1. San na wan fu den moro moi fasi di Yesus abi? Fruklari dati.

WAN fu den moro moi fasi di Yesus abi, na taki a man frustan sortu problema wi leki sondusma abi. Di Yesus ben de na grontapu, a ben „prisiri nanga sma di e prisiri” èn a ben e „krei nanga sma di e krei” (Rom. 12:15). Fu eksempre, di den 70 disipel fu en ben prisiri fu di den ben abi bun bakapisi na ini a preikiwroko, dan Yesus „ben prisiri pasa marki” (Luk. 10:17-21). Ma di a si fa sma ben e sari di Lasarus dede, a ben „soktu dipi èn a ben kon hebi gi en trutru”.​—Yoh. 11:33.

2. San meki taki Yesus ben e firi gi sma?

² San ben meki taki Yesus, di no ben abi sondu, ben man sori sari-ati gi sondusma? Na a fosi presi, Yesus ben lobi sma. Soleki fa wi si na ini na artikel fosi a wan disi, Yesus „ben lobi den libisma srefisrefi” (Odo 8:31). A lobi di a abi gi sma meki taki a ben e pruberi fu frustan bun fa den ben e denki. Na apostel Yohanes taki: „Ensrefi ben sabi fa sma e denki” (Yoh. 2:25). Yesus ben abi sari-ati gi sma. Sma ben man firi taki a ben lobi den èn dati meki den ben e arki en te a ben e preiki fu a Kownukondre. Te wi e leri fu firi gi sma, dan wi o abi moro bun bakapisi na ini a preikiwroko.​—2 Tim. 4:5.

3-4. (a) Efu wi e firi gi sma, dan fa wi o si a preikiwroko? (b) San wi o luku na ini na artikel disi?

³ Na apostel Paulus ben sabi taki a ben musu preiki èn wi sabi taki wi musu du dati tu (1 Kor. 9:16). Ma efu wi e firi gi sma, dan wi no o du a preikiwroko soso fu di wi musu du en. Wi o du en fu di wi e broko wi ede nanga sma èn fu di wi wani yepi den. Wi sabi taki „wan sma sa de moro koloku te a e gi sani, leki te a e kisi sani” (Tori 20:35). Te wi e du  a preikiwroko nanga a denki disi, dan a o gi wi moro prisiri.

⁴ Na ini na artikel disi wi o luku fa wi kan sori taki wi e firi gi den sma di wi e miti na ini a preikiwroko. Wi o luku fosi san wi kan leri fu a fasi fa Yesus ben e si sma. Baka dati wi o taki fu fo fasi fa wi kan teki na eksempre fu en.​—1 Petr. 2:21.

5-6. (a) Gi suma Yesus ben sori sari-ati? (b) Fu san ede Yesus ben e firi gi den sma di a ben preiki gi, soleki fa Yesaya 61:1, 2 taki na fesi?

⁵ Luku wan eksempre fa Yesus sori taki a e firi gi sma. Wan leisi Yesus nanga den disipel fu en ben weri fu di den ben du a preikiwroko sondro fu rostu. Den „no ben abi ten fu nyan” srefi. Dati meki Yesus go na wan presi nanga den disipel wawan fu kan „rostu pikinso”. Ma wan bigi grupu sma lon go na a presi pe Yesus nanga den disipel fu en ben o go èn den doro drape fosi den. Di Yesus doro drape èn a si den sma, san a du? A „ben sari * den, bika den ben de leki skapu di no abi wan skapuman. Dan a bigin leri den furu sani.”​—Mark. 6:30-34.

⁶ Luku fu san ede Yesus ben e sari den sma. Bijbel e taki dati den sma „ben de leki skapu di no abi wan skapuman”. Kande Yesus ben si taki sonwan fu den sma ben pôti èn taki den ben musu wroko bun tranga fu sorgu den osofamiri. Kande a si taki sonwan fu den ben e sari fu di wan lobiwan fu den ben dede. Efu dati ben de so, dan Yesus ben kan frustan fa den ben e firi. Soleki fa wi taki na ini na artikel na fesi, den srefi sani disi ben miti Yesus. Fu di Yesus ben e broko en ede nanga tra sma, meki a ben wani trowstu den.​—Leisi Yesaya 61:1, 2.

7. Fa wi kan teki na eksempre fu Yesus?

 ⁷ San wi e leri fu na eksempre fu Yesus? Neleki na ini a ten fu Yesus, furu sma na ini a ten disi de „leki skapu di no abi wan skapuman”. Den abi furu problema. Ma wi abi san den abi fanowdu, dati na a bun nyunsu fu a Kownukondre (Openb. 14:6). Dati meki wi e teki na eksempre fu Yesus. Wi e preiki a bun nyunsu fu di wi e „firi sari gi den mofina sma èn gi den pôti sma” (Ps. 72:13). Wi e firi gi den sma èn wi wani du wan sani fu yepi den.

8. San na wan fasi fa wi kan sori taki wi e firi gi den sma di wi e miti na ini a preikiwroko? Gi wan eksempre.

⁸ San kan yepi wi fu sori taki wi e firi gi den sma di wi e miti na ini a preikiwroko? Wi wani pruberi fu frustan a situwâsi fu den èn wi musu du gi den san wi ben o wani taki sma du gi wi (Mat. 7:12). * Meki wi luku fo fasi fa wi kan du disi. A fosi sani, na taki wi wani luku san ibri sma abi fanowdu. Te wi e preiki a bun nyunsu, dan wi de leki datra. Wan bun datra e luku san ibri sikisma abi fanowdu. A e poti aksi gi den èn a e arki bun te den sma e fruteri en fa den e firi. A no e gi den dresi wantewante, ma a e ondrosuku sani moro fini fu sabi sortu dresi moro bun gi a sma. Na so a de tu taki te wi de na ini a preikiwroko, dan wi no o taki a srefi sani nanga ala sma. Na presi fu dati, wi o luku san na a situwâsi fu ibri sma èn fa den e denki.

9. San wi no musu du? Tyari disi kon na krin.

⁹ Te yu e miti wan sma na ini a preikiwroko, dan no denki taki yu sabi san na a situwâsi fu en noso taki yu sabi san a e bribi (Odo 18:13). Ma poti aksi fu kon sabi fa a e denki, sondro fu meki a firi wan fasi (Odo 20:5). Efu a fiti na ini a kontren fu yu, dan aksi fa a e go nanga en wroko, nanga en osofamiri, noso aksi fa a e denki. Te wi e meki sma fruteri fa den e denki, dan wi o sabi san den abi fanowdu trutru. Te wi sabi dati, dan wi o man sori taki wi e broko wi ede nanga den èn wi o man gi den a yepi di den abi fanowdu, soleki fa Yesus du dati.​—Luku 1 Korentesma 9:19-23.

10-11. Te wi e luku san 2 Korentesma 4:7, 8 e taki, dan san na wan tra fasi fa wi kan sori taki wi e firi gi sma? Gi wan eksempre.

¹⁰ A di fu tu sani, na taki wi musu pruberi fu frustan a situwâsi fu sma. Furu tron wi kan frustan san e miti den. Wi na sondusma èn wi e kisi den srefi problema di ala sma e kisi (1 Kor. 10:13). Wi sabi taki a libi na ini a grontapu disi hebi. Wi man pasa den problema disi fu di Yehovah  e yepi wi. (Leisi 2 Korentesma 4:7, 8.) Ma prakseri den sma di no sabi Yehovah èn di musu libi na ini na ogri grontapu disi. Neleki Yesus wi e firi gi den èn wi wani tyari „bun nyunsu fu wan moro bun sani” gi den.​—Yes. 52:7.

¹¹ Luku a tori fu wan brada di nen Sergey. Fosi a tron wan Kotoigi a ben e syensyen. A ben muilek gi en fu taki nanga sma. Bakaten a bigin studeri Bijbel. Sergey e taki: „Di mi ben e studeri Bijbel, mi leri taki Kresten abi a frantwortu fu fruteri tra sma san den e bribi. Mi no ben denki srefisrefi taki mi ben o man du dati.” Toku Sergey ben e prakseri den sma di no ben sabi ete san Bijbel e leri trutru èn a ben frustan taki a libi musu fu tranga gi den fu di den no sabi Yehovah. Sergey taki: „Den nyun sani di mi ben e leri ben meki mi de koloku trutru èn den ben gi mi wan korostu firi. Mi ben sabi taki trawan ben musu kon sabi den tru tori disi tu.” Fu di Sergey ben e broko en ede moro nanga sma, meki a ben kon abi moro deki-ati fu preiki gi den. Sergey e taki: „Fu di mi ben fruteri sma san mi leri na ini Bijbel, meki dati yepi mi fu no frede moro fu taki. Noiti mi ben denki taki mi ben o abi a deki-ati disi. Te mi e fruteri tra sma san mi e bribi, dan mi bribi e kon moro tranga.” *

12-13. Fu san ede wi musu abi pasensi nanga den sma di wi e gi leri? Gi wan eksempre.

¹² A di fu dri sani di wi musu du, na taki wi musu abi pasensi nanga den sma di wi e gi leri. Hori na prakseri taki kande noiti den yere fu den Bijbel leri di wi sabi bun. Furu fu den sma di wi e miti lobi a bribi fu den. Kande a prenspari gi den taki den abi a srefi bribi leki den famiri, den sma fu a kulturu fu den, noso den sma na ini a kontren pe den e tan. Fa wi kan yepi den?

¹³ Prakseri na agersitori disi: San e  pasa te wan owru broki no bun moro èn sma musu meki wan nyunwan? Nofo tron sma e tan gebroiki na owru broki teleki a nyunwan kaba meki. Te a nyun broki kaba, dan fosi den o broko na owruwan. Na so a de tu taki efu wi wani taki sma gowe libi a bribi fu den di den lobi so te, dan wi musu yepi den fosi fu kon sabi den tru leri fu Bijbel èn fu lobi den. Soso te wi e du dati, den kan de klariklari fu gowe libi a bribi fu den. Son leisi a e teki ten fu yepi sma fu tyari den kenki disi kon.​—Rom. 12:2.

14-15. Fa wi kan yepi sma fu frustan a howpu di wi abi fu libi fu têgo na ini a paradijs na grontapu? Gi wan eksempre.

¹⁴ Efu wi abi pasensi nanga den sma na ini a preikiwroko, dan wi no o fruwakti taki wantewante den e frustan noso bribi den sani di wi e leri den fu Bijbel. Na presi fu dati, te wi e firi gi den, dan wi o teki wi ten fu yepi den fu frustan den sani di Bijbel e taki. Fu eksempre, fa wi kan yepi wan sma fu frustan a howpu di wi abi fu libi fu têgo na ini a paradijs na grontapu? Furu sma no sabi furu fu a leri disi, noso den no sabi en srefisrefi. Kande den e bribi taki te wan sma dede, a no o man libi baka. Noso kande den e denki taki ala bun sma e go na hemel. Fa wi kan yepi den?

¹⁵ Luku fa wan brada e yepi sma fu frustan a leri disi. A fosi sani di a e du, na taki a e leisi Genesis 1:28. Baka dati a e aksi a sma pe Gado ben wani taki libisma musu tan èn fa a libi ben musu de. Furu sma e piki: „Na grontapu, èn a ben wani taki den ben musu abi wan bun libi.” Baka dati a brada e leisi Yesaya 55:11, dan a e aksi den efu Gado kenki prakseri. Furu tron a sma e piki „nôno”. Te fu kaba a brada e leisi Psalm 37:10, 11 èn a e aksi a sma fa a libi o de gi sma na ini a ten di e kon. Fu di a brada gebroiki Bijbel na a fasi disi, meki a ben man yepi furu sma fu frustan taki Gado wani ete taki bun sma musu libi fu têgo na ini wan paradijs na grontapu.

16-17. Te wi e hori na prakseri san Odo 3:27 e taki, dan san na wan tu fasi fa wi kan sori sma taki wi e broko wi ede nanga den? Gi wan eksempre.

¹⁶ A di fu fo sani di wi musu du, na taki wi musu luku fa wi kan sori sma taki wi e broko wi ede nanga den. Efu wi go na wan sma na wan ten di no bun gi en, dan wi kan aksi en pardon èn wi kan aksi en efu wi kan kon baka na wan moro bun ten. San wi kan du te wi miti wan sma di abi yepi fanowdu nanga wan pikin wroko na oso? Noso san wi kan du efu wan sma musu go du wan boskopu, ma a no man komoto na oso fu di a siki noso fu di a owru? Na den sortu okasi dati, wi kan aksi a sma efu wi kan yepi en.​—Leisi Odo 3:27.

 ¹⁷ Wan sisa ben abi bun bakapisi di a du wan bun sani gi wan sma. A sisa ben denki taki a sani di a du, no ben de so wan bigi sani. A ben sari di a yere taki wan beibi dede a srefi dei di a gebore. Dati meki a skrifi wan brifi gi na osofamiri fu trowstu den nanga wan tu Bijbeltekst. Fa a famiri ben feni en? A mama skrifi: „Esde mi no ben firi bun srefisrefi. Yu no sabi fa a brifi fu yu trowstu wi. Mi breiti srefisrefi nanga a brifi fu yu. Mi denki taki mi leisi en moro leki 20 leisi esde. Mi no ben fruwakti taki wan sma ben o broko en ede so nanga mi èn taki a ben o skrifi wan brifi gi mi di trowstu mi. Nanga mi heri ati mi wani taki yu tangi.” Wi kan de seiker taki wi o abi bun bakapisi te wi e pruberi fu frustan a situwâsi fu den sma di e pina èn te wi e du wan sani fu yepi den.

18. Te wi e luku san 1 Korentesma 3:6, 7 e taki, dan san wi musu hori na prakseri èn fu san ede?

¹⁸ A no de fu taki dati te wi e du a preikiwroko, wi no musu fruwakti taki ala sma o arki a boskopu fu wi. Wi kan du ala san wi man fu yepi sma fu kon sabi Gado, ma wi musu hori na prakseri taki na Yehovah e du a moro prenspari sani. (Leisi 1 Korentesma 3:6, 7.) Na en e hari sma kon na en (Yoh. 6:44). Èn te fu kaba, na a sma srefi musu bosroiti efu a o gi yesi na a bun nyunsu (Mat. 13:4-8). Hori na prakseri taki furu sma no ben arki Yesus èn en ben de a moro bun Leriman di ben de na grontapu! Sobun, wi no musu lasi-ati te furu sma di wi wani yepi no e arki a boskopu fu wi.

19. Sortu wini a e tyari kon te wi e sori taki wi e firi gi den sma di wi e miti na ini a preikiwroko?

¹⁹ A e tyari furu wini kon te wi e sori taki wi e firi gi den sma di wi e miti na ini a preikiwroko. A preikiwroko o gi wi moro prisiri. Wi o de koloku fu di wi e gi wi ten fu yepi sma. Èn wi e meki en makriki gi den sma di „abi a yoisti denki fu man kisi têgo libi”, fu gi yesi na a bun nyunsu (Tori 13:48). Sobun, „solanga wi abi na okasi, meki wi du bun gi ala sma” (Gal. 6:10). Te wi e du dati, dan wi o prisiri fu di wi e meki wi hemel Tata kisi glori.​—Mat. 5:16.