၁. ယ့ၣ်ၡူး​အ​တၢ်ဂ့ၤ​တၢ်ဝါ​လၢ ပ​ဘၣ်သူၣ်​ဘၣ်သး​အီၤ အ​ဒိၣ်ကတၢၢ်​အကျါ​တခါ​န့ၣ်​ မ့ၢ်​မနုၤ​လဲၣ်. တဲ​ဖျါထီၣ်​တက့ၢ်.

ယ့ၣ်ၡူး​အ​တၢ်ဂ့ၤ​တၢ်ဝါ​လၢ ပ​ဘၣ်သူၣ်​ဘၣ်သး​အီၤ အ​ဒိၣ်ကတၢၢ်​အကျါ​တခါ​န့ၣ်​ မ့ၢ်ဝဲ​အဝဲ​နၢ်ပၢၢ် ပှၤ​ဟီၣ်ခိၣ်​ဖိ​လၢ အ​တလၢ​တ​ပှဲၤ​တဖၣ်​ အ​တၢ်ကီ​တၢ်ခဲ​န့ၣ်​လီၤ. ဖဲ​ယ့ၣ်ၡူး​အိၣ်​လၢ ဟီၣ်ခိၣ်​ချၢ​အခါ အဝဲ “သးခု​ဃုာ်ဒီး” “ပှၤလၢ​အ​သးခု​တဖၣ်” ဒီး “ဟီၣ်​ဃုာ်ဒီး” “ပှၤလၢ​အ​ဟီၣ်​တဖၣ်” န့ၣ်​လီၤ. (ရိမ့ၤ ၁၂:၁၅) အဒိ ဖဲ​ယ့ၣ်ၡူး​အပျဲၢ်​အဘီၣ်​အဂၤ ၇၀ မၤတၢ်​စံၣ်တဲၤ​တဲလီၤ​တၢ်မၤ ကဲထီၣ်​လိၣ်ထီၣ်​အခါ အဝဲသ့ၣ်​ ဟဲက့ၤ​လၢ တၢ်​သူၣ်ခု​သးခု​အ​ပူၤ​လီၤ. ဖဲ​န့ၣ်​န့ၣ်​ ယ့ၣ်ၡူး​စ့ၢ်ကီး “အ​သူၣ်ဖှံ​အသး​ညီ” ဃုာ်ဒီး​အဝဲသ့ၣ်​လီၤ. (လူၤကၣ်​ ၁၀:၁၇-၂၁) ဒီး​အဂၤ​တမံၤ​န့ၣ်​ ဖဲ​စီၤ​လါစရူး​သံ​အခါ ယ့ၣ်ၡူး​ထံၣ်ဘၣ်​ဝဲ​လၢ ပှၤလၢ​အ​အဲၣ်ဘၣ်​စီၤ​လါစရူး​တဖၣ်​ သူၣ်အုး​သးအုး​အဃိ အဝဲ​စ့ၢ်ကီး “ကအု​ကစွါ​ထီၣ်​ လၢ​အ​သးကံၢ်​ပူၤ, ဒီး​အ​သူၣ်ကိၢ်​အသး​ဂီၤ” လီၤ.—ယိၤဟၣ်​ ၁၁:၃၃.

၂. တၢ်မနုၤ​မၤစၢၤ​ယ့ၣ်ၡူး လၢ​က​ပာ်ဖျါ​ထီၣ်​ တၢ်​ဒိသူၣ်​ဒိသး လၢ​ပှၤ​ဟီၣ်ခိၣ်​ဖိ​တဖၣ်​ အ​ဖီခိၣ်​န့ၣ်​လဲၣ်.

^၂ ယ့ၣ်ၡူး​မ့ၢ် ပှၤလၢ​ပှၤပှဲၤ​ဘၣ်ဆၣ်​ အဝဲ​ပာ်ဖျါ​ထီၣ်​ တၢ်​သးကညီၤ​လၢ ပှၤ​ဟီၣ်ခိၣ်​ဖိ​လၢ အ​တလၢ​တ​ပှဲၤ​တဖၣ်​ အ​ဖီခိၣ်​လီၤ. တၢ်မနုၤ​မၤစၢၤ​အီၤ​ဒ်သိး အဝဲ​က​မၤဝဲ​ဒ်​န့ၣ်​အဂီၢ်​လဲၣ်. တၢ်​လၢ​အ​မၤစၢၤ​အီၤ အ​ဒိၣ်ကတၢၢ်​တမံၤ​န့ၣ်​ မ့ၢ်ဝဲ​တၢ်အဲၣ်​ ပှၤ​ဟီၣ်ခိၣ်​ဖိ​လီၤ. ဒ်​တၢ်​မၤလိ​လၢ အ​ပူၤကွံာ်​တခါ ပာ်ဖျါ​ထီၣ်ဝဲ​အသိး ယ့ၣ်ၡူး​အ “တၢ်​သူၣ်ဖှံ​သးညီ [“တၢ်အဲၣ်,” NWT] အိၣ်ဝဲ​ဒီး​ပှၤကညီ​ဖိ” လီၤ​လီၤဆီ​ဆီ​လီၤ. (ကတိၤဒိ ၈:၃၁) တၢ်အဲၣ်​ပှၤ​ဟီၣ်ခိၣ်​ဖိ​န့ၣ်​ ထိၣ်ဟူး​ထိၣ်ဂဲၤ​ထီၣ်​အီၤ​လၢ က​သးအိၣ်​သ့ၣ်ညါ​ဝဲ ပှၤ​ဟီၣ်ခိၣ်​ဖိ​တဖၣ်​ အ​တၢ်​ဆိကမိၣ်​န့ၣ်​လီၤ. ဘၣ်ဃး​ဒီး​ယ့ၣ်ၡူး​န့ၣ်​ တၢ်မၢဖိ​ယိၤဟၣ်​ တဲဝဲ​လၢ “တၢ်အိၣ်​လၢ ပှၤကညီ​အ​ပူၤ​န့ၣ်​ သ့ၣ်ညါ​ဒၣ်ဝဲ​လီၤ.” (ယိၤဟၣ်​ ၂:၂၅) ယ့ၣ်ၡူး​အိၣ်ဒီး တၢ်​သးကညီၤ​လၢ ပှၤဂၤ​အ​ဖီခိၣ်​လီၤ. မ့ၢ်​လၢ​ပှၤဂၤ​တဖၣ်​ တူၢ်ဘၣ်​ဝဲ​လၢ ယ့ၣ်ၡူး​အဲၣ်အီၤ​အဃိ အဝဲသ့ၣ်​ ဒိကနၣ်​ဝဲ ဘီမုၢ်​တၢ်သးခု​ကစီၣ်​လီၤ. ဒ်​န့ၣ်​အသိး ပ​မ့ၢ်​အိၣ်ဒီး တၢ်​သးကညီၤ​န့ၣ်​ ဖဲ​ပ​ဟး​စံၣ်တဲၤ​တဲလီၤ​တၢ်​အခါ ပှၤဂၤ​က​အဲၣ်ဒိး​ဒိကနၣ်​ပှၤလီၤ.—၂ တံၤမသ့း ၄:၅.

၃-၄. (က) ပ​မ့ၢ်​အိၣ်ဒီး တၢ်​ဒိသူၣ်​ဒိသး​န့ၣ်​ ပ​က​ထံၣ်​ တၢ်​စံၣ်တဲၤ​တဲလီၤ​တၢ်မၤ ဒ်လဲၣ်. (ခ) လၢ​တၢ်​မၤလိ​အံၤ​အ​ပူၤ ပ​က​တဲသကိး တၢ်ဂ့ၢ်​မနုၤ​လဲၣ်.

^၃ တၢ်မၢဖိ​ပီလူး သ့ၣ်ညါ​ဝဲ​လၢ အ​မူဒါ​အိၣ်​လၢ က​ဘၣ်​စံၣ်တဲၤ​တဲလီၤ​တၢ်​လီၤ. ပဝဲ​စ့ၢ်ကီး ပ​သ့ၣ်ညါ​လၢ ပ​မူဒါ​အိၣ်​လၢ ပ​က​ဘၣ်​မၤ​ဒ်​န့ၣ်​လီၤ. (၁ ကရံၣ်သူး ၉:၁၆) တမ့ၢ်​ထဲ ပ​က​ဘၣ်​ထံၣ်​  တၢ်​စံၣ်တဲၤ​တဲလီၤ​တၢ်မၤ​ဒ် မူဒါ​တခါ​အသိး​ဘၣ်. လၢတၢ်န့ၣ်​အလီၢ် ပ​စံၣ်တဲၤ​တဲလီၤ​တၢ် ခီဖျိ​လၢ ပ​သူၣ်အိၣ်​သးအိၣ်​ပှၤဂၤ ဒီး​အဲၣ်ဒိး​မၤစၢၤ အဝဲသ့ၣ်​အဃိ​လီၤ. ပ​သ့ၣ်ညါ​လၢ “ဟ့ၣ်​တၢ်​န့ၣ်​ ဘၣ်​တၢ်​ဆိၣ်ဂ့ၤ​အါန့ၢ်​ဒိးန့ၢ် တၢ်​တက့ၢ်​လီၤ.” (မၤတၢ် ၂၀:၃၅) ပ​မ့ၢ်​စံၣ်တဲၤ​တဲလီၤ​တၢ် ခီဖျိ​လၢ ပ​အဲၣ်ဒိး​မၤစၢၤ​ပှၤဂၤ​အဃိ​န့ၣ်​ ပ​က​ဒိးန့ၢ်​ဘၣ်​တၢ်သးခု အါထီၣ်​လီၤ.

^၄ လၢ​တၢ်​မၤလိ​အံၤ​အ​ပူၤ ပ​က​တဲသကိး​တၢ်ဂ့ၢ်​လၢ ဘၣ်ဃး​ဒီး ပ​ပာ်ဖျါ​ထီၣ်​ တၢ်​ဒိသူၣ်​ဒိသး​လၢ တၢ်​စံၣ်တဲၤ​တဲလီၤ​တၢ်မၤ​အ​ပူၤ က​သ့​ဒ်လဲၣ်​န့ၣ်​လီၤ. အဆိ​ကတၢၢ်​န့ၣ်​ ပ​က​သ့ၣ်ညါ​ဘၣ်​လၢ ဘၣ်ဃး​ဒီး ယ့ၣ်ၡူး​အ​တၢ်​ပာ်သူၣ်​ပာ်သး​လၢ ပှၤဂၤ​အ​ဖီခိၣ်​န့ၣ်​ ပ​မၤလိ​န့ၢ်ဘၣ်​ တၢ်မနုၤ​လဲၣ်. ဒီး​ပ​က​သမံသမိး​ကွၢ် ကျဲ​လွံၢ်​ဘိ​လၢ ပ​ကွၢ်လိမၤဒိး ယ့ၣ်ၡူး​သ့​န့ၣ်​လီၤ.—၁ ပ့းတရူး ၂:၂၁.

၅-၆. (က) ယ့ၣ်ၡူး​ပာ်ဖျါ​ထီၣ်​ တၢ်​ဒိသူၣ်​ဒိသး​လၢ မတၤ​တဖၣ်​ အ​ဖီခိၣ်​လဲၣ်. (ခ) ဒ် ယၡါယၤ ၆၁:၁, ၂ ပာ်ဖျါ​ထီၣ်ဝဲ​အသိး ဘၣ်​မနုၤ​အဃိ ယ့ၣ်ၡူး​သးကညီၤ​ဝဲ ပှၤလၢ​အ​စံၣ်တဲၤ​တဲလီၤ​ဝဲ​တဖၣ်​လဲၣ်.

^၅ ဆိကမိၣ်​ကွၢ် ဘၣ်ဃး​ဒီး ယ့ၣ်ၡူး​ပာ်ဖျါ​ထီၣ်​ တၢ်​ဒိသူၣ်​ဒိသး​ဒ်လဲၣ်​န့ၣ်​တက့ၢ်. ဘၣ်​တဘျီ ယ့ၣ်ၡူး​ဒီး​အပျဲၢ်​အဘီၣ်​တဖၣ်​ ဟး​စံၣ်တဲၤ​တဲလီၤ​တၢ် ဒီး​တ​အိၣ်ဘှံး​အိၣ်သါ​ဘၣ်​ဝဲ​အဃိ လီၤဘှံး​ဝဲ​လီၤ. အဝဲသ့ၣ်​ “အီၣ်တၢ်​အဆၢ​ကတီၢ်​တအိၣ်​ဘၣ်.” အဃိ​ယ့ၣ်ၡူး​လဲၤ​ကိး​အဝဲသ့ၣ်​ဆူ “တၢ်​တ​ဒၢ​လၢ​ပှၢ်မုၢ်ကနၢ​အလီၢ်” ဒ်သိး​က “အိၣ်ဘှံး​တစိၢ်​တလီၢ်” လီၤ. ဘၣ်ဆၣ်​ ပှၤ​ဂီၢ်မုၢ်​တဖၣ်​ လဲၤ​ဃ့ၢ်​ဆိ​လၢ ယ့ၣ်ၡူး​ဒီး​အပျဲၢ်​အဘီၣ်​တဖၣ်​ က​လဲၤဝဲ​အလီၢ်လီၤ. ဖဲ​ယ့ၣ်ၡူး​လဲၤ​တုၤ​ဖဲ​န့ၣ်​ ဒီး​ထံၣ်​ပှၤ​ဂီၢ်မုၢ်​တဖၣ်​အခါ အဝဲ​တူၢ်ဘၣ်​ဝဲ​ဒ်လဲၣ်​ ဒီး​မၤဝဲ​ဒ်လဲၣ်. အဝဲ “အသး​အိၣ် * အီၤ​လီၤ. အဂ့ၢ်ဒ်အံၤ, မၤ​အသး​ဒ် သိ​လၢ​ပှၤ​ကွၢ်​အီၤ​တအိၣ်​ဘၣ်​အသိး, ဒီး​သိၣ်က့ၤ​သီက့ၤ​အီၤ​အါမံၤ​လီၤ.”—မၢ်ကူး ၆:၃၀-၃၄.

^၆ ပှၤ​ဂီၢ်မုၢ်​တဖၣ်​န့ၣ်​ လီၤဂာ်​ဒ် “သိ​လၢ​ပှၤ​ကွၢ်​အီၤ​တအိၣ်​ဘၣ်” အသိး​လီၤ. လၢတၢ်န့ၣ်​အဃိ ယ့ၣ်ၡူး​သးကညီၤ ဒီး​ဒိသူၣ်​ဒိသး အဝဲသ့ၣ်​လီၤ. ဘၣ်​သ့ၣ်​သ့ၣ်​ ယ့ၣ်ၡူး​က​ထံၣ်​လၢ အဝဲသ့ၣ်​တနီၤ​န့ၣ်​ ဖှီၣ်ယာ်​ဝဲ ဒီး​ဒ်သိး​က​လုၢ်အီၣ်လုၢ်အီ အဟံၣ်​ဖိ​ဃီဖိ​အဂီၢ် ဘၣ်​ဖံးအီၣ်​မၤအီၣ်​ ကီကီခဲခဲ​လီၤ. ဒီး​ဘၣ်​သ့ၣ်​သ့ၣ်​ ပှၤအဂၤ​တနီၤ​အ​သူၣ်အုး​သးအုး ခီဖျိ​လၢ ပှၤလၢ​အ​အဲၣ်ဘၣ်​ဝဲ​တဂၤ သံသဒၣ်​ကွံာ်​အီၤ​အဃိ​လီၤ. မ့မ့ၢ်​ဒ်​န့ၣ်​န့ၣ်​ ယ့ၣ်ၡူး​နၢ်ပၢၢ် အဝဲသ့ၣ်​အ​တၢ်​တူၢ်ဘၣ်​သ့​လီၤ.  ဒ်​တၢ်​မၤလိ လၢ​အ​ပူၤကွံာ်​တခါ ပာ်ဖျါ​ထီၣ်ဝဲ​အသိး ပ​သ့ၣ်ညါ​ဘၣ်​လၢ ယ့ၣ်ၡူး​အ​နီၢ်ကစၢ်​ဒၣ်ဝဲ ထံၣ်ဘၣ်​တၢ်ကီ​တၢ်ခဲ​တဖၣ်​အံၤ တနီၤ​လီၤ. ယ့ၣ်ၡူး ဒိသူၣ်​ဒိသး​ပှၤဂၤ​အဃိ အဝဲ​အဲၣ်ဒိး မၤမုာ်​ထီၣ်​ အဝဲသ့ၣ်​အသး​လီၤ.—ဖး ယၡါယၤ ၆၁:၁, ၂ တက့ၢ်.

၇. ပ​ကွၢ်လိမၤဒိး​ယ့ၣ်ၡူး က​သ့​ဒ်လဲၣ်.

^၇ ပ​မၤလိ​န့ၢ်ဘၣ်​ တၢ်မနုၤ​လၢ ယ့ၣ်ၡူး​အ​အိၣ်​လဲၣ်. ဒ်​ယ့ၣ်ၡူး​အသိး ပဝဲ​သ့ၣ်​တဖၣ်​စ့ၢ်ကီး ပှၤလၢ​အ​လီၤဂာ်​ဒ် “သိ​လၢ​ပှၤ​ကွၢ်​အီၤ​တအိၣ်​ဘၣ်” တဖၣ်​အိၣ်​ဝးတရံး​ပှၤလီၤ. အဝဲသ့ၣ်​အိၣ်ဒီး တၢ်ကီ​တၢ်ခဲ​အါမး​လီၤ. အဝဲသ့ၣ်​လိၣ်ဘၣ်​နၢ်ဟူ ဘီမုၢ်​အ​တၢ်သးခု​ကစီၣ်​ လၢ​အ​အိၣ်ဒီး​ပှၤ​န့ၣ်​လီၤ. (လီၣ်ဖျါ ၁၄:၆) ခီဖျိ​လၢ​ပ “သးကညီၤ​ပှၤ​ဂံၢ်စၢ်​ဘါစၢ် ဒီး​ပှၤဖှီၣ်​ဖိ​ယာ်ဖိ” အဃိ​ပ​ကွၢ်လိမၤဒိး ပ​သရၣ်​ယ့ၣ်ၡူး ဒီး​ပ​စံၣ်တဲၤ​တဲလီၤ တၢ်သးခု​ကစီၣ်​လီၤ. (စံးထီၣ်​ပတြၢၤ ၇၂:၁၃) ဒီး​မ့ၢ်​လၢ​ပ​သးကညီၤ​ပှၤဂၤ​အဃိ ပ​အဲၣ်ဒိး​မၤစၢၤ​အဝဲသ့ၣ်​လီၤ.

၈. ကျဲ​တဘိ​လၢ ပ​ပာ်ဖျါ​ထီၣ်​ တၢ်​ဒိသူၣ်​ဒိသး​လၢ တၢ်​စံၣ်တဲၤ​တဲလီၤ​တၢ်မၤ​အ​ပူၤ​သ့​န့ၣ်​ မ့ၢ်​မနုၤ​လဲၣ်, ဟ့ၣ်​တၢ်အဒိ​တက့ၢ်.

^၈ တၢ်မနုၤ​က​မၤစၢၤ​ပှၤ ဒ်သိး​ပ​ကအိၣ်​ဒီး တၢ်​ဒိသူၣ်​ဒိသး လၢ​ပှၤလၢ​ပ​လဲၤ​စံၣ်တဲၤ​တဲလီၤ​အီၤ​တဖၣ်​ အ​ဖီခိၣ်​န့ၣ်​လဲၣ်. အိၣ်​ကွၢ်​လၢ​အဝဲသ့ၣ်​အလီၢ် ဒီး​ဆိကမိၣ်​ကွၢ်​လၢ န​မ့ၢ်​အိၣ်​လၢ အဝဲသ့ၣ်​အလီၢ်​န့ၣ်​ န​က​အဲၣ်ဒိး​လၢ ပှၤ​ရ့​ဒီး​နၤ​ဒ်လဲၣ်​န့ၣ်​တက့ၢ်. * (မးသဲ ၇:၁၂) ပ​က​ဆိကမိၣ်​ကွၢ် ကျဲ​လွံၢ်​ဘိ​လၢ ပ​မၤ​ဒ်​န့ၣ်​သ့​န့ၣ်​လီၤ. ကျဲ​အဆိ​ကတၢၢ်​တဘိ​န့ၣ်​ ဆိကမိၣ်​ကွၢ် ပှၤ​တဂၤ​စုာ်စုာ် အ​တၢ်လိၣ်ဘၣ်​န့ၣ်​တက့ၢ်. ဖဲ​ပ​ဟး​စံၣ်တဲၤ​တဲလီၤ​တၢ်​အခါ ပ​မူဒါ​န့ၣ်​ လီၤဂာ်​ဒ်သိး​ဒီး ကသံၣ်​သရၣ်​တဂၤ​န့ၣ်​လီၤ. ကသံၣ်​သရၣ်​လၢ အဂ့ၤ​တဂၤ​န့ၣ်​ က​ဆိကမိၣ်​ကွၢ်ဝဲ ပှၤဆါ​တဂၤ အ​တၢ်လိၣ်ဘၣ်​န့ၣ်​လီၤ. အဝဲ​က​သံကွၢ်ဝဲ တၢ်​သံကွၢ် ဒီး​ဖဲ​ပှၤဆါ​တဂၤ​တဲ​ဖျါထီၣ်​ အ​တၢ်အိၣ်သး မ့တမ့ၢ် အ​တၢ်ဆူး​တၢ်ဆါ​အဂ့ၢ်​အခါ အဝဲ​က​ဒိကနၣ်​န့ၢ်ဝဲ​လီၤ. ဒီး​တချုး​လၢ အဝဲ​ဟ့ၣ်လီၤ ကသံၣ်ကသီ​ဒံး​ဘၣ်​န့ၣ်​ အဝဲ​က​ဟံးန့ၢ်​တၢ်​ဆၢကတီၢ် ဒီး​က​ဆိကမိၣ်​ထံ​ဝဲ, ကကွၢ်​ဝဲ ပှၤဆါ​တဂၤ​အံၤ အိၣ်ဒီး​တၢ်ဆါ​မနုၤ​လဲၣ်, ဝံၤဒီး​က​ကူစါ​ယါဘျါ​ဝဲ​လီၤ. ဒ်​န့ၣ်​အသိး ဖဲ​ပ​ဟး​စံၣ်တဲၤ​တဲလီၤ​တၢ်​အခါ ပ​တ​ကြၢး​သူ​ကျဲ​တဘိဃီ ဒ်သိး​ပ​က စးထီၣ်​တဲသကိး​တၢ်​ဒီး ပှၤ​ကိးဂၤ​ဒဲး​န့ၣ်​ဘၣ်. လၢတၢ်န့ၣ်​အလီၢ် ပ​ကြၢး​ဆိကမိၣ်​ကွၢ် ပှၤ​တဂၤ​စုာ်စုာ် အ​တၢ်အိၣ်သး ဒီး​အ​တၢ်ထံၣ်​တဖၣ်​န့ၣ်​လီၤ.

၉. ပ​တ​ကြၢး​အိၣ်ဒီး တၢ်​ဆိကမိၣ်​ ဒ်လဲၣ်. တဲ​ဖျါထီၣ်​တက့ၢ်.

^၉ ဖဲ​န​ထံၣ်​လိာ်သး​ဒီး ပှၤ​တဂၤဂၤ လၢ​တၢ်​စံၣ်တဲၤ​တဲလီၤ​တၢ်မၤ​အ​ပူၤ​အခါ တဘၣ်​ဆိကမိၣ်​လၢ န​သ့ၣ်ညါ အဝဲသ့ၣ်​အ​တၢ်အိၣ်သး မ့တမ့ၢ် အ​တၢ်နာ် ဒီး​ဘၣ်​မနုၤ​အဃိ အ​နာ်ဝဲ​ဒ်​န့ၣ်​လဲၣ်​ န့ၣ်​တဂ့ၤ. (ကတိၤဒိ ၁၈:၁၃) လၢတၢ်န့ၣ်​အလီၢ် ဘၣ်ဃး​ဒီး​အဝဲသ့ၣ်​ ဒီး​အ​တၢ်နာ်​အဂ့ၢ်​န့ၣ်​ သံကွၢ်​အီၤ​သ့​သ့​ဘၣ်​ဘၣ်​လၢ တၢ်ကူၣ်သ့​အ​ပူၤ​တက့ၢ်. (ကတိၤဒိ ၂၀:၅) လၢ​န​တၢ်ဆဲး​တၢ်လၤ​အ​ဖီခိၣ်​ မ့ၢ်​ကြၢး​မ့ၢ်​ဘၣ်​လၢ န​က​သံကွၢ်​ပှၤဂၤ အ​တၢ်ထံၣ်, အ​တၢ်​လဲၤခီဖျိ, အ​တၢ်ဖံး​တၢ်မၤ ဒီး​အဟံၣ်​ဖိ​ဃီဖိ​အဂ့ၢ်​န့ၣ်​ န​သံကွၢ်​သ့​လီၤ. ပ​မ့ၢ်​သံကွၢ်​အဝဲသ့ၣ်​ တၢ်​သံကွၢ်​န့ၣ်​ ပ​က​သ့ၣ်ညါ​ဘၣ်​လၢ ဘၣ်​မနုၤ​အဃိ အဝဲသ့ၣ်​ လိၣ်ဘၣ်​နၢ်ဟူ တၢ်သးခု​ကစီၣ်​လဲၣ်န့ၣ်​လီၤ. ဒီး​ပ​မ့ၢ်​သ့ၣ်ညါ တၢ်​သ့ၣ်​တဖၣ်​အံၤန့ၣ်​ ပ​ပာ်ဖျါ​ထီၣ်​ တၢ်​ဒိသူၣ်​ဒိသး လၢ​အဝဲသ့ၣ်​အ​ဖီခိၣ်​က​သ့ ဒီး​တၢ်​လၢ​အဝဲသ့ၣ်​ လိၣ်ဘၣ်​ဝဲ​တဖၣ်​န့ၣ်​ ပ​မၤစၢၤ​အီၤ ဒ်​ယ့ၣ်ၡူး​မၤဝဲ​အသိး က​သ့​လီၤ.—ထိၣ်သတြီၤ​ဒီး ၁ ကရံၣ်သူး ၉:၁၉-၂၃ တက့ၢ်.

၁၀-၁၁. ဒ် ၂ ကရံၣ်သူး ၄:၇, ၈ ပာ်ဖျါ​ထီၣ်ဝဲ​အသိး ကျဲ​ခံဘိတဘိ​လၢ ပ​ပာ်ဖျါ​ထီၣ်​ တၢ်​ဒိသူၣ်​ဒိသး​သ့​န့ၣ်​ မ့ၢ်​မနုၤ​လဲၣ်. ဟ့ၣ်​တၢ်အဒိ​တက့ၢ်.

 ^၁၀ ခံ​မံၤ​တမံၤ​န့ၣ်​ ထံၣ်တမှံ​ကွၢ်​လၢ အဝဲသ့ၣ်​အ​တၢ်အိၣ်မူ​န့ၣ်​ မၤ​အသး​ဒ်လဲၣ်​န့ၣ်​တက့ၢ်. ပ​မ့ၢ်​ပှၤ​တလၢ​တ​ပှဲၤ​အဃိ ပဝဲ​စ့ၢ်ကီး ပ​တ​ပူၤ​ဒီး တၢ်ကီ​တၢ်ခဲ​နီ​တဂၤ​ဘၣ်. အဃိ ပ​နၢ်ပၢၢ်​အဝဲသ့ၣ်​ အ​တၢ်အိၣ်သး​သ့​လီၤ. (၁ ကရံၣ်သူး ၁၀:၁၃) ပ​သ့ၣ်ညါ​လၢ တၢ်အိၣ်မူ​လၢ ဆၢကတီၢ်​ခဲအံၤ​န့ၣ်​ ကီခဲ​ဒိၣ်မး​လီၤ. ပ​လဲၤခီဖျိ တၢ်ကီ​တၢ်ခဲ​တဖၣ်​အံၤ န့ၢ်​ထဲ​လၢ ယဟိဝၤ​ယွၤ အ​တၢ်မၤစၢၤ​အဃိ​လီၤ. (ဖး ၂ ကရံၣ်သူး ၄:၇, ၈ တက့ၢ်.) ဆိကမိၣ်​ကွၢ် ပှၤလၢ​တအိၣ်​ဒီး​တၢ်​ရ့လိာ်သး​ဒီး ယဟိဝၤ​ယွၤ ဘူးဘူး​တံၢ်​တဖၣ်​ အဂ့ၢ်​န့ၣ်​တက့ၢ်. အဝဲသ့ၣ်​ တအိၣ်​ဒီး​တၢ်​ရ့လိာ်သး​ဒီး​ကစၢ်​ယွၤ ဘူးဘူး​တံၢ်တံၢ်​အဃိ က​လဲၤခီဖျိ​ဝဲ အ​တၢ်ကီ​တၢ်ခဲ​တဖၣ်​အဂီၢ် ကကီ​ဝဲ​ဒိၣ်မး​လီၤ. ဒ်​ယ့ၣ်ၡူး​အသိး ပ​သးကညီၤ​ဘၣ်​အဝဲသ့ၣ်​ ဒီး​ပ​အဲၣ်ဒိး စံၣ်တဲၤ​တဲလီၤ​အဝဲသ့ၣ်​လၢ “တၢ်သးခု . . . အ​ကစီၣ်” လီၤ.—ယၡါယၤ ၅၂:၇, ခ့ခါစှီၤကျိာ်.

^၁၁ ဆိကမိၣ်​ကွၢ် ဒီပုၢ်ဝဲၢ်​ခွါ​စၤ​က့ အဂ့ၢ်​တက့ၢ်. တချုး​လၢ အဝဲ​သ့ၣ်ညါ တၢ်မ့ၢ်​တၢ်တီ​ဒံး​ဘၣ်​န့ၣ်​ အမ့ၢ်​ပှၤလၢ အ​မဲာ်ဆှး​ဒီး အဲၣ်ဒိး​အိၣ်​ကစုဒု ထဲ​တဂၤဧိၤ​လီၤ. အဝဲ က​တဲတၢ်​ဒီး​ပှၤဂၤ​အဂီၢ် ကီဒိၣ်မး​လီၤ. လၢခံ​န့ၣ်​ အဝဲ​မၤလိ လံာ်စီဆှံ ဒီး​တဲဝဲ​လၢ “ဖဲ​ယ​မၤလိ​လံာ်စီဆှံ​အခါ ယ​သ့ၣ်ညါ​ထီၣ်​လၢ ခရံာ်ဖိ​တဖၣ်​န့ၣ်​ အိၣ်ဒီး​မူဒါ​လၢ က​ဘၣ်​ဟး​တဲဘၣ်​ပှၤဂၤ လၢ​အ​တၢ်နာ်​အဂ့ၢ်​လီၤ. ယ​ဆိကမိၣ်​လၢ ယ​မၤ​ဒ်​န့ၣ်​ တ​သ့​နီတဘျီ​ဘၣ်.” ဘၣ်ဆၣ်​ အဝဲ​ဆိကမိၣ်​ဝဲ ပှၤလၢ​အ​တ​နၢ်ဟူ​ဘၣ်​ဒံး တၢ်သးခု​ကစီၣ်​တဖၣ်​အဂ့ၢ်​လီၤ. ဒီး​အဝဲ​သ့ၣ်ညါ​ထီၣ်ဝဲ​လၢ ခီဖျိ​လၢ အဝဲသ့ၣ်​ တ​သ့ၣ်ညါ ယဟိဝၤ​ယွၤ​အဃိ အ​တၢ်အိၣ်မူ ကကီ​ထဲလဲၣ်​န့ၣ်​လီၤ. အဃိ စၤ​က့​တဲဝဲ​လၢ “ယ​သးခု ဒီး​ယ​သူၣ်မံ​သးမုာ် ခီဖျိ​တၢ်​လၢ​ယ​မၤလိ​ဘၣ်​တဖၣ်​ အဃိ​လီၤ. ဒီး​ယ​သ့ၣ်ညါ​လၢ ပှၤဂၤ​တဖၣ်​စ့ၢ်ကီး လိၣ်ဘၣ်​ဝဲ တၢ်မ့ၢ်​တၢ်တီ​တဖၣ်​အံၤ​လီၤ.” ဖဲ​စၤ​က့ အ​တၢ်​ဒိသူၣ်​ဒိသး​ပှၤဂၤ အါထီၣ်​အခါ အဝဲ​အ​တၢ်သးဒူ​ဟဲ​အါထီၣ်​ လၢ​က​စံၣ်တဲၤ​တဲလီၤ​တၢ်​အဂီၢ်​လီၤ. အဝဲ​တဲဝဲ​လၢ “ယ​တဲပၠး​ပှၤဂၤ လံာ်စီဆှံ​အဂ့ၢ်​အဃိ ယ​တၢ်သးဒူ ဟဲ​အါထီၣ်​ဝဲ​လီၤ. ဖဲ​ယ​တဲဘၣ်​ပှၤဂၤ လၢ​ယ​တၢ်နာ်​အခါ ယ​တၢ်နာ်​ဂၢၢ်ကျၢၤ​ထီၣ်ဝဲ​လီၤ. အဃိ ယ​ကမၢ​ကမၣ်​ဒိၣ်မး​လီၤ.” *

၁၂-၁၃. ဖဲ​ပ​သိၣ်လိ​ပှၤဂၤ လံာ်စီဆှံ​အခါ ဘၣ်​မနုၤ​အဃိ ပ​က​ဘၣ်​အိၣ်ဒီး တၢ်​သူၣ်စူၤ​သးစူၤ​လဲၣ်. ဟ့ၣ်​တၢ်အဒိ​တက့ၢ်.

^၁၂ သၢ​မံၤ​တမံၤ​န့ၣ်​ အိၣ်ဒီး​တၢ်​သူၣ်စူၤ​သးစူၤ​လၢ ပှၤလၢ​န​သိၣ်လိ​အီၤ​တဖၣ်​ အ​ဖီခိၣ်​တက့ၢ်. သ့ၣ်နီၣ်​ထီၣ်​လၢ တၢ်မ့ၢ်​တၢ်တီ​တနီၤ​လၢ ပ​သ့ၣ်ညါ​အီၤ​ဂ့ၤဂ့ၤ​တဖၣ်​န့ၣ်​ အဝဲသ့ၣ်​ တ​ဆိကမိၣ်​ဘၣ်​ဝဲ နီတဘျီ​ဘၣ်​န့ၣ်​တက့ၢ်. ဒီး​အဝဲသ့ၣ်​ အါတက့ၢ်န့ၣ်​ အ​တၢ်နာ် အဂံၢ်​စဲၤလီၤ​လၢ​အသး​ပူၤ ဖး​ယိာ်​လံ. ဒီး​အဝဲသ့ၣ်​ထံၣ်ဝဲ​လၢ အ​တၢ်ဘူၣ်​တၢ်ဘါ​န့ၣ်​ မ့ၢ်​တၢ်​အရ့ဒိၣ်​ဒိၣ်မး​တခါ လၢ​အ​မၤ​ဘူးထီၣ်​အဝဲသ့ၣ်​ဒီး အဟံၣ်​ဖိ​ဃီဖိ, အ​တၢ်ဆဲး​တၢ်လၤ ဒီး​ပှၤလၢ​အခိၣ်​အ​ဃၢၤ​တဖၣ်​လီၤ. မ့မ့ၢ်​ဒ်​န့ၣ်​န့ၣ်​ ပ​မၤစၢၤ​အဝဲသ့ၣ်​ က​သ့​ဒ်လဲၣ်.

^၁၃ ဆိကမိၣ်​ကွၢ် တၢ်အဒိ​လၢ ဘၣ်ဃး​ဒီး တိၤ​လီၢ်လံၤ​တဘိ လၢ​အ​တဂ့ၤ အါအါ​လၢၤဘၣ်​န့ၣ်​တက့ၢ်. ဖဲ​ပှၤ​တ့ထီၣ်​ တိၤ​လၢ​အသီ​အဆၢ​ကတီၢ် ပှၤ​က​ဆဲး​သူ​ဒံး တိၤ​လၢ​အလီၢ်လံၤ​အံၤ​လီၤ. ဒီး​ပှၤ​တ့ထီၣ်​ တိၤ​အသီ​မ့ၢ်ဝံၤ​မး ပှၤ​က​မၤ​ဟးဂီၤ​ကွံာ် တိၤ​လၢ​အလီၢ်လံၤ​အံၤန့ၣ်​လီၤ. ဒ်​န့ၣ်​အသိး ပ​မ့ၢ်​အဲၣ်ဒိး​လၢ ပှၤ​တဂၤ က​ပာ်တ့ၢ်​ကွံာ်​အ​တၢ်နာ်​လၢ “အလီၢ်လံၤ” န့ၣ်​ပ​က​ဘၣ်​မၤစၢၤ​အီၤ​ဒ်သိး အဝဲ​က​သ့ၣ်ညါ​ထီၣ်​ဒီး​အဲၣ်ဝဲ လံာ်စီဆှံ​အ​တၢ်မ့ၢ်​တၢ်တီ “အသီ” လၢ​အ​ပူၤကွံာ် အဝဲသ့ၣ်​ တ​သ့ၣ်ညါ​ဝဲ​တဖၣ်​န့ၣ်​လီၤ. ပ​မ့ၢ်​မၤ​ဒ်​န့ၣ်​မး အဝဲသ့ၣ်​က​သးအိၣ်​ ပာ်တ့ၢ်​ကွံာ် အ​တၢ်နာ်​လၢ​အ​ပူၤကွံာ်​တဖၣ်​လီၤ. ဒ်သိး​ပ​က​မၤစၢၤ​အဝဲသ့ၣ်​ လၢ​က​မၤတၢ်​ဆီတလဲ​ဒ်အံၤ​အဂီၢ် တၢ်​ဆၢကတီၢ်​က​လိၣ်​ဝဲ​လီၤ.—ရိမ့ၤ ၁၂:၂.

၁၄-၁၅. ပှၤလၢ​အ​သ့ၣ်ညါ တၢ်​မုၢ်လၢ်​လၢ ပ​က​အိၣ်မူ​ဘၣ်​လီၤထူ​လီၤယိာ်​လၢ ပၤရဒံစူး​အ​ပူၤ​အဂ့ၢ် ထဲ​တစဲးဖိ မ့တမ့ၢ် တ​သ့ၣ်ညါ​ဝဲ နီ​တစဲး​တဖၣ်​န့ၣ်​ ပ​မၤစၢၤ​အီၤ က​သ့​ဒ်လဲၣ်. ဟ့ၣ်​တၢ်အဒိ​တက့ၢ်.

^၁၄ လၢ​ပ​တၢ်​စံၣ်တဲၤ​တဲလီၤ​တၢ်မၤ​အ​ပူၤ ပ​မ့ၢ်​အိၣ်ဒီး​တၢ်​သူၣ်စူၤ​သးစူၤ​န့ၣ်​ ပ​တ​မုၢ်လၢ်​လၢ ပှၤ​က​နၢ်ပၢၢ် မ့တမ့ၢ် တူၢ်လိာ်​လံာ်စီဆှံ အ​တၢ်မ့ၢ်​တၢ်တီ တဘျီဃီ​ဘၣ်. ပ​ကအိၣ်​ဒီး တၢ်​ဒိသူၣ်​ဒိသး ဒီး​မၤစၢၤ​အဝဲသ့ၣ်​ ဒ်သိး​က​ဆိကမိၣ်​ထံ​ဝဲ တၢ်​လၢ​လံာ်စီဆှံ တဲဝဲ​တဖၣ်​ ကယီ​ကယီ​လီၤ. အဒိ ဆိကမိၣ်​ကွၢ်​လၢ ပ​က​မၤစၢၤ ပှၤ​တဂၤဂၤ ဒ်သိး​က​နၢ်ပၢၢ်ထီၣ်​ဝဲ တၢ်​မုၢ်လၢ်​လၢ ပ​က​အိၣ်မူ​ဘၣ်​ လီၤထူ​လီၤယိာ်​လၢ ဟီၣ်ခိၣ်​ပၤရဒံစူး​အဂ့ၢ်​န့ၣ်​တက့ၢ်. ပှၤ​တနီၤနီၤ​န့ၣ်​ က​သ့ၣ်ညါ​ဝဲ တၢ်ဂ့ၢ်​အံၤ​တစဲး ဒီး​တနီၤနီၤ​န့ၣ်​ တ​သ့ၣ်ညါ​ဝဲ​နီ​တစဲး​ဘၣ်. ဘၣ်​သ့ၣ်​သ့ၣ်​ အဝဲသ့ၣ်​ က​ဆိကမိၣ်​ဝဲ​လၢ ပှၤလၢ​အ​သံ​န့ၣ်​ အိၣ်မူ​ဘၣ်​က​ဒီး​အသီ​တဘျီ တ​သ့​လၢၤဘၣ်. မ့တမ့ၢ် ဘၣ်​သ့ၣ်​သ့ၣ်​ အဝဲသ့ၣ်​ က​ဆိကမိၣ်​ဝဲ​လၢ ပှၤလၢ​အ​မၤ​တၢ်ဂ့ၤ​ကိးဂၤ​ဒဲး​န့ၣ်​ က​ထီၣ်ဘၣ်​ဆူ​မူခိၣ်​လီၤ. ပ​မၤစၢၤ​အဝဲသ့ၣ်​ က​သ့​ဒ်လဲၣ်.

^၁၅ ဒ်သိး​ပှၤဂၤ​က​နၢၢ်​ပၢၢ်ထီၣ်​လၢ အဝဲသ့ၣ်​အိၣ်ဒီး​တၢ်​မုၢ်လၢ် လၢ​က​အိၣ်မူ​ဘၣ်​လီၤထူ​လီၤယိာ်​လၢ ဟီၣ်ခိၣ်​ချၢ​အဂီၢ် ဒီပုၢ်ဝဲၢ်​တဂၤ မၤစၢၤ​အဝဲသ့ၣ်​ ဒ်အံၤ​လီၤ. အဆိ​ကတၢၢ်​န့ၣ်​ အဝဲ​ဖး​ဝဲ ၁ မိၤၡ့ ၁:၂၈ ဒီး​သံကွၢ်ဝဲ ဟံၣ်​ကစၢ်​လၢ ကစၢ်​ယွၤ​အဲၣ်ဒိး​လၢ ပှၤ​ဟီၣ်ခိၣ်​ဖိ​တဖၣ်​ က​အိၣ်မူ​ဘၣ်​ဖဲလဲၣ်​ ဒီး​က​အိၣ်မူဘၣ်ဝဲ​ဒ်လဲၣ်. ဖဲ​န့ၣ်​န့ၣ်​ အဝဲသ့ၣ်​အါတက့ၢ် စံးဆၢ​ဝဲ​လၢ “လၢ​ဟီၣ်ခိၣ်​ချၢ, ဒီး​ကအိၣ်​ဘၣ်​ဝဲ မုာ်မုာ်​ခုၣ်ခုၣ်” လီၤ. ဒီး​ဒီပုၢ်ဝဲၢ်​ခွါ​အံၤ ဖး​က​ဒီး​ဝဲ ယၡါယၤ ၅၅:၁၁ ဝံၤ​သံကွၢ်ဝဲ​လၢ မ့ၢ်​ကစၢ်​ယွၤ​အ​တၢ်တိာ်ပာ်​အံၤ ဆီတလဲ​လံဧါ. ဟံၣ်​ကစၢ်​အါဂၤ စံးဆၢ​ဝဲ​လၢ တဆီ​တ​လဲ​ဘၣ်. ဒီး​ဒီပုၢ်ဝဲၢ်​ခွါ​အံၤ ဖး​က​ဒီး​ဝဲ စံးထီၣ်​ပတြၢၤ ၃၇:၁၀, ၁၁ ဒီး​သံကွၢ်ဝဲ​လၢ ခါဆူညါ​န့ၣ်​ ပှၤ​ဟီၣ်ခိၣ်​ဖိ​တဖၣ်​အ​တၢ်အိၣ်မူ က​မၤ​အသး​ဒ်လဲၣ်. ဒီပုၢ်ဝဲၢ်​တဂၤ​အံၤ သူဝဲ​လံာ်စီဆှံ​အဆၢ​တဖၣ်​အံၤ ဒီး​မၤစၢၤ​ပှၤ​အါဂၤ ဒ်သိး​အဝဲသ့ၣ်​ က​နၢ်ပၢၢ်ထီၣ်​ဝဲ​လၢ ကစၢ်​ယွၤ​အဲၣ်ဒိး​လၢ ပှၤလၢ​အဂ့ၤ​တဖၣ်​ က​အိၣ်မူ​ဘၣ်​ လီၤထူ​လီၤယိာ်​လၢ ဟီၣ်ခိၣ်​ပၤရဒံစူး​အ​ပူၤ​ဒံး​လီၤ.

၁၆-၁၇. ဒ် ကတိၤဒိ ၃:၂၇ တဲဝဲ​အသိး ပ​ပာ်ဖျါ​ထီၣ်​ တၢ်​ဒိသူၣ်​ဒိသး လၢ​ကျဲ​လၢ​အ​ကဲဘျုး​တဖၣ်​ က​သ့​ဒ်လဲၣ်. ဟ့ၣ်​တၢ်အဒိ​တက့ၢ်.

^၁၆ လွံၢ်မံၤ​တမံၤ​န့ၣ်​ ဃုကျဲ​လၢ န​က​ပာ်ဖျါ​ထီၣ်​လၢ န​သူၣ်အိၣ်​သးအိၣ်​ ပှၤဂၤ​န့ၣ်​တက့ၢ်. အဒိ ဖဲ​န​လဲၤ​လၢ ဟံၣ်​ကစၢ်​အ​အိၣ်​အခါ မ့ၢ်​န​ထံၣ်ဘၣ်​လၢ အဝဲသ့ၣ်​တချုး​ဘၣ်​ အ​နီၢ်ကီၢ် အိၣ်​တဘျီဘျီ​ဧါ. မ့မ့ၢ်​ဒ်​န့ၣ်​န့ၣ်​ ဃ့​ဝံသးစူၤ​အီၤ ဒီး​တဲ​အီၤ​လၢ န​က​ဟဲက့ၤ​လၢ တၢ်​ဆၢကတီၢ်​အဂၤ​န့ၣ်​တက့ၢ်. ဒီး​အဂၤ​တမံၤ​န့ၣ်​ န​မ့ၢ်​ထံၣ်​လၢ ဟံၣ်​ကစၢ်​လိၣ်ဘၣ်​တၢ်မၤစၢၤ တစဲး​တ​မှဲး​န့ၣ်​ န​မၤစၢၤ​အီၤ​သ့​လီၤ. တကးဒံးဘၣ်​ န​မ့ၢ်​ထံၣ်ဘၣ်​ ပှၤလၢ​အ​အိၣ်​တ​ဆူၣ်​ဘၣ်​ မ့တမ့ၢ် အသး​ပှၢ်​အဃိ ဟးထီၣ်​ဟးလီၤ​တကဲ​ဘၣ်​န့ၣ်​ န​မၤစၢၤ​အဝဲသ့ၣ်​သ့​လီၤ.—ဖး ကတိၤဒိ ၃:၂၇ တက့ၢ်.

 ^၁၇ ဒီပုၢ်ဝဲၢ်​မုၣ်​တဂၤ မၤစၢၤ​ပှၤဂၤ​လၢ တၢ်​သးကညီၤ​အ​ပူၤ ဒီး​အ​တၢ်မၤစၢၤ​န့ၣ်​ ဖျါ​လၢ​အမ့ၢ်​တၢ်​ဆံး​ဆံး​ဖိ​ဘၣ်ဆၣ်​ ကဲဘျုး​ဝဲ​ဒိၣ်မး​လီၤ. လၢ​ဟံၣ်ဖိ​ဃီဖိ​တဒူၣ်​န့ၣ်​ ပှၤ​ဖိသၣ်​တဂၤ ဟဲ​အိၣ်ဖျဲၣ်​ထီၣ်​ဝံၤ သံဝဲ​တနံၤ​ဃီ​လီၤ. ဖဲ​န့ၣ်​အဆၢ​ကတီၢ် ဒီပုၢ်ဝဲၢ်​မုၣ်​တဂၤ​အံၤ သူၣ်အိၣ်​သးအိၣ်​အဝဲသ့ၣ်​အဃိ ကွဲး​လံာ်​ဆူ အဝဲသ့ၣ်​အ​အိၣ်​ ဒီး​ကွဲး​ဟ့ၣ်ဂံၢ်​ဟ့ၣ်ဘါ​ဃုာ်ဝဲ ဒီး​လံာ်စီဆှံ​အဆၢ​တဖၣ်​လီၤ. လံာ်​တဘ့ၣ်​အံၤ ကဲဘျုး​လၢ အဝဲသ့ၣ်​အဂီၢ်​ဒ်လဲၣ်. မိၢ်​လၢ​အ​သူၣ်အုး​သးအုး​တဂၤ​အံၤ ကွဲးဆၢက့ၤ​ဒီပုၢ်ဝဲၢ်​မုၣ်​လၢ “ဖဲ​မ​ဟါ​န့ၣ်​ ယ​သူၣ်အုး​သးအုး​ဒိၣ်မး, န​လံာ်​တဘ့ၣ်​အံၤ ကဲထီၣ်​တၢ်မၤစၢၤ​လၢ​ပဂီၢ်​ထဲလဲၣ်​န့ၣ်​ ယ​ဆိကမိၣ်​ န​တ​သ့ၣ်ညါ​ဘၣ်. န​လံာ်​တဘ့ၣ်​အံၤန့ၣ်​ မၤမုာ်​ထီၣ်​ပ​သး​ဒိၣ်မး​အဃိ ယ​စံးဘျုး​နၤ ဒိၣ်မး​လီၤ. ဖဲ​မ​ဟါ​န့ၣ်​ ယ​ဖး​န​လံာ်​တဘ့ၣ်​အံၤ အစှၤကတၢၢ် ကအိၣ်​အဘျီ ၂၀ ညါ. န​တၢ်ကတိၤ​လၢ အပှဲၤ​ဒီး​တၢ်အဲၣ်​တၢ်ကွံ, တၢ်​သူၣ်အိၣ်​သးအိၣ်​ ဒီး​တၢ်​ဟ့ၣ်ဂံၢ်​ဟ့ၣ်ဘါ​တဖၣ်​အဃိ ယ​ကမၢ​ကမၣ်​ဒိၣ်မး. ပ​စံးဘျုး​နၤ လၢ​ပ​သးဒီဖျၢၣ်​လီၤ.” ပ​မ့ၢ်​ကွၢ် တၢ်​လဲၤခီဖျိ​တခါ​အံၤန့ၣ်​ ပ​သ့ၣ်ညါ​ဘၣ်​လၢ ပ​မ့ၢ်​ဂုာ်ကျဲးစၢး နၢ်ပၢၢ်စၢၤ​ပှၤဂၤ အ​တၢ်ကီ​တၢ်ခဲ ဒီး​မၤစၢၤ​အဝဲသ့ၣ်​ တမံၤမံၤ​န့ၣ်​ ပ​နာ်​သ့​သပှၢ်​ကတၢၢ်​လၢ ပ​က​ဒိးန့ၢ်​ဘၣ်​အဘျုး​လီၤ.

၁၈. ဒ် ၁ ကရံၣ်သူး ၃:၆, ၇ ပာ်ဖျါ​ထီၣ်ဝဲ​အသိး ဘၣ်ဃး​ဒီး တၢ်​စံၣ်တဲၤ​တဲလီၤ​တၢ်မၤ​န့ၣ်​ ပ​က​ဘၣ်​သ့ၣ်နီၣ်​ထီၣ်​ တၢ်မနုၤ​လဲၣ်​ ဒီး​ဘၣ်​မနုၤ​အဃိ​လဲၣ်.

^၁၈ လၢ​ပ​တၢ်​စံၣ်တဲၤ​တဲလီၤ တၢ်မၤ​အ​ပူၤ​န့ၣ်​ ပ​က​ဘၣ်​အိၣ်ဒီး တၢ်ထံၣ်​လၢ​အကြၢး​အဘၣ်​လီၤ. ဒ်သိး​ပှၤဂၤ​က​သ့ၣ်ညါ​ထီၣ်​ ကစၢ်​ယွၤ​အဂီၢ် ပ​မၤစၢၤ​အဝဲသ့ၣ်​သ့ဝဲ​လီၤ. (ဖး ၁ ကရံၣ်သူး ၃:၆, ၇ တက့ၢ်.) ဘၣ်ဆၣ်​ ပ​က​ဘၣ်​သ့ၣ်နီၣ်​လၢ ယဟိဝၤ​ယွၤ​န့ၣ်​ မ့ၢ်​ပှၤလၢ အ​မိၤ​ပှၤဂၤ ဒ်သိး​က​ဟဲ​ဆူ​အ​အိၣ်​န့ၣ်​လီၤ. (ယိၤဟၣ်​ ၆:၄၄) ပှၤ​တဂၤ က​တူၢ်လိာ်​တၢ်သးခု​ကစီၣ်​ဧါ, တ​တူၢ်လိာ်​ဧါ​န့ၣ်​ ဒိးသန့ၤ​ထီၣ်​အသး​လၢ အ​တၢ်​ပာ်သူၣ်​ပာ်သး​အ​ဖီခိၣ်​လီၤ. (မးသဲ ၁၃:၄-၈) သ့ၣ်နီၣ်​ထီၣ်​လၢ ယ့ၣ်ၡူး​မ့ၢ်​သရၣ်​လၢ အ​ဒိၣ်ကတၢၢ်​ဒၣ်လဲာ် ပှၤ​အါတက့ၢ်န့ၣ်​ တ​တူၢ်လိာ် အ​တၢ်သးခု​ကစီၣ်​ဘၣ်. လၢတၢ်န့ၣ်​အဃိ ဖဲ​ပ​ဟး​စံၣ်တဲၤ​တဲလီၤ​တၢ်​အခါ ပှၤ​မ့ၢ်​တ​ဒိကနၣ်​ပှၤ​န့ၣ်​ ပ​တ​လိၣ်​ သးဟးဂီၤ​ဘၣ်.

၁၉. လၢ​ပ​တၢ်​စံၣ်တဲၤ​တဲလီၤ​တၢ်မၤ​အ​ပူၤ ပ​မ့ၢ်​ပာ်ဖျါ​ထီၣ်​ တၢ်​ဒိသူၣ်​ဒိသး​န့ၣ်​ ပ​က​ဒိးန့ၢ်​ဘၣ်​ အဘျုး​ဒ်လဲၣ်.

^၁၉ လၢ​ပ​တၢ်​စံၣ်တဲၤ​တဲလီၤ​တၢ်မၤ​အ​ပူၤ ပ​မ့ၢ်​ပာ်ဖျါ​ထီၣ်​ တၢ်​ဒိသူၣ်​ဒိသး​န့ၣ်​ ပ​က​ဒိးန့ၢ်​ဘၣ်​အဘျုး ဒီး​ပ​စံၣ်တဲၤ​တဲလီၤ​တၢ် ကမုာ်​ဒိၣ်ထီၣ်​လီၤ. ဒီး​ပ​က​ထံၣ်ဘၣ်​လၢ ပ​ဟ့ၣ်​တၢ်​အဃိ ပ​ဒိးန့ၢ်​ဘၣ်​ တၢ်သးခု​လီၤ. ဒီး​ပ​မ့ၢ်​အိၣ်ဒီး တၢ်​ဒိသူၣ်​ဒိသး​န့ၣ်​ ပှၤလၢ “တၢ်​ပာ်​အီၤ လၢ​အ​က​န့ၢ်ဘၣ်​တၢ်မူ လီၤထူ​လီၤယိာ်” တဖၣ်​က​တူၢ်လိာ်​တၢ်မ့ၢ်​တၢ်တီ​အဂီၢ် ကညီ​ဝဲ​လီၤ. (မၤတၢ် ၁၃:၄၈) အဃိ “ဖဲ​ပ​အိၣ်​ ဒီး​အဆၢ​ကတီၢ်​န့ၣ်, မ်​ပ​မၤဂ့ၤ​တၢ်​လၢ ပှၤကညီ​ကိးဂၤ​ဒဲး​တက့ၢ်.” (ကလၤတံ ၆:၁၀) ပ​မ့ၢ်​မၤ​ဒ်​န့ၣ်​န့ၣ်​ မ့ၢ်​ပ​မၤ​လၤကပီၤ ပ​ပၢ်​အိၣ်​လၢ​မူခိၣ်​အဃိ ပ​က​ဒိးန့ၢ်​ဘၣ်​ တၢ်သးခု​လီၤ.—မးသဲ ၅:၁၆.