LONGO DIA 12
Dihage ha Fundo dia Athu Ako
‘Mudi naye . . . gudisha ha fundo dia aphangi enu.’—1 PHET. 3:8.
LUNGIMBO 90 Encourageons-nous les uns les autres
NDAGA JIDI MU LONGO EDI *
1. Ha gutadila 1 Phetelo 3:8, mukunda natshi tuana gusuanguluga gukhala nu athu ana gudihaga ha fundo dietu?
TUANA gusuanguluga gukhala nu athu ana gudihaga ha fundo dietu, nu ana gukamba gubonga guetu. Ha gudisha ha fundo dietu, ana gukamba gukotelesa matangi etu nu luholo tuana gudivua. Ana gumona ndaga tudi najio funu, gungima ana gutukuatesa ngatshima khenji tutoga ndo ukuateshi. Tuana gusuanguluga nu athu ana gumonesa khadilo dia ‘gudisha ha fundo’ * dietu.—Tanga 1 Phetelo 3:8.
2. Mukunda n’atshi tudi naye gutshita ngolo ha gudisha ha fundo dia athu ako?
2 Esue Aklisto, tudi naye gudisha ha fundo dia aphangi etu. Uvi gudisha ha fundo dia muthu muko gushigo ndaga yaleba. Mukunda natshi? Ndaga ya thomo, mukunda tushigo athu atagana. (Lomo 3:23) Tudi naye gulua nu khadilo diabola tuana guvualewa nadio dia gukamba phamba gubonga guetu. Ya mbadi, aphangi ako ana gumona lamba ha gudisha ha fundo dia athu ako mukunda nu luholo akudile nga mukunda nu ndaga ataganele najio. Ya thathu, athu tudi nawo hehi ajiya nji gubolesa khadilo dietu. Mu masugu awa a gisugishilo, athu avula anago gudisha ha fundo dia athu ako, uvi ana ‘gudizumba hakhawo.’ (2 Tim. 3:1, 2) Itshi yajiya gutukuatesa ha gubinga ndaga jiana gutukanga njila ha gudisha ha fundo dia athu ako?
3. (a) Itshi yajiya gutukuatesa ha gudisha ha fundo dia athu ako? (b) Ndaga jitshi tuza muzuelela mu longo edi?
3 Gulandula gifezegeso gia Yehowa nu Mun’enji guajiya gutukuatesa ha gudisha ha fundo dia athu ako. Yehowa udi Nzambi waguzumba, wana guhana gifezegeselo giabonga mu ndaga yatadila gudisha ha fundo dia athu ako. (1 Yone 4:8) Yesu walandudile gifezegeselo gia Yehowa muabonga diago. (Yone 14:9) Hakhalele muene ha mavu, wamonesele luholo lua gudisha ha fundo dia athu ako. Mu longo edi, tumuza mumona thomo luholo Yehowa nu Yesu adihagele ha fundo dia athu ako. Tumuza mumona luko luholo lua gulandula gifezegeselo giawo.
YEHOWA WANA GUDISHA HA FUNDO DIA ATHU AKO
4. Ha gutadila Yeshaya 63:7-9, luholo lutshi Yehowa wana gudisha ha fundo dia akombeledi enji?
4 Biblia yana gulongesa egi Yehowa wana gudisha ha fundo dia akombeledi enji. Ha gufezegesa, tangiza luholo Yehowa wadivile tangua enya Isalele ataganele nu malamba. Biblia idi muzuela egi: ‘Hakhalele ene mu malamba, muene nji wakhalele muvua gikenene’. (Tanga Yeshaya 63:7-9.) Gungima, Yehowa wazuelele mu njila ya profete Zakaliya egi hakhalele athu enji mumonesewa lamba, yakhalele gifua muene udi mumonesewa lamba. Yehowa wawambelele akombeledi enji egi: “Muthu wagasue wamikuata enue, udi mukuata gana ga iso diami.” (Zak. 2:8, NWT) Yehowa wahanele diago gifezegeselo giabonga gia gudisha ha fundo dia akombeledi enji!
Yehowa wavuile khenda hene wazolele enya Isalele mu uhiga gu Egypte (Tala paragrafe 5)
5. Hana gifezegeselo gidi mumonesa luholo Yehowa wakuatesele akombeledi enji akhalele mumona malamba.
5 Yehowa wanago gusuga phamba ha guvua khenda mukunda nu akombeledi enji adi mumona lamba, uvi wana guakuatesa nji. Ha gufezegesa, hakhalele enya Isalele mumona lamba mu uhiga gu Egypte, Yehowa wakotelesele lamba diawo, wazudile desizio dia guakuatesa. Wawambelele Moise egi: ‘Ngamona muabonga lamba dia athu ami . . . , ngavua gudila gudi muadidisa tuphita tuawo . . . Ngajiya muabonga malamba awo. Ame ngudi mubulumuga ha guahuluisa gu mago a enya Egypte.’ (Guz. 3:7, 8) Yehowa wavidile akombeledi enji khenda hene waazolele mu uhiga. Gungima dia ivo, tangua enya Isalele akhalele mu mavu a gutendelela, mbalagaji jiakhalele gualuisa. Yehowa wadivile gikuatshi? ‘Wavile khenda hakhalele ene mudila mukunda nu lamba diakhalele muamonesa mbalagaji jiawo.’ Yehowa wadihagele ha fundo dia akombeledi enji hene waakuatesele. Watumine manzuji ha guhuluisa enya Isalele ha mago a mbalagaji jiawo.—Manz. 2:16, 18.
6. Hana gifezegeselo gidi mumonesa luholo Yehowa wakuatesele muthu mumoshi wakhalele thomo nu matangi abola.
6 Yehowa wana gudisagesa mukunda nu akombeledi enji ngatshima luholo luawo lua gutangiza lushigo luabonga. Tuzuelele gifezegeselo gia Yona. Nzambi wamutumine ha guya muwambela enya Nivive egi mbawuasophesa. Tangua abalumuine mitshima, Nzambi waavidile khenda. Uvi, Yona wasuangulugilego nu desizio diene. ‘Wavuile jikhabu jiabala’ handaga profesi yenji yataganelego. Uvi Yehowa wamonesele khadilo dia guhuiminyina, wakuatesele Yona ha gusombegesa matangi enji. (Yona 3:10–4:11) Gungima, Yona wakotelesele muabonga, hene Yehowa wamutogele ha gusonega lumene luenji ha gutukuatesa esue.—Lomo 15:4. *
7. Ndaga jiana gutshita Yehowa mukunda nu akombeledi enji jidi gutumonesa itshi?
7 Ndaga jiana gutshita Yehowa mukunda nu akombeledi enji, jidi gutumonesa egi wana gudisha ha fundo diawo. Wana gujiya muabonga malamba muthu nu muthu mukatshi dietu wana gutagana nawo. Yehowa wana ‘gujiya muabonga mutshima wa muku’a muthu.’ (2 Gudi. 6:30) Wana gukotelesa matangi etu a moshi’a mutshima, nu luholo tuana gudivua, nu tangua ngolo jietu jiana gusuga. Luko, “mbagashigo mutshigina egi [tulolewe] gubalega ngolo [jietu].” (1 Kol. 10:13, NWT) Ndaga eyi idi muhana diago gikhesa!
YESU WANA GUDISHA HA FUNDO DIA ATHU AKO
8-10. Yajiya gukhala egi ndaga jitshi jiakuatesele Yesu ha gudihaga ha fundo dia athu ako?
8 Hakhalele Yesu ha mavu, wakhalele gudihaga muavula ha fundo dia athu ako. Gudi nu ndaga thathu jiatshitshile egi akhale nu khadilo diene. Ya thomo, gifua luholo tuayizuelela gutuama, Yesu walandudile makalegelo a Yehowa muabonga diago. Wakhalele muzumba athu gifua luholo Sh’enji wana guazumba. Yesu wakuatesele Sh’enji ha gufuga ima yavula, wakhalele musuanguluga diago nu ima yene, uvi wakhalele ‘musuanguluga muavula nu athu.’ (Ish. 8:31) Guzumba guatumine Yesu ha gudisha ha fundo dia athu ako.
9 Ya ngiadi, Yesu nji wakhalele mujiya ndaga jidi mu mitshima ya athu, luholo lumoshi nu Yehowa. Wakhalele mujiya matangi a athu nu luholo akhalele gudivua. (Mat. 9:4; Yone 13:10, 11) Hakhalele Yesu mukotelesa egi athu adi nu gikenene, wakhalele guahana gikhesa, handaga wakhalele gudisha ha fundo diawo.—Yesh. 61:1, 2; Luka 4:17-21.
10 Ya thathu, Yesu wataganele nji nu malamba ako akhalele musagesa athu. Ha gufezegesa, yana gumonega haphelo egi fami ya Yesu yakhalelego nu umonyi. Hakhalele muene mutshita mudimo nu Yozefe tata wamusasele, Yesu wakhalele mutshita mudimo wakola. (Mat. 13:55; Mako 6:3) Yajiya gukhala egi Yozefe wafile matangua azonda gutuama egi Yesu asugise mudimo wenji ha mavu. Hakiene, idi mumonega egi Yesu wavuile nji gikenene tuana guvua gula muthu tuana guzumba wafua. Luko, Yesu wavuile nji luholo tuana gudivua gila athu ako a mu fami yetu ashigo akombeledi a Yehowa. (Yone 7:5) Tuajiya guzuela egi ndaga jiene jiagasue jiakhalele mukatshi dia ndaga jiakuatesele Yesu ha gukotelesa malamba a athu nu ha gudihaga ha fundo diawo.
Yesu wakatula gifua-matshui mukatshi dia athu gutuama egi amusage (Tala paragrafe 11)
11. Itshi yamonesele haphelo egi Yesu wakhalele gudihaga ha fundo dia athu ako? Kotelesa. (Tala gifuanesa gidi ha gizula.)
11 Ndaga jiagushimana jiatshitshile Yesu jiamonesele diago haphelo egi wakhalele gudisha ha fundo dia athu ako. Yesu wakhalelego mulaba gutshita ndaga jiene jia gushimana. Wakhalele “muvua khenda” mukunda nu athu akhalele mumona lamba. (Mat. 20:29-34; Mako 1:40-42) Ha gufezegesa, tangiza luholo Yesu wadivuile tangua wakatudile gifua-matshui mukatshi dia athu ha guya gumusaga. Tangiza nji luholo Yesu wadivuile hafuzumuine muene muvuala mumoshi wa yala; gin’a muvuala muene wakhalele mukhetu wa gafunda. (Mako 7:32-35; Luka 7:12-15) Yesu wadihagele ha fundo dia athu ene, nu wazudile desizio dia guakuatesa.
12. Ha gutadila Yone 11:32-35, luholo lutshi Yesu wadihagele ha fundo dia Mata nu Mariya?
12 Yesu wadihagele ha fundo dia Mata nu Mariya. Tangua waamonele mudila phangi’awo Lazalo, ‘Yesu wadidile’ nji. (Tanga Yone 11:32-35.) Gadidilego phamba mukunda nu gikenene gia gufua gua futa dienji, handaga wakhalele mujiya egi umuza mufuzumuna Lazalo. Uvi, Yesu wadidile handaga wamonele gikenene giakhalele nagio Mata nu Mariya.
13. Mukunda natshi gujiya egi Yesu wana gudihaga ha fundo dia athu ako, guana gutuhana gikhesa?
13 Khadilo dia Yesu dia gudihaga ha fundo dia athu ako diana gutukuatesa muavula. Esue mujiya egi tushigo athu atagana gifua Yesu. Uvi, tuana gumuzumba ha gutala luholo wakhalele mutshitshila athu ndaga. (1 Phet. 1:8) Gujiya egi mangino Yesu udi muhinyina mu Ufumu wa Nzambi, guana gutusuanguluisa. Gualeha ndo mbawukatula malamba agasue. Yesu wakhalele nji ha mavu, hakiene, udi diago watagana ha gumanesela malamba agasue ana gubuila athu mukunda nu uhinyinyi wa Satana. Yadiago, tudi naye gusuanguluga luholo tudi nu Mutuameji wajiya ‘gutuvuila khenda mu guleba guetu.’—Heb. 2:17, 18; 4:15, 16.
LANDULA GIFEZEGESELO GIA YEHOWA NU YESU
14. Mukanda wa Efeso 5:1, 2 udi gututuma ha gutshita itshi?
14 Gutangigiza gifezegeselo gia Yehowa nu gia Yesu, guana gututuma diago ha gudihaga ha fundo dia athu ako. (Tanga Efeso 5:1, 2.) Yehowa nu Yesu ana gujiya ndaga jidi mu mitshima ya athu, uvi esue tuanago gujiya. Uvi tuajiya gukotelesa ndaga athu ako adi najio funu nu luholo adi gudivua. (2 Kol. 11:29) Tushigo gifua athu a ha mavu awa ana ‘gukamba phamba gubonga [guawo]’, uvi esue ‘tuana gukamba nji gubonga gua athu ako.’—Fili. 2:4.
(Tala paragrafe 15-19) *
15. Mu hungu, akuatshi adi naye gumonesa muavula khadilo dia gudisha ha fundo dia aphangi ako?
15 Akulu a mu hungu adi naye gumonesa muavula diago egi ana gudisha ha fundo dia aphangi. Ana gujiya egi Yehowa mbawutadila luholo ana gubamba imeme yenji. (Heb. 13:17) Ha gukuatesa aphangi a mu hungu, akulu adi naye gukamba gukotelesa malamba a aphangi ene. Luholo lutshi akulu ajiya gumonesa egi ana gudihaga ha fundo dia aphangi?
16. Mukulu wana gudihaga ha fundo dia aphangi ako udi naye gutshita itshi? Mukunda n’atshi idi nu ndando?
16 Mukulu wana gudihaga ha fundo dia aphangi ako wana gubalegesa tangua diavula nawo. Wana guahula mihu nu wana guategelela nu guhuiminyina guagasue. Mukulu udi naye gumonesa khadilo diene muavula gubalega, tangua phangi mumoshi watshigina gumuwambela ndaga idi gumusagesa uvi gashigo mutema guzuela muabonga. (Ish. 20:5) Gula mukulu udi mubalegesa tangua nu aphangi a mu hungu, mbaasendesa gumushila mutshima. Luko, mbaabwa diago mafuta akola, mbaadizumba muavula.—Makal. 20:37.
17. Aphangi avula ana guzuela egi khadilo ditshi ana gusuanguluga nadio gudi akulu? Hana gifezegeselo.
17 Aphangi avula ana guzuela egi khadilo diana guasuanguluisa muavula gudi akulu, didi khadilo dia gudihaga ha fundo dia athu ako. Mukunda natshi? Phangi Adelaide wazuelele egi: “Tuana gusuanguluga ha guzuela nu akulu ene handaga tuana gujiya egi mbaatukotelesa muabonga. Ha gujiya egi adi gudihaga ha fundo diaye, tala ndaga ana gutshita tangua udi guatela lumene.” Phangi mumoshi wazuelele egi: “Ngamonele masoji muzoga gu meso a mukulu mumoshi tangua ngakhalele gumutela lumene. Mbangushigo mujimbila ndaga yene.”—Lomo 12:15.
18. Luholo lutshi tuajiya gukudisa khadilo dia gudihaga ha fundo dia athu ako?
18 Idi yadiago egi, ishigo phamba akulu adi naye gudihaga ha fundo dia athu ako. Mukut’etu agasue tuajiya gumonesa khadilo edi. Mu luholo lutshi? Tshita yagasue ha gujiya malamba aphangi a mu fami nu a mu hungu adi mutagana nawo. Dihage ha fundo dia mavuala a mu hungu nu aphangi adi mukata, nu aphangi a gukola nu aphangi afishile muthu akhalele muzumba. Ahule gula adi gikuatshi. Tangua adi muzuela, ategelele muabonga. Amonese egi udi mukotelesa muabonga malamba adi guaabuila. Tshita yagasue ha guakuatesa. Gutshita ngenyi guana gumonesa guzumba gua giamatshidia.—1 Yone 3:18.
19. Mukunda natshi tushigo naye gushinjiga aphangi ha guzuela tangua tudi guakuatesa?
19 Tangua tudi mukuatesa athu, tushigo naye guashinjiga ha guzuela. Mukunda natshi? Handaga athu agasue anago gumonesa makalegelo a luholo lumoshi gutuama dia malamba. Ako ana gutshigina guta lumene lua malamba awo, uvi ako ndo. Yadiago, tuana gusuanguluga ha gukuatesa aku’etu, uvi tushigo naye guahula mihu gu ndaga jidi guatadila phamba ene. (1 Tes. 4:11) Ngatshima phangi watuwambela luholo ludi muene gudivua, matangua ako tuajiya gumona gifua udi mubalegesa. Uvi tujimbilago egi udi gutuwambela luholo ludi gudivua muene. Tudi naye gukhala hehi ha gutegelela, uvi guzuela muphushi ndo.—Mat. 7:1; Yak. 1:19.
20. Itshi mbatuzuelela mu longo dialandula?
20 Tushigo naye gumonesa khadilo dia gudihaga ha fundo dia athu ako phamba mu hungu, uvi tudi naye gudimonesa nji mu mudimo wa gulongesa. Luholo lutshi tuajiya gumonesa khadilo diene tangua tudi mulongesa? Mbatuzuelela ndaga yene mu longo dialandula.
LUNGIMBO 130 Pardonnons volontiers
^ par. 5 Yehowa nu Yesu ana gudisha ha fundo dia athu ako. Longo edi didi gutumonesa luholo tuajiya gulandula gifezegeselo giawo. Didi luko mumonesa gishina tudi naye gudisha ha fundo dia aphangi etu, nu luholo lua guyitshita.
^ par. 1 LUHOLO LUA GUKOTELESA MBIMBI: Mbimbi ‘gudisha ha fundo dia aphangi’ guakotelesa gukamba gujiya luholo aphangi adi gudivua, nu gutshita gifua esue nji tudi muvua gifua ene. (Lomo 12:15).
^ par. 6 Yehowa wamonesele nji khenda gudi akombeledi enji tangua akhalelego luko nu gikhesa. Tangiza lumene lua Ana (1 Sam. 1:10-20), lua Eliya (1 Maf. 19:1-18), nu lua Ebede-meleke (Yel. 38:7-13; 39:15-18).
^ par. 65 UKOTELESHI WA IFUANESA: Gudibungisa mu Inzo ya Ufumu guana gutuhana luendu lua gukolesa ufuta wetu nu aphangi. Tudi mumona (1) mukulu mumoshi udi muzuela nu gisemo giagasue nu mulongeshi mumoshi wa muvuala nu gin’enji, (2) tata mumoshi nu mun’enji wa mukhetu adi mukuatesa phangi mumoshi wa mukhetu wa gukola gale ha gungina mu gamiyo (mashinyi), nu (3) akulu muyadi adi mutegelela muabonga phangi mumoshi wa mukhetu udi mukamba ukuateshi.
