1. Teevi eri echu emoha vooloca sa Yesu yeeyo enatannya murima ahu moopwahaxa? Mutharihe.

MUKHALELO mmoha wa Yesu onatannya murima ari mavyakelo awe a wiiwexexa makacamiho yaawo hiyo achu oohiphaameya nnahoolelaahu. Elukuluku aareiye veelaponi yavathi, Yesu ‘aanatheya ni yaawo yaatheya nave aaninla ni yaawo yinla.’ (Aro. 12:15) Ntoko yootakiherya, vaavaa arummwa awe makhumi mathanu nameeli yaakonkaaya ehakalanle emanle okhumelela phaama mmuteko woolaleerya, Yesu “aahaakalala mwa Munepa Waweela.” (Luka 10:17-21) Mmukhalelo mukina, vaavaa onneiye mukhalelo okhwa wa Lasaro waavolowenlaaya yaale yaamusivela, Yesu “aahuukhuwasha mpuwa mwawe, athanana.”—Yoh. 11:33.

2. Tiheeni yaamukhavihenrye Yesu wooniherya opwacha ntakhara achu?

² Tiheeni yaamweerinhe mulopwana yoola oophaameya okhala aikharari ni a niphwanya ntakhara achu oohiphaameya? Echu yoopacerya wa soothene, ti yawi owo aanaasivela achu. Hiiha ntoko elociwaaya mmwaha ovirale, owo ‘aanahakalala aawoonaka achu.’ (Masi. 8:31) Osivela yoowo ntakhara achu waahimweeriha Yesu osuwela phaama mukhalelo achu anuupuwelaaya. Murummwa Yohani oothariha: “Owo mwaneene aasuwela mukhalo woomuchu.” (Yoh. 2:25) Yesu aahikhalano moonelo woopwacha ntakhara akina. Achu yaanoona osivela wawe ntakhara yaawo nave awo yaanawiriyana muchaka wa Omwene. Vaavaa nnannuwihaahu mukhalelo mmohamoha woopwacha ntakhara achu, nnanwerya waakhaviherya ancipale elukuluku nnaalaleeryaahu yaawo.—2 Tim. 4:5.

3-4. (1) Wakhala wi ninnaapwacha achu, nni nooneke hai muteko ahu woolaleerya? (2) Tiheeni nnahaalaahu ohuserya mmwaha yoola?

³ Murummwa Paulo aahisuwela wi aahikhalano murici wa olaleerya, nave hiyotho nnaphwanela weerano emohamoha. (1 Kor. 9:16) Mwa yeeyo, wakhala wi ninnaapwacha achu, nnahaala woonaka muteko ahu woolaleerya ohiya ntoko murici vyakala woophareliwa.  Nnahaala wooniherya wi ninnaapwacha achu nave wi nri ooreheryeya waakhaviherya. Noosuwela wi “wookhalavo ohakalala wawaaca mu ovaha opwaha mu waakhela.” (Saw. 20:35, TNM) Vaavaa nnalaleeryaahu nthowa na ochuna waakhaviherya achu, nnahaala ohakalala moopwahaxa ni mmuteko woolaleerya.

⁴ Mmwaha yoola, nnahaala ohuserya mukhalelo wa wooniherya opwacha mmuteko ahu woolaleerya. Voopacerya, nnahaala woona yeeyo nneeraahu nihuserye orweela wa mukhalelo Yesu ooneiye vooloca sa achu. Voocharela nnahaala ohuserya mikhalelo misese mummo nneeraahu ncharihe yootakiherya awe.—1 Ped. 2:21.

5-6. (1) Achu taani Yesu oonihenryeiye waapwacha? (2) Ntakhara heeni Yesu aahimoriwa ikharari ntakhara achu yaawo aalaleeryeiye hiiha ntoko yaaloheryiwaaya mu Isaiya 61:1, 2?

⁵ Muthokororye yootakiherya emoha mmukhalelo Yesu oonihenryeiye opwacha. Mu elukuluku emoha, Yesu ni amuhuserya awe yaahitepa okoma emanle olaleerya michaka saphaama ehiichunwe. Awo “hiyaawerya okhalano elukuluku yoolya.” Mwawiihiiha Yesu aahaakusa amuhuserya awe “eyaaka otakhwani wi ekhalewo meekhaaya” nave ‘yiichuuwe vakhaani.’ Mwawiihiiha, mucici wa achu waahichimakela weiwo Yesu ni amuhuserya awe yaayaayawo. Vaavaa Yesu aakeleiye weiwo nave awoona achu, owo aakhulenle hai? Owo aahaamorela “ikharari *, ntakhara yaari ntoko ipucepuche ihirino mukukhula. Aapacerya waahusiha sincipale.”—Mar. 6:30-34.

⁶ Moone nthowa naamweerinhe Yesu omoriwa ikharari, naari waapwacha achu yaale. Owo aahoona wi achu “yaari ntoko ipucepuche ihirino mukukhula.” Akhweya Yesu aahoona wi akina a yaawo yaari oohaawa nave yaanalapa mwakuru wi evakulele imusi saya. Akhweya akina yaanathanana nthowa na omuyeleela oosiveliwa aya mookhwani. Yaari hiiha, Yesu aahiwerya wiiwexexa mukhalelo aya. Hiiha ntoko ethokororyiwaaya mmwaha ovirale, Yesu mwaneene aahihoolela makacamiho makina ntoko yaala. Yesu  aanathanana ntakhara akina, nave eyo yaahimweeriha waavahererya muchaka woohakararya.—Mwaalakhanye Isaiya 61:1, 2.

7. Nni ncharihe hai yootakiherya ya Yesu?

⁷ Tiheeni nnahuseryaahu orweela wa yootakiherya ya Yesu? Moolikana ni Yesu, nrukureryiwe ni achu yaawo ari ntoko “ipucepuche ihirino mukukhula.” Awo aakhalano makacamiho mancipale. Nookhalano yeeyo awo anachunaaya—muchaka wa Omwene. (Wup. 14:6) Mwawiihiiha ninnamutakiherya Pwiya ahu nave ninnalaleerya michaka saphaama nthowa nawi nookhalano “ikharari [wa] oohaawa ni oovelavela.” (Sal. 72:13) Ninnaamorela ikharari achu, nave ninnachuna weeravo echu wi naakhaviherye.

8. Mukhalelo taani mmoha nneeraahu nooniherye opwacha mmuteko woolaleerya? Mvahe yootakiherya.

⁸ Tiheeni eni enikhaviherye waapwacha yaale nnaalaleeryaahu? Nnachuna wiihela mu nipuro na yaale nnaaphwanyaahu mmuteko woolaleerya nave naakhalihe yaawo mmukhalelo hiyo naahaalaahu ochuna okhalihiwa. * (Mat. 7:12) Hankooni nthokororye mikhalelo misese mummo nneeraahu neereno yeela. Mukhalelo woopacerya, muupuwele vooloca sa soothowa sa muchu ti muchu. Vaavaa nnalaleeryaahu michaka saphaama, murici ahu onalikana ni wa totore. Totore aphaama onnathokororya soochuna sa muchu ti muchu oniiceliwa. Owo onnampakela makoho nave onnawiriyana moomaaleleya vaava mulipa awiiceliwa onaloceiye mukhalelo owo onooneiye. Ohiya waakuvela omvaha murece yoowo totore onuupuweleiye, owo onnamaliha elukuluku amvareryaka mulipa awiiceliwa wi oone yeeyo eneereya ni yene nave voocharela onnamvaha murece woophwanelela. Mmukhalelo woolikana, hannaphwanela opharihela meerelo oolikana vaavaa nneereryaahu opacerya ovaanela ni muchu vyakala yoowo nnamphwanyaahu mmuteko woolaleerya. Ohiya yeeyo, nnaphwanela weererya wiiwexexa mukhalelo ni miyoonelo sa muchu ti muchu.

9. Tiheeni nnaphwanelaahu osepa? Mutharihe.

⁹ Elukuluku munamphwanyaanyu muchu mmuteko woolaleerya, musepe wuupuwela wi nyuwo moosuwela khalai mikhalelo sawe naari yeeyo owo onaroromeleiye ni mathowa anamweeriha ororomela yeeyo. (Masi. 18:13) Ohiya yeeyo, mmukohe mwa miruku wi musuwele echu vooloca sa muchu owo nave yeeyo onaroromeleiye. (Masi. 20:5) Wakhala wi ti yookhovelela mu nipuro nanyu, mmukohe vooloca sa muteko awe, emusi awe, saweereya ni miyoonelo sawe. Wakhala wi ninnaakoha yaawo, ninnaweeriha onleela ntakhara heeni anachunaaya michaka saphaama. Vaavaa nnasuwelaahu yeeyo, nnanwerya wooniherya waapwacha ntakhara waavaha nikhaviheryo nenlo anachunaaya, hiiha ntoko Yesu eenreiye.—Mulikanyihe ni 1 Korinto 9:19-23.

10-11. Mwawiiwanana ni 2 Korinto 4:7, 8, tuuvi ori mukhalelo wanawiili nneeraahu nooniherye opwacha? Mvahe yootakiherya.

¹⁰ Yanaawiili, mweererye waanyiherya mukhalelo  okumi aya oryaaya. Mmikhalelo mikina, nnanwerya wiiwexexa mukhalelo aya. Opwaha soothene, hannawerya osepa makacamiho yaawo achu oothene oohiphaameya anahoolelaaya. (1 Kor. 10:13) Noosuwela wi okumi mu elapo yeela onamukhala woovila. Nnavilela pahiru nnikhaviheryo na Yehova. (Mwaalakhanye 2 Korinto 4:7, 8.) Nyenya muupuwele sa yaale ahirino onthamwene wawaacameleya ni Yehova. Wa yaawo ti woovila okhala mu elapo yeela ehirino nikhaviheryo na Yehova. Moolikana ni Yesu, ninnamoriwa ikharari ni yaawo, nave nnachuna waaleela “michaka yaphaama.”—Isa. 52:7.

¹¹ Muthokororye yootakiherya ya munna oniichaniwa Sergey. Ahaakumve ohuserya eparipari, owo aari awuuliwa muru, ni oomaala. Waari woovila wa yoowo oloca ni akina. Mu elukuluku aya, owo aaheemererya yoohuserya ya Piipiliya. Sergey ooloca: “Elukuluku kaamuhuseryaaka Piipiliya, kaahisuwela wi Akristu aakhalano murici wa wuuka nroromelo naya ni akina. Mweeparipari koona wi nkaawerye weerano yeeyo.” Nyenya owo aahuupuwela ntakhara yaale yahiiwale eparipari, nave owo aahiwerya waanyiherya mukhalelo okumi aya waahaalaaya okhala ehimusuwelaka Yehova. Owo ooloca: “Ichu ivyaani seiyo kaahusenryaaka saahikiruuhela ohakalala otokotoko ni murecele wampuwa. Kaahisuwela wi akina yaanaphwanela ohuserya iparipari seiya tho.” Vaavaa opwacha wa Sergey wunnunwaaya, owo aahisuwela wi aaphwanela okhalano olipa murima otokweene wi alaleerye. “Yootutuxa wa miyo,” Sergey tonaloca, “waaleela akina vooloca sa Piipiliya ilukuluku soothene waanalipiha nroromelo naka. Nave oloca wa akina soororomela saka yaanakeeriha olipiha nroromelo naka.” *

12-13. Ntakhara heeni nnaphwanelaahu okhala oopisa murima ni yaale nnaahusihaahu mmuteko woolaleerya? Mphwanaphwanihe.

¹² Yaneeraru, mukhale oopisa murima ni yaale munaahusihaanyu. Muupuwele, awo hantonko wuupuwela vooloca sa iparipari sa Mpiipiliyani seiyo nnasuwelaahu phaameene. Nyenya akina aakhalano moonelo woolipa vooloca sa soororomela saya. Awo anoona wi malapelo aya toochuneyaxa yaawo anahaala owaacameliha ni emusi aya, sookhovelela saya, ni muceche aya. Nni naakhaviherye hai yaawo?

 ¹³ Muupuwele olikanyiha ola: Tiheeni eneereya ni muthato yoowo ovelavenle onachuna oraceelihiwa ni mukina? Wiiliwiili, muthato muvyaani onnatekiwa oniiha ole wakhalai ophariheliwaka. Vaavaa muthato muvyaani onakwaaxiwaaya otekiwa, ole wakhalai onanwerya ophwatiwa. Mmukhalelo woolikana, nihaakumve waaveka achu wi ehiye sookhovelela saya “sakhalai,” voopacerya nnaphwanela waakhaviherya osuwela ni osivelaka iparipari “ivyaani” seiyo awo yaahisuwelaaya elukuluku naapaceryaahu ohuserya ni yaawo. Pahiru hiiha awo anamukhala ooreheryeya ohiya soororomela saya. Enamuchuneya elukuluku yincipale wi nimukhaviherye muchu opaka matorokelo sintoko yaala.—Aro. 12:2.

14-15. Nni naakhaviherye hai yaale anasuwela vakhaani naari ehinasuwelaru echu vooloca sa ewehereryo ya ekumi yoohimala mu parataiso veelaponi yavathi? Mvahe yootakiherya.

¹⁴ Wakhala wi naachu oopisa murima ni achu mmuteko woolaleerya, hanni niweherye wi awo yiiwexexe naari yeemererye eparipari ya Mpiipiliyani mu ekwaha yoopacerya awo aniiwaaya eyo. Ohiya yeeyo, opwacha onnaneeriha waakhaviherya yaawo wuupuwelela moopwacha vooloca sa yeeyo Piipiliya onaloceiye mu elukuluku yincipale. Ntoko yootakiherya emoha, muthokororye mukhalelo nneeraahu nimukhaviherye muchu wiiwexexa vooloca sa ewehereryo ya ekumi yoohimala mu parataiso veelaponi yavathi. Akina anasuwela vakhaani pahi nave akina hanasuwelaru echu sa nihusiheryo nenla. Awo anaroromela wi okhwa makuchuwelo a ichu soothene. Naari awo anuupuwela wi achu oothene aphaama anaya wirimu. Nni naakhaviherye hai yaawo?

¹⁵ Wookhalavo mukhalelo mmoha munna onaakhaviheryeiye achu wiiwexexa ewehereryo ya okhala ni ekumi yoohimala veelaponi. Voopacerya owo onnaalakhanya yoorepa ya Maphatxuwelo 1:28. Voocharela owo onnamukoha mwaneene a vaate ti woowi Muluku aachuneiye wi achu ekhalewo nave mukhalelo taani wa okumi owo aachuneiye wi achu ekhaleno. Achu ancipale annaakhula eriki, “Veelaponi yavathi nave mmukhalelo waphaama.” Voocharela, munna onnamwaalakhanya Isaiya 55:11 onnakoha waakhanle wi yookhwela ya Muluku yootorokeya. Wiiliwiili, mwaneene a vaate onamwaakhula wi hetoroken’ye. Vookuchula, munna onnamwaalakhanya Salumu 37:10, 11 nave onnakoha mukhalelo okumi wa achu ancipale onahaalaya okhala muhoolo. Orweela mwa ompharihela Piipiliya mmukhalelo yoola, owo onnaakhaviherya achu ancipale wiiwexexa wi nlelo Muluku onachuna wi achu aphaama ekhale ni ekumi yoohimala mu Parataiso veelaponi yavathi.

16-17. Nimuupuwelelaka Masiposipo 3:27, mikhalelo taani soophara muteko nneeraahu nooniherye wi ninnaapwacha akina? Mphwanaphwanihe.

¹⁶ Yaneesese, muupuwele vooloca sa yeeyo muneeraanyu mpake wi mooniherye wi munnaapwacha achu. Ntoko yootakiherya, apwanne ninnaya omuxekurya mwaneene a vaate mu elukuluku yoohiphwanelela? Nnaphwanela omveka nikhurumuwelo nave nikookelewo wi namuxekurye mu elukuluku yoophwanelela. Hanka wakhala wi mwaneene a vaate onachuna  okhaviherya ni muteko vyakala? Naari hanka wakhala wi muchu hanawerya weeca nthowa na wiiceliwa naari wuuluvala nave onnachuna nikhaviheryo? Mmikhalelo sintoko seiya, hiyo nnaphwanela omukhaviherya owo.—Mwaalakhanye Masiposipo 3:27.

¹⁷ Murokora mmoha aahikhumelela phaama orweela mwa wooniherya oreera murima mwa opaka echu yeeyo yooneya ntoko ekhaani. Aceenyeryeyaka ni opwacha, murokora owo orepela ekaarata emusi emoha yeeyo yaamuyelenle mwanaya amwaamulopwana mookhwani. Ekaarata eyo yaaphitaanyerya nihakararyo naarweela mu Soorepa. Emusi yaakhulenle hai? Mai yoowo aamuyelenle mwanawe ooloca: “Osilo kaahitepa othanana. Ekaarata aa yaahitepa onikhaviherya vatokovene. Kinnatepa woothamalela ntakhara ekaarata aa yeeyo yaanikhavihenrye vancipale. Osilo kaahaalakhanya ekaarata aa opwaha ikwaha makhumi meeli. Nkinawerya waanyiherya mukhalelo oryaawe ooreera murima, oopwacha, ni oolipiha. Ninnathamalela ni murima woothene.” Moohikhwa minikwa, nnamukhalano sookhumelela saphaama vaavaa nniihelaahu mu nipuro na achu yaale anahooxeya, nave voocharela neeravo echu wi naakhaviherye.

18. Mwawiiwanana ni 1 Korinto 3:6, 7, moonelo taani woophimelela nnaphwanelaahu okhalano mmuupuweloni?

¹⁸ Mweeparipari, nnachuna okhalano moonelo woophimelela ntakhara murici ahu mmuteko woolaleerya. Nnaphwanela opaka makupa mu waakhaviherya akina ohuserya vooloca sa Muluku, nyenya hannapaka makupa matokweene a muteko yoola. (Mwaalakhanye 1 Korinto 3:6, 7.) Yehova tonaweeriha achu orwa wa yoowo. (Yoh. 6:44) Omakuchuwelo, muchu ti muchu onahaala waakhulela michaka saphaama mwawiiwanana ni yeeyo eri mmurimani mwawe. (Mat. 13:4-8) Muupuwele wi achu ancipale hiyaaweemerenrye muchaka wa Yesu—nave owo aari muhusiha Mutokotoko yoowo aakhanle! Chiryene, mwawiihiiha, hannaphwanela okhala ooceecheya wakhala wi achu ancipale yaawo nneereryaahu waakhaviherya hanaakhulela mwaphaama.

19. Sookhumelela taani hiyo nnahalahu okhalano mu wooniherya wahu opwacha mmuteko woolaleerya?

¹⁹ Nnamukhalano mphurelo vaavaa nnaapwachaahu akina mmuteko woolaleerya. Nnahaala opuha muteko ahu woolaleerya moopwahaxa. Nnamukhalano ohakalala otokotoko yoowo onarweela mu ovaha. Nave nnamweeriha okhala wookhweya wa yaale “yaalakhanyeriwe waakhela okumi woohimala” weemererya michaka saphaama. (Saw. 13:48) Mwa yeeyo, “elukuluku yeela nryaahuno, niweereleke saphaama achu oothene.” (Gal. 6:10) Voocharela nnamukhalano ohakalala ntakhara omuruuhela ncicimiho Tiithi ahu a wirimu.—Mat. 5:16.