1. Anni i tadday ta pinaka-makatukkal ta futu nga aspeto na personalidad ni Jesus? Iyesplika.

TADDAY ta pinaka-makatukkal ta futu nga aspeto na personalidad ni Jesus ay i abilidadna nga malippawa i problema tam nga imperfekto nga totolay. Ta kegga ni Jesus ta davvun, ‘makipappagayayya yayya ta magayayya ira,’ anna ‘makipaddaraddam yayya ta maraddam.’ (Roma 12:15) Angngariganna, turi ta magayayya nga nanoli i 70 nga disipulosna kabalin na produktibo nga pallayyagayyada, “nepallo i pagayaya ni Jesus.” (Luc. 10:17-21) Ngem, turi ta nasinganna i daddam danuri mangiddu kani Lazaro megafu ta patena, “nepallo i daddam na.”​—Juan 11:33.

2. Anni i nakoffun kani Jesus nga makipattageno ta totolay?

² Maski nu perfekto nga tolay si Jesus, minaggallallo anna minangngikabbi yayya ta imperfekto nga totolay. Anni i nakoffun nisa nga mabbalin tu kunnatun? I pinaka-importante nga nakoffun nisa ay i ayana ta totolay. Gitta na nakagi ta nappasa nga artikulo, ‘netallugaring nga kakayà na i ána na totolay.’ (Prov. 8:31) Yatun nga aya i namaguyu sa nga talaga ammuan tu mapia i totolay. Niyesplika ni apostol Juan: “Ammu na i kata-katolay da.” (Juan 2:25) Kuruga dakal i pangikallo ni Jesus ta totolay. Natagenoda i ayana nira yari tu nagginna ira ta mensahe na Pappatulan. Nu mas makultiba tam i kunnatun nga pangikallo ta totolay, mas moffunattam ira nu layyagayyattam ira.​—2 Tim. 4:5.

3-4. (a) Nu egga i pakipattageno tam, kunnasi tam imammatan i ministerio tam? (b) Anni i gigiammuattam taw nga artikulo?

³ Ammu ni apostol Pablo nga mawagna nga mallayyagayya, kunne na gapa nittam. (1 Cor. 9:16) Ngem nu egga i pakipattageno tam, imammatattam nga ari laman nga obligasion i ministerio.  Kayà tam ipasingan nga ikavurungattam i totolay anna kakayà tam ira nga uffunan. Ammu tam nga “mas dakal i pagayaya ta pangiyawa anne ta pangalawa.” (King. 20:35) Nu imammatattam tu kunnatun i ministerio tam, mas kakayà tam i mallayyagayya.

⁴ Taw nga artikulo, gigiammuattam nu kunnasi makipattageno ta ministerio tam. Innattam labbi nu anni i magigiammu tam ta pakipattageno ni Jesus ta totolay. Tapus, ikonsidera tam i appa nga gannug tapenu maparigattam i ehemplona.​—1 Ped. 2:21.

5-6. (a) Sinni i nangipasingannan ni Jesus tu pakipattageno? (b) Ngatta nikallo ni Jesus danuri layyagayyanna, kagitta na mabibbig ta Lucas 4:18, 19?

⁵ Ikonsidera tam nu kunnasi nakipattageno si Jesus. Mittan, nababbannag si Jesus anna i disipulosna megafu ta tulu-tuloy ira nga nallayyagayya. “Ari ngana nga matangngaw ni Jesus tuange ta disipulo na ira i kuman.” Yari tu niyangay ni Jesus i disipulosna “ta malamma-lammo nga lugar nga ira-ira laman,” tapenu ‘magibannag ira tu manganannuan.’ Ngem nakkakarela i totolay anna nakadde ira tu ollu ta angyanan da Jesus. Ta paddattal da tari anna ta pakasingan ni Jesus ta totolay, anni i natagenona anna anni i kingnguana? “Ziminatu i allo * na nira megafu ta kagitta da i karneru nga napagurayan nga awan tu manaron nira. Megafu taw pinegafuanan na ira nga sinudduan tu aru nga ganna-gannug.”​—Mar. 6:30-34.

⁶ Ngatta nikallo, onu nikavurung ni Jesus danaw nga totolay? Gafu ta “kagitta da i karneru nga napagurayan nga awan tu manaron nira.” Awayyana nga nasingan ni Jesus nga pobre i karuan nira anna fermi i zigada nga mattrabahu para ta familiada. Puede gapa nga maddaddam i karuan gafu ta natayan ira. Nu kunna, siguradu nga malippawa ni Jesus i situasiodda. Gitta na nagigiammu tam ta nappasa nga artikulo, nappasan ni Jesus  danatun. Nikavurung ni Jesus i tanakuan anna napaguyu yayya nga banna-bannayan ira.​—Bibbigan i Lucas 4:18, 19.

7. Kunnasi tam maparigan i ehemplo ni Jesus?

⁷ Anni i magigiammu tam ta ehemplo ni Jesus? Kagitta ni Jesus, napalevutan ittam na totolay nga “kagitta da i karneru nga napagurayan nga awan tu manaron nira.” Kakkaru i problemada. Egga nittam i mawagda​—i mensahe na Pappatulan. (Nep. 14:6) Yari tu parigattam i Yafu tam anna ilayyagayya tam i mapia nga dumug megafu ta ‘ikallo tam i makafi anna mariga ira.’ (Sal. 72:13) Ikallo tam i totolay, anna kayà tam ira nga uffunan.

8. Anni i tadday nga makua tam tapenu makepasingan tu pakipattageno ta ministerio? Mangiyawa tu ilustrasion.

⁸ Anni i makoffun nittam tapenu makepasingan tu pakipattageno ta layyagayyattam? Ipay tam i baggi tam ta makibbida tam ira ta ministerio anna kayà tam ira tratuan nga kunna kayà tam nga katratu nu sittam i egga ta situasiodda. * (Mat. 7:12) Ikonsidera tam i appa nga gannug tapenu makua tam yatun. Ollu, nonopan i pakawagan na kada indibidual. Mekumpara tam i pallayyagayya tam ta kuan na doktor tapenu uffunan i pasientena ira. Ikonsidera na malalaki nga doktor i pakawagan na kada pasiente. Makkiavu yayya anna ginnanna tu mapia i pasiente durante nga kagianna i mataga-tagenona. Imbes nga marreseta insigida tu medisina, awayyana nga obserban labbi i sintomas na pasiente tapenu meresetana i mepangngo nga medisina. Kunne na gapa, ari nakuan tu para-parehu i istilo na pallayyagayya tam ta kada masimmuattam ta ministerio. Lallagu, alippawatattam i situasion anna i pagimamma na kada tolay.

9. Anni nakuan i ibita tam nga konklusion? Iyesplika.

⁹ Nu egga i masimmuammu ta ministerio, ari makkonklusion nga ammum ngana i situasionna onu i kuruganna ira anna nu ngatta kuruganna yatun. (Prov. 18:13) Lallagu, mataktika nga makkiavu tapenu makilala yayya anna mammuan i kuruganna ira. (Prov. 20:5) Nu mepangngo ta kulturanu, iyavu i meyannung ta trabahu, familia, ekspiriensa, anna i pagimammana ira. Nu makkiavu ittam, makannammuattam nu anni talaga i mawagda. Sonu ammu tam ngana, makepasingan ittam ngana tu pakipattageno ta espesipiko nga kawagadda anna moffunan ira, gitta na kingngua ni Jesus.​—Ikumpara i 1 Corinto 9:19-23.

10-11. Mekunnay ta 2 Corinto 4:7, 8, anni i mekadua nga makua tam tapenu makepasingan tu pakipattageno? Mangiyawa tu angngarigan.

¹⁰ Mekadua, imajinan i klase na pattoleda. Malippawa tam gapa i situasiodda. Imperfekto ittam yari tu egga gapa i problema tam nga kagittada.  (1 Cor. 10:13) Ammu tam nga mariga i pattolay ta maddaggun nga sistema. Makapagattam ittam laman gukaban na uffun ni Jehova. (Bibbigan i 2 Corinto 4:7, 8.) Ngem nonopan danuri awan tu meggo nga relasiodda kani Jehova. Siguradu nga marigatan ira nga mattolay taw nga mundo nu awan tu uffunna. Kagitta ni Jesus, ikallo tam ira, anna mapaguyu ittam nga ikagi nira i “mapia nga dumug na gannug nga mas makasta.”​—Isa. 52:7.

¹¹ Ikonsidera i ekspiriensa na brother nga si Sergey. Nigena nabbalin tu Saksi, minappasirang yayya anna ari kuruga mattattannug. Marigatan yayya nga makiyuvovug ta tanakuan. Tapus, inalawana i paggigiammu ta Biblia. “Durante nga mab-Bible study ngà, nagigiammù nga egga i obligasion na Cristiano ira nga ilayyagayya i kurugadda ira,” kunni Sergey. “Kumbinsidu ngà nga kakku vuluvuga nga makua yatun.” Ngem, nanonona danuri ari paga nakaginna ta kinakurug anna nalippawana nga miserable i pattoleda megafu ta ariadda paga ammu si Jehova. “Magayayya anna memammo ngà megafu ta bagu ira nga gannug nga nagigiammù,” kunna. “Ammù nga mawag gapa nga magigiammu na tanakuan i kinakurug.” Turi ta ziminakal i pangikallo ni Sergey, nasinganna nga mas naggutu yayya nga mallayyagayya. “Nakaddag ngà,” kunni Sergey, “mas nakkomfiansa ngà gafu ta pangilayyagayya meyannung ta Biblia. Mas nassikan i pangurug ku megafu ta pangikagì ta pangurug ku ta tanakuan.” *

12-13. Ngatta mawag nga pasensiattam danuri tudduattam ta ministerio? Iyilustra.

¹² Mekatallu, pasensian danuri tudduammu. Daddamman, awayyana nga ariadda paga matindian i karuan ta kinakurug ta Biblia nga ammu tam. Onu talaga aru nira i kumbinsidu ta kuru-kurugadda. Matagenoda nga importante i relihiodda tapenu maddukko ira ta familiada, ta kulturada, anna ta lugarda. Kunnasi tam ira moffunan?

¹³ Nonopan yaw nga pangikumpara: Anni i mesimmu nu mawag nga matalianan ngana i  dana anna maggugguyag nga tetay? Durante nga mapadday i bagu nga tetay, maruddu nga meyusa paga i dana. Sonu nabalin ngana i bagu nga tetay, awayyana ngana nga madabba i dana. Kunne na gapa, nu kayà tam nga ibbattan na totolay i tagibaloradda nga “dana” nga kuru-kurugan, awayyana nga uffunattam labbi ira nga mamadday tu matuyag nga appresasion ta “bagu” ira nga kinakurug—tuttuddu ta Biblia nga kadda ammu turi ta nigafu tam ira nga tudduan. Tatun laman nga tiempo nga agga-paradda ngana nga panawan i dati nga kuru-kurugadda. Awayyana nga mawag i tiempo tapenu moffunan i totolay nga kuan i kunnatun nga panguli.​—Roma 12:2.

14-15. Kunnasi tam moffunan danuri baddi onu awan tu ammuda ta mannanayun nga inango ta paraiso nga davvun? Mangiyawa tu angngarigan.

¹⁴ Nu mapasensia ittam ta totolay ta ministerio, ariattam ekspektan nga matindian onu alawatadda i kinakurug ta Biblia ta ollu nga pakaginnada tatun. Paguyuan lallagu ittam na pakipattageno nga uffunan ira nga sisinu nga matindian tu mapia i kakkagian na Biblia. Angngariganna, nonopan nu kunnasi tam moffunan i tolay nga alippawatan i iddanama nga mannanayun nga pattolay ta paraiso nga davvun. Aru i ari makannammu onu baddi i ammuda tatun nga tuddu. Baka kurugadda nga nu matay i tolay, arianna ngana awayya nga mattolay uli. Onu baka mangurug ira nga umay ta langi i ngamin nga masippo. Kunnasi tam ira moffunan?

¹⁵ Niyistoria na tadday nga brother i efektibo nga istilona. Ollu, bibbiganna i Genesis 1:28. Tapus, iyavuna ta makabbalay nu sitaw i kayà na Dios nga paddianan na tolay anna nu anni nga klase na pattolay i kayàna para nira. Aru i tubbag, “Kayàna ira nga magayayya nga mattolay ta davvun.” Tumunug, bibbigan na brother i Isaias 55:11 anna iyavuna nu nanguli kari i gakkag na Dios. Maruddu nga kagian na makabbalay tu ari. Ta ultimuna, bibbigan na brother i Salmo 37:10, 11 anna iyavuna nu anni i mesimmu ta totolay ta mappange. Gukaban na kunnaw nga pangusa ta Biblia, aru i noffunanna nga alippawatan nga kayà lagapa na Dios nga mannanayun nga mattolay ta Paraiso nga davvun danuri masippo.

16-17. Nu sigga-nono tam i Proverbio 3:27, anni ira i makua tam tapenu ipasingan i pakipattageno? Mangistoria tu angngarigan.

¹⁶ Meka-appa, mannono nu anni ira i makuam tapenu masingan na tolay nga ikavurungammu ira. Angngariganna, nekanna kari nga ari mepangngo i tiempo na pinabbisita tam? Makidispensa ittam anna kagian nga manoli ittam sonu tumunug. Kunnasi nu magawag i makabbalay tu simple nga uffun? Onu kunnasi nu ari yayya makapanaw ta balay gafu ta mataki onu manakam ngana yayya tapus kawaganna i uffun? Tatun ira nga situasion, awayya tam nga uffunan yatun nga tolay.​—Bibbigan i Proverbio 3:27.

 ¹⁷ Egga tadday nga sister nga makasta i efekto na simple nga pangipasinganna tu kinasippo. Napaguyu yayya na pakipattageno nga mattura ta tadday nga familia nga natayan tu ana. Nepay ta tura i makapabannay ira nga teksto na Biblia. Anni i efekto natun ta familia? “Miserable i aggò ta nappasa nga aggaw,” nitura na maddaddam nga yena. “Kammu laman ammu nu kunnasi kadakal i neyuffun nikami na tura mu. Mappappabalo ngà ta tura mu nga talaga namanna-bannay nikami. Ari laman tu namibbentè nga binibbig yatun kagabi. Anni ngana mabba i sippo, pangiddu, anna pamasikan natun. Iyaddemi nikaw i napafutuan nga appabalomi.” Awan tu duda nga makasta ira i efektona nu alippawatattam i ziga danuri maddaddam anna nu uffunattam ira.

18. Mekunnay ta 1 Corinto 3:6, 7, anni nga balanse nga pagimamma i kayà tam nga pattalupaddianan?

¹⁸ Siempre, kayà tam nga pattalupaddianan nga balanse i pagimamma tam ta papel tam ta ministerio. Egga i papel tam ta panguffun ta tanakuan nga makannammuan i Dios, ngem ari tu sittam i pinaka-importante i papelna. (Bibbigan i 1 Corinto 3:6, 7.) Si Jehova i mangiyaranni ta totolay nisa. (Juan 6:44) Puede nga alawatan onu ari alawatan na tolay i mapia nga dumug depende ta kondision na futuna. (Mat. 13:4-8) Daddamman nga magaru i ari nangalawa ta mensahe ni Jesus​—maski nu yayya i kalalakian nga Mestru ta ngamin! Yayya nga ari nakuan nga makkafi i nono tam nu ari tu makasta i pangalawa danuri totolay nga uuffunattam.

19. Anni ira i makasta nga efekto nittam nu makipattageno ittam ta ministerio?

¹⁹ Makasta i efekto nittam nu makipattageno ittam ta ministerio. Mas magayayya ittam ta ministerio tam. Maekspiriensa tam i mas dakal nga pagayayya gafu ta pangiyawa. Mas paga nga kuattam tu alappaw para turi ira ta “mepangngo nga mangalawa tu mannanayun nga inango” nga akseptan i mapia nga dumug. (King. 13:48, NW) Yayya nga “kada makalugar ittam, kuat-tam i mapia ta ngamin nga ikattolay tam.” (Gal. 6:10) Mapeggan ittam paga tu pagayayya gafu ta medayaw tam i nelangitan nga Yama tam.​—Mat. 5:16.