1. Aha do na paposhon rohanta taringot Jesus? Patorang ma.

SADA parange ni Jesus na boi paposhon rohanta, i ma tangkas do diantusi ibana angka hasusaan na diadopi angka jolma. Tingki di tano on Jesus, “marlas ni roha [do ibana] dohot halak na marlas ni roha” jala ‘tangis dohot halak na tangis’. (Rom 12:15) Umpamana, tingki diida ibana marlas ni roha 70 siseanna ala marhasil di ulaon marbarita, “marlas ni roha ma Jesus”. (Luk. 10:17-21) Di tingki na asing, tingki diida ibana marlungun ni roha angka halak ala mate si Lasarus, “mansai lungun ma dihilala ibana”.​—Joh. 11:33.

2. Aha do na mangurupi Jesus umbahen boi ibana patuduhon roha sapangkilalaan?

² Nang pe sempurna Jesus, boi do diantusi ibana hasusaan na diadopi jolma na so sempurna. Boasa boi songon i? Ala holong do roha ni Jesus tu angka jolma. Songon naung diulas di parsiajaran naung salpu, didok ‘hasudungan ni rohana do jolma manisia’. (Poda 8:31) Alani holongna tu jolma, gabe boi ma diantusi ibana pingkiran ni nasida. Apostel Johannes mandok, “Diboto ibana do na di bagasan roha ni jolma.” (Joh. 2:25) Asi do roha ni Jesus tu sude jolma. Jala boi do dihilala angka halak holong ni Jesus. I do alana, olo angka halak manjangkon barita Harajaon na dipasahat ibana. Alani i, ingkon tatiru do asi ni roha ni Jesus i. On boi mambahen hita lam marhasil di ulaon marbarita.​—2 Tim. 4:5.

3-4. (a) Molo adong roha sapangkilalaan di hita, songon dia do pangkilalaanta tingki marbarita? (b) Aha do na laho taulas di parsiajaran on?

³ Didok si Paulus, sada kewajiban do di ibana marbarita na uli, suang songon i ma nang hita. (1 Kor. 9:16) Alai,  ndang holan ala na kewajiban di hita marbarita na uli, alai ala na adong do di hita roha sapangkilalaan umbahen na taulahon i. Asi do rohanta mangida angka halak jala lomo rohanta mangurupi nasida. Taboto do, “umlas do roha ni halak na mangalehon sian na manjalo”. (Ul. 20:35) Molo songon i do na tahilala, gabe lam las ma rohanta marbarita.

⁴ Di parsiajaran on, taulas ma songon dia patuduhon roha sapangkilalaan tingki marbarita. Alai parjolo, taida ma songon dia pangkilalaan ni Jesus tu angka halak. Jala taulas ma opat cara na boi tatiru sian Jesus.​—1 Ptr. 2:21.

5-6. (a) Tu ise do Jesus patuduhon roha sapangkilalaan? (b) Boasa asi roha ni Jesus tu angka jolma songon na dipaboa di Jesaya 61:1, 2?

⁵ Pingkirhon ma sada contoh songon dia Jesus patuduhon roha sapangkilalaan. Sada tingki, marbarita ma Jesus dohot angka siseanna jala ndang adong dope nasida maradi. Jala ndang ‘sanga dope nasida mangan’. Alani i, diboan Jesus ma nasida tu “inganan na lungun asa pulik sian natorop” laho “maradi satongkin”. Alai, marroan ma godang halak mandapothon nasida. Tingki diida Jesus angka na torop i, songon dia do pangkilalaanna? “Gabe asi ma rohana, * ai songon biru-biru na so adong parmahanna do nasida. Dung i, godang ma diajarhon ibana tu natorop i”.​—Mrk. 6:30-34.

⁶ Boasa boi Jesus patuduhon asi ni roha dohot roha sapangkilalaan tu natorop i? Didok ibana “songon biru-biru na so adong parmahanna” do nasida. Ra diida Jesus, adong do piga-piga sian nasida na pogos manang adong na ingkon manarihon keluargana. Na asing, adong na lungun rohana ala mate halak na hinaholonganna. Alai diantusi Jesus do pangkilalaan ni nasida i. Songon naung  diulas di parsiajaran naung salpu, ra hea do dihilala Jesus songon na dihilala nasida. Asi do roha ni Jesus tu angka halak, gabe taronjar ma rohana laho marbarita tu nasida.​—Jaha Jesaya 61:1, 2.

7. Songon dia hita boi maniru Jesus?

⁷ Aha do na boi taparsiajari sian contoh na dibahen Jesus? Saonari, godang do di humaliangta angka halak na songon “biru-biru na so adong parmahanna”. Godang do hasusaan na diadopi nasida. Alai boi do taurupi nasida marhite paboahon barita na uli. (Pgk. 14:6) Ala ‘asi do rohanta tu angka na pogos dohot na gale’, marbarita ma hita tu nasida songon na diulahon Jesus. (Ps. 72:13, Bibel siganup ari) Asi do rohanta tu sude halak, jala lomo do rohanta mangurupi nasida.

8. Tingki marbarita, aha do na boi mangurupi hita patuduhon roha sapangkilalaan? Bahen ma tudosan.

⁸ Tingki marbarita, aha do na boi mangurupi hita patuduhon roha sapangkilalaan? Ingkon taantusi do aha na dipingkirhon dohot na dihilala angka halak. Lomo do rohanta dibahen halak na denggan tu hita. Alani i, tingki marbarita ingkon tabahen ma songon i tu nasida. * (Mat. 7:12) Saonari, taulas ma opat cara na boi taulahon. Parjolo, pingkirhon ma aha na dihaporluhon ganup halak. Tingki marbarita, dipatudos do hita songon sahalak dokter. Sahalak dokter na burju, ingkon dipingkirhon do na dihaporluhon pasienna. Asa diboto songon dia na dihilala pasienna i, ingkon manat do disungkun jala sabar manangihon pasienna i. Tontu ndang dilehon dokter ubat na sarupa tu sude pasienna. Asa diboto aha do ubat na laho dilehon, ingkon jolo dipareso dokter i do pasienna i. Suang songon i ma nang hita, unang ma tapangke hata pamungka na sarupa tu sude halak na tajumpangi tingki marbarita. Alai ingkon jolo taboto do situasi dohot na jotjot dipingkirhon nasida.

9. Tingki marbarita, aha do na so boi tadok di rohanta? Patorang ma.

⁹ Tingki pajumpang hita dohot sasahalak tingki marbarita, unang ma pintor didok rohanta nunga taboto sude taringot ibana. (Poda 18:13) Alai asa taboto aha na di rohana, tabahen ma sungkun-sungkun. (Poda 20:5) Ra, boi do tasungkun taringot karejona, keluargana, pengalamanna, dohot na jotjot dipingkirhon ibana. Molo nunga taboto aha na di rohana, boi ma tapaboa barita na uli tu nasida. Songon Jesus, tapatudu ma roha sapangkilalaan jala taurupi hombar tu na dihaporluhon nasida.​—Bandingkon 1 Korint 9:19-23.

10-11. Hombar tu 2 Korint 4:7, 8, aha do cara na paduahon laho patuduhon roha sapangkilalaan? Paboa ma contohna.

 ¹⁰ Na paduahon, bayangkon ma songon dia ngolu ni nasida. Boi do taantusi hasusaan na diadopi nasida, ala sarupa do hasusaan na taadopi di portibi on. (1 Kor. 10:13) Taboto do, susa do mangolu di portibi saonari on. Ala na diurupi Jahowa do umbahen na boi hita martahan. (Jaha 2 Korint 4:7, 8.) Alai pingkirhon ma angka halak na so marale-ale tu Jahowa hape ingkon diadopi nasida hasusaan di portibi on. Songon Jesus, asi do rohanta mangida nasida. I do alana gabe taronjar rohanta “mamaritahon barita na uli” tu nasida.​—Jes. 52:7.

¹¹ Rimangi ma pengalaman ni donganta na margoar si Sergey. Andorang so marsiajar Bibel, parila jala parsip-sip do ibana. Maol do ibana paboahon na di rohana. Sada tingki, marsiajar Bibel ma ibana. Didok ibana, “Dung marsiajar Bibel, huboto ma ingkon dipaboa halak Kristen do haporseaonna tu na asing. Alai didok rohangku, ndang boi huulahon i.” Alai sai dipingkirhon si Sergey do angka halak na so mamboto hasintongan, jala songon dia ngolu ni nasida molo ndang mananda Jahowa. Didok ibana ma, “Angka na huparsiajari on mambahen dame jala las rohangku. Gabe huboto ma, halak na asing pe ringkot do mamboto hasintongan.” Ala dipatudu si Sergey do roha sapangkilalaan, gabe barani ma ibana marbarita. Didok ibana, “Ndang hurimpu, molo hupaboa hasintongan tu na asing, gabe lam pos rohangku. Jala on patoguhon haporseaonku sandiri.” *

12-13. Boasa ingkon sabar hita mangajari parsiajar Bibelta? Bahen ma sada tudosan.

¹² Na patoluhon, sabar ma tingki mangajari nasida. Ingot ma, ra ndang hea dope diboto nasida hasintongan na sian Bibel naung tangkas taboto. Jala godang do halak na porsea situtu tu agamana.  Ra dihilala nasida, agamana i do na mambahen nasida jonok tu keluarga, budaya, dohot tu angka dongan ni nasida. Songon dia ma hita boi mangurupi nasida?

¹³ Rimangi ma sada tudosan on. Adong ma jambatan na mulai sega, jala ingkon diganti dohot jambatan na baru. Somalna, tingki dibahen jambatan na baru, dipangke dope jambatan na leleng i. Dung sae jambatan na baru i dibahen, dihancurhon ma jambatan na leleng i. Suang songon i ma, andorang so tajujui halak maninggalhon haporseaon na “leleng”, ingkon jolo taurupi do nasida mangkaholongi hasintongan na “baru” dope diboto nasida. Dung i, baru ma boi ditinggalhon nasida haporseaon ni nasida naung leleng i. Porlu do tingki laho mangurupi nasida asa mambahen hamubaon.​—Rom 12:2.

14-15. Songon dia do hita boi mangurupi sasahalak asa mangantusi taringot paradeiso? Paboa ma sada pengalaman.

¹⁴ Molo sabar hita tu angka halak tingki marbarita, tontu ndang tapaksa nasida asa pintor mangantusi manang manjalo hasintongan na baru dibege nasida. Alai tapatudu ma roha sapangkilalaan, jala unang ma holan sahali taurupi nasida asa mangantusi hasintongan i. Umpamana, pingkirhon ma songon dia carana mangurupi sasahalak asa mangantusi taringot paradeiso di tano on. Ra, otik do diboto nasida taringot on manang ndang diboto. Jala ra, porsea do nasida molo mate sasahalak, ndang boi be mulak mangolu. Manang, porsea do nasida sude halak na burju laho mangolu di surgo. Songon dia hita boi mangurupi nasida?

¹⁵ Parrohahon ma pengalaman ni sahalak donganta na mangurupi godang halak asa mangantusi taringot paradeiso. Parjolo, dijaha ibana ma 1 Musa 1:28. Dung i disungkun ma parjabu i, didia jala ngolu na songon dia do na dihalomohon Debata tu jolma. Godang do na mandok, “Di tano on jala marlas ni roha.” Dung i dijahahon donganta i ma muse Jesaya 55:11, jala disungkun ma muse, na muba do sangkap ni Debata? Jotjot do parjabu mandok, ndang. Na parpudi, dijahahon ma Psalmen 37:10, 11 jala disungkun ma, aha do pangkirimonta di ari na naeng ro. Marhite angka ayat on, godang do halak na diurupi ibana asa mamboto sangkap ni Debata, i ma hangoluan saleleng ni lelengna di Paradeiso.

16-17. Di Poda 3:27, aha do cara na asing na boi taulahon laho patuduhon roha sapangkilalaan? Bahen ma contoh.

¹⁶ Na paopathon, pingkirhon ma aha na boi taulahon laho patuduhon na parduli do hita tu nasida. Umpamana, aha do na laho taulahon molo ro hita di tingki na hurang pas di parjabu i? Molo songon i, tadok ma asa di tingki na asing muse hita ro. Alai, boha do molo parjabu i porlu diurupi? Manang, molo parjabu i  marsahit manang naung matua? Di situasi sisongon i, boi do taurupi nasida.​—Jaha Poda 3:27.

¹⁷ Sahalak donganta borua, mandapot hasil na denggan ala mamparrohahon na asing. Dipatudu ibana do roha sapangkilalaan tu sada keluarga na marujung ngolu anakna. Dibahen ibana ma surat jala adong piga-piga ayat sian Bibel na boi mangapuli nasida. Songon dia do pangkilalaan ni keluarga i? Dibalos omak ni dakdanak i ma surat i. Didok, “Nantoari, mandele situtu do rohangku. Marlaba hian do surat on di hami. Lobi sian 20 hali ma hujaha surat on. Mandok mauliate situtu do ahu di surat on. Ndang hurimpu surat on boi patoguhon rohangku. Sian ias ni roha ma hudok mauliate.” Tontu, molo tapatudu do roha sapangkilalaan tu na asing, boi ma taurupi nasida jala dapotta ma laba na denggan.

18. Songon na didok di 1 Korint 3:6, 7, aha do na ingkon taingot tingki mangurupi halak marsiajar taringot Jahowa?

¹⁸ Taurupi do angka halak laho marsiajar taringot Jahowa. Alai taingot ma, ndang hita na mambahen sasahalak gabe naposo ni Debata. (Jaha 1 Korint 3:6, 7.) Jahowa do na manogu-nogu halak gabe naposona. (Joh. 6:44) Tontu, ganup halak boi do mamillit manjalo barita na tapasahat manang na ndang. (Mat. 13:4-8) Songon Jesus, ndang sude halak manjalo barita na dipasahat ibana. Hape, Guru na mansai burju do ibana. Alani i, unang ma metmet rohanta molo adong halak na so olo manjalo barita na tapasahat.

19. Aha do laba na tadapot molo tapatudu roha sapangkilalaan tingki marbarita?

¹⁹ Molo tapatudu roha sapangkilalaan tingki marbarita, godang do laba na tadapot. Gabe lam ringgas ma hita marbarita. Gabe lam las ma rohanta ala adong na boi talehon. Jala gabe lam mura ma angka halak na “tama mandapot hangoluan saleleng ni lelengna” manjalo barita na uli. (Ul. 13:48) Alani i, “binsan adong dope tingki, taulahon ma na denggan tu saluhut halak”. (Gal. 6:10) Jala tahilala ma las ni roha ala pasangaphon goar ni Ama na di surgo.​—Mat. 5:16.