1. Ci Yis hano mitemeray to falocoˈ no tamdaw hani? Tinakoen mitadtad.

CIPINANGAY ci Yis to masiˈayaway no cowa kalefot a tamdaw a pasangaray, mafanaˈayho to nafalocoˈan nangra, mansa matemeray ko falocoˈ no tamdaw. Itini i sera ci Yis i, “kihatiyaen a malipahak ko lipahakay a tamdaw. Kihatiyaen a tomangic ko tomangicay a tamdaw” cingra. (Loma 12:15) O roma tinakoan i, tiya lipahak a minokay koya 70 nisawawaan to kalaˈosi no mitosilan a minaroˈan i, ‘matemeray no fangcalay saocor, taˈangay ko hemek’ ni Yis. (Luka 10:17-21) Kinacecayay, maˈaraw ni Yis ko salawina ni Lacaros pakayni kapatay ni Lacaros a masomad, ‘cedaˈahay ko falocoˈ, tada mararomay.’​—Yohani 11:33.

2. Hano ngaˈay ci Yis siniˈada to tamdaw hani?

² O malefotay a Yis hano ngaˈay sidaˈit to cowa kalefot a tamdaw, ira ko siniˈadaay a falocoˈ hani? Sakakaay lalangian pakayniay kaolah to tamdaw. Mahecad masowalay i ˈayaway lalakaw, ci Yis ‘lipahakay to nisangaˈan ningra a tamdamdaw.’ (Taneng 8:31) Oniya olah miocoray ci Yisan a cipinang to harateng no tamdaw, sowal no tarokos ci Yohani ‘cipinangay to falocoˈ no tamdaw’ ci Yis sanay. (Yohani 2:25) Itini i sera ci Yis tada siniˈadaay to tamdaw, malifetay no tamdaw ko olah ni Yis cangranan, makahiayto a mitengil to lihaf no Hongti Kitakit. Misaˈicel kita mitodong ci Yisan palahad to siniˈaday falocoˈ, wa ngaˈayto padama to tamdaw i pitosilan.​—2 Timoti 4:5.

3-4. (1) Ano ira ko siniˈadaay falocoˈ ita, wa samaan ko pinengneng to mitosilay demak hani? (2) Oniya lalakaw wa milengo to maanan?

 ³ Mahecaday kita to tarokos ci Pawloan, mafanaˈ to mamitosil ko niyah i tamdaw. (1 Korinto 9:16) Kawra, ano cisiniˈadaay kita i, cowa ko ˈinorong aca a mitosil, pakayniay ka ciharateng to tamdaw, sapadamaaw to tamdaw ko sakalingad mitosil. Mafanaˈay kita ‘o paladaˈay ikakaay ko hemek to micadaay.’ (Dmak 20:35) Ano haratengen ita i falocoˈ koniya safalod, wa matongal ko olah a mitosil.

⁴ Toniya lalakaw wa mananam ita, samaan siniˈada to tamdaw i pitosilan. Salakat cipinangho kita samanay ko pinengneng ni Yis to mitosilan a tamdaw, dotoc milengo to spat pakayraan ni Yis.​—1 Pitiro 2:21.

5-6. (1) O cima ko kasiniˈadaan ni Yis hani? (2) Hano ira ko siniˈadaay ni Yis to tamdamdaw hani?

⁵ Nengnengen samanay ci Yis siniˈada to tamdaw. Kinacecayay, padotocay ci Yis ato nisawawaan mitosil, awaay ko toki a paseraˈ, ‘awaay ko toki a komaen,’ hato mikeridan ni Yis ko nisawawaan ‘tayra i awaay ko adeses a kitiraan paseraˈ.’ Kawra, mikiˈayaway ko ˈalomanay tayra mitala ci Yisan ato nisawawaan. Tahira ci Yis maˈaraway ko ˈalomanay tamdaw, samanay ko harateng ningra hani? Ci Yis ‘siniˈada * sa cingra i cangraan. Samanen cangra mahecaday to awaay ko pakaenay a siri. Ci Yisto i, pakafanaˈ cangranan to adihayay a demak.’—Marko 6:30-34.

⁶ Hano ira ko siniˈadaay falocoˈ ni Yis to tamdaw hani? Samanen miharateng cingra cangranan ‘mahecaday to awaay ko pakaenay a siri,’ mahapinangay ni Yis manikaway ko roma tamdaw, marorayayho a paririˈ to paro no lomaˈ, o roma tamdaw pakidemay ko kasomad to kapatay no  salawina. Pahecaday ko harateng ni Yis, samanen tahalifaay cingra to mahecaday a demak. Siniˈadaay ci Yis to tamdaw, mansa makalim sapifanaˈaw cangranan to ngaˈayay lihaf mihinom cangranan.​—ˈOsien ko Isaya 61:1, 2.

7. Samanen ita mitodong ci Yis hani?

⁷ Mikitini taˈarawan ni Yis mananam ita ko maanan? Anini, taliyok ita a tamdaw hato lintad ni Yis a tamdaw, mahecaday to ‘awaay ko pakaenay a siri.’ Misiˈayaway cangra to adihayay a pades, marorayay ko kaˈorip nangra, kita saan iraay ko lihaf no Hongti Kitakit, o misaalian nangra konini. (Paˈarawan 14:6) Todongen ita ko tapang ci Yis, ‘salimlaay to sasafa:ay mani:kaway a tamdaw.’ Mansa mitenak to ngaˈayay lihaf cangranan. (ˈOlic 72:13) Iraay ko siniˈaday falocoˈ ita to tamdaw, hato makalimay padama cangranan.

8. Samaanen siniˈada ko mitosilan a tamdaw hani? Tinakoen mitadtad.

⁸ Samanen ita siniˈada ko mitosilan a tamdaw hani? Ngaˈayay patadoen cangra miharateng, ano mahemekay kita mihaen ko tao, wa mihaen kita to tao. * (Matay 7:12) Nohatini, wa milengo spatay ko pakayraan siniˈada to tamdaw. Saka cecay, haratengen ko saali no tao. Ano mitosil kita mahecaday to ising. O ngaˈayay a ising i, misinanotay to saali no adadaay, salakat licayan ningra to pina salicay, ikor misongilaˈay cingra mitengil to sowal no adadaay. Cowa ko tatangsol sa misaˈosi to sasamaan miadah, wa mihapinangho to adada no tamdaw ngaˈ pacemel anca mihadak to sapiadah a pakayraan. Mahecaday, ano mitosil i, hamaan oyaan sa a sowal, tooren ko harateng no tao a misalof to mitosilay a pakayraan.

9. Ano mitosil i, hamaan misaˈosi to maanan hani? Misamaanay hani?

⁹ Ihkalay ko kafanaˈ no niyah to pakayraan no mitosilan, hamaan haenen ko harateng, hamaan misaˈosi to o maanan ko lalangian ningra a pakasoˈlin. (Taneng 18:13) Licayen cingra to matatodongay salicay ngaˈ, cipinang to harateng ningra. (Taneng 20:5) O roma a kilac, mitanamay saka cipinangaw ko mitosilay to lalengawan, katayalan, paro no lomaˈ anca o piharateng nangra. Somowalto cingra i, ngaˈ ngaˈay mahapinangto ita o maanan ko hamamitemer i falocoˈ ningra a Kimad no Fangcalay Cudad. Tooren ita ko saali ningra a padama, mihaen i, mitodongay kita to taˈarawan ni Yis.​—Nengnengen ko 1 Korinto 9:19-23.

10-11. Pakayni saka 2 Korinto 4:7, 8, wa ngaˈayho kita samaan siniˈada to tao? Tinakoen hena.

¹⁰ Saka tosa, haratengen samanay ko kaˈorip no mitosilan. Mahecaday kita to  mitosilan, saheto pakayniay cowa ka lefot a misiˈayaw to pasangaray, mansa cipinangay kita to pakayraan nangra. (1 Korinto 10:13) Mafanaˈay kita, marorayay maˈorip toniya hekal. Ngaˈayay hadidien ita, samanen iraay ko sapadama ni Yihofa. (ˈOsien ko 2 Korinto 4:7, 8.) Haratengen hena, ya cowa ka fanaˈ ci Yihofaan a tamdaw. Cowa ka cada ko sapadama no Kawas cangranan, tatiihtatiih ko nikaˈorip. Mahecad ci Yisan a siniˈada kita cangranan, ciharateng a mifanaˈ cangranan to ‘ngaˈayay lihaf no makapahay demak.’​—Isaya 52:7.

¹¹ Cecay faˈinayan ci Silkay, maomoyay cowa kalacaciyaw cingra, cowa kafanaˈ paihkal to niyah a harateng. Ikor, minanamay cingra to Fangcalay Cudad, sanay cingra: “Mananamay ako i Fangcalay Cudad, iraay ko ˈinorong no Krisciyang a milasil to pihakelongan. Salakat, cowa ko hamamitosil kako i tamdamdaw sanay ko harateng.” Kawra, maharatengay ningra koya cowaho tahatengil to soˈlinay kimad a tamdaw marorayay ko nikaˈorip. Sanay ci Silkay: “O mananamay ako a sifanaˈ pairaay to taˈangayay lipahak ato rihaday no falocoˈ. Mahapinangto ako, o romaroma a tamdaw misaaliay to hasakafanaˈaw to kimad no Fangcalay Cudad.” Matongalay ko siniˈadaay falocoˈ ni Silkay to tao, iraayto ko timolo a mitosil. Sanay cingra: “Milengo to Fangcalay Cudad matongalay ko pakasoˈlin no falocoˈ ako ato paˈicelay to pakasoˈlinay falocoˈ ako to Fangcalay Cudad.” *

12-13. Pasifanaˈ to soˈlinay kimad hano pairaen ita ko mihadidiay hani? Tano tinakoen a mitadtad.

¹² Saka tolo, pairaen ko mihadidiay i tamdaw. Haratengen, o kafanaˈan ita a kimad alatek cowa ko kafanaˈan no tao. O roma i, alatek cangra fanekfekay to pihakelongan nangra, anca o pihakelongan nangra masalalomaˈay no lalengawan, ngaˈayayho malaliting to kalalaˈed to paro no lomaˈ ato finawlan. Ano hatiraay, wa samanen ita padama cangra hani?

 ¹³ Haratengen ko laenoay sapatinako: Ira ko cecay matelangay mamapiliw a kayakay, misaaliay to faelohay a kayakay sapikotay. ˈAyaw no mapatireng ko faelohay kayakay, o telangho a kayakay ko mirakatan no tamdaw. Kawra, maharek to ko faelohay kayakay, tastas hanto koya telang a kayakay. Mahecaday, salakatho kita padama to tamdaw cipinang to “faelohay” kimad, mihaen ngaˈ falahen nangra koya misalimlaan nangra a matelangay pihakelongan, sapadamaaw to tamdaw mifalic to harateng misaaliay to toki.​—Loma 12:2.

14-15. O roma tamdw cowa ka fanaˈ to hatokel no lakoing anca cowa ka hakowa ko kafanaˈan, sasamaan kita padama cangranan hani?

¹⁴ Ira ko mihadidiay ita to malitemohay tamdaw i pitosilan, cowa ko mamilongoc cangranan tangsol cipinang ato micada to kimad no Fangcalay Cudad, oha kinapina a patado cangranan tano Fangcalay Cudad misaharaterateng. Haratengen sasamanen ita padama cangranan cipinang to iraay ko tahadaˈoc maˈorip i lakoing a tokel. Cowa ka hakowa ko kafanaˈan no ˈalomanay toniya kimad. Awaay ko mliyaw maˈorip a hatokel sanay cangra a pakasoˈlin, tatayra kakarayan ko ngaˈayay tamdaw sanay cangra. Sasamaan kita padama cangranan hani?

¹⁵ Iraay ko ciepocay pakayraan sanay ko cecay salikaka. Salakat, ˈosian ningra ko Satapangan 1:28. Dotoc, milicay: “O tokel no Kawas wa icowa ko tamdaw mikilomaˈ hani? Sasamaan ko kaˈorip hani?” Sanay ko caˈof no ˈalomanay: “Itini sera lipahak ko kaˈorip.” Dotoc miˈosian ningra ko Isaya 55:11 a milicay to, mafalicay ko araaw no Kawas hokira. Sanay ko ˈalomanay: “Cowa.” Midotocay ko salikaka miˈosi to ˈOlic 37:10, 11 sinael, salikor milicay o tamdaw ira ko maanan a hatokel. Oniya salikaka tano Fangcalay Cudad a misaharaterateng malalengo to tamdaw, adihayay ko mapadamaay ningra a tamdaw, cipinang to kamayan mitokel ko Kawas itini lakoing tahadaˈoc a maˈorip ko tamdaw.

16-17. Pakayni Taneng 3:27, samaan kita paihkal to ciharatengay to tao hani? Tinakoen hena.

¹⁶ Saka spat, miharateng to sasamaan ko hademak, paihkal to kaciharateng to tao. Ano cowa ka tatodong ko pilisoˈ ita to cilomaˈay, ngaˈayay pasowal to miafaday kita cingranan, kilimen ko roma toki a milisoˈ cingranan. Ano misaaliay ko cilomaˈay to sadama ita, anca matoˈasay cangra, adadaay caka ngaˈay masadak, misaaliay to papatado a miˈaca to dafong, ano hatiraay, wa ngaˈay kita a padama cangranan.​—ˈOsien ko Taneng 3:27.

¹⁷ O cecay fafahiyan salikaka iraay ko olah, mafanaˈ cingra to mapatayay ko hofoc hananayho a wawa no cecay lalomaˈan, siniˈadaay cingra toniya paro no lomaˈ, hato patikamiay cangranan. Itini tikami mitilidan ningra ko mihinomay to tamdaw a  sinael. Samanay ko harateng noniya cilomaˈay toniya tikami hani? Sanay ko tikami noniya wina: “Inacira na masomaday kako. Mafanaˈay kiso han? Taˈangayay ko sahinom no tikami iso tamiyanan. Mitemeray ko falocoˈ no mako, cowa kafanaˈ to sasamaan miakoˈid tisowanan. Kina 20 misaliyaliyaw kako a miˈosi toniya tikami. O tikami iso macadaay ako ko matomesay a olah ato siniˈada, paˈicelay takowanan a tanektek. Nai falocoˈay kami miakoˈid tisowanan.” Oniya mimingay a demak no salikaka pairaay to makapahay minaroˈan. Ano patado kita to tao miharateng to roray nangra, hanaca soˈlin a padama to tamdaw, wa ira ko makapahay a minaroˈan.

18. Pakayni mitosilay, saka 1 Korinto 3:6, 7 patalipaˈlalay kitanan to maanan?

¹⁸ Mitokelay kita misaˈicel ko niyah i mitosilay a demak, misongilaˈ padama to tamdaw a mafanaˈ to Kawas, kawra cowa ko kalimlaan a lalangian kita. (ˈOsien ko 1 Korinto 3:6, 7.) Soˈlinay i, ci Yihofa ko misolotay to tamdaw, a makalim saka fanaˈaw Cingranan. (Yohani 6:44) Roma i, mitengil anca caka pitengil ko tamdaw to ngaˈayay lihaf, o falocoˈ ningra ko piˈarawan. (Matay 13:4-8) O kasapaan a singsi ci Yis toniya hekal, kawra ˈalomanay ko cowa picada to sapasifanaˈ ningra a kimad. Mihaenay, misaˈicel kita a padama to tamdaw mafanaˈ to soˈlinay kimad, soˈlin caka kahi cangra mitengil, cowa ko mamatoled ko falocoˈ ita.

19. Ano siniˈada kita to tao i pitosilan, wa paira to maanan haepoc?

¹⁹ Ano siniˈada kita to tao i pitosilan, wa paira to adihayay haepoc. Wa matongal ko kaolah ita a mitosil, tahatanam to hemek no paladaˈay, wa ngaˈayho padama to ‘citodongay milifok to tahadaˈocay ˈorip a tamdaw’ makahi a micada to ngaˈayay lihaf. (Dmak 13:48) Mihaenay, ‘ano ira ko toki ita i, kao ngaˈayay ko demak i tamdamdaw.’ (Kalatiya 6:10) Mihaen ko demak ita, wa tahatanam to hemek a paˈdil to kakarayan Wama!—Matay 5:16.