1. Йесойы диссаджы миниуджытӕй иу цы у? Бамбарын ӕй кӕн.

ЙЕСО ЧЫРЫСТИЙЫ диссаджы миниуджытӕй иу уый у, ӕмӕ ӕнӕххӕст адӕмӕн сӕ зындзинӕдтӕ ӕмбары, ӕмӕ нӕ уый стыр ныфс уадзы. Йесо зӕххыл куы уыди, уӕд-иу адӕмӕн сӕ циныл цин кодта, сӕ мастыл та – маст (Ром. 12:15). Зӕгъӕм, иухатт 70 ахуыргӕнинаджы хъусын кӕнынмӕ арвыста, ӕмӕ фӕстӕмӕ цингӕнгӕйӕ куы ’рбаздӕхтысты, уӕд йӕхицӕн дӕр «йӕ зӕрдӕ цинӕй байдзаг» (Лук. 10:17–21). Ӕмӕ Лазӕры хиуӕтты та йӕ мӕлӕтыл маст кӕнгӕ куы федта, уӕд «йӕхицӕн дӕр йӕ зӕрдӕ суынгӕг ӕмӕ нынкъард» (Иоан. 11:33).

2. Йесо адӕмӕн цӕмӕн тӕригъӕд кодта?

² Йесо ӕххӕст адӕймаг уӕвгӕйӕ ӕнӕххӕст адӕммӕ афтӕ фӕлмӕнзӕрдӕ цӕмӕн уыд ӕмӕ сын цӕмӕн тӕригъӕд кодта? Фыццаджыдӕр уымӕн, ӕмӕ адӕмы уарзта. Айразмӕйы статьяйы куыд федтам, афтӕмӕй Йесо «зӕххон адӕмыл» цин кодта (Ӕмб. 8:31). Йесо адӕмы кӕй уарзта, уымӕ гӕсгӕ-иу архайдта, куыд хъуыды кӕнынц, уый бамбарыныл. Апостол Иоанн Йесойы тыххӕй загъта, зӕгъгӕ, уый «зыдта, адӕймаджы зӕрдӕйы цы ис, уый» (Иоан. 2:25). Йесо адӕмӕн тынг тӕригъӕд кодта. Уыдон дӕр-иу уыдтой, кӕй сӕ уарзы, уый, ӕмӕ-иу бирӕтӕ хорз хабармӕ зӕрдиагӕй байхъуыстой. Мах дӕр Йесойау тӕригъӕдгӕнаг куы уӕм, уӕд нын хъусын кӕнгӕйӕ фылдӕр ӕнтысдзӕн (2 Тим. 4:5).

3, 4. а) Тӕригъӕдгӕнаг куы уӕм, уӕд хъусын кӕныны хъуыддагмӕ цы цӕстӕй кӕсдзыстӕм? б) Ацы статьяйы цӕмӕ ӕркӕсдзыстӕм?

³ Апостол Павел хорз хабар хъусын кӕнын йӕ хӕсыл нымадта. Мах дӕр хӕсджын стӕм, цӕмӕй адӕмӕн хъусын кӕнӕм (1 Кор. 9:16). Фӕлӕ тӕригъӕдгӕнаг куы уӕм, уӕд ӕрмӕст уый тыххӕй нӕ хъусын кӕндзыстӕм, ӕмӕ уый нӕ хӕс у. Уымӕ нӕ уый разӕнгард кӕндзӕн, ӕмӕ сыл тыхсӕм, стӕй  нӕ фӕнды, цӕмӕй сын баххуыс кӕнӕм. Мах зонӕм, «райсынӕй раттын амондджындӕр хъуыддаг [кӕй] у» (Хъуыд. 20:35). Ӕмӕ уый нӕ зӕрдыл куы дарӕм, уӕд нын хъусын кӕныны хъуыддаг фылдӕр циндзинад хӕсдзӕн.

⁴ Ацы статьяйӕ базондзыстӕм, нӕ бон куыд у, кӕмӕн хъусын кӕнӕм, уыдоны ӕнкъарӕнтӕ кӕй ӕмбарӕм, уый ӕвдисын. Фыццаг уал ӕркӕсдзыстӕм, Йесойы цӕвиттонӕй цӕуыл ахуыр кӕнӕм, уымӕ. Стӕй аныхас кӕндзыстӕм, нӕ бон ӕй цавӕр цыппар хъуыддагӕй у бафӕзмын, ууыл (1 Пет. 2:21).

5, 6. а) Йесо йӕ ахуыргӕнинӕгты ӕмӕ иннӕты зын кӕй ӕмбӕрста, уый куыд ӕвдыста? б) Исайы 61:1, 2 стихтӕм гӕсгӕ, Йесо кӕмӕн хъусын кодта, уыдонӕн цӕмӕн тӕригъӕд кодта?

⁵ Йесо иннӕты зын кӕй ӕмбӕрста, уый куыд ӕвдыста? Ӕркӕсӕм иу хабармӕ. Иухатт Йесо ӕмӕ йӕ ахуыргӕнинӕгтӕ куы хъусын кодтой, уӕд тынг бафӕлладысты, стӕй сӕ «къӕбӕр бахӕрынмӕ дӕр не ’вдӕлд». Гъемӕ сӕ Йесо акодта «хибар ранмӕ, цӕмӕй уым иу гыццыл... [сӕ] фӕллад суагътаиккой». Фӕлӕ бирӕтӕ базыдтой, кӕдӕм цӕуынц, уый ӕмӕ сӕ разӕй уым балӕууыдысты. Йесо сӕ куы федта, уӕд куыд бакодта? Уый сын «фӕтӕригъӕд кодта *, уымӕн ӕмӕ уыдысты ӕнӕфыййау фыстау. Гъемӕ сын райдыдта бирӕ цыдӕртӕ амонын» (Мар. 6:30–34).

⁶ Дӕ хъус-ма ӕрдар, Йесо уыцы адӕмӕн уый тыххӕй кӕй фӕтӕригъӕд кодта, ӕмӕ «уыдысты ӕнӕфыйау фыстау». Ӕвӕццӕгӕн, зыдта, се ’хсӕн кӕй уыд мӕгуыртӕ, стӕй, йӕ бинонты фӕдарыны тыххӕй уӕззау куыст чи кодта, ахӕмтӕ. Се ’хсӕн ма, чи зоны, уыдаид, зиан кӕуыл ӕрцыд, ахӕмтӕ дӕр. Ӕмӕ сын Йесо се ’нкъарӕнтӕ хорз ӕмбӕрстаид, уымӕн ӕмӕ, айразмӕйы статьяйы куыд федтам, афтӕмӕй йӕхӕдӕг дӕр уыцы зындзинӕдтӕй кӕцыдӕртыл ӕмбӕлдаид. Йесо адӕмӕн кӕй тӕригъӕд кодта, уымӕ гӕсгӕ сын хъусын кодта, удӕнцой сын чи ’рхастаид, ахӕм хабар. (Бакӕс Исайы 61:1, 2.)

7. Нӕ бон куыд у Йесойы фӕзмын?

 ⁷ Йесойы цӕвиттонӕй цӕуыл ахуыр кӕнӕм? Йесойы рӕстӕджы куыд уыд, афтӕ абон дӕр адӕм сты «ӕнӕфыйау фыстау». Уыдон зындзинӕдтӕй сӕ хъуырмӕ сты. Ӕмӕ махмӕ ис, удӕнцой сын чи ’рхӕсдзӕн, ахӕм хабар – Хуыцауы Паддзахады тыххӕй хорз хабар (Рарг. 14:6). Йесойау мах дӕр «ӕххуысхъуаг ӕмӕ мӕгуыр» адӕмӕн тӕригъӕд кӕнӕм, ӕмӕ сын хъусын дӕр уый тыххӕй кӕнӕм (Пс. 72:13). Мах зӕрдиагӕй фӕнды, цӕмӕй сын баххуыс кӕнӕм.

8. Кӕмӕн хъусын кӕнӕм, уыдонӕн се ’нкъарӕнтӕ кӕй ӕмбарӕм, уый нӕ бон куыд у равдисын? Ӕрхӕсс цӕвиттон.

⁸ Кӕмӕн хъусын кӕнӕм, уыдоны ӕнкъарӕнтӕ кӕй ӕмбарӕм, уый ӕвдисынӕн нын цы баххуыс кӕндзӕн? Хъуамӕ-иу нӕхи сӕ бынаты сӕвӕрӕм ӕмӕ, мах куыд фӕнды, цӕмӕй нын уыдон уой, афтӕ-иу сын уӕм нӕхӕдӕг дӕр (Матф. 7:12) *. Ӕркӕсӕм, уый нӕ бон цавӕр цыппар хъуыддагӕй у равдисын, уымӕ. Фыццаг: алы адӕймаджы дӕр цы тыхсын кӕны, ууыл-иу ахъуыды кӕнӕм. Мах цы куыст кӕнӕм, уый абарӕн ис дохтыры куыстимӕ. Хорз дохтыр алы рынчынӕн дӕр йӕ уавӕрыл фӕхъуыды кӕны. Уый сӕм фарстатӕ фӕдӕтты ӕмӕ сӕ цы тыхсын кӕны, уый куы фӕдзурынц, уӕд сӕм лӕмбынӕг фӕхъусы. Хостӕ рафыссыныл нӕ фӕтагъд кӕны, фӕлӕ уал фыццаг адӕймагӕн йӕ низыхъӕд бӕстон сбӕрӕг кӕны, ӕмӕ йын стӕй фӕзӕгъы, куыд ӕй дзӕбӕх кӕндзӕн, уый. Мах дӕр хъуамӕ ахӕм дохтырау архайӕм. Уацамынды-иу се ’ппӕтӕн хъуамӕ уыцы-иу ныхӕстӕ ма дзурӕм. Фӕлӕ-иу хъуамӕ алы адӕймагӕн дӕр йӕ уавӕр бамбарыныл бацархайӕм ӕмӕ, цы хъуыдыйыл хӕст у, уый-иу базонӕм.

9. Раст куыд нӕ уаид хъуыды кӕнын? Хуыздӕр куыд уыдзӕн архайын?

⁹ Раст нӕ уаид афтӕ хъуыды кӕнын, ӕмӕ, уацамынды кӕуыл фембӕлӕм, уыдонӕн сӕ уавӕртӕ, стӕй, цӕуыл ӕууӕндынц ӕмӕ цӕмӕн, уый зонӕм (Ӕмб. 18:13). Хорз уаид, уӕзданӕй-иу сӕм фарстатӕ куы дӕттиккам, цӕмӕй-иу сын сӕхи тыххӕй исты базонӕм ӕмӕ, цы хъуыдыйыл хӕст сты, уый бамбарӕм (Ӕмб. 20:5). Нӕ бон у адӕймаджы йӕ куыстӕй, йӕ бинонтӕй ӕмӕ йӕ царды хабӕрттӕй афӕрсын ӕмӕ базонын, цавӕр зондыл хӕст у, уый, кӕд, кӕм цӕрӕм, уым афтӕ ӕмбӕлы, уӕд. Уый фӕрцы-иу базондзыстӕм, алы адӕймаджы дӕр цы тыхсын кӕны, уый. Ӕмӕ-иу уӕд нӕ бон уыдзӕн адӕмӕн се ’нкъарӕнтӕ бамбарын ӕмӕ сын баххуыс кӕнын. Афтӕмӕй-иу Йесойы фӕзмдзыстӕм. (Абар 1 Коринфӕгтӕм 9:19–23.)

10, 11. 2 Коринфӕгтӕм 4:7, 8 стихты цы фыст ис, уымӕ гӕсгӕ ма нӕ бон куыд у равдисын, кӕмӕн хъусын кӕнӕм, уыдонӕн се ’нкъарӕнтӕ кӕй ӕмбарӕм? Ӕрхӕсс цӕвиттон.

¹⁰ Дыккаг: адӕймаджы цард ӕнӕ Хуыцауӕй цыхуызӕн у, ууыл-иу ахъуыды кӕнӕм.  Нӕ бон у адӕмӕн сӕ уавӕртӕ бамбарын, уымӕн ӕмӕ, ӕнӕххӕст адӕймаг цы зындзинӕдтыл ӕмбӕлы, уыдонӕй мах дӕр хызт не стӕм (1 Кор. 10:13). Цард зын у, ӕмӕ нӕ зындзинӕдтӕн ӕрмӕстдӕр Йегъовӕйы ӕххуысы фӕрцы фӕразӕм. (Бакӕс 2 Коринфӕгтӕм 4:7, 8.) Фӕлӕ-ма ахъуыды кӕн, Йегъовӕйы чи нӕ зоны, уыдонӕн куыд зын у ӕнӕ Хуыцауы ӕххуысӕй цӕрын. Йесойау мах адӕмӕн тӕригъӕд кӕнӕм ӕмӕ нӕ фӕнды, «хуыздӕр цыдӕр кӕй уыдзӕн, уый тыххӕй [сын] хорз хабар радзурын» (Ис. 52:7).

¹¹ Ӕркӕсӕм иу ӕфсымӕры хабармӕ. Йӕ ном хуыйны Сергей. Уый раздӕр тынг ӕфсӕрмыгӕнаг уыди, йӕ хъуыдытӕ йӕ бон сӕрибарӕй дзурын нӕ уыд. Иуафон Сергей Библи ахуыр кӕнын райдыдта. Уый загъта: «Библи ахуыр кӕнгӕйӕ базыдтон, ӕцӕг чырыстӕттӕн сӕ хӕс кӕй у сӕ дины тыххӕй иннӕтӕн дзурын. Афтӕ мӕм каст, ӕмӕ мӕнӕн уый мӕ бон нӕ бауыдзӕн». Фӕлӕ Сергей хъуыды кодта, рӕстдзинад чи нӕ зоны, уыцы адӕмӕн ӕнӕ Йегъовӕйӕ сӕ цард куыд уӕззау у, ууыл. Сергей загъта: «Библийӕ цы базыдтон, уыцы диссаджы хабӕрттӕ мын стыр циндзинад ӕмӕ стыр удӕнцой ӕрхастой. Ӕмбӕрстон ӕй, иннӕтӕ дӕр кӕй хъуамӕ базоной, Библийы цы фыст ис, уый». Сергей адӕмы зындзинӕдтӕ цас хуыздӕр ӕмбӕрста, уыйас ныфсджындӕрӕй хъусын кодта. Уый загъта: «Иу диссаджы хъуыддаг бафиппайдтон: Библийы тыххӕй адӕмимӕ кӕй ныхас кодтон, уый фӕрцы мӕхицӕн аргъ кӕнын райдыдтон, ӕмӕ мӕ уырнындзинад дӕр бафидар» *.

12, 13. Рӕстдзинад кӕмӕн амонӕм, уыдонимӕ фӕразон цӕмӕн хъуамӕ уӕм? Ӕрхӕсс цӕвиттон.

¹² Ӕртыккаг: рӕстдзинад кӕмӕн амонӕм, уыдонимӕ фӕразон уӕм. Рох нӕ ма уӕд: мах Библийӕ хорз цы зонӕм, уыдӕттыл уыдон, чи зоны, никуы хъуыды кодтой. Стӕй бирӕтӕ сӕ диныл тынг ӕнувыд вӕййынц. Сӕ хъуыдымӕ гӕсгӕ, сӕ дин се ’гъдӕуттимӕ ӕнгом баст у, сӕ адӕмы кӕрӕдзийыл бӕтты ӕмӕ сын сӕ бинонты ӕнгомдӕр кӕны. Нӕ бон сын куыд у баххуыс кӕнын?

¹³ Зӕгъӕм, зӕронд ӕмӕ кӕлӕддзаг хиды бӕсты ног хид саразын куы бахъӕуы, уӕд  зӕронд хид уайтагъд нӕ фехалынц, фӕлӕ йӕ рӕстӕгмӕ ныууадзынц, цӕмӕй уал адӕм ууыл цӕуой. Ӕмӕ ног хид арӕзт куы ’рцӕуы, уӕд зӕронд хид фехалынц. Мах дӕр хъуамӕ афтӕ архайӕм. Кӕд нӕ фӕнды зӕронд хид фехалын, ома цӕмӕй адӕймаг, ӕнувыд кӕуыл у, уыцы ахуырӕдтыл йӕ къух сиса, уӕд уал ын хъуамӕ баххуыс кӕнӕм ног хид саразынӕн, ома цӕмӕй Библийы рӕстдзинад базона ӕмӕ йӕ бауарза. Ӕмӕ уӕд цӕттӕ уыдзӕн, цӕуыл ӕууӕнды, ууыл йӕ къух сисынмӕ. Цӕмӕй адӕймагӕн ахӕм ивындзинӕдтӕ скӕнынӕн баххуыс кӕнӕм, уый тыххӕй хъӕуы рӕстӕг (Ром. 12:2).

14, 15. Нӕ бон куыд у иннӕтӕн баххуыс кӕнын, адӕм зӕххыл дзӕнӕты ӕнустӕм кӕй цӕрдзысты, уыцы ахуырад бамбарынӕн? Ӕрхӕсс цӕвиттон.

¹⁴ Кӕмӕн хъусын кӕнӕм, уыдонимӕ фӕразон куы уӕм, уӕд уымӕ не ’нхъӕлмӕ кӕсдзыстӕм, ӕмӕ, Библийы рӕстдзинад куыддӕр фехъусой, афтӕ йӕ бамбардзысты ӕмӕ йӕ сӕ зӕрдӕмӕ айсдзысты. Хъуамӕ-иу нӕхи уыдоны бынаты сӕвӕрӕм ӕмӕ сын Библийы фӕрцы фӕразонӕй ӕххуыс кӕнӕм раст хъуыдымӕ ӕрцӕуынӕн. Зӕгъӕм, нӕ бон куыд у адӕймагӕн баххуыс кӕнын, адӕм зӕххыл дзӕнӕты ӕнустӕм кӕй цӕрдзысты, уыцы ахуырад бамбарынӕн? Бирӕтӕ ацы ахуырады тыххӕй бирӕ ницы зонынц кӕнӕ та ӕппындӕр нӕ зонынц. Чидӕртӕ ахӕм хъуыдыйыл хӕст сты, зӕгъгӕ, мӕлӕт адӕймаджы цардӕн кӕрон скӕны ӕмӕ йын ницыуал ныфс вӕййы. Чидӕртӕ та афтӕ хъуыды кӕнынц, ӕмӕ мӕлӕты фӕстӕ хорз адӕм уӕлӕрвтӕм ацӕуынц. Нӕ бон куыд у ахӕм адӕймӕгтӕн баххуыс кӕнын?

¹⁵ Ӕркӕсӕм, иу ӕфсымӕр цы хорз мадзалӕй фӕпайда кӕны, уымӕ. Кӕимӕ фӕныхас кӕны, уыдонӕн уал фыццаг бакӕсы Райдианы 1:28 стих ӕмӕ сӕ стӕй бафӕрсы: «Хуыцауы фӕндонмӕ гӕсгӕ адӕм кӕм ӕмӕ цавӕр уавӕрты хъуамӕ цардаиккой?» Адӕм арӕхдӕр фӕзӕгъынц: «Зӕххыл, хорз уавӕрты». Уый фӕстӕ сын бакӕсы Исайы 55:11 стих ӕмӕ сӕ бафӕрсы: «Хуыцау йӕ фӕнд фӕивта?» Арӕхдӕр адӕм фӕзӕгъынц, нӕ, зӕгъгӕ. Фӕстагмӕ сын ӕфсымӕр бакӕсы 37-ӕм псаломӕй 10-ӕм ӕмӕ 11-ӕм стихтӕ. Ацы стихты фӕрцы ӕфсымӕр кӕмӕндӕрты баххуыс кодта, цӕмӕй бамбӕрстаиккой, Хуыцауы фӕнд ныр дӕр кӕй у, адӕм зӕххыл дзӕнӕты ӕнустӕм цӕрой, уый.

16, 17. Ӕмбисӕндты 3:27 стихы цавӕр уагӕвӕрд ис ӕмӕ, иннӕты ӕнкъарӕнтӕ кӕй ӕмбарӕм, уый цавӕр хъуыддӕгтӕй у нӕ бон равдисын? Ӕрхӕсс цӕвиттон.

¹⁶ Цыппӕрӕм: адӕмыл кӕй тыхсӕм, уый-иу хъуыддагӕй равдисӕм. Зӕгъӕм, адӕймаджы ныхас кӕнынмӕ куы не ’вдӕла, уӕд дзы нӕ бон у хатыр ракурын ӕмӕ йын зӕгъын, ӕндӕр хатт ӕм кӕй ӕрбацӕудзыстӕм. Кӕнӕ та, чи зоны, сӕмбӕлӕм, истӕмӕй фӕкӕсын кӕмӕ хъӕуа, ахӕм адӕймагыл. Йе та нӕм, чи зоны, ракӕса, йӕ бон хӕдзарӕй рацӕуын кӕмӕн нӕу, ахӕм рынчын кӕнӕ ацӕргӕ адӕймаг ӕмӕ йӕ цавӕрдӕр ӕххуыс хъӕуа, зӕгъӕм, йӕ бӕсты дуканимӕ ацӕуын. Кӕд нӕ нӕ уавӕртӕ амоной, уӕд хорз уаид, куы-иу сын баххуыс кӕниккам. (Бакӕс Ӕмбисӕндтӕ 3:27.)

 ¹⁷ Ӕркӕсӕм, иу хо куыд равдыста, иннӕты зын кӕй ӕмбары, уый. Сӕ сывӕллон кӕмӕн амард, иу ахӕм бинонтӕн тынг фӕтӕригъӕд кодта ӕмӕ сӕм писмо ныффыста. Йӕ писмойы ныффыста Библийӕ цалдӕр ныфсдӕттӕг стихы дӕр. Цымӕ уыцы бинонтыл уый куыд фӕзынд? «Знон тынг ныфссаст уыдтӕн,– ныффыста сылгоймаг.– Ды йӕ зонгӕ дӕр нӕ кӕныс, дӕ писмо нӕ куы тынг бафидар кодта. Куыд бузныг дӕ стӕм, уымӕн зӕгъӕн дӕр нӕй. Дӕ писмо дын, ӕвӕццӕгӕн, иу-20 хатты бакастӕн. Ахӕм зӕрдӕмӕхъаргӕ, рӕвдауӕн ныхӕстӕ мын исчи ныффысдзӕн, уый ӕнхъӕл дӕр нӕ уыдтӕн. Стыр бузныг дын». Маст чи кӕны, уыдоны бынаты-иу нӕхи куы сӕвӕрӕм ӕмӕ-иу сын истӕмӕй куы баххуыс кӕнӕм, уӕд-иу, чи зоны, афтӕмӕй сӕ ныфсыл ныфс бафта.

18. 1 Коринфӕгтӕм 3:6, 7 стихтӕм гӕсгӕ, нӕ зӕрдыл цы хъуамӕ дарӕм ӕмӕ цӕмӕн?

¹⁸ Нӕ зӕрдыл хъуамӕ дарӕм уый, ӕмӕ адӕймаг хорз хабармӕ байхъусдзӕн ӕви нӕ, ууыл нӕ бар нӕ цӕуы. Кӕй зӕгъын ӕй хъӕуы, махӕн нӕ бон у адӕмӕн баххуыс кӕнын, цӕмӕй Хуыцауы базоной, фӕлӕ, рӕстдзинад сӕ зӕрдӕмӕ айсдзысты ӕви нӕ, уый махӕй кӕнгӕ нӕу. (Бакӕс 1 Коринфӕгтӕм 3:6, 7.) Адӕмы Йегъовӕмӕ мах не ’рбакӕнӕм, уый сӕ йӕхӕдӕг ӕрбакӕны йӕхимӕ (Иоан. 6:44). Адӕймаг хорз хабармӕ байхъусдзӕн ӕви нӕ, уый кӕнгӕ у, цавӕр зӕрдӕйы хицау у, уымӕй (Матф. 13:4–8). Рох нӕ ма уӕд: адӕмӕн сӕ фылдӕр, Чырысти сын цы хабар хъусын кодта, ууыл нӕ баууӕндыдысты, кӕд ӕмӕ уый ӕппӕты хуыздӕр Ахуыргӕнӕг уыд, уӕддӕр. Уӕдӕ-иу адӕмӕн сӕ фылдӕр хорз хабармӕ куы нӕ хъусой, уӕд дӕр-иу хъуамӕ нӕ ныфс асӕттын ма бауадзӕм.

19. Адӕмӕн се ’нкъарӕнтӕ кӕй ӕмбарӕм, уый куы ’вдисӕм, уӕд уый хорзӕй цы ’рхӕсдзӕн?

¹⁹ Уӕдӕ, кӕмӕн хъусын кӕнӕм, уыдонӕн се ’нкъарӕнтӕ куы ’мбарӕм, уӕд уый хорзӕй цы ’рхӕсдзӕн? Афтӕмӕй нын хъусын кӕныны хъуыддаг фылдӕр циндзинад хӕсдзӕн. Нӕхиуыл-иу банкъардзыстӕм, райсынӕй раттын амондджындӕр хъуыддаг кӕй у. Стӕй, «ӕнусон царды фӕндагыл цӕуын кӕй фӕнды», уыдонӕн ӕнцондӕр уыдзӕн рӕстдзинад сӕ зӕрдӕмӕ айсын (Хъуыд. 13:48). Уӕдӕ нын «цалынмӕ рӕстӕг ис, уӕдмӕ алкӕмӕн дӕр хорздзинад аразӕм» (Гал. 6:10). Афтӕмӕй нӕ уӕларвон Фыды кадджын кӕндзыстӕм ӕмӕ нын уый хӕсдзӕн стыр циндзинад (Матф. 5:16).