1. Premalo 1. Petareso 3:8, sose mangaja te ova okoljencar so brininena pe amendar?

SARE amen mangaja te ova okoljencar so brininena pe amendar hem ando amare osećanja. On trudinena pe te čhiven pe ko amaro than te šaj te haljon sar amen razmislinaja hem sar osetinaja amen. On dikhena so valjani amendže hem nudinena amendže pomoć, čak nesavo puti angljeder te puča ljen. Amen ceninaja e manušen kola tane saosećajna * premalo amende. (Čitinen 1. Petareso 3:8.)

2. Sose nane lokho te ova saosećajna?

² Sar hrišćanja amen mangaja te ova saosećajna, ama odova nane uvek lokho. Sose phenaja adžahar? Sar prvo, amen hijam nesavršena (Rim. 3:23). Prirodno tano amendže te mislina upro amende. Odoljese valjani te da sa amendar te mislina upro avera. Sar dujto, šaj te ovel amendže pharo te ova saosećajna odoljese so bariljam adžahar ja diso desindža pe ko amaro dživdipe. Hem ko krajo, averengo stav šaj te utičini upro amende. Ko akala poslednja dive, buten na zanimini sar avera osetinena pe odoljese so mangena kokri pes (2. Tim. 3:1, 2). So šaj te pomožini amen te ova saosećajna, iako odova nane lokho?

3. (a) Sar šaj pobuter te ova saosećajna premalo avera? (b) Sostar ka vačera ko akava članko?

³ Ako amen oponašinaja e Devlje, e Jehova, hem oljese Čhave, e Isuse Hriste, tegani amen ka ova pobuter saosećajna. O Jehova tano Devel pherdo mangipaja, hem ov dindža amen najšukar primer sar te ova saosećajna (1. Jov. 4:8). O Isus savršeno oponašindža pe Dade (Jov.  14:9). Ked hine ki Phuv, ov pe primereja mothodža sar šaj o manuš te ovel saosećajno. Ko akava članko ka dikha sar o Jehova hem o Isus mothodže saosećanje premalo avera. Palo odova, ka dikha sar šaj te oponašina oljengo primer.

4. Sar o stihija ando Isaija 63:7-9 mothovena so o Jehova brinini pe odoljestar sar oljese sluge osetinena pe?

⁴ I Biblija sikavi amen so o Jehova brinini pe odoljestar sar oljese sluge osetinena pe. Na primer, dikh sar o Jehova osetindža pe ked o Izraelcija ko purano vreme hine ljen razna pharipa. E Devljeso Lafi phenela: „Ko sa oljenge pharipa hem olje dukhala hine.“ (Čitinen Isaija 63:7-9.) Palo odova prekalo prorok Zaharija, o Jehova phendža so olje dukhala ked džiko ponašini pe lošno premalo amende. Pe slugendže o Jehova phendža: „Ko zadini tumen, zadini man andral ki mi jakh“ (Zah. 2:8). Savo šukar način te mothovi pe kobor o Jehova brinini pe ando poklo narodo!

5. Vačer jekh primer kova mothovi sar o Jehova pomožindža pe slugendže ked hine ljen pharipa.

⁵ O Jehova nane samo saosećajno premalo okoljende so patinena, nego hem čerela diso te pomožini ljen. Na primer, ked o Izraelcija hine robija ko Egipat, o Jehova dikhlja kobor tano ljendže pharo hem manglja te čerel diso te pomožini ljen. Ov phendža e Mojsijese: „Dikhljum o pharipa me narodose, [...] šundžum oljengi vika [...] šukar džanava oljenge dukha so isi ljen. Odoljese me huljiljum telje te spasinav ljen ando e egipatskonenge vasta“ (2. Moj. 3:7, 8). O Jehova sažalindža pe upro poklo narodo hem oslobodindža ljen ando ropstvo. But berša palo odova, ki Obećano Phuv, o Izraelcija hine napadime. Sar reagujindža o Jehova? „Ked o Jehova šundža oljengo rojbe, e Jehovase hine pharo odoljese so but mučindže ljen hem dukhadže ljen.“ Ov hem ki akija situacija hine lje saosećanje premalo poklo narodo hem čerdža diso te pomožini ljen. Odoljese bičhaldža e sudijen kola oslobodindže ljen ando dušmanja (Sud. 2:16, 18).

6. Vačer jekh primer sar o Jehova haljilo džikas kaso način sar razmislini na hine ispravno.

 ⁶ O Jehova haljola pe slugen čak hem ked oljengo način sar razmislinena nane ispravno. Odova dikhela pe ko Jonaso primer. O Jehova bičhladža akalje proroko te phenel i osuda e manušendže ki Niniva. Odoljese so on kajindže pe, o Jehova na manglja te uništini ljen. Ama, o Jona na hine bahtalo sose o Jehova andža asavki odluka. Ov but holjandilo, sose o proročanstvo so i Niniva ka ovel uništimi na ispunindža pe. O Jehova hine strpljivo e Jona hem pomožindža lje te ispravini po način sar razmislini (Jona 3:10–4:11). O Jona haljilo soj tano odova so o Jehova manglja te sikavi lje hem o Jehova koristindža e Jona te pisini akava izveštaj amare šukaripase (Rim. 15:4). *

7. Ko so šaj te ova sigurna?

⁷ Sa odova mothovi amendže so o Jehova tano saosećajno premalo peklje sluge. Ov šukar džanela kola pharipa hem dukha svako amendar isi lje ano peste. Ov džanela „svakoneso vilo“ (2. Let. 6:30). Ov haljolja sa amare mislija, amare hor (duboka) emocije hem džanela so amen šaj hem so amen našti. Odoljese na ka mukhel te ova iskušime pobuter nego li so šaj te izdržina (1. Kor. 10:13). Odova dela amen bari uteha!

8-10. Kola buča pomožindže e Isusese te ovel saosećajno?

⁸ Ked o Isus hine ki Phuv, ov hine saosećajno premalo avera. Isi barem trin buča kola pomožindže lje te ovel asavko. Sar prvo, sar so angljeder phendžam, o Isus oponašindža pe Dade. Isto sar o Jehova hem ov manglja e manušen. Iako hine bahtalo so o Jehova zajedno oljeja sa stvorindža, o manuša najviše andže ljese bahtaljipe (Godž. 8:31). O mangipe podstaknindža e Isuse te razmislini ando odova sar avera osetinena pe.

⁹ Sar dujto, isto sar o Jehova hem o Isus džanela soj tano e manušendže ko vilo, save osećanja isi ljen hem sose čerena diso (Mat. 9:4; Jov. 13:10, 11). Ked o Isus dikhlja soj tane o manuša tužna hem phage viljeja, na hine ljese sa jekh, odoljese manglja te zorjačeri ljen hem te utešini ljen (Isa. 61:1, 2; Luka 4:17-21).

¹⁰ Sar trito, o Isus kokri doživindža o pharipa kola hine ljen o manuša. Na primer, ov barilo ki čorori porodica. O Isus džandža so značini te čerel pe phari buti, odoljese so čerdža buti e Josifeja kova barjačerdža lje (Mat. 13:55; Mar. 6:3). Izgleda so o Josif mulo disavo vreme angljeder so o Isus počmindža pe službaja. Adžahar o Isus osetindža kobor dukhala ked merela džiko kas mangeja. Džandža hem sar tano ked džiko ki amari porodica na složini pe odoljeja ko so amen verujinaja (Jov. 7:5). Akala hem avera okolnostija pomožindže e Isusese te haljol kola pharipa hem osećanja isi ljen o manuša ki Phuv.

11. Objasnin sar dičhilo e Isuseso saosećanje. (Dikh i slika ko početko ando akava časopis.)

¹¹ E Isuseso saosećanje but dikhlja pe ked čerdža čudija. O Isus na čerdža čudija odoljese so morandilo. Oljese hine „pharo ko vilo“ sose on patindže (Mat. 20:29-34; Mar. 1:40-42). Zamislin sar hine e Isusese ked ljelja jekhe kašuke  manuše, cidindža lje ki strana hem sačardža lje ja ked irindža ko dživdipe e udovicake čhave (Mar. 7:32-35; Luka 7:12-15). O Isus hine lje saosećanje premalo odola manuša hem manglja te pomožini ljen.

12. Sar o lafija ando Jovan 11:32-35 mothovena e Isuseso saosećanje premalji Marta hem i Marija?

¹² O Isus mothodža saosećanje premalji Marta hem i Marija. Rundža ked dikhlja kobor tano ljendže pharo sose o Lazar mulo. (Čitinen Jovan 11:32-35.) Ov na rundža sose našaldža pe šukar amalje. Džandža so pana hari ka irini lje ko dživdipe. Ov rundža sose haljilo kobor tani bari oljengi dukh.

13. Sose zorjačeri amen odova so džanaja kobor tano o Isus saosećajno?

¹³ Amen zorjačeri odova so džanaja kobor tano o Isus saosećajno premalo manuša. Odoljese amen but mangaja lje (1. Petr. 1:8). Bahtalje hijam so ov akana tano Kralj ko e Devljeso Kraljevstvo. Pana hari, ov ka cidel sa o muke. Odoljese so o Isus živindža ki Phuv, ov najšukar šaj te pomožini e manušendže te oporavinen pe ando bare dukha kola andža e Bengesi vlast. Čače tano baro blagoslov te ovel amen vladari kova „šaj te haljol amare slabostija“ (Jevr. 2:17, 18; 4:15, 16).

14. Ko so podstakninena amen o lafija ando Efeskonendže 5:1, 2?

¹⁴ Ked razmislinaja ando primer so dindže o Jehova hem o Isus, odova podstaknini amen te ova pana pobuter saosećajna premalo avera. (Čitinen Efeskonendže 5:1, 2.) Amen našti sar on te džana soj tano nekase ko vilo. Ama, amen šaj te pokušina te haljova sar avera osetinena pe hem so valjani oljendže (2. Kor. 11:29). Iako ko akava sveto isi manuša kola tane sebična, amen trudinaja amen te čera odova so i Biblija sikavi: „Ma dikhen samo tumendže te ovel šukar, nego isto adžahar hem averendže“ (Fil. 2:4).

15. Ko posebno valjani te ovel saosećajno?

¹⁵ Posebno o starešine valjani te oven saosećajna. On džanena so anglo Jehova tane odgovorna sar ponašinena pe premalo okola kastar brininena pe (Jevr. 13:17). Ako mangena te pomožinen pe phraljendže hem pe phenjendže, on valjani te haljon sar on osetinena pe. Sar šaj o starešine te mothoven saosećanje?

16. So čerela o starešina kova tano saosećajno hem sose tano odova važno?

¹⁶ O starešina kova tano saosećajno odvojini vreme te ovel e phraljenca hem e phenjenca. Ov pučela ljen diso hem pažljivo šunela ljen. Odova tano but važno ako nekase tano pharo te objasnini sar osetini pe hem so mislini (Godž. 20:5). Ked o starešina mangela te ovel pe phraljenca hem pe phenjenca, maškaro oljende tano pobaro poverenje, amaljipe hem mangipe (Čer. 20:37).

17. So but amare phralja hem phenja ceninena ko starešine? Vačer jekh primer.

¹⁷ But amare phralja hem phenja ceninena ked o starešine tane saosećajna. Sose? Jekh phen koja vičini pe Adelejd vačeri: „Nane pharo te vačere oljencar sose džaneja so haljona tut. O način sar vačerena tuva mothovi kobor isi ljen saosećanje.“ Jekh phral kova odova osetindža vačeri: „Ked vačerdžum jekhe starešinaja kotar miklji situacija, dikhljum  ljese asva ko jačha. Odova niked na ka bistrav“ (Rim. 12:15).

18. Sar te čere ko odova te ove saosećajno?

¹⁸ Ama na valjani samo o starešine te oven saosećajna. Sare amen šaj te barjačera odija osobina. Sar? Pokušin te haljove save pharipa isi ljen amare phralja hem phenja hem amari porodica. Mothov so brinineja tut kotar terne ki skupština, ama hem okoljendar soj tane naborme, phure ja okoljendar so našaldže nekas kas manglje. Puč ljen sar tane. Šun ljen ked vačerena tuče sar tane. Mothov ljendže so čače haljoveja oljengi situacija. Puč ljen te pomožine ljen. Ked adžahar čereja, tegani mothoveja so mangeja ljen (1. Jov. 3:18).

19. Sose valjani te ova razumna ked pomožinaja nekase?

¹⁹ Ked mangaja te pomožina nekase, amen valjani te ova razumna. Sose phenaja odova? Odoljese so o manuša averčhane reagujinena ko phare situacije. Nesave jedva adžičerena te vačeren odoljestar, ama nesave na mangena te vačeren kotar peklje problemija. Amen mangaja te pomožina ljen, ama na ka puča ljen diso so ka čerel te osetinen pe neprijatno (1. Sol. 4:11). Iako džiko vačeri ando peklje problemija, amen možda na ka složina amen odoljeja so ov phendža. Ama, amen na valjani te bistra so odola tane oljese osećanja. Svako amendar valjani te ovel „sig te šunel, a pohari te vačeri“ (Mat. 7:1; Jak. 1:19).

20. Sostar ka vačera ko aver članko?

²⁰ Amen mangaja te ova saosećajana ki skupština, ama hem ki služba mangaja te mothova akija šuži osobina. Sar šaj te mothova la premalo nekaste ko mangela te ovel e Isuseso učenik? Akaljestar ka vačera ko aver članko.