1. Koja tani jekh andi e Isusesi najšuži osobina?

JEKH kotar najšuži e Isusesi osobina tani i sposobnost te haljol o problemija kola isi ljen o nesavršena manuša. Ked hine ki Phuv, radujindža pe okoljencar kola radujinena pe hem rundža okoljencar kola rovena (Rim. 12:15). Na primer, ked oljese 70 učenikija irindže pe andi služba radosna, „o Isus prekalo o sveti duh pherdilo bahtaljipaja“ (Luka 10:17-21). Kotar aver strana, „hine ljese but pharo hem hine tužno“ ked dikhlja kobor e Lazareso meribe pogodindža okoljen kola manglje lje (Jov. 11:33).

2. So pomožindža e Isusese te mothovi saosećanje premalo manuša?

² Iako o Isus hine savršeno manuš, ov hine milosrdno hem saosećajno premalo o nesavršena hem grešna manuša. So pomožindža lje te ovel asavko? Sar prvo, o Isus manglja e manušen. Ko članko kova proučindžam angljeder vačerdžam odoljestar so o manuša najviše andže ljese bahtaljipe (Godž. 8:31). Hem odoljese so odobor manglja e manušen, dindža sa pestar te haljol sar o manuša razmislinena. O apostol Jovan vačerdža so o Isus „džandža so o manuš isi lje ko vilo“ (Jov. 2:25). O Isus mothodža baro saosećanje premalo manuša. Hem o manuša osetindže so ov mangela oljen hem odoljese ando vilo manglje te šunen o šukar haberi ando e Devljeso Kraljevstvo. Isto adžahar, ako hem amen mothovaja asavko saosećanje premalo manuša, ka ova pouspešna ki služba (2. Tim. 4:5).

3-4. (a) Sar ka dikha ki amari služba ako isi amen saosećanje? (b) Sostar ka vačera ko akava članko?

³ Hem amen sar o apostol Pavle džanaja so hijam dužna te propovedina (1. Kor. 9:16). Ama, ako hijam saosećajna premalo manuša, amari služba na ka dikha sar dijekh obaveza. Ka propovedina sose mangaja e manušen hem sose  mangaja te pomožina ljen. Amen džanaja so „pobuter isi bahtaljipe ked dela pe nego ked ljela pe“ (Čer. 20:35). Odoljese, ked amen propovedinaja e manušendže sose mangaja te pomožina oljendže, tegani pana pobuter ka uživina ki služba.

⁴ Ko akava članko ka dikha sar šaj te mothova saosećanje premalo o manuša koljen resaja ki služba. Najangljeder ka dikha so šaj te sikljova ando Isus, a palo odova ka dikha ko kola štar načinja šaj te mothova saosećanje premalo manuša (1. Petr. 2:21).

5-6. (a) Premalo kaste o Isus mothodža saosećanje? (b) Sar so hine vačerdo ko Isaija 61:1, 2, sose o Isus sažalindža pe upro manuša koljendže propovedindža?

⁵ Ajde te dikha jekh primer kobor o Isus hine saosećajno. Jekh puti, ov hem oljese učenikija hine but umorna sose propovedindže bizo te odmorinen pe. Na hine ljen vreme „ni maro te han“. Odoljese, o Isus ljegardža pe učenikon ko jekh than kuri šaj hine te oven kokri hem te šaj hari te odmorinen pe. Ama, jekh bari grupa manuša sigate alje ko odova than hem reslje angljeder oljendar. Sar o Isus osetindža pe hem so ov čerdža ked dikhlja sa odoljen manušen? Ov „sažalindža * pe upro ljende, sose hine sar bakre bizo pastiri. Hem počmindža te sikavi ljen ando but buča“ (Mar. 6:30-34).

⁶ Sose o Isus sažalindža pe upro odola manuša? Ov vačerdža so on hine „sar bakre bizo pastiri“. Šaj o Isus dikhlja so disave oljendar tane čorore ja so čerena but phari buti te šaj te parvaren peklje porodica. Šaj dijekh manuš kas but manglje mulo oljendar. Ako tano odova adžahar, o Isus verovatno šaj hine te haljol ki savi situacija tane on. Sar so dikhljam ko članko  kova proučindžam angljeder, šaj hem o Isus hine lje asavke problemija. Odoljese so manglja e manušen, odova podstaknindža lje te utešini ljen. (Čitinen Isaija 61:1, 2.)

7. So šaj te sikljova kotar e Isuseso primer?

⁷ So šaj te sikljova kotar e Isuseso primer? O manuša avdije, sar hem ko Isuseso vreme, tane sar „bakre bizo pastiri“. On borinena pe bute problemencar, a amen isi amen baš odova so oljendže valjani – o šukar haberi ando e Devljeso Kraljevstvo (Puč. 14:6). Odoljese so mangaja te ova sar amaro Učitelj, o Isus, amen propovedinaja o šukar haberi sose isi amen saosećanje premalo čorore hem premalo okola kola nane ljen nikas hem ništa (Ps. 72:13). Amendže tano but pharo ko vilo ked dikhaja soj tane ki asavki situacija hem odoljese mangaja te čera diso te šaj te pomožina ljen.

8. Kova tano o prvo način sar šaj te mothova saosećanje ki služba? Vačer jekh primer.

⁸ So ka pomožini amen te mothova saosećanje premalo manuša ki služba? Sar o Isus, hem amen mangaja te čhiva amen ko oljengo than hem premalo oljende te ponašina amen sar so bi mangaja on te ponašinen pe premalo amende * (Mat. 7:12). Ajde te dikha štar načinja sar šaj odova te čera. Sar prvo, valjani te razmislina so oljendže valjani. Amen šaj te uporedina odova so čeraja ked propovedinaja odoljeja so čerela jekh doktori te šaj te pomožini peklje pacijentendže. O šukar doktori razmislini odoljestar so valjani jekhe pacijentese. Postavini pučiba hem palo odova pažljivo šunela dži o pacijenti objasnini sar osetini pe. Asavko šukar doktori na ka pisini ljese leko kova prvo avela oljese ki godi. Šaj ka del lje te čerel disave analize te dikhel kova nabormipe isi lje hem tek palo odova ka odlučini sar te sačari lje. Isto adžahar, ki služba na ka koristina isto metoda svakone manušeja te šaj te počmina te vačera oljeja. Amen valjani te pokušina te haljova save tane e manušese okolnostija hem sostar o manuš razmislini.

9. So valjani te izbegina? Objasnin.

⁹ Ked svedočinaja dijekhe manušese, ma te mislina so odma džanaja save okolnostija isi lje, ko so verujini hem sose verujini ko odova (Godž. 18:13). Ako postavinaja taktična pučiba, tegani ka podstaknina e manuše kokri te vačeri amendže odova (Godž. 20:5). Ako tano odova ko than, puč lje andi oljesi buti, andi porodica hem ando avera buča te šaj te džane ko so ov verujini. Adžahar kokri o manuš ka vačeri tuče sose oljese valjani o šukar haberi. A ked odova džaneja, šaj saosećajno te pomožine lje ko odova so valjani oljese, sar  so čerdža o Isus. (Uporedin e stihonencar ando 1. Korintskonendže 9:19-23.)

10-11. Premalo 2. Korintskonendže 4:7, 8, kova tano o dujto način sar šaj te mothova saosećanje ki služba? Vačer jekh primer.

¹⁰ Sar dujto, pokušin te zamisline sar izgledini e manušengo dživdipe. Ko disavo način šaj te haljova ki savi situacija tane on. Hem amen hijam nesavršena hem isi amen ista problemija (1. Kor. 10:13). Amen džanaja kobor o dživdipe šaj te ovel pharo ko avdisutno vreme. Izdržinaja samo sebepi so o Jehova pomožini amen. (Čitinen 2. Korintskonendže 4:7, 8.) Ama, razmislin samo ando okola manuša kola borinena pe te preživinen ko akava sveto bizo e Jehovasi pomoć. Sar e Isusese, hem amendže tano but pharo sebepi odola manuša hem mangaja te vačera ljendže „o šukar haberi disostar soj tano pošukar“ (Isa. 52:7).

¹¹ Ajde te dikha o primer ando jekh phral kova vičini pe Sergej. Angljeder so pendžardža o čačipe, ov hine but ladžutno hem čutljivo. Hine ljese pharo te vačeri averencar. Hari palo odova, počmindža te proučini i Biblija. O Sergej phenela: „Dži proučindžum i Biblija, haljiljum so o hrišćanja mora te vačeren averendže ko so verujinena. Čače mislindžum so me odova niked našti te čerav.“ Ama, počmindža te razmislini okoljendar kola pana na šundže o čačipe hem haljilo kobor tano oljendže pharo sose na pendžarena e Jehova. Ov pana phenela: „Odova so sikljiljum andža maje bari radost hem hine man mir andre ko vilo. Džandžum so hem avera manuša valjani te pendžaren o čačipe andi Biblija.“ So pobuter osetindža saosećanje premalo manuša, pobuter hine lje hrabrost te propovedini oljendže. O Sergej isto phenela: „But iznenadindžum man so ked vačerdžum averencar andi Biblija hijum lje posigurno ano mande. Isto adžahar, odova pomožindža man te zorjačerav mi vera.“ *

12-13. Sose valjani te ova strpljiva okoljencar kasa proučinaja? Vačer jekh primer.

 ¹² Sar trito, ov strpljivo okoljencar kasa proučineja. Nek ovel tut ki godi so on na džanena odobor kotar Biblija kobor tu džaneja. But manuša čače mangena odova ko so verujinena. Isto adžahar, on dikhena ki religija sar diso so povezini ljen oljenge porodicaja, oljenge običajencar hem e manušencar kuri živinena. Ama, sar šaj te pomožina ljen?

¹³ Razmislin ando akava poređenje: So čerela pe ked jekh purano most kova mrdini, valjani te zamenini pe? Ov pana koristini pe sa dži na čerela pe o nevo most. A ked završini pe o nevo most, tegani o purano rušini pe. Isto adžahar, angljeder so o manuša fordena pe „purane“ verovanja, kola tane oljendže but vredna, prvo mora te pomožina ljen te pendžaren hem te mangen „o neve“ verovanja, e biblijake sikljoviba kola angljeder na džandže. Samo tegani ka oven spremna te forden o purane verovanja. Ama, te čeren asavke promene e manušendže valjani vreme (Rim. 12:2).

14-15. Sar šaj te pomožina okoljendže kola hari džanena andi nada ando večno dživdipe ko raj ki Phuv? Vačer jekh primer.

¹⁴ Ako hijam strpljiva e manušencar ki služba, tegani na ka očekujina o manuša odma te haljon ja te prihvatinen o čačipe andi Biblija. O saosećanje ka podstaknini amen strpljivo te pomožina e manušendže pohor te razmislinen ando odova so pisini ki Biblija. Na primer, ajde te dikha sar šaj te pomožina nekase te haljol e biblijako sikljovibe ando večno dživdipe ko raj ki Phuv. O manuša but hari džanena ando akava. Šaj verujinena so ked o manuš merela ov našti paljem te živini. Ja šaj verujinena so sa o šukar manuša džana upre ko nebo. Sar šaj te pomožina ljen?

¹⁵ Jekh phral objasnini sar ov pomožini e manušendže. Prvo čitini e manušese o stih ando 1. Mojsieso 1:28. Palo odova, pučela lje kuri hem savo dživdipe o Devel manglja o manuša te ovel ljen. But manuša phenena so o Devel manglja te oven bahtalje hem te živinen ki Phuv. Palo odova, čitini o Isaija 55:11 hem postavini pučibe da li e Devljesi namera menindža pe. O manuša but puča phenena na. Hem ko krajo, čitini o Psalam 37:10, 11 hem pučela e manuše, savi budućnost adžičeri amen. Dži adžahar vačeri e manušencar, ov pomožindža butendže te haljon so o Devel pana mangela o šukar manuša te živinen ko raj ki Phuv.

16-17. Ked razmislinaja kotar Godžalje lafija 3:27, ko kola načinja šaj te mothova saosećanje? Vačer jekh primer.

¹⁶ Sar štarto, razmislin so šaj te čere te mothove so brinineja tut e manušendar. Na primer, ako aljam ko disavo nezgodno vreme, valjani te izvinina amen hem te puča da li šaj te ava aver puti. So ako e manušese valjani disavi pomoć? Ja so ako džiko našti te ikljol ando čher  sose tano nabormo ja phuro, a valjani neko te džal dži ki prodavnica ja dži ki pošta? Ko asavke situacije šaj te pomožina odolje manuše. (Čitinen Godžalje lafija 3:27.)

¹⁷ Jekh phen čerdža diso šukar so na dičhilo odobor važno. Oj pisindža ljil jekha porodicače kolatar mulo o čhavo samo so bijandilo. Pisindža ljendže disave utešna stihija andi Biblija. Sar odova ljil utičindža upri akija porodica? I daj koja hine la but bari dukh ko vilo vačeri: „Erati hine man but pharo dive. Na hijan svesno kobor pomožindža man toklo ljil. Nane man lafija koljencar šaj te mothovav tuče kobor hijum zahvalno hem kobor odova ljil utešindža man. Erati čitindžum o ljil barem 20 puča. Neverovatno kobor odova ljil ohrabrindža amen. Viljestar phenaja ov sasti.“ Sigurno ka čera baro šukaripe ako trudinaja amen te čhiva amen ko oljengo than hem ako čeraja diso te pomožina ljen.

18. Premalo 1. Korintskonendže 3:6, 7, savi uloga isi amen ki služba?

¹⁸ Naravno, valjani te džana savi uloga isi amen ki služba. Amen pomožinaja e manušendže te pendžaren e Devlje, ama amen na čeraja o najvažno deo kotar akija buti. (Čitinen 1. Korintskonendže 3:6, 7.) O Jehova tano odova kova čerela o manuša te aven nakro oljeste (Jov. 6:44). Hem ko krajo, da li dijekh manuš ka prihvatini o šukar haberi ja na, zavisini ando odova so ov isi lje ko vilo (Mat. 13:4-8). Ma te bistra so but manuša na prihvatindže odova so o Isus sikadža ljen, a ov hine najšukar Učitelj kova ikada živindža! Odoljese, na valjani te obeshrabrina amen ako but manuša na mangena te prihvatinen o šukar haberi kova vačeraja.

19. Kova baro šukaripe ka ovel amen ako mothovaja saosećanje ki služba?

¹⁹ Amen ka čera baro šukaripe, ako mothovaja saosećanje ki služba. Pobuter ka uživina ki služba. Ka uverina amen so više isi bahtaljipe ked dela pe nego ked ljela pe. A okoljendže so mangena ko po vilo te prihvatinen o čačipe kova ljegari ko večno dživdipe ka ovel polokho te šunen o šukar haberi (Čer. 13:48). Odoljese „dži isi amen prilika, te čera šukaripe sarinendže“ (Gal. 6:10). Ka ova pobahtalje sose džanaja so adžahar slavindžam amare Dade kova tano ko nebo (Mat. 5:16).