1. Chilwilwinyi chimu chekala naYesu chatutiyishaña kuwaha? Lumbululenu.

CHILWILU chimu chatutiyishaña kuwaha chekala naYesu chidi chakwila nawu weluka kukala kutwamonaña chineli twawanina wanyi. Yesu hadiñayi hamaseki, wadiña ‘nakuzañalela hamu nawantu azañalalaña’ nawa wadiña ‘nakudilila hamu nawantu adilaña.’ (Rom. 12:15) Chakutalilahu, atumbanji twindi 70 chafuntiliwu iku anazañalali muloña wakwila antu amavulu etejeli nsañu yayiwahi, Yesu niyena ‘wazañaleli nankashi.’ (Luka 10:17-21) Cheñi, chamweniyi antu amukeñeli Lazaru ananeñi muloña wakufwa kwindi, Yesu niyena “wadishishimwini nikudineña nankashi.”—Yow. 11:33.

2. Chumanyi chamukwashili Yesu kutiyila antu wushona?

² Hela chakwila Yesu wadiña wawanina, watiyilileña luwi niwushona antu abula kuwanina. Chumanyi chamukwashili kwila mwenimu? Chatachi, Yesu wakeñeli antu. Neyi chitwahosha muchibaaba chinafumihu, watiyileña “kuwaha nawanyana kawantu.” (Yish. 8:31) Iku kukeña kwamukwashili kwiluka chatoñojokañawu antu. Kapostolu Yowanu walumbulwili nindi: “Welukili jadiña munyichima yawantu.” (Yow. 2:25) Yesu wadiña nakutiyila antu wushona. Antu amweni chayikeñeliyi nawa etejeli nsañu yaWanta. Neyi ninetu tutiyilaña antu wushona, tukukwasha antu amavulu hampinji yitunakuyishimwina.—2 Tim. 4:5.

3-4. (a) Neyi tuyakamenaña antu, mudimu wakushimwina tukuwumonaña ñahi? (b) Yumanyi yitukudiza muchinu chibaaba?

³ Kapostolu Pawulu welukili nindi wateleleli kushimwina, ninetu tweluka netu twatela kushimwina. (1 Kor. 9:16) Hela chochu, wushona diwatuleñelaña kushimwina muloña  twayakamenaña antu nawa twakeñaña kuyikwasha, bayi neyi muloña wakwila himudimu wutwatela kuzata hohuku. Tweluka netu “mukuhana mwekala muzañalu chikupu kubadika wekala mukutambwila.” (Yil. 20:35) Neyi tutoñojokaña muniyi njila hampinji yitunakushimwina, tukukwashaña antu amavulu.

⁴ Muchinu chibaaba, tukudiza chitunateli kuyakamena antu mumudimu wakushimwina. Chatachi, tukushinshika chitunateli kudizila kudi Yesu chatiyileñayi hadi antu. Kuhiñahu tukuhanjeka njila jiwana mutunateli kumwimbujolela Yesu.—1 Pet. 2:21.

5-6. (a) Anyi atiyililiyi Yesu wushona? (b) Chumanyi chaletesheli Yesu yatiyileña wushona antu ashimwinineñayi neyi chashimunawu ha Isaya 61:1, 2?

⁵ Shinshikenu Yesu chamwekesheliyi wushona. Mpinji yimu, Yesu niatumbanji twindi azeyeli nankashi muloña ashimwinini nsañu yayiwahi chakadi kunooka. “Hiyadiña nampinji yakunooka hela kudaku.” Dichi Yesu wayisendeli atumbanji twindi nakuya ‘kwakankawawu kulonda anookihu chanti.’ Ilaña izaza dawantu datwamininiku lufuchi kwayileñayi Yesu nawatumbanji twindi. Yesu chashikiliyi kweniku wawanini kudi antu. Watiyili ñahi, nawa chumanyi cheliliyi? “Wayitiyilili wushona, * muloña adiña neyi anyikoku akadi kabiña. Dichi watachikili kuyitañisha yuma yayivulu.”—Maku 6:30-34.

⁶ Talenu chuma chaletesheli Yesu yayitiyili awa antu wushona hela kuyakamena. Wahosheli nindi “adiña neyi anyikoku akadi kabiña.” Yesu watela wamweni nindi amakwawu adiña atuzweñi nawa adiña nakuzata nañovu kulonda akeñeli yisaka yawu yuma yakeñekaña. Hadaha amakwawu aneñeli muloña wakwila afwishili antaña jawu. Neyi dimu, dikwila nawu Yesu welukili kukala kwadiñawu naku. Neyi chitwahanjekeli muchibaaba chinafumihu, Yesu niyena wamweni kukala kwamuchidiwu. Yesu wadiña  nakutoñojokelaku antu, nawa wayilejeleña nsañu yakuyikundeja.—Tañenu Isaya 61:1, 2.

7. Tunateli kumwimbujola ñahi Yesu?

⁷ Chumanyi chitwadizilaña kudi Yesu? Kufwana Yesu, twashakamaña nawantu adi “neyi anyikoku akadi kabiña.” Anakuhita mukukala kwakuvulu. Tukweti chuma chinakukeñawu, nsañu yaWanta. (Chim. 14:6) Twamwimbujolaña Mwanta wetu nawa twashimwinaña nsañu yayiwahi muloña ‘twayitiyilaña wushona azeya niabula yuma.’ (Mas. 72:13) Twayitiyilaña antu wushona nawa twafwilaña kuyikwasha.

8. Njilanyi yimu mutunateli kutiyila wushona antu mumudimu wakushimwina? Lumbululenu.

⁸ Chumanyi chinateli kutukwasha kutiyila wushona antu itwashimwinaña? Twatela kufwikija neyi yetu ana antu itwawanaña mumudimu wakushimwina nawa twatela kuyilila yuma yinakukeñawu neyi chitwadi kukeña kutwilila ninetu. * (Mat. 7:12) Tuhanjekenu hanjila jiwana mutunateli kwilila mwenimu. Njila yatachi, toñojokenu hachuma chinakukeñayi muntu himuntu. Twatela kwesekeja mudimu wakushimwina namudimu wazataña ndotolu. Ndotolu wamuwahi watoñojokaña hakukala kukweti muyeji. Wehulaña malwihu nawa watiyililaña nakanañachima chinakulumbululayi muyeji kukala kukwetiyi hela chinakutiyayi. Chatela yamwinki yitumbu hohenohu, ilaña ndotolu wahembelelaña yamoni yikatu yamuyeji chiyidi kuhiñahu dinu hakumwinka yitumbu. Munjila yoyimu, bayi tuzatishaña njila yoyimu hakutachika kuhanjeka nawantu ejima itwawanaña mumudimu wakushimwinaku. Ilaña twatela kwiluka kukala kudi namuntu himuntu nichinakutoñojokayi.

9. Chumanyi chitwatela kutondolwela? Lumbululenu.

⁹ Neyi muwana muntu mumudimu wakushimwina bayi mutoñojokaña nenu muneluki chihandilu chindi, yuma yakuhwelelayi hela chaletesha yakuhweleli iyi yumaku. (Yish. 18:13) Ilaña mwihulenu mukubabala kulonda mwiluki yuma yinakutoñojokayi niyakuhwelelayi. (Yish. 20:5) Neyi chetejewa muchisemwa chenu, mwihulenu chidi mudimu windi, chisaka chindi, yuma yinakuhitamu nichinakutoñojokayi. Neyi tuyihulaña antu malwihu, akutuleja chinakukeñelawu nsañu yayiwahi. Chitweluka kukala kwawu, tukuyitiyila wushona nawa tukuyikwasha hakukala kukwetiwu neyi cheliliyi Yesu.—Esekejenu 1 Akorinda 9:19-23.

10-11. Kwesekeja na 2 Akorinda 4:7, 8 njilanyi yamuchiyedi mutunateli kuyakamena antu? Shimunenu chakutalilahu.

¹⁰ Yamuchiyedi, esekenu kufwikija chinateli kwikala chihandilu chawu. Munjila yikwawu,  tunateli kwiluka chidi chihandilu chawu. Twawanina wanyi dichi ninetu twamonaña kukala. (1 Kor. 10:13) Tweluka netu muyinu nshakaminu yamakonu chihandilu chakala nankashi. Yehova diyi watukwashaña kuumika. (Tañenu 2 Akorinda 4:7, 8.) Ilaña toñojokenu hadi antu abula kwikala amabwambu jaYehova. Chinateli kuyikalila kushakama chiwahi mukanu kaayi chakadi wukwashu waYehova. Twayitiyilaña wushona neyi chatiyileñayi Yesu nawa chatuleñelaña kuyishimwina “nsañu yayiwahi yayuma yayiwahi.”—Isa 52:7.

¹¹ Talenu chakutalilahu chamanakwetu Sergey. Henohu kanda yadizi chalala, Sergey wadiña nansonyi nawa wawunda. Chamukalilileña kuhanjeka nawantu amakwawu. Mukuhita kwampinji wetejeli kumudizisha Bayibolu. Sergey wahosheli nindi: “Chinadizili Bayibolu, nelukili nami akwaKristu atela kulejaku antu amakwawu yuma yakuhwelelawu. Namweneña nami nakatwesha wanyi kushimwina.” Hela chochu, watoñojokeli hadi antu achidi kanda atiyeñahu dehi chalala nawa watachikili kufwikija chidi chihandilu chawu muloña wakubula kumwiluka Yehova. Wahosheli nindi: “Yuma yinadizileña yaleñeleli kwikala namuzañalu nikuwunda. Nelukili nami antu amakwawu niwena atela kudiza ichi chalala.” Sergey’s chaswejeliyi kwakamena antu, wekalili wahamuka hakushimwina. Wahosheli nindi: “Natiyili kuwaha muloña chinatachikili kulejaku amakwawu nsañu yamuBayibolu nekalili wahamuka. Nawa kuhanjeka nawantu hayuma yinakuhwelela kwakolesheli chikuhwelelu chami.” *

12-13. Muloñadi chitwatela kwikala adiwunjika nawantu itwadizishaña mumudimu wakushimwina? Lumbululenu.

¹² Yamuchisatu, diwunjikenuña nawantu imwadizishaña. Anukenu nenu, hadaha kanda atoñojokeñahu dehi chalala chamuBayibolu chitweluka. Nawa amavulu akeña chikupu yuma yakuhwelelawu. Anateli kutoñojoka nawu kwitiya kwawu kwalema nankashi nawa dikwayileñelaña kudikunda nachisaka chawu,  chisemwa niantu ashakamañawu nawu muchituñilu. Tunateli kuyikwasha ñahi?

¹³ Shinshikenu hanichi chakutalilahu: Chumanyi chamwekanaña neyi chakwila chawu chachikulu anakukeña kuchifumishahu? Kakavulu, atuñaña chawu chachiha iku chachikulu chenda chizatika. Neyi anamanishi dehi kutuña chawu chachiha, chachikulu achihumunaña. Munjila yoyimu, henohu kanda tuyileji antu kuleka yuma “yayikulu” yakuhwelelawu, twatela kusambila kuyikwasha eluki chalala “chachiha,” dikwila nawu yuma yatañishaña Bayibolu yabula kwilukawu. Nkumininaku anateli kuleka yuma yakuhweleleliwu. Hanateli kuhita mpinji hakwila tuyikwashi antu ahimpi.—Rom. 12:2.

14-15. Tunateli kukwasha ñahi antu abula kwikala nakuchiñeja kwakushakama haya nyaaka muParadisa hamaseki? Shimunenu chakutalilahu.

¹⁴ Twatela kwikala adiwunjika nawantu itwashimwinaña, muloña hiyanateli kutiyishisha hela kwiteja chalala chamuBayibolu hohenohuku. Neyi tuyakamenaña, chikutuleñela kuyikwasha nawa mukuhita kwampinji akutachika kwiluka chahosha Bayibolu. Chakutalilahu, toñojokenu chitunateli kumukwasha muntu hakuchiñeja kwakushakama muParadisa haya nyaaka hamaseki. Antu amavulu eluka wanyi iyi ntañishilu. Hadaha akuhwelela nawu muntu neyi nafwi wakasañuka wanyi. Indi kwiji atoñojokaña nawu antu amawahi ejima ayaña mwiwulu. Tunateli kuyikwasha ñahi?

¹⁵ Tiyenu manakwetu wumu chakwashañayi antu kulonda eluki kuchiñeja kwakushakama haya nyaaka hamaseki. Chatachi, watañaña Kutachika 1:28. Kuhiñahu wamwihulaña mwini itala nindi Nzambi wakeñeleña nindi antu ashakameña kudihi, nawa nindi ekali nachihandilu chamuchidinyi? Amavulu akulaña nawu, “Wakeñeleña nindi ashakameña hamaseki nawa nachihandilu chachiwahi.” Kuhiñahu, manakwetu watañaña Isaya 55:11 nawa wehulaña neyi chakwila nkeñelu yaNzambi yahimpika. Kakavulu, mwini itala wakulaña nindi inehi. Hakukunkulula, manakwetu watañaña Masamu 37:10, 11 nawa wamwihulaña chihandilu chawantu chichakekala kumbidi. Muloña wakuzatisha Bayibolu muniyi njila, nakwashi antu amavulu kwiluka nawu Nzambi wuchidi kukeña nindi antu akashakameña haya nyaaka muParadisa hamaseki.

16-17. Kwesekeja na Yishimu 3:27, njilanyi jikwawu mutunateli kwakamena antu? Lumbululenu.

¹⁶ Yamuchiwana, toñojokenu hanjila jimunateli kwakamenamu antu. Chakutalilahu, mwayahu dehi kudi mwini itala hampinji yabula kutelela? Tunateli kulomba kwanakena nikumuleja netu twakafuntaku hampinji yatelela. Indi neyi mwini itala nakukeña kumukwashaku kuzata kamudimu kanyanya? Indi neyi muntu wakata hela wunashinakaji nakukeña nindi mumukwashiku kulanda tuyuma hela kumusonekela mukanda? Neyi  tuwana antu amuchidiwu twatela kuyikwasha.—Tañenu Yishimu 3:27.

¹⁷ Muhela wumu wakwashili muntu kuhitila mukumwilila chuma chamwekeneña neyi chamukunkulwayi ilaña mwafumini yuma yayiwahi. Watiyili wushona nawa wasonekeli mukanda nakutemeshela chisaka chafwishili mwana. Muniwu mukanda washilimu Nsona jakukundeja. Ichi chisaka chelili ñahi naniwu mukanda? Mama yawantu wafwishili wasonekeli nindi: “Haloshi naneña nankashi, ilaña mukanda wuwasoneka watukwasha chikupu. Nasakilili nankashi, muloña mukanda weyi watukundeja nankashi. Mukanda iwantemeshela nawutaña haloshi kubadika mapampa 20. Nakañanyi nikulumbulula chiwatukolesha iwu mukanda! Tunakusakilili chakufuma hanyichima yetu.” Chakadi nikujina, munateli kufuma yuma yayiwahi neyi tutoñojokelañaku antu anakukabakana nikuyikwasha.

18. Kwesekeja na 1 Akorinda 3:6, 7, chumanyi chitwatela kwanukaña kutalisha hamudimu wetu wakushimwina, nawa muloñadi?

¹⁸ Hela chochu, neyi tunakushimwina twatela hohu kuzata kwesekeja nahakumina ñovu yetu. Tunateli kuzataku mudimu wakukwasha antu kulonda amwiluki Nzambi ilaña twatela kwanuka netu yetu twazataña mudimu weneni wanyi. (Tañenu 1 Akorinda 3:6, 7.) Yehova diyi wakokaña antu. (Yow. 6:44) Nkumininaku, muntu nateli kukaana hela wukwiteja nsañu yayiwahi kwesekeja nachidi muchima windi. (Mat. 13:4-8) Mwatela kwiluka nenu antu amavulu etejeli wanyi nsañu yaYesu henohu wadiña Ntañishi muneni! Dichi neyi antu amavulu itunakukeña kukwasha anakwiteja wanyi nsañu yetu, bayi tuneñaku.

19. Yumanyi yayiwahi yafumañamu neyi tunakwakamena antu mumudimu wakushimwina?

¹⁹ Neyi twakamenaña antu mumudimu wetu wakushimwina, mukufuma yuma yayiwahi. Tukuzañalalaña namudimu wetu wakushimwina. Tukwikala namuzañalu wafumaña mukuhana. Nawa tukuleñela antu ekala “nanyichima yashinshika yakukeña kwikala nawumi wahaya nyaaka” kwiteja nsañu yayiwahi. (Yil. 13:48) “Neyi twikala nampinji yakwila mwenimu, dichi tukoñeña yuma yayiwahi kudi antu ejima.” (Ñal. 6:10) Tukwikala namuzañalu wakuleta kalemesha kudi Tata yetu wamwiwulu.—Mat. 5:16.