1. Ndomo ci lekisa elivulu lia 1 Petulu 3:8, momo lie tu yevela esanju eci tu kala pokati komanu va kapako asakalalo etu lekalo lietu?

ECI tu kala pokati komanu va kapako asakalalo etu lekalo lietu ci tu sanjuisa. Ovo va li kapa pomangu yetu, va likolisilako oku limbuka ovisimĩlo vietu kuenda ndomo tu liyevite. Ovo va tu kuatisa kovina tu sukila ndaño muẽle ka tua va pingile. Tu eca olopandu komanu vana va lekisa ‘ohenda’ * kokuetu.—Tanga 1 Petulu 3:8.

2. Momo lie tu sukilila oku likolisilako oku lekisa ohenda?

² Omo okuti Tuakristão, tu sukila oku kala vakuahenda. Ocili okuti, oku lekisa ocituwa caco ka ca lelukile. Momo lie? Momo ka tua li puile. (Va Rom. 3:23) Omo liaco, tu sukila oku likolisilako oco tu kapeko asakalalo a vakuetu. Ku vamue ci tĩla calua oku lekisa ocituwa caco, omo lionjila ndomo va tatiwa kosimbu. Kuenje nda ka tua kuatele utate tu pondola oku yapuisiwa lovituwa viomanu vaco. Koloneke vilo via sulako, omanu valua ka va kapeleko vakuavo. Omo liaco, ovo “vakuakulisola ovo muẽle.” (2 Tim. 3:1, 2) Nye ci tu kuatisa oku yula ovitangi evi oco tu lekise ohenda ku vakuetu?

3. (a) Tu lekisa ndati ohenda? (b) Nye tu lilongisa vocipama cilo?

³ Tu pondola oku likolisilako oku lekisa ohenda poku setukula Yehova Suku kuenda Omõlaye Yesu Kristu. Yehova o Suku yimue yocisola kuenda eca ongangu yiwa yoku kapako  asakalalo a vakuetu. (1 Yoa. 4:8) Yesu wa setukula ciwa Isiaye. (Yoa. 14:9) Yesu eci a kala palo posi, wa lekisa ndomo omanu va pondola oku kala vakuahenda. Vocipama cilo, tu lilongisa tete ndomo Yehova la Yesu va siata oku lekisa okuti va kapako asakalalo omanu. Tu lilongisavo ndomo tu pondola oku setukula ongangu yavo.

4. Ndomo elivulu lia Isaya 63:7-9 li lekisa, Yehova o liyeva ndati catiamẽla kovitangi viafendeli vaye?

⁴ Embimbiliya lilongisa okuti Yehova wa kapako asakalalo afendeli vaye. Ndeci, kũlĩhisa ndomo Yehova a liyeva eci akulu vo ko Isareli va liyaka lovitangi vialua. Ondaka ya Suku ya popia hati: “Olohali viavo viosi eye wa vi talelavo kumosi lavo.” (Tanga Isaya 63:7-9.) Noke pocakati cuprofeto Sakariya, Yehova wa popia okuti eci afendeli vaye vatatiwa lãvi eye o yevavo evalo. Yehova wa sapuila afendeli vaye hati: ‘Nda umue wa ku lamba ove ca soka okuti, wa lamba komoliso liange.’ (Sak. 2:8) Eci ci lekisa okuti Yehova wa kapako calua asakalalo afendeli vaye!

5. Tukula ulandu umue u lekisa ndomo Yehova a kuatisa afendeli vaye va kala oku talisiwa ohali.

⁵ Yehova ka yevi lika ohenda kafendeli vaye va tala ohali. Pole, eye o linga cimue oco a va kuatise. Ndeci, eci va Isareli va kala oku talisiwa ohali kupika Kegito, Yehova wa kapeleko evalo liavo kuenje co vetiya oku va kuatisa. Yehova wa sapuila Mose hati: “Nda mõla ohali yomanu vange . . . nda yeva ndeci va lilila . . . nda kulĩha olohali viavo. Ndeya oku va popela peka lia va Egito.” (Etu. 3:7, 8) Omo okuti Yehova wa kuatela ohenda afendeli vaye, wa va yovola kupika. Noke lioku pita anyamo alua, Vofeka Yohuminyo va Isareli va liyaka lovanyali. Yehova wa liyeva ndati? Eye “wa va kuatela ohenda oku yeva ndomo va leñaleña omo va sakalaisua lomo va talisua ohali.” Yimue vali onjanja ohenda ya vetiya Yehova oku kuatisa afendeli vaye. Eye wa tuma olonganji oco vi popele va Isareli kovanyali vavo.—Olong. 2:16, 18.

6. Tukula ulandu umue u lekisa ndomo Yehova a lekisa ohenda kulume umue wa kala lovisimĩlo ka via sungulukile.

⁶ Yehova olonjanja viosi o lekisa ohenda kafendeli vaye ndaño ceci va lekisa  ovisimĩlo ka via sungulukile. Tu konomuisi ulandu wa Yona. Yehova wa tuma uprofeto waye oku eca espulo liesombiso ku va Ninivita. Eci ovo va likekembela Yehova wa nõlapo oku lekisa ohenda kokuavo. Pole, Yona ka sanjukilile onjila Yehova a nõlapo. Eye “wa tema calua” momo ocitumasuku cekangiso ka ca tẽlisiwile. Pole, Yehova wa lekisa epandi ku Yona kuenda wo kuatisa oku pongolola ovisimĩlo viaye. (Yona 3:10–4:11) Noke, Yona wa kuata elomboloko liovina Yehova a kala oku u longisa kuenje Yehova wo nõla oco a sonehe ulandu waco, oco u tu kuatise.—Va Rom. 15:4. *

7. Onjila ndomo Yehova a tata afendeli vaye kosimbu yi tu longisa nye?

⁷ Ndomo Yehova a tata afendeli vaye kosimbu, ci tu ĩha ekolelo liokuti eye wa kapako afendeli vaye. Eye wa kũlĩha ciwa evalo kuenda ohali omunu lomunu pokati ketu a kasi oku liyaka layo. Yehova eye “lika wa kũlĩha ovitima viomala vomanu.” (2 Asa. 6:30) Yehova wa kũlĩha ovisimĩlo vietu viosi kuenda wa kũlĩhavo okuti ka tu tẽla oku linga ovina viosi. Eye “ka ecelela okuti [tu] yonjiwa leci ka [tu] tẽla.” (1 Va Kor. 10:13) Eci ci tu lembeleka calua!

8-10. Nye ca vetiya Yesu oku eca ekuatiso komanu vakuavo?

⁸ Yesu eci a kala palo posi, wa kapeleko asakalalo a vakuavo. Kuli ovina vitatu via kuatisa Yesu oku kapako asakalalo a vakuavo. Tete, ndomo tua lilongisa konyima, Yesu wa setukula ciwa ovituwa via Isiaye wokilu. Ndeci Isiaye, Yesu wa solele omanu. Ndaño okuti eye wa kuatele esanju omo liovina viosi a kuatisa Yehova oku lulika, Yesu wa ‘sanjukilile calua omãla vomanu.’ (Olosap. 8:31) Ocisola ca vetiya Yesu oku kapako asakalalo a vakuavo.

⁹ Vali, ndeci Yehova, Yesu o pondolavo oku kũlĩha eci ci kasi vutima. Yesu wa kũlĩha olonjongole kuenda ovismĩlo viomanu. (Mat. 9:4; Yoa. 13:10, 11) Omo liaco, eci a mola okuti omanu va kala oku tatiwa lãvi, ohenda yo vetiya oku va lembeleka.—Isa. 61:1, 2; Luka 4:17-21.

¹⁰ Tatu, Yesu wa liyakavo lovitangi ndevi omanu va siata oku liyaka lavio. Ndeci, eye wa kulila vepata limue liolohukũi. Yesu poku talavaya la Isiaye wokatumba, Yosefe, wa lilongisa oku linga upange umue u kavisa etimba. (Mat. 13:55; Mar. 6:3) Citava okuti Yosefe wa fa osimbu Yesu kamalele handi upange waye woku kunda. Yesu wa yevavo evalo litunda koku fisa omunu umue o soliwe. Yesu wa kũlĩhile okuti ka ca lelukile oku kala vepata limue okuti ka va tiamẽlele ketavo limuamue. (Yoa. 7:5) Ovina evi kuenda vikuavo via vetiya Yesu oku kuata elomboloko liovitangi omanu va siata oku liayaka lavio.

11. Vepuluvi lipi Yesu a lekisa okuti wa kapeleko calua asakalalo a vakuavo? Ci lombolola. (Tala ociluvialuvia koñoño.)

¹¹ Esakalalo lia Yesu lia limbukiwa eci a linga ovikomo. Yesu ka lingile ño ovikomo viaco omo liekisika. Eye wa kuatela “ohenda” omanu vana va kala oku talisiwa ohali. (Mat. 20:29-34; Mar. 1:40-42) Ndeci, sokolola ndomo Yesu a liyeva eci opa powiñi ulume umue ocisitatũi oco o sakule, ale ceci a pindula omõla wongunga wa cimbumba  umue. (Mar. 7:32-35; Luka 7:12-15) Yesu wa vakuatela ohenda kuenje wa va kuatisa.

12. Ndomo ca lomboluiwa kelivulu lia Yoano 11:32-35, Yesu wa lekisa ndati okuti wa kapeleko esumuo lia Marta la Maria?

¹² Yesu wa lekisa esakalalo ku Marta kuenda ku Maria. Eci eye a mola okuti ovo va sumua omo liolofa via manjavo Lasaru, “Yesu wa lila.” (Tanga Yoano 11:32-35.) Eye ka lilile lika omo okuti ekamba liaye lia fa. Yesu wa kũlĩhile okuti wa laikele oku pindula Lasaru. Pole, eye wa lila omo wa kuatela ohenda akamba vaye va kala lesumuo.

13. Tu lembelekiwa ndati poku kũlĩha okuti Yesu o lekisa ohenda komanu vosi?

¹³ Oku kũlĩha okuti Yesu wa kuatela ohenda omanu ci tu lembeleka calua. Etu ka tua lipuile ndeci Yesu. Oku kũlĩha onjila ndomo eye a tata omanu, ci tu vetiya oku u sola. (1 Pet. 1:8) Tu lembelekiwa oku kũlĩha okuti kaliye Yesu o kasi oku viala Ndosoma Yusoma wa Suku. Ndopo o ka malako ohali yosi. Omo okuti Yesu wa kala palo posi, o kuete epondolo lioku malako ovitangi viosi via kokiwa luviali wa Satana omanu va siata oku liayaka lavio. Omo liaco, tua sumũlũha omo okuti tu kuete Ombiali yimue ya “kapako oku hongua kuetu.”—Va Hev. 2:17, 18; 4:15, 16.

14. Ndomo ci lekisiwa kelivulu lia Va Efeso 5:1, 2, tu vetiyiwa oku linga nye?

¹⁴ Eci tu sokolola kongangu ya Yehova la Yesu, tu vetiyiwa oku setukula ongangu yavo. (Tanga Va Efeso 5:1, 2.) Ocili okuti, etu ka tu pondola oku kũlĩha eci ci kasi vutima womanu ndeci ovo. Ndaño ndoco, tu pondola oku kũlĩha asakalalo a vakuetu kuenda asukila avo. (2 Va Kor. 11:29) Omo okuti tua ñualiwa lomanu va kuepela voluali, tu likolisilako oco ‘ka tu ka li sokololi lika ovina [vietu muẽle], puãi [tu] sokololavo ovina via vakuene.’—Va Fil. 2:4.

15. Velie va sukila oku lekisa vali ohenda?

¹⁵ Ca piãla enene akulu vekongelo va sukila oku lekisa ovituwa vimuamue. Ovo va kuete ocikele ku Yehova konjila ndomo va tata olomeme viaye. (Va Hev. 13:17) Akulu vekongelo oco va kuatise vamanji, va sukila oku kala vakuahenda. Ndamupi akulu vekongelo va pondola oku lekisa ocituwa caco?

16. Ukulu wekongelo okuti wa sunguluka, nye a linga kuenda momo lie ci kuetele esilivilo?

¹⁶ Ukulu wekongelo okuti wa sunguluka o sanda epuluvi lioku kala la vamanji. Eye o linga apulilo, o yevelela lutate kuenda lepandi. Eci ci kuete esilivilo lialua ca piãla enene nda manji umue o yongola oku situlula ovisimĩlo viaye, pole, o likolisilako oku sanga olondaka via suapo. (Olosap. 20:5) Eci ukulu wekongelo lesanju a sanda otembo yoku kala la vamanji, pokati kavo pa kala oku likolela, ukamba kuenda ocisola va likuetele ci livokiya.—Ovil. 20:37.

17. Nye vamanji valua va popia catiamẽla kocituwa va sole vali kakulu vekongelo? Ci lombolola.

¹⁷ Vamanji valua va popia okuti, ocituwa va sole vali kakulu vekongelo, ocituwa cavo coku kapako asakalalo a vakuavo. Momo lie? Manji Adelaide wa popia hati: “Ci leluka oku sapela lavo, momo ove wa kũlĩha okuti ovo va ku yevelela.” Wamisako vali hati: “O limbuka okuti ovo va kapako muẽle asakalalo ove omo lionjila ndomo ovo va ku tambulula eci o sapela lavo.” Manji umue ulume okuti wa sola onjila ndomo akulu vo tata wa popia hati: “Nda mola asuelela vovaso ukulu umue wekongelo eci eye a sokolola kekalo  liange. Eci lalimue eteke ca ndimbile.”—Va Rom. 12:15.

18. Tu lekisa ndati okuti tua kapako vakuetu?

¹⁸ Ocili okuti, akulu vekongelo havoko lika va sukila oku kala vakuahenda. Vosi yetu tu pondola oku lekisa ocituwa caco. Ndamupi tu ci linga? Likolisilako oku kũlĩha ovitangi vi liyaka lepata liove kuenda vamanji vekongelo. Lekisa okuti wa kapako amalẽhe vekongelo, vana va vela, vana vakuka kuenda vana va fisa vangandiavo. Kũlĩhisa ndomo va kasi. Yevelela lutate eci ovo va ku lomboluila ndomo va liyevite. Lekisa kokuavo okuti wa kapako ekalo liavo. Eca ekuatiso lisukiliwa ndomo ci likuata lekalo liove. Poku ci linga, o ka lekisa ocisola cocili.—1 Yoa. 3:18.

19. Momo lie tu sukilila oku lekisa esunguluko poku kuatisa va kuetu?

¹⁹ Tu sukila oku lekisa esunguluko poku kuatisa vakuetu. Momo lie? Momo onjila ndomo omunu lomunu a liyaka lovitangi ya litepa. Vamue va sole oku popia catiamẽla kovitangi viavo, pole, vakuavo sio. Ndaño okuti tu yongola oku eca ekuatiso, tu sukila oku yuvula oku linga apulilo a pondola oku sumuisa vakuetu. (1 Va Tes. 4:11) Eci vakuetu va tu sapuilako ovitangi viavo, pamue tu limbuka okuti ovina tu popia ka vi va vetiya. Omo liaco, tu sukila oku kũlĩha ndomo va liyevite. Etu tu sukila oku kala vakuanjanga koku yevelela loku livala koku popia.—Mat. 7:1; Tia. 1:19.

20. Epulilo lipi li ka tambuluiwa vocipama cikuavo?

²⁰ Ka tu sukila lika oku kala vakuahenda la vamanji vekongelo, pole, tu sukilavo oku kala vakuahenda lomanu kupange woku kunda. Tu lekisa ndati okuti tu vakuahenda kupange woku kunda? Epulilo eli li ka tambuluiwa vocipama cikuavo.