1. Lè nou ka aprann konnèt Jézi, ki biten ki ka touché tchè an nou onlo ? Bay on ti èsplikasyon.

LÈ NOU ka gadé kijan dè moun Jézi yé, on biten ki ka touché-nou onlo sé dè vwè kè i ka konprann ki difikilté nou ka jwenn difètkè nou enpawfè. Lè i té asi latè, Jézi té ni ‘tchè-kontan ansanm èvè moun ki té ni tchè-kontan’ é ‘i té ka pléré èvè moun ki té ka pléré’ (Wom. 12:15). Pa ègzanp, on jou, 70 disip a-y té tou kontan pas yo té sòti fè on bèl travay an prédikasyon. Lè Jézi vwè sa, « lèspri sen plen tchè a-y èvè jwa » (Lik 10:17-21). Men fò-nou sonjé osi, kè lè Laza mò é kè Jézi vwè jan fanmi a-y té tris, « i plenn, tèlman sa fann tchè a-y é sa boulvèsé-y » (Jan 11:33).

2. Ka ki édé Jézi aji èvè konpasyon épi sé moun-la ?

² Lè i té asi latè, kijanfè Jézi té ka rivé konprann sa moun enpawfè té ka rèsanti, alòskè limenm té pawfè ? Si i té ka rivé fè sa, sé dabò pas i té enmé sé moun-la. Kon nou di adan awtik a simenn pasé, sé ‘pitit a lézòm i té pi enmé’ (Pwov. 8:31). Lanmou-lasa ba-y anvi dè byen konprann kijan lézimen ka rézonné. Mi sa lapòt Jan ka èspliké : « I té sav ka ki té andidan tchè a lòm » (Jan 2:25). Jézi sété on boug ki té plen konpasyon. Sé moun-la té ka rèsanti tout lanmou i té ni pou yo, kifè yo té ka kouté mésaj a Wayòm-la. Pi nou ké ni konpasyon pou sé moun-la, pi nou ké touché tchè a yo an prédikasyon (2 Tim. 4:5).

3-4. a) Si nou ni konpasyon, ki valè prédikasyon-la ké ni pou nou ? b) Ka nou ké vwè adan awtik-lasa ?

³ Lapòt Pòl té sav kè fò i té préché, é nou osi nou sav sa (1 Kor. 9:16). Men sèlman, si nou ni konpasyon, nou pé’é kontanté-nou dè vwè prédikasyon-la kon on biten nou oblijé fè. Nou ké vlé édé sé moun-la pas nou ka  sousyé-nou dè yo. Nou sav osi kè on moun ka « pli kontan lè i ka bay ki lè i ka rèsèvwa » (Akt 20:35). Pli nou ké préché pas nou vlé édé sé moun-la, pli nou ké enmé prédikasyon-la.

⁴ Adan awtik-lasa, nou ké vwè ka nou pé fè pou aji èvè konpasyon lè nou ka préché. Adan on prèmyé tan, nou ké vwè ka ègzanp a Jézikri ka aprann-nou. Aprésa, nou ké palé dè 4 fason nou pé imité-y (1 Pyè 2:21).

5-6. a) Épi kimoun Jézi aji èvè konpasyon ? b) Kon Izayi 61:1, 2 anonsé, poukwa Jézi té ni pityé pou sé moun-la i té ka préché ba-yo la ?

⁵ Jézi aji èvè konpasyon adan plizyè sitiyasyon. An-nou palé dè yonn adan yo. Jézi é disip a-y té las toubònman pas yo té sòti préché é yo pa té pozé kò a yo. Yo pa menm té ni « tan manjé ». Alò Jézi menné disip a-y « on ti koté apa pou yo té tousèl a yo » é pou yo té ‘pozé kò a yo tibwen’. Men lèwgadé, on foulmoun kouri désann la yo té kay la é yo rivé avan yo. Lè Jézi vwè pakèt moun-lasa, kijan i réyaji ? I touvé-y « ni pityé * pou yo, pas yo té kon mouton ki pa ni mèt. Alò i koumansé aprann-yo onlo biten » (Mawk 6:30-34).

⁶ Zò vwè poukwa Jézi touvé-y ni pityé pou sé moun-la ? I konstaté kè yo té « kon mouton ki pa ni mèt ». Pétèt kè Jézi vwè kè déotwa adan yo té maléré é kè yo té ka travay rèd pou yo té pé ba fanmi a yo manjé. Pétèt kè ni sa osi ki té ka soufè bon soufè-la pas yo té pèd on moun yo té enmé. Si sété ka a yo, Jézi té ka konprann an ki sitiyasyon yo té yé. Kon nou vwè adan awtik a simenn pasé, pétèt kè limenm a-y osi pasé pa sé difikilté-lasa. Sa té ka fè Jézi lapenn lè i té ka vwè moun ka soufè, é i touvé-y anvi ba sé moun-la on mésaj ki té’é konsolé-yo (li Izayi 61:1, 2).

7. Ka nou pé fè pou imité Jézi ?

 ⁷ Ka ègzanp a Jézi ka aprann-nou ? Nou osi, nou lantouré èvè moun ki ka touvé-yo « kon mouton ki pa ni mèt ». Yo ka débat pas yo ka jwenn onpakèt pwoblèm menm. É nou ni sa ki fo pou édé-yo : mésaj a Wayòm-la (Rév. 14:6). Kifè, nou ka imité Mèt an nou : nou ka préché bon nouvèl-la pas nou ni « pityé pou piti-la é pou maléré-la » (Sòm 72:13). Nou ka pran penn a sé moun-la, é nou vlé fè on biten pou édé-yo.

8. Bay on mannyè nou pé aji èvè konpasyon lè nou ka préché. Sèvi èvè on ègzanp pou èspliké sa.

⁸ Ka ki pé édé-nou aji èvè konpasyon èvè moun nou ka jwenn an prédikasyon ? Fò-nou mété-nou an plas a sé moun-la é fò-nou aji èvè yo jan nou té’é vlé yo aji èvè nou * (Mat. 7:12). An-nou palé dè kat biten ki pé édé-nou fè sa. On prèmyé biten, sé kè fò-nou chèché a vwè ka chakmoun bizwen. Lè nou ka préché bon nouvèl-la, nou ka jouwé prèskè menm wòl ki on dòktè. On bon dòktè ka éséyé konprann ka chak malad a-y bizwen. I ka pozé malad-la kèsyon é lè malad-la ka di-y kijan i ka santi kò a-y, i ka pran tan kouté-y. É i pa ka enki ba malad-la prèmyé trètman-la ki ka vin an lidé a-y la. I ka ègzaminé moun-la avan é sé aprésa i ka ba-y bon médikaman-la. Sé menm biten pou nou fè an prédikasyon. Pou nou koumansé on konvèwsasyon, fo pa nou itilizé menm métòd-la èvè toutmoun nou ka jwenn. Olyé dè sa, fò-nou chèché a konprann sitiyasyon a yochak é jan yo ka vwè léchòz.

9. Ka pou nou pa fè ? Bay on ti èsplikasyon.

⁹ Lè ou ka jwenn on moun an prédikasyon, pa mété an tèt a-w kè ou ja konnèt sa pou-w konnèt asi-y (Pwov. 18:13). Èvè onlo jantiyès, pozé-y kèsyon pou pé sa ni plis enfòwmasyon asi sitiyasyon a-y, asi kwayans a-y é asi sa ki fè i ni sé kwayans-lasa (Pwov. 20:5). Si sé on biten ki ka fèt an péyi a-w, entérésé-w a travay a-y, a fanmi a-y, a sa ki ja pasé an vi a-y é a sa i ka pansé. Lè nou ka pozé sé moun-la kèsyon nou ka pèwmèt-yo di-nou pou ki rézon yo bizwen bon nouvèl-la. Konsa, kon Jézi, nou ké pé montré kè nou ka sousyé-nou dè sa yo bizwen é nou ké pé édé-yo (konparé èvè 1 Korentyen 9:19-23).

10-11. Sèlon 2 Korentyen 4:7, 8, ki dézyèm biten nou pé fè pou aji èvè konpasyon ? Bay on ègzanp.

¹⁰ Dézyèmman, éséyé imajiné jan vi a yo yé. Lè nou byen gadé, nou pé ké ni dimal a fè sa, piskè, noumenm osi nou enpawfè, é défwa, nou ka jwenn menm difikilté  ki yo (1 Kor. 10:13). Nou sav kè adan sistèm-lasa lavi rèd toubònman. É si nou ka rivé tchenbé sé yenki pas Jéova ka ban-nou fòs (li 2 Korentyen 4:7, 8). Alò imajiné sa ki pa zanmi èvè Jéova. Konm yo pa ka bénéfisyé dè èd a Jéova, sa dwèt rèd pou yo toubònman lè yo ni a goumé èvè difikilité a lavi. Ében kon Jézi, sa ka fè-nou lapenn pou yo é nou vlé pòté « bon nouvèl a on biten ki méyè » pou yo (Iz. 52:7).

¹¹ An-nou pran ègzanp a on frè, non a-y sé Sergeï. Avan i té konnèt lavérité, i té timid toubònman. I té ni dimal a palé ba moun. On jou, i aksèpté on étid biblik. Mi sa i ka di : « Pannan an té ka étidyé Labib, an aprann kè fò sé krétyen-la pawtajé fwa a yo èvè lézòt. É franchman an konpranndèdi kè an pa té’é jen rivé fè sa. » Men i sonjé moun ki potoko tann palé dè bon nouvèl-la, é i imajiné jan lavi dwèt té rèd pou yo san Jéova. Mi sa i ka di ankò : « Tout sé vérité-la an té ka dékouvè la té ka rann tchè an mwen kontan é yo té ka trankilizé-mwen. An té sav kè sélézòt moun-la té bizwen konnèt sé vérité-lasa osi. » Pi konpasyon a Sergeï té ka grandi é pi i té ka ni kouraj pou i té préché. Mi sa i ka èspliké : « An pa té ka atann-mwen, men pi an té ka palé dè Labib, pi an té ka ni konfyans adan mwen é sa konsolidé fwa an mwen *. »

12-13. Poukwa fò-nou pran pasyans èvè moun nou ka jwenn an prédikasyon ? Sèvi èvè on ègzanp.

¹² Twazyèmman, fò-nou pran pasyans èvè sé moun-la an prédikasyon. Fo pa nou oubliyé kè sé pétèt prèmyé fwa yo ka tann palé dè sé vérité-la ki an Bib-la, alòskè nou, nou ja konnèt-yo byen. É onlo adan yo enmé kwayans a yo toubònman. Pétèt kè pou yo, sé rèlijyon a yo ki ka pèwmèt-yo rété soudé èvè fanmi a yo, èvè kilti a yo é èvè moun ki alantou a yo. Ka nou pé fè pou édé-yo ?

 ¹³ An-nou pran on ègzanp : Ka i ka pasé lè on vyé pon ja ka dégrenné é kè fò yo fè ondòt an plas a-y ? Byensouvan, toupannan yo ka konstwi on pon tounèf, yo ka kontinyé sèvi èvè vyé-la. É lèwvwè pon nèf la fini, yo pé détui vyé la. Sé menm biten pou on moun ki dwètèt mété « vyé » kwayans a-y dè koté. A pa ni jòdi ni yè, sé kwayans-lasa ni on gran valè pou-y. Kifè, pétèt fò nou ké édé moun-lasa enmé sé vérité-la i ka dékouvè an Bib-la, piskè sé dé biten ki nouvo pou-y. Sé pétèt yenki a moman-lasa, i ké paré pou i mété kwayans a-y a koté. Sé on biten ki pé pran tan (Wom. 12:2).

14-15. Si on moun pa konnèt ayen oben i pa konnèt granzafè asi lavi étèwnèl asi latè, kijan nou pé édé-y ? Bay on ègzanp.

¹⁴ Si lè nou ka préché nou ka pran pasyans èvè sé moun-la, nou pé ké ay vwè-yo èvè lidé kè yo ké konprann vérité-la é aksèpté-y o prèmyé kou. Si nou ni konpasyon pou yo, nou ké fè-yo rézonné si sa Labib ka anségné pou yo pé sa konprann sa i ka di piti-a-piti. Pa ègzanp, kijan nou pé fè on moun rézonné pou édé-y konprann kè ni moun ki ké viv étèwnèlman adan on paradi asi latè ? Ni onpakèt moun ki pa konnèt granzafè é menm ki pa konnèt ayen ditou anrapò èvè ansègnman-lasa. Pou yo, apré lanmò sé tibèt. Oben yo ka kwè kè tout sé bon moun-la kay viv o syèl. Ka nou pé fè pou édé-yo ?

¹⁵ Mi kijan on frè ka fè. I ka koumansé pa li Jénèz 1:28. Apré, i ka mandé moun-la ola Bondyé té vlé mété-nou é kijan i té vlé kè nou viv. Dabitid, moun-la ka réponn : « I té vlé kè lézòm viv asi latè, é alèz a yo. » Aprésa, frè-la ka li Izayi 55:11 é i ka mandé moun-la si Bondyé pa ni lidé fè sa i té prévwa la ankò. Byensouvan, moun-la ka réponn, non. É pou fin, frè-la ka li Sòm 37:10, 11 é i ka mandé moun-la ka dèmen ké pòté pou limanité. Èvè sé vèwsé-lasa, frè-la ja édé plizyè moun konprann kè jousalè, Bondyé vlé kè moun ki jis viv adan on paradi asi latè pou touttan.

16-17. Dapré Pwovèb 3:27, ki biten itil nou pé fè pou aji èvè konpasyon ? Palé dè sa ki rivé on sè.

¹⁶ Katriyèmman, fò-nou éséyé vwè ka nou pé fè pou montré sé moun-la kè nou ni konsidérasyon pou yo. Pa ègzanp, pétèt kè lè nou kriyé moun-la akaz a-y, i té okipé. A moman-lasa, nou pé di-y èskizé-nou é nou pé pwopozé-y dè pasé a ondòt moman ki ka aranjé-y plis. Pétèt osi nou pé tonbé asi on moun ki bizwen on pal pou chayé kous a-y oben pou fè ondòt tibiten tou senp. Nou pé tonbé osi anlè on moun ki ja ni on tilaj oben ki malad é ki bizwen on moun pou fè dé ti konmisyon ba-y. Adan chak sé sitiyasyon-lasa, nou ké ni lokazyon édé moun-la (li Pwovèb 3:27).

 ¹⁷ On sè fè on bèl tijès ki té ka sanm sa sété on ti ayen ditou, é poutan sa bay on bon rézilta. Ni on fanmi ki té sòti pèd on timoun é tèlman sa fè sè-la lapenn, i voyé on lèt ba yo. Adan lèt-la, i mété détwa vèwsé pou konsolé-yo. Kijan fanmi-la réyaji ? Mi sa manman-la ékri : « Yè, an té ka pasé on mové jouné toubònman. Lè nou li lèt a-w, ou pé pa imajiné jan sa fè-nou dibyen. An pé ké jen las di-w mèsi. An pa menm ka touvé kijan pou mwen di-w jan lèt-lasa konsolé-nou. An ja li-y omwen 20 fwa. Té ni tèlman jantiyès, tèlman bonté é tèlman ankourajman adan-y. Prèmyé fwa an vwè on biten konsa ! An ka di-w mèsi, on mèsi ki ka sòti an fon a tchè an mwen ! » Asiré pa pétèt, nou pé viv menm biten ki sè-lasa si nou ka fè éfò pou konprann sa lézòt ka rèsanti lè yo ka soufè é si nou ka fè on biten pou édé-yo.

18. Sèlon 1 Korentyen 3:6, 7, lè nou ka préché, ka pou nou pa jen oubliyé é poukwa ?

¹⁸ Sèlman, fò-nou byen konprann ki wòl nou ni lè nou ka préché. Nou ka édé sé moun-la konnèt Jéova pli byen, men a pa nou ki ka fè pli gwo a travay-la (li 1 Korentyen 3:6, 7). Sé Jéova ki ka fè sé moun-la vin owa a-y (Jan 6:44). Anfinaldikont, sé silon sa i ni andidan tchè a-y on moun ka aksèpté oben ka rèfizé bon nouvèl-la (Mat. 13:4-8). Pa oubliyé kè ni onlo moun ki pa aksèpté sa Jézi té ka préché. É poutan sé pli gran Anségnan ki ja pasé asi latè ! Alò fo pa nou dékourajé si onlo moun nou ka éséyé édé pa’a kouté mésaj-la nou ka pòté pou yo la.

19. Ki byenfé nou ka pwokiré-nou lè nou ka aji èvè konpasyon an prédikasyon ?

¹⁹ Lè nou ka aji èvè konpasyon an prédikasyon, sa ka pwokiré-nou onlo byenfé. Nou ka aprésyé prédikasyon-la plis ankò. Tchè an nou ka kontan padavwa sé bay nou ka bay. É lè nou ka aji konsa, nou ka édé « toutmoun ki ni mantalité-la ki fo la pou ni lavi étèwnèl » aksèpté bon nouvèl-la pli fasilman (Akt 13:48). Alò, touttan ou vwè « lokazyon ka prézanté, an-nou fè toutmoun dibyen » (Gal. 6:10). Konsa nou ké kontan ba Pap’an nou ki an syèl-la glwa (Mat. 5:16).