1. Xkijto tlenon ueli kichiua Jesús tlen melak kualtsin.

JESÚS ueli techasikamati akin titlajtlakolejkej ijkuak tikixnamikij miyek tlauejli, niman yejon melak kualtsin tlen kichiua. Ijkuak onen ipan tlaltikpaktli opak imiuan akin pakiyaj niman ochokak imiuan akin chokayaj (Rom. 12:15). Se neskayotl, ijkuak 70 inomachtijkauan onokuepkej, melak pakiyaj pampa melak kuajli okinkakej kampa otenojnotsatoj, niman “Espíritu Santo sanoyej okipaktij Jesús” (Luc. 10:17-21). Noijki, ijkuak omik Lázaro okimitak ika akin kitlasojtlayaj melak najmanayaj, niman yejua noijki “sanoyej onajman” (Juan 11:33).

2. ¿Tleka Jesús oteasikamat?

² Maski Jesús xtlajtlakole katka, yejua melak okimasikamat niman okimikneli akin tlajtlakolejkej. ¿Tleka ijkon okichiuj? Pampa tetlasojtla. Ken otikitakej ipan tlamachtijli tlen youajpanok, melak kintlasojtlaya tlaltikpakchanejkej (Prov. 8:31). Pampa ijkon okimachili, okichiuj makineki kimasikamatis kenon tlanemiliaj. Apóstol Juan kijtoua: “Kimatstikatka tlinon onkaj ipan inyojlo on tlakamej” (Juan 2:25). Jesús melak teikneliaya, niman pampa miyekej okimachilijkej ken kintlasojtlaya, okiselijkej iTlajtol toTajtsin. Kuakon, tla tokojtiliaj tikchiuaskej ken Jesús, melak kuajli tikinpaleuiskej akin tikinnojnotsaj (2 Tim. 4:5).

3, 4. a) Tla titeasikamatij, ¿tlenon tiknekiskej tikchiuaskej ijkuak titenojnotsaskej? b) ¿Tlenon tikitaskej ipan yejuin tlamachtijli?

³ Apóstol Pablo kimatstoya ika nonekiya tenojnotsas, niman tejuamej noijki (1 Cor. 9:16). San ika, tla titeasikamatij, titenojnotsaskej pampa tajmanaj intech tlaltikpakchanejkej niman tiknekij tikinpaleuiskej, xsan pampa  tikmatstoskej ika noneki tikchiuaskej. Tikmatstokej ika “más paki yejuan kitemaka xken on yejuan kiselia” (Hech. 20:35). Tla ijkon titlanemiliaj, kichiuas melak matipakikan ijkuak titenojnotsaskej.

⁴ Ipan yejuin tlamachtijli, tikitaskej kenon titeasikamatiskej ijkuak titenojnotsaj. Kachtopa, titlajtoskej itech kenon Jesús kimitaya tlaltikpakchanejkej niman tlenon techmachtia yejon. Sakin, tikitaskej naui itech kenon uelis tikchiuaskej ken Jesús (1 Ped. 2:21).

5, 6. a) ¿Akinon okimasikamat Jesús? b) ¿Tleka Jesús okimikneli akin okinnojnots, niman ijkon onochiuj Isaías 61:1, 2?

⁵ Matikitakan sejpa ijkuak Jesús oteasikamat. Yejua niman inomachtijkauan tenojnotstinemiyaj niman nion xnoseuiayaj. “Nion xkipiyayaj tiempo para tlakuaskej”. Kuakon Jesús okinuikak “kampaka xakaj nemi” niman ijkon ompa achijtsin manoseuikan. San ika, miyekej tlaltikpakchanejkej oyajkej kampa yejuamej ajsiskiaj. ¿Tlenon okichiuj Jesús ijkuak oajsik niman okimitak nochimej akin ompa nemiyaj? “Okinmiknelij, * pampa nemiyaj ken itlaj borregos yejuan xkipiyaj intlajpixkau. Kemaj Jesús opeu kinmachtia miyek tlajtlamach” (Mar. 6:30-34).

⁶ ¿Tleka oteikneli Jesús? Pampa okimitak tlaltikpakchanejkej ken “borregos yejuan xkipiyaj intlajpixkau”. Kanaj okitak ika sekimej xkipiayaj tomin niman noneki melak tekitiskej niman ijkon kipiyaskej tlen kikuaskej. Kanaj oksekimej yomijka se inchanejkauj. Jesús kuajli kimasikamatiya pampa kanaj yejua noijki okixnamik yejuin, ken otikitakej ipan tlamachtijli tlen youajpanok. Najmanaya  intech oksekimej niman okichiuj makineki kinyolseuis (xpoua Isaías 61:1, 2).

7. ¿Kenon uelis tikchiuaskej ken Jesús?

⁷ ¿Kenon uelis tikchiuaskej ken Jesús? Aman tlaltikpakchanejkej noijki ken “borregos yejuan xkipiyaj intlajpixkau” niman kipiyaj miyek tlauejli. San ika, tejuamej tikpiyaj tlen kinpoloua: tlajtojli itech iTekiuajyo toTajtsin (Apoc. 14:6). Kuakon, tikchiuaj noijki ken toTemachtijkauj niman titenojnotsaj itech kuajli tlajtoltin pampa tikimikneliaj akin yolyemankej niman akin xkipiyaj tomin (Sal. 72:13). Tikimikneliaj tlaltikpakchanejkej niman tiknekij tikinpaleuiskej.

8. ¿Tlenon uelis techpaleuis matiteasikamatikan ijkuak titenojnotsaj? Xkijto se neskayotl.

⁸ Tla tiknekij tikimasikamatiskej akin tikinnojnotsaj, noneki matikitakan tlen kinemiliaj niman kimachiliaj, niman matikinchiuilikan ken tiknekiskiaj matexchiuilikan * (Mat. 7:12). Matikitakan naui tlemach tlen uelis techpaleuis ijkon matikchiuakan. Kachtopa, matiknemilikan tlen inpan panotok. Ijkuak titenojnotsaj, kentla titlapajtikej. Se tlapajtiketl akin kuajli kichiua itekiyo kita tlen kinpoloua akin kinpajtis. Kintlajtoltia niman kuajli kinkaki ijkuak kijtouaj tlen kimachiliaj. Xnimantsin kimijlia tlen uelis kitoloskej, kachtopa imiuan nonojnotsa niman ijkon kimatis katlejua pajtli kiminamikis. Noijki ijkon, ijkuak titenojnotsaj, xnochimej san noijki ijkon tikimijliaj, tikitaj tlen kinemiliaj tlaltikpakchanejkej niman sakin tikimijliaj tlen noneki.

9. a) ¿Tlenon xkipiya ika nimantsin tiknemiliskej? b) ¿Tlenon kuajli tikchiuaskej?

⁹ Xkipiya ika nimantsin tiknemiliskej ika tikmatij tlen kimachiliaj tlaltikpakchanejkej akin imiuan titlajtouaj, nion xtiknemiliskej ika tikmatij tlenon kineltokaj noso tleka ijkon tlaneltokaj (Prov. 18:13). Melak kuajli tla tikintlajtoltiaj niman ijkon uelis tikmatiskej tlenon kimachiliaj (Prov. 20:5). Matikintlajtoltikan ipampa intekiyo, inchanejkauan, tlenon kinemiliaj niman okseki itech innemilis. Ijkon, sa no yejuamej techijliskej tleka kinekij kikakiskej itech toTajtsin. Ijkuak itikmatij yejon, uelis tikinpaleuiskej itech tlen kinpoloua, ijkon ken okichiuj Jesús (uelis tikitas 1 Corintios 9:19-23).

10, 11. Ken techijlia 2 Corintios 4:7, 8, ¿katlejua ika ome techpaleuis matiteasikamatikan? Xkijto se neskayotl.

¹⁰ Ika ome, matiknemilikan kenon nemij. Yejon techpaleuis matikmachilikan tlen kimachiliaj, pampa tejuamej noijki tikixnamikij tlauejli tlen oksekimej  kipiyaj (1 Cor. 10:13). Tikmatstokej ika ipan yejuin tlaltikpaktli tlen kiyekana Satanás, melak ouijtika tlen tikixnamikij niman ika san Jehová uelis techpaleuis titlaxikoskej (xpoua 2 Corintios 4:7, 8). San ika, matiknemilikan kenon kixnamikij tlauejli akin xnouikaj iuan toTajtsin. Ijkon ken Jesús, tikimikneliaj niman tikiminkakistiliaj kualtsin tlajtojli (Is. 52:7).

¹¹ Matikitakan tlen ipan onochiuj tokniuj Sergey. Ijkuak xikixmatiya Jehová, xueliya kijtouaya tlen kimachiliaya pampa san pijpinauiya. Sakin, opeuj nomachtia Biblia. Yejua kijtoua: “Ijkuak ninomachtiaya Biblia oniuel ika akin kichiuaj ken Cristo noneki tenojnotsaskej itech intlaneltokil. Nejua niknemiliaya ika xkeman ueliskia nikchiuas”. San ika, Sergey nochipa tlanemiliaya itech kenon chantiyaj akin xkixmatiyaj tlen melauak nion xkixmatiyaj Jehová. Kijtoua: “Tlen ninomachtiaya, melak nechyolpaktiaya niman nechyolseuiaya. Nikmatstoya ika oksekimej noijki nonekiya ueliskej tlen melauak”. Pampa okasikamat yejuin, okichiuj maka manomojti tenojnotsas. ¿Tlenon opanok? Yejua kinokuitia: “Onechmojkatlachialti ika yejon onechyolchikauj, okichiuj kuajli maninomachili niman okichiuj ika tlen niueliya itech Biblia manokaua ipan noyojlo”. *

12, 13. ¿Tleka kipiya ika tikinxikoskej akin tikiminmachtiaj itech Biblia? Xkijto se neskayotl.

¹² Ika yeyi, matikinxikokan akin tikiminmachtiaj itech Biblia. Matikilnamikikan ika yejuamej kanaj xkeman kikakiyaj itlamachtiluan Biblia tlen tejuamej kuajli tikimixmatij. Noijki, miyekej kinemiliaj ika tlen kineltokaj kichiua ika san sekan manemikan imiuan ichanejkauan, kinpaleuiya kampa chantij niman ken chantij. ¿Kenon uelis tikinpaleuiskej?

¹³ Matiknemilikan itech yejuin neskayotl. ¿Tlenon nochiua ijkuak noneki  nopatlas se puente tlen melak youejkauj niman yoijtlakauj? Ijkuak nochijchiua se puente yenkuik, tlaltikpakchanejkej ok kikuij puente tlen yoijtlakauj. Ijkuak tlamij kichijchiuaj puente, kitlajkalij tlen yoijtlakauj. Noijki ijkon, kachtopa kanaj nonekis tikpaleuiskej makipatiojkaita tlen temachtia Biblia niman sakin tiktlajtlaniliskej makikajkaua tlen kineltokaya. San ijkon uelis kipatlas tlen kineltokaya. Nochi yejuin, uelis uejkauis (Rom. 12:2).

14, 15. Xkijto ika se neskayotl kenon uelis tikinpaleuiskej akin xtlaj kimatij noso achijtsin kimatij ika tinemiskej nochipa ipan se Xochitlalpan.

¹⁴ Tla tikimijyouiyaj akin tikiminmachtiaj, xtikchiaskej nimantsin makasikamatikan niman makiselikan tlen kijtoua Biblia. Tla titeasikamatij, uelis tikinpaleuiskej matlanemilikan ika Biblia kechpa yejuamej kinekiskej. Xnemili ika titemachtiaj kenon uelis tinemiskej nochipa ipan se Xochitlalpan. Miyekej xtlaj kimatij noso achijtsin kimatij itech yejuin. Sekimej kinemiliaj ika ijkuak se miki nochi ompa tlami. Niman oksekimej kinemiliaj ika akin kichiuaj tlen kuajli yauej iluikak. ¿Kenon uelis tikinpaleuiskej makineltokakan tlen temachtia Biblia?

¹⁵ Se tokniuj techijlia tlenon kichiua. Kachtopa, kipoua Génesis 1:28 niman tetlajtoltia kanon niman kenon kinekiya toTajtsin machantikan tlaltikpakchanejkej. Miyekej tlanankiliaj ika nikan ipan tlaltikpaktli niman ika pakilistli. Kuakon, tokniuj kipoua Isaías 55:11 niman tetlajtoltia tla toTajtsin yokipatlak tlen kinekiya. Tlaltikpakchanejkej tlanankiliaj ika, ka. Ontlami ika Salmo 37:10, 11, sakin tetlajtoltia: “Ken kijtoua Biblia, ¿kenon chantiskej tlaltikpakchanejkej ika tlayekapan?”. Ijkon, yokichiuj ika miyekej makasikamatikan ika toTajtsin ok kineki ika tlaltikpakchanejkej akin kuajkualtin manemikan nochipa ipan se Xochitlalpan.

16, 17. Ken kijtoua Proverbios 3:27, ¿kenon uelis tikteititiskej ika titeasikamatij? Xkijto se neskayotl.

¹⁶ Ika naui, matiknemilikan kenon uelis tikteititiskej ika titeasikamatij. Tla ijkuak tontenojnotsaj tlaltikpakchanejkej xuelij techseliskej, uelis tikimijliskej matechtlapopoluikan niman ika tiaskej ijkuak kema ueliskej techseliskej. Noso tla kanaj akin otiktlajpalotoj noneki makipaleuikan kichiuaskej itlaj tlen xouijtika noso kanaj xueli kisa itech ichan niman kanaj kineki makitlakouilitij, uelis tikijliskej ika tejuamej uelis tikpaleuiskej (xpoua Proverbios 3:27).

¹⁷ Matikitakan tlen panoua ijkuak yakaj kichiua tlen kuajli pampa teasikamati. Ijkuak se tokniuj siuatl okimat ika se familia omik inkonetsin ijkuak onemiko, okichiuj itlaj tlen nesi ika xueyi kijtosneki: okimijkuilouili se carta ika seki textos  itech Biblia tlen teyolseuiyaj. ¿Tlenon okichiuj yejon familia ijkuak okiseli carta? Nantli okijkuilouili tokniuj: “Yaloua melak xkuajli tlen nopan onochiuj. Nion xtiknemilia kenon melak otechpaleui yejon carta. Xkeman nikmatis kenon nimitstlasojkamachilis, tlen otikchiuj melak otechpaleui. Yaloua onikpouj mocarta kanaj veinte veces. Temojkatlachialti kenon melak otechyolchikauj niman otechyolseui. Ika nochi toyojlo timitstlasojkamachiliaj”. Tejuamej noijki uelis tikitaskej tlen kuajli panoua tla tikimasikamatij akin tlajyouiyaj niman tla tikinpaleuiyaj.

18. Ken nesi ipan 1 Corintios 3:6, 7, ¿kenon kipiya ika tikitaskej tlen tikchiuaj ijkuak tontenojnotsaj?

¹⁸ Xtemojkatlachialti ika tiknekiskej tikitaskej ken kinamiki tlen tikchiuaj ijkuak tontenojnotsaj. Maski tikchiuaj tlen tiuelij niman ijkon tlaltikpakchanejkej makixmatikan toTajtsin, san ika, xtejuamej akin nochi tikchiuaj (xpoua 1 Corintios 3:6, 7). Jehová yejua akin kinyoltilana tlaltikpakchanejkej (Juan 6:44). Sakin, tlaltikpakchanejkej yejuamej akin kitlapejpeniaj tla kiseliskej noso xkiseliskej iTlajtol toTajtsin (Mat. 13:4-8). Matikilnamikikan ika miyekej xokikakej Jesús, niman yejua melak kuajli temachtiaya. Kuakon, xkipiya ika toyolkokoskej tla miyekej akin tikinnojnotsaj xkineki techkakiskej.

19. ¿Kenon techpaleuis tla titeasikamatij ijkuak titenojnotsaj?

¹⁹ Melak techpaleuis tla titeasikamatij ijkuak titenojnotsaj. Tiyolpakiskej ijkuak titenojnotsaskej niman tipakiskej pampa tiktemakaskej. Yejon kichiuas ika tlaltikpakchanejkej makiselikan iTlajtol toTajtsin niman ijkon ueliskej nemiskej nochipa (Hech. 13:48). Kuakon, “nochipa ijkuak tiueliskej, nochimej ma tikinchiuilikan tlen kuajli” (Gál. 6:10). Tla ijkon tikchiuaj, melak tipakiskej pampa tikueyichiuaskej toTajtsin Jehová (Mat. 5:16).