1. Tʼeyanajmí jméni xi ngisasa naskánatjín xi bakó jokjoan je Jesús.

JE XI ngisasa naskánatjín xi bakó jokjoan je Jesús kuinga majinle jme kjoa xi bitjatojiaan. Kʼianga tsakʼejna i̱ Sonʼnde, tsjoa kisʼele nga tsjoa kisatio kon je chjota kʼoa kiskiʼndákao je xi kiskiʼndá (Rom. 12:15). Tobʼelañá, kʼianga nʼio tsjoa tjíole nga jekichoni je xi 70 chjotatjenngile nga kikakóyason, je Jesús “nʼio koantsjoale xi tʼatsʼe Espíritu Santo” (Luc. 10:17-21). Kʼoa kʼianga kʼien je Lázaro, nga tsabe nga nʼio ba kisatio kon xínkjín, kʼoati “aon koanle Jesús” (Juan 11:33).

2. Jméni xokisikao je Jesús nga tsakakónile kjoamatokon je chjota.

² Ningalani chjotatsje koan je Jesús, tsakakó kjoamatokon kʼoa koanmake je chjotasonʼnde. Jméni xi tsakasenkao nga tsakakóni kjoamatokon. Kuinga kisʼele kjoatsjoacha. Tojosʼin tsaʼyaa ya kjoaʼmiya xi jaʼato, tsjoake koan je chjota (Prov. 8:31). Kui xi tsakasenkao nga nda tsabeni josʼin síkjaʼaitsjen je chjota. Je pastro Juan i kitso: “Be jo kjoan chjota” (Juan 2:25). Je Jesús koanmake je chjota, kʼoa nkjín mani xi koanjinle nga tsakakó kjoatsjoacha kʼoa kinrʼoé nga kitsoyale je Énle Niná. Nga sa nda sa nda chjénngilee je Jesús, ngisaa nda koa̱nná kʼuínyasoán (2 Tim. 4:5).

3, 4. 1) Tsa si̱jinlee yaoná jotjío kon je chjota, jósʼin koasenkaoná nga kʼuínyasoán. 2) Jméni xi jchaa i̱ kjoaʼmiya jebi.

³ Je pastro Pablo koanjinle nga tjínnele kuitsoyason, kʼoa ñá kʼoati kui xá kjinená (1 Cor. 9:16). Tsa si̱jinlee yaoná jotjío kon je chjota, ali tsa tokuijin kʼuínyasonñá nga kui xá kjinená, kuinga mandosin kjoaixiná kʼoa mená kuinyakoaa. ʼYañá nga “tongisa ndaní nga kʼoee kaoni tsa nga chjoé” (Hech. 20:35). Kʼiatsa kuenta sʼiaan jebi nga kʼuínyasoán ngisaa tsjoa sa̱tío tokoán.

 ⁴ I̱ kjoaʼmiya jebi, kui jchaa jósʼiaan nga si̱jinlee yaoná jotjío kon je chjota xi ʼmiyasonlee. Xi títjon, kui jchaa jósʼin tsabekon Jesús je chjota kʼoa jméni xi bakóyaná. Xijekoa̱n, ño koya tjínni xi chótʼayajiaan jósʼin koa̱n chjénngilee (1 Ped. 2:21).

5, 6. 1) ʼYáni xi tsakakóle kjoamatokon je Jesús. 2) Tojo tso ya Isaías 61:1, 2, ánni nga koanmakeni Jesús je chjota xi kitsoyasonle.

⁵ Kataʼyala jósʼin tsakakó je Jesús nga koanjinle jotjío kon je chjota. Ñandia kʼianga kitsoyason kao chjotatjenngile saʼnda tsín koanʼale nga tsakjen kʼoa nga kisikjáya ngotjo. Kuinga ya kikaoni je chjotatjenngile jngo ʼnde jñani koa̱n sikjáya ngotjo. Tonga nkjín mani je chjota xi kitjenngile jñani ki. Jókisʼin je Jesús nga kicho kʼoa nga tsabe je chjotankjín. “Koanmake * nga je, nga̱ je joni tsa barré xi tsínle xi koʼnda. Tsakʼétsʼiakao nga tsakakóyale nkjín kjoa” (Mar. 6:30-34).

⁶ Ánni nga koanmakeni chjota je Jesús. Kuinga tsabe nga je chjota kʼoasʼin tjío “joni tsa barré xi tsínle xi koʼnda”. Tsakui nichxin tsabe nga ma̱ tjíosíjchá kʼa yaole kʼoa nga bʼajndale nichxin nga síxá kʼianga sokóʼale yaole. Tsakui nichxin tjínkʼa xi xínkjín kisicha. Nʼiojin nda koanjinle je Jesús jokisatio kon je chjota, tsakui nichxin saʼnda kui kjoa jaʼatojin tsanda je, tojosʼin tsaʼyaa ya kjoaʼmiya xi jaʼato. Nga koanndosinle je chjota kui xokisikao nga kitsoyanile je Énle Niná (tʼexkiai Isaías 61:1, 2). *

7. Jósʼin koa̱n chjénngiaa choa̱le Jesús.

⁷ Jósʼin koa̱n chjénngiaa choa̱le Jesús. Nichxin xi tiyoaa ndʼaibi je chjota kʼoatisʼin  tjío “joni tsa barré xi tsínle xi koʼnda”. Tonga ñá koaan kʼuínyalee je Énle Niná, nga̱ kui xi nʼio machjénle nga kjuinrʼoé (Apoc. 14:6). Kuinga kʼoanʼiañá jokisʼin je Jesús, je xi Maestroná mani, ʼmiyalee chjota je énnda chjotse nga̱ mamachañá “je xi nangi tíjna kʼoa je xi ma̱ tísíjchá yaole” (Sal. 72:13). Bakolee kjoamatokon kʼoa mená kuinyakoaa.

8. Jméni xi koasenkaoná nga koa̱njinná jotjío kon je chjota nga ʼmiyasoán. Jngo choa̱ tʼejnai.

⁸ Nga koa̱njinná jotjío kon je chjota xi ʼmiyasonlee, machjén nga si̱jinlee yaoná josʼin síkjaʼaitsjen, kʼoa kʼoasi̱koaa josʼin mená nga ni̱kaoná ñá * (Mat. 7:12). Ñola koya kataʼyaa xi koasenkaoná nga kʼoasʼiaan. Xi títjon, si̱kjaʼaitsjeen jmeni xi machjénle nga jngó jngó chjota. Nga ʼmiyasoán yaa mangósoán joni jngo chjinexki. Jngo chjinexki xi nʼio nda síxki kuenta sʼín jmeni xi machjénle nga jngó jngó chjota. Kjonangile kʼoa nda nrʼoéle je chjota nga bʼéyanajmíle jme chʼin xi tjínle. Alikui tokjoan tsjoále xki tsa kje bejin jme chʼin xi tjínle, títjonkjoanla kotʼa kʼoa kʼiaa tsjoále xki xi koasenkao. Kʼoatinʼia tsanda ñá, alikui tongóson ʼmilee ngatsʼi je chjota nga ʼmiyalee, kuenta nʼia josʼin tjío kʼoa josʼin síkjaʼaitsjen nga jngó jngó.

9. 1) Jméni xi tsín koa̱n si̱kjaʼaitsjeen tʼatsʼe chjota. 2) Jméni xi ngisa nda nga kʼoasʼiaan.

⁹ Alikui koa̱n nga kʼoasʼin si̱kjaʼaitsjeen nga jeʼyaa josʼin tjío je chjota xi ʼmiyasonlee, jme xi makjainle kʼoa ánni nga kui makjainnile (Prov. 18:13). Machjén nga títjonkjoanla chjónangilee kʼianga jchaa xi tʼatsʼe chjota, tonga chósonnile jokʼuínlee (Prov. 20:5). Tobʼelañá, ya jñani tsaan tsa tsín chʼaosʼin beni je chjota, koaan chjónangilee tʼatsʼe xále, familiale, josʼin síkjaʼaitsjen kʼoa tsa jmesani. Kʼoasʼin jchañá ánni nga nʼio machjénnile nga kjuinrʼoé je Énle Niná. Kʼianga jejchaa jebi, kui kʼuínyalee jmeni xi kuinyakao, tojo kisʼin je Jesús (tingósonkoai 1 Corintios 9:19-23).

10, 11. Tojo tso 2 Corintios 4:7, 8, jñánile je xi majaoni koya xi kuinyakaoná nga koa̱njinná jotjío kon je chjota. Jngo choa̱ tʼejnai tʼatsʼe jngo chjota xi kʼoakisʼin.

¹⁰ Xi majaoni, si̱jinlee yaoná josʼin tjíosíjchá yaole je chjota. Tsa kʼoasʼiaan, kui xi koasenkaoná nga koa̱nchoyaná josʼin tjío, nga̱ kʼoati kui kjoa bitjatojiaan tsanda ñá jme kjoa xi faʼatojin toʼya chjotani (1 Cor. 10:13). ʼYañá nga nʼio ñʼai kjimachon je sonʼnde ndʼaibi nga je Na̱i tíbatéxoma kʼoa majinná nga toje Jeobá xi basenkaoná nga chókjoajinná  (tʼexkiai 2 Corintios 4:7, 8). * Si̱kjaʼaitsjenjiaan josʼin tjío je chjota xi tsín be tʼatsʼe Jeobá. Tojo kisʼin je Jesús, mamachañá kʼoa ʼmiyalee je énnda chjotse (Is. 52:7).

¹¹ Kataʼyala jokoan je Sergey. Nga kjesa bejin xi tʼatsʼe Jeobá alikui tso kon nga fákaonajmí je chjota. Nga jeki nichxin kiskotʼaya je Biblia. Itso: “Kʼianga kiskotʼaya je Biblia koanjinna nga je xi chjotale Cristo ma tjínnele nga kjoakaonajmíni je xi kjaʼaí jmeni xi makjainle. Kʼoasʼin kisikjaʼaitsjen nga tsínkʼia kʼoakoanna kʼoasʼian”. Tonga je Sergey kui nʼio kisikjaʼaitsjen josʼin tjío je chjota xi tsín be je xi kixi kʼoa xi tsín be je Jeobá. Itsosa: “Jmeni xi koanjinna tsakasenkaona nga tsjoa kisʼena kʼoa nga nyʼán kisʼe tokoan. Koanjinna nga kʼoati machjénle skoe̱ xi kixi je chjota xi kjaʼaí”. Nga koanjinle jebi je Sergey, kui xi tsakasenkao nga tsín kitsokjon kʼianga kitsoyason. Jósʼin kichomani. Itsosa: “Tiʼan tokʼoakoannina, kui xi tsakasenkaona nga kisʼena kjoanʼiojin kʼoa kichokajin ni̱ma̱na jmeni xi tsoya je Biblia”. *

12, 13. Ánni nga machjénsíni nga tsejta koaan kao je chjota xi bʼailee estudio. Jngo choa̱ tʼejnai.

¹² Xi majanni, tsejta katamaa kao je chjota xi bʼailee estudio. Ñá jeʼyaa jmeni xi tsoya je Biblia, tonga je chjota xi ʼmiyalee tsakui nichxin tosʼa tínrʼoé títjon jmeni xi tso je Énle Niná. Xi ijngosani, nʼio nkjín mani je chjota xi nʼio tsjoake jmeni xi makjainle, kʼoa tsakui nichxin kʼoasʼin síkjaʼaitsjen nga kui xi binyakao nga jtín sʼin batio kao familiale, kao je chjota xi ya tsʼe ʼndele kʼoa kao josʼin ngale. Jósʼin koa̱n kuinyakoaa chjota jebi.

¹³ Jngola choa̱ si̱kʼéjnaa. Kʼiatsa jngo puente chjotse sʼe̱nda ngajaole jngo  puente xi jejchá kji, nga sʼa tísʼenda je puente chjotse tojo kui puente jchá machjén. Kʼianga jemajngo je puente chjotse kʼiaa nikixoya xi jejchá kji. Kʼoatisʼinni, nga kjesa kʼoaʼmijinlee jngo chjota nga katasíkʼéjna jmeni xi makjainle, tsakui nichxin títjonkjoanla kuisenkoaa nga katabechjí jmeni xi bakóya je Biblia, nga̱ tosʼajin skoe̱ títjon. Kʼoa kuijin xosikao nga sikʼéjnani jmeni xi makjainle tsakai. Kʼoa nichxin tjenkao nga kʼoasʼin jngo chjota (Rom. 12:2).

14, 15. Jngo choa̱ tʼejnai jósʼin koa̱n kuinyakoaa je chjota xi tsín be tʼatsʼe je kjoachoya xi tjínná nga koa̱n kuiyoaa ngantsjai nichxin nga jeʼndenaxó koa̱n i̱ Sonʼnde.

¹⁴ Tsa tsejta koaan kao je chjota, alikuijin kui chóyalee nga tokjitʼanangi koa̱njinle kʼoa koa̱nkjainle jmeni xi bakóya je Biblia. Tsa si̱jinlee yaoná jotjío kon je chjota kui xosikaoná nga kuinyakoaa nga katamajinle jotso je Biblia ninga tse nichxin kʼoéngiaa. Tobʼelañá, si̱kjaʼaitsjenla tʼatsʼe je kjoachoya xi tjínná nga koa̱n kuiyoaa ngantsjai nichxin nga jeʼndenaxó koa̱n i̱ Sonʼnde. Nʼio nkjín mani xi tsín be tʼatsʼe jebi. Tjínkʼa xi kʼoatso nga toya tjen fetʼa kʼianga jebiyaa. Kʼoa tjínkʼa xi kʼoasʼin síkjaʼaitsjen nga ya ngʼajmi fi ngatsʼi xi nda chjota. Jósʼin koa̱n kuinyakoaa nga katamajinle jmeni xi bakóya je Biblia.

¹⁵ Jngo ndsʼee xi kʼoatso josʼin bakóyale Biblia je chjota. Xi títjon sʼín kuinga ya bʼéxkiale Génesis 1:28 kʼoa kui kjonangile jñáni kʼoa jósʼin koanmele je Niná nga koatio je chjota. Me tongatsʼi xi kʼoatso nga kui xi koanmele je Niná nga i̱ Sonʼnde koatio kʼoa nga tsjoa sa̱tío kon. Xijema, je ndsʼee kui bʼéxkiale Isaías 55:11 kʼoa kjonangile tsa tíbʼantjaiya jmeni xi mele je Niná. Je chjota kʼoatso nga mai. Kʼoa xi tofetʼani, kui bʼéxkiale Salmo 37:10, 11 kʼoa itsole je chjota: “Tojo tso je Biblia, jósʼin koatio je chjota nichxin xi nroaján”. Nga kʼoasʼin bakóya je ndsʼee, nkjín chjota tíbasenkao nga kjimajinle nga tojo kui xi mele Niná nga je chjota xi ndʼé jngo ʼNdenaxó koatiojin ngantsjai nichxin i̱ Sonʼnde.

16, 17. Tojo tso Proverbios 3:27, jósʼin koa̱n koakoá nga majinná jotjío kon je chjota. Jngo choa̱ tʼejnai.

¹⁶ Xi mañoni, si̱kjaʼaitsjeen jósʼin koakolee kjoaxkóntokon je chjota. Tobʼelañá, tsa kʼia kuichoaa ya ndʼiale je chjota nga tsín ale, koa̱njin si̱jélee kjoanichatʼa kʼoa kʼoakʼuínlee nga skan kuicho ijngokʼa. Kʼoati koa̱n kuisenkoaa tsa nganʼio machjénle. Tobʼelañá, tsa tsín ma bitjo ndʼiale kʼoa tsa tjín xi machjénle nga koaikatse, koaan kuisenkoaa (tʼexkiai Proverbios 3:27). *

¹⁷ Kataʼyala nga ndasʼin bichómani nga nijinlee yaoná josatío kon je chjota.  Kʼianga kisʼejinle jngo tichjaa nga tiʼakʼia kʼienni nga kitsin je ʼndíleele jngo chjoón, jngo xo̱n kiskile jñani tsakʼétʼa jme xi tso je Biblia xi sinʼio kon chjoón jebi. Jókisʼe kon je chjoón jebi kao xʼinle nga tsakʼéxkia jmeni xi kisikasénle je tichjaa. Je chjoón jebi itso xi kiskile je tichjaa: “Nga nʼio ba kise tokuinjin nichxin ngojña, nʼio tsakinyakaonajin je carta xi kinikasáin. Alikui ʼbe joxínle nga tsjoale kjoanda nga̱ nʼio kisinʼiojinnajin. Kanla kʼa tsakʼexkia je carta jebi nichxin ngojña. Nʼio bʼailaijin kjoanda nga tsakakonáijin kjoanda kao kjoatsjoacha, nga̱ nʼio tsakinyakaonajin”. Alikui jao satío tokoán nga kʼoati ndasʼin kuichomani tsa kuinyakoaa kʼoa tsa si̱jinlee yaoná jotjío kon je chjota xi kjoañʼai faʼá.

18. Tojo tso 1 Corintios 3:6, 7, jósʼin tjínnele jchatokoán nga Énle Niná ʼmiyasoán.

¹⁸ Ningalani bʼenelee yaoná nga binyakoaa je chjota nga katabe xi tʼatsʼe Niná, alikuijin jmeni xi nʼia xi ngisa nʼio chjíle (tʼexkiai 1 Corintios 3:6, 7). * Jé Jeobá xosʼín nga síchriantʼale je chjota (Juan 6:44). Kʼoa kui xi kuitsoni jotjín ni̱ma̱le je chjota tsa mele skótʼaya je Énle Niná kʼoa tsa mai (Mat. 13:4-8). Si̱kjaʼaitsjeen nga tsín tongatsʼi je chjota nga kinrʼoéle je Jesús kʼianga kitsoyason ningalani nʼio nda koanle kitsoya. Kuinga tsín si̱kʼajennilee je tokoán tsa tsín kjuinrʼoé je chjota kʼianga ʼmiyasoán.

19. Jósʼin kuichomani tsa si̱jinlee yaoná jotjío kon je chjota kʼianga ʼmiyasoán.

¹⁹ Ndasʼin kuichomani tsa si̱jinlee yaoná jotjío kon je chjota. Ngisaa tsjoa sa̱tío tokoán nga kʼuínyasoán, kao kjoatsjoa koakoyalee je chjota, kʼoa ngisaa nda kjuinrʼoé Énle Niná je xi tjíonda nga sʼe̱le “kjoabijnachon ngantsjai” (Hech. 13:48). Nga tíjnasa nichxin “nda si̱xá tʼatsʼe ngatsʼi” (Gál. 6:10). Tsa kʼoasʼiaan, tsjoa sa̱tío tokoán nga̱ jé Jeobá chʼa̱sjejeyaa, je Nʼainá xi tíjna ngʼajmi (Mat. 5:16).