike okunakonasha?

² Tu li Aakriste, atuheni otwa hala okuulika olukeno nenge okunakonasha. Nonando ongawo, haaluhe hashi kala oshipu. Omolwashike? Etompelo limwe, omolwaashono inatu gwanenena. (Rom. 3:23) Onkee ano, natu kondje twa mana mo tu kale hatu dhiladhila kombinga yayalwe. Shimwe ishewe, yamwe yomutse otashi vulika tatu nyengwa okuulika okunakonasha, omolweputuko lyetu nenge molwoonkalo ndhoka twa pita mudho monakuziwa. Otatu vulu wo okunwethwa mo kiikala yaantu mboka ye tu kundukidha. Momasiku ngaka gahugunina, aantu oyendji kaye na ko nasha nomaiyuvo gayalwe. Pehala lyaashono, oyi ‘ihole mwene.’ (2 Tim. 3:1, 2) Oshike tashi vulu oku tu kwathela tu sinde omashongo ngoka hage shi ningitha oshidhigu tu kale tu na ko nasha nomaiyuvo gayalwe?

3. (a) Ongiini tatu vulu okuhwepopala mokuulika olukeno? (b) Oshike tatu ka kundathana moshitopolwa shika?

³ Otatu vulu okuhwepopala mokuulika olukeno, ngele otwa  holele Jehova Kalunga nosho wo Omwana, Jesus Kristus. Jehova oye Kalunga kohole, nokwe tu tulila po oshiholelwa dhingi shokukala tu na ko nasha nayalwe. (1 Joh. 4:8) Jesus okwa li a holele thiluthilu uukwatya waHe. (Joh. 14:9) Sho a li kombanda yevi, okwa li a ulike nkene omuntu ta vulu okuulika olukeno. Moshitopolwa shika, otatu ka kundathana tango nkene Jehova naJesus ya li ya ulike kutya oye na ko nasha nomaiyuvo gayalwe. Opo ihe, tatu ka kundathana nkene tatu vulu oku ya holela.

4. Jesaja 63:7-9 otadhi ulike ngiini kutya Jehova oku na ko nasha nomaiyuvo gaapiya ye?

⁴ Ombiimbeli otayi ti kutya Jehova oku na ko nasha nomaiyuvo gaapiya ye. Pashiholelwa, tala nkene a li e uvite, sho Aaisraeli ya li moonkalo oondhigu. Ombiimbeli otayi ti: ‘Okwe ya nikile uuthigwa, e te ya hupitha komahepeko gawo agehe.’ (Lesha Jesaja 63:7-9.) Lwanima, okupitila momuhunganeki Sakaria, Jehova okwa ti kutya uuna oshigwana she tashi hepekwa, oha kala a fa oye ta hepekwa. Jehova okwa li a lombwele aapiya ye a ti: “Oongoka te mu gumu, ota gumu ondanda yeho lyandje.” (Sak. 2:8, NW) Shoka itashi ulike tuu kutya Jehova oku na ko nasha naapiya ye!

5. Gandja oshiholelwa shankene Jehova a katuka onkatu a kwathele aapiya ye mboka ya li taya mono iihuna.

⁵ Jehova iha kala owala e uvitile olukeno aapiya ye mboka taya mono iihuna. Oha katuka oonkatu e ya kwathele. Pashiholelwa, sho Aaisraeli ya li muupika waEgipiti, Jehova okwa li e wete okumona iihuna kwawo, naashoka oshe mu inyengitha e ya kwathele. Jehova okwa lombwele Moses a ti: “Onda mono, nkene aantu yandje taa hepekwa . . . ; ondu uvu taa kugile emanguluko . . . . Onda tseya omahepeko gawo agehe, onkee nda kuluka ndi ya mangulule mAayegipiti.” (Eks. 3:7, 8) Molwaashono Jehova okwa li e uvitile aapiya ye olukeno, okwe ya mangulula mo muupika. Konima yomathelemimvo, Aaisraeli oya li ya ponokelwa kaatondi yawo mEvi lyEuvaneko. Jehova okwi inyenge ngiini? Ombiimbeli otayi ti: ‘Omuwa okwe ya sile ohenda, oshoka oya kugu muupyu womahepeko nowomalwa gawo.’ Natango, olukeno olwi inyengitha Jehova a kwathele aapiya ye. Okwa tumu aatokolihapu ya hupithe Aaisraeli kaatondi yawo. — Aatok. 2:16, 18.

6. Gandja oshiholelwa shankene Jehova a li e uvitile gumwe ngoka okudhiladhila kwe kwa li kwa puka.

 ⁶ Jehova oha ulike kutya oku na ko nasha nomaiyuvo gaapiya ye, nokuli nonando okudhiladhila kwawo ihaku kala aluhe ku li mondjila. Tala koshiholelwa shaJona. Kalunga okwa li a tumu omuhunganeki ngoka a ka uvithile Aaninive etumwalaka lyepangulo. Sho yi itedhulula, Jehova okwa tokola kee ya hanagule po. Nonando ongawo, Jona ka li e shi nyanyukilwa. Okwa “geye,” shaashi shoka a hunganeke inashi gwanithwa. Ihe Jehova okwa li i idhidhimikile Jona, nokwe mu kwathele a lundulule okudhiladhila kwe. (Jona 3:10–4:11) Mokweendela ko kwethimbo, Jona okwa uvu ko shoka Jehova a li te mu longo, e te mu longitha nokuli a nyole oshinima shika, omolwuuwanawa wetu. — Rom. 15:4. *

7. Momukalo moka Jehova a ungaunga naapiya ye, otagu tu shilipaleke shike?

⁷ Momukalo moka Jehova a ungaunga naapiya ye, otagu tu shilipaleke kutya oha kala e ya uvitile olukeno. Oha kala e wete nkene tu uvite nosho wo okumona iihuna kwetu. Jehova okwa “tseya omadhiladhilo gomomutima gwomuntu.” (2 Ondjal. 6:30) Oku uvite ko omadhiladhilo getu, omaiyuvo nosho wo omangambeko getu. Ye “ite [tu] ethele memakelo li vule oonkondo [dhetu].” (1 Kor. 10:13) Euvaneko ndyoka itali tu hekeleke tuu!

8-10. Iinima yini ya li ya kwathele Jesus a kale e na ko nasha nayalwe?

⁸ Sho Jesus a li kombanda yevi, okwa li ha ulike kutya oku na ko nasha lela nayalwe. Opu na iinima itatu mbyoka ye mu kwathele a kale e na ko nasha nayalwe. Shotango, ngaashi sha popiwa metetekelo, Jesus okwa li a ulike thiluthilu omaukwatya ga fa gaHe. Ngaashi He, Jesus naye okwa li e hole aantu. Nonando okwa li a nyanyukilwa iinima ayihe mbyoka a kwathele Jehova mokushita, ‘okwa li unene a nyanyukilwa aana yaantu.’ (Omayel. 8:31) Ohole oya li yi inyengitha Jesus a kale e na ko nasha nomaiyuvo gayalwe.

⁹ Oshitiyali, ngaashi Jehova, Jesus naye okwa li ha vulu okulesha omitima. Okwa li ha vulu okumona shoka tashi inyengitha aantu ya ninge sha nosho wo nkene ye uvite. (Mat. 9:4; Joh. 13:10, 11) Onkee ano, sho Jesus a mono kutya aantu oye na oomwenyo dha nyanyagulwa, okunakonasha okwe mu inyengitha e ya hekeleke. — Jes. 61:1, 2; Luk. 4:17-21.

¹⁰ Oshititatu, Jesus ye mwene naye okwa li a piti mugamwe gomomashongo ngoka aantu ya li ye na. Pashiholelwa, aniwa Jesus okwa putukila muukwanegumbo wa hepa. Sho a li ha longo naJosef, he ngoka a hokana yina, Jesus okwi ilongo okulonga iilonga iidhigu yokomake. (Mat. 13:55; Mark. 6:3) Osha fa shi li ngeyi kutya Josef okwa si, manga Jesus inaa mana uukalele we. Onkee ano, otashi vulika Jesus a li a mono nkene omuntu ha kala e uvite, uuna a silwa. Jesus okwa li wo e shi kutya onkalo ohayi kala yi li ngiini muukwanegumbo wa topoka palongelokalunga. (Joh. 7:5) Oonkalo ndhoka nosho wo dhilwe, odhi na okukala dha li dha kwathele Jesus a uve ko omashongo nosho wo omaiyuvo gaantu.

11. Uunake Jesus a li e shi ulike kutya oku na ko nasha lela naantu? Shi yelitha. (Tala ethano lyokombanda.)

¹¹ Jesus okwa li a ulike kutya oku na ko nasha lela nayalwe, moku ya ningila iikumithalonga. Iikumithalonga mbyoka ka li owala e yi longo molwaashono e na oku yi longa. Pehala lyaashono, okwa li ha “sile ohenda” mboka taya mono iihuna. (Mat. 20:29-34; Mark. 1:40-42) Pashiholelwa, dhiladhila owala kutya Jesus okwa li e uvite ngiini, sho a kutha omulumentu  gumwe ombolo maantu e te ke mu thitulula. (Mark. 7:32-35; Luk. 7:12-15) Jesus okwa li e uvitile aantu mboka olukeno nokwa li a hala oku ya kwathela.

12. Johannes 11:32-35, otadhi ulike ngiini nkene Jesus a li e uvitile Marta naMaria uukwawo wanankali?

¹² Jesus okwa li a ulukile Marta naMaria uukwawo wanankali. Sho a mono ya nika oluhodhi, omolweso lyomumwayinamati, Lasarus, “Jesus okwa lili.” (Lesha Johannes 11:32-35.) Ina lila owala molwaashoka a silwa kuume ke kopothingo. Pehala lyaashono, okwa lili, molwaashoka okwa li e uvite ko onkalo yookuume ke nokwa li e ya uvitile olukeno. Nokuli okwa li e shi kutya ota ka yumudha Lasarus.

13. Omolwashike hashi tu tsu omukumo okutseya kutya Jesus oha kala e uvitile aantu olukeno?

¹³ Ohashi tu tsu omukumo okutseya kutya Jesus oha kala e uvitile yalwe olukeno. Odhoshili kutya inatu gwanenena ngaashi ye. Ihe otu mu hole, molwaashono okwa li ha ungaunga naantu nolukeno. (1 Pet. 1:8) Ohashi tu tsu omukumo okutseya kutya ngashingeyi ota pangele e li Omukwaniilwa gwUukwaniilwa waKalunga. Masiku ota ka hulitha po okumona iihuna akuhe. Ota vulu lela okukwathela aantu ya aluke kiilalo mbyoka ya etelwa kuSatana, molwaashoka naye oko a li kombanda yevi. Otwa yambekwa shili, sho tu na Omupangeli ngoka e “uvitile uunkundi wetu olukeno.” — Heb. 2:17, 18; 4:15, 16.

14. Aaefeso 5:1, 2, otadhi tu inyengitha tu ninge shike?

¹⁴ Ngele tatu dhiladhila koshiholelwa shoka twa tulilwa po kuJehova naJesus, ohashi tu inyengitha natse tu kale tu uvitile yalwe olukeno. (Lesha Aaefeso 5:1, 2.) Ihatu vulu okulesha omitima dhaantu ngaashi yo. Nonando ongawo, ohatu kambadhala okuuva ko omaiyuvo gayalwe nokutala kutya oya pumbwa shike. (2 Kor. 11:29) Aantu mboka ye tu kundukidha oyi ihole yo yene, ihe tse ohatu kambadhala ‘okulalakanena uuwanawa wooyakwetu, haamboka ashike wetu yene.’ — Fil. 2:4.

15. Oolye unene ya pumbwa okuulika olukeno?

¹⁵ Aakuluntugongalo oyo unene ya pumbwa okuulika olukeno. Oye shi shi kutya otaye ki ihokolola kuJehova, omolwomukalo moka haya ungaunga noonzi dhe. (Heb. 13:17) Opo ya vule okukwathela ooitaali ooyakwawo, oya pumbwa okukala ye na olukeno. Aakuluntugongalo otaya vulu ngiini okuulika kutya oye na ko nasha nayalwe?

16. Omukuluntugongalo ngoka e na olukeno oha ningi shike, nomolwashike sha simana?

¹⁶ Omukuluntugongalo ngoka e na olukeno, oha mono ompito yokukala naamwatate naamwameme. Ohe ya pula omapulo nokupulakena kuyo neitulomo noneidhidhimiko. Shoka osha simanenena, unene tuu ngele onzi yimwe oya hala oku mu mbumbulila omutima gwayo, ihe kayi wete kutya nayi shi ende ngiini. (Omayel. 20:5) Ngele omukuluntugongalo oha mono ompito a kale naamwatate, ohashi mu ningitha a pange uukuume nayo, ya kale yi inekelathana nokukala ye holathane lela. — Iil. 20:37.

17. Aamwatate naamwameme oyendji, ohaya popi shike shono ya lenga maakuluntugongalo? Gandja oshiholelwa.

¹⁷ Aamwatate naamwameme oyendji, ohaya ti kutya uukwatya mboka ya lenga maakuluntugongalo, olukeno. Omolwashike? Adelaide okwa ti: “Ohashi kala oshipu okupopya nayo, molwaashoka oho kala wu shi kutya otaya ka uva ko onkalo yoye.” Okwa gwedha ko a ti: “Oto vulu okumona kutya oye na olukeno, momukalo moka haye ku yamukula, uuna to popi nayo.” Omumwatate gumwe ngoka a pandula omukuluntugongalo gumwe, ota ti: “Onda li nda mono nkene omukuluntugongalo gumwe  a kengeleka, sho tandi mu lombwele onkalo yandje. Oshinima shoka itandi shi dhimbwa nando.” — Rom. 12:15.

18. Ongiini tatu vulu okukokeka uukwatya wolukeno?

¹⁸ Aakuluntugongalo hayo ayeke ya pumbwa okuulika olukeno. Atuheni otatu vulu okukala tu na uukwatya mboka. Ngiini mbela? Kambadhala okuuva ko oonkalo oondhigu moka yaandjeni nosho wo ooitaali ooyakweni ye li. Ulika kutya owu na ko nasha naagundjuka yomimvo omulongo nasha yomegongalo lyeni, mboka taye ehama, aakokele naamboka ya silwa. Ya pula kutya otaye shi enditha ngiini. Kala wa shoka okutsi, sho taye ku lombwele nkene ye uvite. Ya ulukila kutya owu uvite ko lela onkalo yawo. Ya kwathela mpoka to vulu. Uuna tatu shi ningi, otatu ulike ohole yashili okupitila miilonga. — 1 Joh. 3:18.

19. Omolwashike twa pumbwa okukala hatu tifuka, uuna tatu kwathele yalwe?

¹⁹ Otwa pumbwa okukala hatu tifuka, uuna tatu kambadhala okukwathela yalwe. Omolwashike? Omolwaashoka aantu ohayi inyenge momikalo dhi ili nodhi ili, uuna ye li muupyakadhi. Yamwe oye hole okupopya omaupyakadhi gawo, ihe yamwe kaye hole oku ga popya. Onkee ano, otwa hala oku ya kwathela, ihe natu yande oku ya pula omapulo ge na ko nasha unene niinima yopaumwene. (1 Tes. 4:11) Nonando yamwe oye tu lombwele omaupyakadhi gawo, otashi vulika haaluhe tatu ka tsa kumwe naashoka taya popi. Ihe otu na okudhimbulukwa kutya osho ye uvite ngaaka. Otwa hala tu kale hatu pulakene mbala, ihe ohatu ikwata mokupopya. — Mat. 7:1; Jak. 1:19.

20. Oshike tatu ka kundathana moshitopolwa tashi landula?

²⁰ Kakele kokuulika kutya otu na ko nasha naantu megongalo, otwa hala okuulika uukwatya mboka, uuna tatu uvithile yalwe. Ongiini tatu vulu oku shi ninga? Shoka otatu ke shi kundathana moshitopolwa tashi landula.