1. Khu guya khu 1 Pedro 3:8, khu ginani si hi tsakisago gu manega vbakari nya vathu va khathalago khu gudzipwa gwathu ni gukhadzisega gwathu?

SI NGU hi tsakisa ngudzu gu manega vbakari nya vathu va khathalago khu gudzipwa gwathu ni gukhadzisega gwathu. Vo zama gu dzi vega wulangani wathu, gasi gu wona esi hi si pimisago ni edzi hi dzipwago khidzo. Va gu vbiredza gu tugula esi hi si vbwetago, khavbovbo va hi phasa — dzimbe dzitepo na hi nga si va lombi giphaso. Hi ngu va bonga ngudzu ava va ‘theyago kota’ * khethu. — Leri 1 Vakorinto 12:25.

2. Khu ginani hi yedego gu dzi garadza gasi gu theya kota khu vambe?

² Kha nga maKristo, hatshavbo gu vbwetega hi theya kota khu vambe. Ganiolu, khandri tepo yatshavbo si vbevbugago gu gira isoso. Khu ginani? Hi vathu nya mba vbeleya. (Rom. 3:23) Ha gu oloveya gu khathala khu silo sathu basi tepo yatshavbo. Khu kharato, gu vbwetega hi dzi garadzeya gambe gu khathala khu vambe. Nigu vambe gwathu, adzina si ngu va garadzeya gu theya kota khu vambe khu kotani nya edzi va dandrisidwego khidzo mwendro khesi va si vbanyidego womini gwawe. Gimbe gambe, khu gu hi nga kutsedzedwa khu mavbanyelo nya vathu va hi randredego. Matshiguni yaya nyo hegise, vathu nya vangi kha va theyi kota khu vambe. Vbavbandze nya isoso, vo dzi haladza guvbindra pimo. (2 Thim. 3:1, 2) Ginani gi nga hi phasago gu pala sigaradzo soso si hi tandregisago gu khathala khu gudzipwa ga vambe?

3. a) Ginani gi na hi phasago gu engedzeya gu theya kota khu vambe? b) Ginani hi na gi wonago avba nya ndrima yeyi?

³ Ha gu pimedzeya Jehovha Nungungulu ni Gyanana gyaye Jesu Kristo, hi na khathala ngudzu khu vambe. Jehovha, Nungungulu nya lihaladzo nigu a hi vegede giyeyedzo nya gikhongolo  ngudzu nyo khathale khu gudzipwa ga vambe. (1 Joh. 4:8) Jesu pimedzede makhalelo ya Papayi waye khu guvbeleya. (Joh. 14:9) Tepo a nga ba ari mafuni, yeyedzide edzi vathu va yedego gu theya khidzo kota khu vambe. Avba nya ndrima yeyi, hi na pheya khu gu wona edzi Jehovha ni Jesu va yeyedzago khidzo gukhathala khu vambe. Khavbovbo, hi na wona edzi hi nga va pimedzeyago khidzo.

4. Isaya 63:7-9 o yeyedza kharini gu khuye Jehovha a ngu khathala ngudzu khu gudzipwa ga sithumi saye?

⁴ Bhibhiliya yo hevbudza gu khiyo Jehovha a ngu khathala khu gudzipwa ga sithumi saye. Khu giyeyedzo, nga dundrugeya khedzi Jehovha a dzi pwidego khidzo tepo vaIsrayeli va nga ba va tshangana ni silingo nyo hambanehambane. Lito la Nungungulu lari khilo: “Gutshanisekani gwawe gwatshavbo, uye a di tshaniseka gumogo navo.” (Leri Isaya 63:7-9.) Khu gu gimbiya nya tepo, Jehovha a di thumisa muprofeti Zakariya gasi gu yeyedza gu khuye tepo vathu vaye va tshaniswago, sa gu fana ni gu ba va tshanisa uye. Jehovha a di embeya sithumi saye khuye: “Wule a mu kuhago a gu kuha ndzololwane nya liso laye.” (Zak. 2:8) Nga wonani ndziya yeyi nya tshivba yi fananisago edzi Jehovha a khathalago khidzo khu vathu vaye!

5. Ninga giyeyedzo nya silo si giridwego khu Jehovha gasi gu phasa vathu vaye va nga ba va tshaniswa.

⁵ Jehovha a ngu gira nya singi nyo vbindre gu theya kota basi khu sithumi saye si tshanisekago. Uye o gira gilogyo gasi gu si phasa. Khu giyeyedzo, tepo vaIsrayeli va nga ba vari dzigumbi Egipito, Jehovha gu pwide guvbisa va nga ba va gupwa, khavbovbo a kutsega gu va tshudzisa. Jehovha a di embeya Mosi, khuye: “Khu lisine nyi wonide gutshaniseka ga vathu vangu . . . , gambe dzihuwa dzawe dzi vbohide dzindzeveni gwangu . . . . Nyi ngu wuti wuvi wawe. Khu guralo, nyi tshigide gasi guta va tshudzisa mandzani ga Vagipiti.” (Ekiso. 3:7, 8) Khu kotani nya olu Jehovha a nga ba apwa wuvi khu gutshaniseka ga vathu vaye, a di va tshudzisa khu wugumbini. Mazana myaga hwane nya isoso, na vari Tigoni nya Gitumbiso, vaIsrayeli va di sasedwa khu valala. Ginani a giridego Jehovha? A ‘dipwa gisiro khu avo, khu tshanisa va nga bani va giredwa khu vatshanisi vawe.’ Avba gambe, gukhathala ga Jehovha khu vathu vaye gu mu kutside gu va phasa. A di rumeya valamuli gasi va ya vbulugisa vaIsrayeli ga valala vawe. — Val. 2:16, 18.

6. Ninga giyeyedzo nya edzi Jehovha a khathadego khidzo khu gudzipwa ga muthu a nga ba ari ni mapimo nyo wegeye.

 ⁶ Jehovha a ngu khathala khu gudzipwa ga vathu vaye — ambari mapimo yawe ma gu ba ma wegede. Nga dundrugeya khu giyeyedzo gya Jona. Nungungulu a di ruma Jona gasi guya tshumayela mahungu nya gulamule ga vaNinivha. Khu kotani nya olu va dzi layidego, Nungungulu a di hunga gu mba va fuvisa. Ambari ulolo, Jona kha sa mu tsakisa isoso. A “di swihala a vbisega” kholu giprofeto gaye nya gufuviswe ga Ninivha gi nga ne tadzisega. Ganiolu Jehovha a di mu laphiseya monyo Jona, a mu phasa gu vbindrugedza mapimo yaye. (Jona 3:10–4:11) Khu gu gimbiya nya tepo, Jona si pwisiside esi Jehovha a nga ba a mu hevbudza, a di bwe a thumiswa khu Jehovha gasi gu lova matimo yaye omu nya Bhibhiliya gasi gu phasa ethu. — Rom. 15:4. *

7. Ndziya eyi Jehovha a thumisanago khiyo ni vathu vaye yo yeyedza ginani?

⁷ Edzi Jehovha a thumisanidego khidzo ni vathu vaye so yeyedza gu khiso a ngu khathala khu sithumi saye. A ngu gupwa guvbisa ni gutshaniseka ga moyo ni moyo wathu. Jehovha a nguti gwadi “myonyo ya sanana nya vathu.” (2 Dzik. 6:30) A ngu siti esi si gomogo myonyoni gwathu, a pwisisa ni mapimo, ni guti omu hi hegedwago umo. Nigu “kha na nga dzumedzisa gukhuye [hi] mane silingo nya guvbindre tshivba [yathu].” (1 Kor. 10:13) Gitumbiso gyogyo gi ngu hi thaveleya ngudzu.

8-10. Silo muni si phasidego Jesu gu khathala ngudzu khu vathu?

⁸ Tepo a nga ba ari mafuni, Jesu a di gu khathala ngudzu khu vambe. Gu na ni silo siraru khu wudugwana wakona si phasidego Jesu gu khathala ngudzu khu vathu. Nyo pheye, kha nga hi si wonidego gupheyani, Jesu a di gu pimedzeya makhalelo ya Papayi waye wa ndzadzini khu guvbeleya. Kha nga Papayi waye, Jesu a di gu haladza vathu. Ambari olu a nga ba a tsakiswa khu satshavbo esi a phasidego Jehovha gu si vanga, Jesu a di gu tsakiswa ngudzu khu vathu. (Mav. 8:31) Lihaladzo li kutside Jesu gu khathala khu gudzipwa ga vambe.

⁹ Nya wuvili, gufana ni Jehovha, Jesu a di gu si kodza gu wona esi si gomogo monyoni. A di gu kodza gu wona gudzipwa ni sighelo si nga ba si gira muthu a gira gilo nyo khaguri. (Mat. 9:4; Joh. 13:10, 11) Khu kharato, tepo Jesu a nga ba a wona gu khuye vathu kha va tsaka, a di gu va pweya wusiwana a bwe a va thaveleya. — Isa. 61:1, 2; Luka 4:17-21.

¹⁰ Nya wuraru, Jesu emisanide ni sigaradzo nyo khaguri esi vathu va nga ba va tshangana naso. Khu giyeyedzo, Jesu dandrede ndrangani nya sisiwana. Khu kotani nya olu a nga ba a thuma ni papayi waye nya gu mu sayise, Josefa, Jesu hevbude gu gira mithumo nyo lemeye. (Mat. 13:55; Marko 6:3) Nigu so wonegisa khatshi Josefa fude Jesu na nga si vbedzi thumo waye mafuni. Khu kharato, Jesu gu pwide guvbisa nyo fedwe khu muthu a mu golago. Jesu gambe a di gu dziti edzi si garadzago khidzo gu vbanya ndrangani gu hambanidego khu wukhongeyi. (Joh. 7:5) Siemo soso ni simbe, si phaside Jesu gu pwisisa sigaradzo ni gudzipwa nya vathu.

11. Gukhathala ga Jesu gu wonegide tepo muni? Tshamuseya. (Wona foto avba nya kapa.)

¹¹ Gukhathala ga Jesu gu di gu wonega ngudzu tepo a nga ba a gira silewugiso. Kha nga ba a gira silewugiso khu gu ba a manisedwe. Ganiolu a di gu pwa “gisiro” khava va nga ba va tshaniseka. (Mat. 20:29-34; Marko 1:40-42) Khu giyeyedzo, nga dundrugeya khesi si kutsidego  Jesu gu ndreya ni mwama wule nya givbwiri aya mu hawulugisa mwendro tepo a wusidego gyanana gya gimwegyo gya noni yile. (Marko 7:32-35; Luka 7:12-15) Jesu a di tshanisekeya vathu vovo, khavbovbo a va phasa.

12. Libhuku la Johane 11:32-35 la gu yeyedza kharini gukhathala ga Jesu khu Marta ni Mariya?

¹² Jesu khathade khu gudzipwa ga Marta ni Mariya. Tepo a nga wona wuvi wawe khu kotani nya gufedwe khu ndriyawe Lazaro, “Jesu a di lila.” (Leri Johane 11:32-35.) Khandri a di liya basi khu gu ba a fedwe khu pari yaye nya yikhongolo. Kholu Jesu a di gu dziti gu khuye a na wusa Lazaro. Wulangani nya isoso, Jesu a di liya khu gu khuhwa khedzi dzipari dzaye dzi nga ba dzipwa khidzo guvbisa.

13. Khu ginani si hi tiyisago guti gu khethu Jesu a ngu khathala khu vathu?

¹³ Si ngu hi tiyisa guti gu khethu Jesu a di gu khathala khu vathu. Lisine gu ethu kha ha vbeleya nga uye. Ambari ulolo, hi ngu mu haladza kholu a di gu khathala khu vambe. (1 Ped. 1:8) Si ngu hi tiyisa guti gu khethu olu a ngu fuma nga Pfhumu nya Mufumo wa Nungungulu. Nugunugu a na fuvisa gutshaniseka gwatshavbo. Kha nga olu Jesu a vbanyidego mafuni, khuye wakona a gomogo ga giemo nya gyadi nyo phase vathu gu emisana ni wuvi ni sigaradzo si vangidwego khu wufumu wa Sathane. Khu lisine, hi kategide khu gu manega ni Mufumeyi a kodzago gu hi “pwela wusiwana nya sighoho sathu.” — Hebh. 2:17, 18; 4:15, 16.

14. Khu guya khu Vaefeso 5:1, 2, ginani hi kutsegago gu gira?

¹⁴ Gu dundrugeya khu giyeyedzo hi vegedwego khu Jehovha ni Jesu, sa gu hi kutsa gu engedzeya gu khathala khu vambe. (Leri Vaefeso 5:1, 2.) Hi mwalo makodzelo nyo wone monyo nya muthu nga avo. Ambari ulolo, hi nga zama gu pwisisa gudzipwa ga vambe ni esi va si vbwetago. (2 Kor. 11:29) Guhambana ni vathu nya litigo leli nya mba khathala khu vambe, ethu ha gu zama gu mba ‘dwaneya basi gu sayisa esi si gu sathu, aholu, hi dzi garadza gambe khu sile si gu sa vangana.’ — Filp. 2:4.

15. Khu vamani ngudzungundzu va yedego gu theya kota khu vambe?

¹⁵ Madhota nya libandla ngudzungudzu gu vbwetega ma theya kota khu vambe. Jehovha a na vbweta guti gwawe edzi va khathaledego khidzo dzinvuta dzaye. (Hebh. 13:17) Gasi gu madhota ma kodza gu phasa vandriyawe, gu vbwetega ma khathala khavo. Madhota ma nga yeyedza kharini gu theya kota khu vambe?

16. Ginani li girago lidhota li theyago kota khu vambe, nigu khu ginani isoso si gu na ni lisima?

¹⁶ Lidhota li theyago kota khu vambe li ngu dzi garadzeya gu bhula ni vandriyalo nya maKristo. A va gira siwudziso, a bwe a va engiseya gwadi khu gulaphisa-monyo. Isoso si na ni lisima, ngudzungudzu abari gu ndriyathu yoyo o vbweta gu tshula khana yaye, ganiolu na si gu mu garadzeya gu mana malito nyo kongome. (Mav. 20:5) Madhota ma gu thumisa tepo yawo na si khugeya monyoni gasi gu bhula ni vandriyawe, ma na tumbwa ngudzu khavo, wupari wawe wu tiya, nigu lihaladzo lawe kha nga maKristo li na dandra. — Mith. 20:37.

17. Ginani egi vandriyathu nya vangi va gi tsakeyago ngudzu ga madhota? Ninga giyeyedzo.

¹⁷ Vandriyathu nya vangi vari khavo likhalelo va litsakeyago ngudzu ga madhota gu theya kota gwawe khu vambe. Khu ginani? Adelaide wari khuye: “Si ngu vbevbuga gu bhula navo kholu u ngu dziti gu khuwe ma na gu pwisisa.” A bwe khuye: “U na tugula gu khuwe va ngu theya kota khuwe khedzi va hlamulago khidzo tepo u bhulago navo.” Ndriyathu nyo khaguri a bongago khedzi a pharidwego khidzo khu lidhota nyo khaguri wari khuye: “Nyi di wona  lidhota limwedo na li thega marongo tepo nyi nga ba nyi li tshamuseya gigaradzo gyangu. Isoso gima kha nyi si divali.” — Rom. 12:15.

18. Hi nga haguleya kharini gu theya kota khu vambe?

¹⁸ Khu lisine, khandri madhota basi ma yedego gu theya kota khu vambe. Hatshavbo hi nga haguleya likhalelo leli. Khu ndziya muni? Khu gu zama gu pwisisa sigaradzo esi sivbango nya ndranga yathu ni vandriyathu libandlani va tshanganago naso. Yeyedza ngudzu gukhathala khu vaphya va libandlani gwago, ava va dwalago, ava va dandridego khu tanga ni vale va fedwego khu muthu va mu golago. Va wudzise edzi va dzipwago khidzo. Va engiseye gwadi tepo va gu bhuleyago edzi va dzipwago khidzo. Va yeyedze gu khuwe u ngu si pwisisa gwadi esi va emisanago naso. Gira satshavbo si gomogo tshivbani gwago gasi gu va phasa. Ha gu gira isoso, hi na yeyedza lihaladzo nya lisine. — 1 Joh. 3:18.

19. Khu ginani hi yedego gu gengeya tepo hi zamago gu phasa vambe?

¹⁹ Gu vbwetega hi gengeya tepo hi zamago gu phasa vambe. Khu ginani? Khu gu vathu va hambanide. Vambe va ngu bhuleya vambe sigaradzo sawe, narigu vambe kha va si goli isoso. Gu vbwetega hi va phasa, ganiolu hi nga va giri siwudziso si na va khunguvanyisago. (1 Tes. 4:11) Ambari olu vambe va tshulegago gu hi embeya edzi va dzi pwago khidzo, adzina khandri tepo yatshavbo hi na dzumeleyanago ni mawonelo yawe. Ambari ulolo, gu vbwetega hi dundruga gu khethu khidzo va dzi pwago khidzo. Hi yede vbiredzeya gupwa, ganiolu hi nonoka gu ganeya. — Mat. 7:1; Jak. 1:19.

20. Ginani hi na ganeyago khigyo avba ndrima yi landreyago?

²⁰ Vbavbandze nyo yeyedze gu theya kota khu vambe libandlani, ho vbweta gambe gu yeyedza likhalelo leli thumoni nyo tshumayele. Hi nga yeyedza kharini gu theya kota khu vambe ho ba hi gira vapizane? Hi na ganeya khiso avba ndrima yi landreyago.