1. Иисустыҥ анчада ла кандый кылык-јаҥы бисти токунадып јат? Јартап беригер.

ИИСУС бисте, толо кемдӱ эмес улуста, кандый кӱчтер болуп турганын сӱреен јакшы оҥдоп јат. Бу биске јаан токунал берет. Христос јерде јӱрерде, сӱӱнип јӱргендерле сӱӱнген, ыйлап јӱргендерле ыйлаган (Рим. 12:15). Качан оныҥ 70 ӱренчиги једимдӱ јарлаганыныҥ кийнинеҥ сӱӱнчилӱ једип келерде, ол «тыннаҥ сӱӱнчи ал[ган]» (Лука 10:17—21). Је качан Лазарьдиҥ ӧлӱминеҥ оныҥ јуук улузы ыйлажып турарда, Иисус карыга берген (Иоанн 11:33).

2. Иисус улусты нениҥ учун килеген?

² Иисус толо кемдӱ кижи болгон, је ол толо кеминде эмес улуска буурзап, олорды килеп туратан. Нениҥ учун дезе ол озо ло баштап улусты сӱӱген. Ӧткӧн јӧрмӧлдӧ айдылганыла, оныҥ «сӱӱнчизи кижи уулдарыла колбулу болгон» (Укаа 8:31). Ол улусты сӱӱген, оныҥ учун олордыҥ санаа-шӱӱлтезин оҥдоп турарга албаданган. Элчи Иоанныҥ јартаганыла Иисус «кижиниҥ ичинде не барын» билер болгон (Иоанн 2:25). Иисус улуска карузып туратан. Улус мыны кӧрӱп, Каандык керегинде јарды јилбиркеп уккан. Айдарда, бис Иисустаҥ тем алып, улуска канча ла кире тыҥ карузып, олорго ајару эдип турзаас, бистиҥ јарлаар ижис ончо ло кире једимдӱ болор (2 Тим. 4:5).

3, 4. а) Бис улусты килеп турзаас, јарлаар ишке кандый кӧрӱмдӱ болорыс? б) Бу јӧрмӧлдӧ нени шӱӱп кӧрӧрис?

 ³ Элчи Павел јарлаар ишти бӱдӱрер молјулу болгонын оҥдоп туратан (1 Кор. 9:16). Андый ла молју бисте де бар. Је бис улусты килеп турзаас, јарлаар иш биске уур молју деп билдирбес. Бис улусты килеп, олорго болужарга турганыстаҥ улам јарлап јадыс. Не дезе, «алып турганы эмес, берип турганы оноҥ артык кежиктӱ» (Ап. ижи 20:35). Бу сӧстӧрди ундыбай турзаас, јарлаар иш оноҥ јаан сӱӱнчи экелер.

⁴ Бу јӧрмӧлдӧ јарлаар иште улусты килеп турарга нени эдер керек деген сурак шӱӱжилер. Озо баштап Иисустыҥ теми бисти неге ӱредип турганын билип аларыс, оныҥ кийнинде оноҥ тем аларга болужатан тӧрт јӧп кӧрӧрис (1 Петр 2:21).

5, 6. а) Иисус кемдерди килеген? б) Лука 4:18, 19-та айдылганыла Иисус јарлаар иште улусты нениҥ учун килеген?

⁵ Иисустыҥ улуска канайып килеҥкей болгонын сананып ийектер. Бир катап Иисус ла ӱренчиктери кожо сӱӱнчилӱ јарды јарлап јӱреле тыҥ арып калгандар — «олорго ажанарга да бош јок болгон». Оныҥ учун Иисус олорго: «Аалга јерге барып, эмеш тыштанып [алактар]» — деп айткан. Је олор бу јерге једип барарда, олорды кӧп улус сакып турган болтыр. Иисус мыны кӧрӱп, нени этти? Ол кӧп улусты кӧрӧлӧ, «кӱдӱчизи јок койлордый јӱрӱ деп, ичи ачыды *. Олорды кӧпкӧ ӱредип баштады» (Марк 6:30—34).

⁶ Иисус улусты нениҥ учун килеген деп, сананып ийзеер. Ол олордыҥ «кӱдӱчизи јок койлордый» јӱргенин ајарып ийген: јокту улуска бойлорыныҥ билезин азыраарга, уур иштенерге келижет, кем де јуук кижизи божогонынаҥ улам кунугат. Иисус олорды јакшы оҥдогон болор. Нениҥ учун дезе ӧткӧн јӧрмӧлдӧ  айдылганыла ол бойы да андый ок шыраны ӧткӧн болор. Иисус улус учун санааркап, олорды токунадарга кӱӱнзеген. (Лука 4:18, 19 кычырыгар.)

7. Бис Иисустаҥ кандый тем алар аргалу?

⁷ Иисустыҥ теми бисти неге ӱредет? Бӱгӱнги кӱнниҥ улузы база «кӱдӱчизи јок койлордый» јӱрет. Мынаҥ улам олордыҥ кӱчтери де кӧп. Је бисте дезе олорго болужатан Каандык керегинде јар бар (Ачыл. 14:6). Оныҥ учун бис Иисус чылап «јокту-јойу кижини» карамдап, сӱӱнчилӱ јарды јарлап јадыс (Сар. 72:13). Бис улусты килеп, олорго болужарга кӱӱнзейдис.

8. Улусты килеп турарга, биске кандый јӧп болужар? Тем куучындап беригер.

⁸ Јарлаар иште улусты килеп турарга биске не болужар? Биске бойысты улустыҥ ордына тургузып, олорды биске канайып баштанзын деп кӱӱнзеп јадыс, бис те олорго анайып ла ок баштанар учурлу (Матф. 7:12) *. Биске тузалу болотон тӧрт јӧп кӧрӱп ийектер. Баштапкызында, улустыҥ керексиништерин ајаруга алып туругар. Сӱӱнчилӱ јарды јарлап турган кижини эмчиге тӱҥейлеерге јараар. Јакшы эмчи кажы ла оору кижиниҥ керексиништерин ајаруга алып јат. Ол кижиге сурактар берип, оныҥ айтканын лаптап угат. Эмчи капшай ла эм бичип берерге меҥдебей јат, карын кижиниҥ су-кадыгын шиҥдеген кийнинеҥ канайып эмденерин айдып берет. Оныҥ учун јарлаар иште улустыҥ айалгазын ла кӧрӱм-санаазын ајаруга алып, башка-башка эп-аргалар тузаланактар.

9. Биске не деп сананбас керек? Јартап беригер.

⁹ Јарлаар иште кижиле куучындажып тура, биске оныҥ айалгазын, неге бӱдӱп турганын ла нениҥ учун бӱдӱп турганын билерис деп сананбас керек (Укаа 18:13). Оныҥ ордына черчеҥ сурактар берзе торт болор (Укаа 20:5). Бистиҥ культурада јараар болзо, кижиниҥ ижи, билези, јӱрӱми ле кӧрӱм-санаазы керегинде сураарга јараар. Анайып сӱӱнчилӱ јарды кижиге канайып куучындаарын билип аларыс. Мынаҥ улам кижини килеп, оныҥ јӱрегин Иисус чылап томултып ийерис. (1 Коринфтегилерге 9:19—23 тӱҥдештиригер.)

10, 11. 2 Коринфтегилерге 4:7, 8-ле болзо, јарлаар иште улуска килеҥкей болорго, база не болужар? Учурал куучындап беригер.

¹⁰ Экинчизинде, кижиниҥ јӱрӱмин оҥдоп турарга албаданыгар. Бисте, толо кемдӱ эмес улуста, кӱчтер ончобыста болуп јат, оныҥ учун кижини бир эмеш те  болзо оҥдоп јадыс (1 Кор. 10:13). Кезикте бу телекейде болуп турган кӱчтерди јӱк ле Кудайдыҥ болужыла ӧдӱп јадыс. (2 Коринфтегилерге 4:7, 8 кычырыгар.) Је Иегованы билбес улуска кандый кӱч болуп турганын сананып ийзеер. Оныҥ учун бис олорды Иисус чылап килеп, олорго «јакшылык керегинде сӱӱнчилӱ јар» айдарга албаданадыс (Иса. 52:7).

¹¹ Сергей аканыҥ темин кӧрӱп ийектер. Чындыктаҥ озо ол коркышту уйалчаҥ кижи болгон, бойыныҥ санаа-шӱӱлтезин де јӱк арайдаҥ айдып туратан. Је бир катап ол Агару Бичикти ӱренерге јӧпсинген. Ол айдат: «Агару Бичикти ӱренип, христиандар бойыныҥ бӱдӱмјизи керегинде улуска куучындаар учурлу деп билип алгам. Мен качан да анайып куучындап болбозым деп санангам». Је ол библиялык јарды уккалак улусты сананып, олорго кандый кӱч келижет деп оҥдоп турган. «Агару Бичиктеҥ алган чындыктар меге сӱӱнчи ле токунал берген. Андый токуналдыҥ улуска да керектӱзин оҥдоп туратам» — деп, Сергей оноҥ ары куучындайт. Оныҥ учун улуска болужарга кӱӱнзеп, ол јалтанбай јарлап баштаган. «Јарлап баштайла, коркыбай барганым бойымга да кайкамчылу болгон. Анайып бӱткеним де тыҥыган» — деп, Сергей айдат *.

12, 13. Биске чындыкты ӱренип турган улуска нениҥ учун чыдамкай болор керек? Тем куучындап беригер.

¹² Ӱчинчизинде, чындыкты ӱренип турган улуска чыдамкай болугар. Олор бистиҥ јакшы билер библиялык чындыктарды качан да сананбаган болор деп ундыбагар. Анайда ок кезик улус бойыныҥ кудай јаҥын сӱреен баалап јат. Олордыҥ санаазыла болзо, анайып олор бойыныҥ албатызыла, культуразыла, билезиле колбузын кичееп јат. Бу улуска канайып болужар?

¹³ Темдектезе, эскирип калган кӱрди јаҥы кӱрди тутпаганча буспай јат. Анайып  ла кижи «эски» чӱм-јаҥдарынаҥ айрылзын деп турган болзоос, ого «јаҥы» чындыктарды — библиялык ӱредӱлерди баалап, алынзын деп болужар керек. Јӱк ле ол тушта кижи ӱренип калган ӱредӱлеринеҥ айрылар. Је бого канча да кире ӧй керек болор (Рим. 12:2).

14, 15. Јердеги райда ӱргӱлјиге јӱретен ижемји керегинде нени де билбес улуска канайып болужар? Тем куучындап беригер.

¹⁴ Бис улуска чыдамкай болзоос, олор библиялык чындыкты уккан ла бойынча оҥдоп, јӧпсине берер деп сананбай јадыс. Бойысты олордыҥ ордына тургузып, олорго тӱп-шӱӱлтелерди Агару Бичикке тайанып этсин деп болушсаас, јакшы болор. Темдектезе, улус јердеги райда ӱргӱлјиге јадар деген чындыкты кижиге канайып јартаар эдис деп сананып ийектер. Кӧп улус бу керегинде нени де билбес. Олор ӧлӱмле кожо јӱрӱм токтоп калат эмезе кижи ӧлӱп калза, теҥериге барат деп бӱдӱп турган болор. Бу улуска канайып болужар?

¹⁵ Бир ака улусла мынайып куучындажат. Ол озо баштап Башталганы 1:28-ти кычырып ийеле, кижинеҥ: «Кудайдыҥ амадузыла улус кайда ла кандый айалгада јадар учурлу болгон?» — деп сурайт. Кӧбизи: «Јерде, јакшы айалгаларда» — деп, каруу бергилейт. Мыныҥ кийнинде ака Исаия 55:11-ди кычырып, Кудайдыҥ амадузы солынган ба деп сурайт. Кӧп сабада улус «јок» деп айдат. Оноҥ ака Сарын 37:10, 11-ди кычырала, келер ӧйдӧ улустыҥ јӱрӱми кандый болор деп сурак берет. Анайып бу ака Агару Бичикке тайанып, Кудайдыҥ амадузыла јакшы улус јердеги райда ӱргӱлјиге јӱрер деп, кӧп улуска оҥдоорго болушкан.

16, 17. Укаа сӧстӧр 3:27-ле болзо, бис улусты канайып килеер аргалу? Тем куучындап беригер.

¹⁶ Тӧртинчизинде, улусты килеп турганаарды керектереерле кӧргӱзигер. Темдектезе, слер кижиге эби јок ӧйдӧ келген болзогор: «Јаманымды таштагар, ӧскӧ ӧйдӧ кирип ийейин» — деп, айдарга јараар. Је ол кижиге болуш керек болзо, нени эдер? Айылдаҥ чыкпай турган кижи болзо, болужып берерге јараар. Темдектезе, магазин барып келер эмезе самара аткарып ийер. Анайып слер кижиге керектереерле болужарыгар. (Укаа сӧстӧр 3:27 кычырыгар *.)

¹⁷ Бир эје јакшы керек эдерде, јаан једим болгон. Бу эје балазы божогон билени токунадарга, Агару Бичиктеҥ алынган тоолу ӱлгерлерлӱ самара бичиген. Эје јаан ла неме этпеген ошкош, је бу биле самараны канайып алынган? Ачу-коронго тӱшкен эне мындый каруу бичиген: «Кече меге коркышту јаман болгон. Је билген болзоор,  слердиҥ самарагар биске сӱрекей јаан токунал берди. Бу самара биске кандый болуш јетиргенин айдып та болбозыҥ. Кече мен оны 20 кире катап кычыргам. Меге качан да, кем де мындый јылу, јалакай ла токуналу сӧстӧр айтпаган. Оныҥ учун бис слерге акту јӱрегистеҥ быйанысты айдадыс».

18. 1 Коринфтегилерге 3:6, 7-ле болзо, биске јарлаар иште бойыстаҥ нени сакыбас керек?

¹⁸ Биске јарлаар иште бойыстаҥ ӧткӱре кӧпти сакыбас керек. Бис улуска Кудайды билип аларга болужып та турган болзоос, кезик неме бистеҥ камаанду эмес. (1 Коринфтегилерге 3:6, 7 кычырыгар.) Улусты Иегова бойына бойы јууктадат (Иоанн 6:44). Кижи сӱӱнчилӱ јарды алынар ба, јок по оныҥ јӱрегинеҥ камаанду (Матф. 13:4—8). Ундыбагар: кӧп саба улус Иисусты, улу Ӱредӱчини, угарга кӱӱнзебеген! Оныҥ учун бистиҥ болужарга турган улузыс бисти укпай турза, кунукпас керек.

19. Јарлаар иште улусты нениҥ учун килеер керек?

¹⁹ Јарлаар иште улусты килеп турзаас, јакшы једимдерге једерис. Јарлаар иш биске јаан сӱӱнчи экелер. Бого коштой, берип турганы оноҥ артык ырысту дегенине бӱдӱмјиленерис. Анайда ок «чыннаҥ ла ӱргӱлји јӱрӱм аларга турган улуска, ЈТ» сӱӱнчилӱ јарды алынарга јеҥил болор (Ап. ижи 13:48). Оныҥ учун «эм тура ӧй бар тушта, ончо улуска јакшыны эдели» (Гал. 6:10). Анайып, теҥеридеги Адабысты мактап, сӱӱнчи аларыс (Матф. 5:16).