1. Yesu a atsam ningja ni kaw nna kaja htum atsam ningja langai gaw hpa rai kun? Sang lang dan u.

YESU a atsam ningja ni kaw nna kaja htum atsam ningja langai gaw, n hkum tsup ai masha ni hkrum ai mayak mahkak ni hpe chye na ya ai lam re. Yesu mungkan ga hta nga ai shaloi, “kabu gara re ai ni hte rau kabu gara” nna, “hkrap ngu hkrap ngoi re ai ni hte rau hkrap ngu hkrap ngoi” wa ai. (Rom 12:15) Ga shadawn, sape 70 gaw hkaw tsun magam hpe galaw awng dang lu nna kabu gara let bai wa ai shaloi, Yesu mung “chyoi pra ai Wenyi hta kabu” nga ai. (Luk 10:17-21) Raitim, Lazaru si mat ai majaw yawn nga ai ni hpe mu ai shaloi hta gaw, “shi a wenyi hta shi yawn madai” nna myit n pyaw nga ai.​—⁠Yhn 11:33.

2. Masha ni hpe myit tau ya lu hkra Yesu hpe hpa gaw karum ya wa ai kun?

² Yesu gaw hkum tsup ai wa raitim, n hkum tsup ai masha ni hpe matsan dum myit madun wa ai. Dai hku galaw lu na matu shi hpe hpa gaw karum ya wa ai kun? Shi hpe karum ya wa ai ahkyak htum lam gaw, shinggyim masha ni hpe tsawra ai myit re. Shawng na sumhpa hta tsun wa sai hte maren, Yesu gaw laksan hku nna “shinggyim masha ni hpe grai tsawra ai.” (Gsh 8:31, NW) Shinggyim masha ni hpe tsawra ai majaw, shinggyim masha ni a myit ai lam hpe atsawm chye wa ai. Kasa Yawhan ndai hku tsun ai: “Madu shi nan masha kraw lawang na myit masin a maw mawn ai lam ni hpe chye ya nga ai.” (Yhn 2:25, JCLB) Yesu gaw, kaga ni hpe grai matsan dum wa ai. Masha ni gaw Yesu madun ai tsawra myit a majaw, Mungdan shiga hpe madat mayu wa ai. Masha ni hpe matsan dum ai myit grau madun na nga yang, hkaw tsun magam hta grau awng dang wa na re.​—⁠2 Tm 4:5.

3-4. (a) Myit tau ya ai lam anhte hta nga na nga yang hkaw tsun magam hpe gara hku mu mada na kun? (b) Ndai sumhpa hta hpa lam hkaja mat na kun?

³ Kasa Pawlu gaw, hkaw tsun na lit shi hta nga ai ngu chye wa ai zawn, anhte mung chye ga ai. (1 Ko 9:16) Raitim, myit tau ya  ai lam anhte hta nga yang, hkaw tsun magam hpe lit lu ai majaw sha galaw na n re. Masha ni hpe anhte lanu lahku nna shanhte hpe karum ya na matu myit rawt nga ai hpe madun mayu ga ai. “Hkam sha ai hta jaw ya ai mahtang grau a nga ai” ngu ai lam hpe anhte chye ga ai. (Kas 20:35) Masha ni hpe karum ya mayu ai majaw hkaw tsun na nga yang, hkaw tsun magam hta grau pyaw wa na re.

⁴ Hkaw tsun magam hta myit tau ya ai lam gara hku madun mai na hpe ndai sumhpa hta hkaja mat na re. Shawng nnan, masha ni hte seng nna Yesu a hkamsha lam hpe hkaja na re. Dai hpang, Yesu a kasi ningli hpe anhte hkan sa lu ai lam 4 hpe mung hkaja mat na re.​—⁠1 Pe 2:21.

5-6. (a) Kadai ni hpe myit tau ya ai lam Yesu madun wa ai kun? (b) Esaia 61:1, 2 hta tau hkrau tsun da ai hte maren, Yesu gaw shi hkaw tsun ai masha ni hpe hpa majaw matsan dum wa ai kun?

⁵ Yesu madun wa ai myit tau ya ai kasi ningli hpe hkaja yu ga. Mabyin langai hta, Yesu hte shi a sape ni gaw, n hkring n sa ai sha hkaw tsun nga ai. Shanhte gaw, “shat sha na aten pyi” n lu ma ai. Dai majaw, Yesu gaw shi a sape ni hpe “nam mali na machyi shim ai shara de” shaga sa nna, “loi mi ban sa la” na matu tsun ai. Raitim, shawa hpawng gaw Yesu hte sape ni sa ai shara kaw shawng du nga sai. Masha ni hpe Yesu mu ai shaloi gara hku bai htang wa ai kun? ‘Shanhte gaw rem ai wa n nga ai sagu hpung hte bung nga ma ai majaw, shi shanhte hpe matsan dum * nna, law law wa sharin shaga ya mu ai.’​—⁠Mrk 6:30-34.

⁶ Shanhte hpe myit tau ya nna matsan dum myit hpa majaw Yesu madun wa ai kun? Shi hpang hkan nang ai masha ni hpe ‘rem ai wa n nga ai sagu hpung hte bung’ ai hpe shi mu ai majaw re. Shanhte kaw nna nkau gaw matsan nna, dinghku hpe madi shadaw na matu bungli grai shakut nga ma ai hpe Yesu mu ai rai na re. Nkau gaw, shanhte tsawra ai marai langai ngai n nga mat ai majaw yawn nga na re. Shanhte hkrum ai masa lam ni hpe Yesu gaw chye na ya wa ai. Shawng na sumhpa hta hkaja  wa sai hte maren, Yesu nan mung dai zawn manghkang nkau mi hpe hkrum wa ai. Yesu gaw, kaga ni hpe myit tau ya nna, shanhte hpe shalan shabran lam lu shangun ai shiga hpe tsun dan mayu wa ai.​—⁠Esaia 61:1, 2 hpe hti u.

7. Yesu a kasi ningli hpe anhte gara hku hkan sa mai na kun?

⁷ Yesu kaw nna anhte hpa sharin la lu ai kun? Yesu zawn sha anhte mung, ‘rem ai wa n nga ai sagu hpung hte bung nga’ ai masha ni a lapran hta nga ra ai. Shanhte gaw manghkang law law hpe hparan ra nga ai. Shanhte ra kadawn nga ai Mungdan shiga anhte kaw nga ai. (Shr 14:6) “Gawng kya ai ni hte matsan mayan ni” hpe matsan dum ai majaw, anhte kabu gara shiga hkaw tsun nna anhte a Madu hpe kasi la ga ai. (Shk 72:13, JCLB) Masha ni hpe anhte matsan dum ai majaw, shanhte hpe lama ma karum ya mayu ai.

8. Hkaw tsun magam hta myit tau ya ai lam madun mai ai lam langai gaw hpa rai na kun? Ga shadawn tsun dan u.

⁸ Anhte hkaw tsun ai masha ni hpe myit tau ya ai lam madun lu hkra, hpa gaw anhte hpe karum ya na kun? Hkaw tsun magam hta hkrum ai masha ni a shara hta anhte myit ya mayu ai. Shanhte a masa hta rai yang, anhte gara hku kanawn mazum hkrum mayu ai hpe myit nna dai zawn shanhte hpe kanawn mazum mayu ga ai. * (Mat 7:12) Dai hku galaw lu na lam 4 hpe hkaja yu ga. Langai, langai hpra a ra kadawn ai lam hpe myit yu u. Kabu gara shiga hpe anhte hkaw tsun ai shaloi, anhte a lit gaw sarawun langai a lit hte bung ai. Kaja ai sarawun langai gaw, machyi masha langai hpra hte seng nna myit ya ai. Machyi ai masha hpe ga san san nna, shi tsun dan ai masa lam hte hkamsha lam hpe atsawm madat ya ai. Tsi garai n tsi ya shi yang, machyi masha hpa byin nga ai hpe myit yu ai. Dai hpang she, machyi masha hpe atsawm tsi ya ai. Dai hte maren, hkaw tsun magam hta anhte hkrum ai ni yawng hpe ladat langai hte sha shachyen shaga n mai ai. De a malai, langai hpra a ningmu ni hte masa lam ni hpe chye na hkra shakut ging ai.

9. Hpa hpe anhte koi ging ai kun? Sang lang dan u.

⁹ Hkaw tsun magam hta nang hkrum ai masha langai a masa lam ni, hpa hpe kam sham ai, hpa majaw dai hpe kam sham ai ngu ai lam ni hpe chye da ngut chyalu re ngu n mai myit la ai. (Gsh 18:13) De a malai, hpaji rawng ai ga san ni san nna, shi a lam hpe chye hkra galaw ra ai. (Gsh 20:5) Shanhte a bungli, dinghku a lam, shingdu labau a lam, shanhte a ningmu ni hpe san ai lam gaw, na a htung lai hte htap htuk ai nga yang san mai ai. Anhte ga san san ai shaloi shanhte bai tsun ai ga a majaw, kabu gara shiga hpe hkaw tsun lu na ahkaw ahkang anhte lu la na re. Shanhte teng sha ra kadawn ai lam hpe anhte chye wa yang, Yesu zawn sha, shanhte hpe karum ya lu na re.​—⁠1 Korinhtu 9:19-23 hte shingdaw yu u.

10-11. 2 Korinhtu 4:7, 8 hku nga yang myit tau ya ai lam madun mai na lahkawng ngu na lam gaw hpa rai kun? Ga shadawn tsun dan u.

 ¹⁰ Lahkawng, shanhte a prat gaw gara hku rai nga na hpe shingran yu u. Lam nkau hta shanhte a masa lam hpe anhte chye na lu ai. Anhte ni gaw n hkum tsup ai ni re ai majaw, anhte hta mung manghkang ni nga na re. (1 Ko 10:13) Ndai prat hta asak hkrung ra ai gaw grai yakhkak ai hpe anhte chye ga ai. Yehowa karum madi shadaw ya ai lam hte sha anhte hkamjan lu nga ai. (2 Korinhtu 4:7, 8 hpe hti u.) Yehowa hte hku hkau lam n nga ai shanhte a prat hpe myit yu u. Yehowa a karum shingtau lam n nga ai majaw, shanhte a prat gaw grai yakhkak nga na re. Yesu zawn, shanhte hpe matsan dum ai majaw “kaja ai shi ga” tsun dan nga ai re.​—⁠Esa 52:7.

¹¹ Hpunau Seragi a mabyin hpe hkaja yu ga. Shi gaw, teng man lam hpe garai n chye shi yang, kaya chye nna azim sha nga chye ai wa re. Kaga ni hte ga n shaga gwi ai. Hpang hta, Chyum Laika hkaja lamang hpe shi hkap la wa ai. Shi ndai hku tsun ai: “Ngai Chyum Laika hkaja ai shaloi, Hkristan ni hku nna tinang a makam masham a lam kaga ni hpe tsun dan ra ai lit nga ai hpe chye wa ai.” “Galoi mung ngai lu galaw na n re ngu shadu ai.” Yehowa hpe n chye ai majaw masha ni a prat masa gaw grai yak nga na hpe myit yu nna chye mat ai. Shi ndai hku tsun ai: “Ngai sharin la wa ai lam nnan ni gaw ngai hpe pyaw shangun nna myit hta simsa shangun ai.” “Kaga ni mung dai teng man lam ra nga na hpe ngai chye mat ai.” Hpunau Seragi hta myit tau ya ai lam grau nna nga wa ai majaw, hkaw tsun na matu nden marai nga wa ai. Shi ndai hku tsun ai: “Kaga ni hpe Chyum Laika teng man lam tsun dan ai shaloi, tinang hkum tinang kam ai myit grau nga wa ai majaw ngai grai mau mat ai. Nye a makam masham hpe kaga ni hpe tsun dan ai majaw, makam masham grau nna ngang kang wa ai.” *

12-13. Hkaw tsun magam hta sharin achyin ya ai shaloi hpa majaw myit galu ra ai kun? Ga shadawn tsun dan u.

¹² Masum, nang sharin achyin ya nga ai ni hpe myit galu u. Chyum Laika teng man lam hpe anhte chye ai daram shanhte n chye ai hpe dum u. Masha law malawng gaw, shanhte hkap la da ai makam masham hte  seng nna grai myit rawt ma ai. Shanhte a makam masham gaw, dinghku, makau grup-yin na masha ni hte htung hking lam hta kahkyin gumdin ya ai ngu nna kam ma ai. Shanhte hpe gara hku karum ya na kun?

¹³ Ndai ga shadawn hpe myit yu ga: Mahkrai langai grai dingsa mat nna, nnan langai gawgap ra ai ngu saga. Mahkrai nnan hpe gawgap nga ai shaloi, dingsa hpe mung masha ni gaw naw lang nga ra na re. Mahkrai nnan gawgap ngut sai nga yang, dingsa hpe jahten kau na re. Dai zawn sha, masha ni grai manu shadan ai makam masham “dingsa” hpe kau da na matu n-gun n jaw shi yang, shanhte hte nnan hkaja hpang ai kaw nna, shanhte n chye da ai teng man lam “nnan” hpe manu shadan chye wa hkra shawng karum ya ra ai. Dai hku nna, shanhte a makam masham dingsa hpe kau da na matu jin jin rai wa na re. Dai hku galai shai lu hkra aten jaw nna karum ya ra chye ai.​—⁠Rom 12:2.

14-15. Mungkan hparadisu hta htani htana asak hkrung lu na myit mada lam hte seng nna loi sha chye ai ni (sh) tsep kawp n chye ai ni hpe gara hku karum ya mai na kun? Ga shadawn tsun dan u.

¹⁴ Hkaw tsun magam hta masha ni hpe myit galu na nga yang, Chyum Laika teng man lam hpe shanhte shawng nnan na ai shaloi, kalang ta chye na nna hkap la na ngu myit mada na n re. De a malai, Chyum Laika tsun ai lam ni hte seng nna shanhte angwi ngwi myit chye wa hkra, anhte hta nga ai myit tau ya ai lam gaw karum ya na re. Ga shadawn hku nna, marai langai ngai hte mungkan hparadisu hta htani htana asak hkrung lu na myit mada lam hte seng nna sawn dinglik yu ai ngu saga. Masha law law gaw, dai lam hte seng nna, loi mi sha chye ai (sh) tsep kawp n chye ma ai. Masha si mat yang, asak bai n hkrung lu sai ngu kam ma ai. Shing nrai, kaja ai masha ni gaw sumsing lamu de lung mat wa ai ngu nna myit ma ai. Shanhte hpe gara hku karum ya lu na kun?

¹⁵ Hpunau langai gaw, htawm hpang myit mada lam hte seng nna masha ni chye na hkra ndai hku karum ya wa ai. Shawng nnan Ningpawt Ninghpang 1:28 hpe shi hti dan ai. Dai hpang, Karai Kasang gaw shinggyim masha ni hpe gara kaw nga shangun mayu nna, gara zawn asak aprat lu shangun mayu ai kun? nga nna san ai. Law malawng gaw, “ginding ga ntsa hta ngwi pyaw ai aprat lu shangun mayu ai” ngu nna bai htai ma ai. Dai hpang hpunau gaw Esaia 55:11 hpe hti dan nna Karai a yaw shada lam galai shai mat sai kun? ngu nna bai san ai. Nta madu ni gaw, n galai shai ai ngu mahtai jaw ma ai. Hpang jahtum, Shakawn Kungdawn 37:10, 11 hpe hti dan nna, shinggyim masha ni a htawm hpang prat gaw gara hku rai nga na kun? ngu nna bai san ai. Dai Chyum daw ni hpe akyu jashawn nna, Karai Kasang gaw kaja ai masha ni hpe Hparadisu hta htani htana asak hkrung shangun mayu ai lam chye na hkra, masha law law hpe shi karum ya wa ai.

16-17. Ga Shagawp 3:27 hpe myit sumru nna myit tau ya ai lam hpe tatut gara hku madun mai na kun? Ga shadawn tsun dan u.

¹⁶ Mali, masha ni hpe chye na ya ai lam  madun lu na matu tatut re ai lam ni hpe myit u. Ga shadawn, nta madu n rau ai aten hta nang sa chyai hkrup ai kun? Nta madu hpe hpyi nem nna htap htuk ai aten hta bai sa chyai na lam tsun da mai ai. Nta madu ni hpe karum ya ra ai kaji kajaw masa nga yang gaw gara hku kun? Machyi nga ai (sh) asak kaba ai majaw bungli kaji kajaw galaw karum ra nga ai nta madu hte hkrum yang gaw gara hku kun? Dai zawn masa lam ni hte hkrum yang shanhte hpe anhte karum ya mai ai.​—⁠Ga Shagawp 3:27 hpe hti u.

¹⁷ Nauna langai gaw kaji kajaw lam hta matsan dum myit madun ai majaw, kaja ai akyu ni lu wa ai. Shi hta myit tau ya ai lam nga ai majaw, kasha si mat ai dinghku langai hpang de laika ka wa ai. Laika hta shalan shabran lam jaw ai Chyum daw nkau mi hpe ka shalawm da ai. Dai dinghku gara hku bai htang wa ai kun? Yawn hkyen nga ai kanu gaw ndai hku ka wa ai: “Lai wa sai shani hta ngai grai yawn nga ai.” “Na a laika gaw ngai hpe manu mana karum ya wa ai. Ngai hpe shalan shabran ya ai majaw ngai grai chyeju dum ai. Na a laika hpe ngai 20 lang jan hti kau ai. Dai laika gaw ngai hpe kade daram n-gun lu shangun ai hpe ngai kam pyi n kam ai. Masin salum kaw nna teng sha chyeju dum ai yaw.” Yakhkak jamjau hkrum nga ai ni hpe anhte chye na ya nna anhte lama ma karum ya ai nga yang, kaja ai akyu ni teng sha lu la na re.

18. 1 Korinhtu 3:6, 7 hta tsun da ai hte maren hkaw tsun magam hte seng nna anhte hpa hpe dum ging ai kun? Hpa majaw kun?

¹⁸ Hkaw tsun magam hta anhte galaw lu ai lam hte seng nna ningmu gaw rap ra ra ai. Karai Kasang hpe masha ni chye wa hkra karum ya ai hta anhte lawm nga ai raitim, bungli a ahkyak htum daw hta anhte lawm nga ai n re. (1 Korinhtu 3:6, 7 hpe hti u.) Masha ni hpe lau la ai gaw Yehowa re. (Yhn 6:44) Kabu gara shiga hpe hkap la na (sh) nyet kau na ngu ai gaw masha langai a masin salum hta madung nga ai. (Mat 13:4-8) Yesu gaw asak hkrung wa ai ni hta kaja htum sara byin wa tim pyi, masha law malawng gaw shi a shiga hpe n hkap la wa ai lam dum u. Dai majaw, anhte hkaw tsun ai shiga hpe masha law law n madat ai raitim, myit n daw ging ai.

19. Hkaw tsun magam hta myit tau ya ai lam madun na nga yang gara akyu ni lu la na kun?

¹⁹ Hkaw tsun magam hta myit tau ya ai lam hpe anhte madun na nga yang, kaja ai akyu ni lu la na re. Hkaw tsun magam hta mung grau nna pyaw wa na re. Gam jaw gam ya ai majaw, lu la na ngwi pyaw lam hpe hkamsha lu na re. “N htum n wai asak lu la na san da ai ni nlang hte mung” kabu gara shiga hpe hkap la na matu grau loi wa na re. (Kas 13:48) “Dai re ai majaw, aten ladaw naw pra nga yang, anhte masha nlang hte hpe mai kaja ai amu galaw nga ga.” (Gal 6:10) Anhte a sumsing Kawa hpe shagrau lu ai majaw kabu gara lam hkamsha lu na re.​—⁠Mat 5:16.