1. Малы милемлы кельше, куке мукет адямиос ми сярысь сюлмасько, лыдэ басьтоно ке 1 Пётрлэсь 3:8?

 МИЛЕМЛЫ кельше, куке мукет адямиос ми сярысь сюлмасько. Соос тыршо асьсэды ми интые пуктыны, милесьтым шӧдонъёсмес, малпанъёсмес, кулэяськонъёсмес валаны но юрттэтсэс ӵекто, куддыръя со сярысь куреммылэсь азьло но. Ми туж дунъяськомы соосты, кинъёс милемыз валало но гажам-жалямзэс b возьматыны быгато. (Лыдӟе 1 Пётрлэсь 3:8.)

2. Малы милемлы гажан-жалянэз возьматыны куддыръя секыт луэ?

² Христианъёс луыса, милям гажам-жаляммес возьматэммы потэ. Но сое возьматыны котьку ик уг пӧрмы. Малы? Нырысетӥез, ми тырбыдэстэмесь (Рим. 3:23). Соин ик милемлы нюръяськоно нырысь ик ачид сярысь малпаськон мылкыдын. Кыкетӥез, кинлы ке но секыт гажам-жалямзэ возьматыны, малы ке шуоно со озьы будэтэмын вал яке азьвыл соин мар ке но луиз. Куинетӥез, ми вылын котырысь адямиослэн мылкыдзы шӧдӥськыны быгатэ. Та берпум нуналъёсы тросэзлы мукетъёслэн шӧдонъёссы нокыӵе но уг пото. Библия сыӵе адямиосты «асьсэды асьсэос... яратӥсесь» шуыса нима (2 Тим. 3:1, 2). Кызьы со шуг-секытъёсты вормоно но мукетъёслэн шӧдонъёссы сярысь сюлмаськоно?

3. а) Мар юрттоз милемлы гажам-жаляммес эшшо но умойгес возьматыны? б) Мае ми эскеромы таяз статьяын?

³ Гажан-жалянэз эшшо но умойгес возьматон понна, туж кулэ адӟем карыны Иеговалэсь но солэн Пиезлэсь, Иисус  Христослэсь. Иегова — яратонлэн Инмарез, но со тужгес но умой адӟем карон возьматэ, кызьы мукетъёслэн шӧдонъёссы сярысь сюлмаськоно (1 Иоанн 4:8). Иисус быдэсак адӟем кариз Атаезлэсь (Иоанн 14:9). Музъем вылын улыкуз, со возьматӥз, кызьы гажан-жалянэз возьматыны луэ. Та статьяын ми нырысь эскеромы, кызьы Иегова но Иисус адямиослэсь шӧдонъёссэс лыдэ басьтӥзы. Собере ми вераськомы со сярысь, кызьы ми соослэсь адӟем карыны быгатӥськомы.

4. Кызьы Захариялэн 2:8 возьматэ, Иегова ужась-тыршисьёсызлэн шӧдонъёссы сярысь сюлмаське шуыса?

⁴ Кызьы адӟиське Библиысь, Иегова ужась-тыршисьёсызлэн шӧдонъёсыз сярысь сюлмаське. Малпаське, мае со шӧдӥз, куке израиль калык шуг-секытъёсын пумиськылӥз. Солэн Кылаз вераське: «Котькыӵе но куректон-кайгузы луон дыръя, солы но со куректон вайылӥз» (Ис. 63:7—9, ВД). Берлогес Захария пророк пыр Иегова вераз, куке мукетъёсыз солэн калыкезлы уродзэ лэсьто, со шӧдэ, солы аслыз уродзэ лэсьто кадь шуыса. (Лыдӟе Захариялэсь 2:8.) Кыӵе яркыт со возьматэ Иеговалэсь ас калыкез сярысь сюлмаськемзэ!

5. Кызьы Иегова ужась-тыршисьёсызлы юрттылӥз, куке соос шуг-секытэ сюрылӥзы?

⁵ Иегова шуг-секытэ сюрем ужась-тыршисьёссэ гажам-жалям сяна, соослы юрттэ но. Кылсярысь, куке израиль калык Египетын ляльчиын вал, Иегова валаз, макем солы секыт, но сое курадӟонъёсызлэсь мозмытэмез потэ вал. Тани мар со вераз Моисейлы: «Аслам калыкелэсь Египетын курадӟемзэ адӟи... викышъяса бӧрдэмзэс кылӥ. Солэсь куректон-кайгуоссэ тодӥсько, соин ик Ас калыкме со музъемысь, египет калыклэн киулысьтыз мозмытыны... мынӥсько» (Пот. 3:7, 8). Ас калыксэ гажам-жаляменыз, Иегова сое ляльчи луонысь мозмытӥз. Нош мар со шӧдӥз, куке Сӥзем музъемын солэн калыкез вылэ тушмонъёс урдскылӥзы? Инмар «ултӥясьёслэн, ӝикатыса-ёртыса возисьёслэн курадӟытэмзылы чидатэк ӝуштэмзэс-лулӟылӥськемзэс кылыкуз, соосты жаля вал». Иегова калыксэ жаляз но соослы юрттылӥз. Со ыстылӥз  судьяосты, кудъёсыз израиль калыкез тушмонъёслэсь утьылӥзы (Суд. 2:16, 18).

6. Кыӵе учырысь адӟиське, Иегова ужась-тыршисьёсызлэсь шӧдонъёссэс лыдэ басьтэ шуыса, соос шонертэм малпало ке но?

⁶ Иегова ужась-тыршисьёсызлэсь шӧдонъёссэс лыдэ басьтэ, соос шонертэм малпало ке но. Эскеромы Ионалэсь учырзэ. Инмар ыстӥз та пророкез Ниневияе, со отын улӥсьёслы быдтон сярысь иворез мед вералоз шуыса. Куке Ниневияын улӥсьёс ӧпкелизы, Инмар соосты жаляны малпаз. Нош Ионалы со ӧз кельшы. Солэн вожез потӥз, малы ке шуоно солэн кышкыт иворез ӧз быдэсмы. Нош Иегова чидамзэ возьматӥз но Ионалы та югдур шоры шонер учкыны юрттӥз (Иона 3:10—4:11). Иона валаз, Иегова сое дышетэ шуыса, но Инмар солэсь мылкыдзэ ӝутӥз та учырез ми понна гожтыса кельтыны (Рим. 15:4) c.

7. Кыӵе оскытон сётэ милемлы Иеговалэн ассэ ас калыкеныз воземез?

⁷ Со, кызьы Иегова ассэ ас калыкеныз возиз, оскытэ милемыз, ужась-тыршисьёсыз сярысь со сюлмаське шуыса. Со адӟе, кыӵе шуг-секытъёсын но вӧсь луонъёсын ми пумиськиськомы. Иегова «адями пиослэсь сюлэмзэс» тодэ (2 Пар. 6:30). Солы тодмо пуш малпанъёсмы но шӧдонъёсмы. Иегова тодэ, мае ми быгатӥськомы лэсьтыны, нош мае — ум, но со милемлы «чиданы луонтэм визь сынаськон уз лэзьы» (1 Кор. 10:13). Макем буйгато милемыз та кылъёс!

8—10. Мар юрттӥз Иисуслы мукетъёслы саклыксэ висъяны?

⁸ Куке Иисус музъем вылын улӥз, со мукетъёслы саклыксэ висъяз. Мар солы юрттӥз? Нырысетӥез, кызьы верамын вал ини, Иисус быдэсак инмысь Атаезлэсь адӟем кариз. Со но адямиосты яратӥз. Со шумпотэ вал, адӟыса ваньзэ, мае Иегова солэн юрттэменыз кылдытӥз, но тужгес но бадӟым шумпотонэз адямиосын герӟаськемын вал (Мад. 8:31). Иисус адямиосты яратӥз, но со солэсь мылкыдзэ ӝутӥз соослэн шӧдонъёссы сярысь малпаськыны.

⁹ Кыкетӥез, Иегова сямен, Иисус адӟыны быгатӥз, мар адямиослэн сюлмазы. Со тодӥз соослэн шӧдонъёссы но малпанъёссы сярысь (Матф. 9:4; Иоанн 13:10, 11). Соин ик, куке со вала вал, кинлэн ке мылкыдыз куашкамын шуыса, со сое гажаз-жаляз но буйгатылӥз (Ис. 61:1, 2; Лука 4:17—21).

¹⁰ Куинетӥез, Иисус ачиз потӥз куд-ог шуг-секытъёс пыр, кудъёсыныз адямиос пумиськылӥзы. Кылсярысь, со куанер семьяын будӥз, вылды. Иисус Иосифлы юрттылӥз но тодӥз, мар со сыӵе секыт уж (Матф. 13:55; Марк 6:3). Иосиф Иисуслэн ужаны-тыршыны кутскемезлэсь азьлогес кулӥз, дыр. Соин ик вераны луоз, Иисус матысь адямиез ыштонэн пумиськиз шуыса. Со сяна, со валаз, кызьы улыны семьяын, кудаз ваньмыз тон сямен Инмарлы уг оско (Иоанн 7:5). Та но мукет шуг-секытъёс пыр потыса, со огшоры адямиослэсь шӧдонъёссэс умойгес валаны кутскиз.

11. Ку Иисуслэн гажам-жалямез тужгес но умой адӟиськиз? Валэктэ. (Учке вылбамысь суредэз.)

¹¹ Иисуслэн гажам-жалямез тужгес но умой адӟиськиз соку, куке со паймымон ужъёс лэсьтылӥз. Со соосты ӧз лэсьты, озьы лэсьтыны кулэ шуыса гинэ. Со курадӟыса улӥсьёсты жаляз (Матф. 20:29—34; Марк 1:40—42). Малпаське, мар Иисуслэсь мылкыдзэ ӝутӥз пельтэм муртэ «калык пӧлысь  палэнэ» нуыны но сое бурмытыны, озьы ик палкышнолэсь одӥг гинэ пизэ улӟытыны (Марк 7:32—35; Лука 7:12—15). Иисус соослэсь сюлмаськонъёссэс валаз но соослы юрттэмез потӥз.

12. Кызьы Иисус Марфалы но Мариялы гажам-жалямзэ возьматӥз, кызьы адӟиське Иоаннлэн 11:32—35?

¹² Иисус гажам-жалямзэ возьматӥз Марфалы но Мариялы, куке соос Лазарьлэн кулэменыз сэрен бӧрдо вал. Библиын гожтэмын, «Иисуслэн синкылиосыз потӥзы» шуыса. (Лыдӟе Иоаннлэсь 11:32—35.) Солэн, матысь эшсэ ыштэменыз, синкылиосыз ӧз потэ, малы ке шуоно со тодӥз, сое улӟытоз шуыса. Со бӧрдӥз, малы ке шуоно со валаз вӧсь луонэз, кудзэ шӧдӥзы солэн матысь эшъёсыз, Лазарь кулэмен.

13. Кызьы милесьтым мылкыдмес ӝутэ Иисус милемыз жаля шуыса тодон?

¹³ Куке ми малпаськиськомы со сярысь, кызьы Иисус адямиослы гажам-жалямзэ возьматӥз, милям мылкыдмы ӝутске. Ми дунъяськомы сое, кызьы со мукетъёсыз шоры учкиз, но со понна сое яратӥськомы (1 Пётр 1:8). Куке ми тодӥськомы, Иисус али Инмарлэн Эксэйлыказ кивалтэ шуыса, ми шумпотӥськомы. Ӝоген со вань курадӟонъёсты быдтоз. Иисус куке но адями вал бере, со котькинлэсь умой эмъяны быгатэ вӧсь луонэз, кудзэ вайиз Шайтанлэн кивалтэмез. Кыӵе умой, асьмелэн кивалтӥсьмы «лябӟыса улон дыръямы асьмеды жалясь луэ» шуыса! (Евр. 2:17, 18; 4:15, 16).

14. Мар карыны мылкыдмес ӝутэ Иеговалэн но Иисуслэн примерзы, кызьы со адӟиське Ефесъёслы 5:1, 2?

¹⁴ Куке ми малпаськиськомы Иеговалэн но Иисуслэн примеръёссы вылын, милям мылкыдмы ӝутске мукетъёслы гажан-жалянмес эшшо но золгес возьматыны. (Лыдӟе Ефесъёслы 5:1, 2.) Зэм, ми ум тодӥське, мар адямиослэн сюлмазы. Но ми быгатӥськомы тыршыны соослэсь шӧдонъёссэс но кулэяськонъёссэс валаны (2 Кор. 11:29). Та дуннеысь асьсэды гинэ яратӥсь адямиосын ӵошатыса, ми ас сярысьтымы гинэ ум, нош «мукетъёс сярысь но» сюлмаськыны тыршиськомы (Флп. 2:4).

15. Кинлы тужгес но гажась-жалясь луоно?

¹⁵ Гажан-жалянэз возьматыны тужгес но кулэ тӧроослы. Соос Иегова азьын кыл куто ыжъёс понна, кудъёсыз сярысь соослы сюлмаськыны кулэ (Евр. 13:17). Вын-агайёслы но сузэр-апайёслы юрттон понна, тӧроослы соослэсь шӧдонъёссэс валано. Кытысь адӟиське соослэн гажась-жалясь луэмзы?

16. Мар каре гажась-жалясь тӧро но малы со кулэ луэ?

¹⁶ Гажась-жалясь тӧро мукет христианъёс понна дыр шедьтэ. Со соослы юанъёс сётъя, нош собере, кыл куспазы пырытэк, сак кылзэ соосты. Со туж кулэ луэ, куке кинлэн ке но сюлэмзэ усьтэмез потэ, но солы тупась кылъёс шедьтыны секыт (Мад. 20:5). Аслэсьтыз дырзэ дась луыса висъякуз, сыӵе тӧро вын-агайёсын но сузэр-апайёсын матысь кусыпъёссэ, эшъяськонзэ но яратонзэ эшшо но юнматэ (Ап. уж. 20:37).

17. Мае тужгес но дунъяло тӧроослэсь вын-агайёс но сузэр-апайёс? Вералэ пример.

¹⁷ Вын-агайёслэн но сузэр-апайёслэн верамзыя, соос тужгес но дунъяло тӧроослэсь мукетъёслэн шӧдонъёссы сярысь сюлмаськемзэс. Малы? Аделейд нимо сузэр вера: «Тӧроос доры мыныны но соосын вераськыны капчигес, куке тодӥськод, тонэ валалозы шуыса». Со ватса на: «Тынад кылъёсыд шоры учкемзыя валаны луэ, соос тонэ гажало-жаляло шуыса». Нош тани кыӵе шуныт мылкыдын одӥг агай тодаз вае тӧроен вераськемзэ: «Куке мон солы аслам  югдуре сярысь верай, солэн синкылиосыз потӥзы. Сое вунэтыны уг луы» (Рим. 12:15).

18. Кызьы ми мукетъёслы гажан-жалянмес эшшо но золгес возьматыны быгатӥськомы?

¹⁸ Зэм но, тӧроослы гинэ гажась-жалясь луоно ӧвӧл. Ми ваньмы мукетъёслы гажан-жалянмес эшшо но золгес возьматыны быгатӥськомы. Нош кызьы? Валаны тырше, кыӵе шуг-секытъёсын пумиське тӥляд семьяды, озьы ик кенешысь вын-агайёс но сузэр-апайёс. Дырдэс висъялэ быдэ вуымтэослы, арлыдоослы, висисьёслы но соослы, кин матысь адямизэ ыштӥз. Тунсыкъяське, кызьы соослэн ужъёссы мыно, но соосты сак кылзэ, куке соос шуг-секытъёссы сярысь верало. Соос мед шӧдозы, тӥ соосты зэмзэ ик валаськоды шуыса. Быгатэмдыя соослы юрттэ. Озьы лэсьтыса, тӥ уж вылын зэмос яратондэс возьматоды (1 Иоанн 3:18).

19. Малы, адямиослы юрттыкумы, котькуд адями сярысь нимысьтыз малпаськыны кулэ?

¹⁹ Куке ми мукетъёслы юрттӥськомы, котькуд адями сярысь нимысьтыз малпаськыны кулэ. Малы? Шуг-секытъёсын пумиськыса, адямиослэн пӧртэм шӧдонъёссы луыны быгато. Кинлэн ке но сюлэмзэ усьтэмез потэ, нош кин ке но ваньзэ ас пушказ возе. Милям адямиослы юрттэммы потэ, но, сюлмазы ик пырыса, юанъёс сётъяно ӧвӧл (1 Фес. 4:11). Со сяна, адями милемлы сюлэмзэ усьтэ ке но, со быгатэ вераны сое, маин ми соглаш ӧвӧл. Сыӵе дыре тодады возе: со солэн шӧдонъёсыз. Эн дыртэ мар ке но вераны, адямиез сак кылзэ (Матф. 7:1; Иак. 1:19).

20. Мае ми эскеромы вуоно статьяын?

²⁰ Милям гажан-жалянмес христиан кенешысь вын-агайёслы но сузэр-апайёслы гинэ возьматэммы уг поты, нош озьы ик со адямиослы но, кудъёсызлы тодытӥськомы. Кызьы сое лэсьтоно? Та юан вуоно статьяын эскериськоз.