1. Tsictesan chuqui jiñi wen utsʼatax bʌ yicʼot muʼ bʌ i ñijcan lac pusicʼal tiʼ tojlel Jesús.

JIÑI wen utsʼatax bʌ yicʼot muʼ bʌ i ñijcan lac pusicʼal tiʼ tojlel Jesús jiñʌch cheʼ yujil i chʼʌmbentel i sujm jiñi lac wocol tac. Cheʼ bʌ wʌʼto an ti Pañimil, tijicña tsiʼ yubi yicʼot jiñi tijicñayoʼ bʌ i tsiʼ chaʼle uqʼuel yicʼot jiñi tsaʼ bʌ i chaʼleyob uqʼuel (Ro. 12:15). Jumpʼejl ejemplo, «tijicña» tsiʼ yubi i bʌ cheʼ bʌ jiñi 70 xcʌntʼañob wen tijicña tsaʼ sujtiyob cheʼ wen tsiʼ ñusayob ti jiñi ñuc bʌ subtʼan (Lc. 10:17-21). Pero cheʼ jaʼel, cheʼ bʌ tsiʼ qʼuele chaʼan wen chʼijiyemob jiñi wiñicob xʼixicob (quixtañujob) chaʼan Lázaro tsaʼ chʌmi (sajti), «tsiʼ pʼunta tiʼ pusicʼal. Tsiʼ mele i pusicʼal» (Jn. 11:33).

2. ¿Chucoch tsiʼ pʌsʌ Jesús chaʼan miʼ yubin muʼ bʌ i yubin yambʌlob?

² Anquese tojʌch jiñi Jesús, tsaʼʌch i pʌsʌ i pʼuntaya tiʼ tojlel jiñi quixtañujob xmuliloʼ bʌ. ¿Chucoch tsiʼ mele? Come an i cʼuxbiya. Cheʼ bajcheʼ tsaʼ laj qʼuele ti yambʌ temaj, tsaʼ cʼoti i cʼuxbin jiñi quixtañujob (Pr. 8:31). Jiñʌch tsaʼ bʌ i ñijca chaʼan miʼ cʌn ti wen i pensar jiñi yambʌlob. Jiñi apóstol Juan tsiʼ yʌlʌ: «Mach wersajic miʼ subentel Jesús chuqui an tiʼ pusicʼal winicob xʼixicob, come yujilʌch» (Jn. 2:25). Jesús tsaʼʌch i pʼuntayob, i yonlel tsiʼ qʼuelbeyob i cʼuxbiya i tsiʼ jacʼʌyob jiñi wen tʼan chaʼan i Yumʌntel Dios. Mi mucʼʌch lac lajin Jesús, ñumen wen muʼ bʌ caj lac taj ti subtʼan (2 Ti. 4:5).

3, 4. a) Mi mucʼʌch lac pʌs chaʼan la cujilʌch ubintel muʼ bʌ i yubin yambʌlob, ¿chuqui mi caj i ñijcañonla chaʼan mi lac chaʼlen subtʼan? b) ¿Chuqui mi caj laj qʼuel ti ili temaj?

³ Jiñi apóstol Pablo yujil chaʼan yom miʼ chaʼlen subtʼan, yicʼot joñonla jaʼel (1 Co. 9:16). Pero mi mucʼʌch lac pʌs chaʼan mi la cubin muʼ bʌ i yubin yambʌlob mi caj lac chaʼlen subtʼan  come mi lac chʼʌm ti ñuc jiñi quixtañujob i la com laj coltañob, mach chaʼan jach la com lac tsʼʌctesan jumpʼejl mandar. La cujil chaʼan «ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hch. 20:35). Mi cʼajal lac chaʼan ili cheʼ mi lac loqʼuel ti subtʼan ñumen tijicña mi caj lac ñusan.

⁴ Ti ili temaj, mi caj laj qʼuel bajcheʼ miʼ mejlel lac pʌs chaʼan la cujil ubintel muʼ bʌ i yubin yambʌlob ti subtʼan. Ñaxan, mi caj lac tsajin bajcheʼ yilal miʼ qʼuel Jesús jiñi quixtañujob i chuqui miʼ pʌsbeñonla. Ti wiʼil, mi caj laj cʌn chʌnchajp bajcheʼ miʼ mejlel lac lajiben jiñi wem bʌ i ejemplo (1 P. 2:21).

5, 6. a) ¿Majqui tsiʼ pʼuntayob Jesús? b) Cheʼ bajcheʼ tsaʼ wʌn ajli ti Isaías 61:1, 2, ¿chucoch tsiʼ pʼunta Jesús jiñi quixtañujob tsaʼ bʌ i subeyob wen tʼan?

⁵ Laʼ lac tsajin junyajl cheʼ bʌ Jesús tsiʼ pʌsʌ chaʼan yujil ubintel muʼ bʌ i yubin yambʌlob. Ti jumpʼejl bʌ qʼuin, Jesús yicʼot jiñi xcʌntʼañob i chaʼan maʼañic cʼaj o tsiʼ chaʼleyob subtʼan. Mi tsaʼicto i tajbeyob i yorajlel chaʼan miʼ cʼuxob i waj. Jin chaʼan, Jesús tsiʼ pʌyʌyob majlel «ti jochol bʌ lum» chaʼan mi tsʼitaʼ cʼajob i yoj. Pero yonlel quixtañujob ajñel tsiʼ tsajcayob majlel. ¿Chuqui tsiʼ mele Jesús cheʼ bʌ tsaʼ cʼoti i tsiʼ qʼuele pejtelel jiñi quixtañu yaʼ bʌ añob? «Tsiʼ pʼuntayob come lajalob bajcheʼ tiñʌmeʼ mach bʌ anic xcʌntaya i chaʼañob. An cabʌl chuqui tsaʼ caji i cʌntesañob» (Mr. 6:30-34).

⁶ ¿Chucoch tsiʼ pʼuntayob? Come tsiʼ qʼuele chaʼan lajalob «bajcheʼ tiñʌmeʼ mach bʌ anic xcʌntaya i chaʼañob». Tajol tsiʼ qʼuele chaʼan an wen pʼumpʼuñoʼ bʌ i tsʌts yom miʼ chaʼleñob eʼtel (troñel) chaʼan miʼ tajob chuqui miʼ cʼux. Tajol an jaʼel majqui chʌmeñobix bʌ i chaʼan. Cheʼ bajcheʼ tsaʼ laj qʼuele ti yambʌ temaj, miʼ mejlel lac ñaʼtan chaʼan Jesús tsiʼ wen chʼʌmbe i sujm bajcheʼ woli (choncol) i yubiñob come tsaʼʌch i ñusa jiñi wocol tac. Come tsiʼ chʼʌmʌ ti ñuc jiñi yambʌlob jiñʌch tsaʼ bʌ i ñijca chaʼan miʼ subeñob wem bʌ  tʼan muʼ bʌ i ñuqʼuesʌbeñob i pusicʼal (pejcan Isaías 61:1, 2).

7. ¿Bajcheʼ miʼ mejlel lac lajin Jesús?

⁷ ¿Bajcheʼ miʼ mejlel lac lajin i melbal Jesús? Ti ili ora, jiñi quixtañujob lajalob jaʼel bajcheʼ «tiñʌmeʼ mach bʌ anic xcʌntaya i chaʼañob» i wen cabʌl jax i wocolob. Pero joñonla an lac chaʼan jiñi wen tʼan chaʼan i Yumʌntel Dios i jiñʌch mejl bʌ i coltañob (Ap. 14:6). Jin chaʼan, cheʼʌch mi lac mel (chaʼlen) bajcheʼ Jesús, jiñi xCʌntesa lac chaʼan, mi lac subeñob wen tʼan jiñi quixtañujob come mi lac «pʼuntan jini cʼun bʌ yicʼot jini pʼumpʼun bʌ» (Sal. 72:13). Mi lac pʼuntañob yicʼot mi lac sʌclan bajcheʼ miʼ mejlel laj coltañob.

8. ¿Chuqui miʼ mejlel i coltañonla chaʼan mi lac pʌs chaʼan mucʼʌch la cubin bajcheʼ miʼ yubiñob i bʌ yambʌlob yaʼ ti subtʼan? Acʼʌ jumpʼejl ejemplo.

⁸ Yom mi lac ñop lac ñaʼtan chuqui miʼ ñaʼtañob i bajcheʼ miʼ yubiñob i bʌ jiñi quixtañujob ti subtʼan yicʼot mi lac melbeñob cheʼ bajcheʼ mi lac mulan chaʼan miʼ lac melbentel, * chaʼan mi lac pʌs chaʼan mucʼʌch la cubin bajcheʼ miʼ yubiñob (Mt. 7:12). Laʼ laj qʼuel chʌnchajp mejl bʌ i coltañonla chaʼan mi lac mel. Ñaxan, laʼ lac ñaʼtan chuqui i cʼʌjñibal i chaʼan ti jujuntiquilob. Cheʼ bʌ mi lac chaʼlen subtʼan, lajalonla bajcheʼ juntiquil doctor. Jiñi wem bʌ doctor miʼ chʼʌm ti ñuc bajcheʼ yom coltʌntel jujuntiquil quixtañu. Miʼ mel cʼajtiya tac yicʼot miʼ wen ñʌchʼtan jiñi woli (yʌquel) bʌ i tsictesan bajcheʼ yubil miʼ yubin i bʌ. Maʼañic mi caj i yʌqʼuen baqui jach bʌ tsʼac, ñaxan mi caj i wen qʼuel chaʼan miʼ ñaʼtan chuqui ti tsʼac ñumen wen chaʼan miʼ coltan. I cheʼʌch joñonla jaʼel, mach junlajalic chuqui mi lac suben jiñi quixtañujob, mi lac ñaxan qʼuel chuqui woliʼ ñusañob yicʼot chuqui miʼ ñaʼtañob.

9. a) ¿Chuqui mach yomic mi lac ñaʼtan? b) ¿Chuqui ñumen yom bʌ mi lac mel?

⁹ Mach yomic mi lac ñaʼtan chaʼan luʼ laj cujilix woli bʌ i ñusañob jiñi quixtañujob mi jiñicto muʼ bʌ i ñopob yicʼot chucoch miʼ ñopob (Pr. 18:13). Chaʼan miʼ cʼotel lac ñaʼtan, ñumen wen cheʼ mi lac mel cʼajtiya tac ti wen jach bʌ tʼan (Pr. 20:5). Jumpʼejl ejemplo, mi utsʼatʌch miʼ qʼuejlel yaʼ baʼ chumulonla, miʼ mejlel laj cʼajtiben tiʼ tojlel i familia, i yeʼtel, muʼ bʌ i ñaʼtañob yicʼot yan tac bʌ muʼ bʌ i ñusañob tiʼ cuxtʌlel. Cheʼ bajcheʼ ili, mi caj i yʌqʼueñonla lac ñaʼtan chucoch i cʼʌjñibal i chaʼañob jiñi wen tʼan chaʼan i Yumʌntel Dios. Cheʼ la cujil jiñi, mi caj i mejlel lac ñaʼtan chuqui i cʼʌjñibal i chaʼañob i mi laj coltañob cheʼ bajcheʼ tsiʼ mele Jesús (lajin yicʼot 1 Corintios 9:19-23).

10, 11. Cheʼ bajcheʼ miʼ yʌl 2 Corintios 4:7, 8, ¿baqui bʌ jiñi i chaʼpʼejlel muʼ bʌ caj i coltañonla la cubin bajcheʼ miʼ yubin yambʌlob? Alʌ jumpʼejl ejemplo.

 ¹⁰ I chaʼpʼejlel, laʼ lac ñop lac ñaʼtan bajcheʼ yilal chumulob. Ili mi caj i coltañonla chaʼan mi laj cʌcʼ lac bʌ ti chuqui woliʼ ñusañob come joñonla jaʼel mi lac ñusan wocol tac (1 Co. 10:13). La cujil chaʼan wen wocol chuqui mi lac ñusan ila tiʼ pañimil (mulawil) Satanás i chaʼan cojach tiʼ coltaya Jehová miʼ mejlel laj cuch (pejcan 2 Corintios 4:7, 8). Laʼ lac ñaʼtan tiʼ tojlel jiñi mach bʌ i yamigojobic Jehová, ñumen wocolto miʼ yubiñob ajñel ti ili pañimil come maʼañobic i coltaya. Cheʼ bajcheʼ Jesús, mi lac pʼuntañob yicʼot mi lac chʼʌmbeñob majlel jiñi «wen tʼan» (Is. 52:7).

¹¹ Laʼ laj qʼuel tiʼ tojlel jiñi hermano Sergey. Cheʼ maxto i testigojic Jehová, wen wocol miʼ yubin chaʼan miʼ chaʼlen tʼan come yujil bʌqʼuen yicʼot ñʌchʼʌl jach. Miʼ yʌl: «Cheʼ bʌ woliyon ti estudio tsaʼ cʼoti j cʌn chaʼan jiñi xñoptʼañob yom miʼ subeñob wen tʼan jiñi quixtañujob. I mach wis mejloñic tsaʼ c ñaʼta». Pero Sergey maʼañic tsiʼ cʌyʌ i ñaʼtan bajcheʼ yilal chumulob jiñi mach bʌ i cʌñʌyobic Jehová. Miʼ yʌl: «Tsiʼ wen aqʼueyon cubin c tijicñʌyel yicʼot c ñʌchʼtʌlel jiñi tsaʼ bʌ j cʌñʌ majlel. Cujil chaʼan jiñi yambʌ quixtañujob yomʌch miʼ cʌñob i sujmlel jaʼel». Cheʼ tsiʼ ñaʼta jiñi, maʼañix tsiʼ bʌcʼña subtʼan. ¿Chuqui i wenlel tsiʼ taja? Miʼ yʌl: «Tsiʼ coltayon c taj c chʼejlel yicʼot tsaʼ ñumen cʌyle tic pusicʼal jiñi cʌntesa tac am bʌ ti Biblia». *

12, 13. ¿Chucoch yomʌch la cujil pijt tiʼ tojlel jiñi muʼ bʌ la cʌqʼueñob estudio? Acʼʌ jumpʼejl ejemplo.

¹² I yuxpʼejlel, yom la cujil pijt tiʼ tojlel jiñi woli bʌ la cʌqʼueñob estudio. Yom mi laj cʼajtesan chaʼan jiñi cʌntesa tac wen laj cʌñʌyix bʌ, tajol tsijibto i chaʼañob. Cheʼ jaʼel, cabʌl quixtañujob miʼ wen qʼuelob ti ñuc chuqui ñopolob i chaʼan i tajol miʼ yubiñob chaʼan  jiñʌch muʼ bʌ i temob tiʼ familia, tiʼ cultura yicʼot tiʼ lumal. ¿Bajcheʼ miʼ mejlel laj coltañob?

¹³ Laʼ lac ñaʼtan ili ejemplo. ¿Chuqui miʼ mejlel cheʼ yom miʼ qʼuextʌntel jumpʼejl puente ñoxix bʌ mach bʌ weñix? An i tajol, cheʼ wolito i mejlel jiñi tsijiʼ bʌ, jiñi quixtañujob jinto miʼ bej cʼʌñob jiñi ñoxix bʌ. Cheʼ tsaʼix ujti ti mejlel, muqʼuix i jemob jiñi ñoxix bʌ. Lʌcʼʌ lajal miʼ yujtel cheʼ an majqui woli la cʌqʼuen estudio, chaʼan miʼ cʌy jiñi ñaxam bʌ i ñopbal, tajol yom mi lac ñaxan coltan i qʼuel ti ñuc jiñi cʌntesa tac am bʌ ti Biblia, come tsijibto tiʼ tojlel. Cheʼ jiñi, ti jumpʼejl i pusicʼal mi caj i cʌy jiñi muʼ bʌ i ñop ti ñaxan. Ili mucʼʌch i mejlel ti tsʼitaʼ jalʼan (Ro. 12:2).

14, 15. Tsictesan yicʼot jumpʼejl ejemplo bajcheʼ miʼ mejlel laj coltan jiñi mach bʌ yujilobic o mach bʌ wen yujilob chaʼan mi lac mejlel ti chumtʌl tiʼ pejtelel ora ti jumpʼejl Paraíso ila ti Lum.

¹⁴ Mi la cujilʌch pijt maʼañic mi caj lac pijtan chaʼan ti ora yom miʼ chʼʌmbeñob i sujm o miʼ jacʼob jiñi i sujmlel cheʼ cojaxto woliʼ yubiñob. Cheʼ mi lac chʼʌmbeñob i sujm jiñi yambʌlob miʼ ñijcañonla chaʼan mi laj coltañob i ñaʼtan jiñi i sujmlel yicʼot jiñi Biblia jiñʌch bajcheʼ jalel yom. Jumpʼejl ejemplo, laʼ lac ñaʼtan cheʼ jiñi Biblia miʼ yʌl chaʼan mi lac mejlel ti chumtʌl tiʼ pejtelel ora ti jumpʼejl Paraíso wʌʼ ti Pañimil. Cabʌlob mach yujilobic o maʼan baʼ i yubiyob iliyi. Lamital miʼ ñaʼtañob chaʼan cheʼ mi lac chʌmel yaʼ jaxʌl miʼ jilel. I an muʼ bʌ i ñaʼtañob chaʼan jiñi tojoʼ bʌ miʼ majlelob ti panchan. ¿Bajcheʼ miʼ mejlel laj coltañob chaʼan miʼ ñopob muʼ bʌ i yʌl jiñi Biblia?

¹⁵ Juntiquil hermano miʼ tsictesan bajcheʼ miʼ mel. Ñaxan, miʼ pejcan Génesis 1:28 i miʼ cʼajtin baqui yicʼot bajcheʼ yilal yom Dios chaʼan miʼ yajñelob jiñi wiñicob xʼixicob cʼʌlʌl ti wajali. Lʌcʼʌ tiʼ pejtelelob miʼ yʌlob chaʼan wʌʼ ti Pañimil yicʼot chaʼan yom tijicñayob. Ti wiʼil, jiñi hermano miʼ pejcan Isaías 55:11 i miʼ cʼajtin mi tsaʼix qʼuextʌyi chuqui yom Dios. I miʼ jacʼbeñob chaʼan maʼañic. Tiʼ yujtibal, miʼ pejcan Salmo 37:10, 11 i ti wiʼil miʼ cʼajtin: «Cheʼ bajcheʼ miʼ yʌl jiñi Biblia, ¿bajcheʼ mi caj i chumtʌlob jiñi quixtañujob ti talto bʌ qʼuin?». Cheʼ bajcheʼ ili, an i colta cabʌl quixtañujob chaʼan miʼ chʼʌmbeñob i sujm chaʼan Dios bej yomʌch cheʼ jiñi tojoʼ bʌ miʼ chumtʌlob tiʼ pejtelel ora ti jumpʼejl Paraíso ila ti Pañimil.

16, 17. Cheʼ bajcheʼ miʼ yʌl Proverbios 3:27, ¿bajcheʼ miʼ mejlel lac pʌs chaʼan la cujil ubintel muʼ bʌ i yubin yambʌlob? Acʼʌ jumpʼejl ejemplo.

¹⁶ I chʌnchajplel, yom mi lac ñaʼtan bajcheʼ miʼ mejlel lac pʌs chaʼan mi lac chʼʌm ti ñuc yambʌlob. Jumpʼejl ejemplo, mi tsaʼ cʼotiyonla cheʼ bʌ mach ujt i chaʼañob, miʼ mejlel laj cʼajtin lac ñusʌbentel i chaʼan wiʼilto mi lac ñumel. Mi an chuqui woliʼ mel o maʼañic miʼ mejlel ti loqʼuel tiʼ yotot i an chuqui yom, tajol miʼ mejlel lac suben chaʼan miʼ mejlel laj coltan (pejcan Proverbios 3:27).

 ¹⁷ Laʼ laj qʼuel chuqui wem bʌ miʼ mejlel lac taj cheʼ mi lac pʌs la cutslel come la cujil ubintel muʼ bʌ i yubin yambʌlob. Cheʼ bʌ juntiquil hermana tsiʼ yubi chaʼan ti jumpʼejl familia tsaʼ chʌmi juntiquil alʌl cheʼ bʌ tsiʼ yila pañimil (chʼocʼa), tsiʼ mele mach bʌ ñoj ñuquic yilal: Tiʼ tsʼijbube majlel texto tac loqʼuem bʌ ti Biblia chaʼan miʼ ñuqʼuesʌbeñob i pusicʼal. ¿Bajcheʼ yilal tsiʼ qʼuele jiñi familia? Jiñi ñaʼʌl tsiʼ chaʼ tsʼijbube jiñi hermana: «Acʼbi wen chʼijiyemon. Jiñi tsaʼ bʌ a tsʼijbu tsiʼ wen coltayon lojon. Wocolix a wʌlʌ chaʼan jiñi a carta come tsiʼ wen ñuqʼuesʌbeyon lon c pusicʼal. Mach junsujtel jach tsaʼ c pejca. Wen utsʼatax yicʼot tsiʼ tijicñesa lon c pusicʼal. Wen wocolix a wʌlʌ». Joñonla jaʼel mi caj laj qʼuelben i wenlel mi mucʼʌch la cubin muʼ bʌ i yubiñob jiñi woli bʌ i ñusañob wocol i mi lac sʌclan bajcheʼ miʼ mejlel laj coltañob.

18. Cheʼ bajcheʼ miʼ yʌl 1 Corintios 3:6, 7, ¿bajcheʼ yom mi laj qʼuel jiñi la queʼtel ti subtʼan?

¹⁸ La com chaʼan pʼisbil jach bajcheʼ mi laj qʼuel la queʼtel ti subtʼan. Anquese mi la cʌcʼ laj coltaya chaʼan jiñi quixtañujob miʼ cʌñob Dios, mach joñoñicla jiñi ñumen ñuc bʌ ti jiñi eʼtel (pejcan 1 Corintios 3:6, 7). Jiñʌch Jehová muʼ bʌ i pʌyob tilel (Jn. 6:44). I jiñʌch chuqui an tiʼ pusicʼal jiñi quixtañujob muʼ bʌ caj i ñijcañob chaʼan miʼ jacʼob o maʼañic jiñi i sujmlel (Mt. 13:4-8). Laʼ laj cʼajtesan chaʼan yonlel quixtañujob maʼañic tsiʼ ñopoyob Jesús, anquese jiñʌch jiñi ñumen wem bʌ xcʌntesa. Jin chaʼan, mach yomic mi la cubin lac chʼijiyemlel mi maʼañic miʼ ñʌchʼtañob cheʼ mi lac subeñob wen tʼan.

19. ¿Chuqui ti wenlel mi caj lac taj mi la cujil ubintel muʼ bʌ i yubiñob jiñi quixtañujob ti subtʼan?

¹⁹ Cabʌl wenlel mi caj lac taj mi mucʼʌch la cubin muʼ bʌ i yubin jiñi quixtañujob ti subtʼan. Ñumen wen mi caj lac ñusan ti subtʼan, tijicña mi caj la cubin lac bʌ yicʼot mach wocolic mi caj i yubiñob chaʼan miʼ jacʼob jiñi wen tʼan jiñi «yomoʼ bʌ i taj i cuxtʌlel mach bʌ añic miʼ jilel» (Hch. 13:48, TNM). Jin chaʼan, «laʼ laj coltan pejtelel winicob cheʼ i yorajlel to» (Gá. 6:10). Cheʼ jiñi, wen tijicña mi caj la cubin come woli la cʌqʼuen i ñuclel Jehová, jiñi lac Tat am bʌ ti panchan (Mt. 5:16).