1. Која тани јекх таро буќа башо Исус со највише воодушевинела амен? Објаснин.

ЈЕКХ бути со највише воодушевинела амен башо Исус тани лескири способност те хаљовел амаре проблемија со иси амен сар несовршена мануша. Џикоте сине ки Пхув, о Исус сине бахтало околенцар сој бахтале хем ровела сине околенцар со ровена (Рим. 12:15). На пример, откеда сине ки служба, лескере 70 ученикија иранѓе пе бахтале. Ки адаја прилика „о свети дух пхерѓа е Исусе бахталипаја“ (Лука 10:17-21). Ки јекх јавер прилика, кеда дикхља кобор сине тажна о најпаше е Лазарескере адалеске со муло, о Исус сине „бут погодимо хем тажно“ (Јован 11:33).

2. Со поможинѓа е Исусеске те сикавел сочувство е манушенге?

² Со поттикнинѓа акале совршено мануше те сикавел добором милост хем сочувство спрема о несовршена мануша? Најважно бути сине адаја со мангела сине е манушен. Сар со вакерѓем ки англуни статија, ов сине посебно бахтало „е манушикане чхавенге“ (Изр. 8:31). Лескоро мангипе спрема ленде поттикнинѓа ле шукар те џанел о начин сар размислинена о мануша. О апостол Јован вакерѓа: „Ов џанела сине со иси е мануше ко вило“ (Јован 2:25). Е Исусе сине ле баро сочувство спрема о мануша. Адалеске со осетинена сине кај мангела лен, ола шунена сине о хабери башо е Девлескоро Царство. Со сикљоваја таро акава? Ако трудинаја амен те сикава сочувство е манушенге каске со проповединаја, ола ка овен поспремна те прифатинен амари помош (2. Тим. 4:5).

3-4. а) Сар ка дикха ки амари служба ако сием сочувствителна? б) Со ка дикха ки акаја статија?

³ О апостол Павле џанља кај иси ле одговорност те  проповединел, амен да иси амен адаја одговорност (1. Кор. 9:16). Ама, ако иси амен сочувство, амари служба нане те кера ла само тари одговорност. Ки лате ка дикха сар прилика те сикава е манушенге кај мангаја лен хем кај мангаја те поможина ленге. Џанаја кај „повише иси бахталипе кеда дела пе него кеда лела пе“ (Дела 20:35). Ако проповединаја адалеске со мангаја те поможина е манушенге, повише ка уживина ки служба.

⁴ Ки акаја статија ка дикха сар шај те сикава сочувство ки служба. Прво, ка дикха со шај те сикљова таро адава сар о Исус дикхела сине ко мануша. Пало адава ка дикха ко кола штар начинија шај те џа пало лескоро пример (1. Пет. 2:21).

5-6. а) Каске сикавѓа сочувство о Исус? б) Спрема Исаија 61:1, 2, соске сине жал е Исусеске башо мануша со проповединела ленге сине?

⁵ Те дикха јекх пример сар о Исус сикавѓа сочувство. Ки јекх прилика, о Исус хем лескере ученикија сине бут уморна соске проповединѓе бизо те одморинен пе. На сине лен чак „време ни те хан“. Адалеске о Исус викинѓа лен те џан ко јекх тхан коте со нане никој те шај те одморинен пе. Ама, о мануша дознајнѓе башо акава хем ресле ко адава тхан англедер те ресен о Исус хем лескере ученикија. Со керѓа о Исус кеда дикхља акале манушен? И Библија вакерела: „Пело леске жал * баши ленде, соске сине сар бакхре бизо пастири. Хем почминѓа те сикавел лен башо бут буќа“ (Мар. 6:30-34).

⁶ Соске е Исусеске сине жал башо акала мануша? Ов дикхља кај тане „сар бакхре бизо пастири“. Шај о Исус приметинѓа кај несаве таро адала мануша тане чороле хем кај мора те керен бут бути те шај те грижинен пе башо пле фамилијакере основна потребе. Шај несаве лендар сине бут тажна соске муло лендар некој сој ленге бут паше. Ако сине аѓаар, о Исус шај сине те хаљовел  ленгири ситуација. Сар со дикхлем ки англуни статија, шај е Исусе да сине ле слична проблемија. О Исус грижинела пе сине е јаверенге хем ов мангела сине те утешинел лен. (Читин Исаија 61:1, 2.)

7. Сар шај те џа пало е Исусескоро пример?

⁷ Со сикљоваја таро е Исусескоро пример? Околу аменде да иси мануша кола сој „сар бакхре бизо пастири“. Иси лен бут проблемија. Амен иси амен баш адава со ваљани ленге — о шукар хабери башо е Девлескоро Царство (Отк. 14:6). Исто сар амаро Учители, амен да проповединаја о шукар хабери адалеске сој аменге жал околенге сој ки лошно ситуација хем мангаја те поможина ленге (Пс. 72:13).

8. Кова тано јекх начин сар шај те сикава сочувство ки служба? Вакер пример.

⁸ Со шај те поможинел аменге те сикава сочувство е манушенге со проповединаја? Ваљани те трудина амен те чхива амен ко ленгоро тхан хем те понашина амен ленцар исто сар со би мангаја ола те понашинен пе аменцар * (Мат. 7:12). Те дикха штар начинија сар шај те кера адава. Прво, размислин башо потребе секоле јекхескере. Те дикха јекх пример: Јекх шукар доктори размислинела башо потребе секоле пациентескере. Ов пучела некобор пучиба е пациенте хем шунела ле шукар џикоте вакерела леске сар осетинела пе. Наместо одма те дел ле терапија, о доктори шај ка одлучинел несаво време те дикхел саве симптомија иси е пациенте хем пало адава те дел ле и терапија со одговоринела леске. Кеда проповединаја, амен да иси амен слично улога сар адава доктори. На ваљани те користина секогаш исто метода кеда почминаја те кера лафи е манушенцар ки служба. Наместо адава, ваљани те трудина амен те хаљова о околностија хем о ставија секоле јекхескере.

9. Со на ваљани те кера џикоте сием ки служба?

⁹ Кеда проповединеа несаве манушеске, ма мислин одма кај џанеа ко саве околностија тано, ко со верујнела хем соске верујнела ко адава (Изр. 18:13). Наместо адава, пробин те дознајне нешто повише башо адава мануш адалеа со ка пуче ле тактична пучиба (Изр. 20:5). Ако ки тли култура тано нормално, шај те пуче ле нешто баши бути, баши фамилија, башо лескоро потекло или со мислинела баши несави бути. Аѓаар мукхаја коркори ола те вакерен аменге со мучинела лен. Адава ка поможинел аменге те џана сар те сикава ленге сочувство хем те да лен и помош која со ваљанела ленге. Аѓаар џаја пало е Исусескоро пример. (Споредин 1. Коринќаните 9:19-23.)

10-11. Спрема 2. Коринќаните 4:7, 8, кова тано о дујто начин сар шај те сикава сочувство? Вакер пример.

¹⁰ Дујто, пробин те замислине туке саво тано о живото е манушенгоро. Џинегде  шај те хаљова е манушен со аракхаја лен ки служба. Амен да сием несовршена хем иси амен слична проблемија (1. Кор. 10:13). Џанаја кај о живото ко акава свето шај те овел бут пхаро. Ама, амен издржинаја само адалеске со о Јехова поможинела аменге. (Читин 2. Коринќаните 4:7, 8.) Ама, размислин башо мануша ко свето со на пенџарена е Јехова, сигурно ленге бут пхаро те икљовен ко крајо е проблеменцар бизи лескири помош. Исто сар о Исус амен да жалинаја лен хем адалеске мангаја те вакера ленге о шукар хабери (Иса. 52:7).

¹¹ Те дикха о пример јекхе пхралескоро со викинела пе Сергеј. Англедер те џанел башо чачипе, о Сергеј сине бут лаџутно хем сине леске пхаро те керел лафи е јаверенцар. Ов почминѓа те проучинел и Библија. О Сергеј вакерела: „Џикоте проучинава сине и Библија, сиклиљум кај о христијања ваљани те керен лафи е јаверенцар баши пумари вера. Мислинава сине кај ме никогаш нашти те керав адава“. Ама, ов размислинела сине башо адала кола со на шунѓе панда башо чачипе хем шај сине те замислинел песке саво тано ленгоро живото бизо Јехова. „О неве буќа со сиклиљум џикоте проучинава сине керена ман сине бахтало хем осетинава сине мир. Халиљум кај о јавера да ваљани те шунен акала чачипа.“ Сар со овела сине посочувствително, о Сергеј сине похрабро те проповединел. Ов вакерела: „На мислинѓум кај адава со ка керав лафи е јаверенцар баши Библија, ка керел те овав посигурно ки манде. Исто аѓаар, акала верувања панда повише кхувѓе манге ко вило“. *

12-13. Соске ваљани те ова стрплива адаленцар со проучинаја и Библија? Вакер пример.

¹² Трито, ов стрпливо околенцар со сикавеа лен баши Библија. Ма бистре кај ола шај никогаш на размислинѓе башо несаве библиска чачипа кола со амен џанаја лен шукар. Исто аѓаар, бут џене тане увериме ко пле верувања. Шај мислинена кај ако мукхена пле верувања, адалеа ка откажинен пе тари пли фамилија, култура или потекло. Сар шај те поможина ленге?

 ¹³ Размислин баши акаја споредба: Со керела пе кеда јекх пурано мости тано ки лошно состојба хем ваљани те менинел пе? Бут пути, џикоте градинела пе о нево мости, о пурано панда користинела пе. Откеда ка завршинел пе о нево мости, тегани шај те рушинел пе о пурано. Ко слично начин, англедер те вакера е манушенге кај ваљани те мукхен о „пуране“ верувања кола со значинена ленге бут, прво ваљани те поможина ленге те џанен хем те манген о „неве“ чачипа — о библиска сикљојба кола со англедер на џанена лен сине. Само тегани ола ка овен спремна те мукхен пле пуране верувања. Ама баши акаја промена шај ка ваљани време (Рим. 12:2).

14-15. Сар шај те поможина околенге со џанена хари или со на џанена ништо баши надеж башо вечно живото ко рај ки Пхув? Вакер пример.

¹⁴ Ако сием стрплива е манушенцар ки служба, нане те очекујна кај ка хаљовен или ка прифатинен о чачипе панда таро прво пути кеда ка шунен ле. Наместо адава, о сочувство ка поттикнинел амен те поможина ленге хари по хари те хаљовен о чачипе таро е Девлескоро Лафи. На пример, размислин сар шај те поможине некаске те хаљовел кај о мануша ка живинен вечно ко рај ки Пхув. Бут џене шај џанена хари или на џанена ништо башо адава. Ола шај верујнена кај е мерибаја завршинела са. Или шај мислинена кај са о шукар мануша џана ко небо. Сар шај те поможина ленге?

¹⁵ Аке сар јекх пхрал керела адава. Прво, читинела 1. Мојсеева 1:28. Пало адава, пучела коте хем ко саве условија о Девел мангља о мануша те живинен. Бут мануша одговоринена: Ки Пхув, ко шуже условија. Тегани читинела Исаија 55:11 хем пучела лен дали е Девлескири намера менинѓа пе. Бут пути о станарија вакерена на. Ко крајо, о пхрал читинела Псалм 37:10, 11 хем пучела лен сави иднина ка овел е манушен. Ко асавко начин, ов поможинѓа несаве манушенге те хаљовен кај е Девле сине ле намера о шукар мануша те живинен вечно ко рај ки Пхув.

16-17. Ако размислинаја башо лафија сој пишиме ко Изреки 3:27, ко саве начинија шај те сикава сочувство? Вакер пример.

¹⁶ Штарто, размислин сар шај те сикаве е манушенге кај грижинеа тут ленге. На пример, со ако алем ко време кеда о станари тано зафатимо? Шај те извинина амен леске хем те договорина амен леа те ава палем кеда ка овел слободно. Со ако е станареске ваљани помош баши несави тикни бути ко кхер? Или со ако нашти те икљол таро кхер а ваљани леске помош сар на пример, те платинел пе несави сметка или те кинел пе леске нешто? Дали шај ко асавке ситуацие те поможина? (Читин Изреки 3:27.)

¹⁷ Јекхе пхења сине ла бут шуже резултатија тари јекх тикни љубезно постапка. Поттикними таро сочувство, пишинѓа писмо јекхе брачно пареске со муло ленгоро бебе. Ко писмо, и пхен цитиринѓа некобор стихија тари Библија те шај те утешинел лен.  Сар реагиринѓа о брачно пари? И дај пишинѓа акале пхењаке: „Ерати осетинава ман сине бут лошно. Нашти те замислине туке сар влијајнѓа о писмо упри аменде. Нане ман лафија коленцар со шај те благодаринав туке хем те вакерав туке кобор утешинѓан амен. Ерати читинѓум ле најхари 20 пути. Сиум сине изненадими кобор љубезна, утешна хем охрабрувачка сине тле лафија. Благодаринаја туке таро вило!“ Сигурно шај те овен амен шукар резултатија ако трудинаја амен те хаљова е манушен со иси лен муке хем кераја нешто те шај те поможина ленге.

18. Спрема 1. Коринќаните 3:6, 7, кова исправно стави ваљани те овел амен?

¹⁸ Џанѓола пе, на ваљани те аџикера амендар превише ки служба. Иако поможинаја е манушенге те запознајнен е Девле, на ваљани те бистра кај о Јехова тано адава со привлечинела е манушен ки песте (Читин 1. Коринќаните 3:6, 7; Јован 6:44). Исто аѓаар, секова мануш реагиринела ко шукар хабери спрема адава сој леске ко вило (Мат. 13:4-8). Ма бистре кај, иако о Исус сине о најбаро Учители со живинѓа некогаш, сепак бут мануша на прифатинѓе лескири порака. Адалеске на ваљани те обесхрабрина амен ако бут мануша коленге со мангаја те поможина на прифатинена о шукар хабери.

19. Саве шукар резултатија шај те овен амен ако сикаваја сочувство ки служба?

¹⁹ Ка овен амен шукар резултатија ако сием сочувствителна кеда проповединаја. Ка уживина повише ки служба. Ка ова побахтале адалеске со сием дарежлива. А околенге со дикхена исправно ко вечно живото ка овел полокхо те прифатинен о шукар хабери (Дела 13:48). Адалеске „џикоте иси амен прилика башо адава, те кера шукарипе сариненге“ (Гал. 6:10). Аѓаар ка фалина амаре Даде сој ко небо, а адава ка керел амен бут бахтале (Мат. 5:16).