1. Iesu ena kara hereadaena ta be dahaka? Gwauraia hedinarai.

IESU ena kara hereadaena ta be, goevadae lasi taudia ese idia davaria hekwakwanai ia lalopararalaia diba. Ia be tanobada ai ia noho neganai, ‘idia moale taudia ida ia moale, bona idia taitai taudia ida ia taitai.’ (Roma 12:15) Hegeregere, iena hahediba taudia 70 be mai moale ida edia haroro gaukara idia karaia bona idia giroa lou. Unai negai, “Dirava ese Iesu dekenai lauma helaga ia henia, bona ia moale bada.” (Luka 10:17-21) Danu Iesu be Lasaro idia lalokau henia taudia edia lalohisihisi ia itaia neganai, “ena lalona ia hisihisi bada bona ia lalohekwarahi.”​—Ioa. 11:33.

2. Dahaka ese Iesu ia durua taunimanima edia hemami ia laloa bada totona?

² Herevana Iesu be goevadae tauna, to ia ese goevadae lasi taudia ia hebogahisi henia. Dahaka ese ia durua unai ia karaia totona? Gau ginigunana be, Iesu be taunimanima ia lalokau henia. Stadi atikol 12 ai ita herevalaia bamona, ia be ‘tanobada, mai ena noho taudia ibounai dekenai ia moale.’ (Aon. 8:31) Taunimanima ia lalokau henia dainai, unai ese ia durua edia hemami ia lalopararalaia totona. Aposetolo Ioane ia gwau: “Taunimanima ibounai edia kudouna ia diba vadaeni.” (Ioa. 2:25) Iesu be taunimanima ia hebogahisi henidia. Bona idia ia lalokau henia dainai, idia be mai moale ida Basileia ena sivarai idia abia dae. Iesu bamona, bema taunimanima ita hebogahisi henia, iseda haroro gaukara do ita karaia namonamo.​—2 Tim. 4:5.

3-4. (a) Taunimanima edia hemami ita laloa bada neganai, edena dala ai iseda haroro gaukara do ita laloa? (b) Inai stadi atikol ai dahaka do ita herevalaia?

³ Aposetolo Paulo ia diba, ia be mai ena maduna haroro gaukara ia karaia totona, bona unai be iseda maduna danu. (1 Kor. 9:16) To, namo lasi ita laloa iseda haroro gaukara be maduna ta bamona, to haida edia hemami ita laloa bada dainai haroro gaukara ita karaia. Bona ita hahedinaraia idia ita laloa bada bona ita  ura durudia. Ita diba “henia kara ena moale be bada, to abia kara ena moale be maragi.” (Kara 20:35) Bema unai bamona ita laloa, iseda haroro gaukara do ita moalelaia bada.

⁴ Inai stadi atikol ai, ita ese ma haida edia hemami laloa daladia do ita herevalaia. Ginigunana be, Iesu ese taunimanima ia laloa bada dalana amo ita dibaia gauna do ita itaia. Bena, ita ese iena haheitalai ita tohotohoa diba daladia foa do ita herevalaia.​—1 Pet. 2:21.

5-6. (a) Iesu be daidia edia hemami ia laloa bada? (b) Isaia 61:1, 2 ena peroveta herevana bamona, dahaka dainai Iesu be ia haroro henia taudia ia hebogahisi henidia?

⁵ Iesu ese ma haida edia hemami ia laloa bada dalana ta mani ita laloa. Iesu bona ena hahediba taudia be idia hesiku bada, badina sivarai namona idia harorolaia neganai idia laga-ani lasi. Danu idia be “nega lasi idia aniani totona.” Unai dainai Iesu ese iena hahediba taudia ia hadibaia, “taunimanima lasi gabuna dekenai” do idia lao bona do idia “laga-ani sisina.” To, hutuma bada be Iesu bona iena hahediba taudia do idia lao henia gabuna dekenai idia lao vadaeni. Iesu be unai gabu dekenai ia ginidae bona taunimanima ia itaia neganai, dahaka ia karaia? Ia ese “idia ia hebogahisi * henia, badina idia be mamoe naria tauna ese ia naria lasi mamoe bamona. Bona idia dekenai gau momo ia hadibaia matamaia.”​—Mar. 6:30-34.

⁶ Iesu ese hebogahisi ia hahedinaraia ena badina ita itaia, bona unai be ma haida edia hemami laloa bada karana. Iena hereva amo ia hahedinaraia, “idia be mamoe naria tauna ese ia naria lasi mamoe bamona.” Reana Iesu ia itaia idia haida be ogogami taudia bona edia ruma bese naria totona idia gaukara goada. Bona ma haida be reana edia ruma bese lalonai ta ia mase dainai idia lalohisihisi. Unai dainai Iesu be edia hekwakwanai ia lalopararalaia diba. Stadi atikol 12 ai ita herevalaia bamona, Iesu ena mauri ai reana unai bamona hekwakwanai haida ia mamia vadaeni. Iesu ese  taunimanima edia namo ia laloa bada bona idia dekenai sivarai namona ia harorolaia.​—Isaia 61:1, 2 duahia.

7. Edena dala ai Iesu ena haheitalai ita tohotohoa diba?

⁷ Iesu ena haheitalai amo dahaka ita dibaia? Iesu ena nega ai bamona, hari ita danu be “mamoe naria tauna ese ia naria lasi mamoe” bamona taudia huanai ita noho. Idia be hekwakwanai momo idia davaria noho. Ita ese idia ita hagoadaia totona, Basileia ena sivarai ita abia lao. (Apok. 14:6) Unai dainai iseda Biaguna ita tohotohoa anina be, manoka taudia bona ogogami taudia ita hebogahisi henidia bona sivarai namona ita harorolaia. (Sal. 72:13) Taunimanima ita hebogahisi henia dainai, ita ura gau ta ita karaia idia ita durua totona.

8. Haroro gaukara ai haida edia hemami ita laloa bada dalana ma ta be dahaka? Haheitalai gwauraia.

⁸ Dahaka ese ita do ia durua haroro gaukara ai ita davaria taudia edia hemami ita laloa bada totona? Haroro gaukara ai ita davaria taudia edia lalohadai bona hemami ita laloa be namo, bona ita ura ma haida ese ita idia kara henia hegeregerena idia ita kara henia. * (Mat. 7:12) Unai kara do ita hahedinaraia daladia foa mani ita herevalaia. Dala ginigunana be, taunimanima ta ta edia noho daladia ita laloa. Sivarai namona ita harorolaia neganai, iseda gaukara be doketa ta ena gaukara bamona. Doketa namona be gorere taudia ta ta edia hemami ia laloa. Ia ese idia dekenai henanadai ia henia bona edia hemami idia gwauraia neganai edia hereva ia kamonai namonamo. Ia ese gorere tauna ena gorere hanamoa totona maoromaoro muramura do ia henia lasi, to ia dekenai nega ia henia unai amo do ia diba gorere tauna durua totona muramura maorona do ia henia. Unai hegeregerena, iseda haroro gaukara ai ta ita davaria neganai, hamatamaia hereva dalana tamona ita badinaia lasi. To, ta ta edia noho daladia bona lalohadai ita laloa be namo.

9. Dahaka ita karaia lasi be namo? Gwauraia hedinarai.

⁹ Haroro gaukara ai ta oi davaria neganai, namo lasi oi laloa unai tauna ena noho dalana o ia abia dae gaudia bona ena badina oi diba. (Aon. 18:13) To, bema oi ura unai tauna bona ia abia dae gaudia oi dibaia, henanadai maorodia oi gaukaralaia. (Aon. 20:5) Bema emu gabu ai ruma tauna dekenai iena moni gaukara, ruma bese, iena mauri bona iena lalohadai totona henanadai henia karana be maoro, vadaeni unai oi karaia diba. Bema henanadai maorodia ita henia, edia haere amo sivarai namona idia ura diba ena badina do ita dibaia. Unai ita karaia neganai, ita ese edia hemami do ita lalopararalaia bona idia durua daladia do ita diba, Iesu ia karaia bamona.​—1 Korinto 9:19-23 hahegeregerea.

10-11. Korinto Iharuana 4:7, 8 ena hereva bamona, ma haida edia hemami laloa bada dalana iharuana be dahaka? Haheitalai ta gwauraia.

¹⁰ Dala iharuana be, edia hekwakwanai ita laloa. Taunimanima edia hekwakwanai ita lalopararalaia  be namo. Ita danu be goevadae lasi taudia dainai, hekwakwanai momo ita davaria noho. (1 Kor. 10:13) Ita diba hari inai negai mauri be ia auka momokani. To Iehova ena heduru amo unai hekwakwanai ita haheaukalaia diba. (2 Korinto 4:7, 8 duahia.) To, inai tanobada ai taunimanima momo be hekwakwanai momo idia davaria badina idia be Iehova idia tura henia lasi. Unai bamona taudia ita itaia neganai, ita hebogahisi henidia bona idia dekenai sivarai namona bona “hamauria herevana” ita gwauraia, Iesu ia karaia bamona.​—Isa. 52:7.

¹¹ Tadikaka ta ladana Sergey ena haheitalai mani ita laloa. Hereva momokani ia do dibaia lasi neganai ia be hemarai tauna, unai dainai ia auka taunimanima ia hereva henidia totona. To daudau lasi murinai, Baibel stadi ia abia dae. Sergey ia gwau: “Baibel lau stadilaia neganai, lau diba Keristani taudia edia maduna be ma haida dekenai edia abidadama idia gwauraia hedinarai be namo. Lau laloa unai do lau karaia diba lasi.” To, gabeai hereva momokani idia do diba lasi taudia ia laloa bona ia laloparara reana edia mauri ia auka badina Iehova idia diba lasi. Ia gwau: “Lau dibaia gaudia matamatadia dainai lau moale. Bona lau diba, ma haida ese hereva momokani idia dibaia danu be namo.” Sergey be ma haida edia hemami ia laloa bada matamaia neganai, unai ese ia durua haroro gaukara ai mai gari lasi ida taunimanima ia hereva henia totona. Sergey ia gwau: “Ma haida dekenai Baibel lau herevalaia neganai, ia auka lasi idia lau haroro henia totona. Bona ma haida dekenai lau abia dae gaudia herevalaia karana ese lau ia hagoadaia bada.” *

12-13. Dahaka dainai haroro gaukara ai mai haheauka ida ta ita hadibaia be namo? Haheitalai gwauraia.

¹² Dala ihatoina be, mai haheauka ida ta oi hadibaia. Namona be ita laloatao, ita ese Baibel amo ita dibaia hereva momokani haida be idia do diba lasi. Bona idia momo be do idia ura lasi idia abia dae gaudia idia rakatania. Reana do idia laloa edia tomadiho be mai anina bada badina unai ese edia ruma bese, edia kastom bona edia komiuniti ia durua. Edena dala ai idia ita durua diba?

 ¹³ Mani inai haheitalai ita laloa: Bema brij (bridge) ta be ia dika bona idia ura unai brij hanamoa totona, dahaka do idia karaia? Brij matamatana do idia karaia, bona unai idia karaia noho lalonai, taunimanima be brij gunana do idia gaukaralaia. Brij matamatana idia karaia haorea neganai, gunana do idia kokia. Unai hegeregerena, bema ta ita stadi henia bona ita hadibaia iena tomadiho amo ia dibaia gaudia ia rakatania totona, namona be ia ita durua guna, Baibel amo ia abia diba “matamata”​—unai be Baibel ena hahediba herevadia​—ia laloa bada bona badinaia totona. Unai murinai edia tomadiho amo idia dibaia gaudia idia rakatania diba. Bona namona be mai haheauka ida idia ita durua.​—Roma 12:2.

14-15. Edena dala ai Baibel amo ta ita durua tanobada paradaiso ai mauri hanaihanai helarona ia lalopararalaia namonamo totona? Haheitalai ta gwauraia.

¹⁴ Haroro gaukara ai mai haheauka ida taunimanima ita hadibaia neganai, namo lasi ita laloa Baibel ena hereva momokani be maoromaoro do idia lalopararalaia. To, ma haida edia hemami ita laloa bada dainai idia do ita durua Baibel ena hereva momokani idia lalopararalaia namonamo totona. Hegeregere, Baibel amo ta ita durua unai amo do ia diba mauri hanaihanai be tanobada paradaiso ai do ia vara. Taunimanima momo be unai hahediba herevana idia lalopararalaia namonamo lasi eiava idia diba lasi. Idia laloa ta ia mase neganai, do ia toreisi lou diba lasi. Eiava idia laloa kara namodia idia karaia taudia be guba dekenai do idia lao. Edena dala ai idia ita durua diba?

¹⁵ Tadikaka ta be Baibel amo taunimanima ia durua unai amo idia laloparara, mauri hanaihanai be tanobada paradaisona ai do ia vara. Dala ginigunana be Genese 1:28 ia duahia. Bena ruma tauna ia nanadaia, Dirava ia ura taunimanima be edeseniai do idia noho bona edena bamona mauri do idia moalelaia. Taunimanima momo edia haere be, “tanobada ai edia mauri do idia moalelaia.” Bena gabeai ia ese Isaia 55:11 ia duahia bona ruma tauna ia nanadaia, Dirava ena ura tanobada totona be ia idau eiava lasi. Nega momo ruma tauna ena haere be do ia gwau, lasi. Bona dokonai, tadikaka be Salamo 37:10, 11 ia duahia bona ruma tauna do ia nanadaia, vaira nega ai taunimanima be edena bamona mauri do idia moalelaia. Baibel ia gaukaralaia karana amo taunimanima momo ia durua, unai amo idia laloparara Dirava ia ura kara namodia idia karaia taudia be tanobada Paradaiso ai mauri hanaihanai do idia abia.

16-17. Aonega Herevadia 3:27 ena hereva ita laloa neganai, edena dala ai taunimanima edia hemami ita laloa bada? Haheitalai gwauraia.

¹⁶ Dala ihahanina be, taunimanima durua daladia ita laloa. Hegeregere, ita be ruma tauna ia bisi bada negana ai ia ita vadivadi henia, a? Ruma tauna dekenai sori herevana ita gwauraia bona ia ita hadibaia ia bisi lasi negana ai ita vadivadi diba. Bema ruma tauna be ia ura gaukara maragina ta ia karaia to heduru ia ura, dahaka do ita karaia? Eiava bema ta be gorere o buruka dainai ruma dekenai ia noho sibona, to reana ia ura sitoa dekenai ia lao, dahaka do oi  karaia? Unai bamona negadia ai, idia ita durua diba.​—Aonega Herevadia 3:27 duahia.

¹⁷ Taihu ta be kara namona ta ia hahedinaraia dainai anina namona ia vara. Ruma bese ta be edia beibi ia vara dinana ai ia mase, bona unai taihu be ma haida edia hemami ia laloa bada dainai, idia dekenai revareva ta ia siaia. Unai revareva lalonai lalona hagoadaia Baibel siridia ia torea. Unai revareva ese edena dala ai unai ruma bese ia hagoadaia? Unai beibi ena sinana be ena revareva ai ia gwau: “Varani egu dina be ia dika. To, emu revareva ese ai ia hagoadaia bada dainai oi ai tanikiu henia, emu kara namona do ai laloaboio lasi. Varani, reana nega 20 bamona unai revareva lau duahia. Emu kara namona bona hebogahisi karana ese ai ia hagoadaia bada. Tanikiu bada herea.” Momokani, bema haida edia hekwakwanai ita lalopararalaia, dala do ia kehoa unai amo gau ta do ita karaia idia ita durua totona.

18. Korinto Ginigunana 3:6, 7 ena hereva bamona, dahaka ita laloatao be namo, bona dahaka dainai?

¹⁸ Momokani, ita ura lasi haroro gaukara ai ita karaia diba lasi gaudia dainai ita lalohekwarahi. Ita ese taunimanima ita durua Dirava idia dibaia totona, bona unai be ita karaia diba gauna. (1 Korinto 3:6, 7 duahia.) To ita karaia diba lasi gauna be inai: Hereva momokani dekenai taunimanima ita veria mai diba lasi, to Iehova sibona ese unai do ia karaia. (Ioa. 6:44) Ta be sibona ena abia hidi ia karaia diba, sivarai namona do ia abia dae eiava do ia dadaraia. (Mat. 13:4-8) Laloatao, taunimanima momo ese Iesu​—⁠Hadibaia Tauna hereadaena​—ena hahediba herevadia idia abia dae lasi! Unai dainai namo lasi ita lalohisihisi, bema ita ura durua taudia be idia ura lasi sivarai namona idia abia dae.

19. Haroro gaukara ai ma haida edia hemami ita laloa bada neganai, dahaka anina namona do ia vara?

¹⁹ Bema iseda haroro gaukara ai haida edia hemami ita laloa bada, anina namona do ia vara. Iseda haroro gaukara bona henia kara ena namo do ita moalelaia bada. Bona ita ese “mauri hanaihanai idia ura kudou-maoro taudia ibounai” do ita durudia sivarai namona idia abia dae totona. (Kara 13:48) Unai dainai “dala ita davaria negadiai, namona be taunimanima ibounai dekenai kara namo ita karaia.” (Gal. 6:10) Bena mai moale ida iseda guba Tamana do ita hanamoa.​—Mat. 5:16.