1. 1 Pëdru 3:8 ninqannöpis, ¿imanirtaq noqantsikpaq yarpachakuyaptin alli sientikuntsik?

IMANÖ sientikunqantsikta cuentaman churaqkunawan juntu karninqa allim sientikuntsik. Porqui pëkunaqa imanö sientikunqantsikta entiendiyänampaqmi kallpachakuyan. Y imata wananqantsikta rikarmi manaraq nishqapis pëkunaqa yanaparamantsik. 1 Pëdru 3:8 (leyi) textu ninqannöpis alläpam valorantsik “yanaqinö imëkatapis juntu pasar” * imanö sientikunqantsikta cuentachö katsir.

2. ¿Imanirtaq noqantsikpaqqa fäciltsu kanman llakipäkoq këqa?

² Diospa sirweqninkunaqa llapantsikmi llakipäkoq kanqantsikta rikätsikïta munantsik. Peru tsëta rurëqa itsa fäciltsu kanman, porqui jutsasapa karninmi kikintsikllaman masqa yarparantsik (Rom. 3:23). Itsa wakintsikqa imanö wätashqa karnin o mana allikunapa pasashqa karnin fäciltsu kanman wakinkuna imanö sientikuyanqanta entiendi. Jina kë ushanan junaqkunachö nunakunaqa kikinkunallatam kuyakuyan, itsa tsërëkur noqantsikpis pëkunanö mana llakipäkoq kashwan (2 Tim. 3:1, 2). ¿Imaraq yanapamäshun tsëkunata vencinapaq y wakinkunapaq yarpachakunapaq? Rikärishun.

3. (1) ¿Imaraq yanapamäshun llakipäkoq kanapaq? (2) ¿Imatataq kë yachatsikïchö yachakushun?

³ Wakinkuna imanö sientikuyanqanta entiendinapaqqa, Jehoväpita y Jesuspitam yachakunantsik. Porqui Jehoväqa alläpa kuyakoq Diosmi (1 Juan 4:8). Kë patsachö këkarninmi  Jesuspis Teytannölla kuyakoq y llakipäkoq kanqanta rikätsikurqan (Juan 14:9). Jina noqantsiknö nuna kashqa karninmi rikätsikurqan nunakunapis llakipäkoq këta puëdiyanqanta. Tsëmi kë yachatsikïchöqa yachakushun, wakinkunaman Jehoväwan Jesus yarpachakuyanqanta imanö rikätsikuyanqanta y noqantsikpis tsënölla ruranapaq kaqta.

4. Isaïas 63:7-9 textu ninqannöpis, ¿imataq rikätsikun sirweqninkuna imanö sientikuyanqanman Jehovä alläpa yarpachakunqanta?

⁴ Sirweqninkuna imanö sientikuyanqanta Jehovä cuentachö katsinqantam Bibliachöqa willakun. Por ejemplu israelïtakuna “alläpa sufriyaptinmi, pëpis alläpa llakikurqan” (leyi Isaïas 63:7-9 *). Tiempu pasariptinnam markanta mana allipa tratayaptin pëtapis alläpa llakitsinqanta profëtan Zacarïaswan kënö nir willatsikurqan: “Qamkunata yatayäshoqnikikunaqa, nawi niñätam yatëkäyämun” (Zac. 2:8). Tsënö ninqanmi rikätsikun sirweqninkuna imanö sientikuyanqanman Jehovä alläpa yarpachakunqanta.

5. Sirweqninkuna sufriyaptin Jehovä imanö yanapanqanta juk ejempluwan willakaramï.

⁵ Sirweqninkuna sufriyaptinqa Diosqa manam ankupanllatsu, sinöqa yanapanampaqmi listu këkan. Por ejemplu, Egiptuchö israelïtakuna esclävu karnin alläpa sufreqta rikarmi Jehoväqa esclävu kayanqampita jorqarqan. Porqui imanö sientikuyanqantam entiendirqan. Y Moisestam kënö nirqan: “Markäpa llakikïnintam alleq musyä, [...] noqaman qayakayämunqantam wiyarqö, porqui allim musyä nanatsikur imanö sufrikäyanqanta. Y Egiptu nunakunapa makinkunapita libranäpaqmi urëkämü” (Ex. 3:7, 8). Awmi, sirweqninkunata Jehovä alläpa llakiparmi esclävu kayanqampita librarqan. Tsëpita tiempuwannam Dios Äninqan Patsachö këkäyaptin chikeqnin nacionkuna ushakätsita munar atacayarqan. Peru  Jehoväqa yapëmi sufritsiyanqanta rikarnin, juezkunata churarqan chikeqninkunapita libranampaq (Juëc. 2:16, 18).

6. ¿Imanötaq Jehovä rikätsikurqan juk sirweqnin pantashqa këkaptimpis imanö sientikunqanta cuentachö katsinqanta?

⁶ Sirweqninkuna pantashqa kayaptimpis Jehoväqa imanö sientikuyanqantam cuentachö katsin. Rikärishun Jonasta ima pasanqanta. Nïnivi nacionchö nunakunata ushakätsinampaq kaqta willakunampaqmi, Jehoväqa mandarqan. Peru arrepentikuyaptinmi perdonëkurqan. Tsëmi willakunqan mana cumplikashqa kaptin Jonasqa alläpa cölerakurqan. Peru tsënö kaptimpis Jehoväqa pacienciawanmi pensëninta cambianampaq yanaparqan (Jon. 3:10–4:11). Tiempuwanqa cuentatam Jonasqa qokurirqan ninivïtakunata imanir Jehovä perdonashqa kanqanta. Jinamampis noqantsikta yanapamänapaqmi kikin Jonas pasanqankunata Palabranchö escribinampaq permitirqan (Rom. 15:4). *

7. Sirweqninkuna imanö sientikuyanqanta Jehovä cuentachö katsinqanqa, ¿imapita següru kanapaqtaq yanapamantsik?

⁷ Sirweqninkunata Jehovä imanö tratanqanmi rikätsimantsik imanö sientikunqantsikta cuentachö katsinqanta. Pëqa altantum këkan cada ünu nanatsikur sufrinqantsikta. Jina musyanmi nunakuna shonqunkunachö imanö sientikuyanqanta (2 Crön. 6:30). Awmi, imata pensanqantsikta, imanö sientikunqantsikta y rurëta mana puëdinqantsikkunatam alleq entiendin. Y manam permitinqatsu tsarakïta mana puëdinqantsikpita masqa tentashqa kanantsikta (1 Cor. 10:13). Tsëta musyanqantsikqa alläpam kushitsimantsik.

8-10. ¿Imataq Jesusta yanaparqan wakinkuna imanö sientikuyanqanta entiendinampaq?

⁸ Jesusqa kë patsachö këkarninmi nunakunapaq alläpa yarpachakurqan. Këkunam tsënö kanampaq yanaparqan: Punta kaq. Jehovä ankupäkoq kanqantam Jesusqa kë patsachö këkarnin rikätsikurqan. Tsëmi Jehovänölla pëpis nunakunata kuyarqan. Kamanqankunachö papäninta yanaparnin kushishqa sientikurnimpis, masqa nunakunatam Jesusqa kuyarqan (Prov. 8:31). Tsëmi yanaparqan nunakuna imanö sientikuyanqanta cuentaman churanampaq.

⁹ Ishkë kaq. Jehovänöllam Jesuspis nunakuna imanir imata rurayanqanta y imata pensayanqanta musyaq (Mat. 9:4; Juan 13:10, 11). Tsëmi llakishqa y sufrikäyanqanta cuentata qokurirqa llakiparnin yanaparqan (Is. 61:1, 2; Lüc. 4:17-21).

¹⁰ Kima kaq. Kikin Jesuspis nunakuna pasayanqankunapam pasarqan. Por ejemplu waktsa familiachömi winashqa karqan. Tsëmi mamampa qowan Josëta carpinterïa trabäjuchö yanaparqan, tsë trabäjuqa manam fäciltsu karqan (Mat. 13:55; Mar. 6:3). Y itsachi Josëqa wanukurqan Diospita yachatsikur Jesus manaraq qallaptin, tsëchi pëpis musyarqan wanupakurir imanö sientikuyanqanta. Jinamampis musyarqanmi familiantsikkuna Diosta mana sirwiyaptin imanö sientikunqantsikta, porqui pëpa familiankunapis manam pëman creiyaqtsu (Juan 7:5). Tsëkunapa pasanqankunam yanaparqan nunakuna imanö sientikuyanqanta entiendinampaq.

11. ¿Ima cäsukunachötaq Jesusqa llakipäkoq kanqanta rikätsikurqan? Rikäri jana qaranchö këkaq dibüjuta.

¹¹ Jesus llakipäkoq kanqanqa, masqa rikakarqan milagrukunata ruranqanchömi. Y tsë milagrukunataqa rurarqan nunakuna sufriyaptin llakiparninmi (Mat. 20:29-34; Mar.  1:40-42). ¿Imanöraq Jesusqa sientikurqan sordu nunata juk läduman apëkur kachakäratsir, y juk viudapa wanushqa wamranta kawaritsirnin? (Mar. 7:32-35; Lüc. 7:12-15). Jesusqa tsë nunakuna imanö sientikuyanqantam entiendirqan, tsëmi yanaparqan.

12. Juan 11:32-35 textu ninqannöpis, ¿imanötaq Jesusqa Martawan Marïa imanö sientikuyanqanta cuentaman churarqan?

¹² Jina amïgun Läzaru wanuriptimpis, Jesusqa llakipäkoq kanqantam rikätsikurqan. Martawan y Marïa turinkunapaq alläpa waqayaptinmi pëpis ‘waqar qallëkurqan’ (leyi Juan 11:32-35). Manam kuyashqa amïgunta manana rikänampaq kaqta pensartsu waqarqan, sinöqa Martata y Marïata sufreqta rikarmi. Porqui Jesusqa musyarqanmi Läzaru kawaritsinampaq kaqta.

13. ¿Imanirtaq alläpa kushikuntsik Jesus Reynintsik kanqampita?

¹³ Noqantsikqa jutsasapam kantsik, peru tsënö kaptimpis Jesus llakipäkoq kanqanqa alläpam yanapamantsik. Y nunakunata imanö tratanqampitam kuyantsik (1 Pëd. 1:8). Tsëmi alläpa kushikuntsik Diospa Gobiernunchö mandakoq kanqampita. Y kë patsachö nunanö kawashqa karmi Jesusqa imanö sientikunqantsikta entiendin, tsëmi imëka sufritsimaqnintsikkunata ushakätsinqa. Alläpam kushikuntsik, Reynintsik tsënö ankupäkoq kanqampita (Heb. 2:17, 18; 4:15, 16).

14. Efesius 5:1, 2 textu ninqannöpis, ¿imata ruranapaqtaq animamantsik?

¹⁴ Jehoväwan Jesus imanö kayanqampita yachakunqantsikmi pëkunanölla mas llakipäkoq kanapaq yanapamantsik (leyi Efesius 5:1, 2). Nunakuna shonqunkunachö imata pensayanqantaqa manam rikëta puëdintsiktsu, peru imanö sientikuyanqantaqa entiendita puëdintsikmi (2 Cor. 11:29). Diosta mana sirweq nunakunaqa mana llakipäkoqmi kayan, peru noqantsikqa apostol Pablu kënö ninqantam rurëta procurantsik: “Ama kikikikunapa biennikikunallataqa ashiyëtsu, sinöqa wakinkunapa bienninkunatapis” (Filip. 2:4).

15. ¿Pikunataq masqa llakipäkoq kayanqanta rikätsikuyänan?

¹⁵ Congregacionchö anciänukunam masqa llakipäkoq kayanqanta rikätsikuyänan. Porqui sirweqninkunata imanö tratayanqampitam Jehoväqa cuenta mañanqa (Heb. 13:17). Y cristiänu mayinkunata yanapayänampaqqa, imanö sientikuyanqantam cuentachö katsiyänan. ¿Imanötaq tsëta rurayanman? Rikärishun.

16. Llakipäkoq anciänukunaqa, ¿imatataq rurayan?

¹⁶ Llakipäkoq anciänukunaqa, cristiänu mayinkunawan parlayänampaq y shumaq pacienciawan wiyayänampaqmi tiempunkunata rakiyan. Tsënö rurayanqanqa alläpam yanapakun, porqui wakinkunaqa imanö sientikuyanqantam parlakïta mantsakuyan (Prov. 20:5). Tsëmi cristiänu mayinkunata wiyayänampaq anciänukuna listu kayaptinqa, pëkunamanmi mas confiakuyanqa y amïgum tikrayanqa (Hëch. 20:37).

17. ¿Anciänukuna imanö kayanqantataq cristiänukuna valorayan? Willakaramï.

¹⁷ Mëtsikaq wawqikuna y panikunam alläpa valorayan imanö sientikuyanqanta anciänukuna cuentachö katsiyanqanta. Adelaide jutiyoq panim kënö nin: “Imanö sientikunqantsikta anciänukuna cuentachö katsiyaptinqa, mas fäcilmi pëkunawan parlakurintsik. Y parlapanqantsik höram cuentata qokuntsik imanö sientikunqantsikta entiendiyanqanta”. Juk wawqinam kënö nin: “Problëmäta willëkanqä höram juk anciänu waqarirqan. Y tsëtaqa manam imëpis qonqashaqtsu” (Rom. 12:15).

18. ¿Imanötaq llakipäkoq kanqantsiktaqa rikätsikushwan?

 ¹⁸ Manam anciänukunallatsu llakipäkoqqa kayänan, sinöqa llapantsikmi llakipäkoq kanantsik. Tsëpaqqa familiantsikkuna y cristiänu mayintsikkuna problëmapa pasayaptin imanö sientikuyanqanta entiendita procurashun. Jina jövinkunata, qeshyëkaqkunata, edäyashqakunata y wanupakushqakunata entiendita procurashun. Y tapurishun imanö këkäyanqanta y nimanqantsikta shumaq wiyashun. Jina pëkunapaq rasumpa yarpachakunqantsikta rikätsishun y yanapashun. Tsëta rurarninqa rasumpa kuyakoq kanqantsiktam rikätsikushun (1 Juan 3:18).

19. Wakinkunawan parlakurninqa, ¿imatataq cuentachö katsinantsik?

¹⁹ Wakinkunata yanaparninqa imanö sientikuyanqantam entiendita procuranantsik, porqui problëmakunapa pasarqa manam llapantsu igual sientikuyan. Wakinkunaqa problëmankunapita rasllam parlakuyan, peru wakinqa manam parlakïta munayantsu. Tsëmi yanapëta munarqa, mana alli sientitsinqankunataqa tapupänantsiktsu (1 Tes. 4:11). Jina imanö sientikunqanta pipis nimashqa itsa acuerdutsu kashun. Tsënö kaptimpis imanö sientikunqantam entiendita procuranantsik. Tsëpaqa Biblia ninqannömi, shumaq wiyanantsik y manam rasllaqa parlanantsiktsu (Mat. 7:1; Sant. 1:19).

20. ¿Imatataq qateqnin kaq yachatsikïchö yachakushun?

²⁰ Jina Diospita yachatsikurnimpis llakipäkoq kanqantsiktaqa rikätsikuntsikmi. Tsëtaqa rikätsikuntsik Diospa Gobiernumpita nunakunata parlaparnin y Jesuspa qateqninkuna kayänampaq yanaparninmi. Y tsëtam qateqnin kaq yachatsikïchö yachakushun.