1. Sumala ha 1 Pedro 3:8, kay ano nga nalilipay kita ha pakig-upod ha mga tawo nga nagtatagad ha aton inaabat ngan kaopayan?

NALILIPAY kita ha pakig-upod ha mga tawo nga nagtatagad ha aton inaabat ngan kaopayan. Iginbubutang nira an ira kalugaringon ha aton kahimtang, karuyag sidngon, nangangalimbasog hira nga masabtan an aton ginhuhunahuna ngan inaabat. Ginhuhunahuna nira hin abanse kon ano an aton panginahanglan ngan naghahatag hin bulig​—usahay, antes pa ngani kita mangaro hito. Gin-aapresyar naton an mga tawo nga nagpapakita hin “pagpaid” * ha aton.​—Basaha an 1 Pedro 3:8.

2. Kay ano nga kinahanglan an pangalimbasog ha pagpakita hin empatiya?

² Sugad nga mga Kristiano, karuyag naton ngatanan nga magpakita hin empatiya, o pagpaid. Pero ha pagkamatuod, kinahanglan an pangalimbasog ha pagbuhat hito. Kay ano? Usa nga rason, kay diri kita perpekto. (Roma 3:23) Salit kinahanglan naton atohan an tendensya nga hunahunaon an aton la kalugaringon. An pipira ha aton nakukurian liwat ha pagpakita hin empatiya tungod han aton gindak-an o naglabay nga mga eksperyensya. Dugang pa, mahimo kita maimpluwensyahan han kinaiya han mga tawo ha aton palibot. Hinin kataposan nga mga adlaw, damu an diri nagtatagad ha inaabat han iba. Lugod, “mahigugmaon [hira] ha ira la kalugaringon.” (2 Tim. 3:1, 2) Ano an makakabulig ha aton nga malamposan an mga ulang ha pagpakita hin pagtagad ha inaabat ha iba?

3. (a) Paonan-o naton mapapauswag an aton pagpakita hin pagpaid? (b) Ano an aton hihisgotan hini nga artikulo?

³ Mapapauswag naton an pagpakita hin pagpaid pinaagi ha pagsubad kan Jehova nga Dios ngan ha iya Anak nga hi Jesu-Kristo. Hi Jehova an Dios han gugma, ngan hiya an pinakamaopay  nga susbaranan ha pagpakita hin pagpaid. (1 Juan 4:8) Perpekto nga ginsubad ni Jesus an personalidad han iya Amay. (Juan 14:9) Han nakanhi hiya ha tuna, iginpakita niya kon paonan-o mahimo ipakita han usa nga tawo an pagpaid. Hini nga artikulo, hihisgotan anay naton kon paonan-o hi Jehova ngan hi Jesus nagpakita hin pagpaid ha inaabat han iba. Katapos, aton uusisahon kon paonan-o naton hira masusubad.

4. Paonan-o iginpapakita han Isaias 63:7-9 nga nagtatagad hi Jehova ha inaabat han iya mga surugoon?

⁴ An Biblia nagtututdo nga nagtatagad hi Jehova ha inaabat han iya mga surugoon. Pananglitan, hunahunaa an inabat ni Jehova han nakaeksperyensya an mga Israelita hin mga pagsari. An Pulong han Dios nasiring: “Ha ngatanan nira nga kasakit hiya ginsakit.” (Basaha an Isaias 63:7-9.) Ha urhi, pinaagi kan propeta Sakarias, hi Jehova nagsiring nga kon ginmamaltrato an iya katawohan, sugad hin hiya mismo an ginmamaltrato. Ginsidngan ni Jehova an iya mga surugoon: “Hiya nga nakawkaw ha iyo nakawkaw han tawotawo han [akon] mata.” (Sak. 2:8) Mapwersa gud ini nga pag-ilustrar han pagtagad ni Jehova ha iya katawohan!

5. Paghatag hin ehemplo kon paonan-o ginios hi Jehova ha pagbulig ha iya mga surugoon nga nag-aantos.

⁵ Hi Jehova waray la pumaid ha iya mga surugoon nga nag-aantos. Ginios hiya basi buligan hira. Pananglitan, han nag-aantos an mga Israelita sugad nga mga uripon ha Ehipto, nasabtan ni Jehova an ira kasakit ngan napagios nga buligan hira. Ginsidngan ni Jehova hi Moises: “Ha pagkamatuud akon hinkit-an an mga kakuri-an han akon katawohan . . . , ngan hinbatian ko an ira took . . . , ako maaram han ira mga kabidoan; Ngan ako nakanhi pagluwas ha ira tikang ha mga kamot han mga Egiptohanon.” (Eks. 3:7, 8) Tungod kay pinaid hi Jehova ha iya katawohan, gintalwas niya hira tikang ha pagkauripon. Pipira ka siglo an naglabay, han nakadto na hira ha Tuna nga Iginsaad, gin-atake an mga Israelita hin mga kaaway. Ano an ginhimo ni Jehova? Nalooy hiya ha ira pangaraba tungod han mga nagtalumpigos ha ira ngan han mga nag-aabuso ha ira. Makausa pa, an empatiya nagpagios kan Jehova ha pagbulig ha iya katawohan. Nagpadara hiya hin mga hukom basi talwason an mga Israelita ha ira mga kaaway.​—Huk. 2:16, 18.

6. Paghatag hin ehemplo kon paonan-o hi Jehova nagpakita hin pagpaid ha inaabat han usa nga may sayop nga panhunahuna.

 ⁶ Hi Jehova napaid ha inaabat han iya katawohan​—bisan kon usahay sayop an ira panhunahuna. Tagda an ehemplo ni Jonas. Iginpadara han Dios ini nga propeta basi magpasamwak hin paghukom kontra ha mga taga-Ninibe. Han nagbasol hira, nagdesisyon an Dios nga diri hira bungkagon. Pero waray malipay hi Jonas hini nga desisyon. “Hiya nasina” tungod kay waray matuman an iya tagna han kabungkagan. Kondi nagpailob hi Jehova kan Jonas ngan ginbuligan hiya nga mabag-o an iya panhunahuna. (Jon. 3:10–4:11) Ha urhi, nasabtan ni Jonas an leksyon, ngan gin-gamit pa ngani hiya ni Jehova ha pagsurat hini nga asoy para ha aton kapulsanan.​—Roma 15:4. *

7. Ano an iginpapasarig ha aton han paagi han pagtratar ni Jehova ha iya mga surugoon?

⁷ An paagi han pagtratar ni Jehova ha iya katawohan nagpapasarig ha aton nga may empatiya hiya ha iya mga surugoon. Maaram hiya han mga kasakit ngan pag-antos han kada usa ha aton. Hi Jehova “maaram han mga kasingkasing han mga anak han mga tawo.” (2 Kron. 6:30) Maaram hiya han aton mga ginhuhunahuna, inaabat, ngan limitasyon. Ngan “diri niya itutugot nga sulayon [kita] labaw han [aton] maiilob.” (1 Cor. 10:13) Nakakaliaw gud ito nga pasarig!

8-10. Ano nga mga butang an nakabulig kan Jesus nga magkaada pagpaid ha iba?

⁸ Han nakanhi hi Jesus ha tuna sugad nga tawo, may hilarom hiya nga pagpaid ha iba. May-ada diri maminos tulo nga butang nga nakabulig ha iya nga magkaada pagpaid. Siyahan, sugad han gin-unabi na, perpekto nga ginsubad ni Jesus an personalidad han iya langitnon nga Amay. Pariho ha iya Amay, hinigugma ni Jesus an mga tawo. Bisan kon nalipay hiya ha ngatanan nga ginlarang ni Jehova diin binulig hiya ha paghimo hito, hi Jesus labi nga ‘nalipay ha mga anak han mga tawo.’ (Prob. 8:31) An gugma nagpagios kan Jesus nga tagdon an inaabat han iba.

⁹ Ikaduha, pariho kan Jehova, nakakabasa hi Jesus han kasingkasing. Nahibabaroan niya an motibo ngan inaabat han mga tawo. (Mat. 9:4; Juan 13:10, 11) Salit kon nakikita ni Jesus nga nasusubo hinduro an mga tawo, an pagpaid nagpapagios ha iya nga liawon hira.​—Isa. 61:1, 2; Luc. 4:17-21.

¹⁰ Ikatulo, naeksperyensyahan mismo ni Jesus an pipira han mga problema han mga tawo. Pananglitan, posible nga nagdaku hi Jesus ha pobre nga pamilya. Tungod kay nagtrabaho hiya kaupod han iya pinakaamay nga hi Jose, nahibaro hi Jesus ha pagtrabaho hin magbug-at. (Mat. 13:55; Mar. 6:3) Posible liwat nga namatay hi Jose antes matapos an ministeryo ni Jesus. Salit posible gud nga inabat ni Jesus an kasakit tungod ha kamatyi hin hinigugma. Ngan maaram liwat hi Jesus kon ano an kahimtang han pamilya nga may iba-iba nga gintotoohan. (Juan 7:5) Ito ngan an iba pa nga mga sitwasyon nakabulig gud kan Jesus nga maintindihan an mga problema ngan inaabat han ordinaryo nga mga tawo.

11. Ha ano nga kahimtang labi nga nakita an pagpaid ni Jesus? Isaysay. (Kitaa an retrato ha kobre.)

¹¹ An pagpaid ni Jesus labi nga nakita han naghimo hiya hin mga milagro. Naghimo hi Jesus hin mga milagro diri la tungod kay kinahanglan niya ito himoon. “Nalooy” hiya ha mga nag-aantos. (Mat. 20:29-34; Mar. 1:40-42) Pananglitan, hunahunaa an inabat ni Jesus han gindara niya an usa nga bungol pahirayo ha damu nga tawo basi tambalon hiya o han ginbanhaw  niya an uusa la nga anak han balo nga babaye. (Mar. 7:32-35; Luc. 7:12-15) Pinaid hi Jesus hito nga mga tawo ngan karuyag gud niya nga buligan hira.

12. Paonan-o iginpapakita han Juan 11:32-35 nga napaid hi Jesus kanda Marta ngan Maria?

¹² Hi Jesus nagpakita hin pagpaid kanda Marta ngan Maria. Han nakita niya an ira duro nga kasubo tungod han kamatay han ira bugto nga hi Lasaro, “nagtangis hi Jesus.” (Basaha an Juan 11:32-35.) Nagtangis hiya diri la tungod kay diri na niya makakaupod an iya duok nga sangkay. Ngani, maaram hiya nga babanhawon niya hi Lasaro. Lugod, nagtangis hiya kay nasabtan ngan inabat niya an duro nga kasubo han iya hinigugma nga kasangkayan.

13. Kay ano nga nadadasig kita ha paghibaro nga may empatiya hi Jesus?

¹³ Makapadasig gud ha aton an paghibaro nga may empatiya hi Jesus ha mga tawo. Hi Jesus perpekto, pero kita diri. Kondi, hinigugma naton hiya tungod kay gintratar niya an iba ha mapinairon nga paagi. (1 Ped. 1:8) Napaparig-on kita ha paghibaro nga nagmamando na hiya yana sugad nga Hadi han Ginhadian han Dios. Diri na maiha, iya wawad-on an ngatanan nga pag-antos. Tungod kay nagin tawo hiya, may kapas gud hiya ha pagbulig ha katawohan nga makarekober tikang ha kasakit ngan pag-antos nga resulta han pagmando ni Satanas. Bendisyon gud an pagkaada Magmarando nga “napaid ha aton mga kaluyahan.”​—Heb. 2:17, 18; 4:15, 16.

14. Sumala ha Efeso 5:1, 2, napapagios kita nga buhaton an ano?

¹⁴ Kon ginpapamalandong naton an ehemplo ni Jehova ngan ni Jesus, napapagios kita nga mas mangalimbasog ha pagpakita hin pagpaid. (Basaha an Efeso 5:1, 2.) Diri kita pariho ha ira nga nakakabasa han kasingkasing. Bisan pa hito, mahimo kita mangalimbasog nga masabtan an inaabat ngan ginkikinahanglan han iba. (2 Cor. 11:29) Diri pariho ha makikalugaringon nga mga tawo ha kalibotan, nangangalimbasog kita nga ‘magin matinagaron, diri la para ha aton kalugaringon nga kaopayan, kondi para liwat ha kaopayan han iba.’​—Fil. 2:4.

15. Hin-o an labi nga kinahanglan magpakita hin pagpaid?

¹⁵ An mga tigurang ha kongregasyon labi nga kinahanglan magpakita hin pagpaid. Maaram hira nga may baratunon hira kan Jehova ha paagi han ira pagtratar ha mga karnero nga igintapod ha ira. (Heb. 13:17) Basi mabuligan han mga tigurang an ira mga igkasi-tumuroo, kinahanglan hira magin mapinairon. Paonan-o maipapakita han mga tigurang an pagpaid?

16. Ano an ginhihimo han usa nga mapinairon nga tigurang, ngan kay ano nga importante ito?

¹⁶ An mapinairon nga tigurang naggagahin hin panahon ha iya Kristiano nga kabugtoan. Nagpapakiana hiya ngan katapos, atentibo ngan mapailubon hiya nga namamati ha ira. Importante ini labi na kon an usa hinin hinigugma nga mga karnero naruruyag pagsumat han iya panhunahuna ngan inaabat pero nakukurian ha pagpahayag hito. (Prob. 20:5) Pinaagi ha pagin andam han tigurang ha paggahin hin panahon, nagririg-on an pagtapod, pagkamagsangkay, ngan gugma butnga niya ngan han kabugtoan.​—Buh. 20:37.

17. Sumala ha damu nga kabugtoan, ano nga kalidad an ira pinakanaruruyagan ha usa nga tigurang? Paghatag hin ehemplo.

¹⁷ Damu nga kabugtoan an nasiring nga an ira pinakanaruruyagan nga kalidad ha usa nga tigurang amo an pagin mapinairon ha inaabat han iba. Kay ano? “Mas masayon an pakiistorya ha ira kay maaram ka nga masasabtan ka nira,” siring ni Adelaide. Hiya nagdugang: “Mahibabaroan mo nga napaid hira ha imo pinaagi han ira reaksyon kon nakikiistorya ka ha ira.” Usa  nga brother nga mapasalamaton ha pagtratar ha iya han usa nga tigurang an nagsiring: “Nakita ko an luha ha mga mata han usa nga tigurang samtang igin-iistorya ko ha iya an akon sitwasyon. Diri ko gud ito hingangalimtan.”​—Roma 12:15.

18. Paonan-o naton makukultibar an pagpaid?

¹⁸ Syempre, diri la mga tigurang an kinahanglan magpakita hin pagpaid. Kita ngatanan mahimo magkultibar hini nga kalidad. Paonan-o? Pangalimbasog nga masabtan an kakurian nga gin-aatubang han imo mga kapamilya ngan igkasi-tumuroo. Pagpakita hin personal nga interes ha mga batan-on ha kongregasyon pati ha mga may sakit, edaran, ngan adton namatayan hin hinigugma. Kumustaha hira. Pamati hin maopay kon iginpapahayag nira an ira inaabat. Ipaabat ha ira nga nasasabtan mo gud an ira kahimtang. Paghatag hin bulig. Kon ginbubuhat naton ini, iginpapakita naton an tinuod nga gugma.​—1 Juan 3:18.

19. Kay ano nga kinahanglan kita magin mapauyon-uyon kon nabulig ha iba?

¹⁹ Kinahanglan kita magin mapauyon-uyon kon nabulig ha iba. Kay ano? Kay iba-iba an paagi han mga tawo ha pag-atubang ha mga problema. An pipira naruruyag nga isumat an ira problema, pero an iba diri. Salit, bisan kon karuyag naton buligan hira, sadang naton likyan an pagpakiana hin mga butang nga sobra ka personal. (1 Tes. 4:11) Bisan kon sumatan kita han iba mahitungod han ira inaabat, usahay bangin diri kita umuyon ha ira ginsisiring. Pero sadang naton hinumdoman nga ito an ira inaabat. Kinahanglan magin andam kita mamati ngan diri magdali-dali pagyakan.​—Mat. 7:1; San. 1:19.

20. Ano an aton hihisgotan ha sunod nga artikulo?

²⁰ Labot la ha pagpakita hin pagpaid ha kabugtoan ha kongregasyon, karuyag naton ipakita inin maopay nga kalidad ha aton pagministeryo. Paonan-o naton maipapakita an pagpaid kon nakikigbahin kita ha paghimo hin disipulo nga buruhaton? Ini an aton hihisgotan ha sunod nga artikulo.