1. 1 Pedro 3:8 textopi nisqan jina, ¿imaraykun kusisqa sientekunchis noqanchispi interesakuqtinku?

PIPAS imayna sientekusqanchispi imayna tarikusqanchispi interesakuqtinqa kusisqan sientekunchis. Paykunaqa kallpachakunkun imayna sientekusqanchista imachus piensasqanchista entiendewananchispaq, chayman jinataqmi yanapawanchis. Chhayna runakunataqa ancha allinpaqmi qhawarinchis. 1 Pedro 3:8 (leey) textopi willasqan jina paykunaqa ‘llakipayakuqmi’ * kanku.

2. ¿Imaraykun sasa kanman jujkunapi interesakuy?

² Llapa cristianokunapas munanchismi jujkunapi interesakuyta. Wakinninchispaqmi ichaqa sasa chayta ruway. ¿Imarayku? Juchayoq runa kasqanchisrayku. Chaymi noqallanchispi piensanchis, sasataq jujkunapi piensay (Rom. 3:23). Jinaspapas imayna uywasqa kasqanchisraykun sasa kanman jujkunapi piensay. Chaymantapas kay tukukuy p’unchaykunapi kasqanchisraykun askha runakuna paykunallapi piensanku, chhayna kasqankun noqanchistapas samaykuwasunman (2 Tim. 3:1, 2). Chhaynaqa, ¿imatan ruwasunman ama chaykunawan jark’achikunanchispaq?

3. a) ¿Iman yanapawasun jujkunaq imayna sientekusqankuta entiendenanchispaq? b) ¿Imatan kay estudiopi yachasunchis?

³ Jehová Diospa Jesuspa ejemplonta qatikuymi yanapawasun jujkunaq imayna sientekusqankuta entiendenapaq. Jehová Diosqa munakuq Diosmi chaymi jujkunapi interesakun (1 Juan 4:8). Jesuspas Papan jinan runakunaq  imayna sientekusqankuta entienderan (Juan 14:9). Llapa runapas atinchismi jujkunaq imayna sientekusqankuta entiendeyta, chaytan Jesusqa sut’ita rikuchiran kay pachapi kashaspa. ¿Imaynatan Jehová Diospas Jesuspas runakunaq imayna sientekusqankupi interesakuranku? ¿Imaynatan noqanchispas paykuna jina kasunman? Chaykunamantan kay estudiopi yachasun.

4. Isaías 63:7-9 textopi nisqanman jina, ¿imakunan rikuchin Jehová Dios serviqninkunapi interesakusqanta?

⁴ Bibliaq nisqan jina Jehová Diosqa interesakunmi serviqninkunaq imayna sientekusqankupi. Chayta rikuchiran israelitakuna sasachakuypi tarikushaqtinku. Biblian nin: “Israelitakuna llakisqa kashaqtinkun, paypas llakisqallataq karan”, nispa (leey Isaías 63:7-9). * Profeta Zacariaswanmi Jehová Diosqa willachillarantaq pipas llaqtanta ñak’arichiqtinqa paytapas ñak’arichishankuman jina kasqanta, chaymi serviqninkunata niran: “Pipas qankunata tupaykuqqa ñawi ruruytan tupaykun”, nispa (Zac. 2:8). Chay textopi nisqan jina Jehová Diosqa maytan serviqninkunamanta sienten.

5. ¿Imaynatan Jehová Dios yanaparan llaqtanta sasachakuypi tarikuqtinku? Juj ejemplota willay.

⁵ Serviqninkuna ima llakipipas tarikuqtinkuqa manan khuyapayallanchu, aswanpas imaymanatan ruwan yanapananpaq. Chaypaq yachasun israelitakunamanta. Paykunaqa Egiptopin esclavo karanku, jinan Jehová Diosqa sinchi ñak’arisqankuta rikumuspa paykunata yanaparan. Moisesta niran: “Allintan rikuni llaqtaypa Egipto suyupi muchushasqanta, uyarinin muchuchiqkuna jawa wajakamusqankuta, yachanitaqmi ñak’arishasqankutapas. Egipto runakunamanta kacharichiqmi uraykamuni”, nispa (Éx. 3:7, 8). Paykunata khuyapayaspan chay llaqtamanta orqomuran. Prometesqa allpapiña kashaqtinkupas  Jehová Diosqa yanaparanmi enemigonkuna atacaqtinku. Bibliaq nisqan jina ‘paykunaq waqasqankuta ñak’arisqankutawan’ rikuspan paykunata khuyapayaran. Chaymi juezkunata churaran enemigonkunamanta librananpaq (Juec. 2:16, 18).

6. ¿Imatan Jehová Dios ruwan serviqninkuna piensasqankupi pantaqtinkupas? Juj ejemplota willay.

⁶ Wakin serviqninkuna pantarankuña imachus piensasqankupi chaypas Jehová Diosqa entienderanmi. Jonasmanta yachasun, Diosmi payta kacharan Nínive runakunaman juicionta willamunanpaq, chay runakunan ichaqa arrepientekuranku, jinan Diosqa paykunata perdonaran. Jonasmi ichaqa sinchita phiñakuran rimasqan mana junt’akusqanmanta. Jehová Diosqa pacienciakuranmi profetanwan yanaparantaq imachus piensasqanta cambiananpaq (Jon. 3:10–4:11). Tiempowanqa Jonasqa entienderanmi, jinaspa Diosqa imachus paywan pasasqanta qelqachiran noqanchista yanapawananchispaq (Rom. 15:4). *

7. Ñaupaq tiempopi serviqninkunata yanapasqan, ¿imatan Jehová Diosmanta yachachiwanchis?

⁷ Qhawarisqanchis jina Jehová Diosqa entiendenmi serviqninkunaq llakikusqanta sufrisqantapas, allintan yachan “runakunaq sonqonta” (2 Crón. 6:30). Jinaspapas entiendenmi imachus piensasqanchista, sonqonchis imayna kasqanta, maykama imatapas ruway atisqanchistapas. Diosqa manan dejanqachu mana aguantanaykichiskama tentasqa kanaykichistaqa, chaytan simin qelqapi prometewanchis (1 Cor. 10:13). ¡Chayta yachayqa anchatan consolawanchis!

8-10. ¿Imakunan Jesusta yanaparan runakunaq imayna sientekusqankuta entiendenanpaq?

⁸ Jesusqa kay allpapi kashaspaqa imaymanatan ruwaran runakunaq imayna sientekusqankuta entiendenanpaq. ¿Imakunan Jesusta yanaparan chhayna kananpaq? Ñaupaqpi, Papanpa ejemplontan qatikuran. Jesusqa Papan jinan runakunata munakuran. Tukuy imaymana kamaypiña yanapakuran chaypas, Jesusqa runakunatan astawanqa munakuran (Prov. 8:31). Runakunata munakusqanmi yanaparan imayna sientekusqankuta entiendenanpaq.

⁹ Iskaypi, Jesusqa Papan jinan allinta yacharan runakunaq imachus piensasqankuta sientesqankutapas (Mat. 9:4; Juan 13:10, 11). Chaymi llakisqa kasqankuta ratolla reparaspa paykunata consolaq (Is. 61:1, 2; Luc. 4:17-21).

¹⁰ Kinsapi: Jesusqa pay kikinpunin imaymana sasachakuykunapi tarikuran. Payqa wajcha familiapin wiñaran, papan Josewantaq llank’aran (Mat. 13:55; Mar. 6:3). Papan José wañupuqtinpas sinchitachá llakikuran, payqa wañupuran Jesús manaraq predicayta qallarishaqtinmi. Chaymantapas manan llapa familianchu Diostaqa serviranku (Juan 7:5). Chaykunata yachasqanmi Jesusta yanaparan runakunaq imayna sientekusqankuta entiendenanpaq.

11. ¿Imata ruwaspan Jesús rikuchiran runakunapi interesakusqanta? (Tapanpi kaq fotota qhaway.)

¹¹ Jesusqa milagrokuna ruwasqanpin rikuchiran runakunapi interesakusqanta. Chaytaqa manan obligasqachu ruwaran, aswanpas runakunata khuyapayaspan (Mat. 20:29-34; Mar. 1:40-42). Juj kutinmi sasachakuspa rimaq roqt’u runata jampinanpaq runakunaq  kasqanmanta juj ladoman pusaran. Juj viudaq sapallan wawantapas kausarichiranmi (Mar. 7:32-35; Luc. 7:12-15). Chaykunataqa ruwaran paykunata khuyapayaspan.

12. Juan 11:32-35 textopi nisqanman jina, ¿imaynatan Jesús rikuchiran Martata Mariatawan khuyapayasqanta?

¹² Amigon Lázaro wañupuqtinpas Jesusqa llakipayaranmi Martata Mariatawan, waqasqankuta rikuspataq paypas waqallarantaq (leey Juan 11:32-35). Jesusqa yacharanmi Lazarota kausarichinan kasqanta, chaywanpas waqaranmi amigonmanta, ichaqa astawanqa waqaran Martata Mariatawan sinchitapuni sufrisqankuta rikuspan.

13. ¿Imaraykun Jesuspa khuyapayakuq kasqan kallpachawanchis?

¹³ Jesusqa anchatan runakunata khuyapayan, chayta yachayqa kallpachawanchismi. Chhayna kasqanraykun paytaqa munakunchis (1 Ped. 1:8). Jesusqa ñan Diospa gobiernonpi kamachikushanña, pisi tiempollamantataq tukuy llakikuykunata chinkachinqa. Jesusqa kay pachapin runa jina kausaran, chaymi allin preparasqa kashan Satanaspa causanpi ima mana allinpas paqarisqanta chinkachinanpaq. Anchatan kusikunchis reyninchis ‘pisi kallpa kashaqtinchis khuyapayawasqanchismanta’ (Heb. 2:17, 18; 4:15, 16).

14. Efesios 5:1, 2 textopi nisqanman jina, ¿imata ruwananchispaqmi kallpachakunanchis?

¹⁴ Jehová Diospas Jesuspas ancha khuyapayakuqmi kanku, chayta yachasqanchismi kallpachawanchis paykuna jina kananchispaq (leey Efesios 5:1, 2). Noqanchisqa manan atinchischu runakunaq sonqonpi imachus kasqanta yachayta. Chaywanpas kallpachakunanchismi imayna sientekusqankuta imachus necesitasqankuta yachananchispaq (2 Cor. 11:29). Egoísta runakuna jina kananchismantaqa apóstol Pabloq nisqantan kasukunanchis, paymi niran: “Amataq munaynillaykichistaqa maskhaychischu, aswanpas jujkunaq munaynintawan maskhaychis”, nispa (Filip. 2:4).

15. ¿Pikunan astawanqa hermanokunapi interesakunanku?

¹⁵ Iñiq t’aqapi umalliqkunan astawanqa hermanokunapi interesakunanku. Paykunaqa Jehová Diosmanmi cuentata qonqaku Diospa ovejankunata imayna cuidasqankumanta (Heb. 13:17). Hermanokunata yanapanankupaqqa khuyapayakuqmi kananku. ¿Imaynatan chayta ruwankuman?

16. ¿Imatan khuyapayakuq umalliqkuna ruwanku? ¿Imaraykun chayta ruway importante?

¹⁶ Khuyapayakuq umalliqkunaqa tiempotan t’aqanku hermanokunata visitanankupaq. Tapurispataq tukuy yuyaywan pacienciawan uyarinku. Chaytan astawanqa ruwananku mayqen hermanopas imachus llakichisqanta mana willayta atiqtin (Prov. 20:5). Juj umalliq chay jinata hermanokunata yanapanqa chayqa, astawanmi chay hermanokunawan munanakunqaku, amigontin kapunqaku, astawantaq paypi confianqaku (Hech. 20:37).

17. ¿Imatan astawan hermanokuna valoranku umalliqkunamanta? Juj ejemplota willay.

¹⁷ ¿Imatan astawan hermanokuna valoranku umalliqkunamanta? Imayna sientekusqanchista entiendesqankutan. Hermananchis Adelaide nin: “Imayna sientekusqaykita entiendeq umalliqmanqa mana manchakuspan tukuyta willakunki. Chaytaqa reparanki willashaqtiyki khuyapayaspa uyarisuqtiykin”, nispa. Juj hermanotaq  willakun: “Problemayta juj umalliqman willakushaqtiymi rikurani weqenkunaraq lloqsimusqanta, chaytaqa manan qonqanichu”, nispa (Rom. 12:15).

18. ¿Imaynatan rikuchisunman jujkunaq imayna sientekusqankuta entiendesqanchista?

¹⁸ Manan umalliqkunallachu jujkunapiqa interesakunanku aswanpas llapanchismi. ¿Imaynatan chayta ruwasunman? Kallpachakunanchismi imaynapi tarikusqankuta entiendenanchispaq. Interesakunanchismi familianchispi, wayna-sipaskunapi, onqosqakunapi, kuraqkunapi, familianku wañupusqanwan llakisqa kaq hermanokunapipas. Sumaqllatan tapurinanchis tukuy yuyaywantaq uyarinanchis imachus willawasqanchista. Reparanankun sonqomanta interesakusqanchista, atisqanchisman jinataq yanapananchis. Chayta ruwaspan munakusqanchista rikuchishanchis (1 Juan 3:18).

19. ¿Imaraykun jujkunata yanapananchispaq entiendeq kananchis?

¹⁹ Runakunaqa llakipi tarikuspaqa manan igualtachu reaccionanku, chaymi entiendeq kananchis. Wakinqa facil-llatan imayna sientekusqankuta willasunkiku, wakinmi ichaqa mana. Chaymi yanapananchispaqqa allin yuyaywan imatapas tapurinanchis (1 Tes. 4:11). Mana allinpaqña qhawarisunman willawasqanchista chaypas entiendenanchismi. Tukuy yuyaywantaq uyarinanchis mana tatichispa (Mat. 7:1; Sant. 1:19).

20. ¿Imatan qatimuq estudiopi yachasun?

²⁰ Iñiq t’aqapi hermanonchiskunapi interesakuyqa allinpunin, ichaqa predicasqanchis runakunapipas interesakunanchismi. ¿Imaynatan chayta rikuchisunman predicashaspa estudiota qoshaspapas? Chaytan qatimuq estudiopi yachasun.