1. Go ya ka 1 Petro 3:8, ke ka baka la’ng re rata go gwerana le batho bao ba nago le taba le rena le go naganela maikwelo a rena?

RE RATA go gwerana le batho bao ba nago le taba le rena e bile ba naganela maikwelo a rena. Batho bao ba leka ka gohle go kwešiša maikwelo a rena. Le gona ba kgona go bona seo re se hlokago gomme ba re thuša le pele re ka ba kgopela thušo. Ruri re rata batho bao ba re ‘kwelago bohloko.’ *—Bala 1 Petro 3:8.

2. Ke ka baka la’ng go se bonolo go kwela ba bangwe bohloko?

² Ka ge re le Bakriste, ka moka ga rena re nyaka go kwelana bohloko, goba go naganelana. Eupša ga se ka mehla go lego bonolo go dira bjalo? Ka baka la’ng? Lebaka le lengwe ke gore ga se ra phethagala. (Rom. 3:23) Ke ka baka leo re nago le mokgwa wa go inaganela kudu go feta go naganela batho ba bangwe. Ka gona re swanetše go leka ka gohle go naganela ba bangwe. Le gona ba bangwe ba rena re ka ba re palelwa ke go bontšha kwelobohloko ka baka la tsela yeo re godišitšwego ka yona goba ka baka la dilo tšeo di ilego tša re diragalela bophelong. Se sengwe gape ke gore re phela le batho bao ba inaganelago kudu, mekgwa ya bona e ka re fetela. Mehleng ye ya bofelo batho ga ba na taba le maikwelo a batho ba bangwe. Go e na le moo ke “baithati.” (2 Tim. 3:1, 2) Re ka thušwa ke’ng gore re lwantšhe dilo tše tšeo di ka re paledišago go kwela ba bangwe bohloko?

3. (a) Re ka thušwa ke’ng gore re be le kwelobohloko? (b) Re tlo ithuta’ng sehlogong se?

³ Ge re ka ekiša Jehofa Modimo le Morwa wa gagwe Jesu Kriste, re tlo kgona go kwelana bohloko. Modimo ke lerato, le  gona o bea mohlala o mobotse kudu tabeng ya go naganela ba bangwe. (1 Joh. 4:8) Ge Jesu a be a le mo lefaseng o ile a ekiša dika tša Tatagwe. (Joh. 14:9) O ile a bontšha kamoo motho a swanetšego go bontšha kwelobohloko ka gona. Sehlogong se re tlo ithuta kamoo Jehofa le Jesu ba bontšhitšego gore ba na le taba le batho ba bangwe. E bile re tlo ithuta le kamoo re ka ekišago mohlala wa bona.

4. Go ya ka Jesaya 63:7-9, ke’ng seo se bontšhago gore Jehofa o na le taba le maikwelo a batho ba gagwe?

⁴ Beibele e ruta gore Jehofa o na le taba le maikwelo a bahlanka ba gagwe. Ka mohlala, nagana kamoo Jehofa a bego a ikwa ka gona ge setšhaba sa Baisiraele se be se welwa ke mathata a mantši. Lentšu la Modimo le re: “Tlalelong ka moka ya bona le yena o be a tlalelwa.” (Bala Jesaya 63:7-9.) Ka morago ga moo, Jehofa o ile a diriša Sakaria go bolela gore ge Baisiraele ba be ba tlaišega, go be go le bjalo ka ge eka go tlaišega Jehofa ka boyena. Jehofa o ile a botša bahlanka ba gagwe gore: “Yo a le kgwathago o kgwatha thaka ya leihlo la ka.” (Sak. 2:8) Ruri mantšu a a bontšha gore Jehofa o tloga a na le taba le batho ba gagwe!

5. Jehofa o ile a dira’ng gore a thuše bahlanka ba gagwe bao ba bego tlaišega? Nea mohlala.

⁵ Jehofa ga a no kwela batho bohloko eupša e bile o dira se sengwe go ba thuša. Ka mohlala, ge Baisiraele ba be ba tlaišega kua Egipita, Jehofa o ile a ba kwela bohloko gomme a dira se sengwe gore ba se sa tlaišega. O ile a botša Moshe gore: “Ruri ke bone mohlako wa batho ba ka . . .  e bile ke kwele sello sa bona . . . ke tseba mahloko a bona gabotse. Ke theogela kua tlase go yo ba hlakodiša seatleng sa Baegipita.” (Ek. 3:7, 8) Ka ge Jehofa a be a kwela batho ba gagwe bohloko, o ile a ba ntšha bokgobeng kua Egipita. Mengwaga e mentši ka morago ga moo, ge Baisiraele ba be ba le Nageng ya Kholofetšo, ba ile ba hlaselwa ke manaba a mantši. Jehofa o ile a arabela bjang? Beibele e re: “[O ile a kwa] bohloko ka ge ba be ba tsetsela ka baka la bao ba bego ba ba gatelela le bao ba bego ba ba hlakiša.” Le lekgeng le, Jehofa o ile a kwela batho ba gagwe bohloko gomme a dira se sengwe gore a ba thuše. O ile a diriša baahlodi gore ba phološe setšhaba sa gagwe go manaba a sona.—Baa. 2:16, 18.

6. Hlalosa kamoo Jehofa a ilego a bontšha gore o na le taba le maikwelo a motho yo a bego a nagana ka tsela e fošagetšego.

 ⁶ Jehofa o na le taba le maikwelo a batho ba gagwe le ge ba fela ba ikwa goba ba nagana ka tsela e fošagetšego. Nagana ka Jona. Modimo o ile a mo roma go yo botša Baninife molaetša wa kahlolo. Baninife ba ile ba itshola gomme Modimo a se ba fediše. Eupša Jona ga se a thabela seo. O ile a “tuka bogale” ka gobane seo a bego a se boletše mabapi le Baninife se ile sa se phethagale. Eupša Jehofa o ile a se mo felele pelo gomme a mo thuša go lokiša tsela yeo a naganago ka yona. (Jona 3:10–4:11) Mafelelong Jona o ile a kwešiša seo Jehofa a bego a mo ruta sona gomme Jehofa o ile a mo diriša go ngwala pego ye bakeng sa go hola rena.—Baroma 15:4. *

7. Tsela yeo Jehofa a ilego a dirišana le bahlanka ba gagwe ka yona e re kgonthišetša’ng?

⁷ Tsela yeo Jehofa a dirišanago le batho ba gagwe, e tloga e re kgonthišetša gore ka nnete o ba kwela bohloko. O tseba mathata le ditlaišego ka moka tša yo mongwe le yo mongwe wa rena. Ka nnete Jehofa o “[tseba] dipelo tša bana ba batho.” (2 Dikor. 6:30) O kwešiša dilo ka moka tšeo re di naganago, maikwelo a rena a ka garegare le dilo tšeo di re palelago. Le gona “a ka se [re] lese [re] lekwa go feta kamoo [re] ka kgonago go kgotlelela ka gona.” (1 Bakor. 10:13) Ruri mantšu a a kgothatša kudu!

8-10. Ke dilo dife tšeo di ka bago di ile tša thuša Jesu go kwela batho bohloko?

⁸ Ge Jesu a be a le mo lefaseng o ile a bontšha gore o na le taba le batho ba bangwe. Go na le dilo tše tharo tšeo di thušitšego Jesu gore a kwele ba bangwe bohloko. Sa pele, ka ge re kwele pejana, Jesu o be a ekiša dika tša Jehofa. Go swana le Tatagwe, Jesu o be a rata batho. Le ge Jesu a ile a thabela dilo ka moka tšeo a bego a thuša Jehofa go di dira, o be a ‘kgahlwa kudu ke bana ba batho.’ (Die. 8:31) Go rata batho go be go hlohleletša Jesu go naganela maikwelo a bona.

⁹ Sa bobedi, Jesu o be a kgona go bona dipelo tša batho go no swana le Jehofa. O be a kgona go bona maikwelo a bona le seo ba se naganago. (Mat. 9:4; Joh. 13:10, 11) Ka gona, ge Jesu a be a bona gore batho ba nyamile o be a ba kwela bohloko gomme a ba homotša.—Jes. 61:1, 2; Luka 4:17-21.

¹⁰ Sa boraro, Jesu o ile a lebeletšana le a mangwe a mathata ao batho ba sa phethagalago ba bego ba lebeletšana le ona. Ka mohlala, go bonagala Jesu a goletše ka lapeng la badiidi. Jesu o ile a ithuta go dira mošomo o thata wa go betla ge a be a šoma le tatagwe yo a mo godišitšego, e lego Josefa. (Mat. 13:55; Mar. 6:3) Le gona go ka direga gore Josefa o ile a hwa nako e itšego pele Jesu a ka thoma bodiredi bja gagwe. Ge e ba go le bjalo, Jesu o swanetše go ba a be a tseba bohloko bja go hwelwa ke motho yo a mo ratago. Le gona Jesu o be a tseba gore go bjang go dula ka lapeng le tee le batho bao ba sa hlankelego Jehofa. (Joh. 7:5) Maemo ao le a mangwe a ka ba a ile a thuša Jesu go kwešiša mathata le maikwelo a batho ba sa phethagalago.

11. Jesu o ile a bontšha bjang gore o tloga a na le taba le batho? Hlalosa. (Bona seswantšho sa letlakala la ka ntle.)

¹¹ Jesu o ile a dira mehlolo go bontšha gore o tloga a na le taba le batho. Jesu ga se a dira mehlolo feela go no phetha molao. Eupša o be a ‘hlomoga pelo,’ goba a kwela batho bohloko ge a ba bona ba tlaišega. (Mat. 20:29-34; Mar.  1:40-42) Ka mohlala, nagana kamoo Jesu a ilego a ikwa ka gona ge a be a tšea monna yo e bego e le sefoa lešabeng gore a yo mo fodiša ka thoko. Le gona nagana kamoo a ilego a ikwa ka gona ge a be a tsoša morwa a nnoši wa mohlologadi yo a itšego. (Mareka 7:32-35; Luka 7:12-15) Jesu o ile a kwela batho bao bohloko gomme a tutueletšega go ba thuša.

12. Go ya ka Johane 11:32-35, Jesu o ile a bontšha bjang gore o kwela Mareta le Maria bohloko?

¹² Jesu o ile a kwela Mareta le Maria bohloko. Ge a be a ba bona ba llela ngwanabo bona Latsaro yo a bego a hwile, o ile “a ntšha megokgo.” (Bala Johane 11:32-35.) Jesu ga se a no lla ka gobane mogwera wa gagwe a hwile. O be a tseba gore o tlo mo tsoša bahung. Ka gona, o ile a lla ka gobane a kwešiša kamoo Mareta le Maria ba bego ba ekwa bohloko ka gona.

13. Go tseba gore Jesu o kwela batho bohloko go dira gore re ikwe bjang?

¹³ Ruri go tseba gore Jesu o kwela batho bohloko go re kgothatša kudu. Ke nnete gore Jesu o be a phethagetše eupša rena ga se ra phethagala. Ka gona, re a mo rata ka gobane o be a kwela batho bohloko. (1 Pet. 1:8) Re thaba kudu go tseba gore gona bjale o buša e le Kgoši ya Mmušo wa Modimo. Kgauswinyane o tlo fediša tlaišego ka moka. Ka ge a ile a phela mo lefaseng, ke yena a tlogago a swanelega go tlo lokiša mathata le go fediša tlaišego yeo e bakilwego ke mmušo wa Sathane. Ruri re thabela go ba le Kgoši yeo ‘e re kwelago bohloko mafokoding a rena.’—Baheb. 2:17, 18; 4:15, 16.

14. Go ya ka Baefeso 5:1, 2, ge re nagana ka mohlala wa Jehofa le Jesu re ikwa re tutueletšega go dira’ng?

¹⁴ Ge re nagana ka mohlala wa Jehofa le Jesu wa go bontšha batho kwelobohloko, le rena re tutueletšega go kwela ba bangwe bohloko. (Bala Baefeso 5:1, 2.) Ke nnete gore rena ga re kgone go bona dipelo tša batho. Eupša re ka leka ka gohle go kwešiša maikwelo a bona. (2 Bakor. 11:29) Go fapana le batho ba lefase bao ba nago le boithati, rena ga re ‘kgahlegele ditaba tša rena feela, eupša re kgahlegela le tša ba bangwe.’—Bafil. 2:4.

15. Ke bomang bao ba swanetšego go bontšha kwelobohloko kutšwanyana?

¹⁵ Bagolo ba swanetše go leka ka thata go bontšha phuthego kwelobohloko kutšwanyana. Ba a tseba gore ba tlo ikarabela go Jehofa ka tsela yeo ba swarago dinku tša gagwe. (Baheb. 13:17) E le gore bagolo ba kgone go thuša Bakristegotee le bona, ba swanetše go ba le kwelobohloko. Bagolo ba ka bontšha bjang gore ba kwela ba bangwe bohloko?

16. Mogolo yo a nago le kwelobohloko o dira’ng, gona ke ka baka la’ng seo se le bohlokwa?

¹⁶ Mogolo yo a nago le kwelobohloko o fetša nako a na le Bakristegotee le yena. O ba botšiša dipotšišo gomme a ba theetša ka kelohloko le ka go se ba felele pelo. Go dira bjalo go bohlokwa, kudukudu ge motho a nyaka go tšhollela mogolo sa mafahleng eupša a sa tsebe gore a thome bjang. (Die. 20:5) Ge mogolo a ipha nako ya go ba le Bakristegotee le yena, seo se dira gore ba mo tshepe. E bile segwera sa bona se tla gola gomme ba mo rata kudu.—Dit. 20:37.

17. Bana babo rena ba bantši le dikgaetšedi ba re ke seka sefe seo ba se ratago kudu go bagolo? Nea mohlala.

¹⁷ Bana babo rena le dikgaetšedi ba bantši ba re seka se bohlokwa kudu seo ba se ratago go bagolo ke kwelobohloko. Ka baka la’ng? Kgaetšedi Adelaide o itše: “Go bonolo go bolela le bona ka gore o a tseba gore ba tlo go kwešiša.” O ile a ba a re: “O kgona go bona gore ba go kwela bohloko ka tsela yeo ba arabelago ka yona ge o bolela le bona.” Ngwanabo rena yo mongwe o re: “Ke ile ka bona mahlo a mogolo a tletše megokgo ge ke be ke mo  hlalosetša mathata a ka. Nka se tsoge ke lebetše seo.”—Baroma 12:15.

18. Re ka dira’ng gore re bontšhe ba bangwe kwelobohloko?

¹⁸ Ke nnete gore ga se bagolo feela bao ba swanetšego go bontšha ba bangwe kwelobohloko. Ka moka ga rena re swanetše go ithuta go ba le seka se. Bjang? Leka go kwešiša mathata ao ba leloko le Bakristegotee le wena ba nago le ona. Bontšha bafsa ba ka phuthegong, batšofadi le bao ba hlokofaletšwego gore o na le taba le bona. Ba botšiše gore dilo di sepela bjang. Ba theetše ka kelohloko ge ba go botša maikwelo a bona. Dira gore ba bone gore o a ba kwešiša. Ke moka o ba thuše ka tsela le ge e le efe yeo o ka kgonago. Ge re ka dira bjalo, re tla ba re bontšha gore re tloga re ba rata.—1 Joh. 3:18.

19. Ke ka baka la’ng re swanetše go fetofetoga le maemo ge re leka go thuša ba bangwe?

¹⁹ Re swanetše go fetofetoga le maemo ge re thuša ba bangwe. Ka baka la’ng? Ka gobane batho ga ba arabele go swana ge ba lebeletšane le mathata. Ka mohlala, batho ba bangwe ba lokologa go bolela ka pela, mola ba bangwe ba sa rate go botša batho ba bangwe mathata a bona. Ka gona ge re nyaka go thuša batho ga se ra swanela go botšiša dipotšišo tšeo di ka ba dirago gore ba ikwe ba lewa ke dihlong. (1 Bathes. 4:11) Le ge ba ka re botša maikwelo a bona, ga se ka mehla moo re ka dumelelanago le seo ba re botšago sona. Lega go le bjalo, re swanetše go gopola gore ba re botša kamoo bona ba ikwago ka gona. Re nyaka go akgofela go kwa gomme re diege go bolela.—Mat. 7:1; Jak. 1:19.

20. Re tlo ithuta’ng sehlogong se se latelago?

²⁰ Ke therešo gore re nyaka go bontšha ba bangwe kwelobohloko ka phuthegong, eupša re nyaka le go e bontšha le ba bangwe ge re le tšhemong. Re ka dira seo bjang? Sehlogong se se latelago re tlo araba potšišo ye.