1. ¿Imamandata 1 Pedro 3:8​pi nishca shinaca ñucanchimanda preocuparij gentecunahuanga ali, tranquilo sintiripanchi?

TUCUICUNALLATAMI pipash ñucanchimanda preocuparijpica, paicunahuanga tranquilo sintiripanchi. Paicunaca ñucanchicuna imata pensajta, imashina sintirijta ali intindingapami esforzarin. Shinallata ñucanchicuna imata minishtijushcata cuenta japishpami imagupipash ayudanlla. Bibliapica ninmi: “huauquipurashna juyarishpa” * causana canguichi nishpa. Shina juyaj huauquipanicunamandaca ninandami cushijunchi (1 Pedro 3:8, liingui).

2. Shujcuna imashina sintirishcata intindinaca ¿imamandata huaquinbica shinlli can?

² Jesusta catijcunaca, shujcuna imashina sintishcata intindingapami esforzarina capanchi. Shinapash juchayucuna caimandami ñucanchipillata pensari callarinchi. Chaimandami shujcuna imashina sintirishcata intindinaca huaquinbica shinlli ricurin (Rom. 3:23). Huaquingunaca imashina viñashcamanda o paicuna imashina causaita charishcamandami shujcuna imashina sintirishcataca na intindi ushan. Shinallata tucurimui punllacunapi causanajuimandami paicunapilla pensarij gentecuna tian. Paicunashna yuyai callarishpami shujcuna imashina sintirishcataca na intindi ushanchiman (2 Tim. 3:1, 2). Shinapash shujcuna imashina sintirishcata intindingapaca ¿imata ayudanga?

3. a) Shujcuna imashina sintirishcata intindingapaca ¿imata ayudanga? b) Cai temapica ¿imatata yachajupashun?

³ Jehovashna, Jesushna canami shujcuna imashina sintirishcata ali intindichun ñucanchitaca ayudanga. Jehová Diosca shuj juyaj Diosmi can. Chaimi ñucanchicunapash shujcunata juyana capanchi (1 Juan 4:8). Jesusca Jehová Dios imashinapacha cashcataca alipachami ricuchirca  (Juan 14:9). Jesús cai alpapi cashpaca, gentecunapash shujcunata juyaihuan, llaquishpa ali tratai ushashcataca alimi yacharca. Cai temapica Jehová Diospash, Jesuspash gentecuna imashina sintirishcata intindishcatami yachajupashun. Shinallata Jehová Dioshna, Jesushna cangapaj imata rurana cashcatapashmi yachajupashun.

4. Isaías 63:7-9​pi nishca shinaca Jehová Diosmandaca ¿imatata yachajupanchi?

⁴ Bibliapica, Jehová Dios paipa sirvijcuna imashina sintirijta ali yachashcatami ricuchin. Cunanga israelitacuna llaquicunapi cajpi Jehová Dios imashina sintirishcata ricupashunchi. Bibliapica ninmi: “Paicunata ninan llaqui japijpica, tucuipimi paipash ninanda llaquirijurca” nishpa (Isaías 63:7-9, liingui). Tiempo yalijpica Jehová Diosca profeta Zacariasmanga nircami, contracuna ñuca llactata llaquichijpica ñucatami llaquichinshna llaquichinajun nishpa. Chaimi paipa sirvijcunataca cashna nirca: “Maijambash cangunata llaquichishpaca, ñuca ricujuj ñavita tujsinshnami llaquichin” nishpa (Zac. 2:8). Chai shimicunaca paita sirvijcunata Jehová Dios imashina sintirijta intindishcatami ricuchin.

5. Jehová Dios paita sirvijcuna llaquicunahuan cajta ricushpaca ¿imashinata ayudashca?

⁵ Jehová Diosca paipa sirvijcuna llaquicunapi cajta ricushpaca llaquirishpallaca na quedanllu. Ashtahuangarin ayudangapami imagutapash uchalla ruran. Por ejemplo, israelitacuna Egipto llactapi esclavocuna cajpimi, Jehová Diosca paicuna ninanda sufrinajujta ricurca. Chaimi Jehová Diosca paitapacha llaquichijpishna sintirirca. Moisesmanga cashna nirca: “Ñuca agllashca gentecuna, Egiptopi llaquita apanajujtaca alimi ricurcani; [...] paicuna caparinajujtapash uyarcanimi. Paicunapaj ninan llaquicunataca, ñucami yachani. Chaimandami paicunataca, Egiptopi causajcunapaj maquimanda cacharichingapaj urai shamurcani” nishpa (Éx. 3:7, 8). Jehová Diosca israelitacunata llaquimandami Egipto llactamanda salvarca. Shinallata ashtaca huatacuna jipaca Taita Dios carasha nishca alpagupi israelitacuna cajpimi shuj llactamanda contracunaca llaquichirca. Shina pasajpica ¿imashinata Jehová Diosca sintirirca? Bibliapica ninmi: “Mandaj Diosca ninandapacha llaquirirca” nishpa. Shinapash Jehová Diosca paita sirvijcuna imashina sintirijta ali intindishpami, contracunamanda quishpichingapaj juezcunata churarca (Juec. 2:16, 18).

6. Profeta Jonás pandata yuyajujpipash paita ali intindishpa Jehová Dios imashina ayudashcata intindichipai.

 ⁶ Jehová Diosca paita sirvijcuna pandata yuyanajujpipash, paicuna imashina sintirijtaca alimi intindin. Chaita ali intindingapaca Jehová Dios profeta Jonasman imata nishcata ricupashunchi. Jehová Diosca profeta Jonasmanga, Nínive llactapi causajcunata Jehová Dios llaquichigrinmi nishpa villachun cacharca. Shinapash chai llactamanda gentecuna arripintirijpimi Jehová Diosca chai llactataca na tucuchirca. Jonás villachishca shimicuna na pactarijpimi paica ‘ninanda llaquirishpa fiñarirca’. Shinapash Jehová Diosca profeta Jonás yangamanda fiñarishca cashcata ali intindichishpami ayudarca (Jon. 3:10–4:11). Jipamanga Jonasca pai pandata yuyajushcatami cuenta japirca. Jehová Diosca ñucanchipa ali cajpimi Jonashuan ima pasashcata yachajuchun Bibliapi escribichishpa saquishca (Rom. 15:4). *

7. Jehová Dios ñucanchicunatapash ayudanataca ¿imashinata seguro capanchi?

⁷ Jehová Diosca paita sirvijcunata llaquishpa, paicuna imashina sintirishcata ali intindishpami ayudashca. Chaita yachaimandami ñucanchicuna imashina sintirishcata Jehová Dios ali intindishcata seguro capanchi. Paica ñucanchicuna llaquicunamanda llaquilla sintirijtapashmi ali yachan. Shinallata Jehová Diosca “runacunapaj shungutaca” alipachami rijsin (2 Crón. 6:30). Jehová Diosca ñucanchi yuyaicunata, ñucanchi shungu ucupi imashina sintirijta, ñucanchi imata rurai ushashcatapashmi ali yachan. Ashtahuanbash Jehová Diosca paita sirvijcuna nali munaicunapi o tentaciongunapi ama urmachunmi ayudan (1 Cor. 10:13). Jehová Dios ñucanchicunata llaquishpa ayudajta yachashpaca cushillami sintiripanchi.

8-10. Gentecuna imashina sintirishcata intindichunga ¿imata Jesustaca ayudarca?

⁸ Jesús cai alpapi cashpaca gentecunamanda ninanda preocuparishcatami ricuchirca. Chaipaca cai quimsa yuyaicunata ricupashunchi. Punda yuyai, Jesusca Jehová Dios imashinapacha cashcataca alipachami ricuchirca. Jehová Dios gentecunata juyashcashnallatami Jesuspash ninanda juyarca. Jehová Dios tucuita rurajujpica Jesusca cushijushpami ayudajurca. Gentecunata rurashcata ricushpacarin paicunataca ninandami juyai callarirca (Prov. 8:31). Jesusca juyaimandami gentecuna imashina sintirishcapi preocuparirca.

⁹ Cati yuyai, Jehová Dioshnami Jesusca gentecuna shungu ucupi imata charishcata ali yacharca. Paica gentecuna imashina yuyajushcata, imashina sintishcatapash alimi yacharca (Mat. 9:4; Juan 13:10, 11). Chaimi gentecuna llaquilla cajta cuenta japishpa, paicuna imashina sintirijujta intindishpa tranquilo sintirichun ayudan carca (Is. 61:1, 2; Luc. 4:17-21).

¹⁰ Ultimo yuyai, Jesuspash gentecuna charishca problemacunatallatami charirca. Jesusca pobrella familiapimi nacirirca. Paipa taita José carpintero cajpimi Jesuspash shinllita trabajana carca (Mat. 13:55; Mar. 6:3). Jesús Diospa Reinomanda nara villachi callarijpillatami Joseca huañushcanga. Chaimandami Jesusca shuj juyashca familia huañujpi gentecuna imashina sintirishcata ali intindishcanga. Shinallata Jesusca Taita Diosta na sirvij familiatami charirca. Chaimi Diosta na sirvingapaj munaj familiata charijcuna imashina sintirishcata Jesusca ali intindishcanga (Juan 7:5). Jesús shina causaita charishcamandami, gentecuna ima problemacunata charishcata, imashina sintirishcatapash ali intindirca.

11. Gentecunata juyashcataca ¿imashinata Jesusca ricuchirca? (Callari paginapi dibujota ricupangui).

¹¹ Jesús milagrocunata rurashpaca gentecunata juyashcatami ricuchirca. Jesusca pipash  obligashcamandallaca milagrocunataca na rurarcachu. Ashtahuangarin gentecuna sufrinajujta ricushpami ayudangapaj munarca (Mat. 20:29-34; Mar. 1:40-42). Jesús rurashca cai ishcai milagropi pensaripashunchi. Jesusca na uyaj runaguta ninanda llaquishpa juyaimandami, gentecunamanda shuj ladoguman pushashpa jambirca. Shinallata shuj viuda huarmigupa shujlla churigu huañujpimi, Jesusca ninanda llaquishpa paipa churiguta causachirca (Mar. 7:32-35; Luc. 7:12-15). Jesusca chai gentecunashna sintirimandami paicunata ayudangapaj munarca.

12. Juan 11:32-35​pi nishca shinaca ¿imashinata Jesusca sintirirca?

¹² Jesuspa juyashca amigo Lázaro huañujpimi, Jesusca Mariatapash, Martatapash imashinapacha sintirishcata ali intindirca. Paicunata ninanda huacanajujta Jesús ricushpami, shungupi ninanda llaquirishpa ‘llaqui llaqui tucushpa huacarca’ (Juan 11:32-35, liingui). Jesusca paipa Lázaro amigohuan ñana parlai ushashcamandaca na huacarcachu. Jesusca Lázaro runaguta causachinataca alimi yacharca. Shinapash Martata, Mariatapash ninanda llaquirishpa huacanajujta ricushpami Jesuspash huacarca.

13. Jesusmandaca ¿imatata yachajupanchi?

¹³ Ñucanchicunaca Jesushna jucha illajca na canchichu. Shinapash shujcuna imashina sintirishcata ali intindingapaca Jesusmandami yachajuna capanchi. Jesús gentecunata ninanda llaquishpa juyashcamandami paitaca ninanda juyapanchi (1 Ped. 1:8). Cunanbica Jesusca Diospa Reinopi Reymi can. Ñallapachami tucui llaquicunata tucuchinga. Diablo cai mundopi mandajuimandami gentecunaca ashtaca llaquicunata charishca. Jesuspash cai alpapi cashpaca gentecuna llaquicunamanda sufrijujtami ricurca. Chaimandami paica chai llaquicunata tucuchingapaj munan. Bibliapi Jesusmanda parlashpaca cashnami nin: “Ñucanchica, ñucanchi imata na rurai ushajpipash, curacunata mandaj, ñucanchita llaquij curatami charinchi” nishpa. Ñucanchicuna imashina sintirishcata intindij Rey Jesusta charishcamandaca ninandami cushijupanchi (Heb. 2:17, 18; 4:15, 16).

14. Efesios 5:1, 2​pi nishca shinaca Jehovamanda, Jesusmanda yachajushpaca ¿imatata rurangapaj munashun?

¹⁴ Jehovamanda, Jesusmanda yachajushpaca gentecunata llaquishpa juyaihuan ayudangapami munapashun (Efesios 5:1, 2, liingui). Gentecuna shungu ucupi imata charishcata na ricui ushashpapash, paicuna imashina sintirishcata, imata minishtishcataca cuenda japi ushanchimi (2 Cor. 11:29). Cai mundopi paicunapilla pensarij gentecunashna cangapaca na munapanchichu. Ashtahuangarin apóstol Pablo nishcatami catingapaj munapanchi. Paica nircami: “Maijan cashpapash quiquimbajlla ali cachunga, na yarinachu canguichi. Ashtahuangarin shujcunapajpash ali cachunmi, tucuicunallata yarina canguichi” nishpa (Filip. 2:4).

15. ¿Picunata ashtahuanbachaca shujcunata ali tratana can?

¹⁵ Ancianocunami huauquipanicunata imashina sintirijta ali intindingapaj esforzarina can. Jehová Diosca huauquipanicunata aliguta cuidachunmi ancianocunaman mingashca. Chaimi ancianocunaca huauquipanicunata ali tratana can (Heb. 13:17). Huauquipanicunata ayudangapaca ancianocunaca paicuna imashina sintirijta ali intindinami can. ¿Chaipaca imatata rurana can?

16. a) Ayudangapaj munaj ancianocunaca ¿imatata ruran? b) ¿Chaita ruranaca imamandata minishtirishca can?

¹⁶ Ayudangapaj munaj ancianocunaca huauquipanicunata ayudangapami tiempoguta llujchin. Chaimi ancianocunaca imagutapash ali tapuchishpa, ali uyashpa pacienciahuan ayudan. Shina rurajpimi huauquipanicunaca imata ninata na atinashpapash paicuna imashina sintirishcata ancianocunaman villai ushanga (Prov. 20:5). Ancianocuna huauquipanicunata ayudangapaj tiempoguta llujchishpa ayudajpica, paicunapurami ashtahuan ali llevarishpa, confianzata charishpa, juyaihuan trataringa (Hech. 20:37).

17. Ashtaca huauquipanicunaca ¿imamandata ancianocunahuan parlanataca alicachin? Shuj ejemplomanda parlapai.

 ¹⁷ Ashtaca huauquipanicunaca paicuna imashina sintirishcata ali intindishpa huauqui ancianocuna ayudashcamandaca ninandami cushijun. Adelaide paniguca ninmi: “Ancianocuna ñucanchi imashina sintirishcata ali intindijta yachanaca, paicunahuan parlanaca facilmi can. Paicunaman ñucanchi llaquicunamanda parlashpa, paicuna ñucanchi imashina sintirishcataca alimi intindin” nishpa. Shuj huauquipashmi cushijushpa cashna nin: “Ñuca llaquicunamanda shuj anciano huauquiman villajujpica, paipashmi llaquilla sintirirca. Chaitaca nunca na cungashachu” nishpa (Rom. 12:15).

18. Shujcuna imashina sintirijta intindishcataca ¿imashinata ricuchi ushapanchi?

¹⁸ Tucuicunallatami huauquipanicuna imashina sintirishcataca intindi ushapanchi. Huauquipanicuna, ñucanchi familiacunapash problemacunata charijpi paicuna imashina sintirishcatami intindingapaj esforzarina capanchi. Shinallata jovengunata, ungüihuan cajcunata, mayorllacunata, familia ucupi pipash huañushcata charijcunata ayudangapami esforzarina capanchi. Paicunata tapushpa, paicuna ima nijta ali uyana capanchi. Ashtahuanbash llaquicunata charishcamanda paicuna imashina sintirishcata ñucanchipash ali intindishcata ricuchipashunchi. Shinallata ñucanchi usharishcagupi paicunata ayudangapami ofrecirina capanchi. Shina rurajpica paicunata ciertopacha juyashcatami ricuchipashun (1 Juan 3:18).

19. Shujcunata ayudajushpaca ¿imamandata paicunata ali intindingapaj esforzarina capanchi?

¹⁹ Cada uno shuj shuj llaquicunata charimandami na igual sintiripanchi. Chaimi shujcunata ayudajushpaca paicuna imashina sintirijtaca ali intindingapaj esforzarina capanchi. Huaquingunaca problemacunata charishpapash parlangapaj munanllami. Cutin shujcunaca na parlangapaj munanllu. Shinaca pitapash ayudangapaj munashpaca na yangata imacunatapash tapujunallachu capanchi (1 Tes. 4:11). Huaquinbica shujcuna imashina sintirishcata parlashca jahua ñucanchi nalicachijpipash paicunata intindingapaj esforzarina capanchi. Shinaca “aliguta uyajcuna, aliguta yarishpara rimajcuna” cangapami esforzarina capanchi (Mat. 7:1; Sant. 1:19).

20. Cati temapica ¿imatata yachajupashun?

²⁰ Imashinami ricupashcanchi huauquipanicuna imashina sintirishcata ali intindingapaj esforzarina capanchi. Villachinapipashmi gentecuna imashina sintirishcata ali intindingapaj esforzarina capanchi. Villachijushpa, Bibliamanda yachachijushpapash shujcuna imashina sintirijta ali intindishcataca ¿imashinata ricuchi ushapanchi? Cai tapuimandaca cati temapimi yachajupashun.