1. Fulu Yésus fé ja dañe nambe wo? Amu jé?

FULU Yésus fé ja dañe nambe wo? Abui ya be bia da nye’e nye amu a yeme tebe été bone be bôt. Éyoñ a mbe si va, Yésus a mbe a ‘va’a a ba ba vak’ nge ke ‘yi du a ba ba yi du.’ (Bero. 12:15) Môs éziñ, beyé’é bé 70 be nga bulane nkañete be wô’ô mvaé amu ésaé é nga wulu be nya mvo’é; Yésus a nga bo aya? Bible a jô na “a nga fôn a mevak a ngule [mbamba] nsisim.” (Luc 10:17-21, Mfefé Nkôñelan) Môs ôfe, ‘a nga wô’ô nlem mintaé’ éyoñ a nga yene bôte be Lazare be yônô’ô nye.​—Jean 11:33.

2. Jé é nga volô Yésus na a yeme tebe été bôte bevok?

² Bia yeme na Yésus nye a nji be a be’e metyi ya abé; nde jé é nga volô nye na a yeme tebe été bone be bôt? Bi ne taté yalane tyi’ibi na Yésus a mbe a nye’e bôt. Ayé’é ya mvus, bi nga yene na, a nga ‘dañe yene bone be bôte mvaé.’ (Min. 8:31) Nye’an ôte ô nga tindi nye na a tu’a jeñe na a yem mona môt. Nlômane Jean wo jô na Yésus “a nga yeme mam me ne bôte minlem été.” (Jean 2:25) Yésus a mbe a wô’ô bôte mintaé angôndô. Jôm ete nje be mbe be nye’e be vô’ôlô’ô foé a mbe a kañete’e be. Nge bia fe bia wô’ô bôte bia kañete mintaé, be’e fe ba ye tu’a kômbô vô’ôlô bia, a nkañete woñ wo ye wum mbamba bibuma.​—2 Tim. 4:5.

3-4. (a) Nge bia yeme tebe été bôte bevok, aval avé bia ye yen ésaé nkañete? (b) Jé bia zu yen ayé’é di?

³ Ane nlômane Paul, bia yeme na bia yiane nyoñe ngab a ésaé nkañete. (1 Bec. 9:16) Ve nkañete mbamba foé a yeme tebe été bôte bevok, a kui ki nkañete ane môt a jalé abendé. Ve a kañete bôt amu a mvamane be, a amu  a bili nkômbane ya volô be. A yeme na, a “môt a ve, a nyô a nyoñ, nyô a ve a dañe yen ébotan.” (Mam. 20:35) Nge nne bia fe bia yen ésaé nkañete nalé, wônaa bia ye tu’a nye’e bi kele’e nkañete.

⁴ Ayé’é di da zu liti bia avale bi ne tebe été bôte bevok éyoñ bi ne nkañete. Bia zu taté yen aval éve’ela Yésus é ne volô bia mfa’a ôte. Bia zu fe yene mam menyin bi ne bo asu na bi vu nye.​—1 P. 2:21.

5-6. (a) Yésus a nga tebe été bôte bevé? (b) Kalate Ésaïe 61:1, 2 a liti na Yésus a nga ko bôte bete éngôngo amu jé?

⁵ Bi tame nyoñe mon éve’an a liti na Yésus a mbe a yeme’e tebe été bôte bevok. Môs éziñ, ba be beyé’é bé be nga kañete be té’é. Be nji be be bili to’o ‘ve mon éyoñe ya di.’ Nde Yésus a nga nyoñe be, a kee be “vôm bôt be ne momo,” asu na be tame ‘wo’ane mone jôm.’ Ve beta nsamba bôt a nga bumu mbil, a tyi’i Yésus ba beyé’é bé ôsu. Yésus a nga bo aya éyoñ a nga teme bôte bete? Bible a jô na “a nga ko be éngôngo, * amu be mbe ane mintômba mi ne te mba’ale: ane a nga taté na a ye’ele be mejô abui.”​—Marc 6:30-34.

⁶ Amu jé Yésus a nga wô’ô nkunda bôt ôte éngôngol? Éfuse bia te lañe yôp ja jô na a nga yene na bôte bete “be mbe ane mintômba mi ne te mba’ale.” Éko éziñ a nga yene na abui ya été e mbe azoé, a na be mbe be yiane wondé a miam asu na e toñe menda me bôte map. Éko éziñe ba bevo’o be mbe be ndeme bi awu. Nge é ne nalé, wônaa Yésus a mbe ngule ya tebe été jap. Ayé’é ya sondô a nga man é nga liti bia na Yésus émiene fe a nga tôban avale minju’ ete. Mbôle Yésus a mbe a yeme’e tebe été bôte bevok, nalé  a nga tindi nye na a kômbô volô bôte bete minlem.​—Lañe’ Ésaïe 61:1, 2.

7. Aval avé bi ne vu éve’ela Yésus?

⁷ Jé éve’ela Yésus é ne ye’ele bia? Dene fe, bôte ba bômane bia be ne “ane mintômba mi ne te mba’ale.” Ba tôban angôndô ya abui minjuk. Bia bi bili biañ é ne volô be, biañ éte é ne mbamba foé ya Éjôé Yéhôva. (Nli. 14:6) Ajô te bia vu Ñye’ele wongan; bia kañete benya mejôô amu bia “ko môt a ne nzôzoé a nyô a ne ôsame éngôngo.” (Bs. 72:13) Bia wô’ô bôte mintaé, a bia jeñ a mezene mese na bi volô be.

8. Jam ôsu bi ne bo asu na bi tebe été bôte bia kañete é ne avé? Nyoñe’ éve’an.

⁸ Jé é ne volô bia na bi tebe été bôte bia kañete? Bia yiane jeñe na bi tu’a wô’ô été jap, a sili biabebiene na, ‘Nge bia bi mbe bi tele été éte, bi nga ye nye’e na be nyoñe bia aya?’ Aval ete nde fe bia yiane nyoñe be. * (Mt. 7:12) Bi tame zu yene mam menyin me ne volô bia na bi bo de. Jam ôsu, bia yiane jeñe na bi yemelane miñyiane mi môt ase bia kañete. Bi ne ve’ ésaé nkañete jangan a ésaé dokita. Nya dokita a jeñe na a yemelan été nkôkon ôse wo zu yene nye. A sili minsili, a kôme fe baa alo nté nkôkone wo kate nye jôme wo wôk. A nji bo ôjeja’a ya tili biañ, a taté beta fombô nkôkone mone jôm, éyoñ éte a su’ulane wô tili biañ ja yian. Aval ete fe, bi nji yiane laan a bôte bese avale da éyoñ bi ne nkañete. Ve bia yiane jeñe na bi taté yemelan été môt ase bia tôbane nye, a mam a buni.

9. Bi nji yiane ve’e fe’e na jé? Jé bia yiane viane bo?

⁹ Éyoñ wo tôbane môt éyoñ ôsu, te ve’e fe’e na wo yem été a tele, mam a buni, nge ke amu jé a buni mam mete. (Min. 18:13) Ve sili’i nye minsili mi ne volô wo na ô kôme yeme nye a mam a buni. (Min. 20:5) Nge ba bo nalé vôm ô too, sili’i nye minsili a lat a ésaé jé, nda bôte jé, mam me nga kui nye ényiñ, a mam a buni. Éyoñ bia sili benya minsilii nalé, bia ve môte fane ya kate bia amu jé da yiane na bi kañete nye mbamba foé. Ô lôô ane bi ne kôme tebe été jé ane Yésus, a volô nye avale da yian, amu bia kôme yem été jé.​—Ve’e a 1 Becorinthien 9:19-23.

10-11. Kalate 2 Becorinthien 4:7, 8 a liti na jé bi ne beta bo asu na bi tebe été bôte bevok? Nyoñe’ éve’an.

¹⁰ Jame baa, bo’o ane wo ve’ele fas jôm ényiñe jap é ne funane je. Bi ne jô  na bia be be bia dañe ke selan, amu bia fe bi be’e metyi ya abé, a bia tôbane minju’ ane bôte bese bevok. (1 Bec. 10:13) Bia yeme na ényiñ e ne mbia ayaé émo Satan ji. Nge bi bia kui na bi jibi, a ne fo’o ve amu Yéhôva a volô bia. (Lañe’e 2 Becorinthien 4:7, 8.) Tame ve’ele simesane jôm ényiñe môt a nji yeme Yéhôva é ne funane je. Nga womiene wo yene na bia yiane wô’ô bôte bete éngôngo, a kañete be “mbamba mefoé ya mvaé,” fo’o ve aval Yésus a mbe a bo’ok?​—És. 52:7.

¹¹ Bi tame zu kobô ajô mojañ éziñ ba loone na Serges. Ôsusua na a yeme benya mejôô, Serges a mbe mbia awu ôsonô, a kate laan a bôt. Nde môs éziñ, a nga taté na a yé’é Bible a Bengaa be Yéhôva. A jô na: “Me nga yé’é Bible na, Kristen ése ja yiane kañete bôte bevok benya mejôô. Ve me nji be me buni’i na me ne bo jam ete môs éziñ.” Éyoñ éte a nga tebe été bôte be ngenane te wô’ô benya mejôô, a taté na a sili émiene jôm ényiñe jap é ne fu-funane je. A jô na: “Mam me mbe me yé’é me nga soo ma angôndô ya abui mevak, a mvo’é ya nlem. Me mbe me yeme’e na mam mete me ne fe volô bôte befe.” Serges a nga kui na a bo ayo’o nlem amu a nga jeñe na a tebe été bôte bevok. A beta jô na: “Nkañete ñwô ô nga viane volô ma na me tu’a tabe ndi a mamien. Ñwô fe ô nga yemete mbunane wom.” *

12-13. Amu jé bia yiane bo ôjibi éyoñ bia ye’ele môte Mejô me Zambe? Nyoñe’ éve’an.

¹² Jame lale, bo’o ôjibi éyoñ wo ye’ele môte Mejô me Zambe. Te vuane na, éko éziñ éyoñ ôsu le nye a wô’ô mame wo wo yene tyi’ibi. Ba’ale’e fe na abui bôt da kôme nye’e mame ba ye’ele be ñyebe wop. Mfa’a wop, bedo’otene bete mbe ba late be a menda me bôte map,  metume map, a bôte ya vôme be too. Aval avé bi ne volô be?

¹³ Tame fas éve’ane ji: Be wô’ô bo aya éyoñ ba kômbô tyendé nnôm ékasa’a? Bi wô’ô bo bi yene’ be lôñe’ mfefé ékasa’a fefel, nté bôte be ngena’ane be bela’ane nnôm ékasa’a. Be wô’ô zu tyame nnôm ékasa’a fo’o ve éyoñ be maneya lôñe mfefé. Avale te da da, bi vo’o jô môte na a kôlô ñyebe a mbe a maneya yembane wô, a too ke na bi ngenane teke kôme volô nye na a nye’e mimfefé mi mam a yé’é Bible. Nge bi volô nye na a taté nye’e mam a yé’é Bible, môt ate émien a ne su’ulane tyi’i na a kôlô ñyebe wé. E ne sili abui éyoñe na bi volô bôte na be bo avale ntyendan ete.​—Bero. 12:2.

14-15. Aval avé bi ne volô bôte be nji tu’a yeme nsôñane Yéhôva a lat a ényiñe ya nnôm éto paradis si va? Nyoñe’ éve’an.

¹⁴ Éyoñ bi bili fulu ôjibi, bi vo’o yange na bôte bia kañete be yebe mam ba yé’é Bible été été. Nge bia yeme tebe été jap, bia ye viane volô be na be tu’a bi éyoñe ya fase mame Bible a ye’ele be. Bi tame nyoñ éve’ane na, wo kômbô ye’ele môt ajô ya ndi nleme ya nyiñ paradis nnôm éto si va. Abui bôte da tu’a ki yeme ñye’elan ôte. Ba buni na mbamba be bôte bese ba ye ke nyiñe yôp. Aval avé bi ne volô be?

¹⁵ Mojañ éziñ a kate bia aval a wô’ô bo. A wô’ô taté lañe môte Metata’a 1:28. Éyoñ éte nje a sili nye na: “Zambe a mbe a yi na môta binam a nyiñe vé, a a mbe a yi na a nyiñ aya?” Abui bôt da bo é yala’ane na: “Zambe a yi na bi nyiñe meva’a été si va.” Eyoñ éte mojañ a beta lañ Ésaïe 55:11 a sili môte na: “Ye nsôñane Zambe ô tyendéya?” Éyoñ môt a yalane na momo, mojañ a su’ulane lañe Besam 37:10, 11, a sili nye aval ényiñe ja ye bo melu ma zu. Fatane minlañ éte é boya na a volô bizu’u bi bôte na, be kôme wô’ô na, Yéhôva a ngenan a yi na mbamba be bôte be nyiñe Paradis si va nnôm éto.

16-17. Éyoñ bia kôme bindi kalate Minkana 3:27, mam mevé bi ne bo asu na bi volô bôte bia tôbane be nkañete? Nyoñe’ éve’an.

¹⁶ Jame nyini, sili’i womiene jam ô ne bo asu na ô liti môte wo kañete na wo nyoñe nye ngap. Ye wo te ke nda môt awolo a bo mam me ne nye mfi abui? Sili’i nye njaman, a jeñe na mi kui tyiñe asu na mi beta yenan éyoñ éfe. É ne fe kui na ô koone môt a yii’ na be volô nye bo mon ésaé éziñ. Ye wo te koone môt a ya’a, nge ke nya môtô? Ye môt ate a jeñe môt a ne ji’a ke nye nlôman? Éyoñ bia koone bôt avale bité éte, bia yiane volô be.​—Lañe’e Minkana 3:27.

¹⁷ Sita a nga kui na a nambe minlem bibu’a ya nda bôt éziñ, a too ke na  émien a nga biasé mvolan a nga soo be. Sita ate a nga tili minga éziñ ba nnôme kalate, amu be nga jañele mone wop. Kalate ate a mbe a bili bifuse biziñe ya Bible bia volô nlem. Nde bôte bete be nga bo aya? Minga a nga dimili mon a nga tili sita a jô’ô na: “Me nga lôte mbia abé môs angô’é. Ô vo’o tu’a yem abim avé kalate wôé a nga volô bia. Me nji yem avale me ne ve wo akiba, bifia bi ne tyôtyoé. Me nga lañe kalate ate angô’é a lôte biyoñ 20. Kalate ate a nga liti fo’o bia na wo nyoñe ngab a bia a na wo wô’ô bia mintaé, a nga ve fe bia ngule nyul aval bi nji be bi buna’an. Bia ve wo akéva a nleme wongan ôse.” Nga mi lôô na, ésaé nkañete jangane fe é ne wume mbamba bibuma éyoñ bia yeme tebe été bôte ba tôbane minjuk, a éyoñ bia jeñe na bi volô be.

18. Kalate 1 Becorinthien 3:6, 7 a liti na jé bia yiane ba’ale a late a ésaé nkañete jangan, amu jé?

¹⁸ Ve bi nji yiane ka’a biabebien mimbe’e mia lôte bia nkôñ éyoñ bi ne nkañete. Bi bia bo ve abime dangan, ve sa ke bia bia bo ésaé ése. (Lañe’e 1 Becorinthien 3:6, 7.) Yéhôva émiene nnye a dutu bôte be nye. (Jean 6:44) Nde fe, môt émiene nnye a tyi’i nleme wé été na, a kañese benya mejôô nge momo. (Mt. 13:4-8) Te vuane na, akusa bo Yésus a mbe beta Ñye’ele, bôte bese be nji kañese nkañete wé. Ajô te bi nji yiane bili atek nge bôte bia kañete ba bene vo’olô foé bia kate be.

19. Bibotane bivé bia ye bi nge bia yeme tebe été bôte bia kañete?

¹⁹ Bia ye bi abui bibotan nge bia tebe été bôte bia kañete. Jam ôsu, bia ye tu’a nye’e ésaé nkañete jangan. Bia ye bi abui mevak amu bia volô bôte bevok. Bia ye fe ve ‘bôte ba kômbô bi ényiñe ya melu mese’ fane ya yeme mbamba foé. (Mam. 13:48, nwt-F) Ajô te, ‘embo’ané mam me ne mvaé mfa’a ya bôte bese éyoñ ése bi bili fane ya bo de.’ (Beg. 6:10) Nge bi bo nalé, Ésaa wongan a ye nyoñe duma. Ye sa nne bia bese bia yi nalé nga?​—Mt. 5:16.