1. I cintu ci conga cino twatemwa sana pali vino Yesu waya icikatuvwisya ningo? Londololini.

ICINTU conga cino twatemwa sana pali Yesu i cakuti akamanya intazi zino tukakwata pa mulandu wakuti tutamalilika. Lino Yesu wali pano nsi, ‘wazangilanga pamwi na yao azanganga’ nu ‘kulosezya pamwi na yao alosyanga.’ (Loma 12:15) Lino asambi yakwe 70 yawezile ala iyazanga cuze pa cisila ca kuomba ningo umu mulimo wa kusimikila, “Yesu azanga cuze kupitila mu maka ya mupasi wa muzilo.” (Luka 10:17-21) Lyene lino walola vino yayo atemilwe Lazalo yali sana nu ulanda, Yesu “auvwa ulanda cuze mu mwenzo.”—Yoa. 11:33.

2. I cani icazwilizye Yesu ukuya sana nu luse uku yantu?

² Nanti icakuti Yesu wali u muntu mumalilike, wali sana nu luse muli vino wacitilanga antu aatamalilika. I cani icamwazwilizye ukuya vivyo? Icintu icicindame sana icamwazwilizye i cakuti Yesu watemilwe antu. Wakwe vino itulola umu cipande icafumileko, Yesu ‘wazangilanga umu mutundu wa antu.’ (Mapi. 8:31) Mutumwa Yoane walondolwile ukuti: ‘Yesu wamanyile vyonsi ivyali mu myenzo ya yantu.’ (Yoa. 2:25) Yesu wakweti sana uluse uku yantu. Antu yailolelanga vino wayatemilwe nupya calenzile yauvwa ukwi landwe lya Wene lino wayasimikilanga. Naswe kwene ndi tuli sana nu luse, tulaomba ningo umu mulimo wa kusimikila.—2 Tim. 4:5.

3-4. (a) Uzye tulaalola uli umulimo wa kusimikila ndi tuli nu luse? (b) I vyani vino tumasambilila umu cipande cii?

³ Umutumwa Paulo wamanyile ukuti walondekwanga ukusimikila, naswe kwene twamanya ukuti tulinzile ukusimikila. (1 Kol. 9:16) Nomba ndi tuli nu luse, tulaalola umulimo wa kusimikila ukuti wacindama sana. Tulaalondesya ukulanga ukuti tukasakamala sana antu. Twamanya ukuti “Mukupeela mwaya  upolelelo ukulu cuze kuluta mukupokelela!” (Mili. 20:35) Ndi cakuti tukusimikila pa mulandu wakutemwa antu, tulaipakizya sana umulimo wa kusimikila.

⁴ Umu cipande cii, tumasambilila pali vino tungalanga uluse lino tuli umu mulimo wa kusimikila. Ica kutandikilako, tumalola vino tungasambilila kuli vino Yesu uvwanga pa yantu. Lyene tumasambilila na pa nzila 4 zino tungakolanyizizyamo Yesu.—1 Pet. 2:21.

5-6. (a) Aantu ya musango ci yano Yesu walanganga uluse? (b) U mulandu ci uno Yesu walangilanga uluse uku yantu yano wasimikilangako, wakwe vino casoowilwe pali Ezaya 61:1, 2?

⁵ Elenganyini pali vino Yesu walanganga uluse. Pa nsita imwi, Yesu na asambi yakwe yatonsile sana pano yasimikiile sana ukwaula ukupuuza. “Yatakweti ni nsita yakulya.” Fwandi Yesu wasenzile asambi yakwe ku ‘cifulo ukwali cele’ pakuti ‘yakapuuzeko panono.’ Lelo, iumba ilikulu cuze lyakoleliile Yesu na asambi yakwe. Uzye Yesu uvwile uli lino wafisile kuku nu kulola antu? Uvwilile antu ‘uluse, * pano yakoline wa mfwele izitakweti kacema. Lyene watandike ukuyasambilizya vintu ivingi’—Mako 6:30-34.

⁶ U mulandu ci uno Yesu uvwilanga antu luse? Waweni ukuti antu ‘yaali wa mfwele izitakweti kacema.’ Limwi Yesu waweni ukuti antu yamwi yali apiina nupya yaombesyanga pakuti yasakamala ningo indupwa zyao. Limwi yamwi yaali nu ulanda sana pa mulandu wa kufwilwa atemwikwa yao. Ndi cakuti avino cali, Yesu afwile wilwike vino antu yaa yapitangamo. Wakwe vino twasambilile umu cipande icafumileko, limwi Yesu nawe kwene wapisile muli vino antu yaaya yapitangamo. Yesu wasumvile sana mano uku yantu, nupya walondesyanga ukuyateekezya.—Welengini Ezaya 61:1, 2.

7. Uzye tungaakolanya uli Yesu?

 ⁷ I vyani vino tungasambilila kuli vino Yesu wacisile? Wakwe vino cali kuli Yesu, naswe tukaikala na antu aaya wa ‘mfwele izitakweti kacema.’ Yakwata intazi sana. Twakwata vino yakalondekwa, kuli kuti ilandwe lya Wene. (Umbw. 14:6) Fwandi tukakolanya Umwene witu, tukasimikila ilandwe lisuma pano tukauvwila ‘uluse antu aatakwata aakuyavwangila na apina.’ (Masa. 72:13) Tukauvwila antu uluse, nupya tukalonda ukuyazwilizya.

8. Iinzila ci yonga ino tungalangilamo uluse ku yantu yano tukuzana mu mulimo wa kusimikila? Langililini.

⁸ I cani icingatwazwa ukulanga uluse ku yantu yano tukasimikilako? Tulinzile ukwelenganya pali vino antu yano tukazana yakaelenganya alino nu kuyacitila wakwe vino tungalonda naswe yatucitile. * (Mate. 7:12) Lekini tulande pa nzila 4 zino tungacitilamo vivyo. Ica kutandikilapo, mwaelenganya pa muntu wenga na wenga. Lino tukusimikila ilandwe lisuma, umulimo witu ukakolana sana na uno dokota akaomba. Dokota musuma akaelenganya pali vino cila mulwale akulondekwa. Akauzya amauzyo nu kuvwikisya lino umulwale akulondolola icikuwaya. Ukucila ukuti dokota apeele mulwale mulembo uli onsi uno akulola ukuti ungaomba ningo, akaleka ipapitako insita nga caya vivyo alino angamanya vino mulwale akuyuvwa nupya angamupeela umulembo ungalingana nu ulwale. Avino caya na kuli sweswe, tutalinzile ukuomvya inzila iliimwi kwene pa kulanzyanya na antu yano twazana mu mulimo. Lelo, tulinzile ukwezya ukuvwikisya vino umuntu wino twazana akupitamo alino na vino akalola ivintu.

9. I cani cino tutalinzile ukucita? Londololini.

⁹ Ndi mwazana umuntu lino mukusimikila, mutaelenganya ukuti imumanya ivikacitikila umuntu wiyo nanti vino wazumilamo nu mulandu uno wazumilila ivisambilizyo vivyo. (Mapi. 18:13) Lelo mwauzya mauzyo asuma pakuti mungamanyako vimwi pa muntu na vino wazumilamo. (Mapi. 20:5) Ndi cakuti caya sile ningo kuno mwikala, mungamuzya pa ncito ino akaomba, ulupwa lwakwe, ivikamucitikila, na vino akaelenganyapo. Ndi tukuzya mauzyo, tukaleka antu iyalondolola umulandu uno yakalondekwa ilandwe lisuma. Ndi twamanya vivyo, cingalenga tuvwile umuntu wino tukusimikilako uluse nu kumwazwa wakwe vino Yesu wacitanga.—Loliniko na 1 Kolinto 9:19-23.

10-11. Ukulingana na mazwi aya pali 2 Kolinto 4:7, 8, iinzila ci yakwe ciili ino tungalangilamo uluse? Langililini.

¹⁰ Cakwe ciili, mwaezya ukwelenganya pali vino imikalile yao ingaya. Insita zimwi, tunguvwikisya  vino yakupitamo. Tutamalilika nupya naswe kwene tukakwata intazi. (1 Kol. 10:13) Twamanya ukuti imikalile yatala sana mu nsi ii. Yeova sile aliwe akatwazwa ukuzizimizya. (Welengini 2 Kolinto 4:7, 8.) Nomba mutale mwelenganye pali yayo akuti yatamanya Yeova, cifwile cikayatalila sana ukucimvya intazi izya mu nsi ii. Fwandi wakwe vino Yesu wali, naswe kwene tukauvwila antu yaa uluse nupya tukalondesya ukuyanenako ‘ilandwe lisuma pa vintu visuma.’—Eza. 52:7.

¹¹ Tale elenganyini pa mwina Sergey. Lino atatala wasambilila icumi wali uwa nsonyi sana. Camutalilanga sana kulanzyanya na yauze. Nomba wizile atandika ukusambilila Baibo. Umwina Sergey walanzile ukuti: “Lino nasambililanga Baibo nizile imanya ukuti Aina Klistu yalinzile yanenako yauze pali vino yazumilamo. Nemo nalolanga ukuti ntanga nkwanisye ukusimikila antu.” Nomba nanti ciye vivyo, welenganyanga pali vino imikalile ya yantu aatamanyile Yeova yatazile. Walanzile ukuti: “Ivipya vino nasambililanga vyanzanzyanga nu kuntekezya mwenzo. Namanyile ukuti na anji kwene yalinzile ukumanya icumi wakwe vino nani namanyile.” Lino umwina Sergey watandike ukuya sana nu luse mu mwenzo, wasifile nu kutandika ukusimikila. Walanzile ati: “Icanzungwisye icakuti ukusimikila amazwi aya muli Baibo kwalenzile inte kuitwisika. Nupya calenzile ukuti utailo wane ukomeleko.” *

12-13. U mulandu ci uno tulinzile ukuteekelela yano tukasambilizya Baibo? Langililini.

¹² Cakwe citatu, mwateekelela yano mukusambilizya. Mwaiusya ukuti yatatala yelenganyapo pa cumi icaya muli Baibo cino swemo twamanya ningo sana. Nupya aingi yatemwa sana vino yazumilamo. Limwi yakalola ukuti imipepele yao icintu cicindame sana icikalenga yaye alemane na ya lupwa yao, intambi alino nu mu wikazi. Uzye tungayazwa tutuuli?

¹³ Tale elenganyini pali vii: I vyani ivikacitika ndi cakuti ulalo wa mpiti ononeka nupya  ukulondekwa ukuuzifya? Ilingi, ulalo upya ukapangwa ale uwa mpiti ucili ukuomviwa. Nomba ndi cakuti yamala sile ukupanga ulalo upya, uwa mpiti yakaonona. Avino caya na kuli sweswe, lino tutatala twanena yano tukasimikila ukuti yate kuzumila muli vino yazumilemo mpiti, tulinzile ukutandikilapo ukuyazwa ukumanya nu kutemwa icumi cino yakusambilila cino yatamanyile lino twatandike sile ukusambilila nayo. Ndi twacita vivyo alino yangapingulapo ukusya ivizumilo vyao ivya mpiti. Cikasendela sana antu insita pakuti sile yasenuke.—Loma 12:2.

14-15. Uzye tungazwa uli antu aatamanya ivingi na yano yatamanya nanti cimwi pa umi wa pe pano nsi muli paladaise? Langililini.

¹⁴ Ndi cakuti tukuteekelela antu yano tukazana mu mulimo wa kusimikila, tutalaenekela ukuti yamauvwikisya icumi ca muli Baibo pa muku wa kutandikilapo sile lino yacuvwa. Lelo, uluse lulalenga tuyazwe ukwelenganya sana pali vino Baibo ikalanda nanti icakuti pangapita insita itali. Elenganyini pali vino tungazwa umwi ukuvwikisya umwalola ukuya nu upaalilo wa kwizaya nu umi wa pe mu paladaise pano nsi. Aingi yamanya sile ivinono nanti ukukanamanya nanti acimwi pa cisambilizyo cii. Limwi yazumila mu kuti umuntu ndi wafwa ala casila atanga aye nu umi nupya. Nanti limwi yangaelenganya ukuti antu asuma yonsi yakaya kwi yulu. Uzye tungayazwa tutuuli?

¹⁵ Umwina umwi walanzile vino akacita pakuti aazwe antu ukuya nu upaalilo wa kwikala pano nsi. Ica kutandikilako, akawelenga Utandiko 1:28. Lyene akauzya umuntu wino akulanzyanya nawe kuno Leza walondanga antu yaikala na vino walondanga ulupwa lwa yantu lwaikala. Antu aingi yakaasuka yati, “Leza walondanga antu yaikala ningo pano nsi.” Lyene umwina akawelenga Ezaya 55:11 nu kuzya umuntu ndi cakuti ukulonda kwakwe Leza kwasenuka nanti foo. Ilingi antu yakaasuka ukuti awe. Ica kusyalikizyako, umwina akawelenga Masamu 37:10, 11 nu kuzya vino ivintu vilaya uku yantu uku nkoleelo. Ukuomvya Baibo umu nzila ya musango uu, kwazwa antu aingi ukumanya ukuti Leza acili akalonda antu asuma ukwikala manda pe muli Paladaise pano nsi.

16-17. Ndi cakuti twelenganya pa mazwi aya pa Mapinda 3:27, u munzila ci zimwi muno tungalangila uluse uku yantu? Langililini.

¹⁶ Icalenga 4, mwaelenganya pali vino mungacita pakuti mwalanga ukuti mukasakamala antu. Uzye twatala twatandalila umwi pa nsita iisi ningo? Tungalenga uwelelo nu kulanda ukuti tulaswilila pa nsita yuze isuma. Nga ndi cakuti umuntu akulondekwa uwazwilizyo umu tumilimo tumwi utunono, tungacita uli? Nanti ndi umwi atanga afume pa ng’anda pa mulandu nu kukota nanti ukukwalilila alino akulonda ukuya kumwi, tungacita uli? Ndi cakuti ivya musango uu vyacitika, tungazwako umuntu wino twazana umu miyele iyo.—Welengini Mapinda 3:27.

 ¹⁷ Nkazi umwi waomvile ningo pa mulandu na vino walangizye icikuuku umu kantu sile kanono. Pa mulandu wakuti wisile sana mano uku lupwa lumwi, walemvile kalata uku lupwa kwene lulo ulwafwililwe umwana. Muli kalata wiyo mwali na Malembelo akukomelezya sana. Uzye ulupwa luvwile uli? Nyina wa mwana uwafwile walemvile ukuti: “Ivintu vyanzipiile sana uwanda uwafumileko. Kalata wino mwalemvile wangazwilizye sana. Nkutaizya sana pali kalata winu uwatukomelizye sana. Nawelenzile kalata winu ukucila pa maila 20. Nazungwike sana pali vino mwatuteekizye, ukutusakamala nu kutulanga sana icikuuku. Tukumutaizya sana.” Cii cikulanga sile ukuti tungaomba ningo ndi cakuti tukwelenganya pali vino ivintu ivitalila antu yamwi akucula nu kuyazwa.

18. Ukulingana na mazwi aya pali 1 Kolinto 3:6, 7, i vyani vino tulinzile ukwiusya lino tukusimikila, nupya u mulandu ci?

¹⁸ Ukuya kwene tukalonda ukucita vino tungakwanisya lino tuli mu mulimo wa kusimikila. Tukaavwa antu ukusambilila pali Leza, nomba tusiomba mulimo ucindame sana. (Welengini 1 Kolinto 3:6, 7.) Yeova aliwe akalenga antu ukupalama kuli aliwe. (Yoa. 6:44) Fwandi umuntu azumile ukuvwa icumi nanti akane, casintilila pali vino waya umu mwenzo. (Mate. 13:4-8) Mwaiusya ukuti antu aingi yataazumile vino Yesu wasambilizyanga, nanti icakuti wali ali Kasambilizya uwacizile ya kasambilizya yonsi uwaliko pano nsi. Fwandi tutalinzile ukutoovoka ndi cakuti antu yano tukusimikila yasikulonda ukuvwa kwi landwe lisuma.

19. I visuma ci ivilacitika ndi tukulanga uluse umu mulimo wa kusimikila?

¹⁹ Tulaomba ningo umulimo wa kusimikila ndi tuli nu luse. Tulaipakizya sana ukusimikila antu. Tulaya sana ni nsansa izikaiza pa mulandu na ukapekape. Nupya tulaleenga ukuti antu aaya “nu mwenzo wakulondesya ukuya nu umi wa pe” yazumile ukuvwa ilandwe lisuma. (Mili. 13:48, NWT.) Fwandi “tulinzile kucita visuma ku muntu wensi vino tungacita nu kuluta kuli yao ali alondezi yakwe Klistu.” (Gala. 6:10) Lyene tulaya ni nsansa pa mulandu nu lulumbi luno tukatwala kuli Tata witu uwa kwi yulu.—Mate. 5:16.