1. Akieyi i kimosi muna fu ya Yesu tutoma yangalelanga? Sasila.

KIMOSI muna fu ya Yesu tutoma yangalelanga i kia bakula e mpasi zina wantu alembi lunga benuananga zau. Vava kakala ova ntoto, Yesu ‘wakembesanga awana bakembanga yo dila ye awana badilanga.’ (Roma 12:15) Kasikil’owu, vava 70 lwa alongoki andi batuka muna salu kia umbangi yo kunzayisa kuna kiese kiawonso e nluta babaka, Yesu ‘wayangalala kikilu muna mwand’avelela.’ (Luka 10:17-21) Kuna diak’e sambu, vava kamona o wantu bakendalala mu kuma kia lufwa lwa Lazaro, Yesu “ovumukini muna ntima, o moyo andi utelamene.”—Yoa. 11:33.

2. Nki kiafilanga Yesu mu fwila wantu e nkenda?

² Kana una vo Yesu muntu alunga kakala, wafwilanga wantu alembi lunga e nkenda. Nki kiamfilanga mu vanga wo? Kimosi muna fu kiamfilanga i zola kwandi muna wantu. Nze una tulongokele muna longi diaviokele, edi ditoma twasilanga Yesu e kiese i wan’a wantu. (Nga. 8:31) O zola kwaku kwansadisa mu toma bakula e ngindu za wantu. Yoane wa ntumwa wavova vo Yesu “wazayanga mana mena muna ntim’a muntu.” (Yoa. 2:25) Yesu wafwilanga akaka e nkenda. O wantu bamonanga o zola kwandi, ediadi diabafila mu tambulwila e nsangu za Kintinu. Avo tusongele mpe o zola muna wantu, nluta miayingi tuvua muna salu kieto kia samuna e nsangu zambote.—2 Tim. 4:5.

3-4. (a) Avo tukedi ye fu kia fwila akaka e nkenda, aweyi tubadikila e salu kia umbangi? (b) Adieyi tuvovela mu longi diadi?

³ Paulu wa ntumwa wazayanga wo vo mbebe kakala yau ya samuna e nsangu zambote. Oyeto mpe mbebe yayi tuna yau. (1 Kor. 9:16) Kansi, avo tuyimini e fu kia fwila wantu e nkenda, ke tubadikila kaka e salu kieto ko nze mbebe. Tusonga vo tutokanenanga e wete dia wantu yo kala yo luzolo lwa kubasadisa.  Tuzeye wo vo “edi disundidi e kiese dia vana, ke mu tambula ko.” (Mav. 20:35) Avo tusungamene diambu diadi vava tusamunanga e nsangu zambote, tutoma yangalela e salu kiaki.

⁴ Mu longi diadi, tuvovela una tulenda songela vo tufwilanga wantu e nkenda muna salu kia umbangi. Entete, tuzaya mana tulenda longoka muna mpila ina Yesu kabadikilanga wantu. I bosi, tuvovela mpila yá tulenda tanginina e mbandu andi.—1 Pet. 2:21.

5-6. (a) Aki nani o Yesu kafwila e nkenda? (b) Mun’owu wa sono kia Yesaya 61:1, 2, adieyi diafila Yesu mu fwila wantu e nkenda?

⁵ Yindula e nona kisonganga una Yesu katokanenanga e wete dia wantu. Lumbu kimosi, Yesu ye alongoki andi bayoya bakala kadi ola zayingi bavanga muna salu kia samuna e nsangu zambote. Ke bakala nkutu ye “ntangwa ya dia ko.” Muna kuma kiaki, Yesu wanata alongoki andi “va yau kaka kuna makanga” kimana ‘bavunda fiakete.’ Kansi, ndong’ayingi yavita vana fulu kina Yesu ye alongoki andi bayendanga. Adieyi Yesu kavanga vava kabamona? ‘Wabafwila e nkenda * kadi bakala nze mameme makondwa mvungudi. Wayantika kubalonga mambu mayingi.’—Maku 6:30-34.

⁶ Ekuma Yesu kafwila wantu awaya e nkenda? O lusansu lusonganga vo wantu ‘bakala nze mameme makondwa mvungudi.’ Nanga Yesu wabakula vo akaka muna yau asukami, funtuka bafuntukanga muna dikila esi nzo zau. Akaka nanga bakendalala bakala mu kuma kia lufwa lwa azolw’au. Avo i wau, Yesu wayisia vana fulu kiau. Nze una twalongokele muna longi diaviokele, Yesu wamona mpe ezaka mpasi zazi. Yesu watokanenanga e wete dia wantu yo vanga mawonso mu kubasamunuina e nsangu za lufiaulwisu.—Tanga Yesaya 61:1, 2.

7. Aweyi tulenda tanginina e mbandu a Yesu?

⁷ Adieyi tulongokele muna mbandu a Yesu? Nze Yesu, wantu ana tuzinganga yau bena  “nze mameme makondwa mvungudi.” Mambu mayingi mampasi benuananga mau. Tuna ye lekwa kina bavuidi o mfunu, i sia vo, nsangu zambote za Kintinu. (Lus. 14:6) Muna kuma kiaki, tutangininanga o Mfumu eto muna samunanga e nsangu zambote kadi ‘tumwenanga nsukami yo nkondami e nkenda.’ (Nku. 72:13) Yambula twafwilanga wantu e nkenda yo vanga konso dina tulenda muna kubasadisa.

8. Ayeyi i mpila yantete tulenda songela e nkenda kwa wantu muna salu kia umbangi? Yika e nona.

⁸ Aweyi tulenda songela vo tufwilanga wantu e nkenda muna salu kia umbangi? Tufwete kuyisianga vana fulu kia wantu tusilanga o umbangi yo kadila yau muna mpila ina tuzolanga vo akaka bakadila yeto. * (Mat. 7:12) Yambula twavovela mpila yá tulenda wo vangila. Yantete, tokanenanga e nsatu za konso muntu. Tulenda tezanesa e salu kia samuna e nsangu zambote ye salu kina dotolo kesalanga. Dotolo diambote ovavanga zaya e nsatu za konso mbevo. Oyuvulanga e yuvu yo toma winikina ekolo mbevo kekunzayisanga e mpasi zandi. Vana fulu kia kumvana vana vau e nlongo mina kayindwidi, o dotolo diambote ovavanga teka zaya e kimbevo kia muntu, i bosi kekumvana e nlongo mimfwanukini. Diau dimosi mpe, ke tufwete sadilanga kaka ndekwa zau zimosi ko muna yantika e moko yo wantu muna salu kia umbangi. Tufwete vavanga zaya e mpil’a zingu kia konso muntu ye ngindu zandi.

9. Nkia diambu ke tufwete yindulanga ko avo tuwananene yo muntu muna salu kia umbangi? Adieyi i diambu diambote tufwete vanga?

⁹ Vava tuwanananga yo muntu muna salu kia umbangi, ke tufwete yindula vana vau ko vo tuzeye e mpil’a zingu kiandi yovo mana kekwikilanga ye kuma kekwikidilanga muna mambu mama. (Nga. 18:13) Kuna ndekwa zawonso, tulenda kunyuvula e yuvu ilenda kutusadisa mu toma zaya muntu ndioyu. (Nga. 20:5) Avo ke diambi ko muna zunga kieno, yuvula kwa muntu oma ma salu kiandi, esi nzo, una kasansukila yo vava zaya mpe ngindu zandi. E yuvu ya mpila yayi ilenda kutusadisa mu zaya e kuma muntu ndioyu kavuididi e nsangu zambote o mfunu. Avo tubakwidi e diambu diadi, dilenda kutusadisa mu kuyisia vana fulu kia wantu ankaka yo vanga diambu muna kubasadisa, nze una Yesu kavanga.—Tezanesa ye 1 Korinto 9:19-23.

10-11. Mun’owu wa sono kia 2 Korinto 4:7, 8, ayeyi i mpila yanzole tulenda songela e nkenda kwa wantu? Yika e nona.

¹⁰ Mpila yanzole i teza yindula e mpil’a zingu kiau. Muna mvovo miankaka, tulenda kuyisia vana fulu kiau. Wau vo yeto awonso tu wantu alembi lunga, mpasi zau zimosi tunuananga zau. (1 Kor. 10:13) Tuzeye wo vo e zingu  va nza yayi kiampasi kikilu. Muna lusadisu lwa Yave kaka i tulendelanga zizidila e mpasi zazi. (Tanga 2 Korinto 4:7, 8.) Se yindula awana ke bena ye kikundi kiasikila ko yo Yave. Diampasi kikilu kwa yau mu zingila mu nza yayi kondwa lusadisu lwandi. Nze Yesu, tufwete kubafwilanga e nkenda yo kubasamunuina e ‘nsangu zambote za diambu diambote.’—Yes. 52:7.

¹¹ Badika e nona kia mpangi mosi una ye nkumbu a Sergey. Vitila kazaya e ludi, mpangi Sergey nkwa nsoni kakala. Diampasi diakalanga kwa yandi mu mokena ye wantu. Kuna kwalanda, watambulwila longoka Nkand’a Nzambi. Mpangi Sergey wavova vo: “Ekolo yalongokanga e Bibila, yalongoka vo Akristu mbebe bena yau ya vovela oma ma lukwikilu lwau kw’akaka. Yayindulanga vo kisinga wo vanga ko.” Kana una vo i wau, mpangi Sergey wayindulanga awana ke bazeye e ludi ko. Wazaya wo vo e zingu kiau mu mpasi kikilu kina wau vo ke bazeye Yave ko. Wakudikila vo: “E mambu mampa yalongokanga mantwasila kiese ye luvuvamu lwa ntima. Yazaya wo vo wantu akaka bafwete longoka mpe e mambu mama.” Wau vo mpangi Sergey wayisia vana fulu kia wantu ankaka, ediadi diamvana unkabu wa samuna e nsangu zambote. Wavova diaka vo: “Yasivika kikilu kadi o zayisa kwa akaka mana yalongokanga muna Nkand’a Nzambi diansadisa mu lembi mona diaka e nsoni. Vana ntandu, e mambu mama matoma kota muna ntim’ame.” *

12-13. Ekuma tufwete songela luzindalalu kw’awana tulonganga? Yika e nona.

¹² E mpila yantatu i songanga luzindalalu kw’awana olonganga. Sungamenanga vo yeto tutoma bakulanga malongi ma Nkand’a Nzambi. Kansi wantu ayingi ke bawidi ntete malongi mama ko. Ayingi muna yau, betoma zolanga malongi mana bekwikilanga. Kuna kwa yau, e malongi mama i mau mekubayikakesanga ye yitu yau, fu yau ya kisi nsi yo wantu a zunga kiau. Aweyi tulenda kubasadisila?

 ¹³ Badika e nona eki: Adieyi divangamanga avo e kiamvu (yovo sau) kikitukidi se kiankulu? Nga ke divavanga ko vo vatungwa kiamvu kiankaka? Ekolo kitungwanga e kiamvu kiampa, o wantu bekwamanananga viokela vana kiamvu kiankulu. Avo e kiamvu kiampa kifokokele, kina kiankulu kilenda bangulwa. Diau dimosi mpe, vitila o wantu babaka e nzengo za bembola malongi mana bekwikilanga, entete tufwete kubasadisa batoma zaya yo zola malongi ma Nkand’a Nzambi mana ke bateka zaya ko. Mu mpila yayi kaka balenda bembolwela malongi mana bekwikilanga. Ntangwa divavanga muna sadisa wantu mu vanga e nsobani zazi.—Roma 12:2.

14-15. Aweyi tulenda sadisila muntu mu bakula oma ma vuvu kia zingila yakwele mvu muna paradiso ova ntoto? Yika e nona.

¹⁴ Ke tufwete vingila ko vo wantu batambulwila e ludi kia Nkand’a Nzambi muna nkumbu antete tukubasilanga umbangi. Muna kubasadisa bazaya mana Nkand’a Nzambi ulonganga, tufwete kala ye luzindalalu yo kuyisia vana fulu kiau. Muna bonga e nona: Yindula una tulenda sadisila o muntu kabakula oma ma vuvu kia zingila yakwele mvu muna paradiso ova ntoto. Wantu ayingi ke bazeye mayingi ko yovo ke bazeye diambu ko mu kuma kia longi diadi. Nanga bekwikilanga vo lufwa i mfoko a mawonso yovo beyindulanga vo wantu ambote ku zulu bekwendanga. Aweyi tulenda kubasadisila?

¹⁵ Mpangi mosi wayika una kesadisilanga wantu mu bakula e vuvu kia zingila yakwele mvu ova ntoto. Entete otanganga e sono kia Etuku 1:28. I bosi, oyuvulanga kwa muntu kana akweyi Nzambi kazola vo wantu bazingila ye nkia mpil’a zingu kazola vo bakala kiau. Wantu ayingi bevutulanga vo: “Nzambi wazola vo wantu bakala ye zingu kiambote ova ntoto.” I bosi, o mpangi otanganga e sono kia Yesaya 55:11 yo yuvula kwa muntu kana vo e kani dia Nzambi diasoba. Nkumbu miayingi, o muntu ovutulanga vo ke diasoba ko. Kuna mfoko, o mpangi otanganga e sono kia Nkunga 37:10, 11 yo yuvula aweyi kikala e zingu kia wantu kuna sentu. Muna sadila e sono yayi, o mpangi osadisanga wantu ayingi mu bakula vo Nzambi ozolele vo wantu ambote bazingila yakwele mvu muna Paradiso ova ntoto.

16-17. Landila e sono kia Ngana 3:27, aweyi tulenda songela vo tukuyisianga vana fulu kia wantu ankaka? Yika e nona.

¹⁶ E mpila yayá, i songanga vo otokanenanga e wete dia wantu ankaka. Kasikil’owu, adieyi tufwete vanga avo twele kingula muntu mu ntangwa ina vo ke yambote ko kwa yandi? Tulenda lomba ndoloki yo kumvovesa vo tuvutuka mu ntangwa yankaka. Adieyi tuvanga avo muntu filusadisu kavuidi o mfunu? Adieyi tuvanga kele vo muntu kelendanga diaka vaika mu nzo ko mu kuma kia kimbevo yovo kinunu ye lusadisu kavuidi o mfunu? Muna mambu ma mpila yayi, tulenda sadisa o muntu.—Tanga Ngana 3:27.

 ¹⁷ Mpangi mosi ankento nluta miayingi kebakanga vava kevanganga mambu malenda moneka vo makete kwandi. Vava kazaya vo esi nzo mosi bafwilwa o nsedia, e nkenda zamfila mu kubasonekena e nkanda. Muna nkanda wau, wasia mo mpe sono ya lufiaulwisu. Aweyi esi nzo awaya bamona? O ngudi wavova vo: “O zono lumbu kiampasi kikilu kiakedi. Nanga kuzeye wo ko kana yamu nkia tezo watusadisidi o nkanda watusonekene. Kina ye mvovo ko muna yika lufiaulwisu twatambwidi. O zono, nkumbu 20 yatangidi o nkanda wau. Yasivika kikilu mu kuma kia ngemba watusongele ye mvovo miaku mia lukasakeso. Tutondele kikilu ye nsi a ntima wawonso.” Ka lukatikisu ko vo nluta miayingi tuvuanga vava tukuyisianga vana fulu kia wantu bena mu mpasi yo vanga diambu muna kubasadisa.

18. Landila e sono kia 1 Korinto 3:6, 7, adieyi tufwete sungamenanga mu kuma kia salu kieto kia umbangi?

¹⁸ Tufwete kalanga ye tezo muna mpila tubadikilanga e salu kieto kia samuna e nsangu zambote. Tufwete vanganga mawonso muna sadisa akaka balongoka mu kuma kia Nzambi, kansi ke yeto ko tuvanganga dina disundidi o mfunu. (Tanga 1 Korinto 3:6, 7.) Yave yandi otuntanga wantu kimana bansambila. (Yoa. 6:44) Kuna mfoko, konso muntu una ye mbebe ya sola kana vo otambulwila yovo lembi tambulwila e nsangu zambote landila o ntim’andi. (Mat. 13:4-8) Sungamena wo vo wantu ayingi ke batambulwila ko e nsangu kasamunanga o Yesu una vo i Nlongi osundidi alongi awonso bazinga kala ova ntoto. Muna kuma kiaki, ke tufwete yoya ko kele vo ayingi muna wantu tuvavanga sadisa ke batambulwidi ko e nsangu zambote.

19. Nkia nluta tuvua avo tusongele e nkenda kwa wantu muna salu kia umbangi?

¹⁹ Nluta miayingi tuvua avo tusongele nkenda kwa wantu muna salu kia umbangi. Tutoma yangalela e salu kieto kia samuna e nsangu zambote. Tumona kikilu vo e kiese kia vana kisundidi eki kia tambula. Diasazu dikala kw’awana ‘bena kikilu ye tima dia vua moyo a mvu ya mvu’ mu tambulwila e nsangu zambote. (Mav. 13:48) Muna kuma kiaki, “konso ntangwa tubakidi e lau, yambula twavanga edi diambote kwa wantu awonso.” (Ngal. 6:10) Muna mpila yayi, tukala ye kiese kia kembelela Yave wa Se dieto una kuna zulu.—Mat. 5:16.