1. Nama utai ti ngerinduka ati pasal Jesus? Terangka.

SITI utai ti ngerinduka ati pasal Jesus, iya nya, iya ulih meretika penanggul ke ditapi kitai. Lebuh Jesus ba bumi, iya “rami gaga enggau orang ke rami gaga,” sereta “nyabak enggau orang ke nyabak.” (Rom. 12:15) Ambika chunto, lebuh 70 iku bala murid iya gaga ati pulai ari nginjil, Jesus mega “gaga ati.” (Luk. 10:17-21) Pia mega, lebuh Jesus meda penusah ati orang pengudah Lasarus nadai, ‘ati iya balat sinu sereta tusah.’—Jhn. 11:33.

2. Nama utai ke meransang Jesus siruka orang?

² Taja pan Jesus nya orang ti sempurna, iya kasih sereta sinuka orang. Nama utai ke meransang iya ngereja nya? Baka ke dipadah ba artikel sebedau tu, iya rindu agi ke mensia. (J-lam. 8:31) Pengerindu iya ke mensia meransang iya nemu enggau manah chara mensia berunding. Ku rasul John madah pasal Jesus: ‘Iya empu nemu utai ti dalam ati semua mensia.’ (Jhn. 2:25) Jesus siruka orang. Orang ulih ngasaika pengerindu iya ke sida, lalu sida nerima pesan pasal Perintah Petara. Enti kitai siruka orang, kitai deka mujur agi ba pengawa nginjil.—2 Tim. 4:5.

3-4. (a) Enti kitai siruka orang, nama deka digaga kitai lebuh nginjil? (b) Nama deka dikerandauka kitai ba artikel tu?

³ Rasul Paul nemu iya patut nginjil, lalu pia mega enggau kitai. (1 Kor. 9:16) Taja pia, enti kitai siruka orang, kitai ukai semina ngumbai pengawa nginjil nya patut digaga. Kitai deka nunjukka diri ibuhka orang lalu keran deka nulung sida. Kitai nemu “beberekat agi orang ke meri, ari orang ke nerima.” (SKR. 20:35) Nya alai, enti kitai nginjil ketegal  deka nulung orang, kitai deka rindu agi enggau pengawa nginjil.

⁴ Ba artikel tu, kitai deka belajarka chara kitai ulih ngayanka penyiru lebuh nginjil. Tang sebedau nya, kitai deka beratika dulu asai ati Jesus ke orang. Udah nya, kitai deka berandauka empat iti chara kitai ulih neladan iya.—1 Pet. 2:21.

5-6. (a) Ngagai sapa Jesus ngayanka penyiru? (b) Nitihka Isaiah 61:1, 2, nama kebuah Jesus sinuka orang ti ditemu iya lebuh nginjil?

⁵ Peratika siti chara Jesus ngayanka penyiru. Bisi sekali, pengudah bebendar nginjil, Jesus enggau bala murid iya berasai amat lelak. Sida indah “nyau nadai peluang alai makai.” Nya alai, Jesus mai bala murid iya ngagai “endur ti sunyi” lalu “belelak dia enda lama.” Taja pia, orang mayuh udah dulu datai ba endur ke deka dituju sida. Nama digaga Jesus lebuh meda orang mayuh nya? ‘Iya sinu ati * ke sida, laban sida baka bedus ti nadai orang ngibun. Iya lalu belabuh ngajar sida mayuh macham utai.’—Mrk. 6:30-34.

⁶ Nama kebuah Jesus sinu, tauka siruka orang? Jesus beratika bala orang nya “baka bedus ti nadai orang ngibun.” Iya mega engka beratika sekeda sida nya seranta sereta bebendar gawa nyediaka utai ti diguna diri sebilik. Sida ke bukai engka tusah ati ketegal lenyau orang ti dikesayau. Enti pia, Jesus tentu meretika utai ke ditapi sida. Baka ke udah dikerandauka kitai ba artikel sebedau tu, Jesus empu engka kala napi penanggul ke baka nya. Jesus ibuhka orang, lalu deka mai pesan ti ngelantangka ati ngagai sida.—Bacha Isaiah 61:1, 2.

7. Baka ni kitai ulih neladan Jesus?

 ⁷ Nama ulih dipelajarka kitai ari teladan Jesus? Baka Jesus, kitai dikelingi orang ke “baka bedus ti nadai orang ngibun.” Sida napi mayuh penanggul. Tang kitai bisi pesan pasal Perintah Petara. (Pem. 14:6) Nya alai kitai neladan Jesus. Kitai nusui berita manah laban kitai “sinu ati ke orang ke lemi sereta seranta.” (Mas. 72:13) Kitai sinuka orang, lalu kitai deka nulung sida.

8. Baka ni chara kitai ulih ngayanka penyiru ngagai orang ke ditemu kitai lebuh nginjil? Padahka siti chunto.

⁸ Nama ulih nulung kitai ngayanka penyiru ngagai orang ke ditemu kitai lebuh nginjil? Kitai deka ngambarka utai ke dirunding sereta diasaika sida. Udah nya kitai ngereja ngagai sida baka ke dikedekaka kitai kereja orang ngagai kitai. * (Mat. 7:12) Aram kitai berandauka empat iti chara kitai ulih ngereja nya. Kesatu, berundingka utai ti diguna sida seiku-seiku. Kitai ulih mandingka utai ti digaga kitai lebuh nginjil enggau utai ke digaga lutur lebuh nulung pesakit. Lutur ti manah beratika utai ti diguna pesakit iya seiku-seiku. Iya ngena tanya lalu mendingka utai ti dipadah pesakit. Lutur nya enda terus madahka chara ngubat. Iya mansik penyakit nya dulu ngambika ulih nemu bansa penyakit nya kebendar iya. Udah nya baru iya madahka chara berubat. Pia mega enggau kitai. Kitai enda patut ngena chara ti sama lebuh ngepunka randau enggau tiap iku orang ke ditemu kitai lebuh nginjil. Tang, kitai deka beratika penanggul sereta runding sida seiku-seiku.

9. Nama utai ke enda tau digaga kitai? Nama chara ke patut dikena kitai?

⁹ Lebuh betemu enggau orang, kitai enda tau ngumbai diri nemu penanggul ke ditapi sida tauka utai ke dipechaya sida. (J-lam. 18:13) Kitai patut ngena tanya ngambika nemu pasal sida sereta utai ke dipechaya sida. (J-lam. 20:5) Kitai ulih nanya pasal kereja, diri sebilik, pengidup, sereta runding sida enti betanyaka utai baka tu enda salah ba menua kitai. Lebuh kitai ngena tanya, kitai ulih nemu utai ti diguna sida. Lalu tu ulih nulung kitai meri bantu ke diguna sida, baka ke digaga Jesus.—Banding 1 Korint 9:19-23.

10-11. Bepelasarka 2 Korint 4:7, 8, nama chara kedua kitai ulih ngayanka penyiru lebuh nginjil? Padahka siti chunto.

¹⁰ Kedua, gambarka baka ni pengidup sida. Kadang-kadang, kitai ulih meretika penanggul sida. Tu ketegal kitai bela enda sempurna,  lalu napi penanggul ti sama. (1 Kor. 10:13) Kitai nemu idup ba dunya ke dipegai Sitan enda senang. Kitai semina ulih betan ketegal saup ari Jehovah. (Bacha 2 Korint 4:7, 8.) Tang pikirka pasal orang ke nadai kaul ti rapat enggau Jehovah. Sida tentu tusah idup ba dunya tu laban nadai saup ari Jehovah. Baka Jesus, kitai sinuka sida lalu deka mai berita manah ke bekaul enggau utai ti manah agi.—Isa. 52:7.

¹¹ Peratika utai ke nyadi ngagai seiku menyadi Kristian lelaki ke benama Sergey. Sebedau belajarka pemendar, iya orang ke pemalu sereta enda tentu bejaku. Nyau kelama iya belajarka Bup Kudus. Ku Sergey: “Lebuh belajarka Bup Kudus, aku nemu orang Kristian patut madahka utai ti dipechaya sida ngagai orang bukai. Tang aku ngumbai diri enda ulih ngereja nya.” Taja pia, iya berundingka orang ke bedau kala ninga pasal pemendar. Iya nemu pengidup sida balat tusah laban sida enda ngelala Jehovah. Ku Sergey nampung: “Utai baru ke dipelajar ngasuh aku berasai gaga sereta idup lantang. Aku nemu orang bukai mega patut nemu pasal pemendar.” Lebuh penyiru Sergey nambah, iya berani agi nginjil. Ku Sergey agi: “Aku alit ati laban berandau pasal Bup Kudus enggau orang ngasuh aku andal agi ke diri empu lalu berandau enggau orang pasal utai ke dipechaya aku negapka pengarap aku.” *

12-13. Nama kebuah kitai patut sabar lebuh ngajar orang? Padahka siti chunto.

¹² Ketiga, sabar enggau orang ke diajar nuan. Kingatka, sida nadai kala berunding pasal pemendar Bup Kudus. Lalu mayuh ari sida rinduka utai ti dipechaya sida. Sida ngumbai pengarap sida ngempung adat, bansa, sereta diri sebilik. Baka ni kitai ulih nulung sida?

 ¹³ Ambika chunto: Nama penyadi lebuh jematan ke lama deka diganti enggau iya ke baru? Jematan ke lama agi mengkang dikena taja pan orang benung ngaga iya ke baru. Pengudah jematan ke baru tembu digaga, nya baru iya ke lama dibuai. Pia mega, enti kitai deka orang ninggalka utai ti balat dipechaya sida, kitai patut dulu nulung sida arapka pemendar ari Bup Kudus ke enda kala ditemu sida. Udah nya baru sida ulih sedia ninggalka utai ke dipechaya sida suba. Sida endang begunaka awak enti deka ngaga ubah.—Rom. 12:2.

14-15. Baka ni kitai ulih nulung orang ke semina nemu mimit aja tauka enda nemu nama-nama pasal peluang idup belama iya ba bumi? Padahka siti chunto.

¹⁴ Enti kitai sabar lebuh ngajar sida pasal Bup Kudus, kitai enda ngarapka sida terus mereti tauka nerima ajar Bup Kudus nya. Tang penyiru meransang kitai nulung sida belubah-lubah berundingka utai ke dipadah ba Bup Kudus. Ambika chunto, pikirka baka ni nuan ulih nulung orang meretika ajar Bup Kudus pasal peluang idup belama iya ba bumi paradais. Mayuh orang semina nemu mimit aja tauka enda nemu nama-nama pasal ajar tu. Sida engka ngumbai pengudah orang mati, orang nya enda ulih idup agi ba dunya tu. Tauka sida engka ngumbai semua orang ke manah niki ke serega pengudah mati. Baka ni kitai ulih nulung sida?

¹⁵ Seiku menyadi Kristian lelaki madahka chara ke dikena iya nulung orang meretika ajar Bup Kudus. Keterubah, iya macha Pemungkal 1:28. Udah nya, iya nanya orang ke bempu rumah pasal dini alai sereta baka ni gaya pengidup ke dikedekaka Petara ke mensia. Mayuh orang nyaut, “Petara deka sida ngembuan pengidup ti lantang ba bumi.” Udah nya iya macha Isaiah 55:11 lalu nanya sekalika tuju Petara nya berubah tauka enda. Kesuah agi, orang ke bempu rumah nyaut enda. Kepenudi, iya macha Masmur 37:10, 11 lalu nanya baka ni gaya pengidup mensia jemah ila. Enggau chara tu, iya udah nulung beberapa iku orang nemu, Petara agi deka orang ti manah diau belama iya ba bumi Paradais.

16-17. Nitihka Jaku Dalam 3:27, nama sekeda chara kitai ulih ngayanka penyiru? Padahka siti chunto.

¹⁶ Keempat, chara ngayanka pengibuh. Ambika chunto, kati kitai kala datai ba maya lebuh orang ke bempu rumah benung kisuk? Kitai ulih minta ampun lalu madahka diri deka datai baru ba maya bukai. Baka ni enti orang ke bempu rumah begunaka bantu ngereja utai ti mit? Tauka baka ni enti orang ke bempu rumah nya enda ulih pansut ari rumah ketegal sakit tauka tuai lalu begunaka tulung ngereja siti-siti utai? Nuan ulih nulung sida.—Bacha Jaku Dalam 3:27.

 ¹⁷ Seiku menyadi Kristian ke indu bulih asil ti manah pengudah ngereja utai ti manah ke engka dikumbai orang enda tentu berat. Ketegal penyiru, iya nulis surat ngagai siti ruang bilik ke udah nadai anak ke agi mit. Surat nya bisi jaku peransang ari Bup Kudus. Baka ni asai ati ruang bilik nya? Ku indai ke tusah ati madah dalam surat: “Aku balat tusah ati kemari. Surat ke ditulis nuan amat meransang kami. Aku beterima kasih laban surat nuan ngelantangka ati kami. Lebih 20 kali aku macha surat nya kemari. Surat nya nunjukka penyiru, pengibuh, sereta meransang ati. Terima kasih.” Kitai mega tau bulih asil ti manah enti kitai nguji meretika pemerinsa ke ditapi orang, lalu ngiga chara kena nulung sida.

18. Nitihka 1 Korint 3:6, 7, nama patut dikingatka kitai bekaul enggau nulung orang belajar pasal Petara? Nama kebuah kitai patut ingatka nya?

¹⁸ Lebuh nginjil, kitai ulih nulung orang belajar pasal Petara. Taja pia, kitai patut ingat, iya kebendar Jehovah ke nulung sida belajar. (Bacha 1 Korint 3:6, 7.) Jehovah ke narit orang ngagai Iya. (Jhn. 6:44) Sekalika orang nerima berita manah tauka enda, nya bepanggai ba ati sida seiku-seiku. (Mat. 13:4-8) Kingatka, mayuh orang enggai nerima pesan ke dibai Jesus taja pan iya Pengajar ti pemadu badas! Nya alai, kitai anang lemi semengat enti orang enggai mendingka pesan ke dibai kitai.

19. Nama asil ke diulih enti kitai ngayanka penyiru lebuh nginjil?

¹⁹ Nama asil ke diulih enti kitai ngayanka penyiru lebuh nginjil? Kitai deka rindu agi nginjil. Kitai mega deka gaga ati ketegal meri. Lalu kitai nulung orang ke “bisi pengingin deka bulih pengidup ti meruan belama iya” nerima berita manah. (SKR. 13:48, NW) Nya alai, “genap kali kitai bisi peluang, kereja pengawa ti badas ngagai semua orang.” (Gal. 6:10) Udah nya kitai deka bulih pengaga ketegal ngemuliaka Apai kitai ti di serega.—Mat. 5:16.