1. Йесой менеугутӕй нин уодӕнцойни хуасӕ кӕци ӕй? Ба ’й лӕдӕрун кӕнӕ.

ЙЕСО ӕй хуарз лӕдӕруй ӕнӕнхӕст адӕймаг цӕхуӕн зиндзийнӕдтӕбӕл ӕмбӕлуй, уой, ӕма нин е нӕ нифс куд нӕ федар кӕнуй. Йесо зӕнхӕбӕл ку адтӕй, уӕд адӕнӕн сӕ цийнӕбӕл цийнӕ кодта, сӕ мастбӕл ба – маст (Ром. 12:15). Еухатт ӕ 70 ахуркӕнуйнаги игъосун кӕнуни фӕсте цийнӕгӕнгӕй ку ӕрӕздахтӕнцӕ, уӕд Йесойӕн дӕр «ӕ зӕрдӕ цийнӕй байдзаг ӕй» (Лук. 10:17–21). Иннердиги ба Лазӕри мӕлӕт ӕ хеуӕнттӕн ци маст ӕрхаста, уой ку фӕууидта, «уӕд ӕхецӕн дӕр ӕ зӕрдӕ исунгӕг ӕй» (Иоан. 11:33).

2. Йесо адӕнӕн цӕмӕн тӕрегъӕд кодта?

² Йесо ӕнхӕст адӕймаг адтӕй, фал уӕддӕр адӕнмӕ хӕларзӕрдӕ адтӕй ӕма син тӕрегъӕд кодта. Цума ин е цӕй фӕрци ӕнтӕстӕй? Фиццагидӕр, адӕни ке уарзта, уой фӕрци. Айразиккон статьяй куд базудтан, уомӕ гӕсгӕ «е ’стур цийнӕ адтӕнцӕ зӕнхон адӕн» (Ӕмб. 8:31). Еци уарзондзийнадӕ ’й разӕнгард кодта, адӕн куд сагъӕс кӕнунцӕ, уой хуӕздӕр балӕдӕрунмӕ. Апостол Иоанн куд загъта, уомӕ гӕсгӕ Йесо «зудта, адӕймаги зӕрди ци ес, уой» (Иоан. 2:25). Тӕрегъӕд син кодта, ӕма етӕ дӕр уой уидтонцӕ, ӕма ци хабар игъосун кодта, уомӕ лӕмбунӕг игъустонцӕ. Мадта мах дӕр Киристей ку фӕнзӕн ӕма адӕнмӕ хӕларзӕрдӕ ӕма лӕмбунӕг ку уӕн, уӕд нин игъосун кӕнуни гъуддаги дӕр фулдӕр ӕнтӕсдзӕй (2 Тим. 4:5).

3, 4. а) Адӕнӕн ку тӕрегъӕд кӕнӕн, уӕд игъосун кӕнуни гъуддагмӕ ци цӕстӕй кӕсдзиан? б) Аци статьяй цӕмӕ ӕркӕсдзиан?

³ Апостол Павел хуарз хабар игъосун кӕнун ӕ ихӕсбӕл нимадта. Махбӕл дӕр еци ихӕс ес (1 Кор. 9:16). Еци гъуддаг ӕнхӕст кӕнунмӕ нӕ, адӕнӕн ке тӕрегъӕд кӕнӕн, е ку разӕнгард  кӕна, уӕд ӕй уотид ихӕсбӕл нӕ нимайдзиан. Фал игъосун кӕндзиан, адӕни сагъӕс ке кӕнӕн ӕма нӕ банхус кӕнун ке фӕндуй, уой туххӕй. Мах ӕй зонӕн, «райсунӕй раттун амондгундӕр гъуддаг [ке] ӕй» (Гъуд. 20:35). Ӕма уой нӕ зӕрдӕбӕл ку дарӕн, уӕд нин нӕ лӕггадӕ фулдӕр цийнӕдзийнадӕ хӕсдзӕй.

⁴ Аци статьяйӕй базондзиан, нӕ бон куд ӕй, кӕмӕн игъосун кӕнӕн, уони ке лӕдӕрӕн, уой ӕвдесун. Фиццаг бал ӕркӕсдзиан, Йесой цӕветтонӕй цӕбӕл ахур кӕнӕн, уомӕ. Удта радзубанди кӕндзиан, Киристей фӕнзунмӕ нин цӕхуӕн цуппар унаффи банхус кӕндзӕнцӕ, уобӕл (1 Пет. 2:21).

5, 6. а) Йесо ӕ ахуркӕнуйнӕгти ӕма иннети ке лӕдӕрдтӕй, уой куд ӕвдиста? б) Йесо кӕмӕн игъосун кодта, уонӕн цӕмӕн тӕрегъӕд кодта, уой туххӕй Исаййи 61:1, 2 ци финст адтӕй?

⁵ Йесо иннети зин ке лӕдӕрдтӕй, уой куд ӕвдиста? Ӕркӕсӕн еу хабармӕ. Еухатт Йесо ӕма ӕ ахуркӕнуйнӕгтӕ ӕгас бон игъосун кодтонцӕ ӕма бафӕлладӕнцӕ. Ести «ракомидзаг кӕнунмӕ дӕр сӕ нӕ райевдалдӕй». Уомӕ гӕсгӕ син Йесо загъта, «цӕуӕнти хебарӕ рауӕнмӕ» ӕма еу минкъий рауолӕфӕн, зӕгъгӕ. Фал уордӕмӕ ку ’рбахъӕрдтӕнцӕ, уӕд сӕмӕ уоми дӕр берӕ адӕн ӕнгъӕлмӕ кастӕй. Цума сӕмӕ Йесо цӕхуӕн цӕстӕй ракастӕй? Е син «ӕртӕрегъӕд кодта *, уомӕн ӕма адтӕнцӕ ӕнӕфиййау фусти хузӕн. Гъема син райдӕдта берӕ цидӕртӕ амонун» (Мар. 6:30–34).

⁶ Цума Киристе еци адӕнӕн цӕмӕн ӕртӕрегъӕд кодта? Уомӕн ӕма «адтӕнцӕ ӕнӕфиййау фусти хузӕн». Йесо ӕй зудтайдӕ, сӕ астӕу мӕгуртӕ ке адтӕй, удта бийнонтӕ фӕддаруни туххӕй уӕззау куст ка кодта, уӕхӕнттӕ дӕр. Сӕ астӕу ма, ка ’й зонуй, адтайдӕ, зиан кӕбӕл ӕрцудӕй, уӕхӕн адӕн дӕр. Ӕма син Йесо сӕ уавӕр хуарз лӕдӕрдтӕй. Айразиккон статьяй куд базудтан, уомӕ  гӕсгӕ ӕхуӕдӕг дӕр уӕхӕн зиндзийнӕдтӕ бавзурста. Йесо адӕнӕн ке тӕрегъӕд кодта, уой туххӕй син игъосун кодта, уодӕнцойнӕ син ка ӕрхастайдӕ, уӕхӕн хабар. (Бакӕсӕ Исаййи 61:1, 2.)

7. Нӕ бон куд ӕй Киристей фӕнзун?

⁷ Йесой цӕветтонӕй цӕбӕл ахур кӕнӕн? Йесой рӕстӕги куд адтӕй, уотӕ абони дӕр адӕн ӕнцӕ «ӕнӕфиййау фусти хузӕн» ӕма зиндзийнӕдтӕй сӕ хъурмӕ ’нцӕ. Махмӕ ба ес, уодӕнцойнӕ син ка ӕрхӕсдзӕй, уӕхӕн хабар – Хуцауи Паддзахади туххӕй хуарз хабар (Рарг. 14:6). Киристей хузӕн мах дӕр «ӕнхусгъӕуагӕ ӕма мӕгур» адӕнӕн тӕрегъӕд кӕнӕн ӕма син игъосун дӕр уой туххӕй кӕнӕн (Пс. 72:13). Мах еци адӕнӕн зӕрдиагӕй фӕндуй банхус кӕнун.

8. Кӕмӕн игъосун кӕнӕн, уони ке лӕдӕрӕн, уой нӕ бон куд ӕй ӕвдесун? Ӕрхӕссӕ цӕветтон.

⁸ Ци нин банхус кӕндзӕй, кӕмӕн игъосун кӕнӕн, еци адӕни лӕдӕрун? Гъӕуама нӕхе уони бунати исӕвӕрӕн ӕма мах куд фӕндуй, цӕмӕй нин етӕ уонцӕ, уотӕ син уӕн нӕхуӕдтӕ дӕр (Матф. 7:12) *. Ӕркӕсӕн, еци гъуддаги нин цӕхуӕн цуппар унаффи банхус кӕндзӕнцӕ, уомӕ. Фиццаг: алли адӕймаги дӕр ци тухсун кӕнуй, уобӕл сагъӕс кӕнӕн. Мах ци куст кӕнӕн, уой рабарӕн ес дохтири кусти хӕццӕ. Хуарз дохтир ӕ гъос фӕддаруй, ӕ алли сӕйги дӕр ци тухсун кӕнуй, уомӕ. Фарстатӕ сӕмӕ раттуй ӕма ци фӕдздзорунцӕ, уомӕ лӕмбунӕг байгъосуй. Хуастӕ рафинсунмӕ тагъд нӕ фӕккӕнуй, фал бал фиццаг адӕймагӕн ӕ нез исбӕрӕг кӕнуй, уой фӕсте ба ин ци кӕнгӕ ’й, уой фӕззӕгъуй. Мах дӕр гъӕуама уӕхӕн дохтири хузӕн уӕн. Игъосун кӕнгӕй алкӕмӕндӕр еци еу дзурдтӕ ма дзорӕн, фал алли адӕймаги зӕрдӕмӕ дӕр хецӕн над агорӕн ӕма, ци гъудибӕл хуӕст ӕй, уой базонӕн.

9. Раст куд н’ адтайдӕ сагъӕс кӕнун? Ба ’й лӕдӕрун кӕнӕ.

⁹ Раст н’ адтайдӕ уотӕ сагъӕс кӕнун, ӕма игъосун кӕнгӕй кӕбӕл рамбӕлӕн, уонӕн сӕ уавӕртӕ, удта цӕбӕл ӕууӕндунцӕ ӕма цӕмӕн, уой зонӕн (Ӕмб. 18:13). Хуӕздӕр уайдӕ адӕймагмӕ уӕзданӕй фарстатӕ дӕттун (Ӕмб. 20:5). Ку федауа, уӕд нӕ бон ӕй адӕймаги ӕ кусти, ӕ бийнонти ӕма ӕ царди хабӕртти туххӕй рафӕрсун кенӕ цӕхуӕндӕр гъуддагмӕ цӕхуӕн цӕстӕй кӕсуй, уобӕл. Уой фӕрци ’й базондзиан, ци ’й тухсун кӕнуй, уой ӕма ин ӕ зӕрдӕмӕ над иссердзиан. Уотемӕй Йесой фӕнздзиан. (Рабарӕ 1 Коринфӕгтӕмӕ 9:19–23.)

10, 11. 2 Коринфӕгтӕмӕ 4:7, 8 куд финст ӕй, уомӕ гӕсгӕ кӕмӕн игъосун кӕнӕн, еци адӕни лӕдӕрунмӕ ма нин цӕхуӕн унаффӕ банхус кӕндзӕй? Ӕрхӕссӕ цӕветтон.

¹⁰ Дуккаг: адӕймаги цард ӕнӕ Хуцауӕй цӕхуӕн ӕй, уобӕл сагъӕс кӕнӕ. Нӕ бон  ӕй адӕнӕн сӕ уавӕртӕ балӕдӕрун, уомӕн ӕма ӕнӕнхӕст адӕймаг ци зиндзийнӕдтӕбӕл ӕмбӕлуй, уонӕй мах дӕр хизт нӕ ан (1 Кор. 10:13). Цард зин ӕй, ӕма нӕ зиндзийнӕдтӕн ӕрмӕстдӕр Йегови фӕрци бухсӕн. (Бакӕсӕ 2 Коринфӕгтӕмӕ 4:7, 8.) Фал расагъӕс кӕнӕ, Йегови ка нӕ зонуй, уонӕн куд зин ӕй ӕнӕ Хуцауи ӕнхусӕй цӕрун. Йесой хузӕн мах дӕр адӕнӕн тӕрегъӕд кӕнӕн ӕма нӕ фӕндуй, «хуӕздӕр цидӕр ке уодзӕй, уой туххӕй [син] хуарз хабар радзорун» (Ис. 52:7).

¹¹ Ӕркӕсӕн еу ӕнсувӕр Сергеййи хабармӕ. Сергей раздӕр хъӕбӕр ӕфсӕрмигӕнагӕ адтӕй, ӕ гъудитӕ ӕ бон сӕребарӕй дзорун н’ адтӕй. Еу афони Сергей Библи ахур кӕнун райдӕдта. Е загъта: «Библи ахур кӕнгӕй базудтон, ӕцӕг киристӕнттӕн сӕ ихӕс ке ӕй сӕ дини туххӕй иннетӕн дзорун. Уотӕ мӕмӕ кастӕй, ӕма мӕн бон не ’суодзӕй». Фал Сергей сагъӕс кодта, рӕстдзийнадӕ ка нӕ зонуй, еци адӕнӕн ӕнӕ Йеговӕй сӕ цард куд уӕззау ӕй, уобӕл, ӕма загъта: «Библийӕй ке базудтон, еци дессаги хабӕрттӕ мин устур цийнӕ ӕма уодӕнцойнӕ ӕрхастонцӕ. Лӕдӕрдтӕн ӕй, Библий ци финст ес, уой иннетӕ дӕр ке гъӕуама базононцӕ». Сергей адӕни зиндзийнӕдтӕ куд хуӕздӕр лӕдӕрдтӕй, уотӕ нифсгундӕрӕй игъосун кодта. Е загъта: «Еу дессаги гъуддаг балӕдӕрдтӕн: адӕни хӕццӕ Библий туххӕй ке дзурдтон, уой фӕрци мӕхуӕдӕг дӕр фӕннифсгундӕр дӕн ӕма ме ’ууӕндундзийнадӕ дӕр бафедар ӕй» *.

12, 13. Рӕстдзийнадӕ кӕмӕн амонӕн, еци адӕнмӕ фӕразон цӕмӕн гъӕуама уӕн? Ӕрхӕссӕ цӕветтон.

¹² Ӕртиккаг: рӕстдзийнадӕ кӕмӕн амонис, еци адӕнмӕ фӕразон уо. Еци адӕн, мах ци зонӕн, уобӕл, ӕвӕдзи, сагъӕс дӕр некӕд кодтонцӕ. Беретӕ ба си сӕхе динбӕл федар хуӕст фӕуунцӕ. Ка ’й зонуй, сӕ гъудимӕ гӕсгӕ, сӕ дин ӕма се ’гъдӕутти фӕрци адӕн кӕрӕдзебӕл бастдӕр ӕнцӕ, сӕ бийнонтӕ ба – ӕнгомдӕр. Цума син нӕ бон куд ӕй банхус кӕнун?

 ¹³ Ӕрхӕссӕн цӕветтон. Нӕуӕг хед ку фӕккӕнунцӕ, уӕд зӕронд хед нӕма нийхалунцӕ. Рӕстӕгмӕ бал ӕй ниууадзунцӕ, цӕмӕй ибӕл адӕн цӕуонцӕ. Гъе уотӕ адӕймаг дӕр, цӕмӕй, зӕрдӕй кӕбӕл ӕууӕндуй, еци «зӕронд» ахурӕдтӕ ниууадза, уой туххӕй бал гъӕуама аргъ кӕнун райдайа «нӕуӕг» ахурӕдтӕн, раздӕр ке нӕ зудта, еци ахурӕдтӕн Библийӕй. Ӕрмӕстдӕр гъе уӕд уодзӕй цӕттӕ ӕ гъуди раййевунмӕ. Ӕма ’й уой туххӕй ба гъӕуй рӕстӕг (Ром. 12:2).

14, 15. Нӕ бон куд ӕй адӕймагӕн балӕдӕрун кӕнун, адӕн зӕнхӕбӕл дзенети ӕносмӕ ке цӕрдзӕнцӕ, уой? Ӕрхӕссӕ цӕветтон.

¹⁴ Кӕмӕн игъосун кӕнӕн, еци адӕнмӕ фӕразон ку уӕн, уӕд нӕмӕ уотӕ нӕ кӕсдзӕй, ӕма Библий рӕстдзийнадӕ гъӕуама уайтагъд балӕдӕронцӕ ӕма ибӕл исарази уонцӕ. Фал нӕхе уони бунати ӕвӕрдзиан ӕма син ӕнхус кӕндзиан, цӕмӕй Библий фӕрци сӕхуӕдтӕ хатдзӕгтӕ кӕнонцӕ. Зӕгъӕн, нӕ бон куд ӕй адӕймагӕн балӕдӕрун кӕнун, адӕн зӕнхӕбӕл дзенети ӕносмӕ ке цӕрдзӕнцӕ, уой? Беретӕ аци ахуради туххӕй, зӕгъӕн ес, ӕма ӕппундӕр неци зонунцӕ. Уотӕ сӕмӕ кӕсуй, ӕма мӕлӕт алцӕмӕндӕр кӕрон искӕнуй кенӕ ба адӕймаг ку рамӕлуй, уӕд уӕлӕрвтӕмӕ иссӕуй. Цума нӕ бон куд ӕй уӕхӕн адӕнӕн банхус кӕнун?

¹⁵ Еу ӕнсувӕр еске хӕццӕ ку фӕдздзоруй, уӕд бал ин фиццаг бакӕсуй Райдайӕн 1:28. Уой фӕсте ба ’й бафӕрсуй: «Хуцауи фӕндонмӕ гӕсгӕ адӕн кӕми ӕма цӕхуӕн уавӕрти гъӕуама цардайуонцӕ?» Фулдӕр адӕн ин уӕхӕн дзуапп раттунцӕ: «Зӕнхӕбӕл, дзӕбӕх уавӕрти». Уой фӕсте ба ӕнсувӕр бакӕсуй Исаййи 55:11 ӕма адӕймаги бафӕрсуй, Хуцау ӕ фӕндон раййивта ӕви нӕ, уобӕл. Арӕхдӕр адӕн фӕззӕгъунцӕ, нӕ раййивта, зӕгъгӕ. Фӕстагмӕ ӕнсувӕр бакӕсуй Псалом 37:10, 11 ӕма бафӕрсуй, адӕни цӕхуӕн цард хезуй, уобӕл. Гъе уотемӕй Библий фӕрци еци ӕнсувӕр беретӕн банхус кодта балӕдӕрун, Хуцауи уотӕ ке фӕндуй, цӕмӕй адӕн зӕнхӕбӕл дзенети ӕносмӕ цӕронцӕ.

16, 17. Ӕмбесӕндтӕ 3:27 цӕхуӕн уагӕвӕрд ес ӕма иннети ке лӕдӕрӕн, уой цӕхуӕн гъуддӕгтӕй нӕ бон ӕй ӕвдесун? Ӕрхӕссӕ цӕветтон.

¹⁶ Цуппӕрӕймаг: нӕ бон цӕмӕй ӕй, уомӕй син банхус кӕнӕн. Зӕгъӕн, ка дӕмӕ ракӕса, еци адӕймаги дзорунмӕ ку нӕ евдӕла, уӕд си дӕ бон ӕй хатир ракорун ӕма ин зӕгъун, ӕндӕр хатт имӕ ке ӕрбацӕудзӕнӕ. Кенӕ ба, зӕгъӕн, естӕмӕй фӕккӕсун кӕмӕ гъӕуа, уӕхӕн адӕймагбӕл ку исӕмбӕлӕн, уӕд ин нӕ бон ӕй банхус кӕнун. Хӕдзарӕй рацӕун ка нӕ фӕразуй, уӕхӕн сӕйгӕ кенӕ каргун адӕймаг ку уа, уӕдта? Нӕ бон ӕй ӕ бӕсти туканмӕ бауайун кенӕ ба имӕ ӕндӕр естӕмӕй фӕккӕсун. Еу загъдӕй, гъӕуама цӕттӕ уӕн иннетӕн банхус кӕнунмӕ. (Бакӕсӕ Ӕмбесӕндтӕ 3:27.)

¹⁷ Ӕркӕсӕн, еу хуӕрӕ иннети зин ке лӕдӕруй, уой куд бавдиста, уомӕ. Сӕ сувӕллон  кӕмӕн рамардӕй, еу уӕхӕн бийнонтӕн хъӕбӕр ӕртӕрегъӕд кодта, ӕма сӕмӕ финстӕг ниффинста. Ӕ финстӕги ниффинста цалдӕр нифсфедаргӕнӕн стихи дӕр. Цума еци бийнонтӕ уомӕ ци цӕстӕй ракастӕнцӕ? Силгоймаг нӕ хуӕрӕмӕ уӕхӕн дзурдтӕ ниффинста: «Ӕзинӕ хъӕбӕр нифссаст адтӕн. Ду ’й зонгӕ дӕр нӕ кӕнис, дӕ финстӕг дин ку бакастан, уӕд нин куд фӕнцондӕр ӕй, уой. Куд боз ди дӕн, уой мӕ бон зӕгъун дӕр нӕй. Еци финстӕг 20 хаттемӕй фулдӕр бакастӕн. Уӕхӕн зӕрдӕбӕлӕмбӕлгӕ дзурдтӕ мин некӕдма неке загъта. Устур арфӕ дин». Маст ка кӕнуй, уони бунати нӕхе ку ниввӕрӕн ӕма син естӕмӕй ку банхус кӕнӕн, уӕд, ка ’й зонуй, уотемӕй сӕ нифс бафедар уодзӕй.

18. 1 Коринфӕгтӕмӕ 3:6, 7 куд финст ӕй, уомӕ гӕсгӕ нӕ зӕрдӕбӕл ци гъӕуама дарӕн ӕма цӕмӕн?

¹⁸ Адӕймаг хуарз хабармӕ байгъосдзӕй ӕви нӕ, е махӕй кӕнгӕ ке нӕй, уой гъӕуама ма иронх кӕнӕн. Ке зӕгъун ӕй гъӕуй, махӕн нӕ бон ӕй адӕнӕн банхус кӕнун, цӕмӕй Хуцауи базононцӕ. Фал рӕстдзийнадӕ сӕ зӕрдӕмӕ райсдзӕнцӕ ӕви нӕ, е ба махӕй кӕнгӕ нӕбал ӕй. (Бакӕсӕ 1 Коринфӕгтӕмӕ 3:6, 7.) Адӕни Йеговӕмӕ мах не ’рбакӕнӕн, е сӕ ӕхуӕдӕг ӕрбакӕнуй ӕхемӕ (Иоан. 6:44). Адӕймаг хуарз хабармӕ байгъосдзӕй ӕви нӕ, е кӕнгӕ ’й, цӕхуӕн зӕрдӕ ин ес, уомӕй (Матф. 13:4–8). Иронх ди ма уӕд: адӕнӕн сӕ фулдӕр, Киристе син ци хабар игъосун кодта, уобӕл нӕ баууӕндтӕнцӕ, кӕд тӕккӕ хуӕздӕр Ахургӕнӕг адтӕй, уӕддӕр. Мадта адӕнӕн сӕ фулдӕр хуарз хабармӕ ку нӕ игъосонцӕ, уӕддӕр гъӕуама нӕ нифс басӕттун ма бауадзӕн.

19. Кӕмӕн игъосун кӕнӕн, еци адӕни ку лӕдӕрӕн, уӕд нин е ци пайда ӕрхӕсдзӕй?

¹⁹ Кӕмӕн игъосун кӕнӕн, еци адӕни ку лӕдӕрӕн, уӕд е нӕхецӕн дӕр пайда уодзӕй. Уой фӕрци нин нӕ лӕггадӕ фулдӕр цийнӕдзийнадӕ хӕсдзӕй. Райсунӕй раттун амондгундӕр гъуддаг ке ӕй, уой нӕхебӕл ӕвзардзиан. Удта «ӕносон царди надбӕл цӕун ке фӕндуй», уонӕн дӕр ӕнцондӕр уодзӕй хуарз хабармӕ игъосун (Гъуд. 13:48). Мадта «цалинмӕ рӕстӕг ес, уӕдмӕ алкӕмӕндӕр хуарздзийнадӕ кӕнӕн» (Гал. 6:10). Ӕма гъе уӕд нӕ уӕларвон Фиди кадгин кӕнгӕй ӕцӕг цийнӕдзийнадӕ бавзардзиан (Матф. 5:16).