1. Ania ti maysa kadagiti nagsayaat a paset ti personalidad ni Jesus? Ilawlawag.

TI MAYSA kadagiti nagsayaat a paset ti personalidad ni Jesus ket ti abilidadna a mangtarus kadagiti problematayo nga imperpekto a tattao. Idi adda ditoy daga, ‘nakipagragsak kadagidiay naragsak’ ken ‘nakipagsangit kadagidiay agsangsangit.’ (Roma 12:15) Kas pagarigan, idi nakaragragsak a nagsubli ti 70 nga adalanna kalpasan ti naballigi a panangasabada, “napno ni Jesus iti nasantuan nga espiritu isu a napalalo ti ragsakna.” (Luc. 10:17-21) Ngem idi nakita ni Jesus ti epekto ti ipapatay ni Lazaro kadagiti mangipatpateg kenkuana, “nagasug ti pusona ket naladingitan.”​—Juan 11:33.

2. Ania ti nakatulong ken Jesus a mangipakita iti simpatia kadagiti tattao?

² Apay a napalalo ti asi ken pannakipagrikna daytoy a perpekto a tao kadagiti managbasol a tattao? Umuna, ay-ayaten ni Jesus dagiti tattao. Kas nadakamat iti napalabas nga artikulo, ‘nangnangruna a pakaragsakanna dagiti annak ti tattao.’ (Prov. 8:31) Dayta nga ayatna ti nakatignayanna a mangammo a naimbag no kasano ti panagpampanunot dagiti tattao. Inlawlawag ni apostol Juan: “Ammona ti adda iti puso ti maysa a tao.” (Juan 2:25) Mannakipagrikna ni Jesus. Narikna dagiti tattao ti ayatna isu a dimngegda iti mensahe ti Pagarian. No adda kasta a panangngaasitayo kadagiti tattao, mas epektibo ti ministeriotayo.​—2 Tim. 4:5.

3-4. (a) No adda simpatiatayo, ania ti panangmatmattayo iti ministeriotayo? (b) Ania ti usigentayo iti daytoy nga artikulo?

³ Ammo ni apostol Pablo nga obligasionna ti mangasaba, ket ammotayo met dayta. (1 Cor. 9:16) Ngem no adda simpatiatayo,  saantayo nga ibilang ti ministeriotayo kas obligasion laeng. Kayattayo a paneknekan a maseknantayo kadagiti tattao ken magagarantayo a tumulong kadakuada. Ammotayo a “naragragsak ti mangted ngem ti umawat.” (Ara. 20:35) No kasta ti panangmatmattayo iti ministeriotayo, ad-adda met a matagiragsaktayo dayta.

⁴ Iti daytoy nga artikulo, usigentayo no kasano nga ipakita ti simpatia iti ministeriotayo. Umuna, ammuentayo ti maadaltayo iti narikna ni Jesus kadagiti tattao. Sa usigentayo ti uppat a pamay-an a matuladtayo ti ulidanna.​—1 Ped. 2:21.

5-6. (a) Siasino dagiti impakitaan ni Jesus iti simpatia? (b) Apay a naasian ni Jesus kadagiti tattao a kinasabaanna, kas naipadto iti Isaias 61:1, 2?

⁵ Usigentayo ti maysa a pagarigan no kasano nga impakita ni Jesus ti simpatia. Naminsan, mangaskasaba ni Jesus ken dagiti adalanna ket awan pay ti inanada. “Dida payen masango ti mangan.” Isu nga impan ni Jesus dagiti adalanna iti ‘awan matataona a lugar nga is-isuda’ tapno ‘aginanada biit.’ Ngem adu a tattao ti immun-una a napan iti papanan ni Jesus ken dagiti adalanna. Ania ti narikna ni Jesus idi nakitana dagiti tattao sadiay, ken ania ti inaramidna? “Naasian * kadakuada ta kasda la karnero nga awanan pastor. Isu nga insurona ida iti adu a banag.”​—Mar. 6:30-34.

⁶ Paliiwem ti rason no apay a naasian ni Jesus, a mangipakita iti simpatiana. Naobserbaranna a dagiti tattao ket “kasda la karnero nga awanan pastor.” Mabalin a nakita ni Jesus a dadduma kadakuada ti napanglaw ken marigrigatan nga agtrabaho para iti kasapulan ti pamiliada. Nalabit natayan ti dadduma. No kasta, mabalin a natarusan ni Jesus ti situasionda. Kas nailawlawag iti napalabas nga  artikulo, mabalin a napadasan ni Jesus ti dadduma kadagita a problema. Maseknan iti sabsabali isu nga imbagana kadakuada ti makaliwliwa a mensahe.​—Basaen ti Isaias 61:1, 2.

7. Kasanotayo a matulad ti ulidan ni Jesus?

⁷ Ania ti maadaltayo iti ulidan ni Jesus? Kas ken Jesus, napalawlawantayo kadagiti tattao a kasla “karnero nga awanan pastor.” Adu ti problemada. Adda kadatayo ti kasapulanda​—ti mensahe ti Pagarian. (Apoc. 14:6) Kas panangtuladtayo iti Apotayo, ikaskasabatayo ti naimbag a damag gapu ta “maasian[tayo] kadagiti marigrigat ken napanglaw.” (Sal. 72:13) Maasiantayo kadagiti tattao, ket kayattayo a tulongan ida.

8. Ania ti maysa a pamay-an a maipakitatayo ti simpatia iti ministerio? Iyilustrar.

⁸ Ania ti makatulong kadatayo a mangipakita iti simpatia kadagiti kasabaantayo? Kayattayo a riknaen ti marikrikna dagiti kaskasabaantayo ken tratuentayo ida kas iti kayattayo a pannakatratotayo. * (Mat. 7:12) Usigentayo ti uppat nga espesipiko a pamay-an a maaramidtayo dayta. Umuna, panunotem ti kasapulan ti tunggal indibidual. No ikasabatayo ti naimbag a damag, kaslatayo iti maysa a doktor. Ti nalaing a doktor ikabilanganna ti kasapulan ti tunggal pasiente. Agsaludsod ken dumngeg a naimbag bayat nga ibagbaga ti pasiente ti situasion wenno marikriknana. Imbes a dagus a mangireseta iti agas, mabalin a paliiwenna nga umuna ti pasiente sa ibagana ti umiso nga agas. Umasping iti dayta, saan koma nga agpapada ti pamay-antayo a mangirugi iti pannakisarita kadagiti kasabaantayo. Imbes ketdi, ikabilangantayo ti mismo a situasion ken panangmatmat ti tunggal indibidual.

9. Ania koma ti saantayo nga ipapan? Ilawlawag.

⁹ No adda makasaritam iti ministerio, dimo ipapan nga ammomon ti situasionna wenno ti patpatienna ken no apay a patienna dayta. (Prov. 18:13) Imbes ketdi, sitataktika nga agsaludsodka tapno maammuam dagita. (Prov. 20:5) No maitutop, agsaludsodka maipapan iti trabaho, pamilia, kapadasan, ken kapanunotanna. No agsaludsodtayo, isuda a mismo ti mangibaga no apay a kasapulanda ti naimbag a damag. No ammotayon dayta, mabalintayon ti makisimpatia ken mangipaay iti tulong a kasapulanda, kas iti inaramid ni Jesus.​—Idilig ti 1 Corinto 9:19-23.

10-11. Maitunos iti 2 Corinto 4:7, 8, ania ti maikadua a pamay-an a maipakitatayo ti simpatia? Mangted iti pagarigan.

¹⁰ Maikadua, padasem a panunoten ti posible a kasasaadda. Nalabit adda pagpadaan  ti situasionda iti situasiontayo. Imperpektotayo isu nga adda met dagiti problematayo. (1 Cor. 10:13) Ammotayo a nakarigrigat ti biag iti daytoy a sistema. Makapagibturtayo laeng iti tulong ni Jehova. (Basaen ti 2 Corinto 4:7, 8.) Ngem panunotem dagidiay awanan iti nasinged a relasion ken Jehova. Sigurado a marigrigatanda nga agbiag iti daytoy a lubong. Kas ken Jesus, maasiantayo kadakuada, isu a matignaytayo a mangidanon iti “naimbag a damag maipapan iti nasaysayaat a banag.”​—Isa. 52:7.

¹¹ Kitaentayo ti kapadasan ti brother nga agnagan Sergey. Managbabain unay sakbay a naammuanna ti kinapudno. Marigatan idi a makisarita kadagiti tattao. Idi agangay, nakipagadal iti Biblia. “Bayat nga agad-adalak iti Biblia, naadalko nga obligasion dagiti Kristiano nga ipakaammo ti pammatida iti sabsabali,” kuna ni Sergey. “Pampanunotek a diak a talaga kaya dayta.” Ngem pinanunotna dagidiay saan pay a nakangngeg iti kinapudno, ket naamirisna a kaasida no dida maam-ammo ni Jehova. “Gapu iti baro a bambanag a naadalko, naragragsakakon ken nataltalnan ti panunotko,” kunana. “Ammok a kasapulan met a maammuan ti dadduma dagitoy a kinapudno.” Bayat a dumakdakkel ti simpatiana, tumurtured met a mangasaba. Kuna ni Sergey: “Nasdaawak ta ti panangibagak iti sabsabali maipapan iti Biblia ti nangted kaniak iti kompiansa. Bimmileg met ti mismo a pammatik.” *

12-13. Apay a kasapulan nga anusantayo dagidiay isursurotayo iti ministerio? Iladawan.

¹² Maikatlo, anusam dagiti isursurom. Laglagipem a mabalin a dida pay napampanunot dagiti kinapudno ti Biblia a pamiliar kadatayo. Ket adu ti mangipatpateg kadagiti patpatienda. Mabalin a mariknada a ti relihionda ti mamagbalin kadakuada a nasinged iti pamiliada, iti kulturada, ken kadagiti kalugaranda. Kasano a matulongantayo ida?

 ¹³ Panunotem daytoy: Ania ti maaramid no kasapulan a masukatan ti daan ken narukopen a rangtay? Masansan a bayat a maibangbangon ti baro a rangtay, maus-usar pay laeng ti daan. No naaramiden ti baro a rangtay, mabalinen a rebbaen ti daan. Umasping iti dayta, sakbay nga ibagatayo a panawanen dagiti tattao dagiti ipatpategda a “daan” a patpatienda, baka umuna a tulongantayo pay ida a mangammo ken mangipateg kadagiti “baro” a kinapudno​—dagiti pannursuro ti Biblia a saanda pay nga ammo idi damoda ti makipagadal. Iti kasta, nakasaganadanton a mangpanaw kadagiti dati a patpatienda. Mabalin a mabayag ti kasta a panangtulong kadagiti tattao.​—Roma 12:2.

14-15. Kasano a matulongantayo dagidiay bassit wenno awan ti ammoda maipapan iti namnama a biag nga agnanayon iti paraiso a daga? Mangted iti pagarigan.

¹⁴ No naanustayo kadagiti tattao iti ministerio, ditay ekspektaren a matarusan wenno awatenda ti kinapudno iti Biblia iti damo a pannakangngegda iti dayta. Imbes ketdi, ti simpatia ti mangtignay kadatayo nga in-inut a tumulong kadakuada a mangtarus iti ibagbaga ti Biblia. Kas pagarigan, panunotem no kasano a mailawlawagtayo ti namnama nga agnanayon a biag iti paraiso a daga. Bassit wenno awan ti ammo ti kaaduan maipapan iti daytoy a pannursuro. Baka patienda nga agpatinggan ti amin iti ipapatay. Wenno baka ipapanda a mapan idiay langit ti amin a naimbag a tattao. Kasano a matulongantayo ida?

¹⁵ Inyestoria ti maysa a brother ti epektibo nga ar-aramidenna. Umuna, basaenna ti Genesis 1:28, sa isaludsodna iti bumalay no sadino ken ania a kasasaad ti kayat ti Dios a pagbiagan dagiti tattao. Isungbat ti kaaduan, “Ditoy daga, ken kayatna a naragsakda.” Isarunona a basaen ti Isaias 55:11 sa isaludsodna no nagbaliw ti panggep ti Dios. Kaaduan a saan ti isungbat ti bumalay. Kamaudiananna, basaen ti brother ti Salmo 37:10, 11 sa isaludsodna no anianto ti masanguanan ti sangatauan. Babaen ti kastoy a panangusarna iti Biblia, adda dagiti natulonganna a mangtarus a kayat pay laeng ti Dios nga agbiag nga agnanayon dagiti naimbag a tattao iti Paraiso ditoy daga.

16-17. Maibatay iti Proverbio 3:27, ania ti dadduma a praktikal a pamay-an a maipakitatayo ti simpatia? Iyilustrar.

¹⁶ Maikapat, mangbirok kadagiti praktikal a pamay-an a maipakitam ti konsiderasion. Kas pagarigan, bimmisitatayo kadi iti oras a saan a kombiniente iti bumalay? Agpadispensartayo sa ibagatayo nga agsublitayto laengen iti sabali a gundaway. Kasanon no kasapulan ti bumalay ti tulong iti simple a trabaho iti balay? Wenno kasanon no saan a makapanaw ti bumalay ta masakit wenno nataenganen ket kasapulanna ti ibaonna? Kadagita a situasion,  mabalintayo ti tumulong.​—Basaen ti Proverbio 3:27.

¹⁷ Nasayaat ti resulta ti bassit laeng a kinaimbag nga impakita ti maysa a sister. Gapu iti simpatiana, nagsurat iti maysa a pamilia a natayan iti anak. Inramanna dagiti makaliwliwa a teksto ti Biblia. Ania ti epektona iti pamilia? Insurat ti agladladingit nga ina: “Nakaro ti ladingitko idi kalman. Dakkel ti naitulong kadakami ti suratmo. Agyamyamanak iti dayta ta naliwliwakami unay. Siguro, nasurok a namin-20 a binasak dayta idi kalman. Talaga a nariknak ti kinaimbag, pannakaseknan, ken pammaregtam. Naimpusuan nga agyamankami kenka.” Sigurado a nasayaat met ti resultana no ipakitatayo ti simpatia kadagiti agladladingit sa tulongantayo ida.

18. Maitunos iti 1 Corinto 3:6, 7, ania a balanse a panangmatmat ti laglagipentayo?

¹⁸ Siempre, kayattayo nga agtalinaed a balanse ti panangmatmattayo iti akemtayo iti ministerio. Adda pasettayo iti panangtulong iti sabsabali tapno maammuanda ti Dios, ngem saan a datayo ti makintrabaho iti kapatgan a paset. (Basaen ti 1 Corinto 3:6, 7.) Ni Jehova ti mangtignay kadagiti tattao nga umasideg kenkuana. (Juan 6:44) Ti panangawat ti tunggal indibidual iti naimbag a damag ket depende iti kasasaad ti pusona. (Mat. 13:4-8) Laglagipentayo a saan nga inawat ti kaaduan ti mensahe ni Jesus​—idinto ta isu ti katan-okan pay laeng a Mannursuro a nagbiag! Ditay koma ngarud maupay no adu kadagiti tattao nga ikagkagumaantayo a tulongan ti saan a mangipangag.

19. Ania ti nasayaat a resulta ti panangipakita iti simpatia iti ministeriotayo?

¹⁹ Nasayaat ti resultana no ipakitatayo ti simpatia iti ministerio. Ad-adda a matagiragsaktayo ti mangasaba. Mariknatayo ti dakdakkel a ragsak iti panangted. Ken nalaklaka para kadagidiay “addaan iti umiso a kababalin nga umawat iti agnanayon a biag” nga akseptaren ti naimbag a damag. (Ara. 13:48) Isu a “bayat nga adda gundawaytayo, agaramidtayo koma iti naimbag iti amin.” (Gal. 6:10) Iti kasta, naragsaktayto a mangidayaw iti nailangitan nga Amatayo.​—Mat. 5:16.