1. Unsa ang usa sa makapatandog kaayong bahin sa personalidad ni Jesus? Ipatin-aw.

ANG usa sa makapatandog kaayong bahin sa personalidad ni Jesus mao nga makasabot siya sa atong mga problema nga resulta sa atong pagkadili-hingpit. Sa dinhi pa siya sa yuta, siya ‘nagmaya uban sa mga tawong nagmaya’ ug ‘mihilak uban sa mga tawong nanghilak.’ (Roma 12:15) Pananglitan, dihang ang iyang 70 ka tinun-an mibalik nga malipayon human sa ilang malamposong pagsangyaw, si Jesus “nalipay sa hilabihan diha sa balaang espiritu.” (Luc. 10:17-21) Sa laing bahin, dihang nakita niya nga naguol ang mga nagmahal kang Lazaro tungod sa kamatayon niini, si Jesus “miagulo diha sa espiritu ug naguol.”​—Juan 11:33.

2. Nganong maluluy-on si Jesus sa mga tawo?

² Bisag hingpit, nganong maluluy-on ug mabination man kaayo si Jesus sa makasasalang mga tawo? Una sa tanan, gimahal niya ang mga tawo. Sumala sa nahisgotan sa miaging artikulo, siya “[nahinangop] sa mga anak sa mga tawo.” (Prov. 8:31) Ang maong gugma nagpalihok niya nga sabton pag-ayo ang ilang panghunahuna. Si apostol Juan miingon: “Siya nahibalo kon unsa ang anaa sa tawo.” (Juan 2:25) Si Jesus naluoy kaayo sa mga tawo. Gibati nila nga gihigugma niya sila ug nakatabang ni aron maminaw sila sa iyang mensahe bahin sa Gingharian. Kon masundog nato ang iyang pagbati sa mga tawo, mahimo tang mas epektibo sa atong pagsangyaw.​—2 Tim. 4:5.

3-4. (a) Kon maluluy-on ta, unsaon nato paglantaw ang atong ministeryo? (b) Unsay atong hisgotan niining artikuloha?

³ Si apostol Pablo nahibalo nga obligasyon niya ang pagsangyaw,  ug mao sab ta. (1 Cor. 9:16) Bisan pa niana, kon maluluy-on ta, dili lang nato lantawon nga obligasyon ang ministeryo. Gusto natong pamatud-an nga atong gimahal ang mga tawo ug gusto tang motabang nila. Nahibalo ta nga “adunay labaw nga kalipay sa paghatag kay sa pagdawat.” (Buh. 20:35) Kon ingon ana ang atong panglantaw sa ministeryo, mas malipay ta sa paghimo niini.

⁴ Niining artikuloha, atong makat-onan kon unsaon nato pagpakita ang kaluoy diha sa ministeryo. Una, atong masayran kon unsay pagbati ni Jesus sa mga tawo. Dayon, atong hisgotan ang upat ka paagi nga masundog nato siya.​—1 Ped. 2:21.

5-6. (a) Kang kinsa nagmaluluy-on si Jesus? (b) Nganong naluoy si Jesus sa iyang gisangyawan, sumala sa gitagna sa Isaias 61:1, 2?

⁵ Tagda ang pananglitan kon giunsa pagpakita ni Jesus ang kaluoy. Usa ka higayon niana, si Jesus ug ang iyang mga tinun-an gikapoy kaayo kay sila nagsangyaw nga walay hunong. Wala na gani silay “higayon bisan sa pagpangaon.” Busa gidala ni Jesus ang mga tinun-an “sa usa ka mingaw nga dapit nga silasila ra” aron ‘makapahulayg kadiyot.’ Pero nag-una na didto ang usa ka dakong grupo sa mga tawo. Unsay reaksiyon ni Jesus dihang nakita niya ang mga tawo? “Siya giabot ug kaluoy * kanila, tungod kay sila nahisama sa mga karnero nga walay magbalantay. Ug siya misugod sa pagtudlo kanila ug daghang butang.”​—Mar. 6:30-34.

⁶ Matikdi ang rason kon nganong maluluy-on si Jesus. Iyang nakita nga ang mga tawo “nahisama sa mga karnero nga walay magbalantay.” Tingali nakita ni Jesus nga ang pipila kanila pobre ug naghago aron matagan-an ang pamilya. Ang uban basig namatyan ug minahal. Kon mao, makasabot si Jesus sa ilang kahimtang. Sumala sa nahisgotan sa miaging  artikulo, posibleng naatubang sab ni Jesus ang pipila niini nga mga problema. Mahunahunaon siya sa uban, ug napalihok siya sa paghupay nila.​—Basaha ang Isaias 61:1, 2.

7. Unsaon nato pagsundog si Jesus?

⁷ Unsay atong makat-onan kang Jesus? Sama kang Jesus, ang mga tawo sa atong palibot “nahisama sa mga karnero nga walay magbalantay.” Daghan silag problema. Dala nato ang ilang gikinahanglan​—ang mensahe sa Gingharian. (Pin. 14:6) Busa ingong pagsundog sa atong Agalon, atong isangyaw ang maayong balita kay kita ‘naluoy sa timawa ug sa kabos.’ (Sal. 72:13) Naluoy ta sa mga tawo, ug gusto natong tabangan sila.

8. Unsa ang usa ka paagi nga ikapakita nato ang kaluoy diha sa ministeryo? Iilustrar.

⁸ Unsay makatabang nato sa pagpakitag kaluoy sa atong sangyawan? Ibutang nato ang kaugalingon sa situwasyon sa atong gisangyawan ug trataron sila sa paagi nga gusto natong trataron ta. * (Mat. 7:12) Atong hisgotan ang upat ka paagi nga mahimo kana. Una, hunahunaa ang panginahanglan sa matag indibiduwal. Dihang magsangyaw, sama tag doktor. Hunahunaon sa maayong doktor ang panginahanglan sa matag pasyente. Siya mangutana ug maminaw pag-ayo samtang isulti sa pasyente ang iyang gibati. Dili dayon siya mohatag sa unang tambal nga iyang mahunahunaan, kondili obserbahan una niya ang mga simtomas ayha pa mohatag sa hustong tambal. Sa susama, dili ta mogamit ug parehong introduksiyon sa tanan natong sangyawan. Hinunoa, atong konsiderahon ang kahimtang ug panglantaw sa matag usa.

9. Unsay dili nato angayng hunahunaon dihang magsangyaw? Ipatin-aw.

⁹ Dihang may sangyawan ka, ayawg hunahunaa nga nahibalo na ka sa iyang kahimtang o kon unsay iyang gituohan ug nganong nagtuo siya ana. (Prov. 18:13) Hinunoa, pangutan-a siya sa mataktikanhong paagi. (Prov. 20:5) Kon haom sa inyong kultura, pangutan-a siya bahin sa iyang trabaho, pamilya, kaagi, ug panglantaw. Kon mangutana ta nila, gitugotan nato sila sa pagsulti kon nganong gikinahanglan nila ang maayong balita. Dihang masayran nato kana, makapakita tag simpatiya ug makatabang nila, sama sa gihimo ni Jesus.​—Itandi ang 1 Corinto 9:19-23.

10-11. Uyon sa 2 Corinto 4:7, 8, unsa ang ikaduhang paagi nga ikapakita nato ang kaluoy? Paghatag ug pananglitan.

¹⁰ Ikaduha, hunahunaa ang ilang kahimtang. Sa pipila ka paagi, makasabot ta sa ilang situwasyon. Dili ta hingpit, busa may mga problema pod ta. (1 Cor. 10:13) Nahibalo ta  nga lisod ang kinabuhi niining sistemaha. Makalahutay lang ta sa tabang ni Jehova. (Basaha ang 2 Corinto 4:7, 8.) Pero hunahunaa kadtong naglisod sa pagkinabuhi niining kalibotana nga dili suod kang Jehova. Sama kang Jesus, maluoy ta nila, ug mapalihok ta nga isulti kanila ang “maayong balita sa butang nga mas maayo.”​—Isa. 52:7.

¹¹ Tagda ang kahimtang sa brader nga si Sergey. Sa wala pa makakat-on sa kamatuoran, siya maulawon ug hilomon. Malisdan siya sa pagpakig-estorya sa uban. Sa ngadtongadto, nagtuon siya sa Bibliya. “Samtang nagtuon ko sa Bibliya, akong nakat-onan nga obligasyon sa mga Kristohanon nga isulti sa uban ang ilang pagtuo,” siya miingon. “Nagtuo gyod ko nga dili nâ nako mahimo.” Bisan pa niana, iyang gihunahuna kadtong wala pa makakat-on sa kamatuoran, kon unsa ka lisod ang ilang kahimtang kay wala sila makaila kang Jehova. “Ang bag-ong mga butang nga akong nakat-onan nakapalipay kaayo nako ug gibati nako ang kalinaw sa hunahuna,” siya miingon. “Kinahanglan pong mahibaloan sa uban ang kamatuoran.” Samtang nagkadako ang kaluoy ni Sergey, mao pod ang iyang kaisog sa pagsangyaw. Siya miingon: “Nasorpresa ko nga ang pagsulti sa uban bahin sa Bibliya nakadugang sa akong kompiyansa sa kaugalingon. Nakapalig-on sab ni sa akong pagtuo.” *

12-13. Nganong kinahanglan tang magmapailobon sa atong gitudloan? Iilustrar.

¹² Ikatulo, magmapailobon sa imong gitudloan. Hinumdomi nga lagmit wala gyod nila mahunahunai ang pipila ka kamatuoran sa Bibliya nga atong nahibaloan. Ug daghan ang kombinsido kaayo sa ilang gituohan. Gibati tingali nila nga ang ilang relihiyon maoy nakapahiusa nila sa ilang pamilya ug komunidad, ug mao nay ilang naandan. Unsaon nato sila pagtabang?

¹³ Hunahunaa kini: Unsay mahitabo kon ang karaan ug gabok nga tulay kinahanglang pulihan? Kasagaran, gamiton gihapon ang  karaan samtang gitukod ang bag-o. Inigkahuman sa bag-ong tulay, puwede nang gub-on ang karaan. Sa susama, sa dili pa nato sultihan ang mga tawo nga biyaan ang ilang gimahal pag-ayo pero “daan” nga tinuohan, tabangan una nato sila nga makat-onan ug mahalon ang “bag-ong” kamatuoran nga wala pa nila mahibaloi sa sinugdan. Lagmit nianang panahona andam na silang biyaan ang daang pagtulon-an. Mahimong magkinahanglag taas nga panahon sa pagtabang nila nga mohimog kausaban.​—Roma 12:2.

14-15. Unsaon nato pagtabang sa mga tawo nga wala kaayoy nahibaloan o wala gyoy nahibaloan bahin sa kinabuhing walay kataposan? Paghatag ug pananglitan.

¹⁴ Kon magmapailobon ta sa atong sangyawan, dili ta magdahom nga masabtan o dawaton dayon nila ang kamatuoran sa Bibliya sa unang higayon. Hinunoa, ang kaluoy magpalihok nato sa paghatag nilag panahon nga hunahunaon pag-ayo ang giingon sa Bibliya. Pananglitan, konsideraha kon unsaon nato pagpangatarongan bahin sa kinabuhing walay kataposan sa paraisong yuta. Daghan ang wala kaayoy nahibaloan o wala gyoy nahibaloan bahin niini nga pagtulon-an. Tingali nagtuo sila nga ang kamatayon mao ang kataposan sa tanan. O basig nagtuo sila nga ang tanang maayong tawo moadto sa langit. Unsaon nato sila pagtabang?

¹⁵ Gisulti sa usa ka brader ang usa ka paagi nga nakita niyang epektibo. Una, basahon niya ang Genesis 1:28. Dayon, mangutana siya sa tagbalay kon asa gusto sa Diyos nga mabuhi ang mga tawo ug sa unsang kahimtang. Sagad ang tubag, “Dinhi sa yuta, sa maayong kahimtang.” Unya, basahon niya ang Isaias 55:11 ug mangutana siya kon nausab ba ang katuyoan sa Diyos. Ang tagbalay sagad motubag ug wala. Dayon, basahon sa brader ang Salmo 37:10, 11 ug mangutana siya kon unsay kaugmaon sa mga tawo. Niining paagiha, daghan ang iyang natabangan nga makasabot nga gusto gihapon sa Diyos nga ang mga tawo mabuhi sa walay kataposan sa Paraisong yuta.

16-17. Base sa Proverbio 3:27, unsa ang pipila ka praktikal nga paagi diin atong mapakita ang kaluoy? Iilustrar.

¹⁶ Ikaupat, pangitag praktikal nga mga paagi sa pagpakitag konsiderasyon. Pananglitan, nakabisita ba ta sa panahon nga dili kombenyente sa tagbalay? Makapangayo tag pasaylo ug makaingon nga mobalik ta sa kombenyenteng higayon. Komosta kon ang tagbalay nagkinahanglag tabang para sa usa ka gamayng trabahoon? O komosta kon ang tagbalay dili makabiya sa balay kay nasakit o tigulang na ug nagkinahanglag tabang, tingali, sa pagpamalit? Sa maong mga kahimtang, puwede tang motabang nila.​—Basaha ang Proverbio 3:27.

¹⁷ Nakita sa usa ka sister ang maayong epekto sa morag gamayng pabor nga iyang gihatag.  Kay naluoy, gisulatan niya ang usa ka pamilya nga namatyag bata. Apil sa sulat ang pipila ka makapahupayng teksto. Unsay epekto niini sa pamilya? “Puwerte gyod nakong guola gahapon,” misulat ang inahan. “Wala seguro ka kabalo kon unsay epekto sa imong sulat. Mapasalamaton kaayo ko sa imong sulat kay nakahupay ni namo. Gahapon, kapig 20 ka beses gyod ni nako nabasa. Wala gyod ko magdahom nga matandog ug madasig ko sa imong sulat. Salamat kaayo.” Maayo gyod ang resulta kon atong ibutang ang kaugalingon sa situwasyon niadtong nag-antos ug molihok sa pagtabang nila.

18. Sumala sa 1 Corinto 3:6, 7, unsang balanseng panglantaw ang angay natong hinumdoman?

¹⁸ Siyempre, naningkamot ta nga mamentinar ang balanseng panglantaw sa ministeryo. Motabang ta sa uban nga mailhan ang Diyos, pero dili kita ang nagahimo sa pinakaimportanteng bahin. (Basaha ang 1 Corinto 3:6, 7.) Si Jehova ang nagkabig sa mga tawo. (Juan 6:44) Mahimong dawaton o dili sa usa ang maayong balita depende sa kahimtang sa iyang kasingkasing. (Mat. 13:4-8) Hinumdomi nga kadaghanan wala modawat sa mensahe ni Jesus​—ug siya ang labing bantogang Magtutudlo nga nabuhi sukad! Busa, dili ta angayng maluya kon kadaghanan sa gusto natong tabangan dili maminaw sa mensahe.

19. Unsay mga kaayohan sa atong pagpakitag kaluoy diha sa ministeryo?

¹⁹ Daghan ug kaayohan ang pagpakitag kaluoy diha sa ministeryo. Mas magmalipayon ta sa atong ministeryo. Atong maeksperyensiyahan ang dakong kalipay sa paghatag. Ug gihimo natong sayon para niadtong “hustong nakiling alang sa kinabuhing walay kataposan” nga dawaton ang maayong balita. (Buh. 13:48) Busa, “samtang kita may kahigayonan alang niini, buhaton nato ang maayo ngadto sa tanan.” (Gal. 6:10) Dayon atong masinati ang kalipay sa paghimaya sa atong langitnong Amahan.​—Mat. 5:16.