1. Nituza kugamba ahari mutwarize ki ogwa Yesu ogurikushemeza? Shoboorora.

GUMWE aha mitwarize ya Yesu erikushemeza n’okubaasa kwe kw’okwetegyereza oburemeezi obu abantu abatahikiriire barikurabamu. Obu Yesu yaabaire ari omu nsi, ‘akashemererwa hamwe n’abarikushemererwa’ kandi ‘yaarira hamwe n’abarikurira.’ (Rom. 12:15) Nk’eky’okureeberaho obu abeegi be 70 baagaruka bashemereirwe barikuruga kubuurira, ‘akashemerererwa omu mwoyo gurikwera.’ (Luk. 10:17-21) Kwonka, Yesu ku yaareebire oku banywani ba Laazaaro baasaasire ahabw’okufa kwe, ‘akatsinda omu mutima gwe, yaagira obusaasi.’​—Yoh. 11:33.

2. Niki ekyabaasiise Yesu kugirira abantu esaasi?

² Niki ekyahigire Yesu ohikiriire kugirira abantu embabazi n’esaasi? Ekintu kikuru ekyamuhigire n’okukunda abantu. Nk’oku kirikugambwaho omu kicweka eky’enyima, Yesu okukira munonga akaba naakunda abantu. (Enf. 8:31) Rukundo ei yaabaire ainiire abantu ekamureetera kumanya oku barikuteekateeka. Entumwa Yohaana akagira ati: “Akaba naamanya ebiri omu muntu.” (Yoh. 2:25) Yesu akaba ainiire abandi esaasi. Ekyo kikareetera abantu kureeba ngu naabakunda kandi baahurikiza obutumwa oburikukwata aha Bukama. Naitwe twayongyera kugirira abantu esaasi, nitwija kwongyera kukora gye omu obuheereza bwaitu.​—2 Tim. 4:5.

3-4. (a) Twaba nitufayo aha bandi, nitwija kutwara tuta obuheereza bwaitu? (b) Nituza kushwijuma ki omu kicweka eki?

³ Entumwa Paulo akaba naamanya ngu aine obujunaanizibwa bw’okubuurira, kandi naitwe tubwine. (1 Kor. 9:16) Kwonka twaba nitufayo aha bantu, titurikwija kwejumba omu buheereza bwaitu kuhikiiriza omukoro kyonka. Kureka nitwija kworeka ngu nitufayo aha bantu, kandi ngu tweteekateekire  kubahwera. Nitumanya ngu ‘okugaba kuhaisa nikureeta okushemererwa okukira okuheebwa.’ (Byak. 20:35) Twaguma twine emiteekateekyere egi aha buheereza bwaitu, nitwija kwongyera kubukunda.

⁴ Omu kicweka eki, nituza kwega oku turikubaasa kworeka ngu nitufayo aha bandi omu buheereza bwaitu. Okubanza, nituza kureeba eki turikubaasa kwegyera aha muringo ogu Yesu yaabaire naafayo aha bantu. Bwanyima nituza kureeba emiringo ena oku turikubaasa kumutooreza.​—1 Pet. 2:21.

5-6. (a) Ni baahi abu Yesu yaagiriire esaasi? (b) Ahabw’eki Yesu yaagiriire esaasi abu yaabaire naabuurira, nk’oku kirikworekwa omuri Isaaya 61:1, 2?

⁵ Teekateeka aha ky’okureeberaho ekirikworeka oku Yesu yaabaire naafayo aha bandi. Izooba rimwe, Yesu n’abeegi be bakaba nibaruga kubuurira amakuru marungi n’obwekirizi. Bakaba bataine n’obwire ‘bw’okurya.’ N’ahabw’ekyo Yesu akatwara abeegi be kuza aheekiikire kandi ahehereire kuhuumuraho. Kwonka, abantu baingi bakairuka, baabatanga ahu baabaire nibaza. Yesu akeehurira ata kandi akatwaza ata, ku yaahikireyo akareeba abantu? ‘Akabagirira esaasi *, ahabw’okuba bakaba bari nk’entaama ezitaine muriisa; yaatandika kubeegyesa bingi.’​—Mak. 6:30-34.

⁶ Ahabw’enki Yesu yaagiriire abantu esaasi, akooreka ngu naabafaho? Akareeba ngu “bakaba bari nk’entaama ezitaine muriisa.” Obundi Yesu naabaasa kuba yaareebire ngu abantu abamwe bakaba bari abooro, kandi barikukora eshaaha nyingi kubaisaho amaka gaabo. Kandi obundi abandi bakaba baine obusaasi bwingi ahabw’okufeerwa abakundwa baabo. Ku kiraabe nikwo kyabaire kiri, Yesu akaba naabaasa kwetegyereza embeera zaabo. Nk’oku kirikworekwa omu kicweka eky’enyima, Yesu naabaasa kuba yaarabireho omu mbeera nk’ezo. Yesu akaba naafayo aha bandi  ekyamuhigire kubagambira obutumwa oburikuhuumuriza.​—Shoma Isaaya 61:1, 2.

7. Nitubaasa kutooreza tuta Yesu?

⁷ Eky’okureeberaho kya Yesu nitukyegyeraho ki? Nka Yesu, naitwe twetooroirwe abantu abari ‘nk’entaama ezitaine muriisa.’ Kandi baine oburemeezi bwingi. Twine kyenyine eki barikwetenga, nigo amakuru marungi g’Obukama. (Kush. 14:6) N’ahabw’ekyo nitutooreza Mukama waitu, kandi tubuurira amakuru marungi ahakuba “nitusaasibwa abooro n’abakyene.” (Zab. 72:13) Ahabw’okusaasibwa abantu nituteeraho kugira eki twakora kubahwera.

8. Nitubaasa kworeka tuta ngu nitufayo aha bantu omu buheereza bwaitu? Ha eky’okureeberaho.

⁸ Niki ekirikubaasa kutuhwera kworeka ngu nitufayo aha bandi? Nitwenda kweta omu mbeera y’abu turikubuurira, kandi tukabatwariza nk’oku turikwenda batutwarize. * (Mat. 7:12) Ka tureebe emiringo ena ei turikubaasa kukikoramu. Ogw’okubanza, teekateeka aha mbeera y’ou orikubuurira. Twaba nitubuurira amakuru marungi, nituba nitukora omurimo nk’ogw’omushaho. Omushaho murungi naateekateeka aha mbeera ya buri murwaire okwe. Naabuuza omurwaire ebibuuzo kandi ahurikiza gye yaaba naashoboorora obumanyiso bw’endwara ye. Omu mwanya gw’omushaho kuha omurwaire omubazi ahonaaho, naabaasa kumara obwire arikwetegyereza obumanyiso bw’endwara ye, kubaasa kumuha omubazi oguhikire. Naitwe, titushemereire kuba nitukoresa omuringo gumwe okugaaniira na buri muntu omu kubuurira. Kureka, twine kwetegyereza embeera ya buri omwe n’emiteekateekyere ye.

9. Niki eki tushemereire kwetantara? Shoboorora.

⁹ Omu kubuurira, yetantare kuteebereza ngu nooyetegyereza gye embeera y’omuntu, nari ngu noomanya ebi arikwikiriza n’ahabw’enki naikiriza atyo. (Enf. 18:13) Omu mwanya gw’ekyo, koresa ebibuuzo omu muringo gw’obwengye kumanya ebi arikwikiriza. (Enf. 20:5) Omu kicweka kyanyu kyaba nikiikirizibwa, noobaasa kumubuuza ebikwatiraine n’omurimo gwe, eka ye, n’ebi arikuteekateeka. Ku turikubabuuza ebibuuzo, nikituhwera kumanya enshonga ahabw’enki nibenda kumanya amakuru marungi. Twaheza kukimanya, nitubaasa kubahwera turikubafaho kurugiirira aha mbeera zaabo, nk’oku Yesu yaakozire.​—Gyeragyeranisa 1 Abakorinso 9:19-23.

10-11. Okuhikaana n’ebiri omu 2 Abakorinso 4:7, 8, ni muringo ki ogwa kabiri ogu turikubaasa kworekamu ngu nitufayo aha bandi? Ha eky’okureeberaho.

¹⁰ Ogwa kabiri, teeraho kuteekateeka aha  oburemeezi bwabo. Obumwe n’obumwe nitubaasa kwetegyereza oburemeezi bw’abantu. Ahakuba naitwe tituhikiriire kandi nituhikwaho oburemeezi nk’obu baine. (1 Kor. 10:13) Nitumanya ngu embeera zigumire omu bunaku obu. Yehova niwe wenka orikubaasa kutuhwera kugumisiriza. (Shoma 2 Abakorinso 4:7, 8.) Kwonka teekateeka ahari abo abarikuteeraho kwebaisaho omu nsi egi bataine mukago murungi na Yehova. Nka Yesu, nitubagirira esaasi, kandi ekyo nikituhiga kubagambira “amakuru marungi g’ebigambo birungi.”​—Isa. 52:7.

¹¹ Kandi teekateeka aha ky’okureeberaho ky’ow’eishe-emwe Sergey. Atakeegire mazima, akaba aine enshoni kandi ahunami. Kikaba nikimugumira kugamba n’abandi. Bwanyima y’obwire akaikiriza kwega Baibuli. Sergey naagira ati: “Ku naagumiizemu niinyega Baibuli, nketegyereza ngu Abakristaayo baine obujunaanizibwa bw’okugambira abandi ebi barikwikiriza. Okuba ow’amazima nkaba ninteekateeka ngu ekyo tindikubaasa kukikora.” Kwonka akateekateeka aha bandi abatakamanyire mazima, yaayetegyereza ngu embeera yaabo eshemereire kuba egumire ahabw’okutamanya Yehova. Sergey naagira ati: “Ebintu bisya ebi naabaire niinyega bikandeetera okushemererwa n’obugwagye. Nkamanya ngu abandi nabo baine kwega amazima aga.” Sergey ku yaayongyeire kufayo aha bandi, yaayongyera kugira obumanzi bw’okubuurira. Sergey naagira ati: “Ekyatangaarize munonga bwanyima y’okubuurira abandi aha biri omu Baibuli nkongyera kweyikiririzamu. Kandi kikahamya n’okwikiriza kwangye.” *

12-13. Ahabw’enki twine kugumisiririza abu turikwegyesa? Ha eky’okureeberaho.

¹² Ogwa kashatu, gumisiririza abu orikwegyesa. Ijuka ngu nibabaasa kuba batakateekateekahoga aha mazima agu itwe turikumanya gye. Kandi abaingi nibakundira kimwe enyikiriza zaabo. Nibareeba ngu ebi baayegyesiibwe nibibareetera kugira obumwe  n’ab’omu maka gaabo, entwaza y’ekicweka kyabo, n’abantu b’ekicweka kyabo. Nitubaasa kubahwera tuta?

¹³ Teekateeka aha kugyeragyeranisa oku: Niki ekirikubaho orutiindo rwaba rukuzire barikuza kutaho orundi? Kaingi, orutiindo orukuru niruba rukiriho baaba nibombeka orusya. Orutiindo orusya rwaheza kwombekwa, orukuru nirubaasa kusheenywa. Omu muringo nigwo gumwe, tutakareeteire abantu kutsigaho enyikiriza zaabo “ezikuzire” ezi barikukunda, twine kubanza kubahwera kwetegyereza gye enyegyesa za Baibuli “ensya” ezi batarikumanya. Obwo nibwo baraije kuba beeteekateekire kutsigaho emiteekateekyere yaabo eya ira. Nikibaasa kutwara obwire kuhwera abantu kukora empindahinduka.​—Rom. 12:2.

14-15. Nitubaasa kuhwera tuta abatarikwetegyereza amatsiko g’okutuura omu paradiso omu nsi ebiro byona? Ha eky’okureeberaho.

¹⁴ Twagumisiririza abantu omu murimo gwaitu gw’okubuurira, titurikwija kuteekateeka ngu baine kwetegyereza nari kwikiriza amakuru marungi baagahurira omurundi gw’okubanza. Omu mwanya gw’ekyo, okubafaho nikituhiga kubahwera kuhikaanisa ebiteekateeko aha Byahandiikirwe kumara obwire. Nk’eky’okureeberaho, teekateeka aha ku orikubaasa kuhwera omuntu kwetegyereza amatsiko g’amagara agatahwaho omuri paradiso omu nsi. Baingi nibamanya kakye munonga nari tibaine ki barikumanya aha nyegyesa egi. Nibabaasa kuteekateeka ngu okufa niyo muheru. Nari nibabaasa kuba nibateekateeka ngu abantu boona abarungi nibaza omu iguru. Nitubaasa kubahwera tuta?

¹⁵ Ow’eishe-emwe omwe naashoboorora omuringo ogu ashangire gurikukora gye. Naabanza ashoma Okutandika 1:28, reero abuuza ou arikubuurira ahu Ruhanga yaabaire naayenda ngu abantu batuure, n’embeera ezi yaabaire naayenda batuuremu. Baingi nibagarukamu ngu “n’omu nsi, kandi omu mbeera nungi.” Bwanyima, ow’eishe-emwe naashoma Isaaya 55:11, reero abuuza yaaba ekigyendererwa kya Ruhanga kihindukire. Kaingi abu arikubuurira nibagarukamu ngu ngaaha. Aha muheru, ow’eishe-emwe naashoma Zaaburi 37:10, 11, reero abuuza oku embeera ziraabe omu biro by’omumaisho. Ahabw’okuhikaanisa ebiteekateeko aha Byahandiikirwe omu muringo ogu, abaasize kuhwera baingi kwetegyereza ngu Ruhanga naayenda ngu abacureezi batuure omu Paradiso omu nsi ebiro byona.

16-17. Kurugiirira aha biri omu Enfumu 3:27, nitubaasa kukora ki kworeka ngu nitufayo aha bandi? Ha eky’okureeberaho.

¹⁶ Ogwa kana, teekateeka aha miringo ei orikubaasa kworekamu ngu noobafaho. Nk’eky’okureeberaho, mbwenu shi waija omu ka y’omuntu omu bwire butahikire? Noobaasa kushaba okusaasirwa kandi ocwemu kugaruka omu bwire obuhikire. Kandi shi omuntu ku yaakuba aine eki arikukora arikwenda obuhwezi? Nari omurwaire otarikubaasa kuruga  omuka ku yaakuba naayenda ow’okutuma? Omu mbeera nk’ezi zoona, nitubaasa kugira eki twakora kuhwera.​—Shoma Enfumu 3:27.

¹⁷ Munyaanyazi-itwe omwe akatunga ebirungi ku yaakozire ekikorwa ky’embabazi ekyabaire nikireebeka nka kikye. Ahabw’okufayo akahandiikira eka emwe eyaabaire efeereirwe omwana. Ebaruha ei yaahandiikire ekaba erimu Ebyahandiikirwe ebirikuhuumuriza. Eka egyo ekakwatwaho eta? Omukazi owaafeereirwe omwana akahandiika ati: “Nyomwabazyo mbaire nyine obusaasi n’amaganya maingi. Ebaruha yaawe etuhwereire munonga. Tindikubaasa kukwebaza ekirikumara nari kushoboorora gye oku etuhweraire. Nimbaasa kuba nshomire ebaruha yaawe emirundi nka 20 nyomwabazyo. Buzima ebaruha egyo ebaire neeyoreka okufayo, kandi erikuhuumuriza. Nitukusiima twihire aha mutima.” Hatariho kubangaanisa, nitutunga ebirungi twayeta omu mbeera z’abarikubonabona kandi tukagira eki twakora kubahwera.

18. Nk’oku kirikworekwa omu 1 Abakorinso 3:6, 7, nitwenda kugira miteekateekyere ki etagwereire rubaju?

¹⁸ N’amazima, twine kugira emiteekateekyere eringaniire aha buheereza bwaitu. Nitubaasa kugira eki twakora kuhwera abantu kwega ebirikukwata ahari Ruhanga, kwonka eki turikukora tikyo kirikukirayo obukuru. (Shoma 1 Abakorinso 3:6, 7.) Yehova niwe arikweyiriza haihi abantu. (Yoh. 6:44) Empereeruka, buri muntu naija kwikiriza amakuru marungi kurugiirira aha mbeera y’omutima gwe. (Mat. 13:4-8) Ijuka ngu baingi bakanga obutumwa obwa Yesu n’obu araabe yaabaire ari Omwegyesa mukuru orabaireho! N’ahabw’ekyo titushemereire kuhwa amaani abantu abu turikuteeraho kuhwera baayanga kuhurikiza.

19. Nitwija kutunga birungi ki twayoreka ngu nitufayo aha bandi omu buheereza bwaitu?

¹⁹ Nitwija kutunga ebirungi twafayo aha bantu omu buheereza bwaitu. Kandi nitwija kwongyera kukunda omurimo gw’okubuurira. Nitwija n’okugira okushemererwa okurikuruga omu kuha abandi. Kandi nikiija kworobera abo abaine ekyetengo ky’okutunga amagara agatahwaho kwikiriza amakuru marungi. (Byak. 13:48) “N’ahabw’ekyo obu tukiine omwanya tukore gye abantu boona.” (Gal. 6:10) Reero nitwija kugira okushemererwa ahabw’okuhimbisisa Tataitwe ow’omu iguru.​—Mat. 5:16.