1. ¿Jesusat kun yatiñas chuymar purtʼistu?

PANTJASIR jaqenakjamajj kuna jan walinakansa uñjastan uk Jesusajj sum yati, ukajj chuymar purtʼkiripuniwa. Aka oraqenkkäna ukhajja, Jesusajj ‘kusisipkäna ukanakampejj kusisïnwa, jachapkäna ukanakampejj jacharakïnwa’ (Rom. 12:15). Amuytʼañataki, 70 discipulonakapajj jaqenakan sum istʼapjjatapat wali kusisit kuttʼanipkäna ukhajja, Jesusajj kusisirakïnwa (Luc. 10:17-21). Lazaron jiwatapat wal jachapkäna ukanakar uñjasasti, “Jesusajj walpun llaktʼasïna, chuymapsa chʼalljjtayasirakïnwa” (Juan 11:33).

2. ¿Kunatsa Jesusajj jaqenakat sinttʼasïna?

² Jesusajj janis pantjasir jaqëkchïnjja, jucharar jaqenakarojj khuyaptʼayasiñampi sinttʼasiñampiw uñjäna. ¿Kunatsa ukham uñjpachäna? Jupajj wali munasirïnwa. Kunjamtï pasïr yatichäwin yateqawayktanjja, jaqenakaruw jukʼamp munasïna (Prov. 8:31, NM). Ukham munasitapatwa kunas jaqen chuymapan utji uk yatiñ munarakïna. Apóstol Juanajj akham sänwa: “Kunas jaqen chuymapan utji uksa sum jupajj yatirakïna” sasa (Juan 2:25). Jesusajj wal jaqenakat sinttʼasïna, uk amuyasaw waljanejj Reinon suma yatiyäwinakap istʼañ munapjjarakïna. Ukhamajj Jesusat yateqasiñäni ukhajja, jukʼampiw jaqenakar Diosar uñtʼapjjañapatak yanaptʼañäni (2 Tim. 4:5).

3, 4. 1) Jiwasatï sinttʼasirïñäni ukhajja, ¿kunjamsa Diosan arunakap yatiyañar uñjañäni? 2) ¿Kunsa aka yatichäwin yatjjataskañäni?

³ “Nayan yatiyañajajj wakisipuniwa” sasaw apóstol Pablojj säna, jiwasan yatiyañasajj wakisirakiwa (1 Cor. 9:16).  Ukampis sinttʼasiñatï chuymasan utjani ukhajja, phoqañ laykuki yatiyañat sipansa, jaqenakat llakisitasatwa yatiyañäni. Cheqas “katoqañat sipansa churañanwa jukʼamp kusisiñajj utji” (Hech. 20:35). Uk amtañajja, jukʼamp kusisit yatiyañatakiw yanaptʼistani.

⁴ Aka yatichäwinjja, yatiykasajj kunjamsa sinttʼasirïtas uñachtʼaysna ukwa yatjjataskañäni. Nayraqatjja, Jesusajj kunjamsa jaqenakar uñjäna ukwa yateqaskañäni. Ukjjarusti, kunjamsa jupat yateqassna ukwa pusi toqet uñjaskarakiñäni (1 Ped. 2:21).

5, 6. 1) ¿Khitinakatsa Jesusajj sinttʼasïna? 2) Isaías 61:1, 2 textorjamajja, ¿kunatsa Jesusajj jaqenakat sinttʼasïna?

⁵ Jesusajj kunapachas jaqenakat sinttʼasitap uñachtʼayäna uk uñjañäni. Mä urojja, jan samartʼasaw Jesusajj discipulonakapampejj Diosan arunakap yatiyäna, janiw manqʼasiñatakis tiemponïpkänti. Ukatwa mä jukʼa samartʼañatakejj ‘mä chʼusa lugarar’ sarapjjäna. Ukampis jaqenakajj tʼijukamaw kawkjarutï sarasipkäna ukar sarapjjäna. Uka jaqenakar uñjasajj ¿kunsa Jesusajj lurpachäna? “Jupanakat walpun sinttʼasïna, jan awatirini ovejanakar uñtasitäpjjatap layku. Ukatwa jupanakar kunayman toqenakat yatichañ qalltäna” (Mar. 6:30-34).

⁶ ¿Kunatsa Jesusajj uka jaqenakat sinttʼaspachäna? Jupanakajj ‘jan awatirini ovejanakar uñtasitäpjjänwa’. Yaqhepajj pisinwa jakasipjjäna, kunatï wakiski uk familiapar churañatakejj walja horanakaw urun trabajipjjarakïna. Yaqhepasti, mä familiaran jiwatapatwa wali llakitäpjjäna. Jupanakajj kunjamas jikjjatasipjjäna uk Jesusajj yatïnwa. Kunjamtï pasïr yatichäwin yateqawayktanjja, jaqenakajj kuna llakinakantï uñjasipkäna uka llakinakanwa Jesusajj uñjasirakpachäna. Ukatwa jaqenakat sinttʼasïna, chuymachtʼkir yatiyäwinaksa yatiyarakïna (Isaías 61:1, 2 liytʼañataki).

7. ¿Kunsa Jesusat yateqassna?

 ⁷ ¿Kunsa Jesusat yateqassna? Jichhürunakanjja, jaqenakajj ‘jan awatirini ovejanakar uñtasitäpjjarakiwa’, kunayman jan walinakanwa uñjasipjjaraki. Ukampis jiwasaw jupanakarojj Reinon suma yatiyäwinakap yatiysna (Apoc. 14:6). Ukatwa Jesusat yateqasisajja, ‘jan kunani, aynachtʼat jaqenakat khuyaptʼayasisajj’ suma yatiyäwinak yatiytanjja (Sal. 72:13). Cheqas jaqenakat sinttʼasitas laykuw yanaptʼañ muntanjja.

8. ¿Kunas jaqenakat sinttʼasiñatak yanaptʼistaspa? Uk mä uñachtʼäwimp qhanañchtʼam.

⁸ Yatiyktan uka jaqenakat sinttʼasiñatakejja, kunsa amuyapjje, kunjamäsipkisa uk amuyañatakiw chʼamachasiñasa, kunjam uñjatäñtï munktan ukhamarakiw jupanakar uñjañasa (Mat. 7:12). * ¿Kunas ukatak yanaptʼistani? Uk jichhajj pusi toqet uñjañäni. Maya, jaqenakajj kunjam yanaptʼatäñsa munapjje ukwa amuyañasa. Uk amuytʼañatakejj mä suma doctorat parltʼañäni. Uka doctorajja, sapa usutajj kunan yanaptʼatäñsa muni uk amuyañatakiw chʼamachasi. Usutar jisktʼasajj sumwa istʼaraki. Kuna qollanaksa umaspa uk jankʼak sañat sipansa, kunas usutatak walïspa ukwa nayraqat sum amuytʼi. Diosan arunakap yatiykasajj niya ukhamarakwa lurtanjja. Taqenimp mä pachpa toqetak parlañat sipansa, kunjamsa jakasipjje, kunsa amuyapjje ukarjamaw sapa maynimp parltʼtanjja.

9. 1) ¿Kunsa amtapuniñasa? 2) ¿Jaqenakat jukʼamp yatiñatakejj kunsa lurañasa?

⁹ Amtapjjapuniñäni, jiwasajj janiw kunjamsa jaqenakajj jakasipjje, kunarus creyipjje, kunatsa ukar creyipjje uk yatktanti (Prov. 18:13). Ukatwa jupanakar wali amuyumpi jisktʼañasa (Prov. 20:5). Jakktan uka cheqan walikïskchi ukhajja, trabajopata, familiapata, jakäwipata, jan ukajj yaqha ukhamanakatwa jaqenakar jisktʼsna. Ukhamatwa kunatsa Diosan Reinopat istʼapjjañapajj wakisi uk yatiñäni. Uk yatisajja, Jesusat yateqasisaw kunatï jupanakatak wakiski ukarjam parltʼañäni (1 Corintios 9:19-23 uñjjattʼarakïta).

10, 11. 2 Corintios 4:7, 8 textorjamajja, ¿kunas mayninakat sinttʼasiñatak yanaptʼarakistani? Uk mä experienciamp qhanañchtʼam.

¹⁰ Paya, jaqenakajj kunjamsa jakasipjje uk amuyañatakiw chʼamachasiñasa. Ukham lurañaw jupanakat sinttʼasiñatak yanaptʼistani. Ak amtapuniñäni, pantjasir jaqenakjamajja, jupanakjamaw jan walinakan uñjasiraktanjja (1 Cor. 10:13). Supayan apnaqat akapachan jakañas wali chʼamawa,  Jehová Diosan yanaptʼapampikiw nayrar sartsna (2 Corintios 4:7, 8 liytʼañataki). Ukampis Diosar jan servirinakatakejja, jan waltʼäwinakar saykatañajj jukʼamp chʼamawa. Ukatwa Jesusat yateqasisajj jupanakat sinttʼastanjja, “suma kusiskañ yatiyäwinak” yatiyaraktanjja (Is. 52:7).

¹¹ Sergey sat jilatat parltʼañäni. Jehová Diosar jan uñtʼkäna ukhajja, wali ajjsarirïtap laykojj janiw jaqenakamp parltʼirjamäkänti. Qhepatjja, Bibliat yateqañwa qalltäna. Jupajj akham siwa: “Cristianonakajj kuntï yateqapki uk yaqhanakar parlapjjañapawa, ukwa Bibliat yatjjatasajj yateqayäta” sasa. “Janiw kunapachas uk lurirjamäkäti” sasaw jilatajj amuyasïna. Ukampis Jehová Diosaru, ukhamarak cheqa yatichäwinak jan uñtʼirinakajj kunja llakitas jakasipjje uka toqetwa Sergey jilatajj wal lupʼïna. Jupajj akham saskakiwa: “Kuntï yateqkayäta ukajj kusisitäñataki, jan sint llakisiñatakiw yanaptʼitäna. Ukatwa, ‘jaqenakajj aka yatichäwinak yatipjjañaparakiwa’ sasin amuyayäta” sasa. Ukham amuyañaw predicañ jan sint ajjsarañatak yanaptʼäna. Jichhajj akham siwa: “Yatiyañajja, jan sint ajjsarirïñataki, kuntï Bibliat yateqkayäta ukar jukʼamp confiyañatakiw yanaptʼitäna, ukajj janiw cheqaw sañjamäkiti” sasa. *

12, 13. ¿Kunatsa Bibliat yateqerinakampejj paciencianïñasa? Uk mä uñachtʼäwimp qhanañchtʼam.

¹² Kimsa, Bibliat yateqerinakampejj paciencianïñasawa. Sum uñtʼktan uka cheqa yatichäwinakjja, inas estudionakajj ukhapun istʼapjjchi. Ukhamarus yaqhep jaqenakatakejja, religionapajj wali wakiskiriwa, “familiajampisa markajampis ukaw mayachtʼitu” sasaw sapjje. ¿Kunjamsa jupanakar yanaptʼsna?

 ¹³ Aka toqet amuytʼañäni. Wali jaya tiemponi mä puente lantejj yaqha puente lurasiski ukhajja, jaqenakan pasapjjañapatakejj janiw merqʼe puentejj allthapiskiti. Machaq puentejj tukuyatäjje ukhaw merqʼe puentejj allthapisiskañapa. Bibliat yatichañajj niya ukhamarakiwa. Kunarutï creyki uk jaytañapatak mä jaqer janïr maykasajja, Bibliat yateqaski uka yatichäwinakar wali valoranit uñjañapatakiw nayraqat yanaptʼañasa. Ukhamatakwa jupajj creencianakap jaytañ munani. Ukampis janiw ratuk jaytkaniti (Rom. 12:2).

14, 15. Aka oraqen wiñay jakasiñ toqet jan sum yatipki uka jaqenakarojja, ¿kunjamsa yanaptʼsna?

¹⁴ Jaqenakar pacienciamp uñjañäni ukhajja, janiw Biblian yatichäwinakapar jankʼak iyawsapjjañap suykañäniti. Jupanakat sinttʼasitasatjja, qhawqha tiempojjay Bibliat amuyapjjañapatak munaschini ukarjamaw yanaptʼañäni. Amuytʼañataki, aka oraqen wiñayatakiw mä Paraison jakasjjañäni sasin Bibliajj yatichki ukjja, walja jaqenakajj janiw sum yatipkiti. Yaqhepajja, “jiwañampiw taqe kunas tukusjje” sasaw sapjje. Yaqhepasti, “suma jaqenakajj alajjpacharuw sarjjapjje” sasaw sapjjaraki. ¿Kunjamsa Biblian yatichäwinakapar iyawsapjjañapatak yanaptʼsna?

¹⁵ Mä jilatarojj ak lurañaw yanaptʼi. Nayraqatjja, Génesis 1:28 texto liytʼasajj “¿kawkinsa, ukat kunjam jakasiñassa Diosajj munäna?” sasaw utanir jisktʼi. Jilaparte jaqenakajja, “aka oraqen kusisit jakasiñaswa munäna” sasaw sapjje. Ukjjarusti, Isaías 55:11 texto liytʼasajja, “¿Diosan amtapajj pachpakïskpachati?” sasaw jilatajj utanir jisktʼaraki. “Jïsa, pachpakïskiwa” sasaw waljanejj sapjje. Tukuyañatakisti, Salmo 37:10, 11 texto liytʼasajja, “¿kunjamsa jaqenakajj jutïrin jakasipjjani?” sasaw jilatajj utanir jisktʼi. Ukhamatwa Diosan amtapajj pachpakïskatap amuyapjjañapataki waljanir yanaptʼawayi.

16, 17. Proverbios 3:27 qellqatarjamajja, ¿kunjamatsa sinttʼasirïtas uñachtʼaysna? Uk mä experienciamp qhanañchtʼam.

¹⁶ Pusi, kunjamsa jaqenakat llakisitas uñachtʼaysna uk amuytʼañasawa. Utanejj jan tiemponïki uka horasan utap leqtʼstan ukhajja, disculptʼasiñasawa, “yaqha horasan kuttʼanï” sasaw sarakiñasa. Inas utanejj mä kunan yanaptʼayasiñ munarakchi, jan ukajj usutätap layku, jilïrïtap laykojj inas utat jan mistuñ puedkarakchi. Ukapachajja, jiwasaw kun altʼiris sararapsna, jan ukajj yaqha ukham lurañanakan yanaptʼsna (Proverbios 3:27 liytʼañataki).

¹⁷ Sinttʼasiñat mayninakar yanaptʼasajja, kuna bendicionanaksa katoqsna uk jichhajj uñjañäni. Mä familian wawapajja, naskäna ukürpachaw jiwjjäna. Uk yatisajja, mä  kullakajj chuymachtʼkir textonakani mä cartwa uka familiatak qellqäna. ¿Cartapajj familiar yanaptʼpachänti? ¡Jïsa! Jiwkäna uka wawan mamapajj akham sasaw kullakar qellqäna: “Masürojj wali llakitäyätwa. Cartamajj walpun familiajarusa nayarus yanaptʼawayapjjetu. Yuspärañatakejj janiw arunakajas utjkituti. Masürojj mä pä tunka kutiw cartam liytʼpachäta. Wali chuymachtʼkiri, chʼamañchtʼkir suma arunakaniwa. Taqe chuymaw uka cartat yuspärapjjsma” sasa. Jiwasatï tʼaqesisipki ukanakat sinttʼasiñäni, yanaptʼarakiñäni ukhajja, uka kullakjamarakiw walja bendicionanak katoqañäni.

18. Kuntï 1 Corintios 3:6, 7 textojj siski ukarjamajja, ¿kunsa janipun armañasäki, ukat kunatsa?

¹⁸ Kunsa Diosajj sapa maynit suyi ukwa amuyañasa. Jaqenakan Diosar uñtʼapjjañapatakejj walsa chʼamachaskstanjja, Jehová Diosakiw jupar serviñan nayrar sartapjjañapatakejj jaqenakar yanaptʼaspa, uk janipuniw armañasäkiti (1 Corintios 3:6, 7 liytʼañataki). Diosaw jaqenakarojj Jupan ukar irpani (Juan 6:44). Sapa maynirakiw kunatï chuymapan utjki ukarjamajj Biblian yatichäwinakapar iyawsaniti janicha uk amtjjañapa (Mat. 13:4-8). Jesusajj wali suma yatichirïkchïnsa, jilaparte jaqenakajj janiw istʼapkänti. Ukhamajj yatiyktan ukanakat waljanejj jan istʼapkistani ukhajja, janiw aynachtʼañasäkiti.

19. Yatiykasajj jaqenakat sinttʼasiñäni ukhajja, ¿kuna bendicionanaksa katoqañäni?

¹⁹ Diosan arunakap yatiykasajj jaqenakat sinttʼasiñäni ukhajja, walja bendicionanakwa katoqañäni. Sañäni, jukʼamp kusisitaw yatiyañäni, ‘wiñay jakañatak suma chuymanïpki ukanakarusa’, Reinon suma yatiyäwinakap istʼapjjañapatakiw yanaptʼarakiñäni (Hech. 13:48). Ukhamajj mayninakar ‘yanaptʼirjamäsajj taqenir yanaptʼapjjañäni’ (Gál. 6:10). Ukhamatwa alajjpachankir Jehová Dios awkisar jachʼañchañajj kunja kusiskañasa uk yatiñäni (Mat. 5:16).