1. ¿Imanö nunataq Jesusqa karqan? Willakaramï.

JUTSASAPA karnin problëmakunapa pasanqantsikkunataqa Jesusqa entiendinmi, tsëmi pëtaqa kuyantsik. Kë patsachö këkarninmi tsëtaqa rikätsikurqan, porqui kushikoq kaqkunawanmi kushikurqan y waqaq kaqkunawanmi waqarqan (Rom. 12:15). Juk kutim, Diospita yachatsikuyanqampita 70 discïpulunkuna alläpa kushishqa kutiyarqan, tsëmi tsë höra Jesusman santu espïritu juntarirqan y alläpa kushikurqan (Lüc. 10:17-21). Jina Läzaru wanunqampita familiankuna y amïgunkuna llakikoqta rikarmi “shonqunchö alläpa nanatsikurqan y alläpa llakikurqan” (Juan 11:33).

2. ¿Imanirtaq Jesusqa nunakunata llakiparnin yanaparqan?

² Jutsannaq nuna këkarpis Jesusqa llakipäkoqmi karqan. Pasaq kaq yachatsikïchö yachakunqantsiknöpis, kuyakoq kanqanmi tsënö kanampaqqa yanaparqan (Prov. 8:31). Jina tsëmi yanaparqan nunakuna imanö pensayanqanta entiendinampaq. Apostol Juanmi Jesuspaq kënö nirqan: “Alleqmi musyaq nunakuna imanö kayanqanta” (Juan 2:25). Jesusqa alläpam nunakunata ankuparqan y nunakunaqa tsëtam cuentata qokuyaq, tsëmi Diospita yachatsikunqanta chaskikuyarqan. Noqantsikpis Jesusnölla kanapaq kallpachakushqaqa, yachatsikunqantsiktam nunakuna mas chaskikuyanqa (2 Tim. 4:5).

3, 4. (1) ¿Imanirtaq Diospita nunakunata yachatsinapaq kallpachakuntsik? (2) ¿Imatataq kë yachatsikïchö yachakushun?

³ Apostol Pabluqa musyarqanmi llapan puëdinqanmannö Diospita yachatsikunampaq kaqta. Y noqantsikpis tsënömi yachatsikunantsik (1 Cor. 9:16). Peru nunakunata llakiparninqa manam yachatsikunantsik kaptinllatsu yachatsikushun,  sinöqa nunakunata rasumpëpa kuyarnin y yanapëta munarninmi. Jina musyantsikmi, imata chaskipitapis wakinkunata yanapanqantsik mas kushikïta apamunqanta (Hëch. 20:35). Tsëta cuentaman churëkur yachatsikurninqa kushishqam yachatsikushun.

⁴ Kë yachatsikïchömi rikäshun, Diospita yachatsikurnin llakipäkoq kanqantsikta imanö rikätsikunapaq kaqta. Puntataqa yachakushun nunakunata Jesus imanö tratanqampita y noqantsik imata yachakunqantsikta. Jina yachakushunmi chusku formapa Jesus imanö ruranqampita (1 Pëd. 2:21).

5, 6. (1) ¿Pikunatataq Jesusqa ankuparqan? (2) Isaïas 61:1, 2 textu ninqannöpis, ¿imanirtaq Jesusqa Diospita yachatsinqan nunakunata ankuparqan?

⁵ Jesus llakipäkoq kanqanta rikärishun. Juk kutim Jesusqa discïpulunkunawan mana jamëpa Diospita yachatsikïkäyarqan. Y mikuriyänampaqpis manam tiempunkuna karqantsu. Tsëmi Jesusqa “juk tsunyaq sitiuman” jamariyänampaq discïpulunkunata aparqan. Peru mëtsikaq nunakunam pëkuna kaqman ëwayarqan. Jesusqa tsë nunakunata rikëkurmi ‘alläpa ankuparqan *, porqui mitseqninnaq üshakunanömi këkäyarqan. Y imëkata yachatsirmi qallëkurqan’ (Marcus 6:30-34).

⁶ ¿Imanirtaq Jesusqa tsë nunakunata ankuparqan? Porqui “mitseqninnaq üshakunanömi këkäyarqan”. Itsa cuentata qokurirqan wakin nunakunaqa waktsa karnin familiankunata manteniyänampaq alläpa trabajayanqanta. Itsa wakimpaqa kuyashqa kastankuna wanushqa karqan. Jesusqa alleqmi entiendeq imanö sientikuyanqanta, porqui pasaq kaq yachatsikïchö yachakunqantsiknöpis tsëkunapaqa pëpis pasashqam karqan. Tsëmi nunakunata llakiparnin  Diospita yachatsirqan, tsënöpa shoqakïta tariyänampaq (leyi Isaïas 61:1, 2 *).

7. ¿Imatataq Jesuspita yachakuntsik?

⁷ ¿Imatataq Jesuspita yachakïta puëdintsik? Kanampis nunakunaqa ‘mitseqninnaq üshakunanömi këkäyan’ y imëka problëmakunapam pasayan, peru noqantsikqa Diospa Gobiernumpita yachatsirninmi yanapëta puëdintsik (Rev. 14:6). Tsëmi Jesusnölla noqantsikpis, waktsa y humildi nunakunata ankuparnin Diospa Gobiernumpita alli willakïkunata yachatsikuntsik (Sal. 72:13). Awmi, nunakunata ankuparninmi yanapëta munantsik.

8. ¿Imataq yanapamäshun Diospita yachatsikurnin ankupäkoq kanantsikpaq? Juk ejempluwan willakaramï.

⁸ Yachatsinqantsik nunakunata ankupänapaqqa, imata pensayanqanta y imanö sientikuyanqantam entiendita procuranantsik. Jina pensashun noqantsikta imanö tratamänantsikta munanqantsikman * (Mat. 7:12). Tsëpaqqa chusku yanapakïkunata rikärishun. Punta kaq, cada nuna imata wananqanman pensashun. Diospita yachatsikurqa juk doctor cuentam kantsik. Juk alli doctorqa cada pacientinkuna imata wanayanqankunatam cuentachö katsin. Y imanö sientikunqantam tapupan y niyanqankunatam shumaq wiyan, y manam rastsu ima jampita upunampaq kaqta recetan. Sinöqa exämintaran ruran ima qeshyëwan kanqanta musyanampaq, tsënöpa ima jampita recetanampaq. Tsënöllam noqantsikpis nunakunata Diospita yachatsirninqa juk asuntullapaqtsu llapankunata parlapänantsik, sinöqa cada nuna imakunapa pasëkanqanta o imata pensanqanta cuentaman churëkurmi yachatsinantsik.

9. (1) Yachatsinqantsik nunakunawan parlarninqa, ¿imatataq pensanantsiktsu? (2) Puntataqa, ¿imatataq ruranantsik?

⁹ Diospita yachatsinqantsik nunakunawan parlarninqa, ama pensashuntsu imata creiyanqanta musyanqantsikta (Prov. 18:13). Sinöqa imata pensayanqanta musyanapaqqa yachëllapam tapupärinantsik (Prov. 20:5). Itsa trabäjumpaq, familiampaq y wakin asuntupaq imata pensanqanta tapurishwan. Peru tsëkunapaq tapupë markantsikchö alli o mana alli kanqantam puntataqa rikänantsik. Tsënö tapuparninqa Diospita yachakïta o mana yachakïta  munayanqantam musyashun. Tsëmi Jesus ruranqannölla imanö yanapëta puëdishun (igualaratsi 1 Corintius 9:19-23 textuwan).

10, 11. 2 Corintius 4:7, 8 textu ninqannöpis, ¿imataq masqa yanapamäshun ankupäkoq kanqantsikta rikätsikunapaq? Willakaramï.

¹⁰ Ishkë kaq, vïdankunachö imakunapa pasayanqanman pensashun. Tsëmi yanapamäshun imanö sientikuyanqanta entiendinapaq, porqui noqantsikpis tsënö problëmakunapam pasantsik (1 Cor. 10:13). Kë ushanan junaqkunachö kawëqa alläpa difïcilmi, y Jehovällam yanapamantsik alli tsarakunapaq (leyi 2 Corintius 4:7, 8). Peru Diosta mana sirweq nunakunapaqqa mas difïcilchi kë mana alli tiempuchö kawëqa, porqui pëkunaqa manam Diospa amïguntsu kayan. Tsëmi Jesusnölla pëkunata ankuparnin, Diospa Gobiernumpita alli willakïkunata musyatsintsik (Is. 52:7).

¹¹ Sergey jutiyoq wawqipita yachakurishun. Kë wawqiqa Jehoväta manaraq reqirqa parlakïtam alläpa mantsakoq. Peru tiempuwanqa Testïgukunawanmi Bibliapita yachakur qallëkurqan. Y kënömi nin: “Cristiänukuna nuna mayinkunata creenciankunapita parlapäyänampaq kaqtam Bibliachöqa yachakurqä. Peru imëpis tsëta rurëta mana puëdinäpaq kaqtam pensarqä”. Y Sergeyqa Jehoväta mana reqeq nunakunapa vïdankuna imanö kanqanmanmi yarpachakoq. Jina kënömi nin: “Bibliapita yachakunqämannömi kushishqa y alli sientikoq kä. Tsëmi wakin nunakunapis Diospita yachakïta wanayanqanta rikarqä”. Tsë wawqi tsënö pensanqanmi mana mantsakushpa Diospita yachatsikunampaq yanaparqan. Y kënömi nin: “Jina tsëta ruranqämi parlakïta mana mantsakunäpaq yanapamashqa y Bibliapita wakinta yachatsinqäpis Diosman mas confiakunäpaqmi yanapamashqa”. *

12, 13. ¿Imanirtaq Bibliapita yachakïkaqkunawanqa pacienciakoq kanantsik? Juk ejempluwan willakaramï.

 ¹² Kimaq kaq, Bibliapita yachakïkaqkunawan pacienciakoq kashun. Porqui pëkunaqa itsa Bibliapita tsëraq yachakïkäyan. Jinamampis wakinqa alläpam creenciankunata kuyayan, porqui pensayan tsë costumbrinkuna familiankunawan y marka mayinkunawan unïdu kayanampaq yanapanqanta. Pëkunataqa, ¿imanötaq yanapashwan? Rikärishun.

¹³ Këman pensarishun, juk ishkinëkaq tsakata cambiayänampaqqa, ¿imatataq rurayan? Tsë tsakapam pasar sïguiyan juk mushoq tsakata rurayanqanyaq. Tsë mushoq tsakata rurar usharirqa juk kaq tsakataqa juchuratsiyanmi. Tsënöllam yachatsinqantsik nunakunataqa rasllaqa nirinantsiktsu unë costumbrinkunata dejariyänampaq, tsëpa rantinqa Bibliachö yachakuyanqankunata mas valorayänampaqmi yachatsinantsik, porqui pëkunaqa tsëraqmi tsëkunata yachakïkäyan. Tsënö rurarqa kikinkunallam unë creiyanqankunata dejarita munayanqa. Peru tsëpaqqa tiemputaran wanayan (Rom. 12:2).

14, 15. Kë Patsachö mana wanushpa kawakuyänanta Dios munanqanta entiendiyänampaqqa, ¿imanötaq yachatsishwan? Juk ejempluwan willakaramï.

¹⁴ Nunakunawan pacienciakoq karninqa, manam shuyaräshuntsu yachatsinqantsikkunata raslla chaskikuyänanta. Sinöqa ankupäkoq kanqantsikmi Bibliapita pacienciawan yachatsir sïguinapaq yanapamäshun. Kë patsachö mana wanushpa kawanapaq yachatsikïman pensarishun. Tsë yachatsikïtaqa mëtsikaqmi musyayantsu wakinqa pensayan wanïwan llapampis ushakärinqanta y wakinkunanam pensayan alli nunakunaqa ciëluta ëwayänampaq kaqta. ¿Imanötaq kë nunakunata yanapashwan Biblia yachatsikunqanta chaskikuyänampaq?

¹⁵ Juk wawqi Bibliapita imanö yachatsikunqanta rikärishun. Puntataqa Genesis 1:28 textuta leyirirninmi, mëchö y imanö nunakuna kawayänanta Dios munanqanta tapun. Cäsi llapan nunakunam niyan kë Patsachö y kushishqa kawakunantsikta Dios munanqanta. Y tsëpitanam Isaïas 55:11 textuta leyirir, Diospa munënin cambiashqa o mana cambiashqa kanqanta tapun. Y mana cambiashqa kanqantam nunakunaqa niyan. Y usharinampaqnam Salmus 37:10, 11 textuta leyirirnin kënö tapun: “¿Shamoq tiempuchö nunakuna imanö kawakuyänampaq kaqtataq Bibliaqa yachatsikun?”. Kë wawqiqa tsënö yachatsikurninmi, kë Patsachö nunakuna mana wanushpa kawayänanta Dios munanqanta entiendiyänampaq mëtsikaqta yanapashqa.

16, 17. Proverbius 3:27 textu ninqannöpis, ¿imanötaq ankupäkoq kanqantsikta rikätsikushwan? Willakaramï.

¹⁶ Chusku kaq, wakinkunapaq yarpachakunqantsikta  rikätsikushun. Por ejemplu wayinkunachö nunakunata ocupädu këkaqta tarirninqa disculpakunantsikmi, y yapë kutinapaq kaqtam nirinantsik. O itsa wakinkunaqa imallachöpis yanaparinantsikta wanëkäyan o wayinkunapita yarqïta mana puëdir yanapayänanta wanayan, tsënö nunakunata tarirninqa itsa yanaparinantsikpaq nirishwan (leyi Proverbius 3:27 *).

¹⁷ Llakipäkoq kanqantsik imanö yanapakunqanta juk ejempluwan rikärishun. Juk warmipa tsëllaraq yurishqa wamran wanushqa kanqantam juk paniqa musyarirqan. Tsëmi tsë paniqa juk cartata escribirqan, y shoqakoq textukunatam churarqan. Tsë cartapitam tsë warmi kënö nirqan: “Qanyanqa alläpa llakishqam këkarqä, peru apatsimunqëki cartaqa noqata y familiätam alläpa yanapayämashqa. Y tsëtaqa manam imëpis qonqayäshaqtsu. Jina ishkë chunka kutinömi tsë cartataqa leyirqö, y alläpam yanapamashqa. Tsëmi llapan shonqüwan agradecikü”. Wakinkuna imanö sientikuyanqanta entiendita procurarnin y yanaparninqa, Diospita yachatsikunqantsikchö alläpa yanapakunqantam rikäshun.

18. 1 Corintios 3:6, 7 textu ninqannö, Diospita yachatsikunqantsikchö yanapakurnimpis, ¿imatataq cuentachö katsinantsik?

¹⁸ Diospita yachatsikunqantsikchö alli yarqapukunapaqqa kikin Jehovämi yanapamantsik, y tsëtam imëpis cuentachö katsinantsik (leyi 1 Corintius 3:6, 7). Porqui kikin Jehovämi nunakunata yanapan pëta reqiyänampaq (Juan 6:44). Jinamampis cada nunam decidin Diospita yachatsinqantsikta chaskikunampaq kaqta o mana chaskikunampaq kaqta (Mat. 13:4-8). Jesus alli yachatsikoq këkaptimpis manam llapantsu yachatsikunqanta chaskikuyarqan. Tsëmi yachatsikunqantsikta nunakuna mana chaskikuyaptinqa manam llakikunantsiktsu.

19. Diospita yachatsikurnin ankupäkoq karninqa, ¿ima bendicionkunatataq chaskishun?

¹⁹ Diospita yachatsikurnin ankupäkoq kanqantsikta rikätsikurqa bendicionkunatam chaskishun. Y mas kushishqam sientikushun Diospita yachatsikurnin, y ‘imëyaqpis kawakïta chaskiyänampaq kallpachakïkaqkunatam’ yanapashun (Hëch. 13:48). Tsëmi, ‘puëdinqantsikyaqqa llapankunapaq alli kaqta rurar’ sïguishun (Gäl. 6:10). Jina tsëta rurarninqa teytantsik Jehoväta alabanqantsikpitam kushishqa sientikushun (Mat. 5:16).