1. Khadilo ditshi dia Yesu diana gutusuanguluisa muavula? Kotelesa.

KHADILO dia Yesu diana gutusuanguluisa muavula didi egi wana gukotelesa muabonga malamba etu handaga tushigo athu atagana. Hakhalele Yesu ha mavu, wakhalele ‘musuanguluga nu athu akhalele musuanguluga’, wakhalele nji ‘mudila nu athu akhalele mudila.’ (Lomo 12:15) Ha gufezegesa, tangua alandudi enji 70 avutugile nu gusuanguluga mu mudimo wa gulongesa, Yesu “wasendesele gusuanguluga mu nyuma yabonga.” (Luka 10:17-21) Luko, tangua Yesu wamonele luholo Mata nu Mariya nu athu ako akhalele mudila mukunda nu gufua gua Lazalo, ‘wavuile gikenene giavula.’—Yone 11:33.

2. Itshi yakuatesele Yesu ha gudihaga ha fundo dia athu ako?

² Yesu wakhalele muthu watagana. Uvi wakhalele muvuila athu akhalelego atagana khenda nu gudisha ha fundo diawo. Itshi yakhalele gumutuma ha gutshita ngenyi? Ndaga ya thomo idi egi: Yesu wakhalele muzumba athu. Gifua luholo tuayimonyi mu longo diabalega, Yesu wakhalele “muzumba athu muavula.” (Ish. 8:31, NWT) Guzumba guene mukunda nu athu guakhalele gumutuma ha gukotelesa muabonga matangi awo. Mupostolo Yone wazuelele egi: Yesu ‘wakhalele mujiya ndaga jidi mu mutshima wa muthu.’ (Yone 2:25) Yesu wakhalele muvuila athu khenda jiavula. Tangua athu akotelesele egi Yesu wakhalele guazumba, asendesele gutshigina lukuma luabonga lua Ufumu. Esue nji gula tudi muzumba athu gifua Yesu, mbatukhala hehi ha guakuatesa tangua tudi mu mudimo wa gulongesa.—2 Tim. 4:5.

3-4. (a) Gila tudi gudihaga ha fundo dia athu ako, luholo lutshi tuajiya gutadila mudimo wa gulongesa? (b) Itshi tuza muzuelela mu longo edi?

³ Mupostolo Phaula wajiyile egi wakhalele naye gulongesa lukuma luabonga. Esue nji tudi naye gulongesa. (1 Kol. 9:16) Uvi, gula tudi gudihaga ha fundo dia athu ako, mbatushigo  mutshita mudimo wa gulongesa gifua adi gututuma gu ngolo. Mbatutshita yagasue ha gumonesa egi tuana guzumba athu nu tuatshigina guakuatesa. Esue mujiya egi ‘gusuanguluga guavula guana gukhala gudi muthu udi muhana gubalega muthu udi muzula.’ (Makal. 20:35) Gila tudi mulongesa mukunda nu gukuatesa athu, mbatusuanguluga muavula nu mudimo wene.

⁴ Mu longo edi, tuza mumona luholo tuajiya gudisha ha fundo dia athu ako tangua tudi mu mudimo wa gulongesa. Thomo, tuza mumona luholo gifezegeselo gia Yesu giajiya gutukuatesa ha gudisha ha fundo dia athu ako. Gungima, tuza mumona maluholo nguana a gulandula gifezegeselo gienji.—1 Phet. 2:21.

5-6. (a) Yesu wadihagele ha fundo dia akuatshi? (b) Luholo Yeshaya 61:1, 2 yazuelele gutuama, mukunda natshi Yesu wavuile khenda mukunda nu athu akhalele mulongesa?

⁵ Tutadile luholo Yesu wadihagele ha fundo dia athu ako. Lusugu lumoshi, Yesu nu alandudi enji alongesele muavula lukuma luabonga, hene ahuidile diago. Akhalelego nga nu ‘kumbi diazonda ha gudia.’ Hene Yesu wazudile alandudi enji ha ‘guya ha fundo diko ha guhululuga hazonda.’ Uvi athu avula adiangele guya mu phushi ha fundo diene diakhalele muya Yesu nu alandudi enji. Itshi Yesu watshitshile tangua asangele athu ahetshi gale ha fundo diene? “Waavidile jikhenda * handaga akhalele gifua imeme yakhelelego nu mubambi. Muene wasendesele gualongesa ndaga jiavula.”—Mako 6:30-34.

⁶ Mukunda natshi Yesu wakhalele muvila athu khenda nu gudisha ha fundo diawo? Wamonele egi athu ene “akhalele gifua imeme yakhalelego nu mubambi.” Yajiya gukhala Yesu wamonele egi avula mukatshi diawo akhalele phutu, nu akhalele mutshita mudimo wakola ha gukuatesa enya fami jiawo. Yajiya nji gukhala egi ako mukatshi diawo akhalele nu gikenene handaga afishile athu akhalele muzumba. Gula idi ngenyi, Yesu wakotelesele diago malamba awo. Gifua luholo tuayizuelela mu longo diabalega,  yajiya gukhala egi Yesu watagenele nji nu malamba a luholo elu. Yesu wakhalele gudihaga ha fundo dia athu ako, hene wakhalele gualongesa lukuma luabonga ha guahana gikhesa.—Tanga Yeshaya 61:1, 2.

7. Luholo lutshi tuajiya gulandula gifezegeselo gia Yesu?

⁷ Gifezegeselo gia Yesu gidi gutulongesa itshi? Esue nji, tudi mujinga nu athu “adi gifua imeme ishigo nu mubambi.” Athu ene adi mutagana nu malamba avula diago. Uvi esue tudi nu gima adi nagio funu: lukuma luabonga lua Ufumu. (Yat. 14:6) Tuana gulandula gifezegeselo gia Fumi’etu, tuana gulongesa lukuma luabonga handaga tuana ‘guvila athu aleba nu jiphutu khenda.’ (Ngi. 72:13) Tuana guvila athu khenda, hene tuana gutshigina guakuatesa.

8. Luholo lutshi tuajiya gumonesa egi tuana gudihaga ha fundo dia athu ako mu mudimo wa gulongesa? Hana gifezegeselo.

⁸ Itshi yajiya gutukuatesa ha gudisha ha fundo dia athu tudi mulongesa? Tudi naye gutangiza luholo athu ene adi gudivua, nu guakalegela ndaga tuajiya gutshigina egi athu ako atutshitshile. * (Mat. 7:12) Tuzuelele maluholo nguana tuajiya gumonesa khadilo diene. Luholo lua thomo ludi, gutangiza ndaga muthu nu muthu mukatshi diawo adi najio funu. Tangua tuana gulongesa lukuma luabonga, tuana gutshita ndaga gifua minganga. Munganga wabonga wana gutadila ndaga mukhashi udi najio funu. Wana guhula mihu, gungima wana gutegelela muabonga tangua mukhashi udi gumuhana mvutu. Munganga ganago gusonega phamba gihemba giadiangela gumujila mu matangi. Wajiya nji gubalegesa tangua ha gujiya diago misongo idi musagesa muthu hagula amuhane gihemba giatagana. Luholo lumoshi nji, tushigo naye gukalegela phamba metode amoshi gudi athu agasue tudi mutagana nawo mu mudimo wa gulongesa. Uvi, tudi naye gukotelesa ndaga nu matangi a muthu nu muthu.

9. Tangua tudi mu mudimo wa gulongesa, itshi tushigo naye gutangiza? Kotelesa.

⁹ Gula watagana nu muthu mu mudimo wa gulongesa, utangizago egi udi mujiya ndaga jienji jiagasue nu ndaga jia gikombelelo gienji, nu gishina ana gutshiginyila ndaga jiene. (Ish. 18:13) Uvi, hula muthu muene mihu nu gutema guagasue ha gujiya muabonga ndaga jienji nu gikombelelo gienji. (Ish. 20:5) Gula luholo ludi guene, muhule mihu yatadila mudimo wenji, nu fami yenji, ndaga jia lujingu luenji, nu matangi enji. Mihu tuana guahula, yana gutukuatesa ha gujiya mukunda natshi adi nu funu ya lukuma luabonga. Gula tuajiya mukunda natshi, tuajiya gudihaga ha fundo diawo ha guahana ima adi nayo funu gifua muatshitshile Yesu.—Fuanesa nu 1 Kolinto 9:19-23.

10-11. Ha gutadila 2 Kolinto 4:7, 8, luholo lutshi lua mbadi tuajiya gumonesa egi tuana gudisha ha fundo dia athu ako? Hana gifezegeselo.

¹⁰ Luholo lua mbadi ludi, gukamba gujiya  ndaga adi mutagana najio. Matangua ako, tuajiya gukotelesa malamba adi mutagana nawo. Mukut’etu agasue tuana gutagana nu malamba handaga tushigo athu atagana. (1 Kol. 10:13) Tudi mujiya egi monyo udi lamba ha mavu awa. Tuana gukolesela malamba ene handaga Yehowa wana gutukuatesa. (Tanga 2 Kolinto 4:7, 8.) Uvi tangiza athu anyi ashigo akombeledi a Yehowa. Idi lamba gudi ene ha gujinga ha mavu awa gula ukuateshi wa Yehowa ndo. Luholo lumoshi nu Yesu, tuana guvila athu ene khenda, hene tuana gualongesa ‘lukuma luabonga lua ndaga yabonga.’—Yesh. 52:7.

¹¹ Tutadilenu gifezegeselo gia phangi Sergey. Gutuama dia gujiya giamatshidia, Sergey wakhalele muenya musonyi wabala. Yakhalele lamba gudi muene ha guzuela ha fundo didi athu avula. Uvi gungima, wasendesele gulonguga Biblia. Sergey udi muzuela egi: “Tangua ngakhalele mulonguga Biblia, ngakotelesele egi Aklisto adi naye gulongesa athu ako giamatshidia gia Biblia. Ngakhalele mutangiza egi ngajiyilego gulongesa nga hazonda.” Uvi, tangua Sergey watangijile athu anyi khenji ajiyile galego giamatshidia, wakotelesele egi lujingu luawo ludi lamba handaga ene ashigo mujiya Yehowa. Sergey udi muzuela egi: “Ndaga jihe-jihe ngakhalele mulonguga jiakhalele gungusuanguluisa muavula nu jianguhanele guhuima. Ngajiyile egi athu ako adi naye nji gujiya giamatshidia giene.” Luholo Sergey wakudishile khadilo dia gudisha ha fundo dia athu ako, wahetele gikhesa gia gualongesa. Udi muzuela luko egi: “Ngadihudile muavula ha gumona egi gulongesa athu ako Biblia guangukuatesele ha gutuna guvua musonyi, guakolesele nji gutshigina guami.” *

12-13. Mukunda natshi tudi naye gukhala nu guhuiminyina gudi athu tudi mulongesa giamatshidia? Hana gifezegeselo.

¹² Luholo lua thathu ludi, gukhala nu guhuiminyina gudi athu udi mulongesa giamatshidia. Jiya egi, athu ako mukatshi diawo khenji ajiyile galego giamatshidia gia Biblia gifua esue. Luko, avula mukatshi diawo akhala nu gutshigina guakola mu ndaga jia ikombelelo yawo. Yajiya gukhala ana gumona egi gikombelelo giawo giana guakuatesa ha gujinga hamoshi nu enya fami jiawo, nu kutime jiawo nu athu a  mu dimbo diawo. Luholo lutshi tuajiya giwa guakuatesa?

¹³ Tuzule gifezegeselo egi: Itshi athu ana gutshita gula gikando (pont) gikulu gidi naye gumuangewa? Athu ana landula gubalega hene tangua gikando gihe-gihe gidi mutungiwa. Gula amanesela gutunga gikando gihe-gihe, ajiya giwa gumuanga gikando gikulu. Luholo lumoshi nji, gutuama egi tutoge athu tuana gulongesa Biblia ha gubemba ndaga jiawo “jikulu” ana gutshigina, tudi naye thomo guakuatesa ha gujiya nu guzumba ndaga “jihe-jihe” adi mulonguga. Ndaga jiene jidi malongo a Biblia akhalelego ene mujiya tangua tuasendesele gulonguga nawo Biblia. Gungima, ajiya giwa gubemba ndaga jia gikombelelo giawo gikulu. Uvi gukuatesa athu ene ha gusombegesa guajiya gutoga tangua diavula.—Lomo 12:2.

14-15. Luholo lutshi tuajiya gukuatesa athu adi mujiya ndaga jiazonda jia felela dia monyo wa ivo nu ivo mu phaladiso nu anyi anago gujiya felela diene? Hana gifezegeselo.

¹⁴ Gula tudi nu guhuiminyina gudi athu mu mudimo wa gulongesa, mbatushigo munenga egi athu ene akotelese nga ndo atshigine giamatshidia gia Biblia mu hugo dia thomo tualongesa. Uvi gudisha ha fundo dia athu ene mbagututuma ha guakuatesa ha gutangigiza mage-mage muabonga ndaga Biblia yana gulongesa. Ha gufezegesa, tutale luholo tuajiya gukuatesa muthu ha gukotelesa felela dia monyo wa ivo nu ivo mu Phaladiso ha mavu. Athu avula ana gujiya phamba ndaga jiazonda jiatadila felela diene, uvi ako ana gujiya ndo nga gima. Ajiya gutangiza egi gula muthu wafua, gajiyilego gufuzumuga. Nga ndo ajiya gutangiza egi athu agasue abonga mbaaya mu dilu. Luholo lutshi tuajiya guakuatesa?

¹⁵ Phangi mumoshi wa yala udi muzuelela luholo wana gukuatesa athu ha gukotelesa felela dia monyo wa ivo nu ivo ha mavu. Thomo, wana gutanga Gisendeselo 1:28. Gungima, wana guhula muthu adi muta nenji maga egi, fundo ditshi nu monyo wa luholo lutshi Nzambi watshiginyile egi athu akhale nawo. Athu avula ana guzuela egi, “Nzambi watshiginyile egi athu ajinge ha mavu mu gusuanguluga.” Gungima, phangi muene wana gutanga Yeshaya 55:11 nu wana guhula muhu gula felela dia Nzambi diasombegesele gale. Matangua avula, athu ana guzuela egi ndo. Ha gusugisa phangi muene wana gutanga nawo Ngimbo 37:10, 11 nu wana guahula egi athu mbaajinga gikuatshi mu masugu adi muza. Gukalegela Biblia mu luholo elu guana gukuatesa athu avula ha gujiya egi uu nu mangino gutshigina gua Nzambi guakhala egi athu abonga ajinge mayilago mu phaladiso.

16-17. Ha gutadila Ishima 3:27, luholo lutshi tuajiya gumonesa egi tuana gudihaga ha fundo dia athu ako? Hana gifezegeselo.

¹⁶ Luholo lua nguana ludi, gutshita ndaga jiajiya gumonesa athu egi udi gudisha ha fundo diawo. Tufezegese gale. Tuayile gale mutala muthu tuana gulongesa Biblia mu tangua diabola ba? Tuajiya gumutoga pardon nu gumuwambela egi mbatuza gumutala mu tangua diabonga. Itshi tuajiya gutshita gula muthu tuayi mutala udi nu funu egi tumukuatese nu tumidimo  tuazonda-zonda? Nga ndo, itshi tuajiya gutshita gula muthu muene udi mukata nga udi wagukola uvi udi nu funu ya muthu ha guya gumusumbila ima? Gula tuatagana nu ndaga ya luholo elu, tuajiya gukuatesa muthu muene.—Tanga Ishima 3:27.

¹⁷ Phangi mumoshi wa mukhetu wahetele mbuto yabonga luholo wakuatesele muthu muko nu tumidimo tuazonda-zonda. Wavile khenda mukunda nu fami imoshi yafishile mun’awo, hene waasonegele mukanda. Mukanda wene wakhalele nu verse jia Biblia jidi muhana gikhesa. Luholo lutshi mukanda wene wakuatesele fami yene? Mama wafishile mona wasonegele egi: “Hamene ngabalegesa lusugu luabola diago. Mukanda waye watukuatesa muavula. Ngudi guguhana mersi avula handaga mukanda waye watuhanyi gikhesa giavula. Hamene, ngatangi mukanda wene mahugo gubalega 20. Ngatangijilego egi mukanda waye wajiya gutukuatesa nu gutuhana gikhesa luholo elu. Tudi guguhana mvudi yavula lume.” Idi yadiago egi tuajiya guheta mbuto jiabonga gula tudi gudihaga ha fundo dia athu adi mumona lamba, nu tudi mukamba luholo lua guakuatesa.

18. Luholo 1 Kolinto 3:6, 7 idi guyimonesa, itshi tushigo naye gujimbila mukunda nu mudimo wa gulongesa? Mukunda natshi?

¹⁸ Yadiago, tudi naye gukalagala ngolo hagula tulebigo muila mukunda nu mudimo wetu wa gulongesa. Tuajiya gukuatesa athu ako ha gujiya Nzambi, uvi ishigo esue tuana gutshita mudimo wavula gubalega. (Tanga 1 Kolinto 3:6, 7.) Yehowa hakhenji muene wana gunana athu gudi muene. (Yone 6:44) Mutshima wa muthu wagasue udi naye gumutuma ha gutshigina nga gutuna lukuma luabonga. (Mat. 13:4-8) Tudi mujiya egi Yesu wakhalele mulongeshi wabalega gukoma ha mavu, uvi athu avula atunyile malongo enji! Hene, tuajiyilego guleba muila gula athu tudi mutshigina gukuatesa atuna gawo gutegelela lukuma luabonga.

19. Mbuto jitshi mbatuheta gula tudi gudihaga ha fundo dia athu ako tangua tudi mu mudimo wa gulongesa?

¹⁹ Mbatuheta mbuto yabonga gula tuadihaga ha fundo dia athu mu mudimo wa gulongesa. Mbatusuanguluga muavula nu mudimo wene. Mbatuheta gusuanguluga guana guvua muthu gula wahana. Mbatukuatesa athu adi nu ‘mitshima yatagana mukunda nu monyo wa ivo nu ivo’ ha gutshigina lukuma luabonga. (Makal. 13:48) Hene, ‘gula tuaheta luendu, tutshitshile athu agasue ndaga jiabonga.’ (Gal. 6:10) Ngenyi, mbatusuanguluga muavula ha gutumbuisa Tata wetu wa mu dilu.—Mat. 5:16.