1. Andi da wan u dee fasi u Jesosi di sëmbë ta möön lobi?

WAN u dee fasi di Jesosi abi, di sëmbë ta lobi, da di fusutan di a ta fusutan zöndu libisëmbë. Di Jesosi bi dë a goonliba aki, a bi ta ’wai ku dee sëmbë dee bi ta wai’, nöö a bi ta ’këë ku dee sëmbë dee bi ta këë’ (Lom. 12:15). Di dee 70 bakama fëën di a bi manda go peleiki bi toona ko nëën ko piki ën unfa soni bi waka bunu da de tjika, hën ’di santa jeje u Gadu bi mbei Jesosi ko wai tee na soni’ (Luk. 10:17-21). Ma di a bi si unfa dee sëmbë bi ta tjali u di Lazalosi bi dëdë, hën a „fukëën nëën hati gaanfa te a fika piki an sa hoi ën seei möön”.​—Joh. 11:33.

2. Unfa a du waka taa Jesosi bi sa fii da sëmbë?

² Unfa a du waka taa Jesosi bi ta fii da zöndu libisëmbë sö gaanfa, hii fa an bi abi zöndu? Wë di fosu soni, hën da u di a lobi sëmbë. Kumafa u bi taki a di woto di u bi luku ufö disi, nöö u bi si taa Jesosi bi „lobi libisëmbë gaanfa seei” (Nöng. 8:31). Di lobi di a bi lobi sëmbë, bi heepi ën faa ko fusutan unfa libisëmbë ta pakisei. Apösutu Johanisi bi taki taa: ’A bi sabi hii soni di dë a libisëmbë hati’ (Joh. 2:25). Jesosi bi ta fii da sëmbë. Dee sëmbë bi ta fii taa a lobi de, nöö de bi ta haika di Könuköndë bosikopu di a bi ta paaja. Möön u ko ta fii da sëmbë, möön sëmbë o ta kë ta haika u te u ta peleiki da de.​—2 Tim. 4:5.

3, 4. (a) Unfa woo ta si di peleikiwooko te u ta fii da wotowan? (b) Andi woo luku a di woto aki?

³ Apösutu Paulosu bi sabi taa a bi musu peleiki da sëmbë, nöö useei sabi taa u musu ta peleiki da sëmbë tu (1 Kol. 9:16). Ma ee u ta fii da sëmbë, nöö wa o ta si di peleikiwooko kuma wan soni di u musu du nöö a kaba, ma woo kë lei taa u ta booko u hedi ku sëmbë, söseei taa u kë heepi de. U sabi taa „dee sëmbë ta da sëmbë soni, de dë waiwai möön leki dee sëmbë ta  feni” (Tjab. 20:35). Te u ta peleiki u di u kë heepi sëmbë, nöö woo ta möön lobi di peleikiwooko.

⁴ A di woto aki, woo luku unfa u sa lei taa u ta fii da dee sëmbë dee u ta peleiki da. Di fosu soni di woo luku, hën da di soni di u sa lei a di fasi fa Jesosi bi ta si sëmbë. Baka di dë, nöö woo luku fö fasi fa u sa djeesi ën.​—1 Pet. 2:21.

5, 6. (a) Ambë Jesosi bi lei taa a ta fii da? (b) Andi bi mbei Jesosi bi ta fii da dee sëmbë dee a bi ta peleiki da, te u luku di soni di sikifi a Jesaaja 61:1, 2?

⁵ Luku unfa Jesosi bi lei taa a bi ta fii da sëmbë. Wan daka, Jesosi ku dee bakama fëën bi paaja di bunu buka sö tee taa sinkii u de bi ko wei u di de an bi böö möönsö. De an bi ’feni pasi u njan seei’. Fëën mbei Jesosi bi tja dee bakama fëën ’go a wan pii kamian de wanwan, ka sëmbë an dë, u de sa böö pikisö’. Ma wanlö gaan hia sëmbë bi go ta wakiti Jesosi ku dee bakama fëën a di kamian ka de bi o go. Unfa Jesosi bi fii di a bi si dee hia sëmbë dë, nöö andi a bi du? A bi „go ta lei de sömëni soni möön, biga tjali u de kisi ën. * A si taa de dë kuma wanlö hia sikafu söndö tiima ta waka ta daama nango ta ko”.​—Maik. 6:30-34.

⁶ Faandi mbei Jesosi bi ta fii da dee sëmbë dë? A bi si taa dee sëmbë dë bi „dë kuma wanlö hia sikafu söndö tiima”. Kandë Jesosi bi si taa so u dee sëmbë dë bi pooti, söseei taa de bi ta wooko taanga u sölugu dee sëmbë u de. Kandë sëmbë u de bi lasi libi. Ee sö a bi dë, nöö a sa kan taa Jesosi bi ta fusutan fa di libi bi hebi da de tjika. Kumafa u bi taki a di woto ufö disi, nöö kandë so u dee soni aki bi miti Jesosi tu. Jesosi bi ta booko hën hedi ku wotowan, nöö a bi kë konda soni da de di sa da de kötöhati.​—Lesi Jesaaja 61:1, 2.

7. Unfa u sa djeesi Jesosi?

⁷ Andi u ta lei u Jesosi? Wë useei ta libi a wan ten ka sömëni sëmbë „dë kuma wanlö hia sikafu söndö tiima”. Sömëni soni ta miti de.  Wë dee sëmbë aki musu jei soni u di bunu buka u di Könuköndë (Ako. 14:6). Fëën mbei useei ta konda di bunu buka da sëmbë, leti kumafa Jesosi bi ta du ën, u di u „abi tjalihati u dee möfina sëmbë ku dee pooti sëmbë” (Ps. 72:13). U ta fii da sëmbë, nöö u ta kë du soni u heepi de.

8. Andi da wan u dee fasi fa u sa lei taa u ta fii da dee sëmbë dee u ta peleiki da? Konda wan woto.

⁸ Andi sa heepi u fuu lei taa u ta fii da dee sëmbë dee u ta peleiki da? Wë u musu ta buta useei a de kamian, nöö u libi ku de kumafa u bi o kë u sëmbë libi ku u * (Mat. 7:12). Boo luku fö fasi fa u sa du di soni dë. Di fosu soni, hën da u musu kai pakisei luku fuu ko sabi andi di sëmbë abi fanöudu. U sa taki taa di soni di u ta du te u ta peleiki, dë kuma di soni di wan data ta du te wan sëmbë di siki, ko nëën. Wan bunu data ta luku unfa a sa heepi hiniwan u dee sëmbë dee ta ko nëën. A ta hakisi dee sëmbë soni, nöö a ta haika de bunu te de ta konda dëën unfa de ta fii. Di data aki an ta da dee sëmbë wan deesi wantewante dë, ma a ta tei ten ta luku di sëmbë di ko suku heepi nëën finifini, sö taa a sa dëën di bunu deesi. Wë sö nöö wa musu ta suku u peleiki da hii dee sëmbë dee u ta miti a di wan seei fasi. Ma u musu ta luku unfa soni dë a di libi u hiniwan u de, söseei u musu ta mbei möiti fuu ko fusutan unfa de ta si soni.

9. Andi wa musu ta si kuma u sabi kaa?

⁹ Te i miti wan sëmbë a di peleikiwooko, nöö ja musu si kuma i sabi hii soni u di sëmbë dë kaa. Ja musu si kuma i sabi andi a ta biibi nasö faandi mbei a ta biibi di soni dë (Nöng. 18:13). Ka fii si soni a di lö fasi dë, nöö a bi o möön bunu fii hakisi di sëmbë soni a wan köni fasi fii sa ko sabi di sëmbë möön bunu, söseei fii sa ko sabi andi a ta biibi (Nöng. 20:5). Ee sëmbë u di kamian ka i ta dë guwenti u hakisi wotowan soni di nama ku di föluku sëmbë di de dë, ku di wooko di de ta du, ku dee famii u de, ku dee soni di de sa’ u du, nasö ku di fasi fa de ta si soni, nöö i sa hakisi de dee soni aki. Te u du ën sö, nöö de o piki u soni di o heepi u fuu sa konda da de faandi mbei de abi di bunu buka fanöudu. Te u ko sabi andi de abi fanöudu kaa, nöö woo sa lei de taa u ta fii da de, söseei taa u kë heepi de, kumafa Jesosi bi ta heepi sëmbë.​—Luku 1 Kolenti 9:19-23.

10, 11. Andi da di u tu fasi fa u sa lei taa u ta fii da wotowan, te u luku di soni di sikifi a 2 Kolenti 4:7, 8? Konda wan woto.

¹⁰ Di u tu soni di sa heepi u fuu lei taa u ta fii da dee sëmbë dee u ta peleiki da, hën da u musu pakisei luku unfa di libi u de bi o sa dë. So juu, woo sa fusutan andi ta miti de. U di u da zöndu libisëmbë, mbei hii u tuu ta abi bookohedi (1 Kol. 10:13). U sabi taa di libi taanga seei a di goonliba aki. Ma tökuseei u sa  hoi dou u di Jehovah ta heepi u. (Lesi 2 Kolenti 4:7, 8.) Pakisei dee sëmbë dee an dë mati u Jehovah. A musu u ta taanga da de seei u libi a di goonliba aki. U ta fii da dee sëmbë dë, kumafa Jesosi bi ta fii da de. Di soni dë ta mbei u ta kë konda wan ’bunu buka da de u wan möön bunu soni.’​—Jes. 52:7.

¹¹ Luku di woto u wan baaa de kai Sergey. Ufö Sergey bi ko sabi soni u di tuutuu lei, nöö a bi dë wan sëmbë di bi ta sen gaanfa, söseei a bi lo’ u dë piii sö. A bi ta taanga dëën faa fan ku sëmbë. Bakaten, hën a bigi lei soni u Bëibel. Sergey bi taki taa: „Di mi bi ta lei soni u Bëibel, hën mi bi lei taa wan Keesitu sëmbë musu ta konda soni u di biibi fëën da wotowan. Mi bi ta pakisei taa ma bi o sa du di soni dë wan daka.” Sergey bi ko buta pakisei a dee sëmbë dee an bi jei soni u di tuutuu lei jeti, nöö a bi ko fusutan taa di libi bi musu u taanga da de u di de an sabi soni u Jehovah. A bi taki taa: „Dee njunjun soni dee mi bi ta lei bi ta mbei mi ta dë waiwai seei, söseei de bi ta mbei mi ta dë bööböö. Woto sëmbë seei musu ko sabi dee tuutuu soni di di Bëibel ta lei u tu.” Möön Sergey bi ta fii da sëmbë, möön a bi ta ko abi degihati u peleiki da sëmbë. A bi taki taa: „Mi seei ko foondo di mi ko si taa di konda di mi bi ta konda soni u Bëibel da sëmbë, bi heepi mi u mi ko abi möön degihati. Ma na di dë nöö. Di soni aki bi mbei di biibi u mi ko möön taanga tu.” *

12, 13. Faandi mbei u musu abi pasensi te u ta lei sëmbë soni u Bëibel? Konda wan woto.

¹² Di u dii soni di sa heepi u fuu lei taa u ta fii da dee sëmbë dee u ta peleiki da, hën da u musu ta hoi pasensi da dee sëmbë dee u ta lei soni u Bëibel. Hoi a pakisei taa kandë dee sëmbë dë an bi buta pakisei wan daka a so u dee lei u Bëibel dee u sabi bumbuu. Boiti di dë, so sëmbë lobi dee soni di de ta biibi gaanfa. Kandë de ta si kuma dee soni di de ta biibi ta heepi de u de libi makandi ku dee famii u de, ku dee sëmbë di de ku de dë u di wan föluku, söseei ku dee sëmbë di de ku de  ta libi a di wan kamian. Unfa u sa heepi dee sëmbë dë?

¹³ Pakisei di woto aki: Andi ta pasa te de musu toona mbei wan booki u di a ko booko? A lo’ u pasa taa de ta mbei wan njunjun booki, hii fa sëmbë ta pasa a di awoo wan jeti. Te de kaba mbei di njunjun booki, ufö de ta booko di awoo wan. A di wan seei fasi, u musu heepi dee sëmbë u de ko sabi dee „njunjun” soni di de lei a di Bëibel, söseei u de ko lobi de. Bakaten ufö u sa da de taanga u de an biibi dee „awoo” soni möön. Te u du soni a di lö fasi dë ufö de o kë tooka di fasi fa de ta si soni. A sa tei ten u heepi sëmbë u de tooka soni a de libi.​—Lom. 12:2.

14, 15. Unfa u sa heepi dee sëmbë dee an sabi taa sëmbë sa libi u teego a wan paladëisi a goonliba aki? Konda wan woto.

¹⁴ Ee u ta hoi pasensi da dee sëmbë dee u ta miti a di peleikiwooko, nöö wa o ta dë ku di mëni taa wantewante de musu fusutan dee soni u Bëibel dee u lei de, nasö taa wantewante de musu tei dee soni dee u ta lei de. Ma te u ta fii da de, nöö di soni dë o da u taanga fuu sa heepi de pikipiki u de pakisei fundu u dee soni di di Bëibel ta taki. Pakisei unfa u bi o sa heepi wan sëmbë faa ko biibi taa sëmbë o sa libi u teego a wan paladëisi a goonliba aki. Sömëni sëmbë an sabi soni u di lei aki. Kandë de ta biibi taa te wan sëmbë dëdë, nöö an o sa libi nöiti möön. Nasö kandë de ta biibi taa hii dee bunuhati sëmbë nango a Gadu Köndë. Unfa u sa heepi de?

¹⁵ Wan baaa bi taki unfa a ta heepi sëmbë u de ko biibi taa sëmbë sa libi u teego a goonliba aki. A ta lesi Kenesesi 1:28 da di sëmbë, nöö baka di dë, a ta hakisi di sëmbë ee naasë Gadu bi kë u sëmbë musu libi, söseei un pei libi a bi kë u de musu abi. Gaansë u dee sëmbë ta piki taa: „A kë u de abi wan bunu libi a goonliba aki.” Baka di dë, nöö di baaa ta lesi Jesaaja 55:11, nöö a ta hakisi di sëmbë ee di soni di Gadu bi abi a pakisei ko tooka. Sëmbë lo’ u piki taa nönö an tooka. Di lasiti soni di di baaa ta du, hën da a ta lesi Psalöm 37:10, 11 da di sëmbë, nöö a ta hakisi ën ee unfa di libi o dë da libisëmbë a di ten di ta ko. U di di baaa bi ta wooko ku di Bëibel a sö wan fasi, mbei a bi heepi sömëni sëmbë u de ko fusutan taa Gadu an tooka pakisei, ma a kë u dee sëmbë dee ta libi bunu, libi u teego a di Paladëisi a goonliba aki.

16, 17. Andi da wantu fasi fa u sa lei taa u ta fii da sëmbë, te u pakisei di tëkisi u Nöngö 3:27? Konda wan woto.

¹⁶ Di u fö soni di sa heepi u fuu lei taa u ta fii da dee sëmbë dee u ta peleiki da, hën da u musu luku andi u sa du u lei de taa u ta booko u hedi ku de. Kandë u bi go luku wan sëmbë a wan juu di an bi bunu dëën. Kandë u sa dëën piimisi, u di u bi ko a sö wan juu, nöö u piki ën taa woo ko nëën wan woto pasi, a wan juu di bunu dëën. Andi u sa du ee di sëmbë abi heepi fanöudu? Nasö andi u sa du ee u miti wan sëmbë di bi o kë u sëmbë heepi ën ku wan  soni, ma an sa kumutu nëën pisi u di a ko gaandi kaa, nasö u di a dë ku suwaki? Te a dë sö, nöö kandë u sa heepi di sëmbë ku di soni di a abi fanöudu.​—Lesi Nöngö 3:27.

¹⁷ Soni bi waka bunu da wan sisa u di a ta heepi sëmbë a dee lö fasi dë. U di a bi ta fii da sëmbë, mbei a bi sikifi wan biifi manda da wanlö sëmbë di wan mii u de bi lasi libi. A bi sikifi wantu Bëibel tëkisi a di biifi tu, u da de kötöhati. Unfa dee sëmbë bi feni di soni dë? Di mama u di mii bi taki taa: „Ma bi ta fii bunu a di jeside seepiseepi. Ja o kë biibi fa di biifi fii heepi u tjika. Ma a’ wöutu tjika u da i tangi u di kötöhati di i da u. Mi si kuma mi lesi di biifi fii möön leki 20 pasi a di jeside. Na piki fii mi bi ta fii bunu te mi bi ta lesi ën. Mi ta da i tangi ku hii mi hati.” U ta si gbelingbelin taa soni sa waka bunu da u te u ta mbei möiti u ko fusutan unfa a ta taanga da dee sëmbë dee ta tja fuka, nöö u du wan soni u heepi de.

18. Andi u musu hoi a pakisei te u ta du di peleikiwooko, nöö faandi mbei u musu hoi di soni dë a pakisei, te u luku di soni di sikifi a 1 Kolenti 3:6, 7?

¹⁸ U kë du soni kumafa Jehovah kë, te u dë a di peleikiwooko. U sa heepi sëmbë u de ko sabi soni u Gadu, ma na u ta du di möön gaan pisi u di wooko. (Lesi 1 Kolenti 3:6, 7.) Jehovah hën ta hai sëmbë ko nëën (Joh. 6:44). Di fa hati u wan sëmbë dë, hën o mbei taa a tei di bunu buka nasö an tei ën (Mat. 13:4-8). Hoi a pakisei taa gaansë sëmbë an bi tei di buka di Jesosi bi konda da de, hii fa sëmbë an dë a goonliba di sa’ u lei sëmbë soni kuma Jesosi! Fëën mbei wa musu lasi hati ee dee sëmbë dee u ta peleiki da an kë haika di bosikopu di u ta tja go da de.

19. Un wini u ta feni te u ta lei taa u ta fii da dee sëmbë dee u ta peleiki da?

¹⁹ Soni o waka bunu te u ta lei taa u ta fii da dee sëmbë dee u ta peleiki da. Woo ko möön lobi di peleikiwooko. Woo ta dë waiwai u di woo dë wan sëmbë di ta da sëmbë soni. Te u ta du sö, nöö woo sa heepi „dee sëmbë dee a kai da u de feni di libi u teego” (Tjab. 13:48). Fëën mbei „ee u feni pasi u du wan sëmbë [wan] bunu nöö u musu du ën wante” (Gal. 6:10). Te u kaba fëën, woo ta wai seei taa u ta du soni di ta tja gafa ko da di Tata fuu di dë a liba ala.​—Mat. 5:16.