1. ¿Kasa kamalainka maʼin sümüin wayuu sünainjee nukuwaʼipa Jesuu? Püküja süchiki wanee kasa naaʼinraka.

KAMALAINSÜ maʼin sümüin wayuu sümülialaain naaʼin Jesuu saalinjee niʼrüin müliain wayuu. Soʼu yaajachin nia saaʼu tü Mmakat, talatüsü naaʼin wanaa namaa na talatakana aaʼin otta aʼyalajüshi nia wanaa namaa na aʼyalajakana (Roma 12:15). Jamüshijaʼa Jesuu, soʼu naleʼejüin sünainjee aküjaa pütchi na 70 nikirajüinkana, talatüshi maʼin nia süka niʼrüin talatüin naya sünainjee anain nakuwaʼipa (Luc. 10:17-21). Soʼu outuin Lázaro, mojusü maʼin naaʼin Jesuu sutuma niʼrüin naʼyalajüin na nüpüshikana Lázaro (Juan 11:33).

2. ¿Jamüsü sümülialaaka naaʼin Jesuu naalin na wayuukana?

² Mayaapejeʼe Nüchoin nia Maleiwa, amülialaasü naaʼin naalin na wayuukana, mayaainjeʼe kaainjaraliin naya. ¿Jamüsü makaʼa nukuwaʼipa? Shia süka alin maʼin nüpüla na wayuukana, maʼaka wekirajaaitpain sünain tü wane ekirajaayakat (Prov. 8:31). Sünainjee müin nukuwaʼipa, nütüjaa aaʼu Jesuu tü jülüjakat naaʼin na wayuukana. Anuu nünüiki chi aluwataaushikai Juan nüchiki: «Nnojotsü cheʼojaain süküjünüin nümüin jamüin sukuaippa wayuu, süka nütüjaatüjülüinya saaʼu» (Juan 2:25). Sünainjee sümülialaain naaʼin Jesuu saalin wayuu, wainma na aapaakana sümaa nünüiki. Naapaajeerü amaa na wayuukana tü pütchi waküjakat namüin woushikajaale süchiirua nukuwaʼipa Jesuu (2 Tim. 4:5).

3, 4. (1) Mayaainjeʼe sümülialaain waaʼin saalin wayuu, ¿kasa waküjeetka anainjee pütchi? (2) ¿Kasa wekirajaajeetka anain suluʼu ekirajaayakat tüü?

³ Nütüjaa aaʼu chi aluwataaushikai Pablo nüküjainjachin pütchi, müshiʼiya wayakana, watüjaa aaʼu tia (1 Cor. 9:16). Mayaainjeʼe sümülialaain waaʼin saalin wayuu, aküjeena waya  pütchi namüin sünainjee kachipünaain waaʼin nakuwaʼipa otta wakaalinjeein naya. Nnojotsü shiain sutuma waluwataanüin neʼe sünain aküjaa pütchi. Jülüjasü waaʼin pütchikat tüü: «Anakuaippaʼireʼeya chi wayuu aapakai nuulia chi aapünakai amüin» (Aluw. 20:35). Talateerü maʼin waaʼin sünain aküjaa pütchi jülüjale waaʼin tia.

⁴ Suluʼu ekirajaayakat tüü, wekirajaajeerü anain tü waaʼinrüinjatkat süpüla sümülialaain waaʼin naalin na waküjakana amüin pütchi. Wekirajaajeerü anain palajana kojutuin nümüin Jesuu na wayuukana otta tü watüjakat sünainjee. Süchikijee, wekirajaajeerü anain pienchisü kasa waaʼinrüinjatka süpüla washatüin nukuwaʼipa Jesuu (1 Ped. 2:21).

5, 6. (1) ¿Jaralii na nümülialaakana aalin Jesuu? (2) ¿Jamüshii nümüliajaka Jesuu na wayuu nüküjakana amüin pütchi saashin Lucas 4:18, 19?

⁵ Wekirajaa sünain tü naaʼinrakat Jesuu soʼu sümülialaain naaʼin naalin na nikirajüinkana. Meemeraainsalii naya sünain aküjaa pütchi. Nnojoishii naya eküin soʼu tia. Müshijeseʼe nümüin namüin: «Jooʼuya tamaaiwa jia chamüin eere yüütüülin mmakat süpüla jeemeraainjanain». Süntapaataka wayuu wainma nanainmüin, ¿kasakaʼa naaʼinrüin Jesuu? Wanaa sümaa niʼrüin tü wayuu wattakat saalii, «nümüliajakalaka * shia süka walakatüin maa aka saaʼin anneerü eekai memekeetsein. Nuʼttakalaka sünain ekirajaa shia sünain kasa wainma» (Mar. 6:30-34).

⁶ ¿Jamüsü sümülialaaka naaʼin Jesuu? Süka niʼrüin naya wayuukana «walakatüin maa aka saaʼin anneerü eekai memekeetsein». Eesüjaʼa niyaawatüle saaʼu eein wayuu eekai maʼletsein otta eein na aʼyataakana maʼin süpüleerua tü nepijaainjatkalü aaʼu. Eeshiijaʼa eejanale eekai sünaajaain napüshi. Eesüjaʼa nütüjaale saaʼu jamüin naaʼin naya wayuukana süka sülatüirüin tia nümüin, maʼaka wekirajaaitpain sünain tü wanee ekirajaayakat. Süka  kachipünaain naaʼin nakuwaʼipa na wayuukana, nümülialüin naaʼin süka tü pütchi nüküjakat namüin (paashajeʼera Lucas 4:18, 19).

7. ¿Kasa waaʼinrüinjatka süpüla washatüin nukuwaʼipa Jesuu?

⁷ ¿Kasa waaʼinrüinjatka süpüla washatüin nukuwaʼipa Jesuu? Maaʼulu yaa, müliasü maʼin saaʼin wayuu sutuma tü kasa mojusü alatakat sümüin, müshii naya «maa aka saaʼin anneerü eekai memekeetsein». Eepajaʼa süpüla wakaalinjain naya sükajee waküjain namüin nünüiki Maleiwa (Alat. Map. 14:6). Müsüjeseʼe weʼikajüin namüin tü pütchi anasükat maʼaka naaʼinrüin shia Jesuu, süka jamüin, sümülialaain waaʼin «naalin chi maʼletsekai jee naalin chi mojushikai» (Sal. 72:13). Amülialaasü waaʼin naalin na wayuukana jee wakaalinjeein naya.

8. ¿Kasa wasakireʼerüinjatka anain waaʼin waküjapa pütchi? Püküja wanee sukuwaʼipa.

⁸ Süpüla sümülialaainjatüin waaʼin naalin na waküjakana amüin pütchi, wasakireʼerüinjatü waaʼin süchiki jamüin naaʼin, kasain jülüjain naaʼin otta waaʼinreein namüin tü wachekakat saaʼinnüin wamüin * (Mat. 7:12). Wekirajaa sünain pienchisü kasa süpüla wountüin tia. Tü palajatkat kasa shia jülüjainjatüin waaʼin tü choʼujaakat namüin na wayuukana waneʼewai nakua. Waküjapa pütchi, meesü wakuwaʼipa maʼaka saaʼin nukuwaʼipa wanee tottoot. Jamüshijaʼa wanee tottoot, jülüjasü naaʼin palajana tü choʼujaakat nümüin wanee ayuuishi. Nüsakirüin nia sünain kasain alin nünain jee naapajüin nünüiki. Nnojotsü nuluwataamaatüin nümüin tü nipinaseinjatkat, naainjirüin nia análisis, nütüjaapa saaʼu tü ayuulii nünainkat, nuluwataain tü nipinaseinjatkat. Müsia neʼe sukuwaʼipa tü waaʼinrakat sünain aküjaa pütchi, nnojotsü waküjain kasa eeka eein, shia waküjaka tü choʼujaakat sümüin wayuu wanaapünaa sümaa sukuwaʼipa otta tü sunoujakalü anain.

9. (1) ¿Kasa tü nnojoluinjatkat wamüin nüchiki wanee wayuu? (2) ¿Kasa anaka süpüla waaʼinrüin?

⁹ «Tatüjaa aaʼu nukuwaʼipa otta tü nunoujakalü anain», nnojoishii mamaatüinjanain waya nüchiki wanee wayuu (Prov. 18:13). Yootuinjana waya nümaa palajana süpüla watüjaain saaʼu jamüin nukuwaʼipa (Prov. 20:5). Eeshi süpüla wasakirüin nia sünain niʼyataain, sünain nüpüshi, jamüin nünüiki süchiki waneirua kasa. Eesü süpüla waaʼinrüin tia müleka anashiire shia namüin na wayuu waküjakana amüin pütchi. Waaʼinrüle tia, wayaawateerü aaʼu tü choʼujaakat namüin otta kachipünaajeerü waaʼin nakuwaʼipa maʼaka naaʼinrüin shia Jesuu (anasü paashajeʼerüle 1 Corinto 9:19-23).

10, 11. (1) Sünainjee tü sümakat 2 Corinto 4:7, 8, ¿jarat tü piamakat kasa waaʼinrüinjatka süpüla sümülialaain waaʼin naalin na wayuukana? (2) Püküja süchiki tü naaʼinrakat wanee wawala.

 ¹⁰ Tü piamakat kasa shia jülüjainjatüin waaʼin tü alatakat namüin na wayuukana. Waaʼinrüle tia, meena wayakai alatüin amüin tü alatakat namüin süka weʼrüinnain müliaa wanaa namaa (1 Cor. 10:13). Mayaainjeʼe kapüleein maʼin sümüin wayuu tü alatakat maaʼulu, yalayalasü waaʼin nutuma Jeʼwaa soʼunnaa tia (paashajeʼera 2 Corinto 4:7, 8). Kapüleʼereesia shia namüin na wayuu nnojoliikana eʼraajüin Maleiwa. Ojutuusü waaʼin sutuma weʼrüin namüliala, müsüjeseʼe wamülialüin naaʼin sükajee tü pütchi anasükat maʼaka naaʼinrüin shia Jesuu (Is. 52:7).

¹¹ Anuu tü alatakat nümüin wanee wawala Sergey nünülia. Süpülapünaa niʼraajüin Jeʼwaa, kapüleesü nümüin yootoo sümaa wayuu süka japüleʼein nia. Nikirajaaka sünain tü Wiwüliakat mapa. Anuu nünüiki: «Sutuma tekirajaain sünain tü Wiwüliakat, tayaawata aaʼu naküjainjanain pütchi sümüin wayuu na anoujashiikana. Isainjatia tachiki yootoo sümaa wayuu taaʼinruʼu». Jülüjapejeʼe naaʼin Sergey waneepia müliain naaʼin na wayuu nnojoliikana eʼraajüin Jeʼwaa. Anuu sooʼomüin nünüiki: «Talatüsü maʼin taaʼin jee anasü taaʼin sutuma tü tekirajaakalü anain. Tatüjaapejeʼe aaʼu choʼujaain tia namüin na wayuukana süpüla talatüinjatüin naaʼin». Sutuma niyaawatüin saaʼu tia, yalayalasü naaʼin süpüla nüküjainjachin pütchi. ¿Jamüsü nukuwaʼipa sutuma tia? «Anasü taaʼin sutuma jee katchinsü tanoula sutuma», müshi nia. *

12, 13. ¿Jamüsü nnojotka washapajeʼerüinjatüin naaʼin na wekirajüinkana? Püküja wanee sukuwaʼipa.

¹² Tü apünüinkat kasa shia nnojoluinjatüin washapajeʼerüin naaʼin na wekirajüinkana. Wainma tü kasa watüjakalü suluʼujee tü Wiwüliakat, akaajasaʼa nayakana eesü shiiwaʼarüle  naapüin süchiki tia. Eeshii na kottiraaka sümaa napüshi jee naʼaleewainyuu sutuma tü nakuwaʼipakat naashin. ¿Kasakaʼa waaʼinrüinjatüin süpüla wakaalinjain naya?

¹³ Anuu wanee sukuwaʼipa. Müleka laülaale wanee puente, akumajünüsü wanee shiiʼiraka. Shiasaʼa sümaʼinruʼu sujutaain tü jeketkat, ayatüsia alatünüin ooʼopünaa tü laülaasükat, waneʼereʼeya sujuichijaanüin kettaapa tü jeketkat. Müsia neʼe sukuwaʼipa süpüla nuuʼulaainjachin wanee wayuu suulia tü nukuwaʼipapuʼukat paala. Wekirajüinjachi nia palajana süpüla kojutuinjatüin nümüin tü sümakat tü Wiwüliakat süka jeketüin tia nümüin. Müle sukuwaʼipa watuma, eeshi süpüla nuuʼulaain suulia tü nukuwaʼipapuʼukat paala. Eesü kakaliale tia (Roma 12:2).

14, 15. Püküja wanee sukuwaʼipa süpüla sütüjaanüin aaʼu kepiainjatüin wayuu waneepia Paʼaraiisüpa tü Mmakat.

¹⁴ Nnojoliire kashapajaaraliin waya, nnojoleerü wapüleeruain naaʼin na wekirajüinkana süpüla nanoujamaatüin sünain tü wekirajakalü anain naya. Sümülialaale waaʼin naalin, wekirajeena naya süpüla nayaawatüin saaʼu shiimain tü sümakat tü Wiwüliakat, jaʼitashii kamaʼawalin waya sünain ekirajaa. Eeshii na nnojoliikana atüjaain saaʼu kepiainjanain na wayuukana waneepia yaa saaʼu tü Mmakat. Eeshiʼiya na anoujakana sünain müichimaʼaleeinjachin wanee wayuu outapa nia. Eetaashii na anoujakana sünain chainjanain iipünaa na wayuu anamiakana. ¿Kasa waaʼinrüinjatka süpüla nanoujain tü sümakat tü Wiwüliakat?

¹⁵ Anuu tü naaʼinrakat wanee wawala. Naashajeʼerüin palajana Génesis 1:28 jee nüsakirüin na wayuukana sünain jalainjatüin kepiain wayuu otta kasain nücheküin Maleiwa süpüleerua. «Kepiainjana saaʼu tü Mmakat sümaa talatüin naaʼin», eeshii na makana. Süchikijee tia, naashajeʼerüin Isaías 55:11 jee nüsakirüin naya ayatayürüle nücheküin Maleiwa tia süpüleerua wayuu. «Aa, ayatayülia nücheküin Maleiwa», müshii naya. Nuʼunajachipa, naashajeʼerüin Salmo 37:10, 11: «Saashin tü Wiwüliakat, ¿jalainjana kepiain na wayuukana mapeena?», müshi nia. Sutuma tia nümakat, nayaawata aaʼu na wayuukana kepiainjatüin wayuu waneepia Paʼaraiisüpa tü Mmakat.

16, 17. Sünainjee tü sümakat Proverbios 3:27, ¿kasa waaʼinrüinjatka süpüla wamülialaain naalin na müliakana aaʼin? Püküja tü saaʼinrakat wanee wawala.

¹⁶ Tü pienchikat kasa shia weeʼiyatüinjatüin nojutü na wayuu waküjakana amüin pütchi. Jamüshiijaʼa wantüle nipialuʼumüin wanee wayuu jee mojushiire shia nümüin, eesü süpüla waküjain nümüin wouyanteenain wachikuaʼa wataweena. Müleka choʼujaale nükaalinjünüin wanee wayuu jee isale nüchiki nujuʼitüin nipialuʼujee, waküja nümüin eein süpüla wakaalinjain nia (paashajeʼera Proverbios 3:27).

 ¹⁷ Anuu tü saaʼinrakat wanee wawala napüleerua waneinnua wayuu outakana achon. Anaajaashi chi nachonkai soʼuleʼeya tü kaʼi jemeikalü oʼu nia. Ashajüsü shia karaloʼuta namüin. Süneeküin waneirua wetsiikulo atütüleʼereetka naaʼin. ¿Jamakaʼa naaʼin na wayuu outakana achon? Anuu sünüiki tü wayuukot: «Mojushaatasü taaʼin aliikainka, sütanatpejeʼe waaʼin tü püshajakat wamüin. Isasü tachiki tü tanüikinjatkat pümüin, nnojotsü eein wanee kasa wanaaka sümaa tü paaʼinrakat wapüleerua. Kojuyatua taashajeʼerüin tia karaloʼutakat. Ponusü maʼin taaʼin tü sümakat, anashaatasü maʼin, akatsüinraasü waaʼin sutuma. Anashiʼiya müin waya pükaalinjain». Eeshiʼiya süpüla weʼrüin kasa anasü sünainjee wamülialaain naalin na müliakana aaʼin jee waaʼinrüle kasa anasü napüleerua.

18. ¿Kasa soteeka waaʼin waküjapa pütchi saashin 1 Corinto 3:6, 7?

¹⁸ Waküjapa pütchi, wakaalinjain na wayuukana süpüla neʼraajüinjachin Jeʼwaa, soteepajaʼa waaʼin niain neʼe Jeʼwaa chi lotokoi atuma nanoula (paashajeʼera 1 Corinto 3:6, 7). Nia Jeʼwaa ounejaka na wayuukana nünainmüin (Juan 6:44). Nayapejeʼe na wayuukana aneeküin müleka naapaainjanale sümaa tü aküjünakat namüin (Mat. 13:4-8). Watta naalii na wayuu nnojoliikana aapaain sümaa tü pütchi nüküjakat Jesuu, eerejeʼe nütüjain maʼin ekirajaa. Makalaka nnojoluinjatüin mojuin waaʼin nnojorüle naapaain na wayuukana sümaa tü pütchikat.

19. ¿Kasa anasü weʼreetka sümülialaale waaʼin naalin na waküjakana amüin pütchi?

¹⁹ Eʼreena waya kasa anasü müleka sümülialaale waaʼin naalin na wayuu waküjakana amüin pütchi. Talateerü waaʼin sünain aküjaa pütchi jee süka wakaalinjain wayuu. Naapaajeerü amaa tü pütchikat na wayuu «kettaakana süpüla katüin noʼu waneepia» (Aluw. 13:48, TNM). Sutuma tia, «anakaja waaʼinrüle [tü kasa anasükat] sümüin wayuu süpüshua» (Gal. 6:10). Müle shia watuma, talateerü waaʼin sünain waʼwaajüin Jeʼwaa, chi Washi iipünaajachikai (Mat. 5:16).