1. Olsem 1 Pita 3:8 i kamapim, wai na yumi save amamas long bung wantaim ol manmeri husat i pilim tru ol hevi bilong yumi?

YUMI save amamas long bung wantaim ol manmeri husat i pilim tru ol hevi bilong yumi. Ol i traim long tingim hau ol yet bai pilim sapos wankain hevi i painim ol. Ol i skelim ol samting yumi nidim na ol i helpim yumi—sampela taim ol i mekim olsem paslain long yumi yet i askim ol long helpim yumi. Yumi laikim tru ol manmeri husat i “pilim hevi” bilong yumi.—Ritim 1 Pita 3:8.

2. Wanem ol samting i mekim na i hatwok long pilim hevi bilong ol narapela?

² Yumi ol Kristen i laik pilim hevi bilong narapela. Tasol sampela taim i hatwok long mekim olsem. Wanpela risen em olsem, yumi olgeta i sinman. (Rom 3:23) Olsem na yumi mas wok strong long daunim laik bilong tingim yumi yet tasol. Sampela bilong yumi i hatwok long pilim hevi bilong ol narapela bikos laip yumi kamap bikpela long en i no wankain long laip bilong ol narapela. Na tu, yumi inap bihainim nating ol tingting na pasin bilong ol manmeri i stap klostu long yumi. Long dispela taim bilong las de, planti manmeri i no gat pasin bilong pilim hevi bilong ol narapela. Ol i “laikim ol yet tasol.” (2 Tim. 3:1, 2) Wanem samting inap helpim yumi na bai yumi no ken larim sampela samting i pasim yumi long pilim hevi bilong ol narapela?

3. (a) Yumi ken mekim wanem na bai yumi inap pilim hevi bilong ol narapela? (b) Long dispela stadi, yumi bai stori long wanem samting?

³ Yumi inap pilim hevi bilong ol narapela sapos yumi bihainim eksampel bilong God Jehova na Pikinini bilong em, Jisas  Krais. Jehova em God bilong pasin laikim, na em i stap gutpela piksa tru long pasin bilong pilim hevi bilong ol narapela. (1 Jon 4:8) Jisas i bihainim gut pasin bilong Papa. (Jon 14:9) Taim Jisas i stap long graun, em i pilim sori long ol manmeri i karim hevi. Long dispela stadi, pastaim yumi bai stori long ol samting em Jehova na Jisas i mekim taim ol i pilim hevi bilong ol narapela. Bihain yumi bai stori long olsem wanem yumi inap bihainim eksampel bilong tupela.

4. Olsem wanem Aisaia 63:7-9 i soim olsem Jehova i tingim tru filings bilong ol manmeri i mekim wok bilong em?

⁴ Baibel i skulim yumi olsem Jehova i tingim tru filings bilong ol manmeri i mekim wok bilong em. Jehova i pilim hevi bilong lain Israel taim kain kain hevi i painim ol. Baibel i tok: “Long taim ol i stap bel hevi, dispela i mekim em tu i bel hevi.” (Ritim Aisaia 63:7-9.) Bihain, long rot bilong profet Sekaraia, Jehova yet i tokaut olsem taim ol narapela i mekim nogut long ol manmeri bilong em, i olsem ol i mekim nogut long em yet. Em i tokim ol wokman bilong em olsem: “Man i tatsim yupela em i tatsim ai kiau bilong mi.” (Sek. 2:8) Jehova i tingim tru ol manmeri bilong em!

5. Stori long wanpela eksampel bilong Jehova i helpim ol manmeri bilong em.

⁵ Jehova i pilim sori long ol manmeri bilong em taim hevi i painim ol. Na tu, em i save mekim sampela samting bilong helpim ol. Taim lain Israel i mekim wok sleiv long Isip, Jehova i pilim tru hevi bilong ol na em i redi long kisim bek ol. Jehova i tokim Moses: “Mi lukim pinis pen na hevi bilong ol manmeri bilong mi . . . na mi harim pinis krai bilong ol. Na mi save tru long pen na hevi ol i karim. Olsem na bai mi go daun na kisim bek ol long han bilong ol Isip.” (Kis. 3:7, 8) Jehova i pilim sori tru long ol manmeri bilong em, olsem na em i kisim bek ol long Isip. Planti handret yia bihain taim lain Israel i stap pinis long Graun Bilong Promis, ol birua i go pait long ol. Jehova i mekim wanem? Em “i sori tru long harim krai bilong ol, long wanem, ol birua i givim pen na hevi long ol na mekim nogut  tru long ol.” Long dispela taim tu, Jehova i pilim hevi bilong ol manmeri bilong em na em i helpim ol. Em i salim ol hetman i go bilong kisim bek lain Israel long han bilong ol birua.—Het. 2:16, 18.

6. Stori long eksampel i soim olsem Jehova i tingim tru filings bilong man i holim tingting kranki.

⁶ Jehova i tingim tru filings bilong ol manmeri bilong em—maski sampela taim tingting bilong ol i no stret. Tingim stori bilong Jona. God i salim em i go bilong autim tok long lain Ninive na tokaut long strafe bai painim ol. Taim ol i tanim bel, God i marimari na em i no bagarapim ol. Tasol Jona i no amamas long disisen bilong God. Em “i belhat nogut tru” bikos tok profet bilong em i no kamap tru. Tasol Jehova i soim pasin isi long Jona na helpim em long stretim tingting kranki bilong em. (Jna. 3:10–4:11) Bihain, Jona i kliagut long samting Jehova i laik skulim em, na Jehova i yusim em long rekodim dispela stori bambai yumi inap kisim skul long en.—Rom 15:4.

7. Pasin em Jehova i mekim long ol manmeri bilong em i soim klia wanem samting?

⁷ Pasin em Jehova i mekim long ol manmeri bilong em i soim klia olsem em i pilim tru hevi bilong ol. Em i save long pen na hevi bilong yumi olgeta wan wan. Jehova “i save tru long samting i stap long bel bilong man.” (2 Sto. 6:30) Em i kliagut long ol tingting na filings i stap insait tru long bel bilong yumi, na ol samting yumi no inap long mekim. Na tu, “em i no inap larim wanpela traim i kamap long [yumi] i winim strong bilong [yumi].” (1 Kor. 10:13) Dispela tok promis inap tru long mekim gut bel bilong yumi!

8-10. Wanem ol samting i mekim na Jisas inap pilim hevi bilong ol narapela?

⁸ Taim Jisas i stap long graun, em i tingim tru ol narapela. Tripela samting i stiaim Jisas. Namba 1: Jisas i bihainim stret pasin bilong Papa long heven. Wankain olsem Papa, Jisas i laikim tru ol manmeri. Em i amamas long olgeta samting em i bin helpim Jehova long wokim, na “ol manmeri” em samting em i “amamas” moa long en. (Prov. 8:31) Pasin laikim i kirapim Jisas long tingim tru filings bilong ol narapela.

⁹ Namba 2: Jisas inap lukim tingting na filings i stap insait long bel bilong ol man. (Mat. 9:4; Jon 13:10, 11) Taim Jisas i luksave olsem ol manmeri i bel hevi tru, em i tingim tru ol, na dispela i kirapim em long mekim gut bel bilong ol.—Ais. 61:1, 2; Luk 4:17-21.

¹⁰ Namba 3: Jisas yet i bin karim wankain hevi we i painim ol manmeri. Jisas i kamap bikpela insait long famili em ol i no gat planti mani. Jisas i wok bung wantaim waspapa bilong em, Josep, na em i lain long mekim ol strongpela wok. (Mat. 13:55; Mak 6:3) I luk olsem Josep i dai paslain long Jisas i pinisim wok bilong em hia long graun. Olsem na Jisas i pilim hevi bilong yumi taim wanpela wanblut o pren i dai. Jisas i save tu long hevi bilong ol famili em ol i gat kain kain bilip. (Jon 7:5) Ol kain samting olsem i mekim na Jisas inap pilim hevi bilong ol manmeri.

11. Jisas i mekim wanem na dispela i soim klia olsem em i tingim tru ol narapela? (Lukim fran pes piksa.)

¹¹ Taim Jisas i wokim ol mirakel, dispela i soim klia olsem em i tingim tru ol narapela. Jisas i no wokim nating ol mirakel, nogat. Em i “sori tru” long ol manmeri i karim hevi. (Mat. 20:29-34; Mak 1:40-42) Olsem  na em i kisim wanpela yaupas man i go longwe liklik long planti lain manmeri na oraitim em. Na tu, em i kirapim bek pikinini man bilong wanpela wido. (Mak 7:32-35; Luk 7:12-15) Jisas i pilim hevi bilong ol na em i laik helpim ol.

12. Long Jon 11:32-35, olsem wanem Jisas i soim klia olsem em i pilim tru hevi bilong Marta na Maria?

¹² Jisas i soim olsem em i pilim tru hevi bilong Marta na Maria. Taim brata bilong tupela, Lasarus, i dai na tupela i krai sori, “aiwara bilong Jisas i pundaun.” (Ritim Jon 11:32-35.) Lasarus em gutpela pren. Jisas i save olsem em bai kirapim bek Lasarus, tasol Jisas i aiwara bikos em i pilim tru bel sori bilong ol gutpela pren.

13. Yumi luksave olsem Jisas i pilim tru hevi bilong ol narapela, na dispela i mekim wanem long yumi?

¹³ Yumi luksave olsem Jisas i pilim tru hevi bilong ol narapela, na dispela i strongim tru bel bilong yumi. Yumi no gutpela olgeta olsem Jisas. Tasol yumi laikim tru pasin em i mekim long ol narapela. (1 Pita 1:8) Yumi save olsem long nau em i mekim wok King long Kingdom Bilong God, na dispela i strongim tru yumi. Klostu nau em bai pinisim olgeta pen na hevi. Jisas i kam stap olsem man long graun, olsem na em i redi tru long helpim yumi long kamap fri long olgeta pen na hevi em wok bos bilong Satan i kamapim. Tru tumas, em gutpela blesing tru long yumi gat wanpela King husat “inap pilim tru ol samting i save traim yumi.”—Hib. 2:17, 18; 4:15, 16.

14. Efesus 5:1, 2 i kirapim yumi long mekim wanem?

¹⁴ Taim yumi skelim eksampel bilong Jehova na Jisas, dispela i kirapim yumi long pilim moa yet hevi bilong ol narapela. (Ritim Efesus 5:1, 2.) Em tru olsem yumi no inap lukim tingting na filings i stap insait long bel bilong ol narapela. Maski i olsem, yumi ken traim long pilim tingting bilong ol, na luksave long ol samting ol i nidim. (2 Kor. 11:29) Ol manmeri bilong graun i no save tingim ol narapela, tasol yumi “no ken tingim laik bilong [yumi] yet tasol, nogat, [yumi] mas tingim tu laik bilong ol arapela.”—Fili. 2:4.

15. Husat i gat wok long pilim hevi bilong ol narapela?

¹⁵ Ol elda long kongrigesen i mas pilim hevi bilong ol narapela. Ol i save olsem ol i gat wok long lukautim gut ol sipsip. (Hib. 13:17) Sapos ol elda i laik helpim ol wanbilip, ol i mas i gat pasin bilong pilim hevi bilong ol narapela. Olsem wanem ol elda inap soim dispela pasin?

16. (a) Sapos elda i pilim tru hevi bilong ol bratasista, em bai mekim wanem? (b) Bilong wanem elda i mas mekim olsem?

¹⁶ Sapos elda i pilim tru hevi bilong ol bratasista, em bai lusim sampela haptaim long helpim ol. Em bai givim sampela askim na bihainim pasin isi na putim gut yau. Elda i mas mekim olsem sapos wanbilip i hatwok long kamapim tingting tru bilong em. (Prov. 20:5) Taim elda i lusim sampela haptaim long putim yau, dispela bai strongim pasin pren na pasin laikim, na ol wanbilip bai trastim em.—Apo. 20:37.

17. Planti bratasista i laikim tru wanem pasin long ol elda? Stori long eksampel.

¹⁷ Planti bratasista i tok wanpela pasin ol i laikim tru long ol elda em pasin bilong tingim tru ol narapela. Adelaide i tok: “Dispela pasin i mekim na em isi long mipela inap toktok long ol bikos mipela i save olsem ol bai pilim tru hevi bilong mipela.” Em i tok moa: “Taim mipela i toktok wantaim ol, pasin ol i mekim bai soim klia olsem ol i pilim hevi bilong mipela.” Wanpela  brata i pilim tru pasin bilong wanpela elda na em i tok: “Mi lukim olsem elda i aiwara taim mi stori long hevi bilong mi. Oltaim mi bai tingim dispela pasin bilong em.”—Rom 12:15.

18. Hau bai yumi inap kisim pasin bilong pilim hevi bilong ol narapela?

¹⁸ I no ol elda tasol i gat wok long pilim hevi bilong ol narapela. Yumi olgeta inap kisim dispela pasin. Yumi mas mekim wanem? Traim long pilim tingting bilong ol wanblut na ol wanbilip. Soim olsem yumi tingim tru ol arapela insait long kongrigesen, olsem ol tineja, ol lain i gat sik, ol lapun, na ol lain em wanblut o pren bilong ol i dai. Askim ol long ol i pilim olsem wanem. Putim gut yau taim ol i toktok. Yumi mas mekim pasin i soim olsem yumi pilim tru hevi bilong ol. Mekim ol samting yumi inap mekim bilong helpim ol. Long dispela rot, yumi soim pasin laikim tru.—1 Jon 3:18.

19. Wai na yumi mas redi long daunim laik bilong yumi yet taim yumi laik helpim ol narapela?

¹⁹ Yumi mas redi long daunim laik bilong yumi yet taim yumi laik helpim ol narapela. Bilong wanem? Ol manmeri i save mekim narapela narapela pasin taim ol i bel hevi. Sampela i redi long stori long hevi bilong ol, tasol sampela i no laik mekim olsem. Yumi laik helpim ol, tasol yumi no ken givim ol askim we inap semim ol. (1 Tes. 4:11) Taim ol narapela i stori long hevi bilong ol, ating yumi no inap wanbel long tingting bilong ol. Tasol yumi mas luksave olsem tingting bilong ol i no wankain long tingting bilong yumi. Yumi mas redi long putim yau, na no ken hariap long toktok.—Mat. 7:1; Jems 1:19.

20. Yumi bai stori long wanem samting long neks stadi?

²⁰ Yumi laik pilim hevi bilong ol narapela insait long kongrigesen, na tu, yumi laik soim dispela pasin taim yumi mekim wok autim tok. Hau bai yumi inap soim dispela pasin taim yumi laik helpim ol manmeri long kamap disaipel? Yumi bai stori long dispela samting long neks stadi.