1. Moloʼö 1 Fetero 3:8, hana wa omuso dödöda na so ita ba gotalua niha soʼameʼegö tödö hadia nirasoida hegöi salua khöda?

TATU omuso dödöda na so ita ba gotalua niha soʼameʼegö tödö hadia nirasoida hegöi salua khöda. Laforege enaʼö laʼila hadia niʼangeragöda hegöi nirasoida. Aboto ba dödöra hadia zoguna khöda ba omasi latolo ita hewaʼae na lö niʼandröda khöra. Tatu taʼandrö sibai saohagölö ba niha sangoromaʼö wa ’larasoi zafökhö khöda’. *—Baso 1 Fetero 3:8.

2. Hadia mbörö wa tenga saoha ba worasoi hadia nirasoi niha böʼö?

² Yaʼita niha Keriso, tatu omasi ita ba wangoromaʼö wa tarasoi hadia nirasoi niha böʼö. Hizaʼi, tenga saoha ba wamalua yaʼia. Hadia mbörö? Oya zi möi börö, sambua moroi ba gotaluania yaʼia daʼö börö me lö moʼahonoa ita. (Rom. 3:23) Daʼö mbörö wa aolo dödöda ba woʼameʼegö tödö yaʼita samösa ba abua khöda ba woʼangeragö soguna ba niha böʼö. Baero daʼö, lala ba wangebuaʼö yaʼita mazui si no irai alua khöda ba zilalö zi möi börö waʼabua khöda worasoi salua ba niha böʼö. Tedönisi göi dödöda ba gamuata niha si so ba zi fasuida. Ba ngaluo safuria, ato niha ’sangalui tana khöra’ ba lö laʼameʼegö tödö nirasoi niha böʼö. (2 Tim. 3:1, 2) Hewisa lalada ba wanaögö fefu daʼa?

3. (a) Hadia zanolo yaʼita enaʼö itugu tarasoi hadia ia nirasoi niha böʼö? (b) Hadia nitutunöda ba wamahaʼö daʼa?

³ Tola itugu tarasoi hadia ia nirasoi niha böʼö na taʼoʼö duma-duma Lowalangi Yehowa hegöi Ononia Yesu Keriso. Yehowa no Lowalangi sebua faʼomasi, ba no ibeʼe khöda duma-duma  sabölö sökhi ba worasoi hadia nirasoi niha böʼö. (1 Yoh. 4:8) Moʼahonoa göi Yesu ba woloʼö duma-duma Namania. (Yoh. 14:9) Me auri Yesu tobali niha ba gulidanö, iforomaʼö hewisa lala niha ba wangoromaʼö faʼahakhö dödö. Ba wamahaʼö daʼa, tatutunö hewisa Yehowa hegöi Yesu ba woʼameʼegö tödö nirasoi niha böʼö. Aefa daʼö, tatutunö göi hewisa lalada ba woloʼö duma-dumara.

4. Moloʼö Yesaya 63:7-9, hewisa wangoromaʼö Yehowa wa iʼameʼegö tödö nirasoi nono mbanuania?

⁴ Ifahaʼö ita Sura Niʼamoniʼö wa iʼameʼegö tödö Yehowa hadia nirasoi nono mbanuania. Duma-dumania, datafaigi hewisa dödö Yehowa me oya wamakao salua ba ndraono Gizaraʼeli me föna. Imane Sura Niʼamoniʼö, ”Tosasa ira, fefu, ba tosasa ia göi.” (Baso Yesaya 63:7-9.) Ba gafuriata, ifatunö samaʼeleʼö sotöi Zakharia wa iwaʼö Yehowa, na lafakao nono mbanuania, irasoi Yehowa wa hulö yaʼia nifakao. Imane ba nono mbanuania, ’Me no sombambaya ono hörögu zombambaya yaʼami.’ (Zakh. 2:8) Daʼa khala-khala sahöli-höli dödö, sangoromaʼö wa iʼameʼegö tödö nono mbanuania Yehowa!

5. Beʼe duma-duma sangoromaʼö wa itolo Yehowa nono mbanuania nifakao.

⁵ Tenga ha ahakhö dödö Yehowa ba nono mbanuania si göna famakao. Itolo göi ira. Duma-dumania, me tefakao ndraono Gizaraʼeli me tobali ira sawuyu ba Miserai, irasoi Yehowa hadia nirasoira ba tefarou dödönia ba wanolo yaʼira. Imane Yehowa khö Moze, ”No irege ginötö ufaigi wamakao mbanuagu andrö . . . , ba no urongo wangarö-ngaröra andrö . . . noa sa uʼila waʼabölö-bölö wamakaora andrö. Andrö möido tou saʼae, ba wangefaʼö yaʼira ba danga ndrawa Miserai.” (2 Moz. 3:7, 8) Börö me ahakhö dödö Yehowa ba nono mbanuania, iʼefaʼö ira moroi ba wangosawuyu. Hauga ngaotu fakhe aefa daʼö, me toröi ndraono Gizaraʼeli ba Danö Amabuʼula, lasuwö ira udu. Hewisa dödö Yehowa? ”So sa waʼahakhö dödö Yehowa ba wangarö-ngaröra andrö ba zamakao yaʼira, ba zamalangögö yaʼira andrö.” Börö me irasoi hadia nirasoi nono mbanuania, andrö ifuli itolo ira Yehowa.​—Zangu. 2:16, 18.

6. Beʼe duma-duma sangoromaʼö wa iʼameʼegö tödö Yehowa nirasoi nono mbanuania, hewaʼae ba ginötö fasala lala wangera-ngerara.

 ⁶ Iʼameʼegö tödö Yehowa nirasoi nono mbanuania, hewaʼae ba ginötö fasala lala wangera-ngerara. Angeragö duma-duma Yona. Ifatenge ia Yehowa ba wangombakha turia wanguhuku ba Niniwe. Me lafalalini gera-erara, lö alua ihori ira Lowalangi. Hizaʼi, lö omuso dödö Yona ba gangetula nihalö Lowalangi. ”Mofönu ia” börö me turia nifaʼemania lö alua. Hizaʼi, ebolo dödö Yehowa khö Yona ba itolo ba woʼatulöʼö lala wangera-ngera Yona. (Yo. 3:10–4:11) Ba gafuriata, aboto ba dödö Yona hadia wamahaʼö nibeʼe Yehowa khönia, ba iʼogunaʼö ia Yehowa ba wanura salua andrö börö me soguna khöda daʼö. —Rom. 15:4. *

7. Hadia nifaduhusida tödö moroi ba nifalua Yehowa khö nono mbanuania?

⁷ Nifalua Yehowa khö nono mbanuania, zamaduhuʼö ba dödöda wa irasoi hadia nirasoida. Iʼila waʼafökhö hegöi famakao nirasoi zi samösa-mösa niha. Yehowa ”zangila tödö nono niha”. (2 Nga. 6:30) Iʼila fefu gera-erada, nirasoida hegöi soʼamböta ita. Aefa daʼö, ’lö ilulu ita ba wanandraigö si tebai tataha’. (1 Kor. 10:13) Möi fondrara dödöda mbuʼusa li andrö!

8-10. Hadia manö zangoromaʼö wa aboto ba dödö Yesu hadia nirasoi niha böʼö?

⁸ Me auri Yesu ba gulidanö tobali niha, aboto ba dödönia hadia nirasoi niha böʼö. Si löʼö-löʼönia so tölu zangoromaʼö wa simane daʼö Yesu. Si oföna, simane nitutunöda moroi yawa, fagölö mbua-bua Yesu simane khö Namania. Iʼomasiʼö niha Yesu simane Amania. Me fao ia ba wanolo Yehowa ba wamazökhi ngawalö hadia ia, omuso dödö Yesu ba wamaigi fefu niwöwöi andrö. Mendrua manö ’somuso tödö ia ba nono niha’. (Gamd. 8:31) Börö me iʼomasiʼö niha, andrö wa iʼameʼegö tödö hadia nirasoira.

⁹ Si dua, simane Yehowa tola iʼila Yesu nösi dödö. Iʼila hadia nirasoi niha ba hana wa lafalua zimane daʼö. (Mat. 9:4; Yoh. 13:10, 11) Me iʼila Yesu abu dödö niha, aboto ba dödönia hadia nirasoira irege ibeʼe wondrara dödö.​—Yes. 61:1, 2; Luk. 4:17-21.

¹⁰ Si tölu, no irai göi alua khö Yesu hadia nirasoi niha böʼö. Duma-dumania, teʼebuaʼö Yesu ba nösi nomo si numana. Me falulu fohalöwö ia khö namania Yosefo, si tenga amania sindruhu, ifomaha ia ba wamalua halöwö sabua. (Mat. 13:55; Mrk. 6:3) Mate Yosefo fatua lö ibörögö Yesu halöwö fanuriaigönia. Tobali no irai irasoi Yesu hewisa waʼabu dödö ba ginötö mate niha niʼomasiʼönia. Aboto göi ba dödönia, hewisa rasonia na so nösi nomoda si tenga si sara lala ba wamati. (Yoh. 7:5) Börö me no irasoi samösa daʼa hegöi tanö böʼönia, andrö aboto ba dödö Yesu wamakao nitaögö niha hegöi nirasoira.

11. Hezo tola taʼila wa irasoi Yesu hadia nirasoi niha böʼö? Tutunö. (Faigi gambara ba guli majalah.)

¹¹ Tola taʼila hadia nirasoi Yesu mendrua manö ba ginötö ifalua dandra sahöli-höli dödö. Ifalua dandra sahöli-höli dödö tenga börö me no sinangea ifalua daʼö. Hizaʼi, börö ”waʼahakhö dödönia” ba wamaigi niha si göna abula dödö. (Mat. 20:29-34; Mrk. 1:40-42) Duma-dumania, khalaigö hadia nirasoi Yesu irege iʼohe samösa ndra matua safiso fandröndröu moroi ba gotalua niha sato ba ifadöhö niha andrö. Khalaigö göi hadia  nirasoi Yesu irege isusugi samösa nono matua si ha sambua, ono lakha mbanua. (Mrk. 7:32-35; Luk. 7:12-15) Börö me aboto ba dödö Yesu hadia nirasoi ndra niha daʼö, andrö wa omasi ia ba wanolo yaʼira.

12. Moloʼö Yohane 11:32-35, hewisa Yesu ba wangoromaʼö wa irasoi hadia nirasoi Marata hegöi Maria?

¹² Iforomaʼö göi Yesu wa irasoi hadia nirasoi Marata hegöi Maria. Me iʼila abu dödöra börö me mate dalifusöra Lazaro, ”ilau meʼe Yesu”. (Baso Yohane 11:32-35.) Meʼe ia tenga ha börö me no mate zi fahuwu khönia. Aboto göi ba dödönia wa lö ara tö isusugi Lazaro. Meʼe Yesu börö me fao ia ba worasoi faʼafökhö nirasoi zi fahuwu khönia.

13. Na tafahaʼö ita wa aboto ba dödö Yesu hadia nirasoi niha böʼö, hadia gunania khöda daʼö?

¹³ Ba ginötö tafahaʼö ita wa aboto ba dödö Yesu hadia nirasoi niha böʼö, so gunania khöda. Itugu taʼomasiʼö ia börö me taʼila wa iforomaʼö waʼahakhö dödö ba niha böʼö. (1 Fet. 1:8) Itugu teʼabölöʼö ita börö me taʼila wa iadaʼa no tobali ia Razo ba Wamatörö Lowalangi. Ba zi lö ara tö, iheta dania fefu wamakao. Börö me no irai auri Yesu tobali niha ba gulidanö, yaʼia zabölö tefaudu ba wangefaʼö niha moroi ba waʼafökhö hegöi famakao nibeʼe Zatana. Tatu taʼandrö sibai saohagölö khö Razoda, börö me ”aboto ba dödönia wa ambö faʼabölöda”.​—Heb. 2:17, 18; 4:15, 16.

14. Moloʼö Efeso 5:1, 2, ba wamalua hadia ia tefarou dödöda?

¹⁴ Na taʼangeragö duma-duma Yehowa hegöi Yesu, tola tefarou dödöda ba wangoromaʼö ba niha böʼö wa tarasoi hadia nirasoira. (Baso Efeso 5:1, 2.) Tebai taʼila nösi dödö niha simane yaʼira. Hewaʼae simanö, tola taforege enaʼö aboto ba dödöda hadia nirasoi niha böʼö hegöi hadia zoguna khöra. (2 Kor. 11:29) Tenga simane niha ba ginötö iadaʼa sangalui tanö khöra, moguna khöda ’ba woʼangeragö zoguna ba niha böʼö, tenga ha soguna khöda manö’.​—Fil. 2:4.

15. Haniha nasa zinangea mangoromaʼö wa larasoi hadia nirasoi niha böʼö?

¹⁵ Mendrua manö ira satua sokubaloi moguna laforomaʼö wa larasoi hadia nirasoi niha böʼö. Aboto ba dödöra wa khöra dania tezofu-zofu sanandrösa ba wondrorogö mbiri-biri Yehowa. (Heb. 13:17) Moguna aboto ba dödö ndra satua sokubaloi hadia nirasoi ndra talifusö ba gangowuloa enaʼö tola labeʼe wanolo. Hewisa ndra satua sokubaloi ba wangoromaʼö wa larasoi hadia nirasoi niha böʼö?

16. Hadia nifalua zi samösa satua sokubaloi sangoromaʼö wa irasoi hadia nirasoi ndra talifusönia, ba hana wa moguna daʼö?

¹⁶ Na iforomaʼö zi samösa satua sokubaloi wa irasoi hadia nirasoi ndra talifusönia, tatu ibeʼe ginötönia khöra. Ibeʼe wanofu khöra ba ihaogö ifondrondrongo si fao faʼebolo dödö hadia niwaʼöra. Moguna sibai daʼa, mendrua manö na so mbiri-biri somasi manutunö hadia nirasoinia hizaʼi lö iʼila hadia zinangea iwaʼö. (Gamd. 20:5) Na omasi zatua sokubaloi ba wameʼe inötönia khö ndra talifusö, tola itugu ahatö ira, itugu laʼomasiʼö nawöra ba itugu faduhu dödöra khö nawöra.​—Hal. 20:37.

17. Moloʼö dalifusöda sato hadia zinangea iʼokhögö samösa satua sokubaloi? Beʼe duma-duma.

¹⁷ Ato ndra talifusöda sangumaʼö wa moloʼö yaʼira, moguna sibai khö zatua sokubaloi ba wangoromaʼö wa irasoi hadia nirasoi niha böʼö. Hadia mbörö? Imane Adelaide, ”Itugu aoha khöda fahuhuo khöra börö me taʼila wa larasoi hadia nirasoida. Ba ginötö fahuhuo ita khöra ba taʼila hewisa wanemaʼöra, ba daʼö tola taʼila hadia sindruhu-ndruhu  aboto ba dödönia hadia nirasoida.” Imane samösa talifusöda ira matua sangandrö saohagölö börö me iʼameʼegö tödö ia satua sokubaloi, ”Me ututunö khönia zalua khögu, uʼila moʼala hörönia. Lö irai uʼolifugö daʼö.”​—Rom. 12:15.

18. Hewisa wondrouʼöda ba wangoromaʼö wa tarasoi hadia nirasoi niha böʼö?

¹⁸ Tatu manö, tenga ha satua sokubaloi zi tola mangoromaʼö ba worasoi hadia nirasoi niha böʼö. Fefu ita moguna tadouʼö gamuata daʼö. Hewisa lalania? Moguna taʼila hadia zalua ba nösi nomoda hegöi khö ndra talifusöda. Moguna öforomaʼö wa öʼameʼegö tödö zi bohou ebua si so ba mbanua niha Keriso, niha sofökhö, si no alawa ndröfi, mazui niha si göna abula dödö börö me mate niha niʼomasiʼöra. Sofu duriara. Haogö wamondrongo ba ginötö latutunö nösi dödöra. Foromaʼö khöra wa sindruhu-ndruhu aboto ba dödömö hadia nirasoira. Beʼe khöra wanolo si tola öfalua. Na tafalua daʼa fefu, no taforomaʼö waʼomasi soroi ba dödö.​—1 Yoh. 3:18.

19. Hana wa moguna tafaudugö hadia nifaluada ba ginötö tatolo niha böʼö?

¹⁹ Ba ginötö taʼodödögö ba wanolo niha böʼö, moguna tafaudugö hadia nifaluada. Hadia mbörö? Börö me faböʼö-böʼö wanemaʼö ero samösa niha na alua gabula dödö. So zomasi manutunö ba so göi zi löʼö. Hewaʼae omasi ita ba wanolo yaʼira, moguna taʼangenanöi wanofu nibeʼeda. (1 Tes. 4:11) Itaria, hewaʼae no itutunö zi samösa niha hadia zalua khönia, tola manö lö fao dödöda ba niwaʼönia. Hizaʼi moguna tatörö tödöda wa daʼö nirasoira. Moguna alio khöda wamondrondrongo ba böi tahulö wehede.​—Mat. 7:1; Yak. 1:19.

20. Hadia nitutunöda ba wamahaʼö aefa daʼa?

²⁰ Tenga ha ba mbanua niha Keriso taforomaʼö wa tarasoi hadia nirasoi niha böʼö, moguna taforomaʼö göi daʼa ba ginötö manuriaigö ita. Hewisa wangoromaʼöda ba ginötö tatolo niha tobali nifahaʼö? Tatutunö daʼa ba wamahaʼö aefa daʼa.