1. 1 პეტრეშ 3:8-ის ინოჭარილ სიტყვეფიშ თანახმათ, მუ მოსიამოვნუნა არძას?

არძას მოსიამოვნუნა, მუჟამსით შხვეფ ითვალისწინენა ჩქინ გრძნობეფს დო ზრუნენა ჩქინ ჯგირობუაშე. თინეფ ირნერო ოცადნა, ჩქინ ადგილს წერმიდგინან მუნეფიშ დუდ, ნამდა ქიგეგან მუს ფიფქრენთ დო მუს ბგინაფლენთ. თინეფ მეხვადნა მუ მოსაჭირნა დო სოიშახ ფთხინდათ, აშო ფთავაზენა მოხვარას. ჩქი ვაფასენთ თიცალ კათას, მით ყურადღებას გიმირჩქინანს * ჩქინწკუმა (წეკითხით 1 პეტრე 3:8).

2. მუშენ შილებე მიჭირდან შხვეფიშ გაჭირებაშ გურშა მეღალა?

² მუჭოთ ქრისტიანეფს, მოკონა გურშა მიბღათ შხვეფიშ გაჭირება დო გეფთვალისწინათ თინეფიშ გრძნობეფ. მარა სინამდვილეს, ირიათო ადვილ ვა რე თეშ კეთება. თეშ ართ-ართ მიზეზ ჩქინ არასრულყოფილება რე (რომ. 3:23). ჩქი მიდრეკილ ვორეთ, ნამდა ხვალე ჩქინ დუდშე იფიფქრათ, ათეშენ ოკო ვეცადათ ვებრძოლათ თე თვისებას. თეს გეძინელ, ნამთინექ შილებე თიცალ პირობეფს ირდჷ ვარდა თიცალ მუდგარენ გინიღ, ნამდა უჭირს შხვეფიშ გაჭირებაშ გურშა მეღალა. ხოლო ართ მიზეზ შილებე თი ხალხიშ გავლენა რდას, მიდგაწკუმა ართო ცხოვრება მიხვადნა. თე ბოლო დღალეფს ბრელ ვეთვალისწინენს შხვეფიშ გრძნობეფს დო ხვალე მუნეფიშ დუდშე ფიქრენა (2 ტიმ. 3:1, 2). მუ მიმეხვარებნა, გივორჯგინათ თე სირთულეეფს დო გეფთვალისწინათ შხვეფიშ გრძნობეფ?

3. ა) მუ მიმეხვარებნა გეფთვალისწინათ შხვეფიშ გრძნობეფ? ბ) მუს გუვარჩიენთ თე სტატიას?

³ ჩქი შემალებენა გეფთვალისწინათ შხვეფიშ გრძნობეფ, მუჟამსით მივაჸუნუთ იეჰოვაშ დო თიშ სქუაშ იესოშ მაგალითის.  ჩქინ მოჸოროფე ღორონთ იეჰოვა, თეშ ჯგირ მაგალითის მარზენა (1 იოან. 4:8). იესო ხოლო სრულყოფილო მეჸუნს ზეციერ მუმაშ მაგალითის (იოან. 14:9). მუჟამსით თინა დედამიწას რდუ, საქმეეფით ოძირუ მუჭო შეულებ ადამიანს, გურშა მიღას შხვეფიშ გაჭირება. თე სტატიას პირველ რიგის თის გუვარჩიენთ, მუჭო ითვალისწინენა იეჰოვა დო იესო შხვეფიშ გრძნობეფს დო თეშ უკულ ქიგებგენთ, მუჭო შემლებნა მივაჸუნათ თინეფიშ მაგალითეფს.

4. მუჭო იძირე ესაიაშ 63:7—9-შე, ნამდა იეჰოვა ითვალისწინენს მუშ მსახურეფიშ გრძნობეფს?

⁴ ბიბლიაშე ბგებულენთ, ნამდა იეჰოვა ითვალისწინენს მუშ მსახურეფიშ გრძნობეფს. მაგალთო, დეფიქრით მუჭო გინაფლედჷ თინა დუც, მუჟამსით ჯვეშო ისრაელეფ პრობლემეფს შეხვადუდეს. ბიბლიას ინოჭარ: „თინეფიშ გაჭირება მუშ გაჭირება რდუ“ (წეკითხით ესაია 63:7—9). უმოს გვიანო, ზაქარიაშ საშვალებათ იეჰოვაქ თქუ, ნამდა, მუჟამსით მუშ ხალხ იტანჯებ, მუ ხოლო თეშ გინაფლენს დუც. თიქ მუშ მსახურეფს უწუ: „სი შეგეხებუნ თინა, ჩქიმ თოლიშ გუგას შეხებუ“ (ზაქ. 2:8). მუ ჯგირ შედარება რე თიშ ოძირაფალო, ნამდა იეჰოვა ზრუნენს მუშ მსახურეფშო.

5. ქიმიჸონით მაგალით, მუჭო მეხვარ იეჰოვაქ მუშ მსახურეფს გაჭირებაშ დროს.

⁵ იეჰოვა მუშ მსახურეფიშ გაჭირებაშ გურშა მეღალაშე უმოსის ორთჷ. თინა ოხვარ თინეფს. მაგალთო, მუჟამსით ისრაელეფ ეგვიპტეშ მონობას რდეს, იეჰოვაქ გურშა მიღჷ თინეფიშ გაჭირება დო დერსხჷ თინეფ. თიქ უწუ მოსეს: „ქობძირ ეგვიპტეს ჩქიმ ხალხიშ ტანჯება . . . დო ქიმიფრჩქილე თინეფიშ ხვეწინ, ჯგირო მიჩქჷ, მუ ჭუას გინაფლენა. გიმიბლენქ, დეფრსხენქ თინეფს ეგვიპტელეფიშ ხეშე“ (გამ. 3:7, 8). იეჰოვაქ გათავისუფალ ისრაელეფ მონობაშე, მუშენდა გურშა მიღჷ თინეფიშ გაჭირება. საუკუნეეფიშ უკულ, დუნაპირებ ქიანას თინეფს ნტერეფ გიანთხუდეს. მუს ორთუდ იეჰოვა თე დროს? ბიბლიას პკითხულენთ: „ოცოდუდ იეჰოვას თინეფ, მუჟამსით წუხენდეს დუმაჩაგრებელეფიშ დო შემავიწროებელეფიშ ხეს“. თე დროს ხოლო თინეფიშ გაჭირებაშ გურშა მეღალაქ აღძრჷ იეჰოვა, ქიმეხვარკო თინეფს. ათეშენ მსაჯულეფ მიდაშკვჷ, ისრაელეფიშ ნტერეფშე დარსხებელო (მსაჯ. 2:16, 18).

6. ქიმიჸონით მაგალით, მუჭო ოძირუ იეჰოვაქ, ნამდა ითვალისწინენდჷ თიშ გრძნობეფს, მიდგას არასწორ აზროვნება უღუდ.

 ⁶ იეჰოვა ითვალისწინენს მუშ ხალხიშ გრძნობეფს, თიშ უმკუჯინუო, ნამდა თინეფიშ აზროვნება შილებე ირიათო სწორ ვა რდას. დეფიფქრათ იონაშ მაგალითშე. იეჰოვაქ თე წინასწარმეტყველ ნინეველეფშა განაჩენიშ გინაჩამალო მიდაშკვჷ. მუჟამსით მინანუეს, ღორონთიქ გეგნიფიქრჷ დო ვა განადგურ თინეფ. იონას ვახიოლ თე გადაწყვეტილებაქ. თის გურქ მოურთჷ, მუშენდა მუშ ნარაგადიქ ვეშესრულ. მარა იეჰოვაქ მოთვინება გეგმირჩქინ დო ქიმეხვარ თის აზროვნებაშ თირუას (იონ. 3:10—4:11). იონაქ დითირუ აზროვნება დო უმოს გვიანო, იეჰოვაქ თე შემთხვევა ჩქინ საჯგირობუოთ ქინაჭარაფუ (რომ. 15:4). *

7. მუშა მარწმუნენა თი ფაქტი, მუჭო ოქცუ იეჰოვა მუშ მსახურეფს?

⁷ იეჰოვაშ დამოკიდებულება მუშ ხალხწკუმა, მარწმუნენა, ნამდა თის გურშა მეუღ მუშ მსახურეფიშ გაჭირება. თის უჩქჷ, მუ გურჭუა დო ოწუხებელ მიღნა თითოულს. ნამდვილო, იეჰოვა „ჯგირო იჩინენს კოჩიშ გურს“ (2 მატ. 6:30). თის ესმებ ჩქინ ფიქრეფ, გრძნობეფ დო თინა, ნამდა შეზღუდულ შესაძლებლობეფ მიღნა. ათეშენ ღორონთ „ვა დუშვენს თიცალ ცდუნებას, ნამუთ თქვან შესაძლებლობეფშე უმოს რე“ (1 კორ. 10:13). თენა მართალო გურიშ ემაკინალ დაპირება რე.

8—10. მუ ოხვარუდ იესოს, მიშელკო შხვეფიშ მდგომარეობაშა?

⁸ მუჟამსით დედამიწას რდუ, იესო ითვალისწინენდჷ შხვეფიშ გრძნობეფს. მორთ, გუვარჩუათ თი სუმ საშვალება, ნამუთ ოხვარუდ, მიშელკო შხვეფიშ მდგომარეობაშა. პირველ, მუჭოთ ჟიშე მიფშინეთ, იესო სრულყოფილო მეჸუნდჷ ზეციერ მუმაშ მაგალითის. იეჰოვაცალო, თის ხოლო უჸორდჷ ხალხ. თიშო ხიოლ მოუღუდ თი ირფელს, მუთ ღორონთწკუმა ართო გაჭყჷ, მარა განსაკუთრებულო ადამიანეფ უჸორდჷ (იგავ. 8:31). ზუსტას თე ჸოროფა ოხვარუდ იესოს, გეთვალისწინკო შხვეფიშ გრძნობეფ.

⁹ მაჟია, იეჰოვაცალო, იესო ხოლო გურს ორწყედ. თის უჩქუდ, მუ მოტივეფ დო გრძნობეფ უღდეს შხვეფს (მათ. 9:4; იოან. 13:10, 11). იესო წუხენდჷ, მუჟამსით ორწყედ გურგოტახილ ხალხის დო თენა აღძრენდჷ, გურშა ელუკინკო თინეფს (ეს. 61:1, 2; ლუკ. 4:17—21).

¹⁰ მასმა, იესოქ მუშ დუდშა გიმოცად ნამთინე პრობლემა, ნამუსით ხალხ შეხვადუდ. მაგალთო, თიქ ღარიბ ოჯახის ირდჷ. იოსებწკუმა ართო მუშებაშ დროს, იესოქ ქოძირ, მუ რთულ რდუ ფიზიკურ სამუშა (მათ. 13:55; მარ. 6:3). იოსებიქ შილებე იესოშ მსახურებაშ დოჭყაფაშახ, ჭიჭე ხანით ადრე ღურკო. თაშ ნამდა, იესოს ჯგირო არჩქილედ თი გურჭუა, ნამუთ საჸოროფო პიროვნებაშ ღურას მოუნს. თის თინა ხოლო არჩქილედ, მუნერ რდუ რელიგიურო გორთილ ოჯახის ცხოვრება (იოან. 7:5). თე დო შხვა სიტუაციეფქ მეხვარ იესოს, მიშელკო შხვეფიშ მდგომარეობაშა.

11. განსაკუთრებულო მუჟამ იძირედ, ნამდა იესო მიშეშ შხვეფიშ მდგომარეობაშა? (ქოძირით სურათ პირველ გვერდის).

¹¹ იესო შხვეფიშ მდგომარეობაშა მიშეშუნ თენა განსაკუთრებულო თიმწკუმა იძირედ, მუჟამსით სასწაულეფს ორთუდ. თინა სასწაულეფს მოვალეობაშ მიზნით ვართუდ. იესოს გურს ონტუდ, მუჟამსით ორწყედ ხალხიშ ტანჯებას (მათ. 20:29—34; მარ. 1:40—42). წერმიდგინით, მუჭო იგინანდჷ იესო დუც, მუჟამსით დასკილიდუ ჸუც ვერჩქილედუნ ფერ კოჩ ვარდა მუჟამსით გათელ  ქომონჯღურელ ოსურიშ ართკაკალ სქუა (მარ. 7:32—35; ლუკ. 7:12—15). იესოს გურშა მეუღუდ თინეფიშ გაჭირება დო ოკოდ ქიმეხვარკო.

12. მუჭო იძირე იოანეშ 11:32—35-შე, ნამდა იესოქ გურშა მიღჷ მართაშ დო მარიამიშ გაჭირება?

¹² იესოქ მართა დო მარიამიშ გაჭირება გურშა მიღჷ. თის „ჩილამურეფქ ქელაჸუნ“, მუჟამსით ქოძირ, მუჭო წუხენდეს მუნეფიშ ჯიმაშ ღურაშ გურშენ (წეკითხით იოანე 11:32—35). იესოს ხვალე თიშენ ვა უნგარინ, ნამდა ხოლოშიან მეგობარქ უღურ; თის ლაზარეშ გათელება ულამუდ. მარა იესოქ თიშენ ინგარ, ნამდა არჩქილედ ლაზარეშ ნათესეფიშ მდგომარეობა დო გურშა მიღჷ თინეფიშ ჭუა.

13. მუჭო ელამკინანა გურშა თიშ რჩქინა, ნამდა იესოს არჩქილე შხვეფიშ გაჭირება?

¹³ ჩქი გურშა ელამკინანა თიშ რჩქინა, ნამდა იესოს არჩქილე შხვეფიშ გაჭირება. მუშო ოკო რაგად, იესოცალ სრულყოფილ ვა ვორეთ, მარა მიჸორა თინა, მუშენდა არჩქილედ შხვეფიშ მდგომარეობა დო სიცოდილს გიმირჩქინანდჷ (1 პეტ. 1:8). ჩქი გურშა ემქექუანა თიშ რჩქინა ხოლო, ნამდა თინა ამდღა ღორონთიშ სამეფოშ მეფე რე დო მალას ირნერ ტანჯებას ბოლოს მუღენს. იესო ხოლო ართ დროს დედამიწას ცხოვრენდჷ, ათეშენ არძაშ უჯგუშო უჩქჷ, მუჭო ირსხას კაცობრიობა თი პრობლემეფშე, ნამუთ სატანაშ მართველობას მოუღ. ნამდვილო, ბედნერეფ ვორეთ, ნამდა პჸუნა თიცალ მართველ, ნამდგას არჩქილე ჩქინ სისუსტეეფ (ებრ. 2:17, 18; 4:15, 16).

14. მუჭოთ ეფესოელეფიშ 5:1, 2-ს ინოჭარ, მუშა აღბძრენა იეჰოვაშ დო იესოშ მაგალითეფშე დაფიქრება?

¹⁴ იეჰოვაშ დო იესოშ მაგალითეფშე დაფიქრება მოხვარნა ჩქი ხოლო გურშა მიბღათ შხვეფიშ გაჭირება (წეკითხით ეფესოელები 5:1, 2). მართალ რე, ვეშემლებნა ქიგებგათ, მუ უღნა შხვეფს გურს, მარა შემლებნა ქივეცადათ თიშ გაგებას, მუ აწუხენა დო მუ ოსაჭირნა (2 კორ. 11:29). ჩქი ვეფქციებუთ ამდღარ ქიანას მახორუ ეგოისტ კათაცალო; პირიქით ვოცადუთ ხვალე ჩქინ ჯგირობუაშენ ვარინ, შხვეფშე ხოლო იფიფქრათ (ფილ. 2:4).

15. განსაკუთრებულო, მიქ ოკო მიღას გურშა შხვეფიშ გაჭირება?

¹⁵ განსაკუთრებულო კრებაშ უხუცესეფქ ოკო მიღან გურშა შხვეფიშ გაჭირება. თინეფს უჩქნა, ნამდა პასუხიშმგებელ რენა იზრუნან იეჰოვაშ შხურშე (ებრ. 13:17). თანაქრისტიანეფიშ მოხვარა ქაკონა-და, უხუცესეფქ გემშართან ოკო თინეფიშ მდგომარეობაშა. მუჭო შეულებნა თეშ კეთება?

16. მუჭო იქციებ უხუცეს, ნამუსით შხვეფიშ გაჭირება გურშა მეუღ დო მუშენ რე თენა მნიშვნელოვან?

¹⁶ შხვეფიშ გაჭირება გურშა მეუღნან ფერ უხუცესეფ თანაქრისტიანეფს დროს გიმურთუნა, კითხვეფს უსვენა დო ყურადღებათ დო მოთვინებათ ურჩქილენა. თეშ კეთება განსაკუთრებულო მნიშვნელოვან რე, მუჟამსით დას ვარდა ჯიმას ოკო, გეგმოხანტას მუშ გრძნობეფი, მარა უჭირს საჭირო სიტყვეფიშ გორუა (იგავ. 20:5). მუჟამსით უხუცესეფ ყურადღებას გიმირჩქინანა დო დროს უთმენა და დო ჯიმალეფს, თინეფ შკას უმოსო იმანგარებ ნდობა, მეგობრობა დო ჸოროფა (საქ. 20:37).

17. უხუცესეფიშ ნამ თვისებეფს აფასენა და დო ჯიმალეფ არძაშ უმოსო? ქიმიჸონით მაგალით.

¹⁷ მუჭოთ ბრელ და დო ჯიმა აღნიშნენს, თინეფ უხუცესეფშე არძაშ უმოსო აფასენა თის, ნამდა ითვალისწინენა შხვეფიშ გრძნობეფს. ადელაიდი იჩიებ: „თენა უმოსო მიადვილენს თინეფწკუმა ჩიებას, მუშენდა მიჩქჷ, ნამდა გამგენა“. თინა გეუძინანს: „თინეფწკუმა ჩიებაშ დროს, თინეფიშ პასუხეფშე გინაფლენქ, ნამდა გურშა მეუღნა შხვეფიშ გაჭირება“. ართ ჯიმა უხუცესიშ სიმარდულს თეცალ სიტყვეფით გიმოხანტუნს: „მუჟამსით ართ უხუცესის ჩქიმ სიტუაცია ქივეჩი,  თოლეფქ ჩილამურით ეიაფშჷ. თენა დღას ვაგმოჭყორდუ“ (რომ. 12:15).

18. მუჭო შემლებნა მიშებლათ შხვეფიშ მდგომარეობაშა?

¹⁸ მუშო ოკო რაგად, ხვალე უხუცესეფქ ვარინ, არძაქ ოკო გეფთვალისწინათ შხვეფიშ გრძნობეფ. მუჭო რე შეიოლებერ თეშ კეთება? ირნერო ქეცადით, ქიგეგათ, მუ სირთულეეფ უღნა თქვან ოჯახიშ წევრეფს დო თანაქრისტიანეფს. გეგმირჩქინით ყურადღება ახალგაზრდეფწკუმა, ხანშა მიშულირეფწკუმა დო თინეფწკუმა, მით გლახათ რე ვარდა საჸოროფო პიროვნება აფჷ ღურელ. ქოკითხით, მუჭო გინაფლენა დუც დო შურ დო გურით ქურჩქილით, მუჟამსით მუნეფიშ გრძნობეფშე გეჩიებნა. ქაძირეთ, ნამდა მართალო გარჩქილენა თინეფიშ მდგომარეობა. ქუწით, ნამდა მუთ შეილებნან, ირნერო ქიმეხვარებუთ. მუჟამსით თაშ იფქციებუთ, ვოძირანთ, ნამდა გიმიფრჩქინანთ ნამდვილ ჸოროფას (1 იოან. 3:18).

19. მუშენ მოსაჭირნა გონიერება, მუჟამსით ვოცადუთ შხვეფიშ მოხვარას?

¹⁹ შხვეფიშ მოხვარაშ დროს გონიერება რე საჭირო, მუშენდა არძას შხვადოშხვა მდგომარეობა უღჷ. ნამთინე შილებე თავისფალო იჩიებდას მუშ პრობლემეფშენ. მარა შხვეფს შილებე ვასიამოვნუდან თეშე ჩიება. მართალ რე, მოკონა მივეხვარათ თინეფს, მარა ირნერო ოკო ვეცადათ ვადუსვათ პირადულ ვარდა თიცალ კითხვეფ, ნამუთ უხერხულო ქაგინაფუანს დუც (1 თეს. 4:11). თიმწკუმა ხოლო, მუჟამსით შხვეფ მუნეფიშ გრძნობეფშე მეჩიებნა, შილებე ირიათო ვედვეთანხმათ. მარა ჩქი ოკო მესმებდან, ნამდა თინეფ თაშ გინაფლენა დუც. ჩქი ოკო გეფთვალისწინათ ბიბლიურ რჩევა, ნამდა სწრაფეფ ვორდათ მორჩქილაფას დო ვეფჩქარათ პასუხიშ მეჩამა (მათ. 7:1; იაკ. 1:19).

20. მუს გუვარჩიენთ უკულიან სტატიას?

²⁰ ჩქი მოკონა, გეფთვალისწინათ თანაქრისტიანეფიშ გრძნობეფ დო თეწკუმა ართო მსახურებას ხოლო გეგმიფრჩქინათ თე თვისება. მუჭო შემლებნა თე თვისებაშ გიმორჩქინა მოწაფეეფიშ მომზადებაშ დროს? თეს უკულიან სტატიას გუვარჩიენთ.