1. Yesuusa banxeemmo gede assannonke coyi giddo mittu maati? Xawisi.

YESUUSA banxeemmo gede assannonke coyi giddo mittu, isi guuntete xeˈne noonsari mannu oosora tuncu yaannonsa qarra huwatannoha ikkasiiti. Isi uullate aana noo yannara, “hagiidhitannori ledo [hagiidhino]”; hattono “wiˈlitannori ledo [wiˈlino].” (Rom. 12:15) Lawishshaho, 70 rosaanosi sabbakate loosinsanni dancha guma afidhe hagiidhitanni higgu yannara, Yesuusi “Qullaawu Ayyaaninni [hagiidhino].” (Luq. 10:17-21) Wole widoonni qole, Aliaazaari reyi yannara shiiˈrino ayiddi xissiisiˈrino gara lae Yesuusi “lowo geeshsha marare cinca hooge” wiˈlino.—Yoh. 11:33.

2. Yesuusi manna mararanno gede assinosiri maati?

² Kuni guutu manchi, cubbaataamma ikkitinota mannu ooso maarannonna mararanno gede assinosiri maati? Qaru korkaati, Yesuusi manna baxanno daafiraati. Sai birxichira ronsummonte gede, isi “mannu sirchinni [hagiidhino].” (Law. 8:31) Mannaho noosi baxilli wolootu hedo seekke huwatanno gede assinosi. Soqqamaasinchu Yohaannisi “Isi mannu wodanire baala egennino” yiino. (Yoh. 2:25) Yesuusi manna godowinta mararanno. Yesuusi sabbakinonsa manni isi baxannonsata huwatino daafira, kulinonsa sokka macciishshino. Mannaho noonke baxilli lexxanni haˈri kiiro, sabbakate loosinkenni roore guma afiˈneemmo.—2 Xim. 4:5.

3-4. (a) Manna mararreemmoha ikkiro, sabbakate loosinkera hiittoo lao heedhannonke? (b) Konni birxichira maa ronseemmo?

³ Soqqamaasinchu Phaawuloosi dancha duduwo duduwate giddeeti noosita afino; ninkeno hatto assa hasiissannonketa anfoommo. (1 Qor. 9:16) Ikkollana manna mararreemmoha ikkiro sabbankeemmohu togo assa hasiissannonke daafira calla ikkikkinni mannaho hendeemmonna insa kaaˈla hasiˈneemmo  daafiraati. ‘Adhannonkunni aannohu baˈraaˈrinoha [woy hagiirraamo]’ ikkinota anfoommo. (Soq. 20:35) Sabbankeemmohu manna kaaˈla hasiˈneemmo daafira ikkiro, soqqanshonkenni roore hagiirraamma ikkineemmo.

⁴ Konni birxichira, soqqammeemmo woyite manna marara dandiineemmo gara ronseemmo. Balanxe Yesuusi manna mararino doogonni maa ronseemmoro laˈneemmo. Hakkiinni isi lawishsha harunsa dandiineemmota shoole doogga xiinxallineemmo.—1 Phe. 2:21.

5-6. (a) Yesuusi ayeoo mararino? (b) Isayaasi 61:1, 2te masaalloonni garinni, Yesuusi sabbakino manna mararinohu mayiraati?

⁵ Hanni Yesuusi manna mararannota leellishanno lawishsha laˈno. Mitto barra Yesuusinna rosaanosi dancha duduwo fooliishshidhukkinni sabbakkanni hossino. Wole agurina insa “sagale ittanno gara” nafa hooggino. Konnira Yesuusi ‘fooliishshidhanno’ gede “mannu nookkiwa” haaˈre haˈrinonsa. Ikkollana Yesuusinna rosaanosi hadhannowa batinyu manni balaxe iillino. Yesuusi hakkira marita mayi macciishshaminosi? Isi “lowo manni allaalaanchu nookki geˈreewi gede ikkinota lae marare, * lowo coye rosiisinsa.”—Maq. 6:30-34.

⁶ Yesuusi konne manna mararinohu mayiraati? Isi kuni manni “allaalaanchu nookki geˈreewi gede ikkinota” coyiˈrino. Yesuusi konni manni giddo mitu buxane ikkinotanna maatensara hasiisannore abbate lowo saate loosannota huwatinoha ikkara dandaanno. Qoleno wolootu shiidhe manchittinoha ikkara dandaanno. Hatto ikkiro, Yesuusira qarrinsa leellannosi. Sai birxichira ronsummonte gede, Yesuusi umisira konni giddo mitu qarri iillinosiha ikkara dandaanno. Isi mannaho hedanno daafira, insara sheshifachishshanno sokka kulate hedino.—Isayaasi 61:1, 2 nabbawi.

7. Yesuusi lawishsha harunsa dandiineemmohu hiittoonniiti?

⁷ Yesuusi lawishshinni maa ronseemmo? Yesuusi gede ninkeno “allaalaanchu nookki  geˈreewi gede ikkino” manni mereero heeˈnoommo. Insara lowo qarri iillannonsa. Qoleno ninkera insara hasiisanno coyi noonke; hattino Maganu Mangiste sokkaati. (Aju. 14:6) Konnira, ‘buxanenna wolqiweeloota mararreemmo’ daafira, Mootichinke lawishsha harunsine dancha duduwu dudumbeemmo. (Far. 72:13) Hattono mannaho hendeemmo daafira, insa kaaˈla hasiˈneemmo.

8. Soqqammeemmo woyite manna marara dandiineemmo doogga giddo mitte maati? Lawishsha kuli.

⁸ Sabbankeemmo manna mararreemmo gede mayi kaaˈlankera dandaanno? Sabbankeemmo woyite xaandeemmo mannira iillannonsa coyi ninkera iillanni noonkehu gede assine hedanna ninkera assinankera hasiˈneemmore insarano assa hasiissannonke. * (Mat. 7:12) Hanni togo assa dandiineemmota shoole doogga laˈno. Umihunni, mittu mittunkura mayi hasiisannoro hedi. Sabbakate loosi, akimootu loossanno loosi gedeeti. Danchu akimichi mittu mittunku dhiwamino manchira mayi hasiisannoro hedanno. Isi xaˈmo xaˈmanno, hattono dhiwamino manchi assinosita kuˈlanno woyite seekke macciishshanno. Isi hedino xagicho sammi yee dihajajanno; hatteentenni boode yanna geeshsha dhiwamino mancho amadinosi dhibba huwatate woˈnaalanno; hakkiinni hasiisannosi xagicho hajajanno. Hatteente gede, ninkeno soqqammeemmo woyite manna baala mittu garinni hasaawisa dihasiissannonke. Hatteentenni mittu mittunku manchi noo garanna ammananno coye huwatate woˈnaala hasiissannonke.

9. Mayine heda dihasiissannonke? Xawisi.

⁹ Soqqantinanni heedhine mittu manchi ledo xaaddinanni woyite, hakku manchi noo gara, isi ammanannore, hattono hakko coye mayira ammanannoro guddine affinoonnihu gede assitine heddinoonte. (Law. 18:13) Hatteentenni hayyoteni xaˈmo xaˈmitine hedosi afate woˈnaalle. (Law. 20:5) Qooxeessiˈnera rosaminore ikkiro, loosisi daafira, maatesi daafira, heeshshosi giddo tuncu yiinosire, hattono ammanannore xaˈma dandiitinanni. Mannu hedonsa kulannonke gede xaˈmineemmo woyite, danchu duduwi hasiisannonsahu mayiraatiro kultannonke gede xaˈminanni heeˈnoommohu gedeeti. Tenne anfummo gedensaanni, Yesuusi gede insara hendeemmota leellishanna hasiissannonsa kaaˈlo kaaˈla dandiineemmo.—1 Qorontoosi 9:19-23te ledo heewisiisi.

10-11. Layinki Qorontoosi 4:7, 8te garinni, Manna marara dandiineemmoti layinki doogo hiittenneeti? Lawishsha kuli.

¹⁰ Layinkihunni, hiittoo heeshsho heedhannoro hedate woˈnaali. Woˈmunni woˈma ikka hoogirono soqqammanni xaandeemmo manni hedo huwata dandiineemmo. Korkaatuno guuntete xeˈne noonkere ikkinoommo daafira,  ninkerano wolu mannira iillannonsa qarri iillannonke. (1 Qor. 10:13) Heeˈnoommo alame giddo heeshsho qarru woˈminota ikkitinota anfoommo. Cincine heeˈra dandiineemmohu Yihowa kaaˈlonni callaati. (2 Qorontoosi 4:7, 8 nabbawi.) Ikkollana Yihowa ledo muli jaalooma kalaqirinokki mannira tenne alame giddo iillannonsa fonqolo dandee heeˈra mageeshshi geeshsha qarra ikkitannonsaro hedi. Yesuusi gede, ninkeno mararreemmonsa, hattono insara “dancha duduwo” kula hasiˈneemmo.—Isa. 52:7.

¹¹ Hanni Serge yinanni rodii lawishsha laˈno. Serge halaale rosara albaanni manna ille qase laˈˈa waajjannohonna sammiimaho. Isira hedosi mannaho xawisa qarra ikkitannosi. Gedensoonni isi Qullaawa Maxaafa xiinxalla hanafino. Serge togo yiino: “Qullaawa Maxaafa xiinxallummoti, Kiristaanu ammanansa wolootaho kula hasiissannonsata rosummo. Ani kayinni hatto assa horo didandeemmo yee hedummo.” Ikkirono isi halaale rosinokki manna hedino, hattono kuni manni Yihowa daafira afinokkihura heeshshonsa mageeshshi geeshsha qarraataame ikkitannoro hedino. Isi togo yiino: “Rosanni noommohu haaru rosi lowo hagiirrenna giddiidi harshammo afiˈreemmo gede assinoe. Wolootuno konne halaale rosa hasiissannonsata huwatoommo.” Serge manna albinni roore marara hanafiti, sabbakate roore worbimma afiˈranni haˈrino. Isi togo yiino: “Wolootaho Qullaawa Maxaafa rosiisaˈya waajjeemmokki gede kaaˈlitinoe. Qoleno hatto assaˈya ammanaˈya kaajjitanno gede assitinoe.” *

12-13. Soqqammeemmo yannara cincineemmore ikka hasiissannonkehu mayiraati? Lawishsha kuli.

¹² Sayikkihunni, manna rosiisatto woyite cinca ikki. Soqqamatto woyite xaadatto manni giddo mitu, ninke seekkine anfoommoha mito Qullaawu Maxaafi halaale insa horo afinokkiha ikkara dandaanno. Qoleno batinyu mannira uminsahu ammananno coyi noonsa. Hattono ammanansa maatensa, budinsanna dagoominsa ledo noonsa aante kaajjishshannohu gede asse hedanno. Ikkina insa kaaˈla dandiineemmohu hiittoonniiti?

 ¹³ Hanni konne coye hedi: Mittu buusi akkalino daafira wole kara hasiˈniro maa assinanni? Duucha woyite mannu albi buusa horoonsiˈranni heeˈreenna, wole haaro buusa karranni. Haaro buusa karre gundi gedensaanni, akkala hoola dandiinanni. Hatteente gede, mannu “akkala” rosonsa aguranno gede kullammora albaanni, balanxe xa rosanni nooha “haaro” roso yaano konni albaanni afinokkiha Qullaawu Maxaafi halaale seekke huwatanno gede assa hasiissanno. Konni albaanni noonsa lao biddi assiˈra dandiitannohu, hatto assinummoro callaati. Mannu konni garinni hedonsa biddi assiˈranno gede kaaˈlate yanna hasiissanno.—Rom. 12:2.

14-15. Gannate ikkitino uullara hegerera heeˈrate hexxo daafira afinokki manna kaaˈla dandiineemmohu hiittoonniiti? Lawishsha kuli.

¹⁴ Sabbankeemmo woyite manna cincineemmoha ikkiro, Qullaawu Maxaafi halaale macciishshitanni heedhenni adhitanno yine dihendeemmo. Hatteentenni, manna mararreemmoha ikkiro Qullaawu Maxaafi roso sunu sununni huwatanno gede kaaˈlineemmo. Lawishshaho, hanni uullate aana Gannatete heeˈrate hexxonke daafira mannaho xawisa dandiineemmo gara hedi. Batinyu manni konni rosi daafira garire diafino; mitootu isinni tenne hexxo daafira affinori dino. Insa reyo baalunku coyira gumulote yite heddannoha ikkara dandaanno. Woy danchu manni baalu iimira haˈranno yite ammantannoha ikkara dandaanno. Togoo manna kaaˈla dandiineemmohu hiittoonniiti?

¹⁵ Mittu rodii gannate ikkitino uulla aana hegerera heeˈrate daafira mannaho xawisanno gara coyiˈrino. Isi balaxe Kalaqama 1:28 nabbawanno. Hakkiinni hasaawisanni noo mancho Maganu mannu ooso hiikko heedharanna hiittoo heeshsho heedhara hasiˈrannoro xaˈmanno. Batinyu manni “Uullate aana hagiirru noo heeshsho heedhara hasiˈranno” yee qolanno. Hakkiinni kuni rodii Isayaasi 55:11 nabbawi gedensaanni “Maganu hedinori xa soorraminoni?” yee xaˈmanno. Duucha woyite mannu “Disoorramino” yee qolanno. Jeefote isi Faarso 37:10, 11 nabbawi gedensaanni mannu ooso albillitte ma ikkitannoro xaˈmanno. Isi kuri qummeeshshuwa horoonsiˈre, Maganu xaano danchu manni Gannate ikkitino uullara hegerera heeˈrara hasiˈrannota huwatanno gede batinye manna kaaˈlino.

16-17. Lawishsha 3:27 kultanno garinni, manna mararreemmota leellisha dandiineemmoti mite doogga hiikkuriiti? Lawishsha kuli.

¹⁶ Shoolkihunni, Danchumma leellisha dandaatto gara hedi. Lawishshaho, mannu minira maroottohu insara injiitannokki yannara ikkara dandaanno. Togoo yannara, maaro xaˈmidhe wole woyite daattota kulte haˈra dandaatto. Woy farciˈrattora marootto manchira kaaˈlinanni loosi noohalla ikki? Woy mittu mininni fule afannokki manchi soqqannoha hasiˈrannohalla ikki? Togoo manninni xaandeemmo woyite kaaˈlinammonsara dandiineemmo.—Lawishsha 3:27 nabbawi.

 ¹⁷ Mitte rodoo danchumma leellishshe dancha guma afidhino. Ise mitte qaaqqo shiidhino maate marartino daafira, sokka borreessitinonsa. Ise sokkate giddo mite sheshifachishshannota Qullaawa Borro hedo borreessitino. Ikkina hatte maatera mayi macciishshaminonsayya? Qaaqqu ama togo yitino: “Beˈro barru tunse hosinoe. Soottanke sokka baasa kaaˈlitinonke. Sheshifachishshanno sokka soottanke daafira, lowo geeshsha galaxxeemmahe. Tenne sokka ajayi ajeenna 20 hige nabbawummakki digatoomma. Tini sokka danchummanna shaqqillu woˈminote, jawaachishshannotenna sheshifachishshannote. Godowinta galaxxineemmohe.” Wolu manni qarra uminkehu gede assine laˈneemmohanna insa kaaˈlineemmoha ikkiro, dancha guma afiˈneemmoti egennantinote.

18. Umi Qorontoosi 3:6, 7te garinni, soqqanshonke daafira maa qaaga hasiissannonke?

¹⁸ Soqqammeemmo woyite, ninke qeechi maatiro dea dihasiissannonke. Wolootu Maganu daafira rossanno gede kaaˈla dandiineemmoha ikkirono, qaru loosi kayinni ninkeha diˈˈikkino. (1 Qorontoosi 3:6, 7 nabbawi.) Manna minisira abbannohu Yihowaati. (Yoh. 6:44) Mittu mittunku manchi wodanisi garinni dancha duduwo macciishshe adhara woy hoogara dandaanno. (Mat. 13:4-8) Uullate aana heeˈrino manni baalunkunni roore Rosiisaancho ikkirono, batinyu manni Yesuusi sokka macciishshinokkita qaagi. Konni daafira, batinyu manni dancha duduwo macciishsha giwiro hexxo mudha dihasiissannonke.

19. Soqqammeemmo yannara manna mararanke kaaˈlitannonkehu hiittoonniiti?

¹⁹ Soqqammeemmo woyite manna mararreemmoha ikkiro, dancha guma afiˈneemmo. Hatto assinummoro, sabbakate loosi albinni roore baxisannonke. Qoleno mannaho uyine afiˈnanni hagiirre afiˈneemmo. Hattono “hegere heeshsho afiˈrate gara ikkitinoti wodanu dooˈˈo noonsari” dancha duduwo macciishshite adhitanno gede kaaˈlineemmo. (Soq. 13:48, NW) Konnira, “Coyi injiinkero, manna baalaho . . . dancha coye assino.” (Gal. 6:10) Hatto assinummoro, iimi Anninke ayirranno daafira tashshi yaannonke.—Mat. 5:16.