1. ¿Jesusmanta imata yachashpataj cushilla sintirinchij?

JUCHAYUJ gentecuna ima problemacunata charijpica Jesusca allimi intindij carca. Pai chashna cashcata yachashpaca ¿manachu cushilla sintirinchij? Ari. Jesús cai Allpapi cashpaca cushilla cajcunahuanmi cushicuj carca. Pero llaquilla cajcunahuanca llaquirijmi carca (Romanos 12:15). Por ejemplo, 70 discipulocuna huillanamanta cushilla tigramujpica Jesuspish cushillami sintirirca (Lucas 10:17-21). Cutin Lázaro huañujpica paipaj panicuna huacacujta ricushpami ‘Jesuspish yallitaj llaquirirca’ (Juan 11:33).

2. ¿Jesusca imamantataj gentecunata llaquij carca?

² Jesusca jucha illaj cashpapish gentecunataca llaquijmi carca. ¿Imamantataj gentecunata llaquij carca? Ñaupa yachaipi ricushca shinaca shungumantami gentecunata cꞌuyaj carca (Proverbios 8:31). Chaimantami paicunapaj yuyaicunatapish rijsij carca. Apóstol Juanca: ‘Gentecunapaj shungu ima shina cashcataca Jesusca yacharcallami’ ninmi (Juan 2:25). Jesús chashna llaquij, cꞌuyaj cashcatami gentecunaca ricurca. Chaimantami pai Diospaj Gobiernomanta huillajpica uyanata munarcacuna. Ñucanchijpish Jesús shina cashunchij. Chashnami gentecunaman Bibliamanta huillacushpaca paicunata ashtahuan ayudai tucushun (2 Timoteo 4:5).

3, 4. a) Llaquijcuna cashpaca ¿ima raicushi huillashun? b) ¿Cai yachaipica imatataj ricushun?

³ Apóstol Pabloca Diospaj Shimita huillana obligacionta charishcatami yacharca. Ñucanchijpish chai obligaciontami charinchij (1 Corintios 9:16). Pero, llaquij cashpaca mana predicana cashcallamantachu predicashun. Ashtahuanpish, gentecunamanta sustarishcamanta, paicunata ayudasha nishcamantami predicashun. Shinallataj “imatapish cujmi, cushcata  japijta yalli cushicun” nishca cierto cashcatami yachanchij (Hechos 20:35). Chaita yuyaipi charishpaca cushillami Diospaj Shimita huillashun.

⁴ Cai yachaipica gentecunaman Bibliamanta huillacushpa paicunata llaquij cashcata ricuchingapaj imata rurana cashcatami ricushun. Pero puntapica gentecunata Jesús ima shina ricuj cashcata, paimanta ñucanchijpish imata yachacushcatami ricushun. Qꞌuipaca pai shina cangapaj chuscu cosascunata rurana cashcatami yachashun (1 Pedro 2:21).

5, 6. a) ¿Jesusca picunamantataj llaquirirca? b) Isaías 61:1, 2-pi nishca shinaca ¿Jesusca imamantataj chai gentecunamanta llaquirirca?

⁵ ¿Jesusca imallapitaj llaquij cashcata ricuchirca? Shuj punllaca paipish paipaj catijcunapish mana samarishpami gentecunaman Diospaj Shimita huillarcacuna. Micungapajpish mana pajtarishcacunachu carca. Chaimantami Jesusca “ñucanchijlla pi mana causan chulunllapi ashata samarishunchij” nirca. Pero achca gentecunaca paicuna maiman rigrishcamanmi ña chayashcacuna carca. ¿Gentecuna chaipi shuyacushcata ricushpaca Jesusca imatataj rurarca? Michij illajlla ovejacuna shina cajpimi paicunamanta llaquirirca. * Qꞌuipaca yachachishpami callarirca (Marcos 6:30-34).

⁶ ¿Jesusca imamantataj chai gentecunamanta llaquirirca? “Michij illajlla ovejacuna shina” cajtami ricurca. Por ejemplo, chai gentecunamanta huaquincunaca pobrecunami carca. Chaimantami familiata mantiningapaj sinchita trabajana carca. Shujtajcunaca familiatami huañuipi chingachishcacuna carca. Paicuna chai llaquicunata apacushcatami Jesusca cuentata cushcanga. Ñaupa yachaipi ricushca shinaca paipish chashna llaquicunata apashcamantami paicunata alli intindi tucurca. Shinapish chai gentecunata  llaquishcamantami Jesusca cushichinata munarca (Isaías 61:1, 2-ta liyipai).

7. ¿Jesús shina cangapajca imatataj rurana canchij?

⁷ ¿Jesusmantaca imatataj yachanchij? Cunanpish gentecunaca “michij illajlla ovejacuna” shinami can. Paicunaca achca problemacunatami charin. Chaimantami Diospaj Gobiernomanta alli huillaicunata uyanata minishtincuna. Ñucanchijmi paicunataca ayudai tucunchij (Apocalipsis 14:6). Chaimantami Jesús shina huajchacunata, imata mana charijcunata llaquishpa Diosmanta huillanchij (Salmo 72:13). Shinallataj paicunata llaquishcamantami tucui laya ayudanchij.

8. ¿Predicacionpica ima shinataj gentecunata llaquishcata ricuchishun? Shuj chꞌimbapuraimanta parlai.

⁸ ¿Gentecunata llaquishpa predicangapajca imatataj rurana canchij? Paicuna ima shina sintirishcata, imata yuyashcatami yachana canchij. Shinallataj ñucanchijta ima shina tratachun munashca shinami tratana canchij * (Mateo 7:12). Chaipajca chuscu cosascunata rurana cashcata ricushunchij. Shuj, cada uno imata minishtishcapi yuyashunchij. Caitaca shuj doctor imata rurashcahuan chꞌimbapurashun. Shuj alli doctorca ungushca runa imata minishtishcapimi yuyan. Chaimantami pai ima shina sintirishcata yachangapaj tapuicunata rurashpa alli uyan. Qꞌuipaca mana yuyarishcahuanchu jambicunata cun. Ashtahuanpish paita alli alli ricushpami minishtishca jambicunata cun. Ñucanchijpish predicacushpaca mana tucui gentecunamanchu chaillatataj huillana canchij. Ashtahuanpish cada unopaj causai ima shina cashcatami intindina canchij. Chaimi paicuna imata minishtishcata yachashpa Diospaj Shimihuan huillashun.

9. a) ¿Imatataj mana alli yachanchij? b) ¿Imata ruranataj ashtahuan alli can?

⁹ Gentecuna imata crishcata, imamanta chaita crishcataca mana alli yachai pudinchijchu (Proverbios 18:13). Chaimantami ciertotaj imata crishcata, imata yuyashcata yachangapaj tapuicunata rurana canchij (Proverbios 20:5). Por ejemplo, ñucanchij causacun lugarpi cai tapuicunata rurana alli cajpica, imapi trabajashcata, familiamanta, shujtaj cosascunamantami tapui tucunchij. Chai laya tapuicunata rurashpami paicuna imata minishtishcata yachashun. Chaimi Jesús shina llaquishpa Bibliamanta ima shina huillanata ricushun (1 Corintios 9:19-23-ta ricui).

10, 11. 2 Corintios 4:7, 8-pi nishca shinaca gentecunata llaquingapajca ¿imatataj yuyarina canchij?

¹⁰ Ishqui, gentecunapaj causai ima shina cashcata yuyarishunchij. Diosta sirvijcunapish juchayuj cashcamantami problemacunata  charinchij. Chaimantami gentecunapaj causaita intindi pudinchij (1 Corintios 10:13, QC, 1989). Ashtahuancarin llaqui tiempopimi causacunchij. Jehová Diosllami ahuantachun ayudan (2 Corintios 4:7, 8-ta liyipai). Pero Diosta mana sirvij gentecunaca Diospaj ayudata mana charincunachu. Chaimantami paicunapaj causaica ashtahuan sinchi can. Chaita yachashcamantami Jesús shina llaquishpa ‘sumaj causai tiyanamanta’ paicunaman huillana canchij (Isaías 52:7).

¹¹ Huauqui Sergeymanta parlashun. Bibliamanta manaraj yachashpaca shujtajcunahuan parlanata dimastijmi manchaj carca. Tiempohuanca Bibliamantami yachai callarirca. Paica: “Bibliamanta yachacushpaca imata crishcata shujtajcunaman parlana cashcatami intindircani. Ñucaca chaitaca manataj rurai pudishachu nishpami yuyarcani” ninmi. Pero Sergeyca Diosta mana rijsij gentecunapaj causai ima shina cashcatami siempre yuyarij carca. Paica: “Bibliamanta yachashpaca cushilla, tranquilomi sintirircani. Shujtajcunapish Bibliamanta yachanata minishtishcatami ricurcani” ninmi. Chaita cuentata cushpami cai huauquica manchaita saquishpa huillai callarirca. Chaimantami paica: “Diospaj Shimita huillacushpaca alli sintirishcatami cuentata curcani. Ima huillashcatapish shungu ucupimi huaquichij carcani” ninmi. *

12, 13. Bibliamanta yachacujcunahuanca ¿imamantataj pacienciata charina canchij? Shuj chꞌimbapuraihuan cutichi.

¹² Quimsa, Bibliamanta yachacujcunahuan pacienciata charishunchij. Ñucanchijca Diospaj Shimipi tiyaj yachaicunataca allimi rijsinchij. Pero chai yachaicunata gentecunaman yachachijpica paicunapajca mushujmi ricurin. Ashtahuancarin achcacunaca ‘ñucanchij crishcacunata mana saquishpami familiahuanpish, comunidadpipish, tandalla canchij. Costumbrecunatapish mana  chingachinchij’ nincuna. Paicuna chashna yuyaj cashcata ama cungarishunchij. ¿Ima shinataj paicunata ayudashun?

¹³ Caipi yuyashunchij. Shuj mauca chacata allichingapajca ¿imatataj rurancuna? Mushuj chacata rurangacamami mauca chacataca mana anchuchincuna. Gentecuna chaita pasachunpishmi saquincuna. Ña tucuchishpaca ñaupa chacataca anchuchincunami. Bibliamanta yachacujcunahuanpish chashnallatajmi can. Paicunataca paicunapaj crishcacunata saquichunca mana obliganachu canchij. Ashtahuanpish mushuj yachaicunata shungupi huaquichichunmi ayudana canchij. Chaimi paicunapaj ñaupa crishcacunataca saquingacuna. Pero chaita saquingapajca achca tiempomi minishtiringa (Romanos 12:2).

14, 15. Paraíso Allpapi causanamantaca gentecunamanca ¿ima shinataj intindichina canchij? Shuj huauqui ima rurashcata parlai.

¹⁴ Pacienciata charishpaca gentecuna punta uyashcahuan ñucanchij yachachishcacunata crina cashcataca mana yuyanachu canchij. Ashtahuanpish llaquijcuna cashpaca Biblia ima nishcata paicuna alli intindingacamami yachachishpa catishun. Por ejemplo, paraíso Allpapi huiñaita causanamanta ima shina intindichinata yuyashunchij. Achcacunaca caimantaca ashallata o mana imata yachancunachu. Cutin huaquincunaca pi huañujpica mana tigra causaringachu nincunami. Shujtajcunacarin tucui alli gentecunami jahua pachaman rincuna nincunami. ¿Chashna yuyaita charij gentecunataca ima shinataj ayudashun?

¹⁵ Shuj huauqui Bibliahuan ima shina intindichishcata ricushun. Puntaca Génesis 1:28-tami liyin. Qꞌuipaca ‘¿gentecuna maipi, ima shina causachuntaj Diosca munarca?’ nishpami tapun. Achca gentecunaca ‘cai Allpapi cushilla causachunmi Diosca munarca’ nishpami contestancuna. Chai qꞌuipaca Isaías 55:11-ta liyishpami ‘¿Diospaj munaica cambiashcachu?’ nishpa tapun. Paicunaca ‘mana cambiashcachu’ nishpami contestancuna. Ultimotaca Salmo 37:10 y 11-tami liyin. Qꞌuipaca: ‘Bibliapi nishca shinaca ¿shamuj punllapi gentecunaca ima shinataj causangacuna?’ nishpami tapun. Chashnami cai huauquica achcacunamanca Diosca alli gentecuna cai Allpapi huiñai huiñaita causachun munashcata intindichishca.

16, 17. Proverbios 3:27-pi nishca shinaca ¿ima shinataj shujtajcunata llaquishcata ricuchishun? Shuj experienciamanta parlai.

¹⁶ Chuscu, gentecunamanta sustarishcata ricuchingapaj imata rurai pudishcapi yuyashunchij. Por ejemplo, maipica huasiyuj ocupado cashca horaspimi Diospaj Shimita huillanaman chayanchij. Chaita ricushpaca perdonahuai, shujtaj punllami shamusha nishpami rinalla canchij. Mana cashpaca huasiyuj ayudata minishticujpica ayudanallami canchij. Huaquincunaca ungushca o mayorlla cashcamantami huasimanta mana llujshi tucuncuna. Paicuna ima favorta rurachun mañajpica  ruranallami canchij (Proverbios 3:27-ta liyipai).

¹⁷ ¿Shujtajcunata llaquishpa ayudanaca imamantataj alli can? Shuj experienciata ricushun. Shuj familiapaj huahuaca chai punllallataj huacharishpami huañurca. Chaitami shuj panica yachaj chayarca. Chaimi paica Bibliapi tiyaj cushichij shimicunata quillcashpa shuj cartata paicunaman cacharca. ¿Cartata chasquishpaca chai familiaca ima shinataj sintirirca? Mamaca chai panitaca: “Cainaca dimastij llaquillami carcani. Pero quiquinpaj cachashca cartapi tiyaj shimicunaca shungumanmi chayarca. Chai cartataca 20 cutinmi liyircani. Achcatami ayudapashcangui. Ima shina pagui ninata mana yachanichu. Quiquin chashna cꞌuyaj, alli huarmi cashcata ricushpami mancharini. Shungumantami pagui nipanchij” nircami. Ñucanchijpish shujtajcunamanta sustarishpa imapipish ayudajpica chashna layallatajmi pasanga.

18. 1 Corintios 3:6, 7-pi nishca shinaca predicacushpaca ¿imatataj mana cungarina canchij?

¹⁸ Gentecunaman predicashpaca paicuna Diosmanta yachachunmi ayudacunchij (1 Corintios 3:6, 7-ta liyipai). Pero Jehová Diosmi gentecuna paipajman cꞌuchuyachun ayudan (Juan 6:44). Caitaca ama cungarishunchij. Shinallataj gentecunapaj shungupi ima tiyashcami uyanata o mana uyanata munashcata ricuchinga (Mateo 13:4-8). Jesusca tucuicunamanta yalli alli yachachijmi carca. Chashna jahuapish pai yachachisha nijpica la mayoría gentecunaca mana uyasha nircachu. Chaita yuyarishpaca cunanpish Diospaj Shimita gentecuna mana uyasha nijpica mana desanimarishunchu.

19. Predicacionpi gentecunata llaquishcata ricuchishpaca ¿ima shinataj sintirishun?

¹⁹ Predicacionpi gentecunata llaquishcata ricuchishpaca ashtahuan cushillami sintirishun. Shinallataj gentecunaman cuj canata yachashcamantami alli sintirishun. Ashtahuancarin ‘huiñai causaipaj’ cajcuna Diospaj Reinomanta yachachunmi ayudashun (Hechos 13:48). Shinashpaca, ‘tucuicunapaj allita rurai’ pudishpaca rurashunchij (Gálatas 6:10). Shinami ñucanchij Yaya Jehová Diosta jatunyachishpa cushilla causashun (Mateo 5:16).